Ta Blaeve Vɔ Evelia
Yesaya Gblɔ “Dɔ Tutɔ” si Yehowa Awɔ Ði
1, 2. Nukata Israel kple Yuda bu be yewole dedie?
ISRAEL kple Yuda bui ɣeyiɣi kpui aɖe be yewole dedie. Wo kplɔlawo bla nu kple dukɔ sesẽ siwo lolo wu kple susu be yewoakpɔ dedienɔnɔ le yewoƒe nuto dziŋɔa me. Samaria si nye Israel ƒe fiadu la di kpekpeɖeŋu le Siria gbɔ, eye Yerusalem si nye Yuda ƒe fiadu la hã tsɔ eƒe mɔkpɔkpɔ da ɖe Asiriatɔ ŋutasẽlawo dzi.
2 Tsɔ kpe ɖe dziehefiaɖuƒea ƒe ŋuɖoɖo ɖe dukɔ siwo wobla nu kpli yeyee ŋu la, woganɔ mɔ kpɔm be Yehowa akpɔ yewo ta—togbɔ be woyia edzi zãa sikanyiviwo le tadedeagu me hã. Yuda hã ka ɖe edzi be yeate ŋu aɖo ŋu ɖe Yehowa ƒe ametakpɔkpɔ ŋu. Ne mede ɖeke o hã la, ɖe menye Yerusalem si nye woƒe fiadua mee Yehowa ƒe gbedoxɔa le oa? Gake nudzɔdzɔ aɖewo siwo womenɔ mɔ kpɔm na o nɔ dukɔ evea siaa ŋgɔ. Yehowa ʋã Yesaya wògblɔ nudzɔdzɔ siwo adze nu tutɔ ŋutɔ na eƒe dukɔ dzego la ɖi. Eye nusɔsrɔ̃ veviwo le eƒe nyaawo me na amesiame egbea.
“Efrayim-hamulawo”
3, 4. Nukae nye dada na Israel-dziehefiaɖuƒea?
3 Yesaya tsɔ nya dovoɖinamewo dze eƒe nyagblɔɖia gɔmee be: “Baba na Efrayim-hamulawo ƒe dàdafiakuku kple eƒe atsyɔ̃ ƒe seƒoƒo dzeani yɔyrɔ, si le weinmulawo ƒe bali wɔnu ta me! Kpɔ ɖa, nu sesẽ kako atso Aƒetɔ la gbɔ ava abe dzikpe ƒe dzadza . . . ƒe gbagba ɖe anyi ene. Woafanya Efrayim-hamulawo ƒe dàdafiakuku kple afɔ.”—Yesaya 28:1-3.
4 Efrayim si nye dzieheto ewoawo dometɔ si xɔ ŋkɔ wu la va tsi tre ɖi na Israel-fiaɖuƒe bliboa. Eƒe fiadu, Samaria, le teƒe vevi dzeani aɖe si le “bali wɔnu ta me.” Efrayim-kplɔlawo ƒoa adegbe ɖe “dadafiakuku” si nye ɖokuisinɔnɔ tso Dawid-ƒomea ƒe fianyenye le Yerusalem si me la ta. Gake wonye ‘ahamulawo,’ eye womu le gbɔgbɔ me le esi wobla nu kple Siria ɖe Yuda ŋu ta. Amedzidzelawo ava afanya nusianu si ŋu wokpɔa dzidzɔ ɖo la le afɔ te kpuie.—Tsɔe sɔ kple Yesaya 29:9.
5. Nɔnɔme dziŋɔ ka mee Israel nɔ, gake mɔkpɔkpɔ kae Yesaya na wo?
5 Efrayim mekpɔ nɔnɔme dziŋɔ si me wònɔ la dze sii o. Yesaya yi edzi be: “[Ava] me na eƒe atsyɔ̃ ƒe seƒoƒo dzeani yɔyrɔ, si le bali wɔnu ta me la, abe gbotsetse, si ɖi, hafi dzomeŋɔli ɖo, esi, ne ame aɖe kpɔe la, mekpɔ ɖoa asi me hafi wòminɛ o la ene.” (Yesaya 28:4) Efrayim adze Asiria si me, eye wòanye nuɖuɖu vivi alɔgomedede ɖeka ko nɛ. Ekema ɖe wòfia be mɔkpɔkpɔ aɖeke megali oa? Abe alesi wònɔna zi geɖe ene la, mɔkpɔkpɔ nɔa Yesaya ƒe ʋɔnudɔdrɔ̃ ŋuti nyagblɔɖiwo me. Ne dukɔa dze anyi hã la, nuteƒewɔla siwo le eme atsi agbe le Yehowa ƒe kpekpeɖeŋu me. “Le ɣemaɣi la Yehowa Zebaot anye atsyɔ̃kuku kple ŋgoblanu dzeani na eƒe dukɔ susɔea; anye ʋɔnudɔdrɔ̃gbɔgbɔ na amesi le ʋɔnudɔdrɔ̃ nu kple ŋusẽ na amesiwo gbugbɔ aʋa ɖo ɖe agbo nu.”—Yesaya 28:5, 6.
‘Wole Ya Mum’
6. Ɣekaɣie wotsrɔ̃ Israel, gake nukata mele be Yuda nakpɔ dzidzɔ o?
6 Akɔntabiagbea ɖo na Samaria le ƒe 740 D.M.Ŋ. me esime Asiria tsrɔ̃ anyigba la eye dziehefiaɖuƒea megava nye dukɔ nɔɖokuisi o. Ke Yuda ya ɖe? Asiriatɔwo ava dze woƒe anyigba la dzi, eye emegbe Babilon atsrɔ̃ woƒe fiadu la. Gake Yuda ƒe gbedoxɔ kple nunɔlanyenye ƒe ɖoɖoa akpɔtɔ anɔ dɔ wɔm eye eƒe nyagblɔɖilawo ayi edzi anɔ nya gblɔm ɖi le Yesaya ƒe agbenɔɣi. Ðe wòle be Yuda nakpɔ dzidzɔ ɖe tsɔtsrɔ̃ si gbɔna wo nɔvi dziehetɔwo dzi ŋua? Kura o! Yehowa abia akɔnta Yuda kple eƒe kplɔlawo hã ɖe woƒe tomaɖomaɖo kple xɔsemanɔamesi ta.
7. Mɔ ka nue Yuda ƒe kplɔlawo mu aha le, eye nukae do tso eme?
7 Yesaya trɔ eƒe nyaa ɖe Yuda ŋu heyi edzi be: “Ke wein le ya mum amesiawo hã, eye aha muame na wole yiyim sagãsagã. Aha muame le ya mum nunɔla kple nyagblɔɖila, wein tɔtɔ ta me na wo, eye aha muame na wole yiyim sagãsagã; wole ya mum le nyagblɔɖi gbɔ, eye wole yiyim sagãsagã le afiatsotso gbɔ. Elabena xeɖeɖe yɔ kplɔ̃wo katã dzi fũ, ale be teƒe aɖeke megali o.” (Yesaya 28:7, 8) Ŋunyɔnu ka gbegbee nye si! Ahamumu le Mawu ƒe aƒeme ŋutɔ nye nu vɔ̃ɖi. Gake nunɔla kple nyagblɔɖila siawo mu le gbɔgbɔ me—woka ɖe nubabla wɔwɔ kple amegbetɔ dzi ale gbegbe be exɔ woƒe susu katã. Woble wo ɖokui hebu be afɔ nyui aɖee nye ma yewoɖe, eye ɖewohĩ woxɔe se be fifia ne Yehowa mete ŋu kpɔ yewo ta o hã la, takpɔnu bubu gale yewo si. Esi subɔsubɔhakplɔla siawo mu le gbɔgbɔ me la, aglãdzedzee woɖe kɔ ɖi, si nye nya ƒaƒã siwo ɖea alesi gbegbe xɔse vavã mele wo si ɖe Mawu ƒe ŋugbedodowo me o wòwɔ nublanui la fiana.
8. Aleke woxɔ Yesaya ƒe gbedasiae?
8 Aleke Yuda ƒe kplɔlawo wɔ nu ɖe Yehowa ƒe nuxlɔ̃amea ŋui? Woɖu fewu le Yesaya ŋu, eye wotsɔ nya ɖe eŋu be eƒo nu na yewo abe ɖeviwoe yewonye ene: “Ameka wòafia sidzedzee, eye ameka wòaɖe nya gɔme na? Ðevi, si dzudzɔ notsi, kple ɖevi, si ɖi le noea? Se ɖe se dzi, se ɖe se dzi, ɖoɖo ɖe ɖoɖo dzi, ɖoɖo ɖe ɖoɖo dzi, afi ʋɛ, game ʋɛ.” (Yesaya 28:9, 10) Yesaya ƒe nyawo dze nyaɖekagbugbɔgblɔ kple nya yeye na wo ale gbegbe! Egblɔnɛ enuenu be: ‘Se si Yehowa de enye si! Se si Yehowa de enye si! Yehowa ƒe ɖoɖo enye be! Yehowa ƒe ɖoɖo enye be!’a Gake eteƒe madidi o Yehowa awɔ nu atsɔ “aƒo nu” na Yudatɔwo. Aɖo Babilon-ʋakɔwo ɖe wo—amedzro siwo doa gbe tutɔ ŋutɔŋutɔ. Aʋakɔ mawo awɔ Yehowa ƒe “ɖoɖo ɖe ɖoɖo dzi,” eye Yuda adze anyi.—Xlẽ Yesaya 28:11-13.
Gbɔgbɔmehamula Siwo Li Egbea
9, 10. Ɣekaɣie gɔmesese va nɔ Yesaya ƒe nyawo ŋu na megbeviwo, eye le mɔ ka nu?
9 Blema Israel kple Yuda dzi koe Yesaya ƒe nyagblɔɖiwo va me ɖoa? Kura o! Yesu kple Paulo siaa yɔ eƒe nyawo hetsɔe ku ɖe dukɔ si nɔ anyi le woƒe ŋkekea me ŋu. (Yesaya 29:10, 13; Mateo 15:8, 9; Romatɔwo 11:8) Egbea hã, nɔnɔme aɖe do mo ɖa si ɖi Yesaya ƒe ŋkekea me tɔ.
10 Fifia ya Kristodukɔa ƒe subɔsubɔhakplɔla siwo ɖoa ŋu ɖe dunyahehe ŋue wòku ɖo. Wole yiyim sagãsagã abe Israel kple Yuda hamulawo ene le esi wodea nu dunya me, eye wòdzɔa dzi na wo ne amesiwo xexe sia me buna amegãwoe va bia aɖaŋuɖoɖo wo ta. Le esi teƒe be woagblɔ Biblia me nyateƒe dzadzɛa la, wogblɔa nya makɔmakɔwo boŋ. Womegale nu kpɔm nyuie le gbɔgbɔ me o, eye womenye kplɔla nyuiwo na ameƒomea o.—Mateo 15:14.
11. Aleke Kristodukɔa kplɔlawo wɔa nu ɖe Mawu Fiaɖuƒe ŋuti nyanyuia ŋui?
11 Aleke Kristodukɔa kplɔlawo wɔa nui ne Yehowa Ðasefowo he woƒe susu yi mɔkpɔkpɔ vavã ɖeka kolia si nye Mawu Fiaɖuƒea dzi? Womesea egɔme o. Ewɔna na wo be nya maɖinya wònye Ðasefowo gbugbɔ le gbɔgblɔm abe ɖeviwo ene. Subɔsubɔhakplɔla siawo mebua dɔla siawo ɖe naneke me o eye woɖua fewu le wo ŋu. Abe Yudatɔ siwo nɔ anyi le Yesu ƒe ŋkekea me ene la, womedi Mawu Fiaɖuƒe la o eye womedi be yewoƒe hameviwo nase eŋuti nya hã o. (Mateo 23:13) Eyata wole nyanya nam wo be Yehowa mato dɔla fafa siawo dzi aƒo nu na wo ɖaa o. Ɣeyiɣia ava esime “woagbã” amesiwo mebɔbɔa wo ɖokui na Mawu Fiaɖuƒea o la “gudugudu, mɔ̃ aɖe wo, eye asi atu wo,” ẽ, woatsrɔ̃ wo gbidii.
‘Nubabla Kple Ku’
12. Nukae Yuda ƒe ‘nu’ si wobe ‘yewobla kple ku’ la nye?
12 Yesaya yi eƒe nyaa dzi be: “Miegblɔ be: Míebla nu kple ku, eye míeɖu dzo kple tsieƒe. Atàm, si le nyènyem le yiyim la, mava mía gbɔ o, elabena míetsɔ aʋatso wɔ míaƒe sitsoƒee, eye míebe ɖe alakpa gbɔ.” (Yesaya 28:14, 15) Yuda ƒe kplɔlawo ƒo adegbe be dunyahehe me nubabla siwo yewowɔ la ana be womate ŋu aɖu yewo dzi o. Wobu be ‘yewoabla nu kple ku’ be megava wu yewo o. Gake woƒe sitsoƒe gbɔlo la makpɔ wo ta o. Woƒe nubablawo nye aʋatso, wonye alakpa. Nenema ke egbea la, ƒomedodo kplikplikpli si le Kristodukɔa kple xexemeŋgɔnɔlawo dome makpɔ wo ta ne Yehowa ƒe ɣeyiɣia de be wòabia akɔnta wo o. Anye eƒe tsɔtsrɔ̃ nyateƒe.—Nyaɖeɖefia 17:16, 17.
13. Amekae nye “kpe, si wodo kpɔ” la, eye aleke Kristodukɔa gbe eyamae?
13 Ekema afikae wòle be subɔsubɔhakplɔla siawo nadi kpekpeɖeŋu le? Yesaya ŋlɔ ŋugbe si Yehowa do la ɖi azɔ: “Kpɔ ɖa, meɖo kpe aɖe anyi ɖe Zion, kpe, si wodo kpɔ, dzogoekpe xɔasi, si li ke zã. Amesi xɔe se la, masi o. Matsɔ ʋɔnudɔdrɔ̃ awɔ dzidzekae, eye dzɔdzɔenyenye anye nudanu; dzikpe atsrɔ̃ aʋatsositsoƒe la, eye tsi akplɔ bebeƒe la adzoe.” (Yesaya 28:16, 17) Esi Yesaya gblɔ nya siawo megbe kpuie la, Fia Xizkiya nuteƒewɔla va nɔ zia dzi le Zion eye wokpɔ eƒe fiaɖuƒea ta, menye le dukɔ siwo wobla nu kpli ƒe ŋusẽ me o, ke boŋ le Yehowa ƒe kpekpeɖeŋu me. Gake nya siawo siwo tso gbɔgbɔ me la meva me ɖe Xizkiya dzi o. Apostolo Petro yɔ Yesaya ƒe nyaawo tsɔ ɖee fia be Yesu Kristo, Xizkiya ƒe dzidzimevi si va dzɔ le ɣeyiɣi didi aɖe megbe, ye nye “kpe, si wodo kpɔ” la eye be mahiã be amesi xɔ Eyama dzi se navɔ̃ kura o. (Petro I, 2:6) Nublanuinya ka gbegbee nye si wònye be togbɔ be Kristodukɔa kplɔlawo gblɔna be Kristotɔwo yewonye hã la, wowɔ nusi Yesu ya gbe wɔwɔ! Woti ŋkɔxɔxɔ kple ŋusẽ yome le xexe sia me le esi teƒe be woalala be Yehowa nana eƒe Fiaɖuƒe si le Fia Yesu Kristo si me la nava.—Mateo 4:8-10.
14. Ɣekaɣie woagblẽ Yuda ƒe ‘nubabla kple ku’ la me?
14 Ne Babilon-ʋakɔwo ƒe “atàm, si le nyènyem” va to anyigba la dzi yi la, Yehowa aklo nu le Yuda ƒe dunyahehe me sitsoƒea dzi be enye aʋatso. Yehowa gblɔ be: “Woagblẽ mia kple ku ƒe nubabla la me. . . . Atàm, si le nyènyem le yiyim la, agbã mi gudugudu. Ne eva le yiyim la, . . . ŋɔdzi ɖeɖe sɔŋ aɖe nya gɔme na mi.” (Yesaya 28:18, 19) Ẽ, nusɔsrɔ̃ vevi aɖe le nusi dzɔ ɖe amesiwo gblɔ be yewosubɔa Yehowa gake woɖoa ŋu ɖe nubabla kple dukɔwo ŋu la dzi me.
15. Aleke Yesaya wɔ kpɔɖeŋu le Yuda ƒe takpɔnua ƒe dzodzronyenye ŋui?
15 Bu nɔnɔme si me Yuda ƒe kplɔla siawo kpɔ wo ɖokui le azɔ la ŋu kpɔ. “Aba anɔ kpuie, be afɔdadra manɔ anyi o, eye avɔ makeke, be woaxatsa ame ɖokui ɖe eme o.” (Yesaya 28:20) Enɔ abe ɖe womlɔ anyi be yewoaɖi ɖe eme ene, gake dzodzroe. Ele be woƒe afɔ nanɔ gota vuvɔ nawɔ wo loo alo woaxatsa evɔ avɔa mekeke kura be woaxatsa ɖe eme dzo naɖo lãme na wo o. Nɔnɔme madeamedzi siae nɔ anyi le Yesaya ƒe ŋkekea me. Eye nɔnɔme sia mee amesiame si ɖoa ŋu ɖe Kristodukɔa ƒe aʋatsositsoƒea ŋu la le egbea. Ŋunyɔnu ka gbegbee nye si wònye be esi Kristodukɔa kplɔlawo kpɔ gome le dunyahehe me ta la, wo dometɔ aɖewo ƒe asi nɔ ŋutasesẽ vɔ̃ɖi siwo ƒe ɖewoe nye gbeɖekadolawo tsɔtsrɔ̃ kple ameƒomeviwo tsɔtsrɔ̃ ɖa me!
Yehowa ƒe “Dɔ Tutɔ” La
16. Nukae nye Yehowa ƒe “dɔ tutɔ” la, eye nukata dɔ sia wɔ nuku?
16 Alesi nuwo ava yi mlɔeba ato vovo sã na nusi Yuda-subɔsubɔhakplɔlawo kpɔ mɔ na. Yehowa awɔ nu tutɔ aɖe ɖe Yuda gbɔgbɔmehamulawo ŋu. “Yehowa akɔ eɖokui ɖe dzi abe le Perazim-to la gbɔ ene, eye wòanyrã abe le Gibeon-bali me ene, ne wòawɔ eƒe dɔ, dɔ tutɔ enye eƒe dɔ la, ne wòawɔ eƒe nuwɔwɔ, nuku enye eƒe nuwɔwɔ.” (Yesaya 28:21) Le Fia Dawid ƒe ŋkekeawo me la, Yehowa na eƒe dukɔa ɖu Filistitɔwo dzi vevie le Perazim-toa gbɔ kple le Gibeon-bali me. (Kronika I, 14:10-16) Le Yosua ƒe ŋkekeawo me la, ena ɣe tɔ ɖe Gibeon ale be Israel nate ŋu aɖu Amoritɔwo dzi keŋkeŋ. (Yosua 10:8-14) Nu wɔnuku tutɔ aɖee wònye vavã! Yehowa agawɔ aʋa ake, gake fifia ya amesiwo gblɔ be eƒe dukɔ yewonye ye wòawɔe kpli. Ðe nane ganye nu tutɔ alo wɔmoyaa wu esia? Ao, elabena ne èbu eŋu kpɔ la, Yerusalem enye Yehowa ƒe tadeagunɔƒe kple Yehowa ƒe fia si wosi ami na ƒe du. Vaseɖe fifia la, womexɔ fiaɖuŋusẽ le Dawid fiaƒomea si kpɔ le Yerusalem o. Ke hã Yehowa le eƒe “dɔ tutɔ” la wɔ ge godoo.—Tsɔe sɔ kple Xabakuk 1:5-7.
17. Dɔ kae fewuɖuɖu awɔ ɖe Yesaya ƒe nyagblɔɖia me vava dzi?
17 Eyata Yesaya xlɔ̃ nu be: “Miganɔ fewu ɖum, ne miaƒe babla nadzi goŋgoŋ o; elabena tsɔtsrɔ̃ kple tameɖoɖo kplikpaa mese tso Aƒetɔ, Yehowa Zebaot gbɔ ɖe anyigba blibo la ŋu.” (Yesaya 28:22) Togbɔ be kplɔlaawo nɔ fewu ɖum le Yesaya ŋu hã la, nyateƒee eƒe gbedasia nye. Yehowa, amesi bla nu kple kplɔla mawo la gbɔe wòsee le. Nenema ke egbea Kristodukɔa ƒe subɔsubɔhakplɔlawo ɖua fewu ne wose be Yehowa le “dɔ tutɔ” wɔ ge. Wodoa dziku nɔa bublum gɔ̃ hã. Gake nyateƒee gbedasi si Yehowa Ðasefowo ɖea gbeƒãe la nye. Biblia si nye agbalẽ si me nyawo kplɔla mawo gblɔna be yewogblɔna la mee wòle.
18. Kpɔɖeŋu kae Yesaya wɔ le Yehowa ƒe dadasɔ le tohehe me ŋu?
18 Yehowa aɖɔ anukwaretɔ siwo medzea kplɔla siawo yome o la ɖo eye wòagaɖo wo te akpɔ ŋudzedze ɖe wo ŋu. (Xlẽ Yesaya 28:23-29.) Abe alesi agbledela tsɔa dzigbɔɖi ɖea tsro le nuku si mesẽ o, abe sikɔni ene ŋu la, nenemae Yehowa trɔa asi le eƒe tohehe ŋu wòsɔna ɖe amea kple nɔnɔmeawo nui. Mezia nu ɖe ame dzi alo tea ame ɖe anyi gbeɖe o, ke boŋ ewɔa nu ɖe amesiwo tra ŋu kple susu be woate ŋu atrɔ. Ẽ, ne amewo xɔ Yehowa ƒe ɖɔɖɔɖo la, mɔkpɔkpɔ anɔ wo si. Nenema ke egbea hã togbɔ be tɔtrɔ aɖeke manɔ nusi adzɔ ɖe Kristodukɔa dzi me o hã la, amesiame si abɔbɔ eɖokui ɖe Yehowa ƒe Fiaɖuƒea te ate ŋu asi le fɔbuʋɔnudɔdrɔ̃ si gbɔna la nu.
Baba na Yerusalem!
19. Mɔ ka nue wogblɔ be Yerusalem ava zu ‘mlekpui me’ le, ɣekaɣie esia va eme, eye aleke wòva emee?
19 Gake nuka ŋue Yehowa le nu ƒom tsoe fifia? “Baba na Ariel, Ariel-du, si me Dawid ƒu asaɖa anyi ɖo! Ne miekpe ƒe ɖe ƒe ŋu, eye ŋkeke nyuiwo trɔ va kpe la, ekema maxaxa Ariel ɖo, konyifafa kple nuxaxa ayɔe, eye wòazu [Mawu ƒe Vɔsamlekpui, “NW”] nam.” (Yesaya 29:1, 2) “Ariel” ate ŋu afia “Mawu ƒe Vɔsamlekpui,” eye anye Yerusalem ŋue wòku ɖo le afisia. Afimae gbedoxɔa kple eƒe vɔsamlekpuia nɔ. Ezu kɔnu na Yudatɔwo be woaɖu azã ahasa vɔ le afima, gake woƒe tadedeagu medzea Yehowa ŋu o. (Hosea 6:6) Ke eɖoe boŋ be dua ŋutɔ ava zu “vɔsamlekpui” le gɔmesese bubu nu. Ʋu asi le eme eye dzobibi anɔ eme abe mlekpui me ene. Yehowa ƒo nu tso alesi nusia adzɔe gɔ̃ hã ŋu be: “Maƒu asaɖa anyi ɖe ŋuwò godoo, mana aʋakɔwo namimi wò ɖo, eye maɖe ʋe ɖe ŋuwò. Àƒo nu tso anyigba tu me ke, eye wò nuƒoƒo aɖi tso ke me; wò gbe anɔ abe ŋɔli tɔ ene tso anyigba me, eye wò nuƒoƒo aɖi huhuhu tso ke me.” (Yesaya 29:3, 4) Esia va eme na Yuda kple Yerusalem le ƒe 607 D.M.Ŋ. me esime Babilon-ʋakɔa ɖe to ɖe dua hetsrɔ̃e tsɔ kpe ɖe gbedoxɔa ŋu. Wobɔbɔ Yerusalem wòzu abe anyigba si dzi wotso dua ɖo ke ene.
20. Nukae ava adzɔ ɖe Mawu ƒe futɔwo dzi mlɔeba?
20 Do ŋgɔ na ɣeyiɣi dziŋɔ ma la, Yuda kpɔ fia aɖewo ɣeaɖewoɣi siwo wɔa Yehowa ƒe Se dzi. Nukae ava dzɔ? Yehowa awɔ aʋa ɖe eƒe dukɔa nu. Togbɔ be futɔwo axɔ anyigba la ƒe afisiafi hã la, woanɔ abe “kewɔ memee” kple “tsro” ene. Le Yehowa ŋutɔ ƒe ɣeyiɣi ɖoɖi dzi la, “atsɔ dziɖegbe kple anyigbaʋuʋu, gbeɖiɖi sesĩ, ya kple ahom kpakple dzoƒaɖe binu” aka wo ahlẽ.—Yesaya 29:5, 6.
21. Ðe kpɔɖeŋu si le Yesaya 29:7, 8 la me.
21 Futɔwo ƒe aʋakɔ siwo ava ɖe to ɖe Yerusalem la anɔ mɔ kpɔm vevie be yewoanyã emetɔwo eye yewoaha aboyonuwo fũ. Gake woazi wo dzi woanyɔ enumake! Yuda ƒe futɔwo matu aglo si wokpɔ mɔ na vevie la o, abe dɔwuitɔ si aku drɔ̃e be yele nu ɖum gake wòanyɔ eye dɔwuame mafa nɛ o ene. (Xlẽ Yesaya 29:7, 8.) Bu nusi dzɔ ɖe Asiria-ʋakɔ si nɔ Sanxerib te dzi esime wonɔ ŋɔdzi dom na Yerusalem le Fia Xizkiya si nye nuteƒewɔla la ƒe ŋkekea me ŋu kpɔ. (Yesaya, ta 36 kple 37) Le zã ɖeka me Asiria-ʋawɔla siwo ŋɔdzi lé la trɔ dzo esi amegbetɔ aɖeke mekɔ asi dzi ɖe wo ŋu o—aʋawɔla sesẽ 185,000 ku le wo dome! Wogale aʋadziɖuɖu ƒe mɔkpɔkpɔwo me gblẽ ge ake ne Gog si tso Magog ƒe aʋawɔlawo tso ɖe Yehowa ƒe amewo ŋu le ɣeyiɣi si gbɔna kpuie me.—Xezekiel 38:10-12; 39:6, 7.
22. Aleke Yuda ƒe gbɔgbɔmehamumu gblẽ nu le eŋui?
22 Le ɣeyiɣi si me Yesaya gblɔ eƒe nyagblɔɖia ƒe akpa sia la, xɔse menɔ Yuda ƒe kplɔlawo si abe Xizkiya ene o. Womu le gbɔgbɔ me to nubabla siwo wowɔ kple dukɔ mavɔ̃mawuwo me. “Miɖo asi nu, eye miaƒe nu netsi te, mitre ŋku, eye mizu ŋkuagbãtɔwo! Womu aha, ke menye wein ye wɔe o, wole ya mum, ke menye aha muame ye wɔe o.” (Yesaya 29:9) Esi kplɔla siawo mu le gbɔgbɔ me ta la, womete ŋu kpɔ nusi ŋutega si wona Yehowa ƒe nyagblɔɖila nyateƒetɔ kpɔ la fia o. Yesaya gblɔ be: “Yehowa trɔ alɔ̃dɔdɔ sesẽ ƒe gbɔgbɔ kɔ ɖe mia dzi, etre miaƒe ŋkuwo, siwo nye nyagblɔɖilawo, eye wòtsyɔ nu miaƒe tawo, siwo nye nukpɔlawo. Ale ŋutegawo katã anɔ na mi, abe agbalẽ, si nu wotre la me nya ene, esi ne wotsɔe na agbalẽnyala gblɔ be: Xlẽe la, aɖo ŋu be: Nyemate ŋui o, elabena wotre enu. Eye ne wotsɔ agbalẽ la na ame manyagbalẽ gblɔ be: Xlẽe la, aɖo ŋu be: Nyemenya agbalẽ o.”—Yesaya 29:10-12.
23. Nukata Yehowa abia akɔnta Yuda, eye aleke wòawɔe?
23 Yuda-subɔsubɔhakplɔlawo gblɔ be yewodze aɖaŋu le gbɔgbɔ me, gake wogbugbɔ le Yehowa yome. Woa ŋutɔwo ƒe nukpɔsusu totrowo le nyui kple vɔ̃ ŋu boŋue wofiana, eye woƒoa nu tsɔ dea woƒe xɔsemanɔamesi kple nugbegblẽwɔwɔwo kpakple dukɔa kpɔkplɔ de Mawu ƒe ŋudzedzemakpɔmakpɔ me dzi. Yehowa ato ‘nukunu aɖe’—eƒe “dɔ tutɔ”—dzi abia akɔnta wo ɖe woƒe alakpanuwɔwɔ ta. Egblɔ be: “Esi dukɔ sia te va kple woƒe nu, eye wotsɔ woƒe nuyiwo de bubu ŋunye, ke woƒe dzi le adzɔge tso gbɔnye, eye woƒe vɔvɔ̃ nam nye amegbetɔwo ƒe ɖoɖo, siwo wosrɔ̃ ko la, eyata kpɔ ɖa, magaɖe nukunu afia ɖe dzi ɖe dukɔ sia ŋu, nukunuwo ƒe nukunu wòanye, nunya abu ɖe woƒe nunyalawo, eye gɔmesese asi abe ɖe woƒe nugɔmeselawo.” (Yesaya 29:13, 14) Nunya kple gɔmesese si Yuda bu be ele yewo si la abu ne Yehowa de asi nyawo me be Babilon Xexemefiaɖuƒea naɖe eƒe xɔsegbegbe ƒe mawusubɔsubɔ nuɖoanyi bliboa katã ɖa. Nusia tututue dzɔ le ƒe alafa gbãtɔ me esi Yudatɔwo ƒe kplɔla siwo bua wo ɖokui nunyalawoe la kplɔ dukɔa trae. Nusia tɔgbe adzɔ le míaƒe ŋkekea me ɖe Kristodukɔa dzi.—Mateo 15:8, 9; Romatɔwo 11:8.
24. Aleke Yudatɔwo ɖee fiae be yewomevɔ̃a Mawu o?
24 Gake Yuda ƒe kplɔla adegbeƒolawo bui le ɣeyiɣi sia me be yewodze aɖaŋu ale gbegbe be yewoate ŋu asi le nu tovo siwo yewowɔ le tadedeagu vavã me la nu. Ðe wote ŋuia? Yesaya ɖe woƒe nɔnɔme ŋutɔŋutɔ fia wo eye wòklo nu le wo ŋu be vɔvɔ̃ nyui aɖeke mele wo me na Mawu o eye le ema ta nunya vavã aɖeke hã mele wo si o: “Baba na amesiwo nɔa bebem le Yehowa ŋku me, woɣlaa woƒe adaŋudede, eye wowɔa woƒe nu le vivi me henɔa gbɔgblɔm be: Ameka le mía kpɔm, eye ameka dze si mí? Oo, mieflu mia ɖokui! Ðe tsu le abe zemela ene, ne nuwɔwɔ nagblɔ na ewɔla be: Menye wòe wɔm o, eye numeme nagblɔ na emela be: Mele ɖeke nyam oa?” (Yesaya 29:15, 16; tsɔe sɔ kple Psalmo 111:10.) Aleke ke woɖasusu be yewole ɣaɣla o, ‘woklo nu le wo dzi eye wotsi ƒeƒle’ le Mawu ƒe ŋkume.—Hebritɔwo 4:13.
‘Tokunɔwo Ase Nu’
25. Gɔmesese ka nue “tokunɔwo” ase nu le?
25 Gake mɔkpɔkpɔ li na amesiwo ɖea xɔse fiana. (Xlẽ Yesaya 29:17-24; tsɔe sɔ kple Luka 7:22.) “Tokunɔwo ase agbalẽ sia me nyawo,” si nye gbedasi si tso Mawu ƒe Nya la me. Ẽ, menye dɔdada na tokunɔwo le ŋutilã mee esia nye o. Gbɔgbɔmedɔdada ye. Yesaya gahe susu yi Mesia Fiaɖuƒea ɖoɖo anyi le etsɔme kple alesi Mesia dziɖuɖua agbugbɔ tadedeagu vavãtɔ aɖo anyi le anyigba dzi la dzi ake. Esia dzɔ le míaƒe ŋkekea me, eye ame miliɔn geɖe le mɔ ɖem be Yehowa naɖɔ yewo ɖo eye wole alesi woakafui srɔ̃m. Emevava dodzidzɔname kae nye si! Ɣeyiɣia ava ɖo mlɔeba esime amesiame, nusianu si me gbɔgbɔ le, akafu Yehowa ahado ŋutikɔkɔe na eƒe ŋkɔ kɔkɔe la.—Psalmo 150:6.
26. Gbɔgbɔmeŋkuɖodzinya kawoe “tokunɔwo” sena egbea?
26 Nukae ‘tokunɔ’ siawo siwo sea Mawu ƒe Nya egbea la srɔ̃na? Eyae nye be ele be Kristotɔwo katã, vevietɔ amesiwo hamea buna be wonye kpɔɖeŋuwo, nadze agbagba vevie be ‘yewomanɔ ya mum sagasaga le aha muame nono ta o.’ (Yesaya 28:7) Tsɔ kpe ɖe eŋu la, mele be ɖeɖi nate mía ŋu le Mawu ƒe ŋkuɖodzinya siwo kpena ɖe mía ŋu be míatsɔ gbɔgbɔmenukpɔsusu akpɔ nuwo katãe la sese me o. Togbɔ be Kristotɔwo bɔbɔa wo ɖokui ɖe dziɖuɖuwo te wòsɔ eye wokpɔa wo sinu be woawɔ dɔ aɖewo hã la, menye xexeame ƒe ɖoɖowo gbɔe ɖeɖekpɔkpɔ atso o, ke boŋ Yehowa Mawu gbɔe wòatso. Mele be míaŋlɔe be hã o be abe alesi wònɔ le ʋɔnudɔdrɔ̃ Yerusalem si gbe xɔse gome ene la, dzidzime sia mate ŋu asi le Mawu ƒe ʋɔnudɔdrɔ̃ nu o. Le Yehowa ƒe kpekpeɖeŋu me la, míate ŋu ayi edzi aɖe gbeƒã eƒe nuxlɔ̃amea abe Yesaya ene, togbɔ be wotsia tre ɖe mía ŋu hã.—Yesaya 28:14, 22; Mateo 24:34; Romatɔwo 13:1-4.
27. Nukawoe Kristotɔwo ate ŋu asrɔ̃ tso Yesaya ƒe nyagblɔɖia me?
27 Hamemegãwo kple dzilawo ate ŋu asrɔ̃ nu tso alesi Yehowa hea toe me, eye ele be woadze agbagba ɣesiaɣi be yewoaɖɔ nuvɔ̃wɔlawo ɖo be Mawu nagakpɔ ŋudzedze ɖe wo ŋu, ke menye be woahe to na wo ko o. (Yesaya 28:26-29; tsɔe sɔ kple Yeremya 30:11.) Eye woɖo ŋku edzi na mí katã, kple ɖeviwo hã, be ele vevie be míasubɔ Yehowa tso dzime, ke menye ɖeko míanɔ nu wɔm abe Kristotɔwo ene be míatsɔ adze amewo ŋu ko o. (Yesaya 29:13) Ele be míaɖee afia be vɔvɔ̃ nyuitɔ le mía me na Yehowa eye míedea bubu deto eŋu, menye abe Yudatɔ xɔsemanɔsitɔwo ene o. (Yesaya 29:16) Tsɔ kpe ɖe eŋu la, ele be míaɖee afia be míelɔ̃ faa be Yehowa naɖɔ mí ɖo eye míasrɔ̃ nu tso egbɔ.—Yesaya 29:24.
28. Aleke Yehowa subɔlawo bua eƒe ɖeɖedɔwoe?
28 Aleke wòle vevie enye si be míaxɔ Yehowa kple mɔ si nu wòwɔa nu le dzi ase eye míaka ɖe wo dzi! (Tsɔe sɔ kple Psalmo 146:3.) Nuxlɔ̃amegbedasi si míeɖea gbeƒãe la adze bometsinya na ame akpa gãtɔ. Tsɔtsrɔ̃ si gbɔna ɖe Kristodukɔa si nye habɔbɔ si gblɔna be yewosubɔa Mawu dzi la nye nu wɔmoyaa kple nukunu. Gake Yehowa awɔ eƒe “dɔ tutɔ” la. Ðikeke aɖeke mele nya ma ŋu o. Eyata Mawu subɔlawo ɖoa ŋu ɖe eƒe Fiaɖuƒea kple Yesu Kristo, si nye eƒe Fia si wòɖo, ŋu bliboe le nuɖoanyi sia ƒe ŋkeke mamlɛawo katã me. Wonya be Yehowa ƒe ɖeɖedɔwo—si akpe ɖe eƒe “dɔ tutɔ” ŋu la—ahe yayra mavɔwo vɛ na ameƒomea me tɔ toɖolawo katã.
[Etenuŋɔŋlɔwo]
a Le Hebrigbe gbãtɔa me la, woŋlɔ Yesaya 28:10 wònye nyaɖekagbugbɔgblɔ, eye eɖi hakpanya kpui si wofiaa ɖevi. Eyata Yesaya ƒe gbedasia ɖi nyaɖekagbugbɔgblɔ kple ɖevinya na subɔsubɔhakplɔlaawo.
[Nɔnɔmetata siwo le axa 289]
Kristodukɔa ɖoa ŋu ɖe nubabla kple dziɖula amegbetɔwo ŋu tsɔ wu be woaɖo ŋu ɖe Mawu ŋu
[Nɔnɔmetata si le axa 290]
Yehowa wɔ eƒe “dɔ tutɔ” esime wòɖe mɔ Babilon tsrɔ̃ Yerusalem
[Nɔnɔmetata si le axa 298]
Amesiwo nye gbɔgbɔmetokunɔwo tsã ate ŋu “ase” Mawu ƒe Nya