Eƒe Dzimedidiwo Va Eme Nɛ
ÐE WÒNYE wò dzimedidi be yeakpɔ Mesia Fiaɖuƒea wòaɖu dzi le anyigba bliboa katã dzia? Nenye nenemae la, ekema ètsɔ didi vevie le gbe dom ɖa na anyigba dzi yayra siwo ŋugbe wodo le Dziƒofiaɖuƒe ma te. Ekema gbɔ dzi ɖi, elabena “didi, si va eme la, agbeti wònye.”—Lododowo 13:12; Yakobo 5:7, 8.
Anɔ abe ƒe 2,000 ene enye si va yi la, Simeon si nye “ame dzɔdzɔe kple mawumeme” la nɔ Yerusalem. Exɔ Mesia ŋuti nyagblɔɖiwo dzi se, eye wògbɔ dzi ɖi nɔ “Israel ƒe akɔfafa lalam.”—Luka 2:25.
Mesia Ŋuti Nyagblɔɖiwo Na Mɔkpɔkpɔ Mí
Yehowae gblɔ Mesia ŋuti nyagblɔɖi gbãtɔ si na mɔkpɔkpɔ ameƒomea nuvɔ̃wɔla siwo le kukum la. Mawu gblɔ eƒe “nyɔnu” alo xexeame katã ƒe habɔbɔa ƒe Dzidzimevi la ƒe vava ŋu nya ɖi.—Mose I, 3:15.
Wogblɔ be Amesia anye Abraham ƒe dzidzimevi eye Yakob gblɔ eƒe vava ɖi. (Mose I, 22:17, 18; 49:10) Wokafu Mesia ƒe Fiaɖuƒea ƒe ŋutikɔkɔewo le psalmowo me. (Psalmo 72:1-20) Yesaya gblɔ ɖi be ɖetugbi nɔ aƒee adzi Dzidzimevi la eye Mixa hã gblɔe ɖi be woadzii le Betlexem. (Yesaya 7:14; Mixa 5:1) Esiawo nye Mesia ŋuti nyagblɔɖi gbogboawo dometɔ ʋee aɖewo.
Mesia La Meva Ðo Kpɔ O!
He wò susuwo yi megbemegbee, eye nàtsɔe be ƒe alafa gbãtɔ M.Ŋ. le aƒe tum. Mawu ƒe Mesia ŋuti nyagblɔɖi gbãtɔ xɔ ƒe 4,000 ɣemaɣi. Yudatɔwo kpɔ Yehowa ƒe gbedoxɔ tsɔtsrɔ̃, wo denyigba si zu aƒedo, aboyomenɔnɔ le Babilon ƒe 70, kple ƒe 500 bubu si wotsɔ nɔ dziɖula siwo nye Trɔ̃subɔlawo tee la teƒe. Vaseɖe fifia hã Mesia la meva kpɔ o!
Aleke gbegbe Yudatɔ siwo nye mawuvɔ̃lawo nɔ mɔ kpɔm na Mesia ƒe vavae nye si! Eya gbɔe yayrawo atso ava na wo kple dukɔwo katã.
Mawuvɔ̃la Aɖe
Yudatɔ mawuvɔ̃la siwo nɔ gbedodoɖa dzi henɔ didim vevie be yewoakpɔ Mesia la ƒe vava teƒe la dometɔ ɖekae nye Simeon, ame tsitsi si nye Yehowa subɔla anukwaretɔ aɖe si nɔ Yudea ƒe fiadu me. Nu tɔxɛ aɖe dzɔ ɖe Simeon dzi.
Mawu kɔ eƒe gbɔgbɔ kɔkɔea ɖe Simeon dzi eye wòna wòkpɔ ɖeɖefia aɖe. Simeon mele kuku ge akpɔ o vaseɖe esime eƒe ŋkuwo nakpɔ Amesi anye Mesia la. Gake ŋkekewo kple ɣletiwo va le yiyim. Amegã kuku dzi koe Simeon le eye mate ŋu akpɔ mɔ be yeaganɔ agbe eteƒe nadidi boo o. Ðe Mawu ƒe ŋugbe si wòdo nɛ la ava emea?
Gbeɖeka (le ƒe 2 D.M.Ŋ me) la, ŋutsu aɖe kple srɔ̃a siwo ƒe srɔ̃ɖeɖe teƒe medidi o la tsɔ vidzĩ aɖe ɖe asi tso Betlexem va gbedoxɔa me. Gbɔgbɔ kɔkɔea ɖee fia Simeon be ŋkeke si wòle mɔ kpɔm na xoxoxo la ɖo azɔ. Eyi gbedoxɔa me, afisi wòakpɔ Amesi ŋu nyagblɔɖilawo ŋlɔ nu tsoe la le. Ezɔ kabakaba alesi eƒe ŋutilã si gbɔdzɔ la ate ŋui eye wòkpɔ Yosef, Maria, kple ɖevia.
Dzidzɔ ka gbegbee nye si Simeon tsɔ xɔ ɖevia ɖe eƒe abɔwo mee! Amesiae anye Mesia si ŋugbe wodo—“Yehowa ƒe Kristo la.” Le Simeon ƒe amegãkuku ta la, mate ŋu akpɔ mɔ be yeakpɔ Yesu ƒe anyigba dzi subɔsubɔdɔa nuwuwu o. Gake enyo ŋutɔ be wòakpɔe le eƒe vidzĩme. Mesia ŋuti nyagblɔɖiwo dze eme vava gɔme. Simeon kpɔ dzidzɔ ale gbegbe! Fifia eƒe dzi adze eme be yeadɔ alɔ̃ le ku me vaseɖe esime tsitretsitsi ƒe ɣeyiɣia naɖo.—Luka 2:25-28.
Simeon ƒe Nyagblɔɖinyawo
Esi Simeon kɔ gbe dzi be yeakafu Yehowa la, nya siwo do tso eƒe numee nye be: “Aƒetɔ, azɔ èdo mɔ wò dɔla le ŋutifafa me le wò nya la nu; elabena nye ŋkuwo kpɔ wò xɔxɔ, si nèdzra ɖo ɖe dukɔwo katã ƒe ŋku me; kekeli ƒe nyaɖeɖefia na trɔ̃subɔlawo kple wò dukɔ Israel ƒe ŋutikɔkɔe.” Nya siawo nɔ nuku wɔm na Yosef si nye fofo si xɔ Yesu nyi kple dadaa Maria ŋutɔ.—Luka 2:29-33.
Dzi dzɔ Simeon esi wònɔ Yosef kple Maria yram, eye edze ƒã be enɔ Yehowa ƒe yayra dim na wo be woatsɔ woƒe agbanɔamedziwo le ɖevia nyinyi me. Emegbe amegãɖeɖi la ɖo mo vevie. Esi wòtrɔ ɖe Maria ɖeɖe ŋu nɔ nu ƒom nɛ la, eyi edzi be: “Kpɔ ɖa, woɖo amesia anyi na ame geɖewo ƒe anyidzedze kple tsitretsitsi le Israel, kple dzesi, si woagblɔ nya ɖe eŋuti; ke wò la, yi ato wò ŋutɔ wò luʋɔ me, bena woaɖe ame geɖewo ƒe dzimesusuwo afia.”—Luka 2:34, 35.
Nya si Simeon Gblɔ Na Maria
Wò ya bu alesi Maria ase le eɖokui me la ŋuti kpɔ. Simeon ƒe nya siawo gɔme ɖe? Ame aɖewo axɔ Kristo eye wòaɖe wo tso woƒe nɔnɔme wɔnublanui si me wole xoxo la me. Gake ame bubuwo agbee, azu nukikli na wo eye woadze anyi. Abe alesi wogblɔe ɖi ene la, Yesu zu nuɖiaɖia na Yudatɔ geɖewo. (Yesaya 8:14; 28:16) Simeon ƒe nyawo mefia be Israeltɔ ɖesiaɖe adze anyi, gbã le esi womaxɔ Yesu dzi ase o ta, eye emegbe woafɔ ɖe tsi tre to edzixɔxɔse me o. Ke boŋ ame ɖesiaɖe ƒe nuwɔna ɖe eŋu ato vovo, esi aɖe ame geɖewo ƒe tamesusu ƒe nɔnɔme siwo ahe Mawu ƒe ʋɔnudɔdrɔ hena agbe alo tsɔtsrɔ ava wo dzi la afia. Le dzimaxɔsetɔwo gome la, anɔ abe dzesi alo amenuɖianu ene. Ne ame bubuwo xɔ edzi se la, woafɔ ɖe tsitre tso dzidada kple nuvɔwo me, be tenɔnɔ nyui nava nɔ wo si le Mawu gbɔ. Amewo ƒe nuwɔnawo ɖe Mesia la ŋutie afia nusi le woƒe dzi me.
Ke Simeon ƒe nya siawo ya gɔme ɖe: “Ke wò la, yi ato wò ŋutɔ wò luʋɔ me”? Ŋɔŋlɔa me ɖaseɖiɖi aɖeke meli si fia be woƒo yi ŋutɔŋutɔ ɖe Maria o. Gake ame geɖe ƒe Yesu gbegbe la ate ɖe edzi. Kpɔ alesi gbegbe wòave Mariae be wòakpɔ be wohe Yesu ɖe ati ŋuti la ɖa! Esia le ko abe yi tsɔtsɔ aƒo ɖee ene.
Simeon Ðe Mesia Ŋuti Nyagblɔɖiwo Gɔme
Mawu ƒe gbɔgbɔ ʋã Simeon wòɖe eme be Mesia ŋuti nyagblɔɖiwo va eme ɖe Yesu dzi. Simeon ate ŋu aku le ŋutifafa alo tomefafa me, ‘elabena eƒe ŋkuwo kpɔ Mawu ƒe xɔxɔ si wòdzra ɖo ɖe dukɔwo katã ƒe ŋku me, kekeli ƒe nyaɖeɖefia na trɔ̃subɔlawo kple Eƒe dukɔ Israel ƒe ŋutikɔkɔe.’ (Luka 2:30-32) Aleke esia ɖe Yesaya ƒe nyagblɔɖinyawo me nyuie enye si!
Nyagblɔɖila ma gblɔ be: “Yehowa ƒe ŋutikɔkɔe [aɖe] eɖokui afia, eye ŋutilãwo kata [akpɔe].” “[Nye Yehowa] metsɔ wò ɖo kekeli na dukɔwo hã, ne nanye nye xɔname vaseɖe anyigba ƒe mlɔenu ke.” (Yesaya 40:5; 42:6; 49:6; 52:10) Kristotɔwo ƒe Hela Ŋɔŋlɔawo kple nyateƒenyawo ɖi ɖase xoxoxo be Yesu Kristo si nye Mesia lae nye kekeli vavãtɔ na dukɔwo, Amesi aɖe gbɔgbɔmeviviti ɖa eye wòahe xɔxɔ vɛ na amewo.
Mawu ƒe Nya megagblɔ nya bubu aɖeke tso amegã ɖeɖi Simeon ŋu le ema megbe o. Edze ƒã be eku hafi Kristo va ʋu mɔ hena agbenɔnɔ le dziƒo. Gake eteƒe madidi o woafɔ Simeon ɖe tsitre wòava nɔ anyigba dzi. Dzidzɔ ka gbegbee nye si mia kplii miate ŋu akpɔ le xexe yeye si anɔ Mawu ƒe Mesia Fiaɖuƒea ƒe dziɖuɖu te la me!