Ta 18

Anyigbaʋuʋuwo le Aƒetɔ ƒe Ŋkeke la Dzi

 1, 2. (a) Ne anyigbaʋuʋu gã aɖe dzɔ nekpɔ eteƒe la, aleke wònɔna? (b) Nuka ŋutie Yohanes ƒo nu le esime woɖe nutrenu adelia ɖa?

ÐE ANYIGBA ʋuʋu sesĩe nekpɔ kpɔa? Menye nuteƒekpɔkpɔ si doa dzidzɔ na ame o. Anyigbaʋuʋu gã adze egɔme kple bublu dziŋɔ kpakple gbeɖeɖe abe nanee le mimlim ene. Anyigba ƒe ʋuʋu anɔ sesẽm ɖe edzi le vo me ahanɔ tɔtɔm kpoyi esime nele du dzi yina teƒe si le dedie—ɖewohĩ le kplɔ̃ aɖe te. Alo adze egɔme sesĩe kpoyi le vo me eye agbawo, xɔmenuwo kple xɔwo kura gɔ̃ hã adze gbagbã gɔme. Nusiwo agblẽ la asɔ gbɔ ŋutɔ, eye anyigbaʋuʋu sue siwo aʋuʋu edziedzi ɖe eyome la agagblẽ nu ɖe edzi ahadzi nɔnɔme wɔnublanuia ɖe edzi.

² Esi esia le susu me na wò la, de ŋugble tso nusi Yohanes yi edzi gblɔ be yekpɔ le nutrenu adelia ɖeɖe ɖa me la ŋu: “Eye esime wòɖe nutrenu adelia ɖa la, mekpɔ, eye anyigbaʋuʋu gã aɖe va dzɔ.” (Nyaɖeɖefia 6:12a) Ele be esia nanye ɣeyiɣi si me ke woɖe nutrenu bubuawo ɖa la. Ɣekaɣi tututue anyigbaʋuʋu sia adzɔ le Aƒetɔ ƒe ŋkekea me, eye anyigbaʋuʋu ka ƒomevie wònye?—Nyaɖeɖefia 1:10.

 3. (a) Nukawoe Yesu gblɔ ɖi be woadzɔ esime wònɔ eƒe anyinɔnɔ ƒe dzesi la ŋuti nya gblɔm ɖi? (b) Aleke anyigbaʋuʋu ŋutɔŋutɔwo do ƒome kple Nyaɖeɖefia 6:12 me kpɔɖeŋu ƒe anyigbaʋuʋu gã lae?

³ Woƒo nu tso anyigbaʋuʋu ŋutɔŋutɔwo kple esiwo nye kpɔɖeŋu la ŋu zi geɖe le Biblia me. Le Yesu ƒe nyagblɔɖi gã si ku ɖe eƒe anyinɔnɔ le Fiaɖuƒe ŋusẽ me ŋuti la me la, egblɔe ɖi be “anyigbaʋuʋu ava teƒeteƒewo.” Esiawo anye “fuɖuame ƒe gɔmedzedze” ƒe akpa aɖe. Tso ƒe 1914 me la, anyigbaʋuʋu ŋutɔŋutɔwo dzi míaƒe ɣeyiɣia ƒe xaxawo ɖe edzi ŋutɔ esime amesiwo le anyigba dzi la va sɔ gbɔ ɖe edzi zu ame miliɔn akpe geɖe. (Mateo 24:3, 7, 8) Gake togbɔ be anyigbaʋuʋu mawo na Biblia ƒe nyagblɔɖi va eme hã la, dzɔgbevɔ̃e siwo dzɔna míenya koe wonye. Wodo ŋgɔ na kpɔɖeŋu ƒe anyigbaʋuʋu gã si ŋu Nyaɖeɖefia 6:12 ƒo nu le la. Le nyateƒe me la, esia ava abe nusiwo aʋuʋu Satana ƒe amegbetɔwo ƒe anyigba dzi nuɖoanyia ƒe gɔmeɖoanyiwo vie atsiã ɖe nu la ƒe mamlea si agblẽ nu eteƒe makɔ o ene.a

Amegbetɔwo ƒe Ʋuʋu Suewo

 4. (a) Tso ɣekaɣie Yehowa ƒe amewo nɔ mɔ kpɔm be nudzɔdzɔ siwo nye dzɔgbevɔ̃e adze egɔme le ƒe 1914 me? (b) Azã kae awu nu le ƒe 1914 me?

⁴ Tso ƒe 1870 ƒe ƒeawo titina la, Yehowa ƒe amewo nɔ mɔ kpɔm be nusiwo nye dzɔgbevɔ̃e adze egɔme le ƒe 1914 me eye woanye Trɔ̃subɔlawo ƒe Azã la ƒe nuwuwu ƒe dzesi. Esiae nye “azã adre” (ƒe 2,520) ƒe ɣeyiɣi si dze egɔme tso Dawid ƒe fiaɖuƒe si nɔ Yerusalem la mumu ƒu anyi le ƒe 607 D.M.Ŋ. me dzi vaseɖe Yesu ɖoɖo fiae le dziƒo Yerusalem le ƒe 1914 M.Ŋ. me dzi.—Daniel 4:24, 25; Luka 21:24.b

 5. (a) Gbe ƒã kae Habɔbɔa ƒe zimenɔla gbãtɔ ɖe le ƒe 1914 ƒe October 2 dzi? (b) Dunyahehe ƒe tɔtrɔ gã kawoe va tso ƒe 1914 me?

⁵ Eyata esi C. T. Russell si nye Gbetakpɔxɔ Habɔbɔa ƒe zimenɔla gbãtɔ la va gome kpɔ ge le ŋdi me subɔsubɔ me kple Brooklyn si le New York ƒe Betel-ƒomea le October 2, 1914 ƒe ŋdi me la, eɖe gbe ƒã si wɔ nuku, be: “Trɔ̃subɔlawo ƒe Ɣeyiɣi la wu nu; woƒe fiawo ƒe ɣeyiɣia vɔ.” Le nyateƒe me la, xexeame katã ƒe tɔtrɔ gã si dze egɔme le ƒe 1914 me la lɔ nu geɖe ɖe eme ale gbegbe be fiaɖuƒe geɖe siwo nɔ anyi ɣeyiɣi didi la bu vĩ. Russia-fiaɖuƒea mumu ƒu anyi le ƒe 1917 ƒe Bolshevik-tɔtrɔ kpata la me lae he hoʋiʋli si le Marx ƒe dziɖuɖu ƒomevia kple dziɖuɖu siwo ɖea mɔ be ame natsa asi na eɖokui dome la vɛ. Dunyahehe ƒe tɔtrɔ siwo le nu ʋuʋum la kpɔtɔ le fu ɖem na amegbetɔwo le anyigba katã dzi. Egbea dziɖuɖu geɖewo mete ŋu nɔa anyi wu ƒe ɖeka alo eve o. Nusi nye dunyahehe me kemalimalia ƒe kpɔɖeŋu la dze le Italia gome, afisi woɖo dziɖuɖu yeye 47 le le Xexemeʋa II megbe ƒe 42 pɛ me. Gake ɖeko nuwo ƒe ʋuʋu do ŋgɔ sue mawo nye nusiwo do ŋgɔ na dziɖuɖu ƒe tɔtrɔ mamlea dzro ko. Nukae anye emetsonu? Mawu ƒe Fiaɖuƒea ɖeka hɔ̃ aɖu anyigba la dzi.—Yesaya 9:5, 6.

 6. (a) Aleke H. G. Wells ƒo nu tso azã vevi yeye la ŋue? (b) Nukae xexemenunyala aɖe kple dunyahemegã aɖe ŋlɔ le azã si dze egɔme le ƒe 1914 me la ŋu?

⁶ Ŋutinyaŋlɔlawo, xexemenunyalawo kple dunyahehe ƒe ŋgɔnɔlawo fia asi ƒe 1914 be enye azã vevi yeye aɖe ƒe gɔmedzedze. Le azã ma ƒe gɔmedzedze megbe ƒe 17 la, ŋutinyaŋlɔla H. G. Wells gblɔ be: “Adzɔ dzi na nyagblɔɖila be yeagblɔ nya viviwo ɖi. Gake eƒe dɔe nye be wòagblɔ nusi wòkpɔ. Ekpɔ xexeme si dzi asrafowo, dulɔ̃lawo, gaƒogasitsalawo kple amesiwo dra le ganyawo gome kpɔtɔ kpɔ ŋusẽ ɖo vevie; xexeme si ge ɖe nazãbubu kple fuléle me, eye wòle ame ŋutɔ ƒe ablɔɖe siwo susɔ la xɔm le esi kabakaba hele vodada wɔm ɖo ta ameƒomeviwo ƒe hoʋiʋli dzikutɔe gbɔ eye wòle dzadzram ɖo ɖe aʋawɔwɔ yeyewo ŋu.” Le ƒe 1953 me la, xexemenunyala Bertrand Russell ŋlɔe bena: “Tso ƒe 1914 me la, nusi dze abe zɔzɔ si woɖo ɖi xoxo do ŋgɔ ɖo ta dzɔgbevɔ̃e si vɔ̃ɖi wu gbɔ ene la le fu ɖem na amesiame si ƒe susu le alesi nuwo le dzɔdzɔm le xexeame ŋu la ŋutɔ. . . . Wole amegbetɔƒomea kpɔm be ele abe Helatɔwo ƒe dzɔgbevɔ̃e ƒe glitoto me ame xɔŋkɔ si mawu siwo do dziku le asi tutum ʋume na eye megakpɔ ŋusẽ ɖe nusi adzɔ ɖe edzi dzi o la ene.” Le ƒe 1980 me la, esi dunyahemegã Harold Macmillan nɔ ŋku ɖom míaƒe ƒe alafa 20 lia sia ƒe gɔmedzedze si me ŋutifafa nɔ dzi la, egblɔ be: “Nusianu nɔ nyonyom ɖe edzi. Nenemae xexe si me wodzim ɖo la nɔ. . . . Gbeɖeka ŋdi le ƒe 1914 me la, nu blibo la katã va nuwuwu le vo me kpoyi.”

 7-9. (a) Tɔtrɔ gã kawoe ʋuʋu amegbetɔƒomea tso ƒe 1914 me? (b) Aleke Yesu ƒe nyagblɔɖi si le Luka ta 21 la ɖɔ tɔtrɔ gã siwo ava le amegbetɔwo dome kple dɔ siwo woawɔ lae?

⁷ Xexemeʋa II he tɔtrɔ gã bubuwo vɛ. Eye aʋawɔwɔ sue bubuwo yi edzi le anyigba la ʋuʋum esi míele ƒe alafa sia ƒe nuwuwu gogom. Gake ɖe fifi nuɖoanyia anɔ anyi vaseɖe ɣemaɣia? Nuklia ƒe tsɔtsrɔ̃ ƒe ŋɔdzidonamea na ame geɖe le nya sia biam. Enye dzidzɔnya be ŋuɖoɖoa mele amegbetɔ si me o, ke boŋ eƒe Wɔla si mee wòle.—Yeremya 17:5.

⁸ Gake hekpe ɖe aʋawɔwɔwo ŋu la, nu bubuwo hã ʋuʋu amegbetɔwo vevie ŋutɔ tso ƒe 1914 me. Tɔtrɔ gã siwo he agbenɔnɔ ƒe tɔtɔ vɛ wu la dometɔ ɖekae nye esi U.S. Amerika ƒe agbaɖuɖu le October 29, 1929 me he vɛ la. Esia he Ganyawo ƒe Sesẽ Gã si lɔ dukɔ siwo katã me amewo tsaa asi na wo ɖokui le ɖe eme la vɛ. Ganyawo ƒe sesẽ ma ɖo eƒe sesẽaƒe le ƒe 1932 kple 1934 dome, gake míekpɔtɔ le dɔ si wòwɔ la ŋkɔ sem. Tso ƒe 1929 me la, wotsɔ ɖoɖo siwo nɔa anyi ɣeyiɣi kpui aɖe tre xexeme si le dɔ lém le ganyawo gome la. Dziɖuɖuwo ƒoa wo ɖokui ɖe gadodo zazã me. Ami ƒe kuxi sesẽ si do mo ɖa le ƒe 1973 me kple ganyawo ƒe toyiyi le ƒe 1987 me la dzi ga ƒe fiaɖuƒea ƒe ʋuʋu la ɖe edzi. Le ɣeyiɣi ma ke me la, ame miliɔn geɖewo le nu ƒlem agbanae. Ga gome amebamɔnuwo, ayemɔwo kple hodada kpakple akɔdada ƒe ameflumɔnu bubu siwo dometɔ geɖe dziɖuɖu siwo wòle be woakpɔ amewo ta boŋ la ɖona anyi la le nu gblẽm le ame gbogbo manyaxlẽ aɖe ŋu. Kristodukɔa ƒe television dzi mawunyagblɔlawo gɔ̃ hã doa asi ɖa be woaxɔ wo tɔ gome si nye dɔlar miliɔn geɖe!—Tsɔe sɔ kple Yeremya 5:26-31.

⁹ Do ŋgɔ la, ganyawo ƒe kuxiwo ʋu mɔ na Mussolini kple Hitler be woxɔ dziɖuŋusẽ. Enumake Babilon Gã la wɔ nu be yeadze wo ŋu, eye Vatikan wɔ nubabla kple Italia le ƒe 1929 me eye wòwɔe kple Germania le ƒe 1933 me. (Nyaɖeɖefia 17:5) Ðikeke mele eme o be nu vɔ̃ɖi wɔwɔ ƒe ɣeyiɣi si kplɔ esiawo ɖo la nye Yesu ƒe nyagblɔɖi be “vɔvɔ̃ laɖo dukɔwo, eye woawɔ dzodzodzoe . . . eye amewo ƒe gbɔgbɔ nu latsi le vɔvɔ̃ kple mɔkpɔkpɔ na nusiwo le anyigba blibo la katã dzi vam la ŋuti” la anɔ yeƒe anyinɔnɔ ƒe dzesia me la ƒe emevava ƒe akpa aɖe. (Luka 21:7-9, 25-31)c Ẽ, nusiwo dze amegbetɔƒomea ʋuʋu gɔme le ƒe 1914 me la le edzi yim, eye nu sẽŋu bubuwo le amewo ʋuʋum ɖe wo yome.

Yehowa Ʋuʋu Nuwo

10. (a) Nukatae nu geɖe le ʋuʋum le amegbetɔ ƒe nyawo me alea? (b) Nuka wɔm Yehowa le, hetsɔ le dzadzram ɖo na nuka?

¹⁰ Nusiwo ʋuʋu le amegbetɔwo ƒe ŋutinya me nenema la tso ŋutete si mele amegbetɔ si be wòafia mɔ eɖokui o la gbɔ. (Yeremya 10:23) Gawu la, Satana, Da xoxo ma si “nye xexeame katã blela la” le fukpekpewo hem vɛ le eƒe agbagbadzedze mamlea be yeatrɔ ameƒomea katã tso Yehowa ƒe tadedeagu gbɔ la me. Egbegbe mɔ̃ɖaŋuwɔwɔ na anyigba la zu kɔ ɖeka si me dumevinyenye kple ameƒomevinyenye ƒe fulélewo le amegbetɔƒomea ƒe gɔmeɖoanyi ke ʋuʋum le, eye yeaɖi Dukɔ Ƒoƒuawo mete ŋu le egbɔkpɔnu nyuitɔ aɖeke kpɔm o. Amegbetɔ le amegbetɔ dzi ɖum wòle nu gblẽm le eŋu wu ɣeyiɣi bubu ɖesiaɖe. (Nyaɖeɖefia 12:9, 12; Nyagblɔla 8:9) Gake la Aƒetɔ Fiagã Yehowa, dziƒo kple anyigba Wɔla la nɔ nuwo ʋuʋum le ƒe 70 siwo va yi me hetsɔ nɔ dzadzram ɖo hena anyigba ƒe kuxiwo gbɔ kpɔkpɔ zi ɖeka ɖe ɣeyiɣiwo katã nu. Alekee?

11. (a) Nuwo ʋuʋu ka ŋutie woƒo nu le le Xagai 2:6, 7? (b) Aleke Xagai ƒe nyagblɔɖia le eme vamee?

¹¹ Míexlẽ le Xagai 2:6, 7 bena: “Elabena ale Yehowa Zebaot gblɔ esi: Esusɔ vie ko maʋuʋu dziƒo kple anyigba, atsiaƒu kple ƒuƒuiƒe; maʋuʋu dukɔwo katã, eye woahe dukɔwo katã ƒe nu vevitɔ vɛ, eye matsɔ ŋutikɔkɔe ayɔ xɔ sia taŋ, Yehowa Zebaot ye gblɔe.” Vevietɔ tso ƒe 1919 me la, Yehowa na eƒe ɖasefowo ɖe gbe ƒã eƒe ʋɔnudɔdrɔ̃wo le amegbetɔwo ƒe habɔbɔwo ƒe akpawo katã me le anyigba dzi. Xexeame katã ƒe nuxlɔ̃me sia ʋãnya Satana ƒe xexemenuɖoanyia heʋuʋui.d Esi nuxɔxlɔ̃a le dzidzim ɖe edzi la, eʋã amegbetɔ Mawu-vɔ̃la siwo nye ‘nu vevitɔwo’ be woaɖe wo ɖokui ɖe vovo tso dukɔwo gbɔ. Menye alesi Satana ƒe habɔbɔa le ʋuʋumee lae ʋuʋu wo o. Ke boŋ ne wokpɔ nɔnɔmea dze sii la, woa ŋutɔwo wotsoa nya me na wo ɖokui be yewoakpɔ gome kple amesiaminawo ƒe Yohanes habɔbɔa le ŋutikɔkɔe tsɔtsɔ ayɔ Yehowa ƒe tadeaguƒea taŋ la me. Aleke wowɔa esiae? To Mawu ƒe Fiaɖuƒe si woɖo anyi la ŋuti nya nyui la ƒe gbeƒãɖeɖedɔa wɔwɔ veviedodotɔe dzi. (Mateo 24:14) Fiaɖuƒe sia si me Yesu kple eyomedzela amesiaminawo le la ayi edzi anɔ te abe “fiaɖuƒe, si meʋuʋuna o” ene wòanye ŋutikɔkɔe na Yehowa.—Hebritɔwo 12:26-29.

12. Ne èdze egɔme le wɔwɔm ɖe gbeƒãɖeɖe si ŋuti nya wogblɔ ɖi le Mateo 24:14 la dzi la, nukae wòle be nawɔ hafi Nyaɖeɖefia 6:12 ƒe anyigbaʋuʋu gã la nadzɔ?

¹² Amesi dze egɔme le wɔwɔm ɖe gbeƒãɖeɖe ma dzie nenyea? Ðe wòanye be èle ame miliɔn geɖe siwo yi Yesu ƒe ku ƒe Ŋkuɖodzia ɖuƒe le ƒe siwo va yi nyitsɔ laa me la domea? Nenye nenemae la, ekema yi ŋgɔ le Biblia me nyateƒea sɔsrɔ̃ me. (Timoteo II, 2:15; 3:16, 17) Ðe asi le Satana ƒe anyigba dzi habɔbɔ si le tsɔtsrɔ̃ ge la ƒe agbenɔnɔ gbegblẽa ŋu keŋkeŋ! Ge ɖe Kristotɔwo ƒe xexeme yeye habɔbɔa me eye nakpɔ gome blibo le eƒe dɔwɔnawo me hafi dzɔgbevɔ̃e ƒe “anyigbaʋuʋu” mamlea nagbã Satana ƒe xexeame katã gudugudu. Gake nukae nye anyigbaʋuʋu gã ma? Mina míakpɔe ɖa azɔ.

Anyigbaʋuʋu Gã La!

13. Aleke anyigbaʋuʋu gã la nye esi teƒe amegbetɔ mekpɔ kpɔ o?

¹³ Ẽ, ŋkeke mamle sesẽ siawo nye ɣeyiɣi si me anyigba ʋuʋu—ŋutɔŋutɔ kple le kpɔɖeŋumɔwo nu. (Timoteo II, 3:1) Gake anyigbaʋuʋu siawo dometɔ aɖeke menye anyigbaʋuʋu gã mamlea si Yohanes kpɔ esime woɖe nutrenu adelia ɖa la o. Anyigbaʋuʋu suesue siwo ado ŋgɔ ƒe ɣeyiɣia wu nu. Azɔ anyigbaʋuʋu gã aɖe si tɔgbe teƒe amegbetɔ mekpɔ kpɔ o la adzɔ. Enye anyigbaʋuʋu si nu sẽ ale gbegbe be womate ŋu atsɔ Richter ƒe dzidzenua alo dzidzenu bubu aɖeke si amegbetɔ wɔ la adzidze eƒe ʋuʋu kple ŋusẽe o. Esia menye nuto aɖe ƒe ʋuʋu dzro ko o, ke boŋ enye tsɔtsrɔ̃ ƒe anyigbaʋuʋu si atsrɔ̃ “anyigba” bliboa, si nye amegbetɔ gblẽkuwo katã.

14. (a) Nyagblɔɖi kae gblɔ anyigbaʋuʋu gã aɖe kple emetsonuwo ɖi? (b) Nuka ŋutie Yoel ƒe nyagblɔɖia kple Nyaɖeɖefia 6:12, 13 le nu ƒom le?

¹⁴ Yehowa ƒe nyagblɔɖila bubuwo gblɔ anyigbaʋuʋu ma kple emetsonu siwo nye dzɔgbevɔ̃e la ŋuti nya ɖi. Le kpɔɖeŋu me, le ƒe 820 D.M.Ŋ. lɔƒo la, Yoel ƒo nu tso “Yehowa ƒe ŋkeke gã dziŋɔ la” ƒe vava ŋu hegblɔ be ɣemaɣi la “ɣe ado viviti, eye ɣleti azu ʋu.” Egblɔ nya siawo kpe ɖe eŋu emegbe be: “Amehawo kplɔ amehawo ɖo gbɔna nyametsobali la me; elabena Yehowa ƒe ŋkeke la tu aƒe le nyametsobali me la. Ɣe kple ɣleti ado viviti, eye ɣletiviwo ƒe keklẽ nu atsi. Yehowa le gbe ɖem tso Zion, eye wòna wose eƒe gbe tso Yerusalem, ale be dziƒo kple anyigba ʋuʋu. Ke Yehowa enye sitsoƒe na eƒe dukɔ kple mɔ̃ sesẽ na Israel-viwo.” (Yoel 3:4; 4:14-16) Yehowa ƒe ʋɔnudɔdrɔ̃ hehe vɛ le xaxa gã la me ŋu koe nuwo ʋuʋu alea ate ŋu aku ɖo. (Mateo 24:21) Eyata gɔmesese le eŋu be nya ma tɔgbe si le Nyaɖeɖefia 6:12, 13 me la aku ɖe nu ma ke ŋu.—Kpɔ Yeremya 10:10; Zefanya 1:14, 15 hã.

15. Nuwo ʋuʋu vevie ka ŋuti nyae nyagblɔɖila Xabakuk gblɔ ɖi?

¹⁵ Anɔ abe ƒe 200 ene le Yoel megbe la, nyagblɔɖila Xabakuk gblɔ na eƒe Mawu le gbedodoɖa me be: “Yehowa, esi mese nya le ŋuwò la, vɔvɔ̃ ɖom! Yehowa, gbɔ agbe wò dɔwɔwɔ le ƒewo ƒe domedomee, ɖee fia le ƒewo ƒe domedomee; ɖo ŋku nublanuikpɔkpɔ dzi le dɔmedzoedodo me!” Nukae “dɔmedzoedodo” ma nye? Xabakuk yi edzi ƒo nu tso xaxa gã la ŋu eme kɔ ƒã esime wògblɔ le Yehowa ŋu be: “Etɔ, eye anyigba ʋuʋu; eɖo ŋku anyi kpɔ nu, eye dzidzi ƒo dukɔwo. . . . Èto anyigba dzi le dziku me, eye nèfanya dukɔwo le dɔmedzoe me. Ke nyea matso aseye, eye makpɔ dzidzɔ ɖe Mawu, nye xɔnametɔ la ŋu.” (Xabakuk 3:1, 2, 6, 12, 18) Aleke Yehowa ana anyigba katã naʋuʋu vevie enye si ne efanya dukɔwo!

16. (a) Nukae nyagblɔɖila Xezekiel gblɔ be adzɔ ne Satana ho ɖe Mawu ƒe amewo ŋu zi mamletɔ? (b) Nukae ado tso Nyaɖeɖefia 6:12 ƒe anyigbaʋuʋu gã la me?

¹⁶ Xezekiel hã gblɔe ɖi be ne Gog si tso Magog (Satana si woɖi gbɔe la) ho ɖe Mawu ƒe amewo ŋu zi mamletɔ la, Yehowa ana “anyigbaʋuʋu gã aɖe” nadzɔ “le Israel-nyigba dzi.” (Xezekiel 38:18, 19) Togbɔ be ate ŋu alɔ anyigbaʋuʋu ŋutɔŋutɔwo ɖe eme hã la, ele be míaɖo ŋku edzi be woɖe Nyaɖeɖefia la fia le dzesiwo me. Nyagblɔɖi sia kple nyagblɔɖi bubu siwo míeyɔ la nye kpɔɖeŋuwo vevie ŋutɔ. Eyata edze abe anyigba dzi nuɖoanyi sia ƒe ʋuʋuawo katã ƒe taƒoƒo—si nye anyigbaʋuʋu gã si me woatsrɔ̃ amegbetɔ siwo katã tsi tre ɖe Yehowa Mawu ƒe fianyenye ŋu le la —ɖem nutrenu adelia ɖeɖe ɖa le le fiafiam ene.

Blukɔdoɣi

17. Aleke anyigbaʋuʋu gã la lɔ ɣe, ɣleti kple ɣletiviwo ɖe emee?

¹⁷ Abe alesi Yohanes yi edzi ɖee fia ene la, nu dziŋɔ siwo lɔ dziƒo gɔ̃ hã ɖe eme dzɔ kpe ɖe anyigbaʋuʋu gã la ŋu. Egblɔ be: “Eye ɣe trɔ zu yibɔ abe lãfukotoku ene, eye ɣleti trɔ zu abe ʋu ene. Eye dziƒoɣletiviwo ge ɖe anyigba, abe alesi gboti dudua eƒe tsetse gbogbowo ɖe anyigba, ne ya sesẽ aɖe le ʋuʋum la ene.” (Nyaɖeɖefia 6:12b, 13) Nu ɖedzesi wɔnuku kae nye si! Enye dzɔgbevɔ̃e ƒe nɔnɔme si Yesu gblɔ ɖi do ŋgɔ le Mateo 24:29 la ƒe nuwuwu. Àte ŋu akpɔ viviti dziŋɔ si ado ne nyagblɔɖia va eme ŋutɔŋutɔ la le susu mea? Ɣe ƒe dzoxɔxɔ fakɔname aɖeke maganɔ anyi le ŋkeke me o! Dzinuɖiɖi si le abe klosalo ene eye wòfaa dzi na ame maganɔ anyi le zã me o! Eye ɣletivi akpe ewo teƒe akpe ewoawo maganɔ keklẽm le dziƒo si le abe ago ene o. Ðe ema teƒe la, viviti tsiɖitsiɖi si me gbe kɔkɔ ye anɔ anyi.

18. Aleke ‘dziƒo do viviti tsiɖitsiɖi’ na Yerusalem le ƒe 607 D.M.Ŋ. me?

¹⁸ Wogblɔe ɖi le gbɔgbɔ me gɔmesese nu be blema Israel aɖo viviti ma tɔgbe me. Yeremya xlɔ̃ nu be: “Anyigba blibo la azu gbegbe, ke nyemagblẽe gbidigbidi o. Eyata anyigba nefa konyi, eye dziƒo nenɔ ahovɔ me.” (Yeremya 4:27, 28) Esi nyagblɔɖi ma va eme le ƒe 607 D.M.Ŋ. me la, viviti do ɖe Yehowa ƒe amewo vavã. Yerusalem si nye woƒe fiadu la va yi ɖe Babilontɔwo si me. Wotsrɔ̃ woƒe gbedoxɔa, eye wogblẽ woƒe anyigba la ɖi. Kekeli fakɔname aɖeke meva na wo tso dziƒo o. Ðe ema teƒe la, enɔ abe alesi Yeremya gblɔ le konyifafa me na Yehowa ene be: “[Èwu] mí, mèkpɔ mía ta o. Èɣla ɖokuiwò ɖe alilikpo me, ale be gbedodoɖa aɖeke meɖi go ɖe egodo o.” (Konyifahawo 3:43, 44) Viviti ma si do le dziƒo la zu ku kple tsɔtsrɔ̃ na Yerusalem.

19. (a) Aleke Mawu ƒe nyagblɔɖila Yesaya ɖɔ viviti si do ɖe dziƒo le blema Babilon gome lae? (b) Ɣekaɣie Yesaya ƒe nyagblɔɖia va eme, eye alekee?

¹⁹ Emegbe la, viviti ma tɔgbe si do ɖe dziƒo la zu dzɔgbevɔ̃e na blema Babilon. Wotsɔ gbɔgbɔ ʋã Mawu ƒe nyagblɔɖila wògblɔ le esia ŋuti be: “Kpɔ ɖa, Yehowa ƒe ŋkeke dziŋɔ la gbɔna, dziku kple dɔmedzoe heliheli, ne wòado gbegbe anyigba la, eye wòatsrɔ̃ nuvɔ̃wɔlawo ɖa le edzi. Elabena dziƒoɣletiviwo kple woƒe avũ kple avũtɔwo mana woƒe kekeli naklẽ o, ne ɣe dze la, ado viviti, eye ɣleti mana eƒe kekeli naɖi o. Matu xexeame ƒe vɔ̃ɖiwɔwɔ kple ame vɔ̃ɖiwo ƒe vodada ŋu fe na wo.” (Yesaya 13:9-11) Nyagblɔɖi sia va eme le ƒe 539 D.M.Ŋ. me esime Mediatɔwo kple Persiatɔwo ɖu Babilon dzi. Eɖɔ dziɖeleameƒo, mɔkpɔkpɔmanɔamesi kple akɔfafa ƒe kekeli aɖeke si menɔ anyi na Babilon o esime wòge tegbee tso eƒe nɔƒe abe xexemeŋusẽ gãtɔ ene la nyuie.

20. Nu dziŋɔ kae adzɔ ɖe nuɖoanyi sia dzi ne anyigbaʋuʋu gã la dzɔ?

²⁰ Nenema kee ne anyigbaʋuʋu gã la dzɔ la, anyigba dzi nuɖoanyi blibo sia anɔ viviti tsiɖitsiɖi ƒe mɔkpɔkpɔmanɔamesi me. Satana ƒe anyigba dzi nuɖoanyia ƒe nusiwo klẽna nyuie la mana mɔkpɔkpɔ aɖeke ame o. Egbea, vevietɔ le Kristodukɔa me la, anyigba dzi dunyahehe ƒe ŋgɔnɔlawo xɔ ŋkɔ gbegblẽ le woƒe nu fitifiti wɔwɔ, aʋatsokaka kple agbegbegblẽnɔnɔ ta. (Yesaya 28:14-19) Womagate ŋu aka ɖe wo dzi o. Woƒe kekeli si nu le tsitsim la ado viviti keŋkeŋ ne Yehowa he ʋɔnudɔdrɔ̃ vɛ. Woaɖee afia be ŋusẽ si wokpɔ ɖe anyigba ƒe nyawo dzi abe ɣleti ene la nye esi ƒo ʋu hewua ame. Woƒe ame xɔŋkɔ xexemetɔwo nu ayi abe ɣletivi kakɛ siwo ge tso dziƒo ene eye woaka ahlẽ abe alesi gbotitsetse gbogbowo duduna ne ahomya le ƒoƒom sesĩe ene. Míaƒe ɣletinyigba bliboa aʋuʋu le “xaxa gã . . . esi meva kpɔ tso xexeame ƒe gɔmedzedze vaseɖe egbegbe o, eye megale vava ge akpɔ o” la me. (Mateo 24:21) Nu dziŋɔ kae nye si gbɔna!

“Dziƒo” Te Ða

21. Nukae Yohanes kpɔ le eƒe ŋutega la me ku ɖe “dziƒo” kple “to sia to kple ƒukpo sia ƒukpo” ŋuti?

²¹ Yohanes ƒe ŋutega la yi edzi be: “Eye woŋlɔ dziƒo ɖa abe agbalẽ ŋɔŋlɔ ene, eye woɖe to sia to kple ƒukpo sia ƒukpo ɖa le wo teƒe.” (Nyaɖeɖefia 6:14) Edze ƒã be menye dziƒo alo to alo ƒukpo ŋutɔŋutɔwoe nye esiawo o. Ke nukawoe wotsi tre ɖi na?

22. “Dziƒowo” ka ƒomevie ‘woŋlɔ abe alesi woŋlɔa agbalẽe ene’ le Edom?

²² Le “dziƒo” la gome la, nyagblɔɖi ma tɔgbe si gblɔ alesi Yehowa do dziku ɖe dukɔwo katã ŋue la kpe ɖe mía ŋu le egɔme sese me: “Dziƒo ŋu nuwo katã nu ayi, woaŋlɔ dziƒowo, abe alesi woŋlɔa agbalẽe ene.” (Yesaya 34:4) Ele be Edom koŋ nakpe fu. Alekee? Babilontɔwo va ɖu edzi le Yerusalem ƒe tsɔtsrɔ̃ le ƒe 607 D.M.Ŋ. megbe kpuie. Ɣemaɣi la, womeŋlɔe ɖi be nu ɖedzesi aɖeke dzɔ le dziƒo ŋutɔŋutɔ o. Gake dzɔgbevɔ̃enuwo dzɔ le Edom ƒe “dziƒowo.”e Woɖe eƒe dziɖula amegbetɔ ŋusẽtɔawo le woƒe nɔƒe siwo kɔkɔ abe dziƒo ene la. (Yesaya 34:5) “Woŋlɔ” wo heda ɖe axadzi abe agbalẽ xoxo si ŋu viɖe mele na ame aɖeke o ene.

23. Nukae nye “dziƒo” si ‘woaŋlɔ abe agbalẽ ŋɔŋlɔ ene’ la, eye aleke Petro ƒe nyawo ɖo kpe gɔmesese sia dzie?

²³ Eyata “dziƒo” si ‘woaŋlɔ ɖa abe agbalẽ ŋɔŋlɔ ene’ la ku ɖe dziɖuɖu siwo tsi tre ɖe Mawu ŋu siwo le anyigba sia dzi ɖum la ŋu. Sɔ ɣi Dola si le nuwo katã dzi ɖum la aɖe wo ɖa keŋkeŋ. (Nyaɖeɖefia 19:11-16, 19-21) Nusi apostolo Petro gblɔ esime wònɔ mɔ kpɔm na nudzɔdzɔ siwo nutrenu adelia ɖeɖe ɖa ɖe fia la ɖo kpe esia dzi: “[Wodzra] fifi dziƒo kple anyigba la ɖo, eye woda wo ɖi na dzo, vaseɖe ame mavɔ̃mawuwo ƒe ʋɔnudɔdrɔ̃ kple gbegblẽ ƒe ŋkeke la dzi.” (Petro II, 3:7) Ke nya si wogblɔ be “woɖe to sia to kple ƒukpo sia ƒukpo ɖa le wo teƒe” ya ɖe?

24. (a) Le Biblia ƒe nyagblɔɖi me la, ɣekaɣie wogblɔna be towo kple ƒukpowo ʋuʋu alo womegali ke o? (b) Aleke ‘towo ʋuʋue’ esime woɖu Niniwe dzi?

²⁴ Le Biblia ƒe nyagblɔɖi me la, wogblɔna be towo kple ƒukpowo ʋuʋu alo womegali ke o ne dunyahehe ƒe tɔtrɔ gãwo va. Le kpɔɖeŋu me, esime nyagblɔɖila Naxum nɔ ʋɔnu si Yehowa drɔ̃ Niniwe gblɔm ɖi la, eŋlɔe bena: “Towo ʋuʋu le eŋgɔ, togbɛwo lólo gbanaa, eye anyigba . . . dzo kpekpekpe le eŋku me.” (Naxum 1:5) Nuŋlɔɖi aɖeke meli si fia be to ŋutɔŋutɔwo gbã esime woɖu Niniwe dzi ŋutɔŋutɔ le ƒe 632 D.M.Ŋ. me o. Gake xexemeŋusẽ si dze abe to ene tsã le eƒe ŋusẽ ta la dze anyi le vo me.—Tsɔe sɔ kple Yeremya 4:24.

25. Le nuɖoanyi sia ƒe nuwuwu si gbɔna me la, aleke woaɖe “to sia to kple ƒukpo sia ƒukpo” ɖa le eteƒee?

²⁵ Eyata gɔmesese le eŋu be “to sia to kple ƒukpo sia ƒukpo” siwo ŋuti woƒo nu le le nutrenu adelia ɖeɖe ɖa me la anye xexeme sia ƒe dunyahedziɖuɖuwo kple habɔbɔ siwo ku ɖe wo ŋu, esiwo dze abe nusiwo li ke ene na ame geɖe. Woaʋuʋu wo aɖe wo ɖa wòawɔ mo yaa ahadzi ŋɔ na amesiwo ɖo ŋu ɖe wo ŋu tsã. Abe alesi nyagblɔɖia yi edzi gblɔe ene la, ɖikeke manɔ eŋu o be Yehowa kple Via ƒe dzikudogbe gã—si nye nuwo ʋuʋu mamlea si aɖe Satana ƒe habɔbɔa katã ɖa la—va ɖo kple hlɔ̃biabia!

“Mimu Dze Mía Dzi, eye Miɣla Mí”

26. Aleke amegbetɔ siwo tsia tre ɖe Mawu ƒe fianyenye ŋuti la awɔ nu le woƒe vɔvɔ̃a mee, eye vɔvɔ̃nya kae woagblɔ?

²⁶ Yohanes ƒe nyawo yi edzi be: “Eye anyigba dzi fiawo kple amegãwo kple aʋafia gãwo kple kesinɔtɔwo kple ŋusẽtɔwo kple kluviwo katã kpakple ablɔɖeviwo katã ɣla wo ɖokui ɖe dowo kple towo ƒe agawo me; eye wogblɔ na towo kple agawo bena: Mimu dze mía dzi, eye miɣla mí tso Amesi bɔbɔ nɔ fiazikpui dzi la ƒe ŋku me, eye tso alẽvi la ƒe dziku la nu; elabena eƒe dzikuŋkeke gã la ɖo, eye ameka ate ŋu anɔ tsitre ɖe enu mahã?”—Nyaɖeɖefia 6:15, 16.

27. Nya kae Israel-vi maɖianukware siwo nɔ Samaria la do ɣli gblɔ, eye aleke nya mawo va emee?

²⁷ Esime Hosea nɔ Yehowa ƒe ʋɔnudɔdrɔ̃ gblɔm ɖe Israel ƒe anyiehefiaɖuƒea ƒe fiadu Samaria ŋu la, egblɔ bena: “Woatsrɔ̃ nuxeƒe, siwo Israel tsɔ wɔ nuvɔ̃e la ɖa le Awen, ŋuwo kple aŋɔkawo ato ɖe woƒe vɔsamlekpuiwo dzi, eye woagblɔ na towo bena: Mitsyɔ mía dzi! eye na togbɛwo be: Mimũ dze mía dzi!” (Hosea 10:8) Aleke nya mawo va emee? Esime Samaria va yi ɖe Asiriatɔwo si me le ƒe 740 D.M.Ŋ. me la, teƒe aɖeke menɔ anyi Israel-viwo nasi ayi o. Hosea ƒe nyawo ɖe mɔkpɔkpɔmanɔamesi, vɔvɔ̃ vevie kple yametsitsi si amesiwo aʋa si la se le wo ɖokui me la fia. Samaria ƒe togbɛ ŋutɔŋutɔwo kple eƒe nuɖoanyi siwo le abe towo ene mete ŋu kpɔ wo ta o, togbɔ be tsã la wodze abe nusiwo li ke sesĩe ene gake.

28. (a) Nuxlɔ̃menya kae Yesu gblɔ na Yerusalem-nyɔnuwo? (b) Aleke Yesu ƒe nuxlɔ̃mea va emee?

²⁸ Nenema kee esime Roma-srafowo kplɔ Yesu yina wuwu ge la, eƒo nu na Yerusalem-nyɔnuwo gblɔ bena: “Ŋkekewo gbɔna, le esiwo me woagblɔ bena: Woayra konɔwo kple dɔ, siwo medzi vi o, kple no, siwo mena notsi kpɔ o la. Ekema woade asi gbɔgblɔ me na towo bena: Midze mía dzi! eye na togbɛwo bena: Mitsyɔ mía dzi!” (Luka 23:29, 30) Woŋlɔ Yerusalem ƒe tsɔtsrɔ̃ si Romatɔwo he vɛ le ƒe 70 M.Ŋ. me la ŋuti nya ɖi kpeɖodzitɔe, eye edze ƒã be nusi Yesu ƒe nyawo fia la ɖi Hosea tɔ la. Bebeƒe aɖeke menɔ anyi na Yudatɔ siwo kpɔtɔ nɔ Yudea la o. Afika kee woɖadze agbagba be yewoaɣla ɖo le Yerusalem o, alo esime wosi yi Masada-mɔ̃ si le to tame la me hã la, womete ŋu si le Yehowa ƒe ʋɔnudɔdrɔ̃ sesẽ si wòhe vɛ la nu o.

29. (a) Ne Yehowa ƒe dzikuŋkekea va la, nukae adzɔ ɖe amesiwo le nuɖoanyi sia yome vevie la dzi? (b) Yesu ƒe nyagblɔɖi kae ava eme ne Yehowa ɖe Eƒe dziku ɖe go?

²⁹ Azɔ nutrenu adelia ɖeɖe ɖa ɖee fia be nu ma tɔgbe adzɔ le Yehowa ƒe dzikuŋkeke si gbɔna la dzi. Le anyigba dzi nuɖoanyi sia ʋuʋu mamlea me la, amesiwo de edzi vevie adi bebeƒe kple ŋkubiã, gake womakpɔ ɖeke o. Alakpasubɔsubɔha si nye Babilon Gã si ŋu woɖo ŋu ɖo vevie la do kpo nu xoxo. Agado siwo le to ŋutɔŋutɔwo me kple dunyahehe- kple asitsahabɔbɔ siwo le abe towo ene le kpɔɖeŋumɔ nu la mana ga gome dedienɔnɔ alo kpekpeɖeŋu bubu ƒomevi aɖeke wo o. Naneke makpɔ wo ta tso Yehowa ƒe dziku la nu o. Yesu ɖɔ woƒe vɔvɔ̃ la nyuie be: “Tete Amegbetɔvi la ƒe dzesi lado ɖe dziŋgɔli me, eye anyigba dzi ƒomeawo katã woado konyifaɣli, eye woakpɔ Amegbetɔvi la le dziƒolilikpowo dzi gbɔna kple ŋusẽ kple ŋutikɔkɔe geɖe.”—Mateo 24:30.

30. (a) Nukae nyabiabia: “Ameka ate ŋu anɔ tsitre ɖe enu mahã?” la fia? (b) Ðe ame aɖewo ate ŋu anɔ te le Yehowa ƒe ʋɔnudrɔ̃ɣia?

³⁰ Ẽ, woaƒoe ɖe amesiwo gbe bubu dede sɔ ɣi Dola aʋadziɖula la ƒe ŋusẽ ŋu la nu woalɔ̃ ɖe edzi be yewowɔ vodada. Tsɔtsrɔ̃ adze ŋgɔ amegbetɔ siwo lɔ̃ faa be yewoanye Da la ƒe dzidzimevia ƒe akpa aɖe la ne woɖe Satana ƒe xexeame ɖa. (Mose I, 3:15; Yohanes I, 2:17) Alesi xexeame ƒe nɔnɔme anɔ ɣemaɣi la awɔe be ame geɖe ƒe nuwɔna anɔ biabiam be: “Ameka ate ŋu anɔ tsitre ɖe enu mahã?” Edze abe ɖe woasusui be ame aɖeke manɔ anyi si ŋu Yehowa kpɔ ŋudzedze ɖo le eƒe ʋɔnudrɔ̃gbe ma dzi o ene. Gake anye vodada si wowɔ, abe alesi Nyaɖeɖefia ƒe agbalẽa yi edzi ɖee fia ene.

[Etenuŋɔŋlɔwo]

[Aɖaka/Nɔnɔmetata si le axa 105]

Wokpɔ Ƒe 1914 Do Ŋgɔ

“Ƒe 606 D.M.Ŋ. mee Mawu ƒe Fiaɖuƒea va nuwuwu, woɖe fiakuku la, eye woɖe asi le anyigba la katã ŋu na Trɔ̃subɔlawo. Ƒe 2520 tso ƒe 606 D.M.Ŋ. awu nu le ƒe 1914 M.Ŋ. me.”f—The Three Worlds si wota le ƒe 1877 me ƒe axa 83.

“Biblia me ɖaseɖiɖia me kɔ eye eme sẽ, be ‘Trɔ̃subɔlawo ƒe Azã la’ nye ƒe 2520 ƒe ɣeyiɣi si dze egɔme tso ƒe 606 D.M.Ŋ. me hewu nu le ƒe 1914 M.Ŋ. me.”—Studies in the Scriptures, Babla 2, si C. T. Russell ŋlɔ eye wotae le ƒe 1889 me ƒe axa 79.

Charles Taze Russell kple ehati Biblia nusrɔ̃viwo kpɔe dze sii ƒe geɖe do ŋgɔ be ƒe 1914 ye anye Trɔ̃subɔlawo ƒe Azã alo dukɔwo ƒe ɣeyiɣi ɖoɖi la ƒe nuwuwu. (Luka 21:24) Togbɔ be womese nusi tututu esia afia gɔme le gɔmedzeɣi ma me o hã la, woka ɖe edzi be ƒe 1914 anye tɔtrɔƒe aɖe le xexeame ƒe ŋutinya me, eye nyateƒee woto. De dzesi nya si gbɔna si woɖe tso nyadzɔdzɔgbalẽ aɖe me la:

“Aʋa dziŋɔ si dzɔ le Europa la na nyagblɔɖi wɔnuku aɖe va eme. Le ƒe blave vɔ atɔ̃ siwo va yi me la, to mawunyagblɔlawo kple nyadzɔdzɔgbalẽwo dzi la, ‘Dukɔwo Dome Biblia Nusrɔ̃vi’ siwo wonya ŋkɔ ‘Ƒe Akpe Ðeka ƒe Vava Tɔwo’ na nyuie wu la nɔ gbe ƒã ɖem be xexeame be Dzikudogbe si ŋuti nya wogblɔ ɖi le Biblia me la ava le ƒe 1914 me. Nyanyuigblɔla mɔzɔla alafa geɖe . . . la nɔ gbɔgblɔm be ‘Mikpɔ mɔ na ƒe 1914!’”—The World, si nye New York nyadzɔdzɔgbalẽ aɖe, August 30, 1914.

[Etenuŋɔŋlɔ]

[Aɖaka si le axa 106]

Ƒe 1914—Tɔtrɔƒee

Agbalẽ si nye Politikens Verdenshistorie—Historiens Magt og Mening (Politiken ƒe Xexeameŋutinya—Ŋutinya ƒe Ŋusẽ kple Nusi Wòfia) si wota le ƒe 1987 me le Kopenhagen la gblɔ nya si gbɔna la le axa 40:

“Wotsrɔ̃ ŋgɔyiyi si dzi woxɔ se le ƒe alafa 19 lia me la le ƒe 1914 me. Le ƒe si do ŋgɔ na aʋa la ƒe dzɔdzɔ me la, Denmarktɔ ŋutinyaŋlɔla kple dunyahela Peter Munch ŋlɔe kple mɔkpɔkpɔ be: ‘Ðaseɖiɖia katã fia be aʋa madzɔ ɖe Europa-ŋusẽ gãwo dome o. “Aʋawɔwɔ ƒe afɔku la” hã abu ɖa le ɣeyiɣi si gbɔna me, abe alesi wodzɔ enuenu tso ƒe 1871 me ene.’

“Abe nusi to vovo ene la, míexlẽ le eya ŋutɔ ƒe ŋutinya si wòŋlɔ emegbe la me be: ‘Aʋa si dzɔ le ƒe 1914 me lae nye tɔtrɔƒe gã la le amegbetɔ ƒe ŋutinya me. Míetso ŋgɔyiyi ƒe ɣeyiɣi si me mɔkpɔkpɔ le eye wote ŋu wɔa nuwo le dedienɔnɔ si ŋu gɔmesese le me la me ge ɖe dzɔgbevɔ̃e, ŋɔdzi kple fuléle ƒe azã aɖe me, eye dediemanɔmanɔ le afisiafi. Ame aɖeke mete ŋu nya o, eye egbea gɔ̃ hã ame aɖeke mate ŋu anya ne viviti si me míege ɖo ɣemaɣi la ahe agbenɔnɔ ƒe ɖoɖo blibo si amegbetɔ tsɔ ƒe akpe geɖe wɔ na eɖokui la ƒe tsɔtsrɔ̃ gbidigbidi vɛ o.’”

[Nɔnɔmetata si le axa 110]

‘Woɖe to sia to ɖa le eteƒe’

[Nɔnɔmetata si le axa 111]

Woɣla wo ɖokui ɖe agadowo me