Yi Edzi Nànɔ Ŋudzɔ Abe Yeremiya Ene
“[Nye Yehowa] manɔ ŋute ɖe nye nya ŋu, ne mawɔe ade goe.”—YER. 1:12.
1, 2. Nu ka tae wotsɔ Yehowa ƒe ‘ŋutenɔnɔ’ do ƒome kple aɖatsigoti ɖo?
AÐATSIGOTI, si nye yevuziti ƒomevi aɖe la, nye ati gbãtɔ siwo ƒoa se le Libanon kple Israel togbɛwo tame la dometɔ ɖeka. Eƒe seƒoƒo ƒe amadede ɣi kple dzĩ la nyaa kpɔna ŋutɔ, eye eƒoa se le January ƒe nuwuwu alo February ƒe gɔmedzedze. Ŋkɔ si woyɔna nɛ le Hebrigbe me ƒe gɔmeɖeɖee nye nyɔnyɔla, le esi wòƒoa se do ŋgɔ na ati bubuwo ta.
2 Esi Yehowa ɖo Yeremiya nyagblɔɖilae la, Yehowa tsɔ ale si aɖatsigoti ƒoa se kaba wɔ kpɔɖeŋu na nyateƒenya vevi aɖe. Woɖe ati ma ƒe alɔ aɖe fia nyagblɔɖilaa le eƒe subɔsubɔdɔa ƒe gɔmedzedze. Nu kae nu sia fia? Yehowa ɖe eme be: “Manɔ ŋute ɖe nye nya ŋu, ne mawɔe ade goe.” (Yer. 1:11, 12) Abe ale si ko aɖatsigoti nyɔna kaba ene la, Yehowa anyɔ kaba le kpɔɖeŋunyagbɔgblɔ nu be wòadɔ eƒe nyagblɔɖilawo ɖa be woaxlɔ̃ nu eƒe amewo tso tomaɖomaɖo me tsonuwo ŋu. (Yer. 7:25) Eye madzudzɔ o—ayi edzi ‘anɔ ŋute’—va se ɖe esime eƒe nyagblɔɖinya la nava eme keŋkeŋ. Le ƒe 607 D.M.Ŋ. me, le ɣeyiɣi ɖoɖia dzi tututu la, Yehowa ƒe ʋɔnudɔdrɔ̃ va Yuda dukɔ gbexɔse la dzi.
3. Kakaɖedzi kae ate ŋu anɔ mía si ku ɖe Yehowa ŋu?
3 Nenema kee egbea hã, Yehowa le ŋute be yeawɔ yeƒe lɔlɔ̃nu ade goe. Mate ŋu adzɔ gbeɖe be wòaŋlɔ eƒe nya dzi wɔwɔ be o. Aleke Yehowa ƒe ŋutenɔnɔ la ka wòe? Ðe nèxɔe se be Yehowa le “ŋute” le ƒe 2011 sia me be yeawɔ yeƒe ŋugbedodowo dzia? Ne ɖikeke aɖe le mía me ku ɖe Yehowa ƒe ŋugbedodo, siwo ŋu kakaɖedzi le ŋu la, fifia ye nye ɣeyiɣi si wòle be míanyɔ tso gbɔgbɔmekɔlɔ̃edɔdɔ ɖe sia ɖe ƒomevi me. (Rom. 13:11) Yehowa ƒe nyagblɔɖila Yeremiya yi edzi nɔ ŋudzɔ. Ale si Yeremiya wɔ nɔ ŋudzɔ ɖe dɔ si Mawu de asi nɛ la ŋu kple nu si tae la me dzodzro akpe ɖe mía ŋu míakpɔ ale si míate ŋu ado vevie nu le dɔ si Yehowa de mía si la wɔwɔ me.
Gbedeasi Aɖe Si Hiã Kpata
4. Kuxi kawoe Yeremiya do goe le gbe si wode esi la gbɔgblɔ me, eye nu ka tae gbedeasia hiã kpata?
4 Anya susɔ vie ko ne Yeremiya naxɔ ƒe 25 esime wòxɔ gbe tso Yehowa gbɔ be wòanye dzɔla. (Yer. 1:1, 2) Gake ese le eɖokui me be yemetsi o, yemedze kura aƒo nu na dukɔa ƒe amegãwo, ame tsitsi siwo le ŋusẽnɔƒewo la o. (Yer. 1:6) Fɔbunya sesẽwo kple ʋɔnudrɔ̃nya siwo ŋu ŋɔdzi le la nɔ esi wòagblɔ na dukɔa, vevietɔ na nunɔlawo, aʋatsonyagblɔɖilawo, dziɖulawo, kple ame siwo ‘lé woƒe mɔ tsɔ’ eye “wogbe tɔtrɔ” la. (Yer. 6:13; 8:5, 6) Woagbã Fia Salomo ƒe gbedoxɔ dzeani la, si nye nyateƒe tadedeagua ƒe teƒe vevitɔ hena ƒe alafa ene kloe la, keŋkeŋ. Yerusalem kple Yuda azu aƒedo, eye woaɖe wo me nɔlawo aboyoe. Eme kɔ ƒã be, gbedeasi si wode Yeremiya si be wòagblɔ la hiã kpata!
5, 6. (a) Alekee Yehowa le Yeremiya habɔbɔa zãm egbea? (b) Nu kawo ŋue míaƒe nusɔsrɔ̃a aku ɖo?
5 Le egbeŋkekea me la, lɔlɔ̃ ʋã Yehowa wòna Kristotɔ amesiaminawo ƒe ƒuƒoƒo aɖe li, be wòanye dzɔla le kpɔɖeŋunyagbɔgblɔ nu, be wòaxlɔ̃ nu ameƒomea tso eƒe ʋɔnudɔdrɔ̃ si gbɔna xexe sia dzi la ŋu. Ƒe blananewoe nye esia la, Yeremiya habɔbɔ sia le dzi dem ƒo na amewo be woade dzesi ɣeyiɣi siwo me míele la. (Yer. 6:17) Biblia te gbe ɖe edzi be Yehowa, Gamedzinɔla Gãtɔ la, mele wɔwɔm blewuu o. Eƒe ŋkekea ava ɖe game dzi tututu, le gaƒoƒo aɖe si amegbetɔwo manɔ mɔ kpɔm nɛ o me.—Zef. 3:8; Mar. 13:33; 2 Pet. 3:9, 10.
6 Nenɔ susu me na wò be Yehowa le ŋute, eye ahe eƒe xexe yeyea ava ɖe game dzi tututu. Ele be esia nyanya naʋã Yeremiya habɔbɔa me tɔwo eye wòakpe ɖe woƒe zɔhɛ ɖeadzɔgbewo ŋu be woayi edzi anɔ ŋudzɔ ɖe ale si gbegbe woƒe gbedeasia hiã kpata tso ŋkeke yi ŋkeke la ŋu. Aleke nya sia ka wòe? Yesu ɖee fia be ehiã be ame sia ame nanɔ Mawu ƒe Fiaɖuƒea ƒe akpa dzi. Na míadzro nɔnɔme nyui etɔ̃ siwo kpe ɖe Yeremiya ŋu wòyi edzi nɔ ŋudzɔ ɖe dɔ si wode asi nɛ ŋu la me, eye esia akpe ɖe mía ŋu be míawɔ nenema ke.
Lɔlɔ̃ Na Amewo
7. Ðe ale si lɔlɔ̃ ʋã Yeremiya wòɖe gbeƒã togbɔ be eto nɔnɔme sesẽwo me hã la me.
7 Nu kae ʋã Yeremiya be wòaɖe gbeƒã togbɔ be edo go nɔnɔme sesẽwo hã? Eyae nye lɔlɔ̃ si nɔ esi na amewo. Yeremiya nyae be alẽkplɔla alakpatɔwo gbɔe kuxi gbogbo siwo nɔ dukɔa dzi la ƒe akpa gãtɔ tso. (Yer. 23:1, 2) Esia nyanya kpe ɖe eŋu wòwɔ eƒe dɔa le lɔlɔ̃ kple veveseɖeamenu me. Edi be yede tɔwo nase Mawu ƒe nyawo eye woanɔ agbe. Ese veve ɖe wo nu ale gbegbe be wòfa avi ɖe vɔ̃ si le wo dzi va ge la ta. (Mixlẽ Yeremiya 8:21; 9:1.) Konyifahawo ƒe agbalẽa ɖe Yeremiya ƒe ɖetsɔleme kple lɔlɔ̃ gã si gbegbe nɔ si na Yehowa ƒe amewo kple Yehowa ƒe ŋkɔa la fia. (Kony. 4:6, 9) Ne èkpɔe be “wowɔ fu [amewo], eye woka hlẽ abe alẽ siwo nu kplɔla aɖeke mele o la ene” egbea la, ɖe mèdina vevie be yeatsɔ Mawu Fiaɖuƒea ŋuti nya nyui si faa akɔ na ame la ayi na wo oa?—Mat. 9:36.
8. Nu kae ɖee fia be esi dukɔa wɔ fu Yeremiya la, medo dziku ɖe wo ŋu o?
8 Ame siwo ŋu Yeremiya di be yeakpe ɖo la ŋutɔ kee wɔ fui, ke hã, mewɔ wɔɖenui alo do dziku ɖe wo ŋu o. Egbɔ dzi blewu eye wònyo dɔme na wo, ewɔ nu alea ɖe Fia Zedekiya vɔ̃ɖi la kura gɔ̃ hã ŋu. Esi Zedekiya tsɔe de asi be woawu megbe gɔ̃ hã la, Yeremiya gayi edzi ƒo koko nɛ be wòaɖo to Yehowa ƒe gbe. (Yer. 38:4, 5, 19, 20) Ðe míelɔ̃a amewo vevie abe Yeremiya enea?
Dzideƒo Si Tso Mawu Gbɔ
9. Aleke míewɔ nya be Mawu gbɔe dzideƒo si nɔ Yeremiya si la tso?
9 Esi Yehowa de dɔ asi na Yeremiya gbã la, edze agbagba be yeaɖe ta le ete. Esia na míekpɔe dze sii be dzideƒo kple tenɔnɔ sesĩe si wòɖe fia la menɔ esi le dzɔdzɔme nu o. Ɛ̃, le nyeteƒe me la, Mawu gbɔe ŋusẽ wɔnuku si Yeremiya ɖe fia le eƒe nyagbɔgblɔɖidɔa me la tso, le esi wòɖo ŋu ɖe eŋu bliboe ta. Vavãe, Yehowa nɔ anyi kple nyagblɔɖila la abe “kalẽtɔ sesẽ” ene le mɔ sia nu be, ekpe ɖe Yeremiya ŋu eye wòdo ŋusẽe wòte ŋu wɔ eƒe dɔdeasia. (Yer. 20:11) Dzinɔameƒo kple dzideƒo si Yeremiya ɖe fia la ɖe dzesi ale gbegbe be, esi Yesu va nɔ eƒe subɔsubɔdɔa wɔm le anyigba dzi la, ame aɖewo susui be Yeremiya ye gbɔ agbe.—Mat. 16:13, 14.
10. Nu ka tae míate ŋu agblɔ be woɖo amesiamina susɔeawo “dukɔwo kple fiaɖuƒewo nu”?
10 Esi Yehowa nye ‘dukɔwo ƒe Fia’ ta la, ede dɔ asi na Yeremiya be wòaɖe gbeƒã ʋɔnudrɔ̃gbedasi aɖe na dukɔwo kple fiaɖuƒewo. (Yer. 10:6, 7) Gake gɔmesese ka nue woɖo amesiamina susɔeawo “dukɔwo kple fiaɖuƒewo nu” le? (Yer. 1:10) Abe nyagblɔɖila si nɔ anyi le blema ene la, xexea me katã ƒe Dziɖulagã la de dɔ aɖe asi na Yeremiya habɔbɔa. Eya ta Mawu na ŋusẽ eƒe subɔla amesiaminawo be woagblɔ yeƒe ʋɔnudrɔ̃gbedeasi na dukɔwo kple fiaɖuƒewo. Esi Mawu Dziƒoʋĩtɔ la na ŋusẽ Yeremiya habɔbɔa ta la, ele Mawu ƒe Nya si me kɔ, si tso gbɔgbɔ me, la ŋu dɔ wɔm hele gbɔgblɔm na dukɔwo kple fiaɖuƒe siwo li egbea la be Mawu le wo ho ge ɖa eye atsrɔ̃ wo le eƒe ɣeyiɣi ɖoɖi dzi, to ame si wòtia dzi. (Yer. 18:7-10; Nyaɖ. 11:18) Yeremiya habɔbɔa ɖoe kplikpaa be yemawɔ alɔgblɔdɔ le dɔ si Yehowa Mawu de asi nɛ be wòaɖe gbeƒã yeƒe ʋɔnudrɔ̃gbedeasi le anyigba dzi godoo la ŋu o.
11. Nu kae akpe ɖe mía ŋu míayi gbeƒãɖeɖedɔa dzi madzudzɔmadzudzɔe le nɔnɔme sesẽwo gɔ̃ hã me?
11 Edzɔna zi geɖe be dzi ɖena le mía ƒo ne míedo go tsitretsiɖeŋu, amewo ƒe ɖekematsɔleme, alo nɔnɔme sesẽwo. (2 Kor. 1:8) Gake abe Yeremiya ene la, mina míanɔ dɔ dzi. Dzi megaɖe le mia ƒo o. Mina mía dometɔ ɖe sia ɖe nayi edzi anɔ koko ƒom na Mawu, ahaɖo ŋu ɖe eŋu; eye ‘míalé dzi ɖe ƒo’ esi míele mɔ kpɔm na eƒe kpekpeɖeŋu. (1 Tes. 2:2) Esi míenye tadeagula vavãwo ta la, ele be míayi edzi anɔ ŋudzɔ ɖe dɔ siwo Mawu de asi na mí la ŋu. Ehiã be míaɖoe kplikpaa be míayi edzi anɔ gbeƒã ɖem madzudzɔmadzudzɔe tso Kristodukɔa, si Yerusalem mawɔnuteƒea nye kpɔɖeŋu na, la ƒe tsɔtsrɔ̃ ŋu. Menye “Yehowa ƒe amenuveƒe” la koe Yeremiya habɔbɔa aɖe gbeƒãe o, ke aɖe gbeƒã “mía Mawu ƒe hlɔ̃biaŋkeke la” hã.—Yes. 61:1, 2; 2 Kor. 6:2.
Dzidzɔ Tso Dzi Me
12. Nu ka tae míate ŋu aƒo nya ta be Yeremiya yi edzi kpɔ dzidzɔ, eye nu vevi kae kpe ɖe eŋu?
12 Yeremiya kpɔ dzidzɔ le eƒe dɔa me. Egblɔ na Yehowa be: ‘Esi wò nyawo ɖo gbɔnye la, memi wo, eye wò nyawo nye vivisese kple dzidzɔ na nye dzi, elabena wò ŋkɔe woyɔ ɖe ŋunye, Yehowa.’ (Yer. 15:16) Mɔnukpɔkpɔe wònye na Yeremiya be wòanɔ Mawu vavã la teƒe ahaɖe gbeƒã eƒe nya. Enyo be míade dzesii be, esime Yeremiya tsɔ eƒe susu ɖo dukɔa ƒe fewuɖuɖu ŋu la, meganɔ dzidzɔ kpɔm o. Gake esi wòtrɔ susu ɖe eƒe gbedeasia ƒe nyonyome kple eƒe vevienyenye ŋu la, egate dzidzɔkpɔkpɔ ake.—Yer. 20:8, 9.
13. Nu ka tae gbɔgbɔ me nyateƒe gogloawo tsɔtsɔ nyi mía ɖokuiwo le vevie hafi míayi edzi anɔ dzidzɔ kpɔm?
13 Hafi míate ŋu ayi edzi anɔ dzidzɔ kpɔm le gbeƒãɖeɖedɔa me le míaƒe ŋkekea me la, ehiã be míatsɔ “nuɖuɖu sesẽ,” si nye Mawu ƒe Nya la me nyateƒenya gogloawo, anɔ mía ɖokuiwo nyim. (Heb. 5:14) Nusɔsrɔ̃ deto wɔwɔ tua xɔse ɖo. (Kol. 2:6, 7) Enaa míekpɔa ale si gbegbe míaƒe nuwɔnawo wɔa dɔ ɖe Yehowa ƒe dzi dzii la dzea sii. Ne ele sesẽm na mí be míakpɔ ɣeyiɣi na Biblia xexlẽ kple esɔsrɔ̃ la, ele be míagbugbɔ alé ŋku ɖe míaƒe ɖoɖowɔɖiwo ŋu. Nusɔsrɔ̃ miniti ʋɛ aɖewo kple ŋugbledede ɣeyiɣi kpuie aɖe gbe sia gbe gɔ̃ hã akpe ɖe mía ŋu míayi edzi anɔ tetem ɖe Yehowa ŋu eye wòazu ‘vivisese kple dzidzɔ na míaƒe dzi,’ abe ale si wònɔ le Yeremiya gome ene.
14, 15. (a) Esi Yeremiya lé dɔ si wode asi nɛ la me ɖe asi nuteƒewɔwɔtɔe la, nu kae do tso eme? (b) Nu kae le nyanya na Mawu ƒe amewo ku ɖe gbeƒãɖeɖedɔa ŋu?
14 Yeremiya yi edzi gblɔ Yehowa ƒe nuxlɔ̃ame kple ʋɔnudrɔ̃gbedeasia madzudzɔmadzudzɔe, ke hã, eƒe dzi nɔ dɔ si wode asi nɛ be ‘wòatso aƒe eye wòaƒã nu’ la ŋu. (Yer. 1:10) Nu nyuiwo do tso eƒe agbagbadzedzeawo me. Yudatɔ aɖewo kple ame aɖewo siwo menye Israel viwo o la siaa tsi agbe esime wotsrɔ̃ Yerusalem le ƒe 607 D.M.Ŋ. me. Wo dometɔ aɖewoe nye Ebed-Melex, Rexab viwo, kple Barux. (Yer. 35:19; 39:15-18; 43:5-7) Nuteƒewɔla kple Mawu vɔ̃la siawo, siwo nye Yeremiya xɔlɔ̃wo la, nye kpɔɖeŋu na ame siwo si anyigba dzi nɔnɔ ƒe mɔkpɔkpɔ le egbea, siwo dze xɔlɔ̃ Yeremiya habɔbɔa me tɔwo la wòsɔ nyuie ŋutɔ. Dzidzɔ gã aɖee wònyena na Yeremiya habɔbɔa me tɔwo be yewoatu “ameha gã” la ɖo le gbɔgbɔ me. (Nyaɖ. 7:9) Nenema kee amesiaminawo ƒe zɔhɛ wɔnuteƒe siawo hã kpɔa dzidzɔ geɖe le kpekpeɖeŋunana dzianukwaretɔwo me be woava nya nyateƒea.
15 Mawu ƒe amewo nyae be menye dutoƒosubɔsubɔdɔwɔwɔ na ame siwo ɖoa to gbedeasia koe gbeƒãɖeɖe nya nyuia nye o, ke enye míaƒe tadedeagu na mía Mawu la ƒe akpa aɖe hã. Amewo ɖaɖo to mí alo womeɖaɖo to mí o, subɔsubɔdɔ kɔkɔe wɔwɔ na Yehowa to míaƒe gbeƒãɖeɖedɔa dzi nana míekpɔ dzidzɔ geɖe.—Ps. 71:23; mixlẽ Romatɔwo 1:9.
‘Nɔ Ŋudzɔ’ Ðe Dɔ Si Wode Asi Na Wò La Ŋu!
16, 17. Alekee Nyaɖeɖefia 17:10 kple Xabakuk 2:3 ɖe ale si gbegbe nuwɔwɔ kpata hiã le míaƒe ɣeyiɣia me la fiae?
16 Ne míexlẽ nyagblɔɖinya si tso gbɔgbɔ me, si le Nyaɖeɖefia 17:10 la, míekpɔa ale si gbegbe nuwɔwɔ kpata hiã le míaƒe ɣeyiɣia me la dzea sii. Fia adrelia, si nye Anglo-Amerika Xexemeŋusẽa, la va do. Míexlẽ tso eŋu be: “Ne [xexemeŋusẽ adrelia va] ɖo la, ele be wòanɔ anyi ɣeyiɣi vi aɖe.” Va se ɖe fifia la, ɖikeke mele eme o be, “ɣeyiɣi vi” ma le eƒe nuwuwu gogom. Nyagblɔɖila Xabakuk na kakaɖedzi mí ku ɖe nuɖoanyi sia ƒe nuwuwu ŋu be: “Azãgbe li na ŋutega la . . . Kpɔ esinu; elabena ele vava ge kokoko, eye mahe ɖe megbe o.”—Xab. 2:3.
17 Bia ɖokuiwò be: ‘Ðe ale si menɔa agbee la ɖenɛ fiana vavã be menya be nuwɔwɔ kpata hiã le míaƒe ɣeyiɣia mea? Ðe nye agbenɔnɔ ɖenɛ fiana be mele mɔ kpɔm be nuwuwua le vava ge kpuiea? Alo ɖe nye nyametsotsowo kple nu siwo metsɔ ɖoa nɔƒe gbãtɔ la ɖenɛ fiana be nyemele mɔ kpɔm be nuwuwua ava kpuie o, alo kura gɔ̃ hã be, nyemeka ɖe edzi be ava va gbe ɖeka oa?’
18, 19. Nu ka tae menye fifiae nye ɣeyiɣi si wòle be míana míaƒe alɔ nado agblɔ o?
18 Dzɔla ƒe ha la ƒe dɔa mewu enu haɖe o. (Mixlẽ Yeremiya 1:17-19.) Dzidzɔ ka gbegbee nye esi wònye na mí be amesiamina susɔeawo le tsitre sesĩe maʋamaʋã abe “gasɔti” kple “du sesẽ” ene! Wotsɔ ‘nyateƒe la bla ali dzi’ le gɔmesesea nu be, woɖe mɔ be Mawu ƒe Nya la nado ŋusẽ yewo va se ɖe esime yewoawɔ dɔ si wode yewo si la ade goe. (Ef. 6:14) Ameha gã la me tɔwo tsɔ tameɖoɖo kplikpaa ma ke le asi kpem ɖe Yeremiya habɔbɔa ŋu le dɔ si Mawu de asi na wo la wɔwɔ me dzonɔamemetɔe.
19 Menye fifiae nye ɣeyiɣi si wòle be míaƒe alɔ nado agblɔ le Fiaɖuƒedɔa wɔwɔ me o, ke boŋ fifiae wòle be míakpɔ vevienyenye si le nya si dze le Yeremiya 12:5 ŋu la adze sii. (Mixlẽe.) Mí katã míetoa dodokpɔ siwo me wòhiãna be míado dzi le la me. Míate ŋu atsɔ xɔse ƒe dodokpɔ siawo asɔ kple ‘afɔzɔla’ siwo wòle be mía kpli wo míaƒu du. Ke hã, ne “xaxa gã” la tu aƒe la, míate akpɔ mɔ be nuwo agasesẽ ɖe edzi wu. (Mat. 24:21) Míate ŋu atsɔ akɔkpekpe kple kuxi siwo sesẽ wu, siwo le ŋgɔ gbɔna, la asɔ kple ‘duɖimekeke kple sɔwo.’ Ahiã ŋusẽ kpakple kutrikuku geɖe be ame nake duɖime kple sɔ siwo le du dzi. Eya ta aɖe vi na mí be míado dzi le tetekpɔ siwo me tom míele fifia la me, si adzra mí ɖo be míado dzi le esiwo le ŋgɔ gbɔna me.
20. Nu kae nèɖo kplikpaa be yeawɔ?
20 Mí katã míate ŋu asrɔ̃ Yeremiya ƒe kpɔɖeŋua eye míawɔ gbeƒãɖeɖedɔ si wode mía si la ade goe dzidzedzetɔe! Nɔnɔme nyui siwo nye lɔlɔ̃, dzideƒo, kple dzidzɔ ye ʋã Yeremiya wòte ŋu wɔ eƒe subɔsubɔdɔa nuteƒewɔwɔtɔe ƒe 67 sɔŋ. Aɖatsigoti alo yevuziti ƒose dzeani la ɖoa ŋku edzi na mí be Yehowa ‘anɔ ŋute’ ɖe eƒe nya ŋu, ne wòawɔe ade goe. Eya ta susu nyui aɖe le mía si si tae wòle be míawo hã míawɔe nenema ɖo. Yeremiya yi edzi ‘nɔ ŋudzɔ,’ eya ta míawo hã míate ŋui.
Èɖo Ŋku Wo Dzia?
• Aleke lɔlɔ̃ kpe ɖe Yeremiya ŋu wòyi edzi ‘nɔ ŋudzɔ’ ɖe dɔ si wode asi nɛ la ŋu?
• Nu ka tae míehiã na dzideƒo si tso Mawu gbɔ?
• Nu kae kpe ɖe Yeremiya ŋu wòyi edzi kpɔ dzidzɔ?
• Nu ka tae nèdi be yeayi edzi ‘anɔ ŋudzɔ’?
[Nɔnɔmetata si le axa 31]
Ðe nàyi edzi aɖe gbeƒã le tsitretsiɖeŋu gɔ̃ hã mea?