Ta Blaeve Vɔ Ðekɛlia

Yehowa ƒe Alɔ Le Dzi

Yesaya 25:1–27:13

 1. Nukata Yesaya kpɔ ŋudzedze ɖe Yehowa ŋu?

LƆLƆ̃ deto le Yesaya si na Yehowa eye eyama kafukafu dzɔa dzi nɛ. Edo ɣli gblɔ be: “Yehowa, nye Mawu nènye, mado wò ɖe dzi, eye makafu wò ŋkɔ!” Nukae kpe ɖe nyagblɔɖila la ŋu be wòkpɔ ŋudzedze ɖe Wɔla la ŋu nyuie nenema? Nusi kpe ɖe eŋu koŋue nye sidzedze Yehowa kple eƒe dɔwɔnawo. Nya siwo Yesaya gagblɔ ɖee fia be sidzedze sia nɔ esi: “Elabena èwɔ nukunuwo, wò gbaɖegbe [adaŋudedewo, “NW”] nye nyateƒe, eye wometrɔna o!” (Yesaya 25:1) Abe Yosua si nɔ agbe do ŋgɔ nɛ ene la, Yesaya nya be Yehowa nye nuteƒewɔla kple amesi ŋu woate ŋu aɖo ŋu ɖo, eye be eƒe “adaŋudedewo” katã—nusiwo ƒe tame wòɖona—vaa eme.—Yosua 23:14.

 2. Yehowa ƒe adaŋudede kae Yesaya gblɔ azɔ, eye anye du ka ŋue adaŋudede sia ku ɖo?

² Yehowa ƒe adaŋudedewo ƒe ɖewoe nye ʋɔnudrɔ̃nya siwo wògblɔ ɖe Israel ƒe futɔwo ŋu. Fifia Yesaya gblɔ nya mawo dometɔ ɖeka be: “Èna du la zu anyiglãgo, eye mɔ̃ sesẽ la zu glikpo, du bubu me tɔwo ƒe fiasã maganye du o, eye womagatui akpɔ gbeɖegbeɖe o.” (Yesaya 25:2) Du kae nye sia si ƒe ŋkɔ womeyɔ o? Ðewohĩ Ar si le Moab ye Yesaya wɔnɛ—Moab nye Mawu ƒe amewo ƒe futɔ tso gbaɖegbe ke.a Alo ɖewohĩ du sesẽ bubu—si nye Babilon—ye wòwɔnɛ.—Yesaya 15:1; Zefanya 2:8, 9.

 3. Mɔ ka nue Yehowa ƒe futɔwo ade bubu eŋu le?

³ Aleke Yehowa ƒe futɔwo awɔ nui ne adaŋu si wòde ɖe woƒe du sesẽawo ŋu va eme? “Dukɔ nyanyrãwo ade bubu ŋuwò, eye dukɔ [ameteɖeanyilawo, “NW”] ƒe duwo avɔ̃ wò.” (Yesaya 25:3) Gɔmesese le eŋu be Mawu ŋusẽkatãtɔ la ƒe futɔwo navɔ̃e. Gake aleke woade bubu eŋui? Ðe woaɖe asi le woƒe alakpamawuwo ŋu ava tadedeagu dzadzɛ mea? Ao, womawɔ nenema o! Ke boŋ abe Farao kple Nebukadnezar ene la, ne wozi wo dzi wode dzesi alesi eƒe ŋusẽ tri akɔe vɔ hafi woade bubu Yehowa ŋu.—Mose II, 10:16, 17; 12:30-33; Daniel 4:34.

 4. ‘Dukɔ ameteɖeanyilawo ƒe du’ kae li egbea, eye aleke wòdzɔe be eya gɔ̃ hã de bubu Yehowa ŋu?

⁴ Egbea ‘dukɔ ameteɖeanyilawo ƒe du’ la nye “du gã, si le fia ɖum ɖe anyigba dzi fiawo dzi,” si nye “Babilon gã,” alakpasubɔsubɔ ƒe xexemefiaɖuƒe la. (Nyaɖeɖefia 17:5, 18) Fiaɖuƒe sia ƒe akpa vevitɔe nye Kristodukɔa. Aleke Kristodukɔa ƒe subɔsubɔhakplɔlawo dea bubu Yehowa ŋui? To alesi wotsɔa vevesese lɔ̃na ɖe edzi be ewɔ nu wɔnukuwo na eƒe Ðasefowo la mee. Vevietɔ le ƒe 1919 me esime Yehowa gaɖo esubɔlawo te eye wotsɔ dzo ɖe dɔ ŋu le woƒe dodo le gbɔgbɔmeboyomenɔnɔ le Babilon Gã la me megbe la, kplɔla siawo “vɔ̃ ŋutɔ, eye wotsɔ ŋutikɔkɔe na dziƒo Mawu la.”—Nyaɖeɖefia 11:13.b

 5. Aleke Yehowa kpɔa amesiwo kana ɖe edzi bliboe la tae?

⁵ Togbɔ be Yehowa ƒe futɔwo vɔ̃na nɛ hã la, enye sitsoƒe na ame fafa kple ɖokuibɔbɔla siwo dina be yewoasubɔe. Mawusubɔsubɔ kple dunyahehe me ameteɖeanyilawo awɔ nusianu be woatsɔ agblẽ tadeagula vavãwo ƒe xɔse mee, gake wodoa kpo nu elabena amesiawo kana ɖe Yehowa dzi bliboe. Mlɔeba la, amiã nu na eƒe tsitretsiɖeŋulawo bɔbɔe, eye anɔ abe ɖe wòtsɔ alilikpo dodo xe ɣe ƒe keklẽ sesẽ nu le dzogbe alo tsɔ gli xe ahom nu ene.—Xlẽ Yesaya 25:4, 5.

‘Woɖo Kplɔ̃ na Amesiame’

6, 7. (a) Kplɔ̃ ka tɔgbe ye Yehowa ɖona, eye amekawoe wòɖonɛ na? (b) Nukae kplɔ̃ɖoɖo si Yesaya gblɔ ɖi la nye kpɔɖeŋu na?

⁶ Esi Yehowa nye vifofo lɔ̃ame ta la, menye ɖeko wòkpɔa viawo ta o ke enyia wo hã, vevietɔ le gbɔgbɔ me. Esi wòna ablɔɖe eƒe amewo le ƒe 1919 me megbe la, eɖo aʋadziɖuɖukplɔ̃ aɖe na wo, si nye gbɔgbɔmenuɖuɖu gbogbo si wònana wo: “Yehowa Zebaot atsɔ nuɖuɖu damiwo kple wein, siwo ɖo ƒã la, atu aglo na dukɔwo katã ɖe to sia dzi; nuɖuɖuawo da ami, eye ƒutome mi le wo me, weinawo ɖo ƒã, eye wo me dza.”—Yesaya 25:6.

⁷ Woɖo kplɔ̃a ɖe Yehowa ƒe “to” dzi. Nukae to sia nye? Enye “Yehowa ƒe aƒe ƒe to” si ŋu dukɔwo katã le zi ƒom ɖo “le ŋkeke mlɔeawo me.” Enye Yehowa ƒe “to kɔkɔe,” afisi esubɔla nuteƒewɔlawo mewɔa nuvevi ame loo alo gblẽa nu le o. (Yesaya 2:2; 11:9) Tadeagunɔƒe kɔkɔ siae Yehowa ɖo kplɔ̃ gã na eƒe nuteƒewɔlawo le. Eye gbɔgbɔ me nu nyui gbogbo siwo wonaa mí fifia la nye kpɔɖeŋu na ŋutilã me nu nyui siwo woana mí ne Mawu ƒe Fiaɖuƒea ɖeɖeko va le ameƒomea dzi ɖum. Dɔwuame maganɔ anyi ɣemaɣi o. “Bli ado kpekpekpe le anyigba dzi kple towo tame.”—Psalmo 72:8, 16.

8, 9. (a) Ameƒomea ƒe futɔ gã eve kawoe woaɖe ɖa? Ðe eme. (b) Nukae Mawu awɔ atsɔ aɖe eƒe amewo ƒe vlodoame ɖa?

⁸ Mɔkpɔkpɔ nyuiwo le amesiwo ɖua nu le Mawu ƒe gbɔgbɔmekplɔ̃a ŋu si. Se nya siwo Yesaya gagblɔ ɖa. Etsɔ nuvɔ̃ kple ku sɔ kple “avɔ,” alo “nutsyɔnu” si tsia gbɔgbɔtsixe ɖe ame ƒo hegblɔ be: “Woaɖe avɔ, si tsyɔ dukɔwo katã dzi, kple nutsyɔnu, si tsyɔ anyigba dzi dukɔwo katã dzi la ɖa le to sia dzi. Ami ku saɖagatsi tegbee, eye Aƒetɔ Yehowa atutu aɖatsi ɖa le ŋkuwo katã me.”—Yesaya 25:7, 8a.

⁹ Ẽ, nuvɔ̃ kple ku maganɔ anyi o! (Nyaɖeɖefia 21:3, 4) Tsɔ kpe ɖe eŋu la, woaɖe aʋatsokaɖeamesi ƒe vlodoame si me Yehowa subɔlawo to ƒe akpe geɖe enye sia la hã ɖa. “[Aɖe] eƒe dɔlawo ƒe ŋukpe ɖa tso anyigba blibo la dzi. Elabena Yehowa ye gblɔe.” (Yesaya 25:8b) Aleke esia ava emee? Yehowa aɖe Satana kple eƒe dzidzimevi, amesiwo gbɔ vlodoame ma tso la ɖa. (Nyaɖeɖefia 20:1-3) Eyata mawɔ nuku o be esia naʋã Mawu ƒe amewo woado ɣli agblɔ be: “Kpɔ ɖa, mía Mawu, amesi ŋu míeɖo ŋu ɖo be, aɖe mí la, enye si; Yehowa, amesi ŋu míeɖo ŋu ɖo la, enye si! Mina míatso aseye, eye míakpɔ dzidzɔ le eƒe xɔname ŋu!”—Yesaya 25:9.

Woabɔbɔ Dadalawo Ðe Anyi

10, 11. To sesẽ kae Yehowa ɖo be yeahe na Moab?

¹⁰ Yehowa ɖe eƒe ame siwo ɖea ɖokuibɔbɔ fiana. Gake Moab si te ɖe Israel ŋu la dana, eye Yehowa tsri dada. (Lododowo 16:18) Eyata woɖoe be woabɔbɔ Moab ɖe anyi. “Yehowa ƒe asi aɖiɖi ɖe to sia dzi, eye wòafanya Moab ɖe enɔƒe, abe alesi wofanyaa gbe ɖe agboti me ene; akeke abɔ me le eme, abe alesi tsiƒula kekea abɔ, be yeaƒu tsi ene; ke ate eƒe dàda kple eƒe ayedzesiwo ɖe to. Eye wòagbã wò gli kɔkɔ sesẽwo aƒu anyi, abɔbɔ wò ɖe anyi, eye wòate wò ɖe ke me.”—Yesaya 25:10-12.

¹¹ Yehowa ƒe asi “aɖiɖi” ɖe Moab-to dzi. Nukae ado tso eme? Woaƒo Moab dadala la ahafanyae abe alesi wofanyaa nu ɖe “agboti me” ene. Le Yesaya ƒe ɣeyiɣia me la, wofanyaa gbe ɖe lãmĩ siwo woli kɔ ɖi me be wòazu anyigbanyonu; eyata Yesaya gblɔe ɖi be woabɔbɔ Moab ɖe anyi, togbɔ be edze abe ɖe eƒe gli kɔkɔawo le dedie ene hã.

12. Nukata wogblɔ Yehowa ƒe ʋɔnudrɔ̃nyawo ɖe Moab ɖeɖeko ŋu?

¹² Nukata Yehowa de adaŋu sesẽ sia ɖe Moab ɖeɖeko ŋu? Lot si nye Abraham tɔgãyɔvi kple Yehowa subɔla la ƒe dzidzimeviwoe Moabtɔwo nye. Eyata menye ɖeko wodo liƒo kple Mawu ƒe dukɔ si wòbla nu kpli la ko o ke wonye woƒe ƒometɔwo hã. Togbɔ be ele alea hã la, alakpamawuwoe wosubɔna eye woɖee fia be yewoléa fu Israel vevie. Wodze na nusi ava dzɔ ɖe wo dzi la. Le go sia me la, Moabtɔwo ɖi Yehowa subɔlawo ƒe futɔ siwo li egbea. Vevietɔ eɖi Kristodukɔa si gblɔ be ƒe alafa gbãtɔ me Kristo-hamea mee yewodzɔ tso, evɔ wohenye Babilon Gã la ƒe akpa vevitɔ, abe alesi míekpɔe va yi ene.

Xɔnameha Aɖe

13, 14. “Du sesẽ” kae le Mawu ƒe amewo si egbea, eye amekawoe woɖea mɔ na be woage ɖe eme?

¹³ Ke Mawu ƒe amewo ya ɖe? Esi Yehowa ƒe ŋudzedzekpɔkpɔ ɖe wo ŋu kple wo ta kpɔkpɔ dzɔa dzi na wo ta la, wokɔ woƒe gbe dzi hedzi ha. “Ɣemaɣi woadzi ha sia le Yuda-nyigba dzi be: Du sesẽ le mía si, etsɔ eƒe xɔname wɔ gli kple ʋewo na mí. Miʋu agboawo, ne dukɔ dzɔdzɔe, si dzraa nyateƒe ɖo la, nage ɖe eme.” (Yesaya 26:1, 2) Togbɔ be ɖikeke mele eme o be nya siawo va eme le blema hã la, edze ƒã be wogava eme egbea hã. Wona Yehowa ƒe “dukɔ dzɔdzɔe,”si nye gbɔgbɔ me Israel la zu habɔbɔ sẽŋu aɖe si le abe du ene. Dzidzɔnya kae nye si bia hadzidzi ale!

¹⁴ Amekawo ƒomeviwoe vaa “du” sia me? Ŋuɖoɖoa dze le hadzidzia me be: “[Mawu,] ètsɔ ŋutifafa dzra amesi ƒe susu li ke la ɖo, elabena eɖo dzi ɖe ŋuwò. Miɖo dzi ɖe Yehowa ŋu ɖaa, elabena [Yah, “NW”] Yehowa enye agakpe tegbee.” (Yesaya 26:3, 4) “Susu” si ta Yehowa kpɔnae nye didi be woawɔ ɖe eƒe gɔmeɖose dzɔdzɔeawo dzi eye be woaɖo ŋu ɖe eŋu, ke menye ɖe xexeame ƒe ganya, dunyahehe, kple subɔsubɔ nuɖoanyi malikeawo ŋu o. “Yah Yehowa” koe nye dedienɔnɔ ƒe Agakpe si ŋu kakaɖedzi le. Amesiwo kana ɖe Yehowa dzi bliboe la kpɔa eƒe ametakpɔkpɔ eye wonɔa “ŋutifafa” me.—Lododowo 3:5, 6; Filipitɔwo 4:6, 7.

15. Aleke wobɔbɔ “du kɔkɔ” la ɖe anyi egbeae, eye mɔ ka nue “ame dahewo ƒe afɔ” fanyanae le?

¹⁵ Aleke nusi adzɔ ɖe Mawu ƒe dukɔ ƒe futɔwo dzi to vovoe nye si! “Eƒu kɔkɔƒenɔlawo anyi, ebɔbɔ du kɔkɔ la ɖe anyi, ebɔbɔe vaseɖe anyigba ke, eye wòtee ɖe ke me. Afɔ fanya wo, ame dahewo ƒe afɔ kple hiãtɔwo ƒe afɔɖeɖe.” (Yesaya 26:5, 6) Ðewohĩ “du kɔkɔ” aɖe si le Moab ye Yesaya wɔnɛ le afisia hã, alo ate ŋu anye du bubu aɖe, abe Babilon si edze ƒã be edo eɖokui ɖe dzi kakaka ene lae wòwɔnɛ. Du ka ke wòɖanye o, Yehowa na nɔnɔmea trɔ dze “du kɔkɔ” la dzi eye eƒe ‘ame dahewo kple hiãtɔwo’ fanyae le afɔ te. Nyagblɔɖi sia sɔ na Babilon Gã la nyuie egbea, vevietɔ Kristodukɔa. Le ƒe 1919 me la, wozi “du kɔkɔ” sia dzi wòɖe asi le Yehowa ƒe amewo ŋu—si nye eƒe anyidzedze gbɔɖiametɔe—eye woawo hã fanyaa amesiawo siwo lé wo aboyoe tsã la. (Nyaɖeɖefia 14:8) Aleke wofanyaa woe? To alesi woɖea gbeƒã Yehowa ƒe dziku si gbɔna wo dzi la le gaglãgbe me.—Nyaɖeɖefia 8:7-12; 9:14-19.

Dzɔdzɔenyenye Kple Yehowa ƒe “Ŋkuɖodzi” Didi

16. Ðokuitsɔtsɔna ƒe kpɔɖeŋu kae Yesaya ɖo?

¹⁶ Le aʋadziɖuha sia megbe la, Yesaya ɖe alesi eya ŋutɔ ƒe ɖokuitsɔtsɔna de toe kple teƒeɖoɖo siwo le dzɔdzɔenyenye Mawu la subɔsubɔ me fia. (Xlẽ Yesaya 26:7-9.) Nyagblɔɖila la ɖo kpɔɖeŋu nyui aɖe ɖi le ‘mɔkpɔkpɔ na Yehowa’ kple dzodzro sẽŋu na Yehowa ƒe “ŋkɔ” kple eƒe “ŋkuɖodzi” me. Nukae nye Yehowa ƒe ŋkuɖodzi? Mose II, 3:15 gblɔ be: “Yehowa . . . nye nye ŋkɔ tegbee, eye nye ŋkɔ sia dzidzimewo katã woayɔ.” (NW) Yesaya kpɔa dzidzɔ ɖe Yehowa ƒe ŋkɔa kple nusiwo katã wòtsi tre ɖi na ŋu, tsɔ kpe ɖe Eƒe dzidzenu kple mɔ dzɔdzɔeawo ŋu. Kakaɖedzi li be Yehowa ayra amesiwo tua lɔlɔ̃ sia tɔgbe ɖo na eyama.—Psalmo 5:9; 25:4, 5; 135:13; Hosea 12:6.

17. Mɔnukpɔkpɔ kawoe womana ame vɔ̃ɖiwo o?

¹⁷ Gake menye amesiamee lɔ̃ Yehowa kple eƒe dzidzenu kɔkɔawo o. (Xlẽ Yesaya 26:10.) Ne wokpe ame vɔ̃ɖiwo be woava srɔ̃ dzɔdzɔenyenye ale be woayi “anyigba dzɔdzɔe,” anyigba si dzi Yehowa subɔla siwo wɔa nu dzɔdzɔe le agbenɔnɔ kple gbɔgbɔ me le dzi hã la, wogbena. Esia ta ame vɔ̃ɖiwo ‘makpɔ Yehowa ƒe gãnyenye o.’ Womanɔ agbe akpɔ yayra siwo woadudu ɖe ameƒomea dzi ne wokɔ Yehowa ƒe ŋkɔ ŋuti vɔ megbe la o. Le nuɖoanyi yeyea me, esime anyigba bliboa katã anye “anyigba dzɔdzɔe” gɔ̃ hã la, ame aɖewo agbe Yehowa ƒe amenuveve ŋudɔwɔwɔ. Womaŋlɔ amesiawo tɔgbe ƒe ŋkɔ ɖe agbegbalẽa me o.—Yesaya 65:20; Nyaɖeɖefia 20:12, 15.

18. Mɔ ka nue ame aɖewo ŋutɔ ɖoe be yewoanye ŋkuagbãtɔwo le Yesaya ƒe ŋkekea me le, eye ɣekaɣi woazi wo dzi be “woakpɔ” Yehowa?

¹⁸ “Yehowa, wò alɔ le dzi, ke womele ekpɔm o; woakpɔ ŋuʋaʋã ɖe dukɔ la ŋu, eye ŋu akpe wo, eye dzo afiã wò ketɔwo.” (Yesaya 26:11) Le Yesaya ƒe ŋkekea me la, enɔ dzedzem be Yehowa ƒe alɔ nɔ dzi esime Yehowa kpɔ eƒe dukɔa ta to alesi wòtso ɖe woƒe futɔwo ŋu me. Gake ame akpa gãtɔ mekpɔ esia dze sii o. Woazi amesiawo siwo ɖoe be yewoanye gbɔgbɔmeŋkuagbãtɔwo la dzi mlɔeba be “woakpɔ” Yehowa, alo woalɔ̃ ɖe edzi be eli, ne eƒe ŋuʋaʋã ƒe dzo fiã wo. (Zefanya 1:18) Emegbe Mawu gblɔ na Xezekiel be: “Woadze sii be, nyee nye Yehowa.”—Xezekiel 38:23.

‘Amesi Yehowa Lɔ̃na la, Eya Wòhea To Na’

19, 20. Nutaka Yehowa he to na eƒe dukɔ la eye aleke wòwɔe, eye amekawoe tohehe sia ɖe vi na?

¹⁹ Yesaya nya be Yehowa ƒe yayra gbɔe ŋutifafa kple nudzedziname ɖesiaɖe si yewo detɔwo kpɔ la tso. “Yehowa, ana ŋutifafa mí, elabena èwɔ míaƒe dɔwo katã de goe na mí.” (Yesaya 26:12) Togbɔ be enɔ alea eye togbɔ be Yehowa tsɔ mɔnukpɔkpɔa ɖo eƒe dukɔa ŋkume be woava zu “nunɔlawo ƒe fiaɖuƒe kple dukɔ kɔkɔe” hã la, nɔnɔme nyui kple gbegblẽawo siaae dze le Yuda ƒe ŋutinya me. (Mose II, 19:6) Dukɔa me tɔwo trɔ megbe va de ta agu na alakpamawuwo zi geɖe. Esia na wohe to na wo enuenu. Gake tohehe sia ɖo kpe edzi be Yehowa lɔ̃ wo, elabena ‘amesi ke Yehowa lɔ̃na la, eya wòhea to na.’—Hebritɔwo 12:6.

²⁰ Zi geɖe la, Yehowa ɖea mɔ dukɔ bubuwo, siwo nye ‘aƒetɔ bubuwo,’ ɖua eƒe dukɔ dzi tsɔ hea to na woe. (Xlẽ Yesaya 26:13.) Le ƒe 607 D.M.Ŋ. me la, eɖe mɔ Babilontɔwo kplɔ wo yi aboyo me. Ðe esia ɖe vi na woa? Fukpekpe dzro ko meɖea vi na ame o. Gake ne fukpela la srɔ̃ nu tso nusi dzɔ me, trɔ dzime, eye wòtsɔ subɔsubɔ na Yehowa ɖeka ko hafi wòɖea vi nɛ. (Mose V, 4:25-31) Ðe Yudatɔ aɖewo ɖe mawumedzimetɔtrɔ fiaa? Ẽ! Yesaya gblɔe wònye nyagblɔɖi be: “Wò ɖeɖe kple wò ŋkɔ ko míakafu!” Esi Yudatɔwo trɔ gbɔ tso aboyo me le ƒe 537 D.M.Ŋ. me megbe la, eva hiã be woahe to na wo enuenu ɖe nuvɔ̃ bubuwo ta, gake womegava de ta agu na mawu siwo nye kpewo gbeɖe o.

21. Nukae adzɔ ɖe amesiwo te Mawu ƒe dukɔ ɖe anyi la dzi?

²¹ Ke amesiwo ɖe aboyo Yuda ya ɖe? “Ame kukuwo megagbɔa agbe o, eye ŋɔliwo megafɔna o; eyata nèhe to na wo hetsrɔ̃ wo, eye nètsi woƒe ŋkɔwo katã nu.” (Yesaya 26:14) Babilon akpe fu ɖe ŋutasẽnu siwo wòwɔ ɖe Yehowa ƒe dukɔ tiatia la ŋu ta. Yehowa ato Media kple Persia tɔwo dzi atsrɔ̃ dadalawo ƒe dukɔ Babilon eye wòana ablɔɖe eƒe ame siwo woɖe aboyoe. Agbe maganɔ Babilon-dugã la me o, eye anɔ ko abe ɖe wòku ene. Mlɔeba la, maganɔ anyi kura o.

22. Aleke woyra Mawu ƒe amewo le egbeŋkekea mee?

²² Le emevava egbegbetɔ me la, wona ablɔɖe gbɔgbɔ me Israel si ŋu wokɔ la tso Babilon Gã la me eye wogaɖo wo te na Yehowa subɔsubɔ le ƒe 1919 me. Esi ŋusẽ gaɖo Kristotɔ amesiaminawo ŋu la, wotsɔ wo ɖokui katã de gbeƒãɖeɖedɔa me. (Mateo 24:14) Esia na Yehowa hã yra wo wokpɔ dzidziɖedzi, eye ena “alẽ bubuwo” ƒe ameha gã aɖe gɔ̃ hã va le subɔsubɔm kpli wo. (Yohanes 10:16) “Èna dukɔ la dzi ɖe dzi, Yehowa, èna dukɔ la dzi ɖe dzi, ède bubu ɖokuiwò ŋu, eye nèkeke anyigba ƒe liƒowo katã ɖe nu. Yehowa, wodi wò le hiã me, eye esi wò tohename va wo dzi la, wotrɔ woƒe dzi me nyawo ƒo ɖe anyi.”—Yesaya 26:15, 16.

‘Woafɔ ɖe Tsitre’

23. (a) Aleke Yehowa ɖe eƒe ŋusẽ fia wòɖe dzesi le ƒe 537 D.M.Ŋ. me? (b) Nusia tɔgbe kae dzɔ le ƒe 1919 M.Ŋ. me?

²³ Yesaya gatrɔ susu ɖe nɔnɔme siwo dze ŋgɔ Yuda esime wokpɔtɔ nye aboyomewo le Babilon la ŋu. Etsɔ dukɔa sɔ kple nyɔnu si le ku lém gake ame aɖeke meli akpe ɖe eŋu wòadzi vi o. (Xlẽ Yesaya 26:17, 18.) Yehowa ƒe amewo kpɔ kpekpeɖeŋu ma le ƒe 537 D.M.Ŋ. me, eye wotrɔ yi wo denyigba dzi kple didi vevie be yewoagbugbɔ gbedoxɔa atu eye yewoagaɖo tadedeagu dzadzɛ anyi. Wofɔ dukɔa tso ku me le gɔmesese sia nu. “Wò ame kukuwo agbɔ agbe, eye nye ame kukuwo afɔ ɖe tsitre! Minyɔ, mi ketu me tɔwo, eye mitso aseye, elabena miaƒe zãmu enye kekeli ƒe zãmu, eye anyigba aɖe ŋɔliwo ana.” (Yesaya 26:19) Yehowa ƒe ŋusẽ ɖeɖefia ka gbegbee nye si! Tsɔ kpe ɖe eŋu la, nu gã ka gbegbee nye si wòwɔ esime nya siawo va eme le gbɔgbɔmegɔmesese nu le ƒe 1919 me! (Nyaɖeɖefia 11:7-11) Eye aleke gbegbe míele mɔ kpɔm na ɣeyiɣi si me nya siawo ava eme ŋutɔŋutɔ ɖe nyaawo nu le xexe yeyea me enye si, esime ame kukuwo ‘ase Yesu ƒe gbe eye woado go’ tso ŋkuɖodziyɔdowo me!—Yohanes 5:28, 29.

24, 25. (a) Aleke Yudatɔ siwo nɔ anyi le ƒe 539 D.M.Ŋ. ate ŋu awɔ ɖe Yehowa ƒe sedede be woaɣla wo ɖokui la dzii? (b) Nukae “xɔgã” la ate ŋu afia le egbeɣeyiɣiwo me, eye nɔnɔme kae wòle be wòanɔ mía si ɖe nusiawo ŋu?

²⁴ Gake ele be nuteƒewɔlawo nawɔ ɖe Yehowa ƒe sededewo dzi hafi woakpɔ gbɔgbɔmeyayra siwo wogblɔ ɖi to Yesaya dzi: “Nye dukɔ, yi ɖe wò xɔgã me, eye nado ʋɔ ɖe ɖokuiwò nu, ɣla ɖokuiwò vie, vaseɖe esime dziku la nu nava yi. Elabena Yehowa ado tso enɔƒe, ne wòaxe anyigbadzitɔwo ƒe vodada ŋu fe na wo, anyigba aklo nu le eƒe ʋu dzi, eye magatsyɔ nu amesiwo wowu ɖe edzi la dzi o.” (Yesaya 26:20, 21; tsɔe sɔ kple Zefanya 1:14.) Ðewohĩ nya siawo va eme zi gbãtɔ esime Media kple Persia tɔ siwo Fia Kores nɔ ŋgɔ na ɖu Babilon dzi le ƒe 539 D.M.Ŋ. me. Helatɔ ŋutinyaŋlɔla Xenophon gblɔ be esime Kores ge ɖe Babilon la, ede se be amesiame nanɔ eƒe aƒeme elabena “wode se na” eƒe asrafo sɔdolawo “be woawu amesiwo katã woakpɔ le gota.” Egbea míate ŋu atsɔ “xɔgã” si woyɔ le nyagblɔɖi sia me asɔ kple Yehowa ƒe amewo ƒe hame akpe bla nane siwo le xexeame godoo. Hame siawo ayi edzi awɔ akpa vevi aɖe le míaƒe agbenɔnɔ me, le “xaxa gã” la me gɔ̃ hã. (Nyaɖeɖefia 7:14) Aleke wòle vevie nye si be míaɖe nɔnɔme nyuitɔ afia ɖe hamea ŋu eye míade ha kplii edziedzi!—Hebritɔwo 10:24, 25.

²⁵ Eteƒe madidi o Satana ƒe xexea nu ava yi. Míenya mɔ si dzi Yehowa ato aɖe eƒe amewo le ɣeyiɣi dziŋɔ ma me haɖe o. (Zefanya 2:3) Gake míenya be míaƒe Yehowa dzixɔse kple míaƒe nuteƒewɔwɔ kpakple toɖoɖo dzie míaƒe agbetsitsi nɔ te ɖo.

26. Nukae nye “Leviatan” le Yesaya ƒe ŋkekea me kple míaƒe ŋkekea me, eye nukae adzɔ ɖe ‘boso si le atsiaƒu me’ la dzi?

²⁶ Ɣeyiɣi ma nɔ susu me na Yesaya wògblɔ ɖi be: “Ɣemaɣi la Yehowa atsɔ eƒe yi kpekpe gã sesẽ la ahe to na [Leviatan, “NW”], si nye da, si le sisim, kple [Leviatan], si nye da xatsaxatsa la, eye wòawu boso le atsiaƒu me.” (Yesaya 27:1) Le emevava gbãtɔ me la, “Leviatan” la nye dukɔ siwo me woka Israel hlẽ ɖo, siwo ƒe ɖewoe nye Babilon, Egipte, kple Asiria. Ne ɣeyiɣi nyuitɔ ɖo la, dukɔ siawo mate ŋu axe mɔ na Yehowa ƒe amewo be womegatrɔ yi wo denyigba dzi o. Gake amekae nye egbeŋkekea me Leviatan la? Edze abe eyae nye Satana—“da xoxo la”—kple eƒe nuɖoanyi vɔ̃ɖi si le anyigba dzi afisia, si nye nusi wòzãna tsɔ wɔa aʋae kple gbɔgbɔ me Israel la ene. (Nyaɖeɖefia 12:9, 10; 13:14, 16, 17; 18:24) “Leviatan” megava kpɔ ŋusẽ ɖe Mawu ƒe amewo dzi o tso ƒe 1919 me, eye eteƒe madidi o abu keŋkeŋ ne Yehowa ‘wu boso la le atsiaƒu me.’ Hafi ɣemaɣi naɖo la, “Leviatan” mate ŋu awɔ naneke Yehowa ƒe amewo wòadze dzi nɛ ŋutɔŋutɔ o.—Yesaya 54:17.

“Weingble Nyo La”

27, 28. (a) Nukae Yehowa ƒe weingble la tsɔ yɔ anyigba dzi katã? (b) Aleke Yehowa kpɔa eƒe weingble la tae?

²⁷ Azɔ Yesaya gadzi ha bubu tsɔ wɔ alesi Yehowa ƒe dukɔ si wona ablɔɖee la atse kui la ƒe kpɔɖeŋu wòsɔ nyuie be: “Ɣemaɣi la midzi ha le weingble nyo la ŋu be: Nye Yehowa manye eŋu dzɔla, eye made tsii ɣesiaɣi, be naneke magawɔe o; madzɔ eŋu zã kple keli.” (Yesaya 27:2, 3) Gbɔgbɔ me Israel kple woƒe zɔhɛ siwo doa vevie dɔ la tsɔ gbɔgbɔmekutsetsewo yɔ anyigba bliboa dzi nyateƒe. Nukae nye sia si dze na aseyetsotso—hegadze na hadzidzi ale! Kafukafua katã nye Yehowa tɔ, amesi dzɔa eƒe weingble la ŋu lɔlɔ̃tɔe.—Tsɔe sɔ kple Yohanes 15:1-8.

²⁸ Dzidzɔ va xɔ ɖe dziku si Yehowa do tsã la teƒe vavã! “Dzi mele kuyem o; ne makpɔ aŋɔkawo kple ŋuwo la, maho aʋa ɖe wo ŋu atɔ dzo wo katã; negbe ɖeko woava sim atso, eye woawɔ ŋutifafa kplim hafi, ŋutifafa ko woawɔ kplim hafi!” (Yesaya 27:4, 5) Esi Yehowa di be yeƒe weinkawo nayi edzi atse ‘weinku nyui’ gbogbo aɖe ta la, egbãa ŋusẽkpɔɖeamedzi ɖesiaɖe si le abe gbe ene si ate ŋu agblẽ eƒe weingble la eye wòɖenɛ ɖa abe ɖe wòtɔ dzoe ene. Eyata ame aɖeke megawɔ nusi agblẽ Kristo-hamea ƒe nyonyo me o! Ke boŋ amesiame ‘nesi Yehowa tso,’ eye wòadi eƒe ŋudzedzekpɔkpɔ kple ametakpɔkpɔ. Woato esia wɔwɔ me awɔ ŋutifafa kple Mawu—nusi le vevie ale gbegbe be Yesaya gblɔe zi eve sɔŋ. Nukae ado tso eme? “Le ŋkeke, siwo gbɔna me la, Yakob ato ke, Israel adze, eye wòaƒo se, eye eƒe kutsetse ayɔ xexeame taŋ.” (Yesaya 27:6)c Aleke kpukpui sia me vava ɖe Yehowa ƒe ŋusẽ fia enye si! Tso ƒe 1919 me la, Kristotɔ amesiaminawo tsɔ “kutsetse,” si nye gbɔgbɔmenuɖuɖu dami, yɔ anyigba la dzii. Esia na be nuteƒewɔla miliɔn geɖe siwo nye alẽ bubuawo la va wɔ ɖeka kpli wo, eye wo kple amesiawo le ‘subɔsubɔ kɔkɔe tsɔm na Mawu zã kple keli.’ (Nyaɖeɖefia 7:15) Amesiawo léa eƒe dzidzenu kɔkɔawo me ɖe asi togbɔ be xexe gblẽku mee wole hã. Eye Yehowa yi edzi tsɔ dzidziɖedzi le wo yram. Megadzɔ gbeɖe be míaŋlɔ mɔnukpɔkpɔ gã si su mía si be míanɔ “kutsetse” la ɖum eye míana ɖe ame bubuwo to mía ŋutɔwo ƒe kafukafunyawo gbɔgblɔ me la be o!

[Etenuŋɔŋlɔwo]

[Aɖaka si le axa 285]

“Kpẽ Gã” aɖe Ðe Gbeƒã Ablɔɖekpɔkpɔ

Le ƒe 607 D.M.Ŋ. me la, Yuda ƒe vevesese dzi ɖe edzi esime Yehowa tsɔ aboyomenɔnɔ ƒe ati ƒo eƒe dukɔ dzego lae. (Xlẽ Yesaya 27:7-11.) Dukɔa ƒe vodada lolo ale gbegbe be manya wɔ be woatsɔ lãwo ƒe vɔsa alé avui o. Eyata Yehowa nyã Israel ɖa tso wo denyigba dzi abe alesi wotsɔa ‘vɔvɔ̃doameɣli’ dea zi alẽwo alo gbɔ̃wo mee ene, alo abe alesi ya ʋudu ‘kplɔa’ aŋgbawo ɖae ene. Le esia megbe la, ame beli, siwo wotsɔ nyɔnuwo wɔ kpɔɖeŋu na, gɔ̃ hã ate ŋu agblẽ nusiwo susɔ ɖe anyigba la dzi.

Gake ɣeyiɣia ade be Yehowa naɖe eƒe dukɔ tso aboyo me. Ana ablɔɖe wo abe alesi agbledela naa ablɔɖe amiti ƒe tsetsee le ati dzi ene, le kpɔɖeŋumɔ nu. “Ava me le ɣemaɣi be, Yehowa atsɔ ati aƒo luwo tso [Frat] tɔsisi la nu vaseɖe Egipte-tɔʋu la nu, eye woafɔ mi ɖekaɖeka, mi Israel-viwo. Eye wòava me be, woaku kpẽ gã la, eye amesiwo bu ɖe Asur-nyigba dzi kple amesiwo wonyã de gbe ɖe Egipte-nyigba dzi la, ava ado gbe ɖa le Yehowa ŋku me le to kɔkɔe la dzi le Yerusalem.” (Yesaya 27:12, 13) Le Kores ƒe aʋadziɖuɖu le ƒe 539 D.M.Ŋ. megbe la, ede se aɖe si na ablɔɖe Yudatɔ siwo katã nɔ eƒe fiaɖuƒea, si me Asiria kple Egipte hã nɔ la me. (Ezra 1:1-4) Enɔ abe ɖe “kpẽ gã” ɖi, wònye Mawu ƒe dukɔa ƒe ablɔɖekpɔkpɔ ŋuti kafukafuha ene.

[Nɔnɔmetata siwo le axa 275]

‘Woatsɔ nuɖuɖu damiwo aɖo kplɔ̃e’

[Nɔnɔmetata si le axa 277]

Amesiwo nye gamenɔlawo le Babilon tsã la fanyae le woƒe afɔ te

[Nɔnɔmetata si le axa 278]

“Yi ɖe wò xɔgã me”