Kpɔ Nyuie Be Wò Dzi Nagable Wò O

1, 2. Nu ka tae wòsesẽna be míanya nɔnɔme si me míaƒe kpɔɖeŋudzia le ŋutɔŋutɔ?

TSƆE be ŋdi kanya aɖe esi mèfɔ le aba dzi haɖe o la, akɔta dze wò veve vevie eye nède gbɔgbɔ ge do kpoe. Èbia ɖokuiwò se be, ‘Alo dzidɔe di be yeaho nama?’ Màdi be yeaŋe aɖaba ƒu kuxia dzi agblɔ ko be menye nanekee o. Àtso ɖe eŋu kpla. Ðewohĩ àna woakɔ wò ayi kɔdzi enumake. Àna ɖɔkta nado wò dzia kpɔ nyuie. Ɛ̃, afɔ siawo ɖeɖe kaba alea ate ŋu akpɔ wò agbe ta.

² Ke míaƒe kpɔɖeŋudzia ya ɖe? Mele bɔbɔe be míanya nɔnɔme si tututu me wòle o. Nu ka tae? Biblia gblɔ be: “Ame ƒe dzi la, alakpatɔ wònye wu nuwo katã, nu gbegblẽ wònye, ame ka ahadze sii ma?” (Yer. 17:9) Eya ta míaƒe dzi ate ŋu able mí míabu xaa be kuxi aɖeke mele mía ŋu le gbɔgbɔ me o, evɔ ame bubuwo ya anɔ kuxiawo kpɔm ahatsi dzi ɖe mía ŋu. Nu ka tae dzia ate ŋu able mí alea? Míaƒe nuvɔ̃menyenye kpɔa ŋusẽ gbegblẽ ɖe mía dzi, eye Satana kple nuɖoanyi sia hã ate ŋu atsyɔ nu ame si ƒomevi míenye le ememe dzi. Yeremiya kple eŋɔlimetɔwo ŋu nya sɔsrɔ̃ akpe ɖe mía ŋu míanya dzi si ƒomevi le mía si.

 3. Nu kawoe va zu mawu na ame geɖe egbea?

³ Yudatɔ akpa gãtɔ ƒe nuwɔna ɖee fia be nane gblẽ le woƒe dzi ŋu le gbɔgbɔ me. Wogblẽ Mawu vavã la ɖi hedze Kanaantɔwo ƒe mawuwo yome gake woƒe dzitsinya meɖe fu na wo o. Yehowa tɔ gbe alakpamawusubɔla mawo be: “Ke afi ka wò mawu, siwo nèwɔ na ɖokuiwò la le? Woawo netso kpɔ, be woate ŋu aɖe wò le wò hiãɣi la hã? Yuda, elabena ale si wò duwo sɔ gbɔe la, nenema wò mawuwo sɔ gbɔe!” (Yer. 2:28) Enye nyateƒe be míawo ya míabu mía ɖokui be míenye alakpamawusubɔla ya o. Ke hã, nyagɔmeɖegbalẽ aɖe ɖe nya “mawu” gɔme be: “Ate ŋu anye amegbetɔ loo alo nu siwo ŋu wodea asixɔxɔ etɔxɛe.” Egbea, ame geɖe dea asixɔxɔ dɔwɔɖui, lãmesẽ, ƒome, kple aƒemelã siwo gbɔ womelɔ̃a nu le o gɔ̃ hã ŋu wu nu sia nu. Ame bubuwo hã dea asixɔxɔ kamedefefewo, ame xɔŋkɔwo, mɔɖaŋunuwo, tsaɖiɖi, alo dekɔnuwo ŋu etɔxɛe. Ame geɖe tsɔ nu siawo yome titi ɖɔ li ƒomedodo si wòle be wòanɔ woa kple wo Wɔla la dome. Ðe esia ate ŋu adzɔ ɖe Kristotɔ vavãwo hã dzi abe ale si wòdzɔ ɖe Yudatɔwo dzi le Yeremiya ŋɔli enea?

 4. Esi Yudatɔwo le gbɔgblɔm be, “Afi kae Yehowa ƒe nya la le? Neva dzro!” la, ɖe nya ma tso woƒe dzi me vavãa?

⁴ Ðewohĩ adzɔ dzi na wò be nànya nu si dzɔ hafi Yeremiya ɖɔ dzi la be, enye nu gbegblẽ. Ekpɔe be amewo nɔ gbɔgblɔm be: “Afi kae Yehowa ƒe nya la le? Neva dzro!” (Yer. 17:15) Gake ɖe wole Mawu ƒe nyaa dim be yewoase nyateƒea? Yeremiya dze eƒe agbalẽa ƒe ta 17 lia ma gɔme ale: “Wotsɔ ganuŋlɔnu kple lotamekpe tsutsuẽ ŋlɔ Yuda ƒe nu vɔ̃wo ɖe woƒe dzi ƒe nuŋlɔkpe dzi kple woƒe vɔsamlekpuiwo ƒe dzowo ŋu.” Yudatɔ mawo ƒe kuxiae nye be ‘wole dzi ɖom ɖe amegbetɔ gbɔlo ƒe kpekpeɖeŋu ŋu, eye woƒe dzi trɔ le Yehowa yome.’ Gake wo dometɔ ʋɛ aɖewo ya ɖo ŋu ɖe Mawu ŋu hebia eƒe mɔfiame kple yayra.—Yer. 17:1, 5, 7.

 5. Aleke Yeremiya ŋɔlimetɔwo wɔ nu ɖe Yehowa ƒe mɔfiamewo ŋui?

⁵ Ale si wo dometɔ geɖe wɔ nu ɖe se si Mawu de na wo ŋu ye ɖe nu si tututu le woƒe dzi me fia. (Xlẽ Yeremiya 17:21, 22.) Le kpɔɖeŋu me, Sabat nye ŋkeke si dzi wodzudzɔa ŋutilãmedɔwo wɔwɔ hekpɔa gome le gbɔgbɔmedɔwo me. Mele be Yeremiya ŋɔlimetɔwo nadzra nu alo ayi aɖawɔ dɔ aɖeke le Sabat dzi o. Ke hã, woƒe nuwɔna ɖe dzi si ƒomevi le wo si la fia. “Wogbe toɖoɖo, eye womeƒu to anyi o, ke boŋ wolia ʋume, womeɖo to o, eye wodo toku tohehe.” Togbɔ be wonya Mawu ƒe sea nyuie hã la, nu si dze wo ŋue wowɔna—wowɔa dɔ le Sabat dzi.—Yer. 17:23; Yes. 58:13.

6, 7. (a) Togbɔ be kluvi nuteƒewɔla kple aɖaŋudzelaa le aɖaŋu ɖom na mí hã la, aleke wòadzɔe be Kristotɔ aɖe nawɔ nyametsotso si me nunya mele o? (b) Ŋusẽ gbegblẽ kae nyametsotso mawo akpɔ ɖe míaƒe kpekpewo dede dzi?

⁶ Míawo ya míegale Sabat sea te egbea o. Gake nuxlɔ̃ame vevi aɖe le ale si Yudatɔ mawo wɔ nu ɖe Sabat sea ŋui me na mí, eye wòna míekpɔ dzi si ƒomevi le wo si. (Kol. 2:16) Míeɖe asi le ɖokuitɔdidi alo ŋutilãmenuwo yome titi vevie ŋu ale be míate ŋu awɔ Mawu ƒe lɔlɔ̃nu. Míekpɔe be anye vodada be míasubɔ Mawu ale si mía ŋutɔ míedii. Azɔ hã, míenya ame geɖe siwo tsɔ Mawu ƒe lɔlɔ̃nuwɔwɔ ɖo nɔƒe gbãtɔ le agbe me, si na wokpɔ dzidzeme kple tomefafa. Ekema, aleke wòadzɔe be míava nɔ mía ɖokui blem?

⁷ Kristotɔ ate ŋu asusui vodadatɔe be yeƒe dzi mate ŋu able ye abe ale si wòdzɔ ɖe Yeremiya ŋɔlimetɔwo dzi ene gbeɖe o. Le kpɔɖeŋu me, esɔ be ame nasusu be, ‘Ele be makpɔ egbɔ be nye dɔwɔɖui nagage le asinye o ale be mate ŋu akpɔ nye ƒomea dzi nyuie.’ Ke ne esia na wògblɔ be, ‘Ele be made suku akpee bene ɖoƒe si mele le dɔme nagage le asinye o alo be makpɔ dɔ gã aɖe awɔ’ ya ɖe? Adze abe nunya le nuŋububu alea hã me ene, si ana wòaƒo nya ta be, ‘Nuwo megale abe tsã ene o, fifia ele be ame nade yunivɛsiti hafi dɔ mage le esi o, eye agbea nanya nɔ nɛ.’ Kpɔ ale si wòle bɔbɔe be ame nabu aɖaŋuɖoɖo nyui si tso kluvi nuteƒewɔla kple aɖaŋudzelaa gbɔ ku ɖe suku geɖe dede ŋu nu tsɛe, eye wòava nɔ kpekpewo dam ƒu la ɖa! Le sukudede ƒe nya sia me la, ame aɖewo va le xexea ƒe nukpɔsusu xɔm de eme vivivi. (Ef. 2:2, 3) Esɔ be Biblia xlɔ̃ nu mí be: “Migaɖe mɔ xexea nazi mia dzi miatrɔ ɖe eƒe nɔnɔme nu o.”—Rom. 12:2, Phillips.a

 8. (a) Nu kawoe mele be Kristotɔ natsɔ aƒo adegbee o? (b) Nu ka tae Mawu ƒe ŋkɔ kple eƒe nuwɔna aɖewo nyanya ɖeɖe mesɔ gbɔ o?

⁸ Ƒe alafa gbãtɔ me Kristotɔ aɖewo nye kesinɔtɔwo, eye ɖewohĩ wo dometɔ aɖewo hã nye ame ŋkutawo. Nenema ko wòle le Kristotɔ siwo li egbea hã gome. Aleke wòle be Kristotɔ siawo nabu woƒe nudzedzinameae, eye nukpɔsusu kae wòle be wòanɔ mía si ɖe wo ŋu? Yehowa to Yeremiya dzi ɖo nya sia ŋu. (Xlẽ Yeremiya 9:23, 24.) Le esi teƒe be ame natsɔ eƒe nudzedziname anɔ adegbe ƒom la, nunya anɔ eme be wòalɔ̃ ɖe edzi be Xexea Me Katã Ƒe Dziɖulagã la nyanya nyuie ye nye nu vevitɔ le agbe me. (1 Kor. 1:31) Nu kae wòfia be míanya Yehowa nyuie? Enye nyateƒe be Yeremiya ŋɔlimetɔwo nya Mawu ƒe ŋkɔ. Wonya hã be ekplɔ yewo tɔgbuiwo to Ƒudzĩa me dedie, eye wòkpɔ wo ta esi woyina ɖe Ŋugbedodonyigbaa dzi kpakple esime ʋɔnudrɔ̃lawo kple fia wɔnuteƒewo nɔ wo dzi ɖum. Ke hã, womenya Yehowa nyuie alo xɔ edzi se ŋutɔŋutɔ o. Wogblɔna be: ‘Míeɖi fɔ o, Mawu ƒe dɔmedzoe fa ɖe mía ŋu vavã.’—Yer. 2:35.

 9. Nu ka tae míeka ɖe edzi be anya wɔ be míatrɔ míaƒe dzi ƒe nɔnɔme, eye aleke míawɔ esiae?

⁹ Ehiã be Yudatɔ siwo Yeremiya gblɔ Mawu ƒe nya na la nawɔ tɔtrɔ aɖewo be dzi nyui nasu wo si. Mɔnukpɔkpɔ su wo si be woawɔ tɔtrɔ sia, elabena Mawu gblɔ tso ame siwo atrɔ gbɔ tso aboyo me ŋu be: “Mana dzi wo, ne woatsɔ adze sim be, nyee nye Yehowa; woanye dukɔ nam, eye manye Mawu na wo, nenye be wotrɔ ɖe ŋunye tso woƒe dzi blibo me.” (Yer. 24:7) Tɔtrɔ ma tɔgbi anya wɔ egbea hã. Eye le mía dometɔ akpa gãtɔ gome la, míagate ŋu ana míaƒe kpɔɖeŋudzia nanyo ɖe edzi. Be míawɔ esia la, nu vevi etɔ̃ aɖewo hiã: Mawu ƒe Nya la sɔsrɔ̃ nyuie, ŋugbledede tso nu siwo Mawu wɔna na mí ŋu, kple nu siwo míesrɔ̃na tso Mawu ŋu tsɔtsɔ wɔ dɔe. Mele be míaɖi Yeremiya ŋɔlimetɔwo o, ke boŋ míalɔ̃ be Dziwo Me Dzrola Gã la nado míaƒe dziwo kpɔ. Ŋugbledede tso Biblia me gɔmeɖosewo kple nu siwo Yehowa wɔ na mí ŋu akpe ɖe mía ŋu míadzro míaƒe dziwo me. (Ps. 17:3) Kpɔ ale si gbegbe esia wɔwɔ aɖee afia be míedze nunyae ɖa!

10, 11. (a) Nu ka tae Yeremiya yi zemela ƒe me? (b) Nu ka dzie Yehowa nɔa te ɖo trɔa asi le ame ŋu?

¹⁰ Satana dina be yeame amewo katã abe ze ɖeka tɔgbiwo ene, gake Mawu ya nyae be ame sia ame kple eƒe nɔnɔme ye. Nane si teƒe Yeremiya kpɔ na esia me kɔ na mí. Gbe ɖeka Mawu gblɔ nɛ be wòayi zemela aɖe ƒe me. Esi wòva ɖo la, ekpɔ zemela wòle ze mem, gake esi ze si mem wòle la gblẽ la, zemelaa tsɔ tsua me ze bubui. (Xlẽ Yeremiya 18:1-4.) Nu ka tae Yehowa ɖo Yeremiya ɖa be wòakpɔ nu sia teƒe, eye nu kae míate ŋu asrɔ̃ tso eme?

¹¹ Yehowa di be Yeremiya kple Israel viwo nanya be yee nye zemela gãtɔ eye ŋusẽ le ye si be yeatrɔ asi le amewo kple dukɔwo siaa ŋu woanɔ abe ale si yedi ene. Aleke Mawu trɔa asi le tsua ŋui? Yehowa mele abe amegbetɔ zemelawo ene ne wòawɔ vodada alo atso zi ɖeka ko agblẽ eƒe asinudɔwɔwɔ dome o. Ale si ame wɔa nui ne Yehowa le asi trɔm le eŋu ye ɖea ale si wòazãe fiana.—Xlẽ Yeremiya 18:6-10.

12. (a) Aleke Yoyakim wɔ nui esi Yehowa dze agbagba be yeatrɔ asi le eŋu? (b) Nu kae nèsrɔ̃ tso Yoyakim ŋu nya sia me?

¹² Ke aleke Yehowa trɔa asi le ame ɖekaɖekawo ŋui? Biblia koŋue wòzãna egbea. Ne míele Mawu ƒe Nyaa xlẽm la, míakpɔ ame si ƒomevi míenye adze sii, eye Mawu atrɔ asi le mía ŋu. Azɔ mina míadzro ale si Fia Yoyakim wɔ nui me, ne míakpɔ ale si Mawu di be yeatrɔ asi le Yeremiya ŋɔlimetɔwo ŋu hafi la ɖa. Mose ƒe Sea gblɔ be ame aɖeke ‘nagatafa apadɔwɔla o,’ gake nu ma tututue fia la wɔ. Ena nɔvia Israel viwo tu “xɔ gãwo” nɛ wògbe woƒe dɔwɔfe xexe na wo. (5 Mose 24:14; Yer. 22:13, 14, 17) Yehowa to nyagblɔɖilawo dzi di be yeakpe ɖe Fia Yoyakim ŋu wòatrɔ eƒe nɔnɔme. Gake fia la na eƒe dzi flui. Egbe be “yemasee o,” eye wòyi edzi lé mɔ si dzi wòdze tso eƒe ɖevime ke la me ɖe asi. Eya ta Yehowa gblɔ be: “Woaɖii abe tedzi ene, woatee le anyigba atsɔ aƒu gbe ɖe adzɔge.” (Yer. 22:19, 21) Bometsitsi ka gbegbee nye esi wòanye be míagbe tɔtrɔ ahagblɔ be: ‘Nenemae nye ya mele’! Egbea, Mawu megaɖoa nyagblɔɖilawo abe Yeremiya ene ɖe mí o, gake enaa mɔfiamewo mí. Kluvi nuteƒewɔla kple aɖaŋudzela la kpena ɖe mía ŋu be míade dzesi Biblia me gɔmeɖosewo ahatsɔ wo awɔ dɔe. Gɔmeɖose mawo dometɔ aɖewo kuna ɖe nu siwo míewɔna gbe sia gbe ŋu, abe awudodo kple dzadzraɖo ene, eye bubuwo hã kuna ɖe hadzidzi kple ɣeɖuɖu le srɔ̃ɖeƒewo alo hadomewɔna bubuwo me ŋu. Ðe míalɔ̃ faa be Mawu ƒe Nya la natrɔ asi le mía ŋua?

13, 14. (a) Nu kae dzɔ hafi Yudatɔ siwo le Yerusalem va lɔ̃ na ablɔɖe wo nɔvi siwo zu kluvi na wo? (b) Nu kae wowɔ emegbe si ɖe dzi si ƒomevi le wo si ŋutɔŋutɔ la fia?

¹³ Na míakpɔ kpɔɖeŋu bubu ɖa. Babilontɔwo tsɔ Zedekiya ɖo fiae le Yuda be wòanɔ yewoƒe ŋusẽ te. Togbɔ be Yehowa to Yeremiya dzi ɖo aɖaŋu na Zedekiya be wòawɔ ɖe ɖoɖo sia dzi hã la, eva dze aglã. (Yer. 27:8, 12) Eya ta Babilontɔwo va ɖe to ɖe Yerusalem. Azɔ Fia Zedekiya kple eŋumewo se le wo ɖokui me be yewoawɔ Se la me nya aɖewo dzi ne Mawu nakpɔ nublanui na yewo. Fia Zedekiya nyae be Sea bia be woaɖe asi le Yudatɔ siwo zu kluvi na wo nɔviwo ŋu le woƒe kluvinyenye ƒe ƒe adrelia me, eya ta ewɔ ɖoɖo azɔ be ame sia ame nana ablɔɖe eƒe kluvi. (2 Mose 21:2; Yer. 34:14) Ɛ̃, esi futɔwo xaxa wo ɖo ko hafi wolɔ̃ be yewoana ablɔɖe yewoƒe kluviwo.—Xlẽ Yeremiya 34:8-10.

¹⁴ Emegbe Egipte-ʋakɔa va kpe ɖe Yerusalem ŋu, si na be Babilontɔwo trɔ dzo. (Yer. 37:5) Aleke ame siwo na ablɔɖe woƒe kluviwo wɔ nui? Wogbugbɔ kplɔ kluviawo gbɔe, be woagava subɔ yewo ake. (Yer. 34:11) Edze ƒãa be esi Yudatɔwo ɖo xaxa me la, wowɔ nu abe ɖe wotrɔ nɔnɔme hele sea dzi wɔm ene. Ke esi futɔwo trɔ dzo la, wogatrɔ ɖe woƒe tsãgbenɔnɔa ŋu. Togbɔ be edze abe ɖe woɖoe be yewoawɔ Sea dzi ene hã la, woƒe nuwɔna ɖee fia be le woƒe dzi me la, womedi be Mawu ƒe Nya nafia mɔ yewo yewoatrɔ agbenɔnɔ o.

15. Tsu ka ƒomevie nàdi be yeanye le Yehowa si me? Gblɔ eƒe kpɔɖeŋu.

¹⁵ Esi míele Yehowa ƒe xexea me katã ƒe habɔbɔa me ta la, míeva nya Biblia me gɔmeɖosewo le nyati tɔxɛ aɖewo ŋu. Le kpɔɖeŋu me, míenya nu si míawɔ ne mía nɔvi aɖe dze agɔ le mía dzi. (Ef. 4:32) Míelɔ̃ ɖe edzi be Biblia ƒe aɖaŋuɖoɖowo le dzɔdzɔe eye nunya le wo me. Ke tsu ka ƒomevie wòle be míanye? Ðe míalɔ̃ be Yehowa name mí ale si wòdia? Ne míaƒe dzi bɔbɔ la, Zemela Gã la atrɔ asi le mía ŋu míanyo ɖe edzi. Ame mí míanye ze si ŋu bubu le, si nyo na eƒe zazã. (Xlẽ Romatɔwo 9:20, 21; 2 Timoteo 2:20, 21.) Mele be míaƒe dzi nanɔ abe Fia Yoyakim loo alo Zedekiya ŋɔlimetɔ siwo si kluviwo nɔ la tɔ ene o. Ke boŋ ele be míalɔ̃ Yehowa natrɔ asi le mía ŋu be míazu dɔwɔnu nyui si ŋu bubu le.

16. Nyateƒenya vevi kae le nyanya na Yeremiya?

¹⁶ Eva hiã be Yehowa naɖɔ Yeremiya gɔ̃ hã ɖo. Nɔnɔme kae wòɖe fia? Edze le nya si wògblɔ me be: “Ŋutsu ƒe zɔzɔme la menye eya ŋutɔ si me wòle, ne eƒe azɔlime nato mɔ ɖeka o.” Eya ta eɖe kuku na Mawu be: ‘Oo, Yehowa, ɖɔm ɖo.’ (Yer. 10:23, 24) Sɔhɛwo, ɖe miadi be yeawoasrɔ̃ Yeremiya ƒe kpɔɖeŋua? Nyametsotso geɖe li miawɔ le etsɔme. Sɔhɛ aɖewo dina be ‘yewoafia mɔ yewo ɖokui.’ Ðe nàdi be Mawu nafia mɔ ye ne yele nyametsotso wɔma? Ðe nàtsɔ ɖokuibɔbɔ alɔ̃ ɖe edzi abe Yeremiya ene be amegbetɔ mate ŋu afia mɔ eɖokui oa? Ðo ŋku edzi be ne èdi Mawu ƒe mɔfiame la, atrɔ asi le ŋuwò nànyo ɖe edzi.

17-19. (a) Nu ka tae Yeremiya zɔ mɔ legbe yi Frat Tɔsisia nu? (b) Nu ka tae wòate ŋu asesẽ na Yeremiya be wòaɖo to Mawu hafi? (d) Nu kae Yehowa fia eƒe dukɔa tso Yeremiya ƒe aklalalidziblanu ƒe nyaa me?

¹⁷ Yeremiya ƒe dɔa bia be wòaɖo to Mawu. Ne wòe nye Yeremiya ɖe, ɖe nàlɔ̃ awɔ ɖe mɔfiame ɖe sia ɖe si Mawu ana wò dzia? Gbe ɖeka la, Yehowa gblɔ na Yeremiya be wòayi aɖaƒle aklalalidziblanu atsɔ abla ali dzi. Emegbe Yehowa gblɔ nɛ be wòayi Frat Tɔsisia nu. Esia fia be Yeremiya zɔ mɔ abe kilometa 500 ene. Esi wòɖo teƒea la, Mawu gblɔ nɛ be wòaɣla alidziblanua ɖe agato aɖe me, eye wòagazɔ mɔ legbe ma atrɔ ava Yerusalem. Emegbe Mawu gblɔ nɛ be wòagatrɔ ayi aɖatsɔ alidziblanu si wòɣla la gbɔe. (Xlẽ Yeremiya 13:1-9.) Esia fia be eƒe mɔzɔzɔ yiyi kple gbɔgbɔ zi evea katã va le abe kilometa 2,000 ene. Ame siwo ɖea ɖeklemi Biblia mexɔe se be Yeremiya to afɔ zɔ mɔ legbe ma, si axɔ ɣleti geɖe la o.b (Ezra 7:9) Ke hã, nya mae Mawu gblɔ eye nu ma tututue Yeremiya wɔ.

¹⁸ Kpɔe ɖa le susu me be nyagblɔɖila lae nye ema le afɔ zɔm to Yuda towo dome, ɖewohĩ anya to gbegbe hafi ɖo ta Frat Tɔsisia nu. Aklalalidziblanua ɣaɣla dzaa ta koe wòzɔ mɔ legbe ma ɖo. Ðewohĩ esi eƒe aƒelikawo megale ekpɔm o la, woanɔ didim be yewoanya afi si wòyi. Esi wòtrɔ gbɔ la, aklalalidziblanua megale ali nɛ o. Emegbe Mawu gblɔ nɛ be wòagazɔ mɔ legbe ma ayi aɖatsɔ alidziblanua gbɔe, evɔ alidziblanua nyunyɔ, “wɔna aɖeke megale” eŋu o. Ele bɔbɔe be Yeremiya nagblɔ be: ‘Oo, eglom azɔ. Viɖe ka gɔ̃e le nu siawo katã me nam?’ Ke hã, esi wòlɔ̃ Mawu trɔ asi le eŋu ta la, megblɔ nya mawo dometɔ aɖeke o. Meto nyatoƒoe kura o. Ewɔ ɖe mɔfiamea dzi pɛpɛpɛ!

¹⁹ Esi wòzɔ mɔ zi evelia yi gagbɔ ko hafi Yehowa ɖe nu si wɔm wòle la me nɛ. Aklalalidziblanu ƒe nya sia zã gee Yeremiya le atsɔ agblɔ nya vevi sia ɖi be: “Dukɔ vɔ̃ɖi sia, si gbe nye nyawo sese, wole zɔzɔm le woƒe dzimesesẽ nu, wodze mawu tutɔwo yome, eye wosubɔ wo hede ta agu na wo la, anɔ abe alidziblanu sia, si ŋu wɔna aɖeke megale o la ene.” (Yer. 13:10) Kpɔ ale si gbegbe mɔnu si Yehowa zã tsɔ fia nu eƒe dukɔa awɔ dɔ ɖe wo dzii ɖa! Ale si Yeremiya ɖo to Yehowa tso dzi me le nu siwo míasusu be wonye nu maɖinuwo gɔ̃ hã me ye wɔe be Yehowa ɖo eƒe dukɔa ƒe dzi gbɔ.—Yer. 13:11.

20. Nu ka tae wòawɔ nuku na ame aɖewo be èɖoa to Mawu, gake kakaɖedzi kae wòle be wòanɔ asiwò?

²⁰ Mawu mebia tso Kristotɔ siwo li egbea si be woazɔ mɔ kilometa alafawo ne yeatsɔ afia nu amewo o. Ke hã, ate ŋu adzɔ be esi nèzu Kristotɔ ta la, wò agbenɔnɔ awɔ nuku na xɔ̃wòwo alo aƒelikawo eye woahe nya ɖe ŋuwò. Woate ŋu atsɔ nya ɖe ŋuwò le tiatia siwo nèwɔna le awudodo kple dzadzraɖo, sukudede, dɔwɔɖui, alo aha sesẽ nono nyawo me ta. Ðe nàɖoe kplikpaa be yeaɖo to Mawu ƒe mɔfiame abe Yeremiya enea? Ne èlɔ̃ be Yehowa natrɔ asi le wò dzi ŋu le tiatia siwo nèwɔna me la, wò nuwɔna azu ɖaseɖiɖi na wo. Ðo ŋku edzi be ne èwɔ ɖe mɔfiame siwo Yehowa nana to eƒe Nya la kple kluvi ƒe haa dzi la, wò ŋutɔ dziwò ko wòade. Le esi teƒe be nàɖe mɔ wò dzi nable wò la, srɔ̃ Yeremiya boŋ. Ðoe be yealɔ̃ faa Mawu natrɔ asi le ye ŋu. Ðe mɔ wòame wò nàzu ze si ŋu bubu le, si wòazã ɖaa.