Yesu—Afi Si Wòtso

“[Pilato gage] ɖe nutomefia ƒe fiasã la me, eye wògblɔ na Yesu be: ‘Afi kae nètso?’ Gake Yesu meɖo nya aɖeke ŋu nɛ o.”—YOHANES 19:9.

NYA mae Roma Nutomefia Pontio Pilato bia Yesu esi wonɔ ʋɔnu drɔ̃mee be woatso kufia nɛ.a Pilato nya Israel ƒe nuto si me Yesu tso. (Luka 23:6, 7) Enya hã be menye amegbetɔ dzro aɖe koe Yesu nye o. Ðe wònɔ wɔwɔm na Pilato be Yesu nɔ agbe le afi aɖe kpɔ hafi va anyigba dzia? Ðe dziɖula trɔ̃subɔla sia nɔ didim ŋutɔŋutɔ be yeaxɔ nyateƒea ahanɔ agbe ɖe enua? Aleke kee wòɖale o, Yesu gbe be yemaɖo nya ŋu nɛ o, eye eteƒe medidi o, eme va kɔ be Pilato ŋutɔ ƒe ɖoƒe ŋue wòtsi dzi ɖo, ke menye nyateƒe kple dzɔdzɔenyenye ŋue o.—Mateo 27:11-26.

Dzidzɔtɔe la, ame siwo di tso dzi me be yewoanya afi si Yesu tso la ate ŋu anya bɔbɔe. Biblia na afi si Yesu Kristo tso la me kɔ ƒãa. Bu nya siwo gbɔna la ŋu kpɔ.

▪ Afi kae wodzii le? Akɔntabubu siwo wowɔ egbea ɖee fia be wodzi Yesu le ƒe si woyɔna fifia be ƒe 2 Do Ŋgɔ Na Mía Ŋɔli ƒe kele ƒe gɔmedzedze me, le ƒome dahe aɖe me, le Yuda kɔƒe si nye Betlexem me. Se si Kaisaro Augusto de be amewo naŋlɔ ŋkɔ la ƒoe ɖe Yesu dada Maria, “si ƒo fu tsi ɖo,” kple srɔ̃a Yosef nu be woazɔ mɔ ayi Betlexem, si nye Yosef dedu me. Esi amewo sɔ gbɔ ɖe kɔƒea me fũu, si wɔe be womekpɔ afi si woadze o ta la, eva hiã be atsu kple asi sia natsi lãkpo me, afi si wodzi Yesu ɖo hetsɔe mlɔ lãnuɖunu me.—Luka 2:1-7.

Ƒe alafa geɖe do ŋgɔ la, Biblia me nyagblɔɖi aɖe gblɔ afi si woadzi Yesu le ŋu nya ɖi ale: ‘Wò Betlexem Efrata, esi nènye suetɔ le Yuda ƒe ƒomeawo dome hã la, mewò Israel ƒe dziɖula le dzɔdzɔ ge atso nam, ame si dzɔɣi tso tititi le gbaɖegbe ʋĩ ke.’b (Mixa 5:1) Edze abe wobu Betlexem be ele sue akpa be woabui akpe ɖe Yuda duwo ŋu. Ke hã, du sue sia ŋue woade bubu tɔxɛe. Mesia, alo Kristo, si ŋugbe wodo la atso Betlexem.—Mateo 2:3-6; Yohanes 7:40-42.

▪ Afi si wonyii le Esi Yesu ƒe ƒomea nɔ Egipte ɣeyiɣi kpui aɖe vɔ megbe la, woʋu yi Nazaret, si nye dugã aɖe le Galilea nutoa me, afi si didi tso Yerusalem kilometa 96 le dziehe gome. Ɣemaɣi la, Yesu mekpɔ xɔ ƒe etɔ̃ o. Nuto dzeani ma si agbledelawo, alẽkplɔlawo, kple tɔƒodelawo nɔ dɔ dzi le la mee Yesu tsi le le ƒome gã aɖe, si anɔ eme be ganyawo mede wo dzi tututu o la, me.—Mateo 13:55, 56.

Ƒe alafa geɖe do ŋgɔ la, Biblia gblɔe ɖi be Mesia la anye “Nazaretetɔ.” Nya Nyui ŋlɔla Mateo gblɔ be Yesu ƒe ƒomea va nɔ “Nazaret . . . , bene nya si wogblɔ to nyagblɔɖilawo dzi la nava eme be: ‘Woayɔe be Nazaretetɔ.’” (Mateo 2:19-23) Edze abe ŋkɔ Nazaret do ƒome kple Hebrigbe me nya “atilɔ” ene. Edze ƒãa be Mateo ƒe nyawo ku ɖe Yesaya ƒe nyagblɔɖi si yɔ Mesia la be “atilɔ” si amie tso Isai me la ŋu, si fia be Mesia la anye Isai, Fia David fofo, ƒe dzidzimevi. (Yesaya 11:1) Eye eva eme nenema hã, Yesu nye Isai ƒe dzidzimevi tso David ƒe ƒome me.—Mateo 1:6, 16; Luka 3:23, 31, 32.

▪ Afi si wòdzɔ tso Biblia ɖee fia be Yesu ƒe agbe dze egɔme xoxoxo hafi wova dzii le lãkpo me le Betlexem. Mixa ƒe nyagblɔɖi si míeyɔ do ŋgɔ la yi edzi gblɔ be edzɔ “tso tititi le gbaɖegbe ʋĩ ke.” (Mixa 5:1) Esi Yesu nye Mawu ƒe Ŋgɔgbevi ta la, enye gbɔgbɔmenuwɔwɔ le dziƒo hafi wova dzii le anyigba dzi abe amegbetɔ ene. Yesu ŋutɔ gblɔ be: “Meɖi tso dziƒo va.” (Yohanes 6:38; 8:23) Aleke esia dzɔe?

Yehowa Mawu zã gbɔgbɔ kɔkɔea le nukumɔ aɖe nu tsɔ trɔ Via si le dziƒo la ƒe agbe de Yuda ɖetugbui nɔaƒe Maria ƒe vidzidɔ me be woadzii wòanye amegbetɔ deblibo.c Nukunu sia tɔgbi wɔwɔ menye nu sesẽ na Mawu Ŋusẽkatãtɔ la kura o. Abe ale si mawudɔla si ɖe nyawo me na Maria gblɔe ene la, “Mawu magblɔ nya aɖeke wòado kpo emevava o.”—Luka 1:30-35, 37.

Biblia gblɔ nya geɖe na mí wu nya siwo ku ɖe afi si Yesu tso la ŋu ko. Nya Nyui Gbalẽ eneawo, siwo nye Mateo, Marko, Luka, kple Yohanes gagblɔ nya geɖe na mí tso ale si wònɔ agbee ŋu.

[Etenuŋɔŋlɔwo]