Ŋutifafa Axɔ Aƒe Hena Ƒe Akpe Ðeka—Anɔ Anyi Tegbee!

 1. Nu dodzidzɔname kawoe “ameha gã” la le mɔ kpɔm na?

ÐE NÀTE ŋu akpɔ nu nyui siwo katã dziɖula dzɔdzɔe veveseɖeamenula aɖe ƒe dziɖuɖu si si ŋusẽ le la ate ŋu awɔ na eteviwo le ƒe akpe ɖeka me la le susu mea? Nu dodzidzɔnamewo le “ameha gã” si xexlẽme meli na o, si atsi agbe le “xaxa gã,” si me woatsrɔ̃ fifi nuɖoanyi vɔ̃ɖia le keŋkeŋ me, la lalam.—Nyaɖ. 7:9, 14.

 2. Nu kawo mee amegbetɔwo to le ƒe 6,000 siwo va yi me?

² Le ƒe 6,000 siwo va yi la katã me la, amegbetɔwo dze agbagba be yewoakplɔ yewo ɖokuiwo eye esia he fukpekpe kple vevesese geɖe vɛ na ameƒomea. Biblia gblɔ gbe aɖe gbe ke be: “Amegbetɔ ɖua fia ɖe ame bubuwo dzi hena woƒe dzɔgbevɔ̃e.” (Nyagb. 8:9) Nu ka teƒe kpɔm míele egbea? To vovo na aʋawɔwɔwo kple aglãdzedze ɖe dziɖuɖuwo ŋu la, ahedada, dɔléame, anyigbadzinuwo dome gbegblẽ, yame ƒe nɔnɔme ƒe tɔtrɔ kple kuxi bubu geɖewo ɖe kpe na ameƒomea. Dziɖuɖumegãwo xlɔ̃ nu be, ne míetrɔ míaƒe agbenɔnɔ hedzudzɔ anyigbadzinuwo dome gbegblẽ o la, emetsonua adzi ŋɔ ŋutɔ.

 3. Nu kawoe adzɔ le Ƒe Akpe Ðeka Dziɖuɖua me?

³ Le Mesia Fia Yesu Kristo kple eƒe hatidziɖula 144,000 la ƒe dziɖuɖu te la, Mawu Fiaɖuƒea akpɔ egbɔ be woɖɔ nu siwo katã wogblẽ le amegbetɔwo kple woƒe aƒe si nye anyigba la ŋu la ɖo vivivi. Le Ƒe Akpe Ðeka Dziɖuɖua me la, woana Yehowa Mawu ƒe ŋugbedodo fakɔname sia nava eme be: “Mawɔ dziƒo yeye kple anyigba yeye, eye womagaɖo ŋku tsãtɔwo dzi, alo woava ame ƒe ta me o.” (Yes. 65:17) Nudzɔdzɔ wɔnuku siwo womekpɔ kpɔ o kawoe adzɔ le etsɔme? Nyagblɔɖi siwo le Mawu ƒe Nya la me ate ŋu akpe ɖe mía ŋu míase nudzɔdzɔ wɔnuku siawo gɔme, togbɔ be wonye nu siwo ‘womekpɔ’ haɖe o gɔ̃ hã.—2 Kor. 4:18.

 4. Kuxi kae le fu ɖem na ame geɖe egbea ku ɖe afi si woanɔ ŋu?

⁴ Ame kae madi be aƒe, si nye teƒe si ye kple yeƒe ƒomea yewoanɔ dedie le la, nanɔ ye ŋutɔ si o? Gake le xexea me egbea la, aƒe nyui manɔamesi nye kuxi gã aɖe. Amewo tigi wo ɖokuiwo ɖe dugã siwo me amewo sɔ gbɔ ɖo la me. Le ame geɖe gome la, ele na wo be woanɔ xɔ xoxo ƒoɖiwo me le nuto madeamedziwo me. Womeku drɔ̃e kpɔ gbeɖe be aƒe ava nɔ yewo ŋutɔwo si o.

5, 6. (a) Aleke Yesaya 65:21 kple Mixa 4:4 me nyawo ava eme? (b) Nu kae wòle be míawɔ be yayra ma nasu mía si?

⁵ Le Fiaɖuƒea ƒe dziɖuɖu te la, ame sia ame ƒe didi, si nye be aƒe nanɔ ye ŋutɔ si la, ava eme nɛ, elabena Yesaya gblɔ ɖi be: “Woatu xɔ anɔ eme, eye woade waingble aɖu eme kutsetse.” (Yes. 65:21) Ke hã menye didi be aƒe nanɔ yewo ŋutɔwo si ɖeɖe koe nye nu si wole mɔ kpɔm na o. Elabena ame aɖewo le woawo ŋutɔwo ƒe aƒewo me egbea, eye ame ʋɛ aɖewo gɔ̃ hã le aƒe gã nyadriwo me. Gake wotsia dzimaɖi ɣesiaɣi be ganyawo ƒe tɔtrɔ kpata ate ŋu ana yewoabu yewoƒe aƒea, alo be fiafiwo—alo ame siwo vɔ̃ɖi wu kura—ate ŋu ava dze yewo dzi. Aleke nu sia nu ato vovo le Fiaɖuƒedziɖuɖua tee nye esi! Nyagblɔɖila Mixa ŋlɔ ɖi be: “Wo dome ame sia ame abɔbɔ nɔ anyi ɖe eƒe wainka kple eƒe gboti te bɔkɔɔ, [‘eye ame aɖeke mado voɖi na wo o,’ NW].”—Mixa 4:4.

⁶ Ne míedi be míanɔ Fiaɖuƒedziɖuɖua te la, nu kae wòle be míawɔ? Le nyateƒe me la, mí katã míedi be míanɔ aƒe nyui aɖe me. Ke hã mehiã be míatsɔ mía ɖokuiwo ade fe me be míatu aƒe nyui si le mía dzrom la fifia o. Ke boŋ nunya anɔ eme be míanɔ agbe le mɔ si aɖee afia be míetsɔ míaƒe susu ɖo Yehowa ƒe ŋugbedodoa dzi la nu. Ðo ŋku nya si Yesu gblɔ tso eɖokui ŋu la dzi; egblɔ be: “Do le abeiwo si, eye atɔ le dziƒoxewo si, gake teƒe aɖeke mele Amegbetɔvi la ya si wòatsɔ ta aziɔ ɖo o.” (Luka 9:58) Ŋutete kple ŋusẽ nɔ Yesu si wòatso aƒe nyuitɔ kekeake si ame aɖeke mate ŋu atso o la hafi. Nu ka tae mewɔ esia o? Edze ƒãa be Yesu di be yeaƒo asa na susuhenuwo kple nu sia nu si axe mɔ na ye be yeagatsɔ Fiaɖuƒea aɖo nɔƒe gbãtɔ o la. Ðe míate ŋu asrɔ̃ eƒe kpɔɖeŋua ahana míaƒe ŋku nanɔ nu ɖeka ŋu, ne míavo tso ŋutilãmenudidi ƒe mɔ̃ kple dzimaɖitsitsiwo si mea?—Mat. 6:33, 34.

 7. Se kae Yehowa de ku ɖe ƒomedodo si anɔ lãwo kple amegbetɔwo dome la ŋu?

⁷ Esi Yehowa nɔ nuwo wɔm la, amegbetɔwoe nye nu mamlɛtɔ siwo wòwɔ, eye woawoe nye anyigbadzinuwɔwɔ siwo ƒo bubu ɖe sia ɖe ta. Yehowa gblɔ susu si koŋ tae wòwɔ amegbetɔwo ɖo la na eƒe Dɔnunɔla si nye eƒe Ŋgɔgbevi la ale: “[Na] míawɔ ame ɖe míaƒe nɔnɔme, wòaɖi mí, eye wòaɖu ƒumelãwo, dziƒoxe dzodzoewo, aƒemelãwo kple gbemelãwo katã kpakple lã, siwo katã tana le anyigba dzi la dzi!” (1 Mose 1:26) Eya ta Mawu de se na Adam kple Xawa be woaɖu nuwɔwɔ siwo nye lãwo la dzi, eye sedede sia yi na amegbetɔwo katã.

 8. Nɔnɔme kae lãwo ɖena fiana egbea?

⁸ Ðe wòanya wɔ vavã be amegbetɔwo naɖu lãwo katã dzi eye woa kpli wo woanɔ ŋutifafa mea? Ame geɖewo lɔ̃a woƒe aƒemelãwo, abe avuwo kple dadiwo ene, ale gbegbe. Ke lã wɔadãwo ya ɖe? Nyatakaka aɖe gblɔ be: “Dzɔdzɔmeŋutinunyala siwo nɔ anyi kple lã wɔadãwo kplikplikpli eye wosrɔ̃ nu tso wo ŋu la va kpɔe be lã siwo naa no wo viwo la katã ɖea seselelãme fiana.” Enye nyateƒe be vɔvɔ̃ ɖoa lãwo eye wowɔa adã ne wodo ŋɔdzi na wo, gake ɖe woate ŋu ase veve ɖe ame nua? Dzɔdzɔmeŋutinunyalawo gblɔ be, ne lã siwo naa no wo viwo la le wo viwo nyim la, woɖea tufafa wɔnuku aɖe fiana.

 9. Aleke lãwo ƒe nuwɔna atrɔ le etsɔme?

⁹ Eya ta ne míexlẽe le Biblia me be ŋutifafa ava nɔ amegbetɔwo kple lãwo dome la, mele be wòawɔ nuku na mí o. (Mixlẽ Yesaya 11:6-9; 65:25.) Susu bubu ka tae mele be esia nawɔ nuku na mí o? Ðo ŋku edzi be, esi Noa kple eƒe ƒomea wodo tso aɖakaʋua me le Tsiɖɔɖɔa megbe la, Yehowa gblɔ na wo be: “Vɔvɔ̃ kple ŋɔdzi anɔ mia ŋu ɖaa na anyigba dzi lãwo katã.” Esia nye takpɔkpɔ na anyigba dzi lã geɖewo. (1 Mose 9:2, 3, NW) Ðe Yehowa mate ŋu aɖe vɔvɔ̃ kple ŋɔdzi ma ƒe ɖe ɖa ale be se si wòde le gɔmedzedzea me la nava eme oa? (Hos. 2:20) Dzidzɔɣeyiɣi kae nye esi le ame siwo katã atsi agbe eye woanɔ anyigba dzi ɣemaɣi la lalam!

10. Nu ka tae amegbetɔwo faa avi ɖo?

¹⁰ Esi Salomo kpɔ “ameteteɖeanyi, siwo katã dzɔna le ɣea te la,” efa konyi be: “Kpɔ ɖa, ame siwo wote ɖe anyi la ƒe aɖatsiwo le tsyɔtsyɔm, ke akɔfala aɖeke meli na wo o.” (Nyagb. 4:1) Nenema koe nuwo le egbea, alo wogblẽ ɖe edzi kura gɔ̃ hã. Mía dometɔ kae mefa avi le susu aɖe ta kpɔ o? Nyateƒee, ɣeaɖewoɣi la, míetea ŋu faa dzidzɔvi ya. Gake zi geɖe la, míefaa avi le esi vevesese yɔ míaƒe dzi me ta.

11. Biblia me ŋutinya ka koŋue wɔa dɔ ɖe dziwò vevie?

¹¹ Bu ŋutinya siwo míexlẽna le Biblia me, siwo wɔa dɔ ɖe mía dzi vevie la ŋu kpɔ. Esi Sara ku esime wòxɔ ƒe 127 la, “Abraham va, be wòafa konyi, eye wòafa avi na Sara.” (1 Mose 23:1, 2) Esi Naomi gblɔ na lɔ̃xoayɔvi eveawo be woagbugbɔ ayi wo de la, “wofa avi sesĩe,” eye eyome esi Naomi gaƒo nu na wo yi ŋgɔe la, “wogafa avi sesĩe” wu tsã. (Rut 1:9, 14) Esime Fia Xizkiya dze dɔ vevie eye wòsee be yele kuku ge godoo la, edo gbe ɖa na Mawu eye ‘wòfa avi kple ɣli.’ Yehowa kpɔ eƒe aɖatsiwo eye wòyɔ dɔe. (2 Fia. 20:1-5) Eye nu si dzɔ esime apostolo Petro gbe nu le Yesu gbɔ la wɔa dɔ ɖe mía dometɔ ɖe sia ɖe dzi. Esi Petro se koklo ku atɔ la, “[edo] go yi xexe hefa avi vevie.”—Mat. 26:75.

12. Aleke Fiaɖuƒedziɖuɖua ahe gbɔdzɔe vavã vɛ na ameƒomea?

¹² Esi nu wɔnublanui geɖe dzɔna ɖe amegbetɔwo dzi ta la, wohiã na akɔfafa kple gbɔdzɔe. Nu mae Ƒe Akpe Ðeka Dziɖuɖua ahe vɛ na eteviwo: “[Mawu atutu] aɖatsi sia aɖatsi ɖa le woƒe ŋkume, eye ku maganɔ anyi o, eye konyifafa kple ɣlidodo kple vevesese hã maganɔ anyi o.” (Nyaɖ. 21:4) Ewɔ nuku ŋutɔ be konyifafa, ɣlidodo kple vevesese aɖeke maganɔ anyi o! Nu si gawɔ nuku wue nye be Mawu do ŋugbe be yeaɖe ku ɖa tegbee. Aleke esia ava emee?

13. Ŋusẽ kae ku kpɔ ɖe amegbetɔwo dzi tso esime Adam wɔ nu vɔ̃ ke?

¹³ Ku ɖu fia ɖe ameƒomea dzi tso esime Adam wɔ nu vɔ̃ ke. Enye futɔ aɖe si dzi ame aɖeke mate ŋu aɖu o, eye amegbetɔ aɖeke mate ŋu asi le enu o; ehe vevesese kple konyifafa geɖe vɛ. (Rom. 5:12, 14) Le nyateƒe me la, “le vɔvɔ̃ na ku ta la,” ame miliɔn geɖe “zu kluviwo le woƒe agbenɔɣi katã.”—Heb. 2:15.

14. Nu kae adzɔ ne woɖe ku ɖa?

¹⁴ Biblia ƒo nu tso ɣeyiɣi aɖe si me “woaɖe ku, si nye futɔ mamlɛtɔ, la ɖa” ŋu. (1 Kor. 15:26) Esia ate ŋu aɖe vi na amewo ƒe hatsotso eve. Le “ameha gã” siwo le agbe fifia gome la, anya wɔ be woatsi agbe ayi ɖe xexe yeye si ŋugbe Yehowa do la me, eye woanɔ agbe tegbee. Woafɔ ame biliɔn gbogbo siwo ku la hã ɖe tsitre. Àte ŋu akpɔ ale si gbegbe ame sia ame akpɔ dzidzɔe ne “ameha gã” la me tɔwo le dzaa dom na ame siwo woafɔ ɖe tsitre la le susu mea? Ne míexlẽ ŋutinya siwo le Biblia me, siwo ku ɖe ame siwo wofɔ ɖe tsitre le blema ŋu dometɔ aɖewo la, ana míakpɔ ale si nuwo anɔ ne wova fɔ amewo ɖe tsitre le etsɔme la le susu me.—Mixlẽ Marko 5:38-42; Luka 7:11-17.

15. Aleke nàse le ɖokuiwò me ne èkpɔ wò ame vevi aɖe trɔ gbɔ va agbe me?

¹⁵ De ŋugble tso nyagbɔgblɔ siwo nye “gbɔgblɔ bu ɖe wo le dzidzɔ si gbegbe wokpɔ la ta” kple “wode asi Mawu dodo ɖe dzi me” ŋu kpɔ. Ðewohĩ wò hã àse le ɖokuiwò me nenema ke ne ɖe ènɔ eteƒe esime wofɔ ame mawo ɖe tsitre. Nyateƒee, ne míekpɔ eteƒe míaƒe ame vevi siwo ku la gbɔ agbe le tsitretsitsia me la, míakpɔ dzidzɔ wòagbɔ eme. Yesu gblɔ be: “Gaƒoƒo la gbɔna, esi me ame siwo katã le ŋkuɖodziyɔdowo me la ase eƒe gbe, eye woado go.” (Yoh. 5:28, 29) Mía dometɔ aɖeke mekpɔ nu sia teƒe kpɔ o; kakaɖedzitɔe la, esiae anye ‘nu siwo womekpɔ kpɔ o’ ƒe gãtɔ kekeake si teƒe míava kpɔ.

16. (a) Nu ka tae wòle be míaƒo nu tso yayra siwo míava kpɔ la ŋu dzonɔamemetɔe? (b) Nya kae Paulo gblɔ tsɔ de dzi ƒo na Kristotɔ siwo nɔ Korinto?

¹⁶ Vavãe, etsɔme wɔnuku aɖee le ame siwo yia edzi wɔa nuteƒe na Yehowa le ɣeyiɣi sesẽ siawo me la lalam! Togbɔ be míekpɔ etsɔmeyayra siawo haɖe o hã la, ne míena míaƒe susuwo le wo dzi la, akpe ɖe mía ŋu míatsɔ míaƒe susu katã aɖo nu si le vevie ŋutɔŋutɔ la ŋu eye ana míaƒo asa na fifi nuɖoanyia ƒe susuhenu siwo nu ayi kpuie la. (Luka 21:34; 1 Tim. 6:17-19) Mina míaƒo nu tso míaƒe mɔkpɔkpɔ wɔnuku sia kple etsɔmenudzɔdzɔ siawo ŋu kple dzo le ƒomenusrɔ̃ɣiwo kple ƒometadeaguɣiwo, le dzeɖoɖo kple mía nɔviwo me kple ne míele nu me dzrom kple Biblia nusrɔ̃viwo kpakple ɖetsɔlemetɔwo. Esia akpe ɖe mía ŋu míaƒe mɔkpɔkpɔa nanɔ susu kple dzi me na mí ɣesiaɣi. Nu sia tututue apostolo Paulo wɔ esime wòde dzi ƒo na ehati Kristotɔwo. Eƒe nyawo na wokpɔ nu siwo adzɔ le Kristo ƒe Ƒe Akpe Ðeka Dziɖuɖua ƒe nuwuwu la le susu me. Dze agbagba nàde ŋugble le Paulo ƒe nya siwo dze le 1 Korintotɔwo 15:24, 25, 28 la ŋu nàkpɔ.—Mixlẽe.

17, 18. (a) Le amegbetɔwo ƒe ŋutinya ƒe gɔmedzedze la, mɔ ka nue Yehowa nye “nuwo katã na ame sia ame” le? (b) Nu kae Yesu awɔ be wòagbugbɔ aɖo ŋutifafa kple ɖekawɔwɔ si bu la anyi?

¹⁷ Nyagbɔgblɔ aɖeke meli woatsɔ aɖɔ nuwo katã ta ƒoƒo keŋkeŋ wòasɔ nyuie wu esia, be “Mawu nanye nuwo katã na ame sia ame,” o. Nu kae nya sia fia? Na wò susu natrɔ yi ɖe Eden bɔa me esime amegbetɔ deblibo Adam kple Xawa nye Yehowa ƒe ƒome si me ŋutifafa kple ɖekawɔwɔ nɔ la me tɔwo nàkpɔ. Ɣemaɣi la, Yehowa, Xexea Me Katã ƒe Dziɖulagã la, ɖua eƒe nuwɔwɔwo katã, siwo nye mawudɔlawo kple amegbetɔwo siaa, dzi tẽe. Wotea ŋu ƒoa nu kplii tẽe, wodea ta agu nɛ, eye wòyraa wo. Yehowa nye “nuwo katã na ame sia ame.”

¹⁸ Ƒomedodo kplikplikpli ma me gblẽ tso esime Satana ble amegbetɔwo wogbe Yehowa ƒe dziɖuɖu. Gake tso keke ƒe 1914 me ke la, Mesia Fiaɖuƒea le afɔ vovovowo ɖem be yeagbugbɔ aɖo ŋutifafa kple ɖekawɔwɔ ma anyi. (Ef. 1:9, 10) Le Ƒe Akpe Ðeka Dziɖuɖua me la, nu wɔnuku siwo ‘míekpɔna’ egbea o la ava eme míakpɔ ŋutɔŋutɔ. Eyome “nuwuwu” la, si fia Kristo ƒe Ƒe Akpe Ðeka Dziɖuɖua ƒe nuwuwu, ava. Nu kae adzɔ ɣemaɣi? Togbɔ be wotsɔ ‘ŋusẽ katã si le dziƒo kple anyigba dzi’ la na Yesu hã la, menye nɔƒe gã dila o. Didi aɖeke mele eme be yeaxɔ ɖoƒe si le Yehowa si la o. “[Atsɔ] fiaɖuƒe la ade asi na Mawu, si nye Fofoa” ɖokuibɔbɔtɔe. Awɔ eƒe ɖoƒe kple ŋusẽ tɔxɛ si wonae la ŋu dɔ ‘hena Mawu ƒe kafukafu.’—Mat. 28:18; Flp. 2:9-11.

19, 20. (a) Aleke Fiaɖuƒea teviwo katã aɖee afia nenye be wolɔ̃ ɖe Yehowa ƒe dziɖuɖu dzi? (b) Mɔnukpɔkpɔ wɔnuku kae le mía lalam?

¹⁹ Kaka ɣemaɣi naɖo la, woana Fiaɖuƒea tevi siwo le anyigba dzi la nade blibo. Woasrɔ̃ Yesu ƒe kpɔɖeŋua eye woalɔ̃ ɖe Yehowa ƒe dziɖuɖu dzi ɖokuibɔbɔtɔe. Woana mɔnukpɔkpɔ wo be woawɔ esia ne wowɔ nuteƒe le dodokpɔ mamlɛa me. (Nyaɖ. 20:7-10) Esia megbe la, woaɖe tsitretsiɖeŋulawo katã ɖa tegbee, woɖanye amegbetɔwo alo gbɔgbɔmenuwɔwɔwo o. Dzidzɔ kple aseyetsoɣi ka gbegbee esia anye! Yehowa ƒe ƒomea me tɔwo katã, siwo le dziƒo kple anyigba dzi la, akafui kple dzidzɔ. Eye Yehowa anye “nuwo katã na ame sia ame.”—Mixlẽ Psalmo 99:1-3.

²⁰ Ðe nu wɔnuku siwo Fiaɖuƒea awɔ kpuie la aʋã wò be nàtsɔ wò tamesusu katã aɖo Mawu ƒe lɔlɔ̃nu wɔwɔ ŋu eye nàwɔe kple wò ŋutete katã? Ðe nàte ŋu aƒo asa na yeaɖi mɔkpɔkpɔ kple akɔfafa si Satana ƒe xexea nana la? Ðe nàdo ŋusẽ tame si nèɖo kplikpaa be yeanɔ Yehowa ƒe dziɖuɖu ƒe akpa dzi sesĩe la? Na wò nuwɔnawo naɖee afia be èdi be yeawɔe alea yi ɖe mavɔmavɔ me. Ekema àkpɔ ŋutifafa kple nudzedziname, menye hena ƒe akpe ɖeka ko o, ke yi ɖe mavɔmavɔ me!