Nubabla Yeyea Ate Ŋu Aɖe Vi Na Wò

 1. Dɔ eve ƒokpli kae Yeremiya wɔ?

DƆ EVE ƒokplie Yehowa de asi na Yeremiya. Eƒe dɔa ƒe akpa gbãtɔae nye be ‘wòalã nu eye wòagbã nu, wòatsrɔ̃ nu eye wòagblẽ nu.’ Akpa eveliae nye be ‘wòatu nu eye wòaƒã nu.’ Nyagblɔɖila la wɔ dɔ sia ƒe akpa gbãtɔ esime wòɖe ama Yudatɔ dadalawo ƒe nu vɔ̃ɖi wɔwɔwo hegblɔ Mawu ƒe ʋɔnudɔdrɔ̃ si ava woa kple Babilontɔwo siaa dzi ŋu nya na wo. Ke hã, Yeremiya gblɔ etsɔme nyui aɖe ŋu nyawo hã ɖi. Egblɔ ɖi be Mawu atu nu si wòɖo be yeatu, eye wòaƒã nu si wòɖo be yeaƒã. Le kpɔɖeŋu me, Yeremiya wɔ dɔa ƒe akpa evelia sia esime wògblɔ ale si Yudatɔwo agatrɔ agbɔ va wo denyigba dzi ŋu nya ɖi.—Yer. 1:10; 30:17, 18.

 2. Nu ka tae Yehowa he ʋɔnudɔdrɔ̃ va eƒe dukɔa dzi, eye afi kae wòhe to na wo se ɖo?

² Esi Yeremiya gblɔe ɖi be Yudatɔwo agatrɔ agbɔ va wo denyigba dzi la, ema mefia be Mawu awɔ vinugbee na wo alo agbe tohehe na wo ne ehiã o. Ao, ahe ʋɔnudɔdrɔ̃ ava Yudatɔ tosẽlawo dzi godoo. (Xlẽ Yeremiya 16:17, 18.) Le Yeremiya ƒe ŋkekea me la, ame ʋɛ aɖewo koe “wɔa nu dzɔdzɔe” alo “[biaa] nyateƒe ta sena,” eye Yehowa gbɔ dzi ɖi na nuteƒemawɔlawo ʋuu glo. Egblɔ be: “Nublanuikpɔkpɔ tim.” (Yer. 5:1; 15:6, 7) Yudatɔ mawo “[trɔ] ɖe wo fofo, siwo gbe be, yewomaɖo to” Yehowa ƒe nyawo o la “ƒe vodada tsãtɔwo ŋu.” Gawu la, dukɔa subɔ alakpamawuwo tsɔ do dziku na Yehowa. (Yer. 11:10; 34:18) Yehowa gbe nya na wo, eye wòhe to na wo “ɖe ɖoɖo la nu.” Esia wɔe be wo dometɔ aɖewo nyɔ le wo ɖokui me eye wogatrɔ va egbɔ.—Yer. 30:11; 46:28.

 3. Nu ka tae wòhiã be nàtsɔ ɖe le nyagblɔɖi si ku ɖe nubabla yeyea ŋu me?

³ Mawu na Yeremiya gblɔ nya ɖi tso nane si ƒe viɖewo akeke ta ahanɔ anyi ɖaa la ŋu, si nye nubabla yeyea. Susu geɖewo li si tae wòhiã be míadzro Yeremiya ƒe nyagblɔɖiawo ƒe akpa sia si naa mɔkpɔkpɔ ame la me ɖo. Nubabla siae axɔ ɖe esi Mawu bla kple Israel viwo le woƒe ʋuʋu tso Egipte vɔ megbe, si Mose nye domenɔla na, la teƒe. (Xlẽ Yeremiya 31:31, 32.) Yesu Kristo ƒo nu tso nubabla yeye sia ŋu esi wòɖo Aƒetɔ ƒe Fiẽnuɖuɖua anyi. Eya ta ele vevie be míatsɔ ɖe le eme. (Luka 22:20) Apostolo Paulo he susu yi nubabla sia dzi esi wònɔ agbalẽ ŋlɔm na Hebritɔwo. Eyɔ nya tso Yeremiya ƒe nyagblɔɖia me tsɔ te gbe ɖe nubabla yeyea ƒe vevienyenye dzi. (Heb. 8:7-9) Ke nu ka koŋ ye nye nubabla yeyea? Nu ka tae wòva hiã? Ame kawoe le nubabla sia me, eye aleke nàwɔ wòaɖe vi na wò? Na míakpɔe ɖa?

 4. Nu vevi kawo gbɔe Se ƒe nubablaa kpɔ?

⁴ Be míase nubabla yeyea gɔme la, ele be míase susu si tae woɖo Se ƒe nubablaa anyi ɖo gɔme gbã. Se ƒe nubablaa akpɔ nu vevi geɖe gbɔ na Mawu ƒe dukɔ si nɔ Dzidzimevi si dzi woato ayra ame geɖewo lalam. (1 Mose 22:17, 18) Esi Israel viwo xɔ Se ƒe nubablaa la, wova zu Mawu ‘tɔ koŋ.’ Le nubabla ma ƒe ɖoɖoa nu la, ame siwo tso Lewi toa me koe asubɔ abe dukɔa ƒe nunɔlawo ene. Esi Yehowa nɔ nu ma blam kple Israel dukɔa le Sinai Toa gbɔ la, egblɔ be yeana woanye “nunɔlawo ƒe fiaɖuƒe kple dukɔ kɔkɔe,” gake megblɔ nya aɖeke tso ɣeyiɣi si me wòawɔe kple mɔ si dzi to ge wòala awɔe ya ŋu o. (2 Mose 19:5-8) Hafi ɣemaɣi naɖo la, Se ƒe nubablaa ɖee fia be Israel viwo mate ŋu awɔ ɖe Sea me nyawo dzi bliboe o. Esia na wokpɔe be nuvɔ̃mewoe yewonye. Eya ta Sea bia tso Israel viwo si be woanɔ vɔ sam ɖe woƒe nu vɔ̃wo ta. Ke hã, edze ƒãa be vɔsa bubu hiã, vɔsa si de blibo, si woawɔ zi ɖeka ɖe ɣeyiɣiawo katã nu. Ɛ̃, ehiã vevie be ɖoɖo aɖe nanɔ anyi si dzi Mawu nanɔ te ɖo atsɔ nu vɔ̃wo anɔ kekem ɖaa.—Gal. 3:19-22.

 5. Nu ka tae Yehowa do nubabla yeyea ŋugbe?

⁵ Eya ta míate ŋu ase nu si tae esime Se ƒe nubablaa gakpɔtɔ nɔ dɔ wɔm kura gɔ̃ hã la, Mawu to Yeremiya dzi do nubabla yeyea ŋugbe ɖo la gɔme. Yehowa ƒe lɔlɔ̃ kple dɔmenyo ʋãe wòdi be yeawɔ ɖoɖo aɖe si aɖe vi na dukɔ geɖewo ɖaa. Eto Yeremiya dzi gblɔ tso ame siwo wòabla nu yeye sia kplii ŋu be: “Matsɔ woƒe vodadawo ake wo, eye nyemagaɖo ŋu woƒe nu vɔ̃wo azɔ o.” (Yer. 31:34) Togbɔ be Yeremiya ƒe ŋkekea me kee wòdo ŋugbe ma hã la, mɔkpɔkpɔ nyui aɖe le eme na ameƒomea katã. Le mɔ ka nu?

6, 7. (a) Aleke ame aɖewo sena le wo ɖokui me tso woƒe nuvɔ̃menyenye ŋu? (b) Nu ka tae nubabla yeyea me nyawo me dzodzro ade dzi ƒo na wò?

⁶ Mía dometɔ aɖeke mede blibo haɖe o, eye míaƒe blibomademadea ɖea fu na mí katã zi geɖe. Esia ƒe kpɔɖeŋue nye nya siwo nɔvi aɖe gblɔ esi wònɔ agbagba dzem be yeaɖu yeƒe gbɔdzɔgbɔdzɔ aɖe dzi. Egblɔ be: “Ɣesiaɣi si megawɔ nu vɔ̃ si ŋu mele agbagba dzem be maɖe asi le la, ɖeko metɔtɔna. Mesena le ɖokuinye me be manya wɔ be Mawu natsɔe akem o. Esesẽna nam be mado gbe ɖa. Gake medzea agbagba tenɛ kpɔ, eye medzea egɔme ale: ‘Yehowa, nyemanya ne àse nye gbedodoɖa sia o, gake . . .’” Nyateƒee, ame siwo wɔ nu vɔ̃ alo le agbagba dzem be yewoaɖu gbɔdzɔgbɔdzɔ aɖe dzi do kpoe la dometɔ geɖe sena le wo ɖokui me be “alilikpo” xe yewoƒe gbedodoɖa ŋkume be wòagaɖo Mawu gbɔ o. (Kony. 3:44) Ame aɖewo hã ɖoa ŋku nu gbegblẽ aɖe si wowɔ ƒe geɖee nye esia la dzi wòɖea fu na wo. Kristotɔ kpɔɖeŋu nyui ɖolawo gɔ̃ hã daa vo le nuƒoƒo me ɣeaɖewoɣi.—Yak. 3:5-10.

⁷ Mele be mía dometɔ aɖeke nasusui be yemate ŋu ada vo o. (1 Kor. 10:12) Apostolo Paulo kura gɔ̃ hã lɔ̃ ɖe edzi be yedaa vo. (Xlẽ Romatɔwo 7:21-25.) Esia tae wòle be míaɖo ŋku nubabla yeyea dzi ɖo. Mawu do ŋugbe be nu vevi aɖe si gbɔ nubabla sia akpɔe nye be yeanɔ te ɖe edzi atsɔ nu vɔ̃wo ake ahaŋlɔ wo be. Viɖe manyagblɔ kae nye esi! Nubabla yeyea ŋu nya gbɔgblɔ ɖi anya de dzi ƒo na Yeremiya ŋutɔ. Ele be wòade dzi ƒo na míawo hã esi míele nu geɖe srɔ̃m tso eŋu be míanya ale si míawɔ wòaɖe vi na mí.

8, 9. Nu ka gbegbee ɖoɖo si Yehowa wɔ be yeanɔ te ɖe edzi atsɔ nu vɔ̃wo ake la bia tso esi?

⁸ Zi ale si nèle nu geɖe srɔ̃m tso Yehowa ŋui la, zi nenemae nàva kpɔ ale si gbegbe wòvea ame nu hekpɔa nublanui na amegbetɔ madeblibowoe la dze sii ɖe edzi. (Ps. 103:13, 14) Esi Yeremiya nɔ nubabla yeyea ŋu nya gblɔm ɖi la, egblɔ be Yehowa ‘atsɔ woƒe vodadawo ake wo, eye magaɖo ŋku woƒe nu vɔ̃wo dzi azɔ o.’ (Yer. 31:34) Ðewohĩ Yeremiya bu mɔ si dzi Mawu ato awɔ esia ŋu ʋuu va se ɖe afi aɖe. Ke hã, Yeremiya anya godoo be esi Mawu ƒo nu tso nubabla yeye ŋu la, ke efia be ŋugbedodo alo ɖoɖo yeye aɖe anɔ woa kple amegbetɔwo dome. Ɛ̃, Yehowa ato nubabla ma dzi awɔ nu siwo eƒe gbɔgbɔ ʋã Yeremiya wòŋlɔ ɖi la dzi, si dome nu vɔ̃wo tsɔtsɔ ke hã le. Gake ƒe aɖewo megbe hafi Mawu va ɖe tameɖoɖo sia kple nu siwo Mesia la awɔ ŋu nya bubuwo ɖe go.

⁹ Ðewohĩ ènya dzila aɖewo siwo gblẽ wo viwo le esi woŋea aɖaba ƒu woƒe nu gbegblẽ wɔwɔ dzi ta. Ðe nàkpɔ mɔ be Yehowa hã nawɔ nu nenema? Gbeɖe! Esia dze ƒãa le ale si nubabla yeyea dze egɔmee me. Le esi teƒe be Mawu naŋe aɖaba ƒu nu vɔ̃wo dzi agblɔ ko be yete fli ɖe wo me la, edze agbagba boŋ wɔ ɖe eya ŋutɔ ƒe dzidzenu dzɔdzɔewo dzi esi wòtsɔ nane si dzi wòanɔ te ɖo atsɔ nu vɔ̃wo ake la na le se nu togbɔ be esia wɔwɔ bia nu gã aɖe tso esi hã. Àte ŋu ase ɖoɖo sia gɔme nyuie le nya siwo Paulo ŋlɔ esime wònɔ nu ƒom tso nubabla yeyea ŋu me. (Xlẽ Hebritɔwo 9:15, 22, 28.) Paulo ƒo nu tso “ɖeɖe . . . to tafe la dzi” ŋu, eye wògblɔ kpee be “ne womekɔ ʋu ɖi o la, tsɔtsɔke aɖeke menɔa anyi o.” Esia mefia be nyitsuwo alo gbɔ̃wo ƒe ʋue woatsɔ asa vɔe le nubabla yeyea me abe ale si wowɔe le Sea te ene o. Ao, Yesu ƒe ʋu dzie wotu nubabla yeyea ɖo. Yehowa anɔ te ɖe ame deblibo ƒe ʋu sia dzi ‘atsɔ vodada kple nu vɔ̃’ ake tegbee. (Dɔw. 2:38; 3:19) Gake ame kawoe anɔ nubabla yeye sia me, siwo ƒe nu vɔ̃wo woatsɔ ake? Menye Yuda dukɔa ye o. Yesu gblɔ be Mawu agbe Yuda dukɔ si tsɔ lãwo ƒe ʋu sa vɔe le Sea te la, eye wòatrɔ susu ɖe dukɔ bubu ŋu. (Mat. 21:43; Dɔw. 3:13-15) Dukɔ mae nye “Mawu ƒe Israel,” eye emenɔlawoe nye Kristotɔ siwo wotsɔ gbɔgbɔ kɔkɔe si ami na. Kpuie ko la, dzɔdzɔme Israel ye Mawu wɔ Se ƒe nubabla la kplii, gake gbɔgbɔme Israel ye wòwɔ nubabla yeyea, si Yesu nye Domenɔla na, ya kplii.—Gal. 6:16; Rom. 9:6.

10. (a) Ame kae nye David ƒe “atidzedze” la? (b) Mɔ kawo nue “atidzedze” sia ate ŋu aɖe vi na ameƒomea le?

¹⁰ Esi Yeremiya nɔ nu ƒom tso Mesia ŋu la, eyɔe be David ƒe “atidzedze.” (Yer. 33:15) Esia sɔ ŋutɔ. Womu David ƒe fiaƒomea ƒu anyi le ɣeyiɣi si me Yeremiya kpɔtɔ nɔ eƒe nyagblɔɖidɔa wɔm. Gake eƒe atitakpoa meku o. Ɣeyiɣi aɖe megbe la, wova dzi Yesu wònye Fia David ƒe dzidzimevi. Woyɔe be ‘Yehowae Nye Míaƒe Dzɔdzɔenyenye,’ si nye kpeɖodzi be Mawu tsɔ ɖe le dzɔdzɔenyenye me vevie. (Xlẽ Yeremiya 23:5, 6.) Yehowa ɖe mɔ eƒe Tenuvi la kpe fu le anyigba dzi heku. Yehowa ate ŋu anɔ te ɖe David ƒe “atidzedze” sia ƒe tafevɔsaa dzi atsɔ nu vɔ̃wo ake wòanye eƒe dzɔdzɔenyenye ɖeɖe fia. Ðoɖo sia na mɔnukpɔkpɔ ameƒomea me tɔ aɖewo wobu wo be wole “dzɔdzɔe hena agbekpɔkpɔ,” eye wotsɔ gbɔgbɔ kɔkɔe si ami na wo wova zu gomekpɔlawo le nubabla yeyea me. Abe ale si míava kpɔe emegbe ene la, nu bubu si me Mawu ƒe dzɔdzɔenyenye gadze lee nye be, togbɔ be ame aɖewo mele nubabla yeyea me o hã la, eɖe mɔ be wòaɖe vi na wo.—Rom. 5:18.

11. (a) Nu ka dzie woŋlɔ nubabla yeyea ƒe sea ɖo? (b) Nu ka tae ‘alẽ bubuawo’ kpɔa dzidzɔ ɖe nubabla yeyea ƒe sea ŋu?

¹¹ Àdi be yeaganya nu bubu siwo wɔe be nubabla yeyea le etɔxɛa? Vovototo gã ɖeka si le woa kple Mose ƒe Se ƒe nubablaa domee nye nu si dzi woŋlɔ wo dometɔ ɖe sia ɖe ɖo. (Xlẽ Yeremiya 31:33.) Kpe dzie woŋlɔ Se ƒe nubablaa ƒe Se Ewoawo ɖo, eye kpe sia va bu emegbe. Yeremiya gblɔ ɖi be amewo ƒe dzi mee woaŋlɔ nubabla yeyea ƒe sea ya ɖo, be wòanɔ anyi ɖaa. Kristotɔ amesiaminawo, ame siwo nye gomekpɔlawo le nubabla yeyea me la, kpɔa dzidzɔ ɖe se sia ŋu vevie. Ke ‘alẽ bubuawo,’ siwo mele nubabla yeyea me o, ke boŋ wole mɔ kpɔm na agbe mavɔ nɔnɔ le anyigba dzi ya ɖe? (Yoh. 10:16) Woawo hã wokpɔa dzidzɔ ɖe Mawu ƒe sea ŋu. Le mɔ aɖe nu la, wosɔ kple amedzrovi siwo nɔ Israel viwo dome le blema, siwo nɔ agbe ɖe Mose ƒe Sea nu wòɖe vi na wo.—3 Mose 24:22; 4 Mose 15:15.

12, 13. (a) Nu kae nye nubabla yeyea ƒe se la? (b) Nu ka tae womezia ame siwo nɔa agbe ɖe “Kristo la ƒe se la” nu dzi be woasubɔ Mawu o?

¹² Ne wobia wò be, ‘Nu kae nye se sia si woŋlɔna ɖe Kristotɔ amesiaminawo ƒe dzi me’ hã la, aleke nàɖo eŋui? Wogayɔa se sia be “Kristo la ƒe se.” Gbɔgbɔme Israel viwo, siwo le nubabla yeyea mee wotsɔ se sia na gbã. (Gal. 6:2; Rom. 2:28, 29) Míate ŋu atsɔ nya ɖeka ko aɖɔ “Kristo la ƒe se la.” Nya mae nye: lɔlɔ̃. (Mat. 22:36-39) Aleke wòdzɔnae be woŋlɔa se sia ɖe amesiaminawo ƒe dzi me? Mɔ vevitɔawoe nye Mawu ƒe Nyaa xexlẽ kple gbedodoɖa na Yehowa. Eya ta ele be tadedeagu vavãtɔ ƒe akpa eve siawo nazu numame na Kristotɔ vavãwo katã, wo dometɔ siwo mele nubabla yeyea me o gake wodi be wòaɖe vi na yewo hã le eme.

¹³ Wogayɔ “Kristo la ƒe se la” be “se deblibo si naa ablɔɖe,” kple “ablɔɖedukɔ ƒe se.” (Yak. 1:25; 2:12) Le Mose ƒe Sea gome la, ɖe wodzi ame geɖe ɖe Sea te. Gake womedzia ame aɖeke ɖe nubabla yeyea, alo Kristo la ƒe sea, ya te o. Womezia ame siwo nɔa agbe ɖe Kristo la ƒe sea nu dometɔ aɖeke dzi be wòasubɔ Mawu o. Ke boŋ wokpɔe be mɔnukpɔkpɔe wònye su yewo si be woaŋlɔ Mawu ƒe sea ɖe yewoƒe dzi me, eye wokpɔa dzidzɔ be nubabla yeye si ŋu nya Yeremiya gblɔ ɖi la ƒe viɖe siwo nɔa anyi ɖaa ate ŋu asu ameƒomea si egbea.

14. Ame kawoe nubabla yeyea aɖe vi na?

¹⁴ Ne ame aɖewo see be ame 144,000 koe le nubabla yeyea me la, wosusuna be ke ame mawo koe nubabla sia aɖe vi na. Ðewohĩ esi wònye amesiaminawo koe ɖua kpɔɖeŋunuawo le Kristo ƒe ku ƒe Ŋkuɖodzia ɖuɣi, eye wain la nye kpɔɖeŋu na ‘nubabla yeyea ƒe ʋu’ tae wosusuna nenema ɖo. (Mar. 14:24) Gake ɖo ŋku edzi be ame siwo le nubabla yeyea me akpe ɖe Yesu ŋu woanye Abraham ƒe “dzidzime” si dzi woato ayra dukɔwo katã. (Gal. 3:8, 9, 29; 1 Mose 12:3) Eya ta Yehowa ato nubabla yeyea dzi awɔ ɖe ŋugbe si wòdo be yeato Abraham ƒe “dzidzime” dzi ayra ameƒomea katã la dzi.

15. Dɔ kae wogblɔ ɖi be amesiaminawo awɔ?

¹⁵ Yesu Kristo, si nye Abraham ƒe dzidzimea ƒe akpa gbãtɔ, ye nye Nunɔlagã le nubabla yeyea ƒe ɖoɖoa me, eye eyae sa vɔ deblibo si dzi woanɔ te ɖo atsɔ nu vɔ̃wo kple vodadawo ake. (Xlẽ Hebritɔwo 2:17, 18.) Ke hã, Mawu ƒo nu tso “nunɔlawo ƒe fiaɖuƒe kple dukɔ kɔkɔe” aɖe ŋu ɣeyiɣi didi aɖe do ŋgɔ. (2 Mose 19:6) Le dzɔdzɔme Israel viwo gome la, nunɔlawo tsoa to ɖeka me, eye fiawo hã tsoa to bubu me. Ke afi kae Mawu akpɔ dukɔ si ŋugbe wòdo, be eƒe fiawo ke aganye nunɔlawo la atsoe? De dzesi nya si apostolo Petro gblɔ esi wòŋlɔ eƒe agbalẽ gbãtɔ na ame siwo ŋu wokɔ to gbɔgbɔ kɔkɔea dzi. (1 Pet. 1:1, 2) Egblɔ tso wo ŋu be wonye “nunɔla siwo nye fiawo, dukɔ kɔkɔe, ame siwo nye Mawu tɔ koŋ.” (1 Pet. 2:9) Esia fia be esi Kristotɔ amesiaminawo le nubabla yeyea me ta la, woasubɔ abe nunɔlawo ene le Kristo te. Bu viɖe si gbegbe esia anye na mí ŋu kpɔ. Míewɔa avu kple nu vɔ̃ si le ‘fia ɖum’ le mía me la ƒe ŋusẽkpɔɖeamedziwo gbe sia gbe. Nunɔlatevi siawo hã to nɔnɔme siawo ƒomevi me. (Rom. 5:21) Wonya ale si ame sena le eɖokui me ne ewɔ vodada alo kpɔe be yeɖi fɔ. Eya ta woa kple Kristo woase nu gɔme na mí esi míele agbagba dzem be míaɖu gbɔdzɔgbɔdzɔ siwo hea mí dea nu vɔ̃ me la dzi.

16. Dzideƒonya kae le Nyaɖeɖefia 7:9, 14 na “ameha gã” la?

¹⁶ Le Nyaɖeɖefia 7:9, 14 ƒe nya nu la, wokpɔ “ameha gã” aɖe wodo “awu ʋlaya ɣiwo,” si fia be tenɔnɔ nyui le wo si le Mawu ŋkume. Wole ameha gã sia si atso “xaxa gã” la nu ƒom ƒu fifia. Eya ta le mɔ aɖe nu la, tenɔnɔ dzɔdzɔe su ame siawo si le Mawu ŋkume xoxo. Wonye Yehowa xɔlɔ̃ siwo wobua dzɔdzɔenyenye na. (Rom. 4:2, 3; Yak. 2:23) Viɖe gã ka gbegbee nye esi! Ne ameha gã la me tɔe nènye la, ke kakaɖedzi nenɔ asiwò be Mawu le klalo be yeakpe ɖe ŋuwò esi nèle agbagba dzem be yeanɔ dzadzɛ le eŋkume.

17. Ne wobe Yehowa ‘megaɖoa ŋku’ nu vɔ̃ dzi o la, egɔme ɖe?

¹⁷ Nu kae Mawu awɔ tso ame siwo ŋu wòkpɔa ŋudzedze ɖo ƒe nu vɔ̃wo ŋu? Abe ale si míekpɔe va yi ene la, Yehowa gblɔ to Yeremiya dzi be: “Matsɔ woƒe vodadawo ake wo, eye nyemagaɖo ŋu woƒe nu vɔ̃wo azɔ o.” (Yer. 31:34) Mawu nɔa te ɖe Yesu ƒe vɔsaa dzi tsɔa amesiaminawo ƒe nu vɔ̃wo kea wo. Nenema kee Mawu ate ŋu anɔ te ɖe “nubabla ƒe ʋu” la dzi atsɔ ameha gã la me tɔwo hã ƒe nu vɔ̃wo ake wo. Esi Yeremiya gblɔ be Mawu ‘magaɖo ŋku’ woƒe nu vɔ̃wo dzi azɔ o la, mefia be womegavaa susu me nɛ o. Ke boŋ, nu si wòfiae nye be ne Yehowa nya he to si sɔ na nu vɔ̃ wɔla aɖe eye amea trɔ dzi me ale be wòtsɔ eƒe nu vɔ̃wo kee ko la, etsɔa amea ƒe nu vɔ̃wo ƒua gbe ɖe megbe. Wò ya de ŋugble tso nu vɔ̃ siwo gbegbe Fia David wɔ le nudzɔdzɔ siwo ku ɖe Bat-Seba kple Uriya ŋu me la ŋu kpɔ. Wohe to na David eye nu vɔ̃ siwo wòwɔ me tsonuwo va edzi. (2 Sam. 11:4, 15, 27; 12:9-14; Yes. 38:17) Gake Mawu meyi edzi he to nɛ agbadre o. (Xlẽ 2 Kronika 7:17, 18.) Abe ale si Yehowa gblɔe le nubabla yeyea me ene la, ne enya nɔ te ɖe Yesu ƒe vɔsaa dzi tsɔ nu vɔ̃wo ke ko la, megaɖoa ŋku wo dzi azɔ o.—Eze. 18:21, 22.

18, 19. Tsɔtsɔke ŋuti nufiame kae le nubabla yeyea me na mí?

¹⁸ Eya ta nubabla yeyea na míekpɔ mɔ lédziname si nu Yehowa wɔa nu ɖe amegbetɔ nuvɔ̃mewo ŋu le, metsɔ le eme be wonye amesiamina siwo le nubabla yeyea me loo alo ame siwo si anyigbadzinɔnɔ ƒe mɔkpɔkpɔ le o. Àte ŋu aka ɖe edzi be ne Yehowa nya tsɔ wò nu vɔ̃wo ke wò ko la, magahe nya xoxo mawo ɖe go emegbe o. Nufiame geɖe le ŋugbe si Mawu do ku ɖe nubabla yeyea ŋu me na mía dometɔ ɖe sia ɖe. Bia ɖokuiwò be, ‘Ne amewo dze agɔ le dzinye eye megblɔ be metsɔe ke wo la, ɖe medzea agbagba srɔ̃a Yehowa be magahe nya ma ɖe go ake emegbe oa?’ (Mat. 6:14, 15) Menye vodada viviviwo ŋu koe nya sia ku ɖo o. Eku ɖe nu vɔ̃ gãwo, abe ne Kristotɔ aɖe srɔ̃ wɔ ahasi ene, hã ŋu. Ne ame si srɔ̃ wɔ ahasi la lɔ̃ be yeatsɔe akee le esi wòtrɔ dzi me ta la, ɖe manyo be wòadze agbagba be ‘yemagaɖo ŋku’ nu vɔ̃ ma dzi azɔ oa? Nyateƒee, ate ŋu asesẽ be míatsɔ vodadawo aƒu gbe ɖe mía megbe, gake esiae nye mɔ ɖeka si dzi míate ŋu ato asrɔ̃ Yehowa.a

¹⁹ Míate ŋu awɔ nufiame si le nubabla yeyea me ŋu dɔ wòaku ɖe ame si woɖe le haa me gake wòtrɔ dzi me wogbugbɔe xɔ ŋu. Ke ne amea gblẽ nu dome na wò alo ƒo ɖi wò ŋkɔ le mɔ aɖe nu ya ɖe? Fifia, wogbugbɔe xɔ ɖe haa me. Nukpɔsusu kae wòle be Yeremiya 31:34 nakpe ɖe mía ŋu wòanɔ mía si ɖe nɔvi ma ŋu, eye aleke míawɔ nu ɖe eŋui? Ðe míatsɔ eƒe vodadawo akee ahaɖe asi le nya xoxoawo ŋua? (2 Kor. 2:6-8) Le nyateƒe me la, esiae wòle be ame siwo katã kpɔa ŋudzedze ɖe nubabla yeyea ŋu nadze agbagba awɔ gbe sia gbe.

20. Vovototo kae nèkpɔ le Yeremiya ŋɔlimetɔ geɖe kple ɖokuiwò dome?

²⁰ Le Yeremiya ŋɔli la, Yudatɔ geɖe gblɔna be: “Yehowa mele nyui alo vɔ̃ wɔ ge o.” (Zef. 1:12) Togbɔ be wodze si Yehowa eye wonya nu siwo dzɔa dzi nɛ kple nu siwo medzɔa dzi nɛ o hã la, wosusu be mahe to na yewo o; eye madi tso yewo si hã be yewoanɔ agbe ɖe dzidzenu aɖe koŋ nu o. Gake wò ya ènya be naneke mele ɣaɣla ɖe Mawu o. Èvɔ̃a Mawu eye èdi be yeaƒo asa na nu baɖa wɔwɔ. (Yer. 16:17) Azɔ hã, ènya be Vifofo dɔmenyotɔe Yehowa nye. Amewo ɖadea dzesi míaƒe nu nyui wɔwɔ loo alo womeɖadea dzesii o, Yehowa ya kpɔnɛ dzea sii.—2 Kron. 16:9.

21, 22. Nu ka tae magahiã be ame aɖeke nagblɔ na wò be: “Dze si Yehowa” o?

²¹ Nu bubu si gana nubabla yeyea ɖe dzesie nye nya si Mawu gblɔ tso eŋu be: “Matsɔ nye se la ade woƒe dɔ me, eye maŋlɔe ɖe woƒe dzi ŋu, manye Mawu na wo . . . Ame aɖeke magafia nu xɔlɔ̃via kple nɔvia agblɔ be: ‘Dze si Yehowa’ o, elabena wo katã woadze sim.” (Yer. 31:33, 34) Amesiamina siwo le anyigba dzi egbea ɖee fia be woŋlɔ Mawu ƒe sea ɖe yewoƒe dzi me vavã. Wolɔ̃ nyateƒenya siwo le Biblia me eye wogbe nu le amegbetɔwo ƒe nufiafiawo gbɔ. Azɔ hã, wotsɔa dzidzɔ kpena ɖe ameha gã la me tɔwo ŋu be Biblia me sidzedze nasu wo si. Esia wɔe be ame siawo siwo le mɔ kpɔm be yewoanɔ agbe le anyigba dzi la hã va dze si Yehowa helɔ̃e. Wolɔ̃na faa bɔbɔa wo ɖokui ɖe eƒe mɔfiafia te, eye wokana ɖe eƒe ŋugbedodowo dzi. Ðikeke mele eme o be nɔnɔme siawoe le wò hã asiwò. Ènya Yehowa nyuie eye mia kplii dome le kplikplikpli. Yayra ka gbegbee nye esi!

²² Nu kawoe nèwɔ tsɔ do ŋusẽ mia kple Yehowa dome ƒomedodoa? Ànya ɖo ŋku nɔnɔme siwo me nèse le ɖokuiwò me be Yehowa ɖo wò gbedodoɖawo ŋu na wò dzi. Nuteƒekpɔkpɔ mawo wɔe be nègakpɔa ŋudzedze ɖe Yehowa ŋu wu tsã. Ðewohĩ èse le ɖokuiwò me kpɔ hã be ekpe ɖe ŋuwò nèɖo ŋku mawunyakpukpui aɖe si do ŋusẽ wò nènɔ te ɖe kuxi sesẽ aɖe nu la dzi. Mègaŋlɔ nuteƒekpɔkpɔ mawo be gbeɖe o. Ne èyi edzi srɔ̃ eƒe Nyaa la, wò sidzedze eyama anɔ dzidzim ɖe edzi eye wòaɖe vi na wò ɖaa.

23. Aleke sidzedze Yehowa akpe ɖe ŋuwò nàƒo asa na fɔbubu ɖokuiwò madzemadzee?

²³ Gake nubabla yeyea ƒe yayra bubu gali si ate ŋu aɖe vi na mí fifia. Esi míenya be Yehowa toa nubabla yeyea dzi tsɔa nu vɔ̃ kena ta la, ne míenya trɔ dzi me ko la, mele be míaɖe mɔ míaƒe dzitsinya nayi edzi anɔ fu wɔm mí o. Le kpɔɖeŋu me, ame siwo ɖe fu kpɔ hafi va srɔ̃ nu tso Mawu ƒe nudidiwo ŋu te ŋu bua fɔ wo ɖokui henɔa veve sem le esi woɖe amegbetɔ ƒe agbe ɖa ta. Ame aɖewo hã sena le wo ɖokui me alea le esi wowu ame le aʋawɔwɔ me ta. Gake nya lae nye be, Mawu nɔa te ɖe Yesu ƒe tafevɔsaa, si dzi wotu nubabla yeyea ɖo la dzi tsɔa ame siwo trɔ dzi me vavã ƒe nu vɔ̃wo kea wo. Ne ele alea ɖe, ɖe manyo be míaka ɖe edzi be ne Yehowa nya tsɔ míaƒe nu vɔ̃wo ke mí ko la, eŋlɔa wo be oa? Mele be míanɔ ŋku ɖom nu vɔ̃ siwo Yehowa lɔ̃ faa tsɔ ke mí la dzi wòanɔ fu ɖem na mí o.

24. Aleke Yeremiya 31:20 me nyawo ate ŋu ade dzi ƒo na wòe?

²⁴ Mawu ƒe tsɔtsɔke ŋuti kpeɖodzi ɖedzesi aɖe dze le Yeremiya 31:20. (Xlẽe.) Ƒe gbogbo aɖewo do ŋgɔ na Yeremiya ŋɔli la, Yehowa he to na Israel to ewo fiaɖuƒe si le dziehe gome la le woƒe trɔ̃subɔsubɔ ta. (Wogayɔa fiaɖuƒe sia be Efrayim, elabena Efrayim toae ɖe dzesi wu le to ewoawo dome.) Woɖe aboyo wo ɣemaɣi. Gake Mawu gakpɔtɔ lɔ̃ wo hetsɔ ɖe le eme na wo vevie. Ebu wo be wonye ye ‘vi si gbɔ yemelɔ̃a nu le o.’ Ne eɖo ŋku wo dzi la, ɖeko eƒe ‘dɔkaviwo dzea agbo,’ si fia be woƒe nu wɔa nublanui nɛ. Nya siawo siwo do ƒome kple nubabla yeyea la ɖe ale si gbegbe Yehowa sea veve ɖe ame siwo trɔ dzi me hedzudzɔ nu gbegblẽ wɔwɔ nui la fia.

25. Nu ka tae wòle be nàda akpe na Yehowa ɖe nubabla yeyea ta?

²⁵ Ŋugbe si Yehowa do be yeato nubabla yeyea dzi atsɔ nu vɔ̃wo ake la ava eme bliboe le Kristo ƒe Ƒe Akpe Ðeka Dziɖuɖua ƒe nuwuwu. Va se ɖe ɣemaɣi la, Yesu Kristo kple nunɔlatevi 144,000 la akpe ɖe amegbetɔ nuteƒewɔlawo ŋu woaɖo blibodede gbɔ keŋkeŋ. Le dodokpɔ mamlɛa megbe la, mɔnukpɔkpɔ asu amegbetɔwo si mlɔeba be woazu Yehowa ƒe xexea me katã ƒe ƒome, si me mawudɔlawo hã le, la me tɔwo. (Xlẽ Romatɔwo 8:19-22.) Ƒe alafawoe nye esia si mí katã míele ŋeŋem le nu vɔ̃ ƒe kluvinyenye te. Gake Yehowa aɖe amegbetɔwo tso nu vɔ̃ kple ku si me ayi ɖe “Mawu ƒe viwo ƒe ablɔɖe si me ŋutikɔkɔe le la” me. Eya ta ka ɖe edzi bliboe be nubabla yeyea ƒe ɖoɖo si Mawu wɔ lɔlɔ̃tɔe la aɖe vi geɖe na wò. Yayra geɖe ate ŋu asu asiwò fifia kple etsɔme siaa to David ƒe “atidzedze” la dzi, bene nàkpɔ dzidzɔ le “nu dzɔdzɔe, si le eteƒe [la wɔwɔ me] le anyigba dzi.”—Yer. 33:15.