Nyabiabia Siwo tso Exlẽlawo Gbɔ

Esi Yehowa Ðasefowo dzea agbagba be yewoanye anukwareɖilawo eye woka ɖe wo nɔewo dzi ta la, nukata wobui be ele vevie be yewoawɔ agbalẽ ɖe nya dzi ne dɔwɔɖoɖowo le wo dome?

Ewɔwɔ nenema sɔ ɖe Ŋɔŋlɔawo nu, nunya le eme, eye wònye lɔlɔ̃ ɖeɖefia. Nukatae? Enyo, mina míadzro dɔwɔɖoɖo ƒe akpa mawo me.

Alesi Mawu wɔ nu kple eƒe dukɔ Israel-vi siwo wòbla nu kpli la ŋuti nuŋlɔɖi le Biblia me. Dɔwɔɖoɖo siwo nɔ nyateƒe tadeagulawo dome ŋu nyawo hã le eme. Nuŋlɔɖi aɖe le Mose ƒe Agbalẽ Gbãtɔ, ta 23 me si me míate ŋu adzro. Esime Abraham srɔ̃ lɔlɔ̃a Sara ku la, edi be yeaƒle ameɖiƒe aɖe. Edze ɖoɖowɔwɔ gɔme kple Kanaanitɔ siwo te ɖe Xebron ŋu. Kpukpui 7-9 ɖee fia be ena fe si wòaxe ɖe anyigba si wòdi ta la me kɔ ƒã. Kpukpui 10 lia ɖo kpe edzi be wogblɔe le dutoƒo le dua ƒe agbo nu amesiame se. Kpukpui 13 lia ɖee fia be anyigbatɔa be yeatsɔ anyigba la ana Abraham femaxee, gake egblɔ be ɖeko wòadzra anyigba la na ye hafi yeaxɔe. Kpukpui 17, 18, kple 20 ɖee fia be eva eme nenema pɛpɛpɛ, eye woɖo kpe edzi le “Xitiviawo kple amesiwo katã va dua me la ŋku me.”

Gake ɖe nuwo ato vovo ne nyateƒe tadeagula evee le dɔwɔɖoɖo mawo wɔma? Yeremya ta 32 ɖo nya la ŋu. Míekpɔe le kpukpui 6 yina be ele be Yeremya naƒle anyigba le tɔɖiayɔvi si. Kpukpui 9 ɖee fia be wolɔ̃ ɖe asi nyui aɖe dzi. Fifia xlẽ kpukpui 10-12: “Nye [Yeremya] meŋlɔe ɖe agbalẽ me, eye metre enu, meɖe ɖasefowo, eye meda ga la le nudanu me. Eye metsɔ asinyigbalẽ, si nu wotre, kple esi le ʋuʋu, seawo kple ɖoɖoawo de asi na Maxseya vi Neriya ƒe vi Barux le nye tɔɖiayɔvi Xanameel kple ɖasefoawo, amesiwo ŋlɔ ŋkɔ ɖe asinyigbalẽa te la ŋku me kpakple le Yudatɔ, siwo katã le dzɔlawo ƒe xɔxɔnua la ŋku me.”

Ẽ, togbɔ be Yeremya nɔ nu wɔm kple hati tadeagula, si nye eƒe ƒometɔ gɔ̃ hã la, ewɔ ɖe nusi le se nu si me nunya le dzi. Wowɔ nuŋlɔɖi eve—ɖeka le ʋuʋu ɖi si ŋudɔ woate ŋu awɔ kabakaba, eye evelia nye kpeɖodzigbalẽ si nu wotre be woazã nenye be ɖikeke aɖe fɔ ɖe te le esi le ʋuʋu ɖi ƒe vavãnyenye ŋu. Abe alesi kpukpui 13 lia gblɔe ene la, wowɔ esiawo katã le “wo ŋku me.” Eyata enye dɔwɔɖoɖo si le se nu, si wowɔ le dutoƒo, si ŋu ɖasefowo le. Eyata eme kɔ ƒã be esɔ ɖe Ŋɔŋlɔawo me kpɔɖeŋu nu ne nyateƒe tadeagulawo kpɔ nyawo gbɔ le mɔ ma si dzi woɖo kpee nu eye wowɔ agbalẽ ɖe edzi.

Nunya le eme hã. Míenya alesi nyagbɔgblɔ sia nye nyateƒee be “azãgbe kple nuɖiɖeame li na wo katã.” (Nyagblɔla 9:11) Kristotɔ nuteƒewɔla siwo tsɔ wo ɖokui ke hã le eme. Ale Yakobo 4:13, 14 gblɔe nye si: “Azɔ la [miva], mi amesiwo gblɔna bena: Egbe alo etsɔ míayi du si kple du si me, eye míanɔ afima ƒe ɖeka, eye míatsa asi, eye míakpɔ viɖe! Gake mienya nusi ava dzɔ etsɔ o.” Eyata míate ŋu adze nane wɔwɔ gɔme abe nuƒeƒle, dɔ alo kpekpeɖeŋudɔ si dzi míelɔ̃ ɖo be míawɔ, alo adzɔnu aɖe si míawɔ na ame aɖe ene. Gake nukae adzɔ etsɔ—alo ɣleti si gbɔna alo ƒe si gbɔna me? Ne afɔku aɖe dzɔ ɖe mí alo ame kemɛa dzi ɖe? Ana wòadze abe ɖe ɖoɖoa dzi manya wɔ o ene. Ke ne míagate ŋu awɔ dɔa alo awɔ kpekpeɖeŋunadɔa o, alo ɖewohĩ eva le sesẽm na ame evelia be wòaxe fea alo wòawɔ eƒe akpa dzi le ɖoɖoa me ɖe? Ne ɖoɖoa ŋuti nuŋlɔɖi aɖeke meli o la, kuxi sesẽwo ate ŋu ado mo ɖa, esiwo gbɔ woate ŋu akpɔ alo madzɔ hafi o ne ɖe wowɔ agbalẽ kpui aɖe ɖe edzi.

Eye mele be míaŋlɔ be o be alesi kakaɖedzi mele agbemenya geɖe ŋu o ate ŋu awɔe gɔ̃ hã be ame bubu naxɔ ɖe mía teƒe alo akpɔ míawo (alo ame kemɛa) ƒe dɔwɔnyawo gbɔ. Yakobo gblɔ kpee le kpukpui 14 lia be: “Elabena dzudzɔ, si dzena ɣeyiɣi kpui aɖe, eye emegbe la megadzena o la, ke mienye.” Ne míagblɔe ŋutɔŋutɔ la, míate ŋu aku kpata. Nubabla, alo dɔwɔɖoɖo, si ŋuti nuŋlɔɖi wowɔ la, ate ŋu awɔe be ame bubuwo nayi edzi akpɔ nyawo gbɔ ne nya kpata aɖe va dzɔ ɖe ameawo dometɔ aɖe dzi.

Le go aɖe me la, esia kplɔ mí yi akpa etɔ̃lia gbɔ—dɔwɔɖoɖo ŋuti nuŋlɔɖiwo nye lɔlɔ̃ ɖeɖefia. Le nyateƒe me la, ne amesiwo wɔ ɖoɖoa dometɔ ɖeka ku alo afɔku aɖe wɔe be wòzu nuwɔametɔ la, anye lɔlɔ̃ si eya Kristotɔ aɖe fia be wòatsɔ fe siwo wònyi alo ga home si wònɔ mɔ kpɔm be aka ye si ŋuti nuŋlɔɖi afia. Eye ne míewɔ dɔwɔɖoɖo ŋuti nuŋlɔɖi si gblɔ nɔvi si míele dɔ wɔm kplii ƒe fe si wònyi le mía ŋu alo ga home si tututu wòaxɔ la, anye lɔlɔ̃ ɖeɖefia ke menye be ɖe míeka ɖe edzi tae o. Afɔɖeɖe sia si me lɔlɔ̃ le mana míado dɔmedzoe alo akpɔ dziku ɖe mia nɔewo ŋu ne ame madebliboawo dometɔ ɖeka ŋlɔ nya alo agbanɔamedzi aɖewo be o. Eye mía dometɔ ka ŋue blibomademade mele o, meŋlɔa nu be o, alo mesea nya alo susu aɖewo gɔme bubui ɣeaɖewoɣi o?—Mateo 16:5.

Mɔ bubuwo gali siwo dzi dɔwɔɖoɖowo ŋuti nuŋlɔɖi si míawɔ la ate ŋu anye lɔlɔ̃ ɖeɖefia mía nɔvi, míaƒe ƒomea, kple hame bliboa. Gake eme nekɔ be hekpe ɖe lɔlɔ̃ si wònye be míawɔ nuŋlɔɖi siwo me woŋlɔ nyawo ɖo wòde pɛpɛpɛ ŋu la, nunya le wo wɔwɔ me eye wòsɔ ɖe Ŋɔŋlɔawo nu hã.