“Dzata ƒe Dzi” Ate Ŋu Anɔ Asiwò

ƔEAÐEWOƔI la, Biblia zãa dzata tsɔ wɔa dzideƒo kple kakaɖedzi ƒe kpɔɖeŋui. Wogblɔna le ŋutsu kalẽtɔwo kple dzideƒotɔwo ŋu be “dzata ƒe dzi” le wo si, eye wogblɔna be ame dzɔdzɔewo “[ɖea] dzi ɖi abe dzatavi ene.” (Samuel II, 17:10; Lododowo 28:1) Ne wodi ge le dzata ŋu koŋue wòɖenɛ fiana be yedze be woabu ye “kalẽtɔ le lãwo dome.”—Lododowo 30:30.

Yehowa Mawu tsɔ tame si wòɖo kplikpaa be yeakpɔ yeƒe amewo ta la sɔ kple alesi dzata mevɔ̃a naneke o lae. Yesaya 31:4, 5 gblɔ be: “Alesi dzata kple dzatavi nɔa gbe tem ɖe nuléle ŋu, eye ne woyɔ lãkplɔviwo ɖe eŋu kpaŋkpaŋ hã, woƒe ɣli meɖea dzi le eƒo o, eye meɖoa to woƒe howɔwɔ o la, nenema Yehowa Zebaot aɖi ɖe anyi, ne wòawɔ aʋa le Zion-to ... dzi. ... Adzɔ eŋu, eye wòaxɔ nɛ, akpɔ eta, eye wòaɖee.” Yehowa tsɔ nya siawo ka ɖe edzi na eƒe subɔlawo ne yeawɔ nu akpɔ wo ta, vevietɔ ne woɖo dzɔgbevɔ̃e me.

Biblia tsɔ ameƒomea ƒe adikãtɔ gãtɔ, Satana Abosam, sɔ kple dzata wɔadã si le gbe ɖem. Be míagana wòalé mí o la, wogblɔ na mí le Ŋɔŋlɔawo me be: “Minɔ mo xexi, minɔ ŋudzɔ.” (Petro I, 5:8) Nusiwo míawɔ dometɔ ɖekae nye be míagadɔ gbɔgbɔmekɔlɔ̃e si wua ame o. Yesu gblɔ ke esia ŋu be: “Mikpɔ mia ɖokui dzi nyuie, bena nutsuɖuɖu kple ahamumu kple dzimaɖitsitsi ɖe agbe ŋu nagate miaƒe dzi ɖe to.” (Luka 21:34-36) Ẽ, ne míele ŋudzɔ le gbɔgbɔ me le ‘ŋkeke mamlɛ’ siawo me la, ate ŋu ana “dzata ƒe dzi” nanɔ mía si, dzi si ‘maʋuʋu o, si ɖoa ŋu ɖe Yehowa ŋu.’—Timoteo II, 3:1; Psalmo 112:7, 8.