Ta Ewolia

Amekae Ate Ŋu Anɔ Te Ðe Aƒetɔwo Ƒe Aƒetɔ La Nu?

 1, 2. Nukata ŋutega si Daniel kpɔ le Belsazar ƒe fiaɖuɖu ƒe ƒe etɔ̃lia me le vevie na mí?

ƑE BLAATƆ̃ VƆ ADRE va yi tso esime wotsrɔ̃ Yehowa ƒe gbedoxɔa le Yerusalem. Belsazar kple fofoa Nabonido wɔ ɖeka ɖu fia ɖe Babilonia Fiaɖuƒe si nye xexemefiaɖuƒe etɔ̃lia le Biblia ƒe nyagblɔɖi me la dzi.a Mawu ƒe nyagblɔɖila Daniel nɔ aboyo me le Babilon. Eye le “Belsazar ƒe fiaɖuɖu ƒe ƒe etɔ̃lia me” la, Yehowa na Daniel kpɔ ŋutega aɖe si me woɖe tadedeagu dzadzɛ gbugbɔɖoanyi ŋuti nya aɖewo fiae le.—Daniel 8:1.

² Nyagblɔɖi ƒe ŋutega si Daniel kpɔ wɔ dɔ ɖe edzi ŋutɔ eye eka mí amesiwo le ‘nuwuɣia’ me vevie. Mawudɔla Gabriel gblɔ na Daniel be: “Kpɔ ɖa, maɖe nusi le dzɔdzɔ ge, ne dɔmedzoe wu enu la, afia wò; elabena nuwuɣi ŋu wòle ɖo.” (Daniel 8:16, 17, 19, 27) Ekema mina míatsɔ didi vevie adzro nusi Daniel kpɔ kple nusi wòfia na mí egbea me.

AGBO DZOEVEE

 3, 4. Lã kae Daniel kpɔ le tɔsisi la to, eye nukae wòtsi tre ɖi na?

³ Daniel ŋlɔ bena: “Menɔ ŋutega la me yi Susan-mɔ̃, si le Elam-nyigba dzi la me, eye wòwɔ nam le ŋutega me abe Ulai-tɔsisi la to mele ene.” (Daniel 8:2) Daniel megblɔe ne Susan (Susa)—Elam-fiadu, si gbɔ didi tso Babilon kilometa 350 le ɣedzeƒe gome—lae wònɔ ŋutɔŋutɔ loo alo ŋutega me koe wònɔ afima le o.

⁴ Daniel yi edzi be: “Mefɔ kɔ dzi kpɔ agbo aɖe le tɔsisi la to, si to dzo legbee eve.” (Daniel 8:3a) Nusi agboa fia menɔ ɣaɣla ɖe Daniel o. Mawudɔla Gabriel gblɔ emegbe be: “Agbo dzoevee, si nèkpɔ la enye Media- kple Persia-fiawo.” (Daniel 8:20) Gbadzaƒe si le todzi le Asiria ƒe ɣedzeƒe gomee Mediatɔwo nɔ, eye Persiatɔwo nye tsaglãlatsalawo tsã le nuto si nɔ Persia Ƒukɔmea ƒe dziehe la me. Gake esi Medo-Persia Fiaɖuƒe nɔ ta kekem ɖe edzi la, emenɔlawo va lɔ̃ agbeɖuɖu vevie.

 5. Aleke dzo si nye “mamlɛtɔ, si to” la va didi legbee?

⁵ Daniel gblɔ be: “[Eto] dzo legbee eve, ke ɖeka didi wu nɔvia, eye legbeetɔ enye mamlɛtɔ, si to.” (Daniel 8:3b) Dzo legbeetɔ si to emegbe la tsi tre ɖi na Persiatɔwo, eye dzo evelia tsi tre ɖi na Mediatɔwo. Mediatɔwoe kpɔ ŋusẽ wu gbã. Gake le ƒe 550 D.M.Ŋ. me la, Persia-fia Kores ɖu Mediatɔ Fia Astyages dzi bɔbɔe. Kores tsɔ dukɔ eveawo ƒe kɔnuwo kple sewo ƒo ƒu, etsɔ woƒe fiaɖuƒeawo wɔ ɖeka, eye wòkeke woƒe dziɖuƒewo ɖe enu. Tso ɣemaɣi la, fiaɖuƒea zu dukɔ eve ƒe fiaɖuƒe ƒokpli.

AGBOA KPƆ ŊUSẼ ETEƑE MEKƆ O

 6, 7. Aleke wòdzɔe be “lã aɖeke menɔ te ɖe” agbo la ‘nu o’?

⁶ Daniel yi edzi ɖɔ agboa be: “Mekpɔ agbo la wòle dzo dam ɖo ta ɣetoɖoƒe, anyiehe kple dziehe gome, eye lã aɖeke menɔ te ɖe enu o, ame aɖeke mete ŋu xɔ ame le esi me o, ewɔ alesi dze eŋu, eye wòkpɔ ŋusẽ eteƒe mekɔ o.”—Daniel 8:4.

⁷ Le ŋutega si wotsɔ na Daniel do ŋgɔ me la, wotsɔ lã wɔadã si do tso atsiaƒu me eye wònɔ abe dzata si to hɔ̃ ƒe aʋala ene la wɔ Babilon ƒe kpɔɖeŋui. (Daniel 7:4, 17) Kpɔɖeŋulã ma mete ŋu nɔ te ɖe “agbo” si le ŋutega yeye sia me nu o. Kores Gãtɔ ɖu Babilon dzi le ƒe 539 D.M.Ŋ. me. Le ƒe 50 kloe megbe la, “lã gã,” alo dunyahedziɖuɖu, aɖeke mete ŋu nɔ te ɖe Medo-Persia Fiaɖuƒea nu o—wònye xexemefiaɖuƒe enelia le Biblia me nyagblɔɖi me.

 8, 9. (a) Aleke “agbo” la nɔ “dzo dam ɖo ta ɣetoɖoƒe, anyiehe kple dziehe” gomee? (b) Nya kae Ester ƒe agbalẽa gblɔ le amesi va xɔ ɖe Persia Fia Dario I teƒe ŋu?

⁸ Medo Persia Xexemefiaɖuƒe si tso “ɣedzeƒe”—afisi ɣe dzena le—la wɔ nu alesi dze eŋu wònɔ “dzo dam ɖo ta ɣetoɖoƒe, anyiehe kple dziehe.” (Yesaya 46:11) Fia Cambyses II si va xɔ ɖe Kores Gãtɔ teƒe la xɔ Egipte. Persia Fia Dario I ye va xɔ ɖe eteƒe, amesi ho va to ɣetoɖoƒe gome to Bosporus-ƒudomemɔ le ƒe 513 D.M.Ŋ. me va dze Thrace si le Europa-nutome eye eƒe fiadue nye Byzantium (si nye Istanbul) fifia la dzi. Le ƒe 508 D.M.Ŋ. me la, eɖu Thrace dzi eye wòsi Makedonia le ƒe 496 D.M.Ŋ. me. Eyata va ɖo Dario ƒe fiaɖuɣi la, Medo-Persia ƒe “agbo” la xɔ anyigbawo le nuto vevi etɔ̃ me: le dziehe gome yi Babilonia kple Asiria, le ɣetoɖoƒe gome va to Asia Sue, kple le anyiehe gome vaseɖe Egipte.

⁹ Nusi gaɖo kpe Medo-Persia Fiaɖuƒea ƒe gãnyenye dzie nye be Biblia ƒo nu tso Xerxes I si va xɔ ɖe Dario teƒe ŋu be enye “Axasweros, si ɖu anyigba alafa ɖeka kple blave vɔ adre dzi, tso India vaseɖe [Etiopia, NW ].” (Ester 1:1) Gake fiaɖuƒe bubu ava xɔ ɖe fiaɖuƒe gã sia teƒe, eye Daniel ƒe ŋutega la ɖe nya dodzidzɔname aɖewo fia le esia ŋu si ado ŋusẽ míaƒe Mawu ƒe nyagblɔɖinya la dzixɔxɔse.

GBƆ̃TSU LA TU DZO AGBOA ƑU ANYI

10. Lã kae tu dzo “agbo” la ƒu anyi le Daniel ƒe ŋutega la me?

¹⁰ Kpɔ alesi nusi Daniel gakpɔ awɔ mo yaa nɛ ɖa le susu me. Nuŋlɔɖia gblɔ be: “Esi meɖo ŋku anyi la, gbɔ̃tsu aɖe tso ɣetoɖoƒe gome va anyigba blibo la dzi, eƒe afɔ mele anyi kam o, eye gbɔ̃tsu la to dzo sesẽ aɖe ɖe ŋugbladome. Eva agbo dzoevee, si mekpɔ wòtsi tre ɖe tɔsisia to la gbɔ, eye wòlũ ɖe edzi kple ŋusẽ le dziku me. Mekpɔe wòɖo agbo la gbɔ, dzi kui ɖe eŋu, eye wòtu dzo agbo la heŋe eƒe dzo eveawo, eye ŋusẽ mele agbo la ŋu, ne wòanɔ te ɖe enu o; etutui ƒu anyi henyã avuzi le edzi, eye ame aɖeke mexɔ agbo la le esi me o.” (Daniel 8:5-7) Nukae nusiawo katã fia?

11. (a) Aleke mawudɔla Gabriel ɖe nu me le “gbɔ̃tsu” la kple eƒe “dzo gã” la ŋui? (b) Amekae dzo ɖedzesi la tsi tre ɖi na?

¹¹ Womegblẽ Daniel alo míawo hã ɖi be míasusu nya aɖe ko agblɔ le nusi ŋutega sia fia ŋu o. Mawudɔla Gabriel na Daniel nya be: “Gbɔ̃tsu la nye Hela-nyigba ƒe fia, eye dzo gã, si le ŋugbladome nɛ la, enye fia gbãtɔ.” (Daniel 8:21) Woɖo Persia Fiaɖuƒea ƒe fia mamlɛtɔ si nye Dario III (Codommanus) zi dzi le ƒe 336 D.M.Ŋ. me. Alexander va zu fia le Makedonia le ƒe ma ke me. Ŋutinya ɖee fia be Alexander Gãtɔ va zu “Hela-nyigba ƒe fia” gbãtɔ si ƒe nya wogblɔ ɖi. Alexander si tso “ɣetoɖoƒe,” la ho le ablaɖeɖe me le ƒe 334 D.M.Ŋ. me. Eɖu anyigbawo dzi abe ɖe “eƒe afɔ mele anyi kam o” ene eye wòtu dzo “agbo” la ƒu anyi. Hela he Medo-Persia dziɖuɖu si nɔ anyi ƒe alafa eve kloe la va nuwuwui eye wòva zu xexemefiaɖuƒe atɔ̃lia si ŋu Biblia ƒo nu tsoe. Aleke gbegbe Mawu ƒe nyagblɔɖi va eme wòɖe dzesi enye si!

12. Aleke ‘woŋe’ kpɔɖeŋugbɔ̃tsu la ƒe “dzo gã” lae, eye nukae dzo ene siwo va xɔ ɖe eteƒe la nye?

¹² Gake ɣeyiɣi kpui aɖe koe Alexander ƒe ŋusẽ anɔ anyi ase ɖo. Ŋutega la gaɖee fia be: “Gbɔ̃tsu la kpɔ ŋusẽ eteƒe mekɔ o; eye esi ŋusẽ ɖo eŋu la, dzo gã la ŋe, eye dzo kako ene to ɖe eteƒe ɖo ta dziƒo ƒe ya eneawo dzi.” (Daniel 8:8) Esi Gabriel nɔ nyagblɔɖia me ɖem la, egblɔ be: “Esi dzo ene to ɖe ŋeŋea teƒe la, egɔme enye: Fiaɖuƒe ene atso dukɔ la me, ke womasesẽ ade eya nu o.” (Daniel 8:22) Abe alesi wogblɔe ɖi ene la, Alexander “ŋe,” alo eku esime wòxɔ ƒe 32 pɛ ko esi eƒe aʋadziɖuɖudɔa ɖo eƒe kɔkɔƒe kekeake. Eye wova mã eƒe fiaɖuƒe gã la me ɖe eƒe aʋafia ene dome.

DZO SUE SI ŊU NYA NƆ ƔAƔLA

13. Nukae do tso dzo eneawo dometɔ ɖeka me, eye aleke wòwɔ nui?

¹³ Ŋutega la ƒe akpa si kplɔe ɖo ku ɖe nusiwo adzɔ le ƒe 2,200 kple edzivɔ me, eye emevava yi ŋgɔ ɖo egbeɣeyiɣiawo me. Daniel ŋlɔ bena: “Dzo sue aɖe do tso wo [dzo eneawo] dometɔ ɖeka me, eye wòlolo ŋutɔ ɖo ta dziehe kple ɣedzeƒe gome kpakple anyigba nyo la gbɔ. Edo eɖokui ɖe dzi ɖe dziƒo ŋu nuwo ŋuti, eye wòdudu dziƒo ŋu nu aɖewo kple dzinuviwo ƒo ɖe anyi henyã avuzi le wo dzi. Edo eɖokui ɖe dzi ɖe aʋakɔwo ƒe amegã hã ŋu, eye wòxɔ gbesiagbe vɔsa le esi hegbã eƒe nɔƒe kɔkɔe la. Wòtsɔ nu vɔ̃ɖi wɔwɔ ho aʋa ɖe gbesiagbe vɔsa ŋu; elé nyateƒe ƒu anyi, eye eƒe nuwɔwɔ dze edzi nɛ.”—Daniel 8:9-12.

14. Nya kae mawudɔla Gabriel gblɔ le kpɔɖeŋudzo sue la ƒe dɔwɔna ŋu, eye nukae adzɔ ɖe dzo ma dzi?

¹⁴ Hafi míate ŋu ase nya siwo míeyɔ va yi gɔme la, ele be míase nya si mawudɔla la agblɔ. Esi mawudɔla Gabriel fia asi fiaɖuƒe ene siwo ado tso Alexander ƒe fiaɖuƒea me ƒe dziɖuɖu megbe la, egblɔ be: “Ne woƒe dziɖuɖu wu nu, eye nu vlo wɔwɔwo nu flɔ la, fia [si ɖo adãmo, NW ], si dze aɖaŋu la, ado. Ŋusẽ anɔ eŋu, ke menye to eya ŋutɔ ƒe ŋusẽ me o, agblẽ nu eteƒe makɔ o, eye eƒe nuwɔwɔ adze edzi nɛ, eye wòatsrɔ̃ ame geɖewo kple ame kɔkɔewo ƒe dukɔ la. Eƒe asi ana alakpadada nadze edzi nɛ le eƒe ayedzedze ta, ado eɖokui ɖe dzi le dzi me, eye wòatsrɔ̃ ame geɖewo le vo me; ado eɖokui ɖe dzi ɖe aƒetɔwo ƒe Aƒetɔ la ŋu, ke woagbãe gudugudu, ame ƒe asi manɔmee.”—Daniel 8:23-25.

15. Nukae mawudɔla la gblɔ na Daniel be wòawɔ le ŋutega la ŋu?

¹⁵ Mawudɔla la gblɔ na Daniel be: “Dzra ŋutega la ɖo ɖe ta me, elabena eteƒe le didi ge.” (Daniel 8:26) ‘Eteƒe adidi’ hafi ŋutegaa ƒe akpa sia nava eme, eye wogblɔ na Daniel be ‘wòadzra ŋutega la ɖo ɖe ta me.’ Edze ƒã be Daniel mete ŋu nya nusi wòfia o. Gake fifia la, ɣeyiɣi si wogblɔ be ‘eteƒe adidi’ ase ɖo la anya va yi xoxo. Eyata míabia be: ‘Nukae xexemeŋutinya ɖe fia le nyagblɔɖi ƒe ŋutega sia me vava ŋu?’

DZO SUE LA VA KPƆ ŊUSẼ

16. (a) Kpɔɖeŋudzo ka mee dzo sue la do tso? (b) Aleke Roma wɔ va zu xexemefiaɖuƒe adelia le Biblia ƒe nyagblɔɖi me, gake nukatae meva zu dzo sue la o?

¹⁶ Ŋutinya ɖee fia be dzo sue la do tso kpɔɖeŋudzo eneawo dometɔ ɖeka me—tso esi le keke ɣetoɖoƒe gome ke la me. Eyae nye Aʋafia Cassander ƒe Hela-fiaɖuƒe si kpɔ ŋusẽ ɖe Makedonia kple Hela dzi. Emegbe Aʋafia Lysimachus si nye Thrace kple Asia Sue ƒe fia la ƒe fiaɖuƒe va kpɔ ŋusẽ ɖe fiaɖuƒe sia dzi. Le ƒe alafa evelia do ŋgɔ na Mía Ŋɔli me la, Roma ɖu Hela-dziɖuƒea ƒe ɣetoɖoƒenuto siawo dzi. Eye kaka ƒe 30 D.M.Ŋ. naɖo la, Roma xɔ Hela-fiaɖuƒeawo katã, eye wòva zu xexemefiaɖuƒe adelia le Biblia ƒe nyagblɔɖi me. Gake menye Roma Fiaɖuƒeae nye dzo sue si le Daniel ƒe ŋutega la me o, elabena fiaɖuƒe ma menɔ anyi va ɖo “nuwuɣi” la me o.—Daniel 8:19.

17. (a) Ƒomedodo kae nɔ Britain kple Roma Fiaɖuƒea dome? (b) Aleke Britain Fiaɖuƒe do ƒome kple Hela-fiaɖuƒe si ɖu Makedonia kple Greece dzii?

¹⁷ Ekema nukae ŋutinya ɖe fia be “fia si ɖo adãmo” si wɔa nu akpasesẽtɔe la nye? Roma Fiaɖuƒe ƒe dzieheɣetoɖoƒee Britain dzɔ tso. Va ɖo ƒe alafa atɔ̃lia M.Ŋ. ƒe gɔmedzedze la, Roma-dziɖuƒewo nɔ afisi nye Britain fifia. Le ɣeyiɣi aɖe megbe la, Roma Fiaɖuƒea va yi to, gake Hela kple Roma tɔwo ƒe agbenɔnɔ kple kɔnuwo yi edzi kpɔ ŋusẽ ɖe amewo dzi le Britain kple Europa ƒe akpa bubu siwo nɔ Roma-dziɖuɖu te tsã. Nobel Nunanaxɔla Octavio Paz si nye Mexicotɔ hakpanyaŋlɔla kple nuŋlɔla la ŋlɔ bena: “Le Roma Fiaɖuƒea ƒe mumu megbe la, Sɔlemeha lae va xɔ ɖe eteƒe.” Egblɔ kpee be: “Sɔleme fofowo kple agbalẽnyala siwo va emegbe tsɔ Hela-xexemenunya de Kristotɔwo ƒe nufiafia me.” Eye ƒe alafa 20 lia me xexemenunyala kple akɔntanyalagã Bertrand Russell gblɔ be: “Xexemenunya kple blema dzɔdzɔmeŋutinunya si dze egɔme le Mileto [Hela-du aɖe si le Asia Sue] ƒe akpe eve kple afã enye sia la dzie wotu Ɣetoɖoƒetɔwo ƒe agbenɔnɔ kple kɔnu siwo woxɔ tso Helatɔwo gbɔ la ɖo.” Eyata míate ŋu agblɔ be Hela-fiaɖuƒe si ɖu Makedonia kple Greece dzi ƒe nuwɔnae Britain Fiaɖuƒea srɔ̃.

18. Nukae dzo sue si va zu “fia si ɖo adãmo” le ‘nuwuɣia’ me la nye? Ðe eme.

¹⁸ Kaka ƒe 1763 M.Ŋ. naɖo la, Britain ɖu Spain kple France, siwo nye dukɔ sẽŋu siwo ƒe ŋusẽ sɔ kplii la dzi. Tso ɣemaɣi la, eɖee fia be yenye dukɔ si kpɔ ŋusẽ ɖe ƒu gãwo dzi kple xexemefiaɖuƒe adrelia le Biblia ƒe nyagblɔɖi me. Esime Amerika-dukɔ 13 ɖe wo ɖokui ɖa le Britain ŋu le ƒe 1776 me heɖo United States of America anyi megbe gɔ̃ hã la, Britain Fiaɖuƒea keke ɖe edzi xɔ anyigba memamã ene ƒe akpa ɖeka eye edzinɔlawo ƒe akpa enelia nɔ eƒe dziɖuɖu te. Xexemefiaɖuƒe adrelia la gakpɔ ŋusẽ ɖe edzi esime United States of America wɔ ɖeka kple Britain wòzu Anglo-Amerika xexemefiaɖuƒe ƒokpli. Fiaɖuƒe sia zu “fia si ɖo adãmo” nyateƒe le ganya kple asrafonyawo me. Eyata Anglo-Amerika Xexemefiaɖuƒe ye nye dzo sue si va do adã le dunyaheŋusẽ me le ‘nuwuɣia’ me.

19. Nukae nye “anyigba nyo” si woyɔ le ŋutega la me?

¹⁹ Daniel kpɔ be dzo sue la ‘ɖo ta anyigba nyo’ la gbɔ. (Daniel 8:9) Ŋugbedodonyigba si Yehowa tsɔ na eƒe dukɔ tiatia la dze ani ale gbegbe be woyɔe be “anyigba nyuitɔ le anyigbawo katã dome,” si fia be ɖeke mede enu le anyigba bliboa katã dzi o. (Xezekiel 20:6, 15) Enye nyateƒe be Britain xɔ Yerusalem le December 9, 1917, dzi eye le ƒe 1920 me la, Dukɔwo ƒe Nubabla la tsɔ Palestine de Great Britain dziɖuɖu te vaseɖe May 14, 1948. Gake nyagblɔɖi si me kpɔɖeŋunu geɖe le ye ŋutega la nye. Eye menye Yerusalem ye “anyigba nyo” si woyɔ le ŋutegaa me tsi tre ɖi na o, ke etsi tre ɖi na nɔnɔme si me amesiwo Mawu bua ame kɔkɔewoe anɔ le anyigba dzi le xexemefiaɖuƒe adrelia la ƒe dziɖuɣi. Mina míakpɔ alesi Anglo-Amerika Xexemefiaɖuƒe la te kpɔ be yeado ŋɔdzi na ame kɔkɔeawoe ɖa.

WOGBÃ “EƑE NƆƑE KƆKƆE” LA

20. Amekawoe nye “dziƒoʋakɔ” la kple ‘dzinuvi’ siwo dzo suea te kpɔ be yeadudu ƒo ɖe anyi?

²⁰ Dzo sue la “[do] eɖokui ɖe dzi ɖe dziƒo ŋu nuwo ŋuti, eye wòdudu dziƒo ŋu nu aɖewo kple dzinuviwo ƒo ɖe anyi.” Le mawudɔla la ƒe numeɖeɖe nu la, “dziƒo ŋu nuwo” kple ‘dzinuvi’ siwo dzo sue la te kpɔ be yeadudu ƒo ɖe anyi la nye “ame kɔkɔewo ƒe dukɔ.” (Daniel 8:10, 24) ‘Ame kɔkɔe’ siawo nye Kristotɔ siwo wotsɔ gbɔgbɔ si ami na. Esi nubabla yeye si Yesu Kristo ƒe ʋu si wòkɔ ɖi na wòle dɔ wɔm la wɔe be ƒomedodo va le wo kple Mawu dome ta la, wokɔ wo ŋu, wole tsi na wo, heɖe wo ɖe vovo koŋ na Mawu subɔsubɔ. (Hebritɔwo 10:10; 13:20) Esi Yehowa ɖoe be woanye domenyilawo akpe ɖe ye Vi ŋu le dziƒodomenyinyia me ta la, ebua wo ame kɔkɔewoe. (Efesotɔwo 1:3, 11, 18-20) Ekema “dziƒo ŋu nuwo” si le Daniel ƒe ŋutega la me fia ‘ame kɔkɔe’ 144,000 la ƒe ame susɔe siwo le anyigba dzi, amesiwo aɖu fia kple Alẽvi la le dziƒo.—Nyaɖeɖefia 14:1-5.

21. Amekae le “nɔƒe kɔkɔe” si xexemefiaɖuƒe adrelia di be yeawɔ aƒedoe?

²¹ Egbea ame 144,000 la ƒe ame susɔeawoe nye “dziƒo Yerusalem”—Mawu ƒe Fiaɖuƒe si le abe du ene—kple eƒe gbedoxɔ me ɖoɖoa teƒenɔlawo le anyigba dzi. (Hebritɔwo 12:22, 28; 13:14) Le gɔmesese sia nu la, wole “nɔƒe kɔkɔe” aɖe si dzi xexemefiaɖuƒe adrelia la di be yeafanya ahawɔe aƒedoe. (Daniel 8:13) Esi Daniel nɔ nu ƒom tso kɔkɔeƒe ma ŋu be enye “[Yehowa ƒe] nɔƒe kɔkɔe” hã la, egblɔ be: “[Exɔ] gbesiagbe vɔsa le [Yehowa si] hegbã eƒe nɔƒe kɔkɔe la. Wòtsɔ nu vɔ̃ɖi wɔwɔ ho aʋa ɖe gbesiagbe vɔsa ŋu; elé nyateƒe ƒu anyi, eye eƒe nuwɔwɔ dze edzi nɛ.” (Daniel 8:11, 12) Aleke esia va emee?

22. Aleke xexemefiaɖuƒe adrelia wɔ “nu vɔ̃ɖi” tɔŋku aɖe le Xexemeʋa II wɔɣi?

²² Nɔnɔme ka mee Yehowa Ðasefowo to le Xexemeʋa II wɔɣi? Woti wo yome vevie! Edze egɔme tso Nazi kple Fasi dukɔwo me. Gake eteƒe medidi o ‘wonɔ nyateƒe lém ƒu anyi’ le ‘dzo sue si va kpɔ ŋusẽ ɖe edzi’ la ƒe dziɖuƒe gã bliboa katã me. Woɖo asi Fiaɖuƒegbeƒãɖelawo ƒe ‘aʋakɔa’ kple woƒe dɔ si nye gbeƒãɖeɖe ‘nyanyuia’ dzi le Britain Dziɖuƒea katã kloe. (Marko 13:10) Esime dukɔ siawo zi woƒe amewo dzi ɖe asrafodɔ me la, womelɔ̃ be yewoaɖe Yehowa Ðasefowo le eme le esi wonye subɔlawo ta o, si nye bubumademade Mawu ƒe subɔla si wonye le teokrasiɖoɖo nu la ŋu. Yehowa subɔla nuteƒewɔlawo to nuvlowɔhawo ƒe amedzidzedze kple gbɔɖiame vovovowo me le United States. Xexemefiaɖuƒe adrelia la to esia me te kpɔ be yeaxɔ kafukafuvɔsa—‘nuyi ƒe kutsetse’—si Yehowa ƒe amewo tsɔna nɛ edziedzi wònye woƒe tadedeagu ƒe akpa si wowɔna “gbesiagbe” la. (Hebritɔwo 13:15) Xexemefiaɖuƒe ma wɔ “nu vɔ̃ɖi” si nye be ege ɖe Mawu Dziƒoʋĩtɔ la ƒe dziɖuƒe si dze nɛ la—si nye “eƒe nɔƒe kɔkɔe.”

23. (a) Aleke Anglo-Amerika Xexemefiaɖuƒea tso “ɖe aƒetɔwo ƒe Aƒetɔ la ŋu” le Xexemeʋa II wɔɣi? (b) Amekae nye “aƒetɔwo ƒe Aƒetɔ” la?

²³ Esi dzo sue la ti “ame kɔkɔewo” yome le Xexemeʋa II me la, edo eɖokui ɖe dzi ɖe “aʋakɔwo ƒe amegã” la ŋu. Alo abe alesi mawudɔla Gabriel gblɔe ene la, etso “ɖe aƒetɔwo ƒe Aƒetɔ la ŋu.” (Daniel 8:11, 25) Yehowa Mawu koe woate ŋu ayɔ dzesideŋkɔ “aƒetɔwo ƒe Aƒetɔ” na. Hebrigbe me nya sar si gɔme woɖe be “aƒetɔ” la do ƒome kple dɔwɔnya aɖe si gɔmee nye “ɖu ame dzi.” Nya la ate ŋu afia fia viŋutsu alo fia, eye agate ŋu afia amegã alo tatɔ hã. Daniel ƒe agbalẽa ƒo nu tso aƒetɔ bubu siwo nye mawudɔlawo hã ŋu—le kpɔɖeŋu me, eyɔ Mixael ƒe ŋkɔ. Mawue nye Tatɔ, si nye aƒetɔ siawo katã ƒe Aƒetɔ. (Daniel 10:13, 21; tsɔe sɔ kple Psalmo 83:19.) Gake ɖe míate ŋu akpɔe le susu me be ame aɖe natso ɖe Yehowa—aƒetɔwo ƒe Aƒetɔ la—ŋua?

WOGAÐO “KƆKƆEƑE” LA TE

24. Kakaɖedzi kae Daniel 8:14 na mí?

²⁴ Ame aɖeke mate ŋu atso ɖe aƒetɔwo ƒe Aƒetɔ la ŋu o—Anglo-Amerika Xexemefiaɖuƒe si nye fia si “ɖo adãmo” la gɔ̃ hã mate ŋui o! Agbagba si fia sia dze be yeawɔ Mawu ƒe kɔkɔeƒea aƒedoe la medze edzi o. Mawudɔla si wodɔ la gblɔ be le “fiẽ kple ŋdi akpe eve alafa etɔ̃” megbe la, “woagaɖo kɔkɔeƒe la te,” alo “akpɔ aʋadziɖuɖu.”—Daniel 8:13, 14; The New English Bible.

25. Alekee nye nyagblɔɖi ƒe ŋkeke 2,300 la ƒe didime, eye nudzɔdzɔ ka ŋue wòku ɖo?

²⁵ Ŋkeke 2,300 la nye nyagblɔɖi ƒe ɣeyiɣi. Eyata ele be míazã nyagblɔɖiƒe si me ŋkeke 360 le. (Nyaɖeɖefia 11:2, 3; 12:6, 14) Ekema ŋkeke 2,300 la anye ƒe 6, dzinu 4, kple ŋkeke 20. Ɣekaɣie wònye? Le ƒe 1930 ƒe ƒeawo me la, wova nɔ Mawu ƒe amewo yome tim ŋutɔ le dukɔ vovovowo me. Eye le Xexemeʋa II wɔɣi la, woti Yehowa Ðasefowo yome vevie le Anglo-Amerika xexemefiaɖuƒe ƒokplia ƒe anyigbawo dzi. Nukatae? Le esi woɖoe godoo be ‘yewoabu Mawu dziɖulae wu amewo’ tae. (Dɔwɔwɔwo 5:29) Eyata aʋa ma ŋue ŋkeke 2,300 la aku ɖo.b Gake nya kae míate ŋu agblɔ le nyagblɔɖi ƒe ɣeyiɣi sia ƒe gɔmedzedze kple eƒe nuwuwu ŋu?

26. (a) Ne etsɔ hã la, ɣekaɣie wòle be míadze ŋkeke 2,300 la xexlẽ gɔme tsoe? (b) Ɣekaɣie ŋkeke 2,300 la wu enu?

²⁶ Ne ‘woagaɖo kɔkɔeƒe la te,’ alo woagbugbɔe aɖo anyi wòazu abe alesi wònɔ ene la, ke ele be ŋkeke 2,300 la nadze egɔme tso ɣeyiɣi si me wònɔ “te” tsã le Mawu ŋkume. Mado ŋgɔ na June 1, 1938, o esime wota nyati si ƒe tanyae nye “Habɔbɔ” la ƒe akpa 1 ɖe Gbetakpɔxɔ me. Eƒe akpa 2 lia nɔ June 15, 1938, ƒe tataa me. Ne míexlẽ ŋkeke 2,300 (si nye ƒe 6, dzinu 4, kple ŋkeke 20 le Hebritɔwo ƒe ɣletigbalẽ dzi) tso June 1 alo 15, 1938, dzi la, akplɔ mí va ɖo October 8 alo 22, 1944 me. Le takpekpe tɔxɛ aɖe si wowɔ le Pittsburgh, Pennsylvania, U.S.A., le September 30 kple October 1, 1944 me ƒe ŋkeke gbãtɔ dzi la, Gbetakpɔxɔ Habɔbɔa ƒe zimenɔla ƒo nu tso tanya si nye “Nuwɔwɔ ɖe Teokrasimɔ Nu Egbea” ŋu. Le habɔbɔa ƒe ƒe sia ƒe takpekpe si wowɔ le October 2 dzi la, wotrɔ asi le Habɔbɔa ƒe ɖoɖo si dzi woda asi ɖo le se nu la ŋu kple susu be woana wòasɔ ɖe teokrasiɖoɖo nu alesi se aɖe mɔe. Esi wota Biblia me nudidi siwo me wogakɔ ɖe agbalẽ me la, eteƒe medidi o Yehowa Ðasefowo ƒe hamewo va wɔ nu ɖe teokrasiɖoɖo nu bliboe wu.

27. Kpeɖodzi kae li be woɖo asi nusi wowɔna “gbesiagbe” dzi le Xexemeʋa II ƒe ƒe siwo me yometiti nɔ ŋutɔ la me?

²⁷ Togbɔ be ŋkeke 2,300 la wu enu le Xexemeʋa II si dze egɔme le ƒe 1939 me la me hã, woɖo asi nusi wowɔna “gbesiagbe” le Mawu ƒe kɔkɔeƒea dzi vevie le yometiti ta. Le ƒe 1938 me la, alɔdzedɔwɔƒe 39 ye Gbetakpɔxɔ Habɔbɔa ɖo be woakpɔ Ðasefowo ƒe dɔa dzi le anyigba dzi katã, gake kaka ƒe 1943 naɖo la, 21 koe nɔ anyi. Fiaɖuƒegbeƒãɖelawo ƒe xexlẽme hã mete ŋu dzi ɖe edzi boo ɣemaɣi o.

28, 29. (a) Esi Xexemeʋa II nɔ kekem la, nukae dzɔ le Yehowa ƒe habɔbɔa me? (b) Nya kae míate ŋu agblɔ le agbagba vɔ̃ɖi siwo futɔ la dze be yeawɔ “nɔƒe kɔkɔe” la aƒedoe ahatsrɔ̃e ŋu?

²⁸ Míede dzesii be le Xexemeʋa II ƒe ɣleti mamlɛawo me la, Yehowa Ðasefowo gaɖo kpe woƒe tameɖoɖo kplikpaa be yewoado Yehowa Mawu ƒe dziɖulanyenye ɖe dzi to teokrasihabɔbɔ me nɔnɔ asubɔe me. Taɖodzinu sia tae wodze egɔme gbugbɔ ɖoɖo wɔ ɖe woƒe dɔa kple alesi woakpɔ edzii ŋu le ƒe 1944 me. Le nyateƒe me la, woɖo tanya na nyati aɖe si nɔ October 15, 1944, ƒe Gbetakpɔxɔ me be “Wowɔ Ðoɖo ɖe Dɔ Mamlɛtɔ Wɔwɔ Ŋu.” Esia kple nyati bubu siwo do ɣemaɣi ku ɖe subɔsubɔdɔa wɔwɔ ŋu la ɖee fia be ŋkeke 2,300 la wu enu eye be ‘wogaɖo kɔkɔeƒe la te’ ake.

²⁹ Agbagba siwo futɔ la dze vɔ̃ɖitɔe be yeawɔ “kɔkɔeƒe” la aƒedoe ahatsrɔ̃e la do kpo nu keŋkeŋ. Le nyateƒe me la, ‘ame kɔkɔe’ siwo kpɔtɔ le anyigba dzi kple woƒe zɔhɛ siwo nye “ameha gã” la me tɔwo ɖu aʋa dzi. (Nyaɖeɖefia 7:9) Eye fifia woyi edzi le subɔsubɔ kɔkɔe tsɔm na Yehowa le kɔkɔeƒe si va le eƒe teokrasiɖoƒe si dze nɛ.

30. Nukae adzɔ ɖe “fia si ɖo adãmo” la dzi kpuie?

³⁰ Anglo-Amerika Xexemefiaɖuƒea kpɔtɔ le dzi ɖum. Gake mawudɔla Gabriel gblɔ be: “Woagbãe gudugudu, ame ƒe asi manɔmee.” (Daniel 8:25) Eteƒe madidi kura o, woagbã xexemefiaɖuƒe sia si nye adrelia le Biblia ƒe nyagblɔɖi me—si nye ‘fia sia si ɖo adãmo’—eye menye amegbetɔ ƒe asie awɔ esia o, ke atso ŋusẽ si kɔ boo wu amegbetɔ tɔ gbɔ le Harmagedon. (Daniel 2:44; Nyaɖeɖefia 16:14, 16) Aleke gbegbe wòdoa dzidzɔ na amee nye si be míanya be woaʋli Yehowa Mawu, aƒetɔwo ƒe Aƒetɔ la, ƒe dziɖulanyenye ta ɣemaɣi!

[Etenuŋɔŋlɔwo]

NUKAWO GƆMEE NÈVA SE?

• Nuka ƒe kpɔɖeŋue

“agbo dzoevee” la nye?

“gbɔ̃tsu” si to “dzo gã” la nye?

dzo ene siwo to ɖe “dzo gã” la teƒe nye?

dzo sue si do tso dzo eneawo dometɔ ɖeka me la nye?

• Le Xexemeʋa II wɔɣi la, aleke Anglo-Amerika Xexemefiaɖuƒe la te kpɔ be yeawɔ “nɔƒe kɔkɔe” la aƒedoe, eye ɖe wòkpɔ dzidzedzea?

[Map/Picture on page 166]

(Edze nyuie le agbalẽa ŋutɔ me)

Medo-Persia Fiaɖuƒe

Yerusalem

Babilon

Memphis

Axmeta

Susa

Persepolis

MAKEDONIA

EGIPTE

ETIOPIA

INDIA

[Nɔnɔmetata si le axa 169]

Hela Fiaɖuƒe

MAKEDONIA

Babilon

EGIPTE

Indus Tɔsisi

[Map/Picture on page 172]

(Edze nyuie le agbalẽa ŋutɔ me)

Roma Fiaɖuƒe

BRITANIA

ITALY

Roma

Yerusalem

EGIPTE

[Nɔnɔmetata si xɔ axa 164]

[Nɔnɔmetata siwo le axa 174]

Anglo-Amerika Xexemefiaɖuƒea me ame ŋkuta aɖewo:

1. George Washington, United States dukplɔla gbãtɔ (1789-97)

2. Britain Fianyɔnu Victoria (1837-1901)

3. Woodrow Wilson, United States dukplɔla (1913-21)

4. David Lloyd George, Britain dumegãwo ƒe tatɔ (1916-22)

5. Winston Churchill, Britain dumegãwo ƒe tatɔ (1940-45, 1951-55)

6. Franklin D. Roosevelt, United States dukplɔla (1933-45)