“Yehowa Wɔ Eƒe Tame, Si Wòɖo La, De Goe”

 1. Esi wotsrɔ̃ Yerusalem vɔ la, nya kae Yeremiya gblɔ tso Yehowa ƒe nyagblɔɖiwo ŋu?

YERUSALEM zu anyiglãgo. Dzo si Babilontɔwo tɔ dua ƒe dzudzɔ gale dzi dem. Yeremiya anya ɖo ŋku ale si ame siwo wonɔ wuwum la nɔ ɣli dom henɔ ŋeŋem la dzi. Mawu gblɔ nɛ do ŋgɔ be nu siawo adzɔ, eye wova eme pɛpɛpɛ. Nyagblɔɖila la fa konyi hegblɔ be: “Yehowa wɔ eƒe tame, si wòɖo la, de goe.” Nublanuinya kae nye esi Yerusalem ƒe tsɔtsrɔ̃ nye!—Xlẽ Konyifahawo 2:17.

 2. Nya kae wogblɔ ɖi ƒe alafawo, si me vava teƒe Yeremiya kpɔ?

² Nyateƒee, Yeremiya kpɔ nyagblɔɖi geɖe siwo ku ɖe Mawu ƒe dukɔa ŋu la me vava teƒe. Nya siawo dometɔ aɖewo nye esiwo wogblɔ ɖi tso gbe aɖe gbe ʋĩi ke. Ƒe alafawo do ŋgɔ la, Mose gblɔ na Israel viwo be ne woɖo to Mawu la, woakpɔ “yayra,” gake ne womeɖo toe o la, “fiƒode” ava wo dzi. Yehowa di be yeƒe dukɔa naɖo to ye ne yeayra wo. Gake ne wogbe toɖoɖo la, fiƒode si ava wo dzi adzi ŋɔ ŋutɔ. Mose xlɔ̃ nu wo—eye emegbe Yeremiya hã te gbe ɖe edzi—be, ame siwo atrɔ megbe de Yehowa ahatsi tsitre ɖe eŋu la “[aɖu] woƒe ŋutsuviwo kple woƒe nyɔnuviwo ƒe lã.” (5 Mose 30:19, 20; Yer. 19:9; 3 Mose 26:29) Ðewohĩ ame aɖewo bia wo ɖokui ɣemaɣi be, ‘Ðe nu dziŋɔ sia ate ŋu adzɔ nyateƒea?’ Ɛ̃, nu dziŋɔ sia tututue dzɔ esime Babilontɔwo va ɖe to ɖe Yerusalem eye nuɖuɖu vɔ le dua me. Yeremiya ka nya ta be: “Nyɔnu, siwo ame ƒe nu wɔa nublanui na la ƒe asi ɖa woawo ŋutɔwo ƒe viwo, eye wonye nuɖuɖu na wo le nye dukɔ ƒe nyɔnuvi la gblẽɣi.” (Kony. 4:10) Ewɔ nublanui loo!

 3. Susu ka tae Mawu dɔa nyagblɔɖilawo ɖe eƒe dukɔa?

³ Gake menye tsɔtsrɔ̃ ŋu nyawo gbɔgblɔ na amewo ta koe Yehowa ɖo nyagblɔɖilawo abe Yeremiya ene o. Mawu di be yeƒe dukɔa natrɔ ɖe nuteƒewɔwɔ ŋu. Edi be nu vɔ̃ wɔlawo natrɔ dzi me. Nya sia dzie Ezra he susu yi esi wògblɔ be: “Yehowa, wo fofowo ƒe Mawu la, ɖo eƒe dɔlawo ɖe wo enuenu, elabena Yehowa [se veve ɖe] eƒe dukɔ kple eƒe nɔƒe la ta.”—2 Kron. 36:15; xlẽ Yeremiya 26:3, 12, 13.

 4. Aleke Yeremiya se le eɖokui me tso nya si wòɖe gbeƒãe ŋu?

⁴ Yeremiya hã se veve ɖe dukɔa nu abe ale si Yehowa se veve ɖe wo nui ene. Àte ŋu akpɔ esia le nya si wògblɔ do ŋgɔ na Yerusalem ƒe tsɔtsrɔ̃ me. Tsɔtsrɔ̃ si lili dukɔa ŋu nya te ɖe edzi vevie. Ne ɖe dukɔa ɖo to Yeremiya ƒe nyawo hewɔ wo dzi la, anye ne woaƒo asa na afɔku sia hafi! Wò ya bu ale si Yeremiya se le eɖokui me esime wònɔ Mawu ƒe gbedeasia gblɔm ŋu kpɔ. Edo ɣli be: “Nye dɔkaviwo, nye dɔkaviwo! Mele togotogoe ƒom le vevesese ta, nye dzixɔ, nye dzi dze agbo le menye, nyemate ŋu azi ɖoɖoe o, elabena nye luʋɔ le kpẽwo ƒe ɖiɖi kple aʋaɣli sem!” (Yer. 4:19) Yeremiya mate ŋu akpɔ afɔku ma gbegbe ko azi ɖoɖoe o.

 5. Nu kae na be Yeremiya ka ɖe nya siwo wòɖe gbeƒãe dzi?

⁵ Nu kae na be Yeremiya ka ɖe edzi bliboe be nya siwo yegblɔ ava eme? (Yer. 1:17; 7:30; 9:22) Enye ŋutsu xɔsetɔ si srɔ̃a Ŋɔŋlɔawo eye wòkpɔe be Yehowa nye Mawu si ƒe nyawo vaa eme godoo. Ŋutinya ɖo kpe edzi be Yehowa te ŋu gblɔa nya siwo dzena na amegbetɔwo abe manya wɔ o ene gɔ̃ hã ɖi eye wovaa eme pɛpɛpɛ. Ðekae nye Israel viwo ɖeɖe tso kluvinyenye me le Egipte. Yeremiya nya Mose Ƒe Agbalẽ Evelia me ŋutinyawo kple nya siwo nudzɔdzɔ mawo teƒekpɔla ɖeka, si nye Yosua, gblɔ la nyuie. Yosua ɖo ŋku edzi na nɔvia Israel viwo kpɔ be: “Mienyae tso dzi blibo kple luʋɔ blibo me bena, nya aɖeke meto le nya nyui, siwo katã Yehowa, mia Mawu la, gblɔ na mi la me o, wo katã va me na mi, eye nya ku ɖeka hɔ̃ hã meto le eme o.”—Yos. 23:14.

6, 7. (a) Nu ka tae wòle be nàtsɔ ɖe le nya siwo Yeremiya gblɔ ɖi me? (b) Nu kae akpe ɖe ŋuwò nàka ɖe gbedeasi si nèɖea gbeƒãe dzi?

⁶ Nu ka tae wònyo be nàtsɔ ɖe le nya siwo Yeremiya gblɔ ɖi me? Gbã la, Yeremiya ŋutɔ ka ɖe edzi be Yehowa ƒe nyawo ava eme godoo. Evelia, nya siwo Mawu to Yeremiya dzi gblɔ ɖi dometɔ aɖewo le eme vam fifia eye bubuwo hã ava eme emegbe. Etɔ̃lia, nya gbogbo siwo Yeremiya gblɔ ɖi le Mawu ƒe ŋkɔ me, kple dzonɔameme si wòtsɔ gblɔ woe na wòɖe dzesi le mawusubɔlawo dome. Agbalẽnyala aɖe gblɔ be: “Ne míetsɔ Yeremiya sɔ kple etɔ nyagblɔɖila bubuwo ɖeɖe dzaa hã la, eɖe dzesi le wo dome.” Esi Yeremiya nye ame vevi aɖe si Mawu zã le nuwɔwɔ kple eƒe dukɔa me ta la, esime Yesu va anyigba dzi la, ame siwo se eƒe nyawo dometɔ aɖewo susu be Yeremiya ye.—Mat. 16:13, 14.

⁷ Abe ale si wònɔ le Yeremiya ŋɔli ene la, wò hã èle ɣeyiɣi si me Biblia me nyagblɔɖi vevi aɖewo le eme vam la me. Eye abe Yeremiya ene la, ele vevie be nàka ɖe Mawu ƒe ŋugbedodowo dzi. (2 Pet. 3:9-14) Aleke nèle ewɔ gee? Ele be nàyi edzi atu wò xɔse ɖo ahaɖo ŋu ɖe Mawu ŋu be eƒe nyagblɔɖiwo katã ava eme. Eya ta míadzro nya siwo Yeremiya gblɔ ɖi eye wòkpɔ wo me vava teƒe la me le ta sia me. Míadzro wo dometɔ aɖewo siwo va eme le Yeremiya ƒe ku megbe hã me. Eƒe nyagblɔɖi aɖewo hã le eme vam fifia, siwo ka wò tẽe, eye bubuwo hã ku ɖe wò etsɔme ŋu. Na nyagblɔɖi siawo me dzodzro nado ŋusẽ wò nàka ɖe Yehowa ƒe nyagblɔɖinyawo dzi wu tsã, eye nàxɔe ase bliboe be Yehowa ‘awɔ eƒe tame si wòɖo la ade goe.’—Kony. 2:17.

8, 9. Nu siwo na Biblia nye agbalẽ tɔxɛ dometɔ ɖeka ɖe?

⁸ Ame geɖewo dzea agbagba be yewoagblɔ nu si ava dzɔ le etsɔme ɖi. Wò ya de ŋugble le gaŋutiɖoɖowɔlawo, dunyahelawo, afakalawo, kple yame ƒe nɔnɔme ŋuti nunyalawo ŋu kpɔ. Ðewohĩ ànya de dzesii be esesẽna na wo be woagblɔ nu suetɔ kekeake si adzɔ etsɔ, nyitsɔ, alo kwasiɖa si gbɔna me kura gɔ̃ hã ɖi wòava eme pɛpɛpɛ. Ke Biblia ya ɖe? Nu siwo na wònye agbalẽ tɔxɛ dometɔ ɖekae nye be eme nyagblɔɖiwo vaa eme pɛpɛpɛ. (Yes. 41:26; 42:9) Nya siwo katã Yeremiya gblɔ ɖi ava eme. Eɖanye ɣeyiɣi kpui aɖe megbee woava eme loo alo ɣeyiɣi didi aɖe megbee o, ɖeke mada ƒu o. Wo dometɔ geɖe ku ɖe ame ɖekaɖekawo kple dukɔwo ŋu. Gbã la, na míadzro wo dometɔ ʋɛ siwo va eme le Yeremiya ƒe agbenɔɣi me.

⁹ Ame kae li egbea si ate ŋu agblɔ ale si xexea me anɔ le ƒe ɖeka alo eve siwo gbɔna me? Le kpɔɖeŋu me, dukɔwo dome ŋuti numekula kae ate ŋu agblɔe be dziɖuɖu aɖe amu eye bubu axɔ ɖe eteƒe le ɣeyiɣi aɖe dzi ko wòava eme pɛpɛpɛ? Yehowa ƒe gbɔgbɔ ʋã Yeremiya ya wògblɔe ɖi be Babilon ƒe dziɖuɖu akeke ta. Egblɔ be Babilon nye “sikakplu” si Yehowa azã atsɔ atrɔ eƒe dziku akɔ ɖe Yuda kple du geɖe siwo te ɖe eŋu la dzi, eye Babilon akpɔ ŋusẽ ɖe wo dzi. (Yer. 51:7) Nu sia tututue dzɔ Yeremiya kple eŋɔlimetɔwo kpɔ.—Tsɔe sɔ kple Yeremiya 25:15-29; 27:3-6; 46:13.

10. Nya kawoe Yehowa gblɔ ɖi tso Yuda fia ene aɖewo ŋu?

¹⁰ Yehowa to Yeremiya dzi gblɔ nu si adzɔ ɖe Yuda fia ene aɖewo dzi hã ɖi. Mawu gblɔ ɖe Fia Yoaxaz, Yosiya vi, si wogayɔna be Salum, ŋu be woaɖe aboyoe eye magatrɔ agbɔ va Yuda-nyigba dzi gbeɖe o. (Yer. 22:11, 12) Nya sia va eme. (2 Fia. 23:31-34) Mawu gblɔ tso Yoyakim, ame si va xɔ ɖe Yoaxaz teƒe, hã ŋu be woaɖii “abe tedzi ene.” (Yer. 22:18, 19; 36:30) Biblia megblɔ ale si tututu Yoyakim kui alo ale si wowɔ eƒe kukuae ŋu nya ya o. Gake egblɔ be via Yoyaxin ye xɔ zia le ɣeyiɣi si me woɖe to ɖe Yerusalem. Yeremiya gblɔe ɖi be woaɖe aboyo Yoyaxin (si wogayɔna be Xonya alo Yexonya) ayi Babilon eye wòaku ɖe afi ma. (Yer. 22:24-27; 24:1) Nya sia hã va eme. Ke nu kae dzɔ ɖe fia mamlɛtɔ, Zedekiya, ya dzi? Yeremiya gblɔe ɖi be woatsɔ Zedekiya ade eƒe futɔwo si me, eye womakpɔ nublanui nɛ o. (Yer. 21:1-10) Nu kae va dzɔ? Futɔ mawo ƒe asi tui nyateƒe. Wowu viawo le eya ŋutɔ ŋkume, emegbe wogbã ŋku nɛ, eye wòkplɔe yi Babilon wòtsi afi ma ku. (Yer. 52:8-11) Ɛ̃, nyagblɔɖi siawo katã va eme.

11. Ame kae nye Xananya, eye nya kae Yehowa gblɔ ɖi tso eŋu?

¹¹ Míexlẽ le Yeremiya ta 28 be le Zedekiya ƒe dziɖuɣi la, aʋatsonyagblɔɖila Xananya gblɔ nya si tsi tsitre ɖe esi Yehowa gblɔ to Yeremiya dzi la ŋu, be Babilontɔwo maɖu Yerusalem dzi o. Xananya ka aʋatso le Mawu ƒe ŋkɔ me be kluvinyenye ƒe kɔkuti si Nebukadnezar ɖo kɔ na Yuda kple dukɔ bubuwo katã la aŋe. Yehowa to Yeremiya dzi klo nu le Xananya ƒe alakpanyaa dzi hete gbe ɖe edzi be dukɔ geɖewo asubɔ Babilon godoo, eye wògblɔ na aʋatsonyagblɔɖila ma be aku le ƒe ma me. Nenema tututu wòva emee.—Xlẽ Yeremiya 28:10-17.

12. Aleke Yeremiya ŋɔlimetɔ akpa gãtɔ wɔ nu ɖe eƒe nyagblɔɖinyawo ŋui?

¹² Gake Yerusalem ƒe tsɔtsrɔ̃ koŋ ŋue nya siwo Mawu to Yeremiya dzi gblɔ ɖi la ku ɖo. Yeremiya xlɔ̃ nu wo atraɖii be wole dua tsrɔ̃ ge, negbe ɖe Yudatɔwo ɖe asi le trɔ̃subɔsubɔ, nu madzɔmadzɔ wɔwɔ, kple ŋutasesẽ ŋu ko hafi. (Yer. 4:1; 16:18; 19:3-5, 15) Yeremiya ŋɔlimetɔ geɖe susu be Yehowa matsrɔ̃ dua gbeɖe o. Mawu ƒe gbedoxɔa le Yerusalem. Aleke wɔ wòaɖe mɔ woagbã teƒe kɔkɔe la? Woƒe susue nye be nu ma madzɔ kpɔ gbeɖe o. Gake wokui wòɖuɖu, elabena Mawu mekaa aʋatso o. Ewɔ eƒe tame si wòɖo la de goe.—Yer. 52:12-14.

13. (a) Aleke míaƒe ɣeyiɣia sɔ kple Yeremiya tɔe? (b) Nu ka tae wòle be nàtsɔ ɖe le ŋugbe siwo Mawu do na ame ɖekaɖeka aɖewo le Yeremiya ŋɔli me?

¹³ Nɔnɔme siwo me tom Mawu ƒe amewo le egbea la sɔ kple ame siwo wɔ nuteƒe na Yehowa le Yeremiya ŋɔli la tɔ. Míenya be eteƒe madidi o, Yehowa atsrɔ̃ ame siwo katã gbe toɖoɖo eƒe nuxlɔ̃amenyawo. Gake eƒe ŋugbedodowo ate ŋu ana dzi naɖo mía ƒo abe ale si wona dzi ɖo Yudatɔ siwo lé subɔsubɔ dzadzɛa me ɖe asi le Yeremiya ŋɔli ƒoe ene. Esi Rexab viwo wɔ nuteƒe na Yehowa eye woɖo to wo tɔgbui ta la, Mawu gblɔ be woatsi agbe le Yerusalem tsrɔ̃ɣi. Wotsi agbe nyateƒe. Esia ƒe kpeɖodzi ɖekae nye be wova ƒo nu tso “Malkiya, Rexab vi,” ŋu emegbe be ekpɔ gome le Yerusalem dua ɖɔɖɔɖodɔwo me le anyigbadzikpɔla Nexemya ƒe ɣeyiɣia me. (Nex. 3:14; Yer. 35:18, 19) Yehowa na kakaɖedzi Ebed-Melex hã be atsi agbe, elabena eɖo ŋu ɖe Mawu ŋu eye wòna kpekpeɖeŋu Yeremiya. (Yer. 38:11-13; 39:15-18) Nenema kee Mawu do ŋugbe na Yeremiya xɔlɔ̃ Barux be eƒe ‘agbe azu aboyonu’ nɛ. (Yer. 45:1, 5) Dɔ kae nyagblɔɖi siawo me vava wɔ ɖe dziwò? Nu kae nèsusu be Yehowa awɔ na wò ne èyi edzi wɔ nuteƒe nɛ?—Xlẽ 2 Petro 2:9.

14. Nu ka tae nya si Mawu gblɔ ɖi tso Babilon ŋu me vava wɔ nuku ŋutɔ?

¹⁴ Mawu gblɔe ɖi be menye Yuda ɖeɖe dzi koe Nebukadnezar aɖu o, ke boŋ aɖu Egipte hã dzi. (Yer. 25:17-19) Adze abe nu ma manya wɔ o ene, elabena ŋusẽ nɔ Egipte ŋu ale gbegbe, eye eyae nɔ Yuda kura gɔ̃ hã dzi ɖum ɣemaɣi. (2 Fia. 23:29-35) Esi wotsrɔ̃ Yerusalem vɔ la, Yudatɔ siwo tsi agbe dometɔ aɖewo ɖoe be yewoasi ayi Egipte ne yewoanɔ dedie le afi ma, evɔ Yehowa xlɔ̃ nu wo be woagayi o, eye be yeayra wo ne wotsi Yuda-nyigbaa dzi hafi. Ena wonya hã be ne wotri to hesi yi Egipte la, yi si vɔ̃m wole la atu wo le afi ma. (Yer. 42:10-16; 44:30) Naneke mele Yeremiya ƒe nuŋlɔɖiwo me si fia be ekpɔ eteƒe esime Babilontɔwo yi ɖadze Egipte dzi o. Gake Yehowa ƒe nyagblɔɖia va eme ɖe Israel vi sitsoƒedila mawo dzi esime Babilontɔwo yi ɖaxɔ Egipte le ƒe alafa adelia D.M.Ŋ. ƒe gɔmedzedze lɔƒo.—Yer. 43:8-13.

15, 16. Aleke nya siwo Mawu gblɔ tso ablɔɖenana eƒe amewo ŋu la va emee?

¹⁵ Yeremiya gblɔ nya ɖi ɖe Babilon, si ɖu Egipte dzi, hã ƒe anyidzedze ŋu. Yeremiya gblɔe ɖi abe ƒe alafa ɖeka ene do ŋgɔ be Babilon adze anyi le vo me. Aleke wòadzɔe? Mawu ƒe nyagblɔɖila la gblɔe ɖi be Babilon ƒe tsi siwo ŋu wòɖoa ŋu ɖo la ‘amie,’ eye eƒe kalẽtɔwo mawɔ aʋa o. (Yer. 50:38; 51:30) Nyagblɔɖi siawo va eme pɛpɛpɛ esime Mediatɔwo kple Persiatɔwo va trɔ mɔ na Frat Tɔsisia wòsi to teƒe bubu, eye woto tɔʋua me ge ɖe dua me hedze Babilontɔwo dzi le vo me. Nyagblɔɖia ƒe akpa bubu si hã awɔ dɔ ɖe dziwò vevie ye nye be, wogblɔ be dua azu gbegbe eye ame aɖeke magatso aƒe ɖe afi ma o. (Yer. 50:39; 51:26) Ɛ̃, Babilon si kpɔ ŋusẽ kpɔ la zu aƒedo va se ɖe egbe, eye esia ɖo kpe edzi be Mawu ƒe nyagblɔɖiwo vaa eme pɛpɛpɛ ɣesiaɣi.

¹⁶ Yehowa gblɔ to Yeremiya dzi be Yudatɔwo asubɔ Babilontɔwo ƒe 70, eye le ema megbe la, yeagakplɔ wo ava wo denyigba dzi. (Xlẽ Yeremiya 25:8-11; 29:10.) Daniel xɔ nyagblɔɖi sia dzi se bliboe, eye wònɔ te ɖe edzi bu akɔnta henya ɣeyiɣi si ‘Yerusalem ƒe aƒedozuzu’ awu enu. (Dan. 9:2) Ezra gblɔ be: “[Be] Yehowa ƒe nya, si wògblɔ to Yeremya nu la, nava me [la]—Yehowa nyɔ Persia-fia Kores,” si ɖu Babilon dzi la “ƒe gbɔgbɔ,” wòna ablɔɖe Yudatɔwo wotrɔ yi wo denyigba dzi. (Ezra 1:1-4) Esi wotrɔ yi aƒe la, wonɔ ŋutifafa me eye wogbugbɔ subɔsubɔ vavãtɔ ɖo anyi abe ale si tututu Yeremiya gblɔe ɖi ene.—Yer. 30:8-10; 31:3, 11, 12; 32:37.

17. Nu kae fia be nya si Yeremiya gblɔ ɖi tso ‘avifafa’ le Rama ŋu la anya va eme zi eve?

¹⁷ Yeremiya gblɔ nya siwo ava eme le ɣeyiɣi didi aɖe megbe hã ɖi. Egblɔ be: “Ale Yehowa gblɔ esi: Wose konyifagbe le Rama kple avifafa vevie, Raxel le fafam na viawo, eye wògbe be, womegafa akɔ na ye le ye viwo ŋuti o, le esi womegali o la ta.” (Yer. 31:15) Anɔ eme be esi wotsrɔ̃ Yerusalem le ƒe 607 D.M.Ŋ. me vɔ la, wova ƒo Yudatɔ siwo woɖe aboyoe la nu ƒu ɖe Rama, si le abe kilometa enyi ene tso Yerusalem, le dziehe gome. Woanya wu aboyomeawo dometɔ aɖewo gɔ̃ hã le afi ma. Ðewohĩ emae nye nyagblɔɖi ma me vava zi gbãtɔ, abe ɖe Raxel le fafam le “viawo” ƒe ku ta ene. Gake le ƒe alafa ade kple edzivɔ megbe la, Fia Herodes na wowu ɖeviwo le Betlexem dua me. Nya Nyui ŋlɔla Mateo ɖe eme be veve heliheli si wose le ɖevi mawo wuwu ta la nye nya si Yeremiya gblɔ ɖi la me vava.—Mat. 2:16-18.

18. Aleke nya si Mawu gblɔ ɖi tso Edom ŋu va emee?

¹⁸ Nyagblɔɖi bubu hã va eme le ƒe alafa gbãtɔ M.Ŋ. me. Mawu gblɔe ɖi to Yeremiya dzi be Edom hã le dukɔ siwo dzi Babilon adze la dome. (Yer. 25:15-17, 21; 27:1-7) Gake mese ɖe afi ma o. Egblɔ kpee be Edom azu abe Sodom kple Gomora ene. Nu si wòfiae nye be dua agbã, enu ayi tegbee. (Yer. 49:7-10, 17, 18) Nenema tututu wòva dzɔe nye ema. Afi kae nèsusu be míate ŋu akpɔ Edom alo Edomtɔwo ƒe ŋkɔ le egbea? Egbegbe anyigbatatawo dzi yea? Ao. Blema anyigbatatawo alo agbalẽ siwo ƒo nu tso blematɔwo kple Biblia me nudzɔdzɔwo ŋu me koe nàte ŋu akpɔ wo le. Ŋutinyaŋlɔla Flavius Josephus gblɔ be le ƒe alafa evelia  D.M.Ŋ. me la, wozi Edomtɔwo dzi woxɔ Yudasubɔsubɔ de eme. Emegbe esi wotsrɔ̃ Yerusalem le ƒe 70 M.Ŋ. me la, Edomtɔwo megale afi aɖeke abe dukɔ ɖeka ene o.

19. Nu kae Yeremiya ƒe agbalẽa na míede dzesii tso Mawu ƒe nyagblɔɖiwo me vava ŋu?

¹⁹ Abe ale si nàde dzesii ene la, nyagblɔɖi siwo ku ɖe ame ɖekaɖekawo alo dukɔwo ŋu la le Yeremiya ƒe agbalẽa ƒe ta ɖe sia ɖe kloe me. Nyagblɔɖi siawo dometɔ akpa gãtɔ va eme xoxo. Ele be nyateƒenya sia ɖeɖe dzaa naʋã wò nàtsɔ ɖe le Biblia-gbalẽ sia me nyawo me ahasrɔ̃ wo vevie, elabena enye agbalẽ si ɖo kpe nu vevi aɖe dzi na wò ku ɖe wò Mawu gã la ŋu. Yehowa wɔ tame si wòɖo la dzi, eye ayi edzi awɔe nenema. (Xlẽ Yesaya 46:9-11.) Esia ate ŋu ado ŋusẽ wò nàka ɖe Biblia me nyagblɔɖiwo dzi wu tsã. Azɔ hã, Yeremiya ƒe agbalẽa me nyagblɔɖi aɖewo me vava ka wò egbea kple etsɔ si gbɔna. Na míadzro wo dometɔ aɖewo me le ta sia dzi yiyi me.

20-22. Nu ka tae míate ŋu agblɔ be Yeremiya ƒe nyagblɔɖi aɖewo, kple nyagblɔɖi bubu siwo le Biblia me, te ŋu vaa eme wòwua zi ɖeka? Gblɔ eƒe kpɔɖeŋu.

²⁰ Biblia me nyagblɔɖi aɖewo ate ŋu ava eme wòawu zi ɖeka. Esia ƒe kpɔɖeŋu ɖekae nye nya si Yesu gblɔ esi eƒe nusrɔ̃lawo bia nyae tso eƒe “anyinɔnɔ kple nuɖoanyi sia ƒe nuwuɣi” ƒe dzesi la ŋu. (Mat. 24:3) Nyagblɔɖi ma va eme le ƒe 66 va se ɖe 70 M.Ŋ. me. Gake edze ƒãa be agava eme le “xaxa gã” si gbɔna nuɖoanyi vɔ̃ɖi sia katã dzi la me. Anye xaxa “si tɔgbi meva kpɔ o, ao, meva kpɔ tso xexea ƒe gɔmedzedze va se ɖe fifia o, eye magava ake o.” (Mat. 24:21) Nenemae wòle le Yeremiya ƒe nyagblɔɖi aɖewo hã gome. Wo dometɔ aɖewo va eme zi gbãtɔ le ƒe 607 D.M.Ŋ. me, gake woagava eme zi evelia le ƒe aɖewo megbe, abe ale si míekpɔe le nyagblɔɖi si ku ɖe ‘Raxel ƒe fafa na viawo’ ŋu me ene. (Yer. 31:15) Nya siwo Yeremiya gblɔ ɖi dometɔ aɖewo ku ɖe míaƒe ɣeyiɣia ŋu, eye wo me vava ka wò.

²¹ Àte ŋu akpɔ esia ƒe kpeɖodzi le Nyaɖeɖefia ƒe agbalẽa me. Gbɔgbɔ ʋã apostolo Yohanes wòhe susu yi nya siwo Yeremiya gblɔ ɖi tso ale si wotsrɔ̃ Babilon le ƒe 539 D.M.Ŋ. me ŋu dzi. Nyaɖeɖefia ƒe agbalẽa na míekpɔe be nu siwo dzɔ esime nyagblɔɖi ma va eme zi gbãtɔ la tɔgbi agadzɔ le mɔ si lolo wu nu. Le kpɔɖeŋu me, Yeremiya ƒe nyagblɔɖia va eme le míaƒe ŋkekea me le mɔ si lolo wu nu esi “Babilon Gã la,” si nye alakpasubɔsubɔ ƒe xexemefiaɖuƒea, mu. (Nyaɖ. 14:8; 17:1, 2, 5; Yer. 50:2; 51:8) Ele be Mawu ƒe amewo “[nado] go le eme,” be woagaxɔ eƒe fuwɔameawo ƒe ɖeke o. (Nyaɖ. 18:2, 4; Yer. 51:6) Eƒe tɔsisiwo ‘amie’ le kpɔɖeŋugɔmesesea nu be eƒe hameviwo ƒe xexlẽme dzi aɖe kpɔtɔ.—Yer. 51:36; Nyaɖ. 16:12.

²² Mawu do ŋugbe hã be yeabia hlɔ̃ alakpasubɔsubɔ le ŋuta si wòsẽ le yeƒe amewo ŋu ta, eye nya sia ava eme le etsɔ si gbɔna kpuie me. Yehowa “[aɖo] eƒe nuwɔna teƒe nɛ . . . abe ale si wòwɔ ene.” (Yer. 50:29; 51:9; Nyaɖ. 18:6) Alakpasubɔsubɔ ƒe kpɔɖeŋuduwo azu aƒedo.—Yer. 50:39, 40.

23. Tadedeagu vavãtɔ gbugbɔɖoanyi ŋu nya kae Yeremiya gblɔ ɖi si va eme le ƒe alafa 20 lia me?

²³ Abe ale si nànya de dzesii xoxo ene la, dzidzɔnyawo hã le Yeremiya ƒe nyagblɔɖiawo me. Egblɔe ɖi be woagbugbɔ subɔsubɔ vavãtɔ aɖo anyi le anyigba dzi le míaƒe ŋkekeawo me. Ablɔɖenana Yudatɔ siwo nɔ kluvinyenye me le blema Babilon nye kpɔɖeŋu na ale si wona ablɔɖe Mawu ƒe ame siwo li egbea tso Babilon Gã la me le Fiaɖuƒea ɖoɖo anyi le dziƒo megbe. Le gbɔgbɔmegɔmesese nu la, Yehowa gbugbɔ tadedeagu dzadzɛa ɖo anyi na eƒe amewo, si wɔe be wole dzidzɔ kpɔm hele ekafum. Yehowa le yayram ɖe agbagba si dzem wole be yewoakpe ɖe amewo ŋu woava subɔe ahakpɔ gbɔgbɔmenuɖuɖu nyuiwo aɖu la dzi. (Xlẽ Yeremiya 30:18, 19.) Wò ŋutɔ hã èle ale si Yehowa le wɔwɔm ɖe ŋugbe si wòdo be yeana kplɔla yeƒe amewo dzii la teƒe kpɔm egbea. Ena ŋutsu siwo tsi le gbɔgbɔ me la eƒe alẽha la, be woalé be na wo ahakpɔ wo ta.—Yer. 3:15; 23:3, 4.

24. Yeremiya ƒe nyagblɔɖi sesẽ kae ava eme kpuie?

²⁴ Yeremiya na Mawu ƒe ame siwo nɔ anyi le blema la nya be yayra geɖe asu ame siwo awɔ nuteƒe la si, gake exlɔ̃ nu wo hã be tsɔtsrɔ̃e le ame siwo malé woa kple Yehowa dome ƒomedodo me ɖe asi o la lalam. Nenema koe wòle egbea hã. Míate ŋu axlẽ ŋkubiãnya siwo gbɔna ahado kpo ale si nuwɔwɔ kpata hiã fifiae la kpɔkpɔ adze sii o. Yeremiya gblɔ be: “Yehowa ƒe ame siwo wòwu le ŋkeke ma me la, woanɔ anyi tso anyigba ƒe mlɔenu ɖaseɖe anyigba ƒe mlɔenu; womafa na wo o, womaƒo wo nu ƒu o, eye womaɖi wo o, eye woazu aɖuɖɔ le agble me.”—Yer. 25:33.

25. Dɔ kae wode asi na Mawu ƒe ame siwo li egbea?

²⁵ Nyateƒee, ɣeyiɣi vevi aɖe mee míele egbea, abe ale si wònɔ le Yeremiya ŋɔli ene. Agbe kple ku ƒe nyae dze ŋgɔ ame siwo Yeremiya gblɔ Yehowa ƒe gbedeasia na ɣemaɣi. Menye nyagblɔɖilawoe Mawu ƒe ame siwo li egbea nye o. Yehowa metsɔa eƒe gbɔgbɔ ʋãa mí be míatsɔ nya aɖewo akpe yeƒe nyateƒenya siwo le Biblia me o. Ke hã, edɔ mí be míaɖe gbeƒã Fiaɖuƒe ŋuti nya nyuia va se ɖe esime nuɖoanyi sia nawu enu. (Mat. 28:19, 20) Míedi be ‘míafi Yehowa ƒe nya’ o, si fia be, míedi be míaɣla nu si gbɔna dzɔdzɔ ge la ɖe amewo o. (Xlẽ Yeremiya 23:30.) Míedi kura be míatɔ tsi eƒe nyawo ahana ŋusẽ si le wo ŋu dzi naɖe kpɔtɔ o. Nya siwo Mawu to Yeremiya dzi gblɔ ɖi dometɔ geɖe va eme xoxo. Esia na kakaɖedzi mí be susɔeawo hã ava eme godoo. Ele be míana amewo nanya be: ‘Yehowa awɔ eƒe tame si wòɖo la ade goe, eye awɔ eƒe nya si ŋugbe wòdo tso blema ke la dzi.’—Kony. 2:17.

26. Nyagblɔɖi bubu ka mee míadzro le ta si kplɔe ɖo me?

²⁶ Va se ɖe fifia la, míedzro Yeremiya ƒe subɔsubɔdɔ kple eƒe nyagblɔɖi geɖewo me. Gake ne míeƒo nu tso ‘nubabla yeye’ si ŋu nya wògblɔ, si Yehowa be yeabla kple yeƒe dukɔ ahaŋlɔ eƒe sewo ɖe woƒe dzi me ya ŋu o la, ke míaƒe numedzodzroa mede edeƒe o. (Yer. 31:31-33) Nyagblɔɖi vevi sia kple ale si emevava ka wòe la mee míadzro le ta si kplɔe ɖo me.