Ta Wuiɖekɛlia

Baba na Aglãdzelawo!

Yesaya 9:7–10:4

 1. Nuvɔ̃ gã kae Yerobeam wɔ?

ESIME dukɔ si Yehowa bla nu kpli la me ma hezu fiaɖuƒe eve la, dziehe to ewo fiaɖuƒea va nɔ Yerobeam ƒe dziɖuɖu te. Aɖaŋu nɔ fia yeyea si eye ŋusẽ hã nɔ eŋu. Gake Yehowa dzixɔse ŋutɔŋutɔ menɔ esi o. Esia na wòwɔ nuvɔ̃ gã aɖe si gblẽ dziehefiaɖuƒea ƒe ŋutinya katã me. Wode se na Israel-viwo le Mose ƒe Sea me be woayi gbedoxɔ si le Yerusalem, si va le Yuda anyiehefiaɖuƒea me fifia, la me zi etɔ̃ ƒe sia ƒe. (Mose V, 16:16) Esi Yerobeam vɔ̃ be mɔzɔzɔ edziedzi alea ana ye teviwo nava bu be ele be yewoagawɔ ɖeka kple yewo nɔvi siwo le anyiehe ta la, “[ewɔ] sikanyivi eve, eye wògblɔ na wo bena: Miede Yerusalem wòsɔ gbɔ azɔ! Israel, kpɔ ɖa, wò mawu, siwo kplɔ wò tso Egipte-nyigba dzi la, wonye si. Etsɔ ɖeka ɖo Betel, eye wòtsɔ evelia ɖo Dan.”—Fiawo I, 12:28, 29.

2, 3. Nukae Yerobeam ƒe nuvɔ̃ la gblẽ le Israel ŋu?

² Edze abe Yerobeam ƒe ɖoɖoa dze edzi nɛ ɣeyiɣi kpui aɖe ene. Vivivi la, dukɔa megadea Yerusalem o eye wote tadedeagu na nyivi eveawo. (Fiawo I, 12:30) Gake xɔsegbegbe ƒe mawusubɔsubɔ me nuwɔna sia gblẽ to ewo fiaɖuƒea. Le ƒe aɖewo megbe la, Yehu, amesi ɖe veviedodo si dze na kafukafu fia le Baal-subɔsubɔ ɖeɖeɖa me le Israel la, gɔ̃ hã yi edzi de ta agu na sikanyiviawo. (Fiawo II, 10:28, 29) Nuka hãe do tso nyametsotso gbegblẽ si Yerobeam wɔ wòzu afɔku la me? Eyae nye dunyahehe me dediemanɔmanɔ kple dukɔa ƒe fukpekpe.

³ Esi Yerobeam va gbe xɔse ta la, Yehowa gblɔ be eƒe dzidzimeviwo maɖu fia ɖe anyigba la dzi o, eye afɔku gã aɖe ava dzɔ ɖe dziehefiaɖuƒea dzi mlɔeba. (Fiawo I, 14:14, 15) Yehowa ƒe nya la va eme. Israel-fia adre tsɔ ƒe eve alo esi mede nenema o ɖu fiae—wo dometɔ aɖewo ɖu fia ŋkeke ʋɛ aɖewo ko. Fia ɖeka wu eɖokui, eye ŋutsu nɔƒegãdilawo wu wo dometɔ ade hexɔ fiazikpuia sesẽe. Vevietɔ le Yerobeam II ƒe fiaɖuɣi si wu enu anye le ƒe 804 D.M.Ŋ. me lɔƒo, esime Uziya nɔ fia ɖum le Yuda la, zitɔtɔ, ŋutasẽnuwɔnawo, kple amewuwu bɔ ɖe Israel. Nɔnɔme siae na Yehowa to Yesaya dzi xlɔ̃ nu dziehefiaɖuƒea, alo gblɔ “nya” ɖo ɖe wo tẽ. “Aƒetɔ la gblɔ nya ɖo ɖe Yakob, eye wòva ƒo ɖe Israel dzi.”—Yesaya 9:7.a

Adegbeƒoƒo Kple Dada Na Mawu Do Dɔmedzoe

 4. “Nya” kae Yehowa gblɔ ɖe Israel ŋu, eye nukata wògblɔe ɖo?

⁴ Womaŋe aɖaba aƒu Yehowa ƒe “nya” dzi o. “Dukɔ blibo la nadze sii hekpe ɖe Efrayim kple Samariatɔwo ŋu, amesiwo [ƒoa nu] le adegbeƒoƒo kple dàda me.” (Yesaya 9:8) “Yakob,” “Israel,” “Efrayim,” kple “Samaria” katã fia Israel dziehefiaɖuƒe, si ƒe to vevitɔe nye Efrayim eye eƒe fiadue nye Samaria. Nya si Yehowa gblɔ ɖe fiaɖuƒe ma ŋu nye ʋɔnudrɔ̃nya sesẽ aɖe, elabena Efrayim va sẽ ɖe xɔsegbegbe me eye medea bubu Yehowa ŋu kura o. Mawu makpɔ dukɔa ta tso woƒe mɔ vɔ̃wo me tsonuwo me o. Woazi wo dzi be woase Mawu ƒe nya, alo alé to ɖe eŋu.—Galatiatɔwo 6:7.

 5. Aleke Israel-viwo ɖee fia be nusiwo Yehowa tsɔ drɔ̃ ʋɔnu wo la metsɔ fu lãme na wo o?

⁵ Esi nɔnɔmea nɔ gbegblẽm ɖe edzi la, dukɔa bu nu geɖe, tsɔ kpe ɖe woƒe aƒewo ŋu—esiwo wotu kple anyikpewo kple ati siwo mesesẽ o. Ðe esia wɔ dɔ ɖe woƒe dzi dzia? Ðe woawɔ ɖe Yehowa ƒe nyagblɔɖila ƒe nya dzi ahatrɔ ɖe Mawu vavã la ŋua?b Yesaya ŋlɔ alesi dukɔa ɖo eŋu dadatɔe la be: “Anyikpewoe mũ dze anyi, ke míatsɔ gãwo atui, gbotiwoe wolã, ke míado sedertiwo ɖe wo teƒe.” (Yesaya 9:9) Israel-viwo do vlo Yehowa hegbe eƒe nyagblɔɖilawo, amesiwo gblɔ nusita wole fu siawo gbegbe kpem ɖo na wo. Dukɔa to esia me le gbɔgblɔm be: ‘Aƒe siwo nye anyikpexɔ kple ati siwo mesesẽ o ate ŋu agbã faa, gake míakpɔ nusiwo nyo wu aɖo nusiawo siwo míebu la teƒe ne míetsɔ xɔtunu siwo nyo wu gbugbɔ tu xɔwo—míazã kpe siwo wofu kple sedertiwo!’ (Tsɔe sɔ kple Hiob 4:19.) Nusi Yehowa ate ŋu awɔ na wo koe nye be wòagahe to na wo ɖe edzi.—Tsɔe sɔ kple Yesaya 48:22.

 6. Aleke Yehowa gblẽ Siria kple Israel ƒe nugbeɖoɖo ɖe Yuda ŋu mee?

⁶ Yesaya yi edzi be: “Yehowa do Rezin ƒe ketɔwo ɖe dzi ɖe eŋu.” (Yesaya 9:10a) Israel Fia Pekax bla nu kple Siria Fia Rezin. Woɖo nugbe be yewoaɖu Yuda to eve fiaɖuƒea dzi ahatsɔ fia si anɔ yewo te aɖo Yehowa ƒe fiazikpuia dzi le Yerusalem—ame aɖe si nye “Tabeal vi.” (Yesaya 7:6) Gake nugbeɖoɖoa me agblẽ. Futɔ sesẽwo le Rezin ŋu, eye Yehowa ‘ado’ futɔ siawo “ɖe dzi” ɖe Israel “ŋu.” Nyagbɔgblɔ ‘do ɖe dzi’ fia be aɖe mɔ na wo woawɔ aʋa dzidzedzetɔe wòagblẽ nubabla la kple eƒe taɖodzinuwo me.

7, 8. Nukae do tso alesi Asiria ɖu Siria dzii me na Israel?

⁷ Nubabla sia te gbegblẽ esi Asiria dze Siria dzi. “Asur-fia ho va Damasko [Siria ƒe fiadu] hexɔe, eye wòkplɔ wo yi Kir, eye wòwu Rezin.” (Fiawo II, 16:9) Pekax kpɔe be tame si yeɖo ɖe Yuda ŋu me gblẽ le esi ye xɔlɔ̃ sesẽ la megava li o ta. Le nyateƒe me le Rezin ƒe ku megbe kpuie la, Xosea wu Pekax, eye wòva xɔ Samaria-fiazikpuia sesẽe.—Fiawo II, 15:23-25, 30.

⁸ Fifia Siria si Israel bla nu kpli tsã la va le Asiria, si nye fiaɖuƒe sesẽtɔ le nutoa me te. Yesaya gblɔ alesi Yehowa azã dunyahehe ƒe ɖekawɔwɔ yeye siae ɖi be: “[Yehowa de] akiti lã me na [Israel ƒe] futɔwo: Aram tso ɣedzeƒe, eye Filistitɔwo tso [megbe, “NW”], eye woɖu Israel wòyɔ nu me na wo. Ke to esiawo katã gbɔ hã eƒe dɔmedzoe nu mefa o, eye eƒe alɔ gale dzi ko.” (Yesaya 9:10b, 11) Ẽ, fifia Siria va zu Israel ƒe futɔ, eye ele be Israel nadzra ɖo ɖe Asiria kple Siria ƒe amedzidzedze ŋu. Wote ŋu va dze edzi. Asiria na Xosea si va xɔ fiazikpuia akpasesẽe la zu esubɔla, eye wòka adzɔ gã aɖe nɛ be wòanɔ xexem. (Ƒe bla nanewo do ŋgɔ la, Israel Fia Menaxem xe ga gbogbo aɖe na Asiria.) Aleke gbegbe nyagblɔɖila Hosea ƒe nyawo va emee nye si be: “Du bubu me tɔwo xɔ [Efrayim ƒe] ŋusẽ le esi”!—Hosea 7:9; Fiawo II, 15:19, 20; 17:1-3.

 9. Nukata míate ŋu agblɔ be Filistitɔwo “tso megbe” va dze wo dzi?

⁹ Ðe Yesaya megblɔ hã be Filistitɔwo ‘atso megbe’ ava dze wo dzi oa? Ẽ. Hafi woava to taɖoƒefianuwo vɛ la, Hebritɔwo nɔa te ɖe amesi dze ŋgɔ ɣedzeƒe dzi tsɔ fiaa taɖoƒee. Eyata “ɣedzeƒe” nɔ ŋgɔ eye ɣetoɖoƒe, si nye Filistitɔwo nɔƒe la, nɔ “megbe.” Anye be Yuda kpe ɖe “Israel” si woyɔ le Yesaya 9:11 la ŋu le afisia elabena Filistitɔwo va dze Yuda dzi le Pekax ŋɔlimetɔ Axaz ƒe fiaɖuɣi, eye woxɔ Yuda duwo kple teƒe veviwo wozu wo tɔ. Abe Efrayim si le dziehe ene la, Yuda dze na tohehe sia si tso Yehowa gbɔ, elabena xɔsegbegbe xɔ aƒe ɖe eya hã me fũ.—Kronika II, 28:1-4, 18, 19.

Tso ‘Ta Va Ðo Asike’—Wonye Aglãdzelawo ƒe Dukɔ

10, 11. To kae Yehowa ahe na Israel le eƒe aglãdzedze atraɖii ta?

¹⁰ Togbɔ be dziehefiaɖuƒea le fu kpem—eye togbɔ be Yehowa ƒe nyagblɔɖilawo gblɔ gbedasi sesẽwo na wo—hã la, woyi edzi dze aglã ɖe Yehowa ŋu. “Dukɔ la metrɔ ɖe amesi ƒoe la ŋu o, eye womedi Yehowa Zebaot yome mɔ o.” (Yesaya 9:12) Eyata nyagblɔɖila la gblɔ be: “Yehowa tsrɔ̃ ta kple asike, deʋaya kple keti ɖa tso Israel le ŋkeke ɖeka dzi. Ame tsitsiwo kple ame ŋkutawo nye ta la, eye nyagblɔɖila, siwo fiaa alakpadada la, wonye asike la. Dukɔ sia kplɔlawo nye ameblelawo, eye amesiwo woble la, wobu.”—Yesaya 9:13-15.

¹¹ “Ta” kple “deʋaya” la tsi tre ɖi na “ame tsitsiwo kple ame ŋkutawo”—siwo nye dukɔa kplɔlawo. “Asike” kple “keti” la nye alakpanyagblɔɖila siwo gblɔa nya siwo adze wo kplɔlawo ŋu. Biblia me nyawo ŋutinunyala aɖe ŋlɔ bena: “Woyɔ Aʋatsonyagblɔɖilaawo be asike, le esi woƒe agbenɔnɔ vlo wu ameawo katã tɔ, eye wotsɔa alakpanuwɔwɔ nɔa fia vɔ̃ɖiwo yome hedoa alɔ wo ta.” Nufialagã Edward J. Young gblɔ le aʋatsonyagblɔɖila siawo ŋu be: “Esi womenye kplɔlawo o, ke boŋ wonɔa kplɔlawo ƒe mɔfiafia yome ta la, wovivia nu me na wo hekafua wo alakpatɔe, abe avu siwo le asike nyem ene.”—Tsɔe sɔ kple Timoteo II, 4:3.

‘Ahosiwo Kple Tsyɔ̃eviwo’ Gɔ̃ Hã Dze Aglã

12. Afika ke nu gblẽ le Israel-viwo ƒe hadomegbenɔnɔ ŋu se ɖo?

¹² Yehowae nye ahosiwo kple tsyɔ̃eviwo Taʋlila. (Mose II, 22:21, 22) Ke hã se nya si Yesaya gblɔ fifia ɖa: “Aƒetɔ la makpɔ dzidzɔ le woƒe ɖekakpuiwo ŋu o, eye mave woƒe tsyɔ̃eviwo kple ahosiwo nu o, elabena wo katã wonye ame vɔ̃ɖiwo kple nu tovo wɔlawo, eye [nu sia nu] gblɔa nya gbegblẽ. Ke to esiawo katã gbɔ hã eƒe dɔmedzoe nu mefa o, eye eƒe alɔ gale dzi ko.” (Yesaya 9:16) Xɔsegbegbe gblẽ nu le hadomegbenɔnɔ ƒe akpa sia akpa ŋu, eye ahosiwo kple tsyɔ̃eviwo hã le eme! Yehowa gbɔ dzi ɖi nɔ eƒe nyagblɔɖilawo dɔm ɖa, henɔ mɔ kpɔm be dukɔa atrɔ woƒe mɔwo. Le kpɔɖeŋu me, Hosea ɖe kuku na wo be: “Israel, gatrɔ ɖe Yehowa, wò Mawu la ŋu, elabena wò vodadawoe tsɔ wò ƒu anyi.” (Hosea 14:2) Aleke gbegbe wòave ahosiwo kple tsyɔ̃eviwo Taʋlila lae nye si be wòahe to na ame mawo kura gɔ̃ hã!

13. Nukae míate ŋu asrɔ̃ tso alesi nɔnɔmea nɔ le Yesaya ƒe ŋkekea me la me?

¹³ Abe Yesaya ene la, míele ɣeyiɣi vɔ̃ siwo do ŋgɔ na Yehowa ƒe ʋɔnudrɔ̃ŋkeke si ava ame vɔ̃ɖiwo dzi la me. (Timoteo II, 3:1-5) Eyata aleke gbegbe wòle vevie enye si be eɖanye nɔnɔme ka ke me Kristotɔ vavãwo le le agbe me o, woakpɔtɔ anɔ dzadzɛ le gbɔgbɔ me, le agbenɔnɔ me, kple le susu me ale be Mawu nayi edzi akpɔ ŋudzedze ɖe wo ŋu. Mina mía dometɔ ɖesiaɖe natsɔ ŋuʋaʋã akpɔ eƒe ƒomedodo kple Yehowa tae. Megadzɔ gbeɖe be amesiwo si tso ‘Babilon Gã’ la me la dometɔ aɖeke nagava ‘de ha kplii le eƒe nuvɔ̃wo me’ o.—Nyaɖeɖefia 18:2, 4.

Alakpasubɔsubɔ Dzia Ŋutasẽnuwɔwɔ Ðe Edzi

14, 15. (a) Nukae dona tsoa tadedeagu na gbɔgbɔ vɔ̃wo me? (b) Fukpekpe si nɔ edzi yim kae Yesaya gblɔ ɖi ɖe Israel ŋu?

¹⁴ Ne míagblɔe la, alakpasubɔsubɔ nye gbɔgbɔ vɔ̃wo subɔsubɔ. (Korintotɔwo I, 10:20) Abe alesi wònɔ do ŋgɔ na Tsiɖɔɖɔa ene la, gbɔgbɔ vɔ̃wo ƒe ŋusẽkpɔɖeamedzi hea ŋutasẽnuwɔwɔ vɛ. (Mose I, 6:11, 12) Eyata mewɔ nuku o be esime Israel va gbe xɔse eye wòte gbɔgbɔ vɔ̃wo subɔsubɔ la, ŋutasẽnuwɔwɔ kple vɔ̃ɖinyenye va xɔ aƒe ɖe anyigba la dzi.—Mose V, 32:17; Psalmo 106:35-38.

¹⁵ Yesaya zã nya siwo ɖe nɔnɔmea fia nyuie tsɔ ɖɔ alesi vɔ̃ɖinyenye kple ŋutasẽnuwɔwɔ keke tae le Israel: “Elabena vɔ̃ɖiwɔwɔ le bibim abe dzo ene, efiã aŋɔkawo kple ŋuwo, eye wòtɔ dzo ave dodowo, ale be dzudzɔ de dzi kɔtɔɔ. Yehowa Zebaot ƒe dziku na dzo ƒo anyigba, eye dukɔ la le abe dzo ƒe nuɖuɖu ene; ame aɖeke mekpɔ nɔvia ta o. Wole tsyo dam nu le ɖusi me, ke dɔwuame nu mefa o, wole nu ɖum le mia me, ke womeɖi ƒo o, amesiame ɖu eya ŋutɔ ƒe abɔ ƒe lã; Manase ɖu Efrayim, eye Efrayim ɖu Manase; woa kple eve la siaa wotso ɖe Yuda ŋu. Ke to esiawo katã gbɔ hã eƒe dɔmedzoe nu mefa o, eye eƒe alɔ gale dzi ko.”—Yesaya 9:17-20.

16. Aleke nya siwo le Yesaya 9:17-20 va emee?

¹⁶ Abe dzobibi si kekea ta tso ŋuve ɖeka gbɔ yia bubu gbɔ ene la, ŋutasẽnuwɔnawo nu meganya léna o eye ekekena kabakaba ɖoa “ave dodowo” me va zua ŋutasẽnuwɔwɔ ƒe ave gã si lé dzo. Biblia me nyawo me dzrola Keil kple Delitzsch ƒo nu tso alesi gbegbe ŋutasẽnuwɔwɔ nu sẽe ŋu be enye “ame nɔewo tsɔtsrɔ̃ tagbɔsesẽtɔe le dukɔmeviʋa ƒe sedzimawɔmawɔ me. Esi veveseɖeamenu suetɔ gɔ̃ hã mele wo me o ta la, wonɔ wo nɔewo tsɔtsrɔ̃ dzi atraɖii.” Anɔ eme be Efrayim kple Manase toawo koŋ dzie wotɔ asii le afisia elabena woawo koŋue nye to siwo le dziehefiaɖuƒea teƒe eye esi wonye Yosef viŋutsu eveawo ƒe dzidzimeviwo ta la, woawoe do ƒome kple wo nɔewo wu le to ewoawo dome. Gake togbɔ be ele alea hã la, ne wokpe aʋa kple Yuda si le anyiehe gome la ko hafi woadzudzɔ wo nɔewo wuwu vie gbɔ.—Kronika II, 28:1-8.

Ʋɔnudrɔ̃la Gblẽkuwo Kpe Kple Woƒe Ʋɔnudrɔ̃la

17, 18. Nu gbegblẽ kae nɔ se kple dukplɔɖoɖowo me le Israel?

¹⁷ Azɔ Yehowa trɔ eƒe susu ɖe Israel ʋɔnudrɔ̃lawo kple amegã bubuwo ŋu be yeadrɔ̃ ʋɔnu wo. Amesiawo wɔa woƒe ŋusẽ ŋudɔ ɖe mɔ gbegblẽ nu hetafaa ame dahewo kple hiãtɔ siwo vaa wo gbɔ be woadrɔ̃ ʋɔnu dzɔdzɔe na yewo. Yesaya gblɔ be: “Baba na amesiwo tsɔ ɖoɖo gbegblẽ wɔ see, kple agbalẽŋlɔla, siwo le ameteteɖanyi ŋlɔm ɖi, ne woate ame dahewo ƒe nya ɖe to, eye woada adzo nya dzɔdzɔe le nye dukɔ ƒe hiãtɔwo si, ne ahosiwo nazu woƒe aboyonu, eye woaha tsyɔ̃eviwo!”—Yesaya 10:1, 2.

¹⁸ Yehowa ƒe Se tsi tre ɖe madzɔmadzɔnyenye ɖesiaɖe ƒomevi ŋu: “Migawɔ apasa le ʋɔnudɔdrɔ̃ me o. Migade ame dahe dzi o, eye migakpɔ amegãwo ŋku me o.” (Mose III, 19:15) Amegã siawo ŋe aɖaba ƒu se ma dzi eye woawo ŋutɔwo wɔ “ɖoɖo gbegblẽwo” be wòana nusi sɔ kple fififi ŋutɔŋutɔ si vɔ̃ɖi wu ɖesiaɖe la nadze nusi le se nui—woxɔa nunɔamesi ʋɛ siwo le ahosiwo kple tsyɔ̃eviwo si la le wo si. Israel ƒe alakpamawuwo mekpɔa nu madzɔmadzɔ siawo o, gake Yehowa ya kpɔnɛ. Fifia Yehowa to Yesaya dzi he eƒe susu yi ʋɔnudrɔ̃la vɔ̃ɖi siawo dzii.

19, 20. Aleke woatrɔ Israel-ʋɔnudrɔ̃la gbegblẽawo ƒe nɔnɔmee, eye nukae adzɔ ɖe woƒe “kesinɔnuwo” dzi?

¹⁹ “Nuka miawɔ le gbesigbe wotu eŋu fe, eye gbegblẽ tso adzɔge va? Ameka miasi atso, eye afika miagblẽ miaƒe kesinɔnuwo ɖo? Ke boŋ ame labɔbɔ ɖe gatɔwo dome, eye wòadze anyi ɖe ame tsiaʋawo dome.” (Yesaya 10:3, 4a) Ʋɔnudrɔ̃la ɖianukwarewo menɔ anyi ahosiwo kple tsyɔ̃eviwo atsɔ woƒe nyawo ayi wo gbɔe o. Eyata aleke wòsɔe nye si be fifia Yehowa bia Israel-ʋɔnudrɔ̃la gbegblẽawo be amekae woasi atso esi Yehowa le akɔnta biam tso wo si fifia. Ẽ, woava kpɔe be “enye ŋɔdzinu, ne ame aɖe ge ɖe Mawu gbagbe la ƒe asi me.”—Hebritɔwo 10:31.

²⁰ Ɣeyiɣi kpui aɖe koe ʋɔnudrɔ̃la vɔ̃ɖi siawo ƒe “kesinɔnuwo”—xexeme ŋkɔxɔxɔ, bubu, kple ŋusẽ si wokpɔ le woƒe kesinɔnuwo kple ɖoƒe ta la—anɔ anyi ase ɖo. Woalé wo dometɔ aɖewo le aʋa ade game, eye ‘woabɔbɔ,’ alo ata le klo nu, le gamenɔla bubuwo dome, woawu ame susɔeawo eye ame tsiaʋawo atsyɔ woƒe kukuawo dzi. Woƒe “kesinɔnuwo” ƒe ɖee nye nusiwo woto mɔ fitifitiwo dzi kpɔ, si woƒe futɔwo aha.

21. Ðe to siwo wohe na Israel na Yehowa ƒe dziku nu faa?

²¹ Yesaya wu nya siwo le ɖoɖo nu la ƒe akpa mamlɛ sia nu kple nuxlɔ̃ame sesẽ aɖe be: “Ke to esiawo katã [fu siwo katã dukɔa kpe vaseɖe fifia] gbɔ hã la eƒe dɔmedzoe nu mefa o, eye eƒe alɔ gale dzi ko!” (Yesaya 10:4b) Ẽ, nya bubuwo gale Yehowa si wòagblɔ na Israel. Yehowa mabɔbɔ eƒe alɔ si le dzi la ɖe anyi o vaseɖe esime wòhe afɔku mamlɛtɔ si atsrɔ̃ dziehefiaɖuƒe si dze aglã la va wo dzi hafi.

Mègana Woable Wò Adi Viɖe le Ŋuwò O

22. Nukae míate ŋu asrɔ̃ tso nusi dzɔ ɖe Israel dzi me?

²² Yehowa ƒe nya si to Yesaya dzi ʋuʋu Israel vevie eye ‘megbugbɔ va egbɔ ƒuƒlu o.’ (Yesaya 55:10, 11) Woƒo nu tso alesi Israel dziehefiaɖuƒea wu enu nublanuitɔe ŋu le ŋutinya me, eye míate ŋu akpɔ fu siwo gbegbe emenɔlawo kpe le susu me ɖa. Kakaɖedzi li be nenema ke Mawu ƒe nya ava eme ɖe fifi nuɖoanyia dzii, vevietɔ ɖe Kristodukɔ si gbe xɔse la dzi. Ekema aleke wòle vevie be Kristotɔwo nagaɖo to aʋatsonya siwo tsi tre ɖe Mawu ŋu o enye si! Mawu ƒe Nya la klo nu le Satana ƒe ayemɔwo ŋu tso gbaɖegbe ke, eye mele be míana woaflu mí abe alesi wòdzɔ ɖe blema Israel dzi ene o. (Korintotɔwo II, 2:11) Neva eme be mía dometɔ aɖeke nagadzudzɔ Yehowa subɔsubɔ “le gbɔgbɔ kple nyateƒe me” gbeɖe o. (Yohanes 4:24) Ne míewɔe nenema la, eƒe abɔ si le dzi la maƒo esubɔlawo abe alesi wòƒo Efrayimtɔ dzeaglãwo ene o; ke boŋ axɔ wo lɔlɔ̃tɔe ɖe eƒe abɔ me, eye wòakpe ɖe wo ŋu woanɔ mɔ si ɖo ta agbe mavɔ me le paradisonyigba dzi la dzi.—Yakobo 4:8.

[Etenuŋɔŋlɔwo]

[Nɔnɔmetata si le axa 139]

Vɔ̃ɖinyenye kple ŋutasẽnuwɔwɔ xɔ Israel katã abe alesi dzo léa avee ene

[Nɔnɔmetata si le axa 141]

Yehowa abia akɔnta amesiwo wɔa fu amewo