Ta Blaeve Vɔ Adelia

“Miatso Aseye Ðaa le Nusi Mawɔ la Ŋuti”

Yesaya 65:1-25

 1. Nya siwo naa kakaɖedzi ame kae apostolo Petro ŋlɔ ɖi, eye biabia kawoe fɔ ɖe te?

ÐE NUMADZƆMADZƆWƆWƆ kple fukpekpe nu ava yi gbaɖegbea? Ƒe 1,900 kple edzivɔe enye sia va yi la, apostolo Petro ŋlɔ kakaɖedzinya siawo be: “Míele dziƒo yeye kple anyigba yeye, siwo me dzɔdzɔenyenye anɔ la, lalam le [Mawu ƒe] ŋugbedodo la nu.” (Petro II, 3:13) Petro kple mawusubɔla wɔnuteƒe bubu geɖe siwo nɔ anyi le ƒe alafaawo me kpɔ mɔ na ŋkeke nyui ma si dzi numadzɔmadzɔwɔwɔ, ameteteɖeanyi, kple ŋutasesẽ nu ayi eye dzɔdzɔenyenye axɔ aƒe ɖi la. Ðe míate ŋu aka ɖe edzi be ŋugbedodo sia ava emea?

 2. Nyagblɔɖila kae ƒo nu tso “dziƒo yeye kple anyigba yeye” ŋu, eye aleke blema nyagblɔɖi ma va emee?

² Ẽ, míate ŋui! Menye susu yeyee Petro nɔ dodom ɖa esi wòƒo nu tso “dziƒo yeye kple anyigba yeye” ŋu o. Anɔ ƒe 800 do ŋgɔ la, Yehowa to nyagblɔɖila Yesaya dzi gblɔ nya mawo tɔgbe. Ŋugbedodo gbãtɔ ma va eme le mɔ sue aɖe nu le ƒe 537 D.M.Ŋ. me esime woɖe Yudatɔwo tso Babilon ƒe kluvinyenye me, si na be wote ŋu trɔ yi wo denyigba dzi. Gake Yesaya ƒe nyagblɔɖia le eme vam le mɔ wɔnuku aɖe nu egbea, eye míele mɔ kpɔm na emevava si agado dzidzɔ na ame wu le Mawu ƒe xexe yeye si gbɔna me. Le nyateƒe me la, nya dodzidzɔname si wogblɔ ɖi to Yesaya dzi na míekpɔa yayra siwo Mawu dzra ɖo ɖi na amesiwo lɔ̃a eyama la le susu me.

Yehowa Ƒo Koko na “Dukɔ Sẽto” Aɖe

 3. Nya ka ŋue woɖo na mí le Yesaya ta 65 lia?

³ Ðo ŋku edzi be Yesaya ƒe nyagblɔɖi me gbedodoɖa ɖe Yudatɔ aboyome siwo nɔ Babilon ta la dze le Yesaya 63:15–64:11. Yesaya ƒe nyawo ɖee fia be Yudatɔ geɖe menɔ Yehowa subɔm tso luʋɔ blibo me o, gake wo dometɔ aɖewo trɔ dzime hetrɔ va egbɔ. Ðe Yehowa agbugbɔ nuwo aɖɔ ɖo le dukɔa me azɔ le ame susɔe mawo siwo trɔ dzime la taa? Míakpɔ ŋuɖoɖoa le Yesaya ta 65 lia. Gake hafi Yehowa nado ɖeɖekpɔkpɔ ŋugbe na nuteƒewɔla siwo susɔ la, eƒo nu tso ʋɔnudɔdrɔ̃ si le ame geɖe siwo si xɔse mele o lalam la ŋu.

 4. (a) Amekawoe manɔ abe Yehowa ƒe dukɔ dzeaglã la ene o eye woadi Yehowa? (b) Aleke apostolo Paulo zã Yesaya 65:1, 2 me nyawoe?

⁴ Yehowa do dzi le eƒe dukɔa ƒe aglãdzedze atraɖii tsɔtsɔ me. Gake ɣeyiɣi aɖe ava esime wòagblẽ wo ɖi ɖe woƒe futɔwo si me ahaxɔ ame bubuwo, amesiwo dzi eƒe ŋudzedzekpɔkpɔ anɔ, tufafatɔe. Yehowa to Yesaya dzi gblɔ be: “Mele nyanya na amesiwo media nye mɔ o, eye mele kpɔkpɔ na amesiwo mediam o; megblɔ na dukɔ, si meyɔa nye ŋkɔ o la be: Nyee nye esi, nyee nye esi!” (Yesaya 65:1) Ewɔ nublanui le Yehowa ƒe dukɔ si wòbla nu kplii la gome be dukɔwo me tɔwo ava Yehowa gbɔ gake Yuda-dukɔa si sẽ to la ya nagbe egbɔ yiyi. Menye Yesaya koe nye nyagblɔɖila si gblɔe ɖi be Mawu ava tia dukɔ aɖe si womenya tsã o mlɔeba o. (Hosea 2:1; 2:25) Apostolo Paulo yɔ nya tso Yesaya 65:1, 2 le Septuagint Biblia gɔmeɖeɖe me tsɔ ɖee fia be dukɔwo me tɔwo awɔ ‘nu dzɔdzɔe si tso xɔse me’ togbɔ be dzɔdzɔme Yudatɔwo ya agbe nusia wɔwɔ hã.—Romatɔwo 9:30; 10:20, 21.

5, 6. (a) Didi vevie kae Yehowa ɖe fia, gake aleke eƒe dukɔ la wɔ nui? (b) Nukae míate ŋu asrɔ̃ tso alesi Yehowa wɔ nu ɖe Yuda ŋu me?

⁵ Yehowa ɖe nusita wòaɖe mɔ dzɔgbevɔ̃e nava eya ŋutɔ ƒe dukɔ dzi la me be: “Meke nye abɔ me ŋkeke blibo la ɖo ɖe dukɔ sẽto, si le mɔ baɖa dzi hedze eya ŋutɔ ƒe susuwo yome la.” (Yesaya 65:2) Be woake abɔ me fia amekpekpe alo kokoƒoƒoname. Yehowa ke eƒe abɔ me, menye ɣeyiɣi kpui aɖe ko o, ke ŋkeke bliboa katã. Eƒe dzimedidie nye be Yuda natrɔ va ye gbɔ. Ke hã dukɔ sẽto sia gbe vava.

⁶ Nu dodzidzɔname kae nye si míesrɔ̃ tso Yehowa ƒe nyawo me! Edi be míate ɖe ye ŋu elabena Mawu si ŋu wote ŋu tena ɖoe wònye. (Yakobo 4:8) Nya siawo fia mí hã be Yehowa bɔbɔa eɖokui. (Psalmo 113:5, 6) Eyi edzi ke eƒe abɔ le kpɔɖeŋumɔ nu hele koko ƒom na eƒe dukɔa be woatrɔ va ye gbɔ togbɔ be woƒe tosesẽa ‘vee’ hã. (Psalmo 78:40, 41) Esi wòƒo koko na wo ƒe alafa geɖe megbe hafi wògblẽ wo ɖe woƒe futɔwo si me mlɔeba. Ɣemaɣi gɔ̃ hã la, megbe wo dometɔ siwo nye ɖokuibɔbɔlawo o.

7, 8. Mɔ kawo nue Yehowa ƒe dukɔ sẽto la do dziku nɛ le?

⁷ Yudatɔ tosẽlawo tsɔ woƒe ŋukpenanuwɔnawo do dziku na Yehowa enuenu. Yehowa ƒo nu tso woƒe nuwɔna dodzikunameawo ŋu be: “Amesiwo le dziku dom nam le ŋkunye me ɖaa, wosaa vɔ le abɔwo me, eye wodoa dzudzɔ le anyikpewo dzi; amesiwo bɔbɔ nɔa yɔdowo me, eye wotsia teƒe ɣaɣlɛwo dɔna, amesiwo ɖua halã, eye detsi nyɔŋu le woƒe kutuwo me; amesiwo le gbɔgblɔm be: Nɔ adzɔge, megaka asi ŋunye o, mava wɔ wò kɔkɔe la, amesiawoe nye dzudzɔ le nye ŋɔti me kple dzo, si abi nu ŋkeke blibo la.” (Yesaya 65:3-5) Amesiawo siwo wɔa nu abe mawuvɔ̃lawoe wonye ene la le dziku dom na Yehowa ‘le eya ŋutɔ ƒe ŋkume tututu’—nyagbɔgblɔ sia ate ŋu afia amemabumabu kple mawumavɔ̃mavɔ̃. Womedzea agbagba aɖeke be yewoaɣla yewoƒe ŋunyɔnuwɔwɔawo o. Ðe menye nusi dze tohehe wònye, vevietɔ be woanɔ nuvɔ̃ wɔwɔ dzi le Amesi ŋu wòle be woade bubui ahaɖo toe la ŋkume tututu oa?

⁸ Nuvɔ̃wɔla siawo siwo bua wo ɖokui ame dzɔdzɔewoe la to woƒe nuwɔna me le gbɔgblɔm na Yudatɔ bubuwo be: ‘Megate ɖe ŋunye o, elabena mele kɔkɔe wu wò.’ Alakpanuwɔwɔ kae nye si! “Mawuvɔ̃la” siawo saa vɔwo hedoa dzudzɔ na alakpamawuwo, si nye nusi ŋu Mawu ƒe Sea tsi tre ɖo. (Mose II, 20:2-6) Wobɔbɔ nɔ yɔdowo me, si na wo ŋu mekɔ o le Sea nu. (Mose IV, 19:14-16) Woɖua halã, si nye nu makɔmakɔ.a (Mose III, 11:7) Ke hã woƒe subɔsubɔ nuwɔnawo na wobu be yewole kɔkɔe wu Yudatɔ bubuwo, eye womedi be ame bubuwo nate ɖe yewo ŋu ale be wo ŋu nagava kɔ, le kpɔɖeŋumɔ nu, alo anɔ dzadzɛ, to hadede kple wo me o. Gake menye nenemae Mawu si biaa ‘ɖokuitsɔtsɔna blibo’ ya bua nuwo ŋui kura o!—Mose V, 4:24.

 9. Aleke Yehowa bu nuvɔ̃wɔla siwo bua wo ɖokui ame dzɔdzɔewoe lae?

⁹ Le esi teƒe be Yehowa nabu amesiawo siwo bua wo ɖokui ame dzɔdzɔewoe be wole kɔkɔe la, egblɔ boŋ be: “Amesiawoe nye dzudzɔ le nye ŋɔti me.” Wozãa Hebrigbe me nya si wozãna na “ŋɔti” la le kpɔɖeŋumɔ nu na dziku. Wozãa dzudzɔ hã wòkuna ɖe Yehowa ƒe dɔmedzoe ŋu. (Mose V, 29:19) Trɔ̃subɔsubɔ nyɔŋu si me Yehowa ƒe dukɔa ge ɖo do dɔmedzoe nɛ helĩhelĩ.

10. Aleke Yehowa aɖo eteƒe na Yudatɔwo ɖe woƒe nuvɔ̃wo tae?

¹⁰ Le dzɔdzɔenyenye nu la, Yehowa mate ŋu aɖe mɔ nuvɔ̃wɔla siawo natsi tomahemahe o. Yesaya ŋlɔ bena: “Kpɔ ɖa, meŋlɔe ɖi ɖe ŋkunye me, nyemazi kpi o, negbe ɖeko maɖo eteƒe hafi, maɖo eteƒe ɖe woƒe akɔ me; Yehowa be: Madzidze miaƒe nuvɔ̃wo ɖe akɔ me na mi gbã, miaƒe vodadawo kple mia fofowo ƒe vodadawo siaa, amesiwo do dzudzɔ le towo dzi, eye woɖe alɔme le ŋunye le togbɛwo dzi.” (Yesaya 65:6, 7) Yudatɔ siawo do vlo Yehowa to gomekpɔkpɔ le alakpasubɔsubɔ me. Wona wòdze abe ɖe vovototo aɖeke mele Mawu vavã la ƒe tadedeagu kple dukɔ siwo ƒo xlã wo tɔ dome o ene. Yehowa aɖo ‘woa ŋutɔwo ƒe vodadawo,’ si me trɔ̃subɔsubɔ kple gbɔgbɔyɔyɔ hã nɔ la teƒe na wo ‘ɖe woa ŋutɔwo ƒe akɔ me.’ Anye be nyagbɔgblɔ “akɔ me” la fia dziwui si nu woŋe va akɔmee wòzu abe kotoku ene si me nudzralawo ate ŋu alɔ nusi dzram wole ƒe ɖe ɖo. (Luka 6:38) Nusi nya siawo fia me kɔ nyuie le Yudatɔ xɔsegbelawo gome—Yehowa adzidze woƒe ‘teƒeɖoɖo,’ alo tohehe na wo wòade pɛpɛpɛ. Dzɔdzɔenyenye Mawu la aɖo eteƒe na wo. (Psalmo 79:12; Yeremya 32:18) Esi Yehowa metrɔna o ta la, míate ŋu aka ɖe edzi be le eƒe ɣeyiɣi nyuitɔ dzi la, adzidze tohehe na nuɖoanyi vɔ̃ɖi sia hã pɛpɛpɛ nenema.—Maleaxi 3:6.

“Le Nye Dɔlawo Ta”

11. Aleke Yehowa ɖee fia be yeakpɔ ame susɔe aɖewo siwo nye nuteƒewɔlawo tae?

¹¹ Ðe Yehowa akpɔ nublanui na nuteƒewɔla siwo le eƒe dukɔa mea? Yesaya ɖe eme be: “Ale Yehowa gblɔ esi: alesi ne wokpɔ tsi le weintsetse me wogblɔna be: Migagblẽe o, elabena yayra le eme la, nenemae mawɔ, eye nyemagblẽ wo katã o, le nye dɔlawo ta; eye mana ƒome nado tso Yakob me, eye nye towo ƒe domenyila natso Yuda me; nye ame tiatiawo anyi edome, eye nye dɔlawo anɔ afima.” (Yesaya 65:8, 9) Esi Yehowa tsɔ eƒe dukɔa nɔ sɔsɔm kple weinkpo la, ezã kpɔɖeŋu aɖe si gɔme woate ŋu ase kaba. Weintsetsewo bɔ ɖe anyigba la dzi, eye wein si wokpɔna tsoa tsetseawo me la nye yayra na ameƒomea. (Psalmo 104:15) Nusi ŋu woƒo nu tsoe la ate ŋu anye weinkpo si ŋu weintsetse nyui aɖewo le, gake menye wo katãe nyo o. Alo ate ŋu afia be weinkpo ɖeka nyo, gake weinkpo bubuawo ya le gbogbo alo wogblẽ. Le nɔnɔme evea siaa me la, weingbledela la magblẽ weintsetse nyuiawo dome o. Yehowa to esia me ka ɖe edzi na eƒe dukɔ la be yematsrɔ̃ dukɔ bliboa gbidigbidi o ke boŋ yeakpɔ ame susɔe aɖewo siwo nye nuteƒewɔlawo ta. Egblɔ be ame susɔe siawo siwo nu wove la anyi yeƒe “towo,” si nye Yerusalem kple Yuda-nyigba, dukɔ si le to dzi si Yehowa gblɔ be enye ye tɔ, la ƒe dome.

12. Yayra kawoe le ame susɔe wɔnuteƒewo lalam?

¹² Yayra kawoe le ame susɔe wɔnuteƒe siawo lalam? Yehowa gblɔ be: “Saron azu alẽwo ƒe gbeɖuƒe, eye Axorbalime la azu nyiwo ƒe akɔtsyɔƒe hena nye dukɔ, si biaa tanye sena la.” (Yesaya 65:10) Lãhawo wɔa akpa vevi aɖe le Yudatɔ geɖe ƒe agbenɔnɔ me, eye gbeɖuƒe gãwo naa nu dzea dzi na wo le ŋutifafaɣiwo. Yehowa he susu yi anyigba la ƒe seƒe eve dzi tsɔ wɔ ŋutifafa kple nudzedziname ƒe kpɔɖeŋui. Saron-gbadzaƒe si le ɣetoɖoƒe, eye wònye teƒe dzeani kple anyigba wɔnu la, le Mediterranea-ƒuta. Axor-bali nye anyigba la ƒe liƒo si le dzieheɣedzeƒekpa dzi la ƒe akpa aɖe. (Yosua 15:7) Le aboyomenɔɣi si ava va me la, nuto siawo azu gbegbe, tsɔ kpe ɖe anyigba la ƒe akpa susɔea ŋu. Gake Yehowa do ŋugbe be le aboyomenɔɣia megbe la, woava zu gbeɖuƒe damawo na ame susɔe siwo atrɔ agbɔ.—Yesaya 35:2; Hosea 2:17.

Ŋuɖoɖo Ðe “Aklama” Ŋu

13, 14. Nuwɔna kawoe ɖee fia be Mawu ƒe dukɔ la gblẽ eyama ɖi, eye le esia ta nukae adzɔ ɖe wo dzi?

¹³ Azɔ Yesaya ƒe nyagblɔɖia gatrɔ ɖe amesiwo gblẽ Yehowa ɖi heyi trɔ̃subɔsubɔ dzi la ŋu. Egblɔ be: “Miawo, . . . miegblẽ Yehowa ɖi, eye mieŋlɔ nye to kɔkɔe la be, mieɖo kplɔ̃ na aklama, eye mieku aha tre banaa na dzɔgbe.” (Yesaya 65:11) Yudatɔ megbedela siawo ƒe nuɖuɖu kple aha kplɔ̃ ɖoɖo na “aklama” kple “dzɔgbe” fia be wole gome kpɔm le trɔ̃subɔdukɔwo ƒe trɔ̃subɔsubɔ nuwɔnawo me.b Nukae adzɔ ɖe amesiame si ɖoa ŋu ɖe mawu siawo ŋu nuŋumabumabutɔe dzi?

¹⁴ Yehowa ƒo nu na wo kaŋ tsɔ xlɔ̃ nu wo be: “Maɖo yi ɖa ɖe mia ŋu, eye mi katã miado dɔgɔ̃e woawu, elabena meyɔ mi, mietɔ o, meƒo nu, miesee o, miewɔ nusi nye vɔ̃ le ŋkunye me, eye mietia nusi medze ŋunye o la.” (Yesaya 65:12) Le Hebrigbe si nye gbe si me woŋlɔ nya siawo ɖo gbã me la, ƒomedodo aɖe le nya si wozã na Dzɔgbemawu, kple dɔwɔnya ‘ɖo ɖa’ dome, eye Yehowa zãe tsɔ gblɔ na amesiwo le ta dem agu na alakpamawu sia be ‘yeaɖo yi ɖa ɖe wo ŋu,’ si fia be yeatsrɔ̃ wo. Yehowa to eƒe nyagblɔɖilawo dzi ƒo nu na amesiawo enuenu be woatrɔ dzime, gake wometsɔ ɖeke le eme nɛ o eye wotsɔ dzimesesẽ ɖoe be yewoawɔ nusi wonya be medzea eŋu o. Aleke gbegbe wogbe bubudede Mawu ŋu enye si! Mawu ƒe nuxlɔ̃amenyawo ava eme, eye afɔku gã aɖe ava dukɔa dzi ne Yehowa ɖe mɔ Babilontɔwo va tsrɔ̃ Yerusalem kple eƒe gbedoxɔa le ƒe 607 D.M.Ŋ. me. Ɣemaɣi la, ‘Aklamamawu’ la makpɔ esubɔla siwo le Yuda kple Yerusalem la ta o.—Kronika II, 36:17.

15. Mɔ ka nue Kristotɔ vavãtɔ siwo li egbea wɔna ɖe nuxlɔ̃amenya si le Yesaya 65:11, 12 dzi le?

¹⁵ Egbea Kristotɔ vavãtɔwo wɔna ɖe nuxlɔ̃ame si le Yesaya 65:11, 12 la dzi. Womexɔ “Aklamamawu” dzi se abe ŋusẽ triakɔ aɖe si vea ame nue wònye ene o. Esi womegblẽa woƒe nunɔamesiwo dome tsɔ dzea agbagba be yewoafa dzi na “Aklamamawu” o ta la, wotsria tsatsadada ƒomevi ɖesiaɖe. Woka ɖe edzi be amesiwo tsɔ wo ɖokui na mawu sia abu nusianu mlɔeba, elabena Yehowa gblɔ na amesiawo be: “Maɖo yi ɖa ɖe mia ŋu.”

“Kpɔ Ða, Nye Dɔlawo Akpɔ Dzidzɔ”

16. Mɔ kawo nue Yehowa ayra esubɔla nuteƒewɔlawo le, gake nukae adzɔ ɖe amesiwo gblẽ eyama ɖi ya dzi?

¹⁶ Esi wonɔ mo kam na amesiwo gblẽ Yehowa ɖi le nyagblɔɖia me la, woƒo nu tso nusi le amesiwo subɔa Mawu le anukwareɖiɖi me lalam kple nusi to vovo si amesiwo wɔa alakpanu le esubɔsubɔ me akpɔ la ŋu be: “Ale Aƒetɔ Yehowa gblɔ esi: Kpɔ ɖa, nye dɔlawo aɖu nu, ke miawo la, dɔ awu mi; kpɔ ɖa, nye dɔlawo ano nu, ke miawo la, tsikɔ awu mi; kpɔ ɖa, nye dɔlawo akpɔ dzidzɔ, ke miawo la, ŋu akpe mi. Kpɔ ɖa, nye dɔlawo atso aseye le dzi ƒe dzidzɔkpɔkpɔ ta, ke miawo la, miado ɣli le dzi ƒe vevesese ta, eye miafa avi le gbɔgbɔ ƒe teteɖeanyi ta.” (Yesaya 65:13, 14) Yehowa ayra esubɔla nuteƒewɔlawo. Woatsɔ dzi si me dzidzɔ yɔ fũ la ado ɣlii. Nuɖuɖu, nunono, kple dzidzɔkpɔkpɔ nye nya siwo fia be Yehowa akpɔ esubɔlawo ƒe nuhiahiãwo gbɔ na wo geɖe ŋutɔ. Gake gbɔgbɔ me dɔ kple tsikɔ awu amesiwo ɖoe be yewoagblẽ Yehowa ɖi ya. Womana woƒe nuhiahiãwo wo o. Woado ɣli afa avi le vevesese kple xaxa si ava wo dzi ta.

17. Nukata wòsɔ be Mawu ƒe amewo natso aseye egbea?

¹⁷ Yehowa ƒe nyawo ɖɔ amesiwo gblɔna ko be yewosubɔa Mawu egbea la ƒe gbɔgbɔmenɔnɔme nyuie. Togbɔ be nu te ɖe ame miliɔn geɖe siwo le Kristodukɔa me ƒe gbɔgbɔ dzi hã la, Yehowa subɔlawo ya le aseye tsom. Eye susu nyuiwo le wo si si ta woatso aseye ɖo. Wonaa nu wo le gbɔgbɔ me woɖuna ɖia ƒo. Yehowa naa gbɔgbɔmenuɖuɖu gbogbo aɖe wo to Biblia-srɔ̃gbalẽwo dzi kple le Kristotɔwo ƒe kpekpewo me. Le nyateƒe me la, Mawu ƒe Nya la me nyateƒe tuameɖowo kple eƒe ŋugbedodo fakɔnamewo naa míaƒe ‘dzi kpɔa dzidzɔ’!

18. Amesiwo gblẽ Yehowa ɖi ƒe nuka koe asusɔ, eye nukae woƒe ŋkɔ tsɔtsɔ do ɖiŋui ate ŋu afia?

¹⁸ Yehowa yi edzi ƒo nu na amesiwo gblẽ eyama ɖi la be: “Miagblẽ miaƒe ŋkɔ ɖi na nye ame tiatiawo woatsɔ ado ɖiŋui be: ‘Alea Yehowa nawu wòe!’ Ke ayɔ ŋkɔ yeye na eƒe dɔlawo ya, ale be amesi ayra eɖokui le anyigba dzi la, atsɔ Mawu nyateƒetɔ la ayra eɖokui, eye amesi atà nu le anyigba dzi la, atà Mawu nyateƒetɔ la, elabena ŋku dzo le gbaɖegbe xaxawo dzi, elabena woɣla ɖe nye ŋkuwo.” (Yesaya 65:15, 16) Amesiwo gblẽ Yehowa ɖi ƒe nusiwo asusɔ koe nye woƒe ŋkɔ, si woazã le atamkaka, alo ɖiŋudodo, ko me. Ate ŋu afia be amesiwo di be yewoaka atam atsɔ abla nu le nya vevi aɖe ŋu agblɔ be: ‘Ne nyemewɔ ɖe ŋugbedodo sia dzi o la, ke tohehe si va xɔsegbela mawo dzi la nava dzinye.’ Ate ŋu anye gɔ̃ hã be woazã woƒe ŋkɔ abe kpɔɖeŋu ene, abe Sodom kple Gomora ene, wòanye Mawu ƒe tohehe na ame vɔ̃ɖiwo ƒe kpɔɖeŋu.

19. Aleke woatsɔ ŋkɔ bubu ayɔ Mawu subɔlawoe, eye nukata woaka ɖe Mawu ƒe anukwaretɔnyenye dzi? (Kpɔ etenuŋɔŋlɔa hã.)

¹⁹ Aleke gbegbe nuwo ato vovo na Mawu ŋutɔ ƒe subɔlawoe nye si! Woatsɔ ŋkɔ bubu ayɔ woe. Ema fia yayra kple bubu ƒe nɔnɔme si me woanɔ ne wotrɔ va wo denyigba dzi. Womadi yayra tso alakpamawu aɖeke gbɔ loo alo aka atam na legba si me agbe mele aɖeke o. Ke Mawu ƒe nuteƒewɔwɔ boŋue woatsɔ ayra wo ɖokui alo atsɔ aka atamee. (Yesaya 65:16, NW ƒe etenuŋɔŋlɔ) Anyigba la dzi tɔwo akpɔ nusita wòle be woaka ɖe Mawu dzi bliboe, elabena woakpɔe be ewɔ eƒe ŋugbedodowo dzi.c Ne Yudatɔwo va ɖo wo denyigba dzi dedie la, madidi hafi woaŋlɔ tsã fukpekpewo be o.

“Mawɔ Dziƒo Yeye Kple Anyigba Yeye”

20. Aleke “dziƒo yeye kple anyigba yeye” ƒe ŋugbe si Yehowa do va eme le ƒe 537 D.M.Ŋ. mee?

²⁰ Azɔ Yehowa gaɖe nu geɖe me le ŋugbe si wòdo be yeana nuwo nagaɖo woƒe nɔnɔ na ame susɔe siwo trɔ dzime la ne wotrɔ gbɔ tso aboyo me le Babilon la ŋu. Yehowa to Yesaya dzi gblɔ be: “Kpɔ ɖa, [mele dziƒo yeye kple anyigba yeye wɔm, “NW”], eye womagaɖo ŋku tsãtɔwo dzi, alo woava ame ƒe ta me o.” (Yesaya 65:17) Kakaɖedzi li be gbugbɔɖoanyiŋugbe si Yehowa do la ava eme, eyata eƒo nu tso gbugbɔɖoanyi ma si ava eme le etsɔme ŋu abe ɖe wòle eme vam xoxo ene. Nyagblɔɖi sia va eme gbã le ƒe 537 D.M.Ŋ. me, esime wona Yudatɔwo ƒe ame susɔeawo gbɔ va Yerusalem. Nukae nye “dziƒo yeye” la ɣemaɣi? Eyae nye Zerubabel ƒe anyigba la dzikpɔkpɔ si me Nunɔlagã Yosua kpe ɖe eŋu le Yerusalem. Yudatɔwo ƒe ame susɔe siwo gbɔ va wo de lae nye “anyigba yeye” la, si nye amesiwo ŋu wokɔ siwo bɔbɔ wo ɖokui ɖe dziɖuɖu sia te eye wona kpekpeɖeŋu wogbugbɔ tadedeagu dzadzɛ ɖo anyi ɖe anyigba la dzi. (Ezra 5:1, 2) Dzidzɔ si gbugbɔɖoanyia he vɛ la de ŋgɔ wu fu siwo katã wokpe va yi; womegaɖo ŋku tsã fukpekpewo dzi gɔ̃ hã o.—Psalmo 126:1, 2.

21. Dziƒo yeye kae va nɔ anyi le ƒe 1914 me?

²¹ Gake ɖo ŋku edzi be Petro gblɔ Yesaya ƒe nyagblɔɖia me nya mawo tɔgbe eye wòɖee fia be etsɔmee wòava eme. Apostoloa ŋlɔ bena: “Míele dziƒo yeye kple anyigba yeye, siwo me dzɔdzɔenyenye anɔ la, lalam le eƒe ŋugbedodo la nu.” (Petro II, 3:13) Le ƒe 1914 me la, woɖo dziƒo yeye si wokpɔ mɔ na ɣeyiɣi didi aɖe. Mesia Fiaɖuƒe si woɖo anyi le ƒe ma me la le dzi ɖum tso dziƒo ŋutɔŋutɔ, eye Yehowa na ŋusẽe ɖe anyigba bliboa katã dzi. (Psalmo 2:6-8) Fiaɖuƒedziɖuɖu sia si le Kristo kple ehati dziɖula 144,000 te lae nye dziƒo yeyea.—Nyaɖeɖefia 14:1.

22. Amekawoe anye anyigba yeye la, eye aleke wole amewo dzram ɖo fifia gɔ̃ hã be woava zu ɖoɖo ma me tɔwo?

²² Ke anyigba yeyea hã ɖe? Abe alesi wònɔ esime nya sia va eme le blema ene la, anyigba yeyea anye amesiwo bɔbɔa wo ɖokui ɖe dziƒodziɖuɖu yeye sia ƒe ŋusẽ te dzidzɔtɔe. Fifia gɔ̃ hã, ame miliɔn geɖe siwo si dzi ƒe nɔnɔme nyui le bɔbɔa wo ɖokui ɖe dziɖuɖu sia te eye wodzea agbagba be yewoawɔ ɖe eƒe se siwo dze le Biblia me la dzi. Amesiawo tso dukɔwo, gbegbɔgblɔwo, kple ameƒomeviwo katã me, eye wowɔa dɔ ɖekae tsɔ subɔa Fia Yesu Kristo si le dzi ɖum lae. (Mixa 4:1-4) Ne fifi nuɖoanyi vɔ̃ɖi sia nu va yi la, ƒuƒoƒo sia azu anyigba yeye si anye xexeame katã ƒe habɔbɔ si me amegbetɔ Mawu vɔ̃la siwo anɔ Mawu Fiaɖuƒea ƒe dziɖuƒe si le anyigba dzi la me tɔwo mlɔeba.—Mateo 25:34.

23. Nya kae míekpɔ le Nyaɖeɖefia ƒe agbalẽa me ku ɖe “dziƒo yeye kple anyigba yeye” ŋu, eye aleke nyagblɔɖi sia ava emee?

²³ Nyaɖeɖefia ƒe agbalẽa ƒo nu tso ŋutega aɖe si apostolo Yohanes kpɔ le Yehowa ƒe ŋkeke si gbɔna ŋu, esime woaɖe nuɖoanyi sia ɖa la ŋuti. Emegbe woade Satana aʋli me. (Nyaɖeɖefia 19:11–20:3) Esi woƒo nu tso nya ma ŋu megbe la, Yohanes ŋlɔ Yesaya ƒe nyagblɔɖinya mawo tɔgbe be: “Mekpɔ dziƒo yeye kple anyigba yeye.” Ŋutikɔkɔe ƒe ŋutega sia ŋuti nuŋlɔɖi ƒe kpukpui siwo kplɔe ɖo ƒo nu tso ɣeyiɣi si me Yehowa Mawu ahe tɔtrɔ gã aɖe ava anyigba dzi be nuwo nanyo wu ŋu. (Nyaɖeɖefia 21:1, 3-5) Edze ƒã be “dziƒo yeye kple anyigba yeye” ƒe ŋugbe si Yehowa do la ava eme le mɔ wɔnuku aɖe nu le Mawu ƒe xexe yeyea me! Anyigba dzi habɔbɔ yeyea anɔ gbɔgbɔ me kple ŋutilã me paradiso siaa me le dziƒo yeyea ƒe dziɖuɖu te. Ŋugbe si wodo be “womagaɖo ŋku tsãtɔwo [dɔléle, fukpekpe, kple xaxa bubu geɖe siwo ɖea fu na ameƒomea] dzi, alo woava ame ƒe ta me o” la faa akɔ na ame ŋutɔ. Nusianu si dzi míaɖo ŋkui ɣemaɣi manye vevesese helĩhelĩ na mí, abe alesi nusiawo te ɖe ame geɖe ƒe dzi dzii fifia ene o.

24. Nukata Yehowa atso aseye ɖe Yerusalem gbugbɔɖoanyi ŋu, eye nukae womagase le dugã ma ƒe ablɔwo dzi o?

²⁴ Yesaya ƒe nyagblɔɖia yi edzi be: “[Mikpɔ dzidzɔ, eye mitso aseye ɖaa le nusi wɔm mele, “NW”] la ŋuti, elabena kpɔ ɖa, mawɔ Yerusalem hena aseyetsotso, eye eƒe dukɔ la hena dzidzɔkpɔkpɔ. Matso aseye ɖe Yerusalem ŋu, eye makpɔ dzidzɔ ɖe nye dukɔ ŋu, eye womagase avifagbe kple konyifagbe le eme azɔ o.” (Yesaya 65:18, 19) Menye Yudatɔwo koe atso aseye ɖe alesi wona wogava le wo denyigba dzi ŋu o ke Mawu ŋutɔ hã atso aseye, elabena aɖo atsyɔ̃ na Yerusalem—agazu tadedeagu vavãtɔ nɔƒe le anyigba dzi. Womagase amewo ƒe avifafa ɖe dzɔgbevɔ̃e ta abe alesi wosee le dugã ma ƒe ablɔwo dzi ƒe bla nanewo do ŋgɔ ene azɔ o.

25, 26. (a) Aleke Yehowa wɔa Yerusalem “hena dzidzɔkpɔkpɔ” le míaƒe ŋkekea mee? (b) Aleke Yehowa azã Yerusalem Yeye lae, eye nukata míate ŋu atso aseye egbea?

²⁵ Egbea hã Yehowa wɔa “Yerusalem hena aseyetsotso.” Le mɔ ka nu? Abe alesi míekpɔe va yi xoxo ene la, dziƒo yeye si va li tso ƒe 1914 me la me tɔwo ava nye hatidziɖula 144,000 mlɔeba, amesiwo akpɔ gome le dziƒodziɖuɖu ma me. Woyɔ amesiawo le nyagblɔɖi me be “Yerusalem yeye.” (Nyaɖeɖefia 21:2) Yerusalem yeyea ŋue Mawu gblɔ le be: “Mawɔ Yerusalem hena aseyetsotso, eye eƒe dukɔ la hena dzidzɔkpɔkpɔ.” Mawu azã Yerusalem yeyea atsɔ adudu yayra manyagblɔwo ɖe ameƒomea me tɔ siwo nye toɖolawo dzi. Womagase avifafa alo konyifagbe le eme azɔ o, elabena Yehowa ana ‘nusi míaƒe dzi di la mí.’—Psalmo 37:3, 4.

²⁶ Nyateƒee, esɔ le go sia go me be míatso aseye egbea! Eteƒe madidi o Yehowa atsrɔ̃ tsitretsiɖeŋulawo katã atsɔ akɔ eƒe ŋkɔ nyui la ŋui. (Psalmo 83:18, 19) Dziƒo yeyea axɔ ŋusẽ bliboe ɣemaɣi. Nya nyui kawoe nye si siwo ta wòle be míatso aseye ahakpɔ dzidzɔ ɖe nusi wɔm Mawu le ŋu tegbee!

Etsɔme si Le Dedie Ŋuti Ŋugbedodo

27. Mɔ ka nue Yesaya ƒo nu tso dedienɔnɔ si Yudatɔ siwo atrɔ yi la akpɔ le wo denyigba dzi ŋu le?

²⁷ Aleke agbenɔnɔ anɔ na Yudatɔ siwo atrɔ va le dziƒo yeyea ƒe dziɖuɖu te le emevava gbãtɔa me? Yehowa gblɔe be: “Ðevi, si xɔ ŋkeke ʋɛ alo amegã ɖeɖi, si ƒe ŋkeke mede keŋ o la, maganɔ afima o; elabena amesi xɔ ƒe alafa hafi ku la, ɖevie, eye nuvɔ̃wɔla, si xɔ ƒe alafa la, fiƒode ava edzi.” (Yesaya 65:20) Aleke wogblɔ aboyome siwo atrɔ yi wo denyigba dzi ƒe dedienɔnɔ wònya se ale! Vidzĩ si xɔ ŋkeke ʋɛ maku kukpo o. Eye ame tsitsi si menɔ agbe eƒe agbemeŋkekewo katã wu enu o hã maku o.d Aleke gbegbe Yesaya ƒe nyawo fa akɔ na Yudatɔ siwo atrɔ yi Yuda lae nye si! Ne wole dedie le woƒe anyigba dzi la, mahiã be woatsi dzi be futɔwo ava xɔ wo vi vidzĩwo loo alo awu woƒe ŋutsuwo o.

28. Nukae míesrɔ̃ tso nya siwo Yehowa gblɔ le agbenɔnɔ le xexe yeyea me le eƒe Fiaɖuƒea ƒe dziɖuɖu te ŋu?

²⁸ Nukae Yehowa ƒe nyawo fia mí le agbenɔnɔ le xexe yeye si gbɔna me ŋu? Le Mawu ƒe Fiaɖuƒea ƒe dziɖuɖu te la, mɔkpɔkpɔ anɔ ɖevi ɖesiaɖe si be yeanɔ dedie le etsɔme. Magadzɔ be Mawu vɔ̃la naku le eƒe ɖekakpui alo ɖetugbi me nɔɣi o. Nusi adzɔ boŋue nye be woakpɔ ameƒomea me tɔ siwo nye toɖolawo ta, woanɔ dedie, ale be woate ŋu ase vivi le agbe me. Ke ne ame aɖe ɖoe be yeadze aglã ɖe Mawu ŋu ɖe? Amesiawo abu agbenɔnɔ mɔnukpɔkpɔa. Ne nuvɔ̃wɔla dzeaglã la “xɔ ƒe alafa” hã, aku. Ne edzɔ alea la, woagblɔ be “ɖevie” wònye ne wotsɔe sɔ kple nusi wòate ŋu ava zu hafi—si nye amegbetɔ si ate ŋu anɔ agbe tegbee.

29. (a) Dzidzɔ kae Mawu ƒe dukɔa me tɔ siwo nye toɖolawo akpɔ le Yuda-nyigba si dzi wodzra ɖo la dzi? (b) Nukata atiwo nye agbedidinɔnɔ ƒe kpɔɖeŋu si sɔ? (Kpɔ etenuŋɔŋlɔ.)

²⁹ Yehowa yi edzi ɖe nu me le nɔnɔme siwo anɔ Yuda-nyigba si wodzra ɖo dzi ŋu be: “Woatu xɔ anɔ eme, eye woade weingble aɖu eme kutsetse. Womatu xɔ ame bubu nanɔ eme o, eye womaƒã nu ame bubu naɖu o; elabena nye dukɔ atsi, abe alesi ati tsinae ene, eye nye ame tiatiawo aɖu woawo ŋutɔ ƒe asinudɔwɔwɔwo.” (Yesaya 65:21, 22) Ne Mawu ƒe dukɔa me tɔ siwo nye toɖolawo gbɔ va Yuda-nyigba si zu aƒedo, si dzi ɖikeke mele eme o be aƒewo kple weingblewo mele o dzi la, dzi adzɔ wo be woanɔ woa ŋutɔwo ƒe aƒewo me aɖu woa ŋutɔwo ƒe weingblewo me kutsetsewo. Mawu ayra ɖe woƒe dɔwo dzi, eye woanɔ agbe didi—abe alesi ati tsinae ene—si me woase vivi le woƒe agbagbadzedze me tsonuwo me le.e

30. Nɔnɔme dodzidzɔname ka mee Yehowa subɔlawo le egbea, eye nuka mee woase vivi le le xexe yeyea me?

³⁰ Nyagblɔɖi sia va eme le míaƒe ŋkekea me. Yehowa ƒe amewo do tso gbɔgbɔmeboyo me le ƒe 1919 me eye wodze woƒe “anyigba,” alo woƒe dɔwɔwɔ kple tadedeagu nɔƒe, la gbugbɔɖoanyi gɔme. Woɖo hamewo hetse gbɔgbɔmekuwo. Nusi do tso emee nye be fifia gɔ̃ hã la, Yehowa ƒe amewo le gbɔgbɔ me paradiso kple ŋutifafa si tso Mawu gbɔ me. Míate ŋu aka ɖe edzi be ŋutifafa sia ayi edzi aɖo Paradisoa ŋutɔŋutɔ me. Míate ŋu akpɔ nusiwo Yehowa ato esubɔlawo ƒe dzimekɔkɔ faa kple woƒe asi dzi awɔ le xexe yeyea me la le susu me wòade edeƒe o. Dzidzɔ kae nye si wòanye be wò ŋutɔ nàtso wò aƒe anɔ eme! Dɔ siwo naa dzidzeme abɔ ɖe Fiaɖuƒedziɖuɖua te. Yayra kae nye si wòanye be ‘nyui nado tso’ wò ŋutɔ wò agbagbadzedzewo ‘me na wò’ ɣesiaɣi! (Nyagblɔla 3:13) Ðe míakpɔ ɣeyiɣi sɔgbɔ atsɔ ase vivi bliboe na míaƒe asinudɔwɔwɔwoa? Ẽ, míakpɔe! Amegbetɔ nuteƒewɔlawo ƒe agbenɔnɔ si nuwuwu meli na o la anɔ “abe alesi ati tsinae ene”—woanɔ agbe ƒe akpe geɖe, eye woanɔe tegbee!

31, 32. (a) Aleke woayra aboyome siwo atrɔ gbɔ lae? (b) Mɔkpɔkpɔ kae anɔ amegbetɔ siwo nye nuteƒewɔlawo si le xexe yeyea me?

³¹ Yehowa gaƒo nu tso yayra bubu siwo le aboyome siwo atrɔ gbɔ la lalam ŋu be: “Womadze agbagba dzodzro o, eye womadzi dzikudziku o; elabena Yehowa ƒe ame yayrawo ƒe ƒome wonye, eye wo viwo le wo ŋu.” (Yesaya 65:23) Yehowa ayra Yudatɔ mawo siwo gbɔ va aƒe la, eyata woƒe agbagbadzedze mazu dzodzro o. Dzilawo madzi vi be ɖeviawo nava kpe fu aku kukpo o. Menye amesiwo nye aboyomewo tsã ɖeɖekoe gbugbɔgaɖoanyi ƒe yayrawo aɖe vi na o; wo viwo hã anɔ wo ŋu. Mawu di vevie be yeakpɔ yeƒe dukɔa ƒe nuhiahiãwo gbɔ na wo ale gbegbe be wòdo ŋugbe be: “[Ava] me be, matɔ, hafi woava yɔm, eye ne wogale nuƒoƒo dzi la, masee.”—Yesaya 65:24.

³² Aleke Yehowa awɔ ŋugbedodo sia dzi le xexe yeyea si gbɔna mee? Ðeko míalala akpɔ alesi wòava dzɔe. Yehowa megblɔ nya sia nya na mí le eŋu o, gake míate ŋu aka ɖe edzi be amegbetɔ siwo nye nuteƒewɔlawo ‘magadze agbagba dzodzro akpɔ o.’ Mɔkpɔkpɔ anɔ ameha gã siwo atsi agbe le Harmagedon me kple ɖevi ɖesiaɖe si woadzi si be yewoanɔ agbe le dzidzeme me ɣeyiɣi didi ŋutɔ aɖe—woanɔ agbe mavɔ! Amesiwo afɔ le tsitretsitsia me kple amesiwo atiae be yewoanɔ agbe ɖe Mawu ƒe dzidzenuwo nu hã akpɔ dzidzɔ le xexe yeyea me. Yehowa ase woƒe nuhiahiãwo ahakpɔ wo gbɔ na wo, akpɔ wo do ŋgɔ ahawɔ dɔ le wo ŋu gɔ̃ hã. Le nyateƒe me la, Yehowa aʋu eƒe asi me atsɔ “nu gbagbewo katã ƒe nudidi” siwo sɔ aɖi ƒo na woe.—Psalmo 145:16.

33. Ne Yudatɔwo trɔ yi wo denyigba dzi la, gɔmesese ka nue lãwo anɔ ŋutifafa me le?

³³ Afika ke ŋutifafa kple dedienɔnɔ si ƒe ŋugbe wodo la akeke ta ase ɖo? Yehowa ƒo nyagblɔɖia ƒe akpa sia ta be: “Amegãxi kple alẽvi woaɖu gbe le wo nɔewo gbɔ, dzata aɖu gbe abe nyi ene, eye da ƒe nuɖuɖu anye kewɔ. Womawɔ vɔ̃ aɖeke o, eye womahe gbegblẽ ava nye to kɔkɔe blibo la dzi o, Yehowa ye gblɔe!” (Yesaya 65:25) Ne Yudatɔ nuteƒewɔlawo trɔ yi wo denyigba dzi la, woanɔ Yehowa ƒe beléle te. Anɔ abe ɖe dzata aɖu gbe abe nyi ene, elabena dzata mawɔ vɔ̃ aɖeke Yudatɔwo alo woƒe aƒemelãwo o. Kakaɖedzi le ŋugbedodo sia ŋu, elabena wotsɔ nya siawo ƒo eta be, “Yehowa ye gblɔe.” Eye eƒe nyawo vaa eme ɣesiaɣi!—Yesaya 55:10, 11.

34. Mɔ dodzidzɔname ka dzie Yehowa ƒe nyawo va eme le egbea, eye aleke woava eme le xexe yeyea mee?

³⁴ Yehowa ƒe nyawo va eme le mɔ dodzidzɔname aɖe nu le esubɔla vavã siwo li egbea dome. Tso ƒe 1919 me la, Mawu yra eƒe amewo ƒe gbɔgbɔmenyigba la, eye wòtrɔe zu gbɔgbɔmeparadisoe. Amesiwo vaa gbɔgbɔmeparadiso sia me wɔa tɔtrɔ ɖedzesiwo le woƒe agbenɔnɔ me. (Efesotɔwo 4:22-24) Mawu ƒe gbɔgbɔ kpena ɖe amesiawo siwo si lãwo ƒe nɔnɔme nɔ—amesiwo anye be wowɔa ŋlɔmi alo wɔa fu wo hati amegbetɔwo—tsã la ŋu wowɔa ŋgɔyiyi le nɔnɔme manyomanyowo dzi ɖuɖu me. Nusi do tso emee nye be wosea vivi le tadedeagu le ŋutifafa kple ɖekawɔwɔ me kple woƒe haxɔsetɔwo. Yayra siwo Yehowa ƒe amewo xɔna le woƒe gbɔgbɔmeparadisoa me fifia la akeke ta aɖo Paradisoa ŋutɔŋutɔ me, afisi lãwo hã anɔ ŋutifafa me tsɔ kpe ɖe ŋutifafa si le amegbetɔwo dome ŋu. Míate ŋu aka ɖe edzi be le Mawu ƒe ɣeyiɣi ɖoɖi dzi la, woawɔ dɔ si wòde ameƒomea si le gɔmedzedzea me la nyuie, si nye be: “Mianye agbo ɖe [anyigba la dzi], miaɖu ƒumelãwo kple dziƒoxe dzodzoewo kple lã, siwo katã zɔna le anyigba dzi la dzi!”—Mose I, 1:28.

35. Nukata wòsɔ le go sia go me be ‘míatso aseye ɖaa’?

³⁵ Aleke gbegbe míedaa akpe ɖe ŋugbe si Yehowa do be yeawɔ “dziƒo yeye kple anyigba yeye” la tae nye si! Ŋugbedodo ma va eme le ƒe 537 D.M.Ŋ. me eye egale eme vam egbea. Emevava eve siawo fia be etsɔme nyui aɖe li na ameƒomea me tɔ toɖolawo. Dɔmenyotɔe la, Yehowa to nyagblɔɖila Yesaya dzi na míenya nane tso nusi wòdzra ɖo ɖi na amesiwo lɔ̃a eyama la ŋu. Nyateƒee, esɔ le go sia go me be míawɔ ɖe Yehowa ƒe nya siawo dzi, esi nye: “Mitso aseye ɖaa le nusi wɔm mele la ŋuti.”—Yesaya 65:18.

[Etenuŋɔŋlɔwo]

[Nɔnɔmetata si le axa 389]

Míakpɔ ɣeyiɣi geɖe ase vivi le míaƒe asinudɔwɔwɔwo me le Mawu ƒe xexe yeyea me