Nusita Míatso Aseye Ðo La Le Mía Si
“Vivisese kple dzidzɔ asu wo si, eye nuxaxa kple hũɖeɖe abu ɖe wo.”—YESAYA 35:10.
1. Amekawo sie susu vevi si ta woakpɔ dzidzɔ ɖo la le egbea?
ANƆ eme be ède dzesii be ame ʋee aɖewo koe kpɔa dzidzɔ vavãtɔ egbea. Gake Yehowa Ðasefo siwo nye Kristotɔ vavãwo la kpɔa dzidzɔ. Eye ame maxɔnyɔnyrɔ̃ miliɔn geɖe, ɖeviwo kple tsitsiawo, siwo dea ha kple Ðasefowo hã ate ŋu akpɔ dzidzɔ ma ke. Nyateƒe si wònye be èle nya siawo xlẽm le magazine sia me ɖee fia be dzidzɔ sia zu tɔwò xoxo alo ate ŋu asu asiwò bɔbɔe.
2. Aleke Kristotɔ ƒe dzidzɔkpɔkpɔ to vovo na nɔnɔme si me ame akpa gãtɔ le egbea?
2 Ame akpa gãtɔ sena le wo ɖokui me be nane bu le yewoƒe agbenɔnɔ me. Wò hã ɖe? Ele eme be manye ŋutilãmenu ɖesiaɖe si nàte ŋu azãe anɔ asiwò o, eye edze ƒã be menye nusiwo katã le egbe gatɔwo kple ŋusẽtɔwo sie ate ŋu asu asiwò o. Eye àdi be lãmesẽ kple ŋusẽ nanɔ ye ŋu wu. Ke hã míate ŋu agblɔe kakaɖedzitɔe be le dzidzɔ gome la, enye gatɔ eye lãmesẽ le asiwò wu ame biliɔn geɖe siwo le anyigba dzi ƒe akpa gãtɔ. Nukata wòle nenema?
3. Nya siwo ŋu gɔmesese le kawo ŋue wòle be míalé ŋku ɖo, eye nukatae?
3 Ðo ŋku Yesu ƒe nya siawo dzi be: “Esiawo megblɔ na mi, bena nye dzidzɔ la nanɔ mia me, eye miaƒe dzidzɔ la nayɔ fũ.” (Yohanes 15:11) “Miaƒe dzidzɔ la nayɔ fũ.” Nuɖɔɖɔ nyui kae nye si! Nusɔsrɔ̃ le alesi Kristotɔwo nɔa agbee ŋu wòade to ana míanya nu geɖe siwo ta wòle be míaƒe dzidzɔ nayɔ fũ ɖo. Gake fifia la, de dzesi nya aɖewo siwo ŋu gɔmesese le le Yesaya 35:10. Míegblɔ be gɔmesese le wo ŋu elabena le nyateƒe me la, wofia nane na mí egbea. Míexlẽ be: “Yehowa ƒe amesiwo wòxɔ ƒle la, atrɔ agbɔ, eye woava Zion kple aseyetsotso, eye dzidzɔ mavɔ anɔ woƒe ta me; vivisese kple dzidzɔ asu wo si, eye nuxaxa kple hũɖeɖe abu ɖe wo.”
4. Dzidzɔkpɔkpɔ ka ƒomevi ŋue woƒo nu tsoe le Yesaya 35:10, eye nukata wòle be míalé ŋku ɖe esia ŋu?
4 “Dzidzɔ mavɔ.” Nya “mavɔ” la nye nya si Yesaya ŋlɔ ɖe Hebrigbe me la gɔmeɖeɖe si sɔ tututu. Gake abe alesi ŋɔŋlɔ bubuwo ɖee fia ene la, nusi wowɔnɛ le mawunyakpukpui sia mee nye “tegbee.” (Psalmo 45:7; 90:2; Yesaya 40:28) Eyata dzidzɔkpɔkpɔa nu matso gbeɖe o, le nɔnɔme siwo aɖe mɔ—ẽ, ana wòasɔ be—míakpɔ dzidzɔ mavɔ la me. Ema medo dzidzɔ na wò oa? Ðewohĩ mawunyakpukpui ma ɖi abe nusi meku ɖe nu ŋutɔŋutɔ aɖeke ŋu o ene, si ana nàbu be: ‘Le nyateƒe me la, nya ma meku ɖe ŋunye abe alesi nye gbesiagbe kuxiwo kple dzimaɖitsitsiwo le ene o.’ Gake nyateƒeawo ɖee fia be eku ɖe mía ŋu. Gɔmesese le nyagblɔɖi ƒe ŋugbedodo si le Yesaya 35:10 la ŋu na wò egbea. Be míanya alesi wòku ɖe mía ŋui la, mína míadzro Yesaya ta 35 sia me nya dodzidzɔname sia me, ahade dzesi nya siwo le eƒe akpa ɖesiaɖe. Kakaɖedzi nenɔ asiwò be àkpɔ dzidzɔ ɖe nusi míakpɔ la ŋu.
Amesiwo Wòva Hiã be Dzi Nadzɔ
5. Nyagblɔɖi me nɔnɔme ka mee Yesaya ta 35 ƒe nyagblɔɖia dze le?
5 Be wòakpe ɖe mía ŋu la, mina míalé ŋku ɖe ŋutinyamenudzɔdzɔ si na wogblɔ nya dodzidzɔname siawo ɖi la ŋu. Hebri-nyagblɔɖila Yesaya ye ŋlɔe le ƒe 732 D.M.Ŋ. me lɔƒo. Ƒe bla nanewo do ŋgɔ hafi Babilon-srafowo tsrɔ̃ Yerusalem. Abe alesi Yesaya 34:1, 2 ɖee fia ene la, Mawu gblɔ ɖi be yegbɔna hlɔ̃ bia ge dukɔwo, abe Edom si woyɔ le Yesaya 34:6 ene. Edze ƒã be blema Babilontɔwoe wòzã tsɔ bia hlɔ̃ mae. Nenema ke Mawu na Babilontɔwo wɔ Yuda aƒedoe elabena Yudatɔwo mewɔ nuteƒe o. Nukae do tso eme? Wokplɔ Mawu ƒe dukɔ la yi ɖe aboyo mee eye woƒe anyigba la zu aƒedo ƒe 70 sɔŋ.—Kronika II, 36:15-21.
6. Vovototo kae le nusi ava dzɔ ɖe Edomtɔwo dzi kple nusi ava dzɔ ɖe Yudatɔwo dzi dome?
6 Gake vovototo ɖedzesi aɖe le Edomtɔwo kple Yudatɔwo dome. To si Mawu he na Edomtɔwo la mawu enu gbeɖe o; dukɔ la bu keŋkeŋ le ɣeyiɣi aɖe megbe. Ẽ, àte ŋu ava kpɔ teƒe gbagbã si tsi ƒuƒlu si Edomtɔwo nɔ la, si ƒe ɖee nye Petra ƒe dudo si xɔ ŋkɔ le xexeame. Gake egbea la, dukɔ alo amewo ƒe ƒuƒoƒo aɖeke meli si woate ŋu agblɔ be wonye ‘Edomtɔwo’ o. Gake ɖe aƒedo si Babilontɔwo wɔ Yuda la anɔ anyi tegbee, ahana dzidzɔ nabu le anyigba la dzi ayi ɖe mavɔ mea?
7. Aleke Yudatɔ siwo nɔ aboyo me le Babilon anya wɔ nu ɖe Yesaya ta 35 me nyawo ŋui?
7 Gɔmesese dodzidzɔname aɖe le nyagblɔɖi wɔnuku si le Yesaya ta 35 la ŋu le afisia. Míate ŋu ayɔe be gbugbɔgaɖoanyi ŋuti nyagblɔɖi, elabena eva eme zi gbãtɔ le ɣeyiɣi si me Yudatɔwo gbugbɔ yi wo denyigba dzi le ƒe 537 D.M.Ŋ. me. Wona ablɔɖe Israel-vi siwo nɔ aboyo me le Babilon be woagbugbɔ ayi wo denyigba dzi. (Ezra 1:1-11) Gake hafi ema nadzɔ la, Yudatɔ aboyome siwo nɔ Babilon siwo ƒe susu nɔ Mawu ƒe nyagblɔɖi sia ŋu la anya nɔ nɔnɔme siwo tɔgbe ŋu woava ke ɖo le wo dedukɔ Yuda ŋu bum. Eye nɔnɔme ka mee woawo ŋutɔ woava nɔ? Ŋuɖoɖoawo ku ɖe nusita míatso aseye ɖo ŋu tẽ. Mina míakpɔe ɖa.
8. Nɔnɔme kawoe Yudatɔwo ava kpɔ ne wotrɔ gbɔ tso Babilon? (Tsɔe sɔ kple Xezekiel 19:3-6; Hosea 13:8.)
8 Edze ƒã be nɔnɔmea made dzi ƒo na Yudatɔawo esime wose be wogale tɔtrɔ ge ayi wo denyigba dzi gɔ̃ hã o. Woƒe anyigba la zu aƒedo ƒe blaadre sɔŋ, si nye amegbetɔ ƒe agbenɔƒe katã. Nukae dzɔ ɖe anyigba la dzi? Agble siwo wodena tsã, weingblewo, alo abɔmetiwo katã anya trɔ zu gbegbe. Abɔ alo agblenyigba siwo wodea tsii tsã la azu kuɖiɖinyigba alo dzogbe. (Yesaya 24:1, 4; 33:9; Xezekiel 6:14) Bu lã wɔadã siwo abɔ ɖe afima hã ŋu kpɔ. Esiawo dometɔ aɖewoe nye lã lénuwo abe dzatawo kple lãklẽwo ene. (Fiawo I, 13:24-28; Fiawo II, 17:25, 26; Hawo ƒe Ha 4:8) Womate ŋu aŋe aɖaba aƒu sisiblisi siwo ate ŋu aƒo ŋutsu, nyɔnu, alo ɖevi ƒu anyi la hã dzi o. (Samuel I, 17:34-37; Fiawo II, 2:24; Lododowo 17:12) Eye mehiã be míaƒo nu tso ƒliwo kple da bubu siwo nu aɖi le, alo dziɖegbewo ya ŋu o. (Mose I, 49:17; Mose V, 32:33; Hiob 20:16; Psalmo 58:5; 140:4; Luka 10:19) Ne ɖe nènɔ Yudatɔ siwo trɔ tso Babilon le ƒe 537 D.M.Ŋ. dome la, ɖewohĩ màdi be yeanɔ zɔzɔm le teƒe sia tɔgbe o. Teƒea meɖi paradiso kura esime wotrɔ gbɔ o.
9. Susu ka tae wole be mɔkpɔkpɔ kple kakaɖedzi nanɔ amesiwo trɔ gbɔ la si?
9 Gake Yehowa ŋutɔe kplɔ eƒe tadeagulawo yi aƒee, eye ate ŋu atrɔ aƒedo ƒe nɔnɔmea bubui. Mèxɔe se be Wɔla la ate ŋu awɔ nenema oa? (Hiob 42:2; Yeremya 32:17, 21, 27, 37, 41) Eyata nukae wòawɔ—nukae wòwɔ—na Yudatɔ siwo trɔ va wo denyigba dzi? Ŋusẽ kae esia kpɔna ɖe Mawu ƒe amewo dzi le míaƒe ɣeyiɣia me kple ɖe wò nɔnɔmea dzi—fifia kple etsɔme? Gbã mina míakpɔ nusi dzɔ ɣemaɣi ɖa.
Dzidzɔkpɔkpɔ ɖe Nɔnɔme si Trɔ Ŋu
10. Tɔtrɔ kae wogblɔ ɖi le Yesaya 35:1, 2?
10 Nukae adzɔ ne Kores ɖe mɔ na Yudatɔwo be woatrɔ ayi anyigba ɖivɔvɔ̃ ma dzi? Xlẽ nyagblɔɖi dodzidzɔname la le Yesaya 35:1, 2 kpɔ: “Gbegbe kple gbedadaƒo akpɔ dzidzɔ, tagba atso aseye, eye wòaƒo se abe dzogbenya ene. Woaƒo se ake, eye woatsɔ dzidzɔkpɔkpɔ kple aseyetsotso ase vivii. Woatsɔ Libanon ƒe ŋutikɔkɔe, Karmel kple Saron ƒe atsyɔ̃ nɛ. Woakpɔ Yehowa ƒe ŋutikɔkɔe kple mía Mawu ƒe atsyɔ̃.”
11. Anyigba la ƒe nɔnɔme kae Yesaya ɖɔ?
11 Le Biblia ƒe ɣeyiɣiwo me la, Libanon, Karmel, kple Saron nye teƒe siwo wonya be gbe ƒe amadede nya kpɔna le. (Kronika I, 5:16; 27:29; Kronika II, 26:10; Hawo ƒe Ha 2:1; 4:15; Hosea 14:5-7) Yesaya zã kpɔɖeŋu mawo tsɔ ɖɔ alesi anyigba si wotrɔ la anɔ, le Mawu ƒe kpekpeɖeŋu me. Gake anyigba la ŋutɔŋutɔ dzi koe wòakpɔ ŋusẽ ɖoa? Kura o!
12. Nukata míate ŋu agblɔ be amewo ŋue nyagblɔɖi si le Yesaya ta 35 la ku ɖo?
12 Yesaya 35:2 gblɔ le anyigba la ŋu be “woatsɔ dzidzɔkpɔkpɔ kple aseyetsotso ase vivii.” Míenya be anyigba la kple atiwo metsɔ ‘dzidzɔkpɔkpɔ tso aseyee’ ŋutɔŋutɔ o. Gake alesi woatrɔ awɔ nyuie la ate ŋu ana amewo nase le wo ɖokui me nenema. (Mose III, 23:37-40; Mose V, 16:15; Psalmo 126:5, 6; Yesaya 16:10; Yeremya 25:30; 48:33) Tɔtrɔ ŋutɔŋutɔ siwo ava anyigba la ŋutɔ dzi la aku ɖe tɔtrɔ siwo ameawo awɔ ŋu, elabena amewo ŋu koŋue nyagblɔɖi sia ku ɖo. Eyata míekpɔ nusita wòle be míase Yesaya ƒe nyawo gɔme be Yudatɔ siwo trɔ gbɔ, vevietɔ woƒe dzidzɔkpɔkpɔ, ŋue wòƒo nu tsoe.
13, 14. Tɔtrɔ si amewo awɔ kae wogblɔ ɖi le Yesaya 35:3, 4?
13 Eyata mina míadzro nyagblɔɖi ʋãme sia me geɖe wu ne míakpɔ alesi wòva eme le Yudatɔwo ƒe ablɔɖekpɔkpɔ kple woƒe tɔtrɔgbɔ tso Babilon megbe. Le kpukpui 3 kple 4 lia me la, Yesaya ƒo nu tso tɔtrɔ bubu siwo ame mawo siwo trɔ gbɔ la awɔ ŋu be: “Mido ŋusẽ alɔ gblɔdɔwo, eye mide agbe klo beliwo me. Migblɔ na amesiwo ƒo dzi ɖe le la be: Milé dzi ɖe ƒo, migavɔ̃ o! Kpɔ ɖa mia Mawu enye si! Hlɔ̃biabia gbɔna, Mawu ƒe teƒeɖoɖo; eya ŋutɔ gbɔna, ne wòaxɔ na mi.”
14 Ðe medoa ŋusẽ mí ne míebu alesi mía Mawu, amesi ate ŋu atrɔ anyigba si zu aƒedo la, tsɔ ɖe le eƒe tadeagulawo me vevie ŋu oa? Medi be Yudatɔ siwo woɖe aboyoe nagbɔdzɔ, dzi naɖe le wo ƒo, alo woatsi dzimaɖi ɖe woƒe etsɔme ŋu o. (Hebritɔwo 12:12) Bu Yudatɔ aboyomenɔla mawo ƒe nɔnɔmea ŋu kpɔ. Ne menye Mawu ƒe nyagblɔɖi siwo ku ɖe woƒe etsɔme ŋu ƒe mɔkpɔkpɔe su wo si o la, anye ne asesẽ be kakaɖedzi nanɔ wo si. Enɔ abe tomegaxɔ doviviti aɖe mee wonɔ ene, eye womate ŋu awɔ nu le wo ɖokui si eye woatsɔ dzonɔameme asubɔ Yehowa o. Adze na wo abe ɖe akaɖi aɖeke mele ŋgɔ o ene.—Tsɔe sɔ kple Mose V, 28:29; Yesaya 59:10.
15, 16. (a) Nukae míate ŋu agblɔ be Yehowa wɔ na amesiwo trɔ gbɔ la? (b) Nukata amesiwo trɔ gbɔ la manya kpɔ mɔ na ŋutilãmedɔdadawo o, gake nukae Mawu wɔ si wɔ ɖeka kple Yesaya 35:5, 6 me nyawo?
15 Gake tɔtrɔ kae nye si va esime Yehowa na Kores ɖe asi le wo ŋu be woatrɔ yi aƒe! Kpeɖodzi aɖeke mele Biblia me be Mawu to nukumɔ nu ʋu ŋku na Yudatɔ siwo trɔ gbɔ la dometɔ siwo ƒe ŋku gbã eye wòʋu to na tokunɔwo, alo da gbe le xɔdrɔ̃ alo nuwɔametɔ ɖesiaɖe ŋu o. Gake ewɔ nane ŋutɔŋutɔ si wɔ nuku sã wu ema. Ena wo denyigba lɔlɔ̃a dzi kekeli kple eƒe ablɔɖe gasu wo si.
16 Naneke meli si fia be amesiwo trɔ gbɔ la kpɔ mɔ be Yehowa awɔ ŋutilãmedɔdada ƒe nukunu siawo o. Woanya de dzesii be Mawu mewɔ nenema na Isak, Simson, alo Eli o. (Mose I, 27:1; Ʋɔnudrɔ̃lawo 16:21, 26-30; Samuel I, 3:2-8; 4:15) Gake ne wokpɔ mɔ be Mawu natrɔ yewoƒe nɔnɔmea le kpɔɖeŋumɔ nu la, ke womegblẽ wo ɖi o. Kakaɖedzitɔe la, kpukpui 5 kple 6 va eme ŋutɔŋutɔ le kpɔɖeŋumɔ nu. Yesaya gblɔe ɖi wòva eme pɛpɛpɛ be: “Ekema ŋkuagbãtɔwo ƒe ŋku aʋu, eye tokunɔwo ƒe to aʋu; ekema xɔdrɔ̃wo ati kpo abe zi ene, eye aɖetututɔwo ƒe aɖe atso aseye.”
Anyigba la Wɔwɔ abe Paradiso Ene
17. Edze ƒã be ŋutilãmetɔtrɔ kawoe Yehowa he vɛ?
17 Nusita wòle be ame mawo siwo trɔ gbɔ natso aseye le dzidzɔkpɔkpɔ me ɖe nɔnɔmewo abe esiwo Yesaya yi edzi gblɔ ene ŋu la nɔ wo si: “Elabena tɔ ŋɔ tso gbegbe, eye tɔʋu tso tagba. Bleziblezi azu tá, eye kuɖiɖinyigba azu tsidzɔƒe; amegãxiwo nɔƒe, afisi wotsyɔa akɔ ɖo la, azu aƒla kple avàwo teƒe.” (Yesaya 35:6b, 7) Togbɔ be míakpɔe le nutoa katã me egbea o hã la, ɖaseɖiɖi ɖee fia be afisi nye Yuda tsã la nye “paradiso dama” kpɔ.a
18. Aleke Yudatɔ siwo trɔ gbɔ anya wɔ nu ɖe Mawu ƒe yayrawo nui?
18 Le nusiwo ta woakpɔ dzidzɔ ɖo gome la, bu alesi Yudatɔ susɔeawo ase le wo ɖokui me esime wogbugbɔ wo xɔ ɖe Ŋugbedodonyigba la dzi ŋu kpɔ! Mɔnukpɔkpɔ su wo si be woaxɔ gbegbe si zu amegãxiwo kple lã mawo tɔgbe nɔƒe la ahatrɔe. Ðe dzi madzɔ wò be yeanɔ eme woawɔ gbugbɔɖɔɖodɔ sia, vevietɔ ne ènya be Mawu nɔ miaƒe agbagbadzedzewo yram oa?
19. Gɔmesese ka nue tɔtrɔgbɔ tso aboyo me le Babilon nɔ te ɖe dzidzenuwo dzi le?
19 Gake menye Yudatɔ ɖesiaɖe si nɔ aboyo me le Babilon koe atrɔ alo trɔ yi be yeakpɔ gome le gbugbɔɖɔɖodɔ dodzidzɔname ma me o. Mawu ɖo dzidzenuwo ɖi. Amesiwo tsɔ Babilontɔwo ƒe trɔ̃subɔsubɔnuwɔnawo ƒo ɖi wo ɖokui mekpɔ mɔ atrɔ yi o. (Daniel 5:1, 4, 22, 23; Yesaya 52:11) Eye amesiwo nɔa agbe numanyamanyatɔe hã mekpɔ mɔ ayi o. Amesiame si nɔ nɔnɔme ma me medze o. Gake amesiwo nɔ agbe wòsɔ ɖe Mawu ƒe dzidzenuwo nu, amesiwo wòbu ame kɔkɔewoe vaseɖe afi aɖe la ate ŋu atrɔ ayi Yuda. Woate ŋu azɔ mɔa abe Kɔkɔenyenyemɔ dzi zɔm wole ene. Yesaya na ema me kɔ le kpukpui 8 lia me be: “Ametoƒe kple mɔ tata anɔ afima, si woayɔ be ‘mɔ tata kɔkɔe.’ Ame makɔmakɔ aɖeke mato edzi o; woawo ɖeɖeko tɔ wòanye.”
20. Nukae mele be Yudatɔawo navɔ̃ o ne wotrɔ gbɔna, eye nukae ado tso eme?
20 Mele be Yudatɔ siwo trɔ yina la navɔ̃ amegbetɔ siwo wɔa nu abe lãwo ene alo adzohawo ƒe amedzidzedze o. Nukatae? Elabena Yehowa maɖe mɔ ame mawo nanɔ Mɔ ma dzi kple eƒe dukɔ si wògbugbɔ xɔ la o. Eyata woate ŋu atsɔ dzi kpɔdzidzɔwo kple mɔkpɔkpɔ dodzidzɔnamewo azɔ mɔ lae. Se alesi Yesaya ƒo nu tso ema ŋu tsɔ ƒo nyagblɔɖi sia tae ɖa: “Dzata aɖeke manɔ afima o, lã wɔadã aɖeke manɔ edzi loo, alo woakpɔe le afima o, eye ale amesiwo woɖe la, woato edzi, Yehowa ƒe amesiwo wòxɔ ƒle la, atrɔ agbɔ, eye woava Zion kple aseyetsotso, eye dzidzɔ mavɔ anɔ woƒe ta me, vivisese kple dzidzɔ asu wo si, eye nuxaxa kple hũɖeɖe abu ɖe wo.”—Yesaya 35:9, 10.
21. Aleke wòle be míabu Yesaya ta 35 me vava si dzɔ xoxo lae egbea?
21 Nyagblɔɖi me nɔnɔmetata nyui kae nye si míekpɔ le afisia! Gake mele be míabui be ŋutinya si nu va yi xoxo koe nya sia nye, abe ŋutinya vivi aɖe si meka mí alo meku ɖe míaƒe etsɔme ŋu o ye ene o. Nyateƒe lae nye be nyagblɔɖi sia va eme nukutɔe egbea le Mawu ƒe amewo dome, eyata eka mía dometɔ ɖesiaɖe nyateƒe. Ena susu siwo ŋu kakaɖedzi le siwo ta míate ŋu atso aseye ɖo la mí. Wodzro eƒe akpa siawo siwo ka wò agbenɔnɔ fifia kple etsɔme siaa la me le nyati si kplɔe ɖo me.
[Etenuŋɔŋlɔwo]
a Esi agblenyigbaŋununyala Walter C. Lowdermilk (si le Dukɔ Ƒoƒuawo ƒe Nuɖuɖu kple Agbledede Habɔbɔ teƒe) ku nu me le nutoa ŋu la, eƒo nya ta be: “Anyigba sia nye paradiso dama aɖe tsã.” Eɖee fia hã be yame ƒe nɔnɔme metrɔ le afima boo o “tso Romatɔwo ƒe ɣeyiɣia me ke,” eye “‘dzogbe’ si va xɔ anyigba si de ama tsã la tso amegbetɔ ƒe nuwɔna gbɔ, ke menye dzɔdzɔme gbɔe wòtso o.”
Èɖo Ŋku Wo Dzia?
◻ Ɣekaɣie Yesaya ta 35 va eme zi gbãtɔ?
◻ Nukae nyagblɔɖia me vava zi gbãtɔa ahe vɛ?
◻ Aleke Yehowa na nya si le Yesaya 35:5, 6 va emee?
◻ Tɔtrɔ kawoe Yudatɔ siwo trɔ gbɔ la kpɔ le anyigba la kple woƒe nɔnɔme ŋu?
[Nɔnɔmetata si le axa 9]
Petra ƒe dudowo, le nuto si me Edomtɔwo nɔ tsã
[ Credit Line]
Garo Nalbandian
[Nɔnɔmetata siwo le axa 10]
Esime Yudatɔwo nɔ aboyo me la, Yudea ƒe teƒe geɖe zu gbegbe si dzi lã wɔadãwo abe sisiblisi kple dzatawo ene nɔ
[Credit Line on page 10]
Garo Nalbandian
Sisiblisi Kple Dzata: Safari-Zoo of Ramat-Gan, Tel Aviv