Yehowa ƒe Aƒe la ƒe Ŋutikɔkɔe Gãtɔ

“Matsɔ ŋutikɔkɔe ayɔ xɔ sia taŋ, Yehowa Zebaot ye gblɔe.” —XAGAI 2:7.

 1. Ƒomedodo kae le gbɔgbɔ kɔkɔe kple xɔse kpakple dɔwɔwɔ dome?

ESI Yehowa Ðasefo aɖe nɔ gbeƒã ɖem tso aƒeme yi aƒeme la, edo go nyɔnu Gbɔgbɔsɔlemedela aɖe si gblɔ be, ‘Míawo sie gbɔgbɔ kɔkɔea le, gake miawoe le dɔa wɔm.’ Woɖe eme nɛ aɖaŋutɔe be ne gbɔgbɔ kɔkɔea le ame aɖe dzi la, aʋãe be wòawɔ Mawu ƒe dɔ la hã. Yakobo 2:17 gblɔ be: “Xɔse hã, ne dɔwɔwɔwo mele eŋu o la, enye nu kuku le eɖokui me.” Yehowa ƒe gbɔgbɔ kpe ɖe eƒe Ðasefowo ŋu xɔse sesẽ ɖo wo si, eye etsɔ ‘ŋutikɔkɔe yɔ eƒe aƒe’ lae le alesi wòna wole dzɔdzɔenyenyedɔwo wɔmee me—eƒe vevitɔe nye ‘gbeƒãɖeɖe Fiaɖuƒenyanyuia be wòanye ɖaseɖiɖi na dukɔwo katã.’ Ne wowɔ dɔ sia va ɖo afisi dze Yehowa ŋu la, ‘ekema nuwuwu la ava.’—Mateo 24:14.

 2. (a) Yayra kae míaxɔ ne míeƒo mía ɖokui ɖe Yehowa ƒe dɔa me? (b) Nukatae wòle be nusianu si adze na mí abe ‘heheɖemegbe’ ene la nadzɔ dzi na mí?

² Nusi míefɔ le Yesu ƒe nya siawo mee nye be ele be dɔ si wɔm míele egbea naku ɖe gbeƒãɖeɖe ‘dzidzɔ Mawu la ƒe ŋutikɔkɔenyanyui’ si wotsɔ de asi na mí ŋu. (Timoteo I, 1:11) Alesi míeƒo mía ɖokui ɖe Yehowa subɔsubɔ me dzidzɔtɔe la, nenemae wòanɔ dzedzemee na mí be nuwuwua le aƒe tum. Míexlẽ Yehowa ƒe nya siwo le Xabakuk 2:2, 3 be: “Ŋlɔ ŋutega la ɖi, eye naɖee ɖe kpe dzi, be wòanya xlẽ bɔbɔe. Elabena azãgbe li na ŋutega la, eƒe nuwuwu le aƒe tum, eye maflu ame o; ke ne etsi megbe la, kpɔ esinu elabena ele vava ge kokoko, eye mahe ɖe megbe o.” Ẽ, “ŋutega la” ava eme “ne etsi megbe” hã. Le Yesu ƒe Fiaɖuƒe dziɖuɖu ƒe ƒe 83 lia sia me la, awɔ na ame aɖewo be nuwo tsi megbe fifia. Gake ɖe mele be dzi nedzɔ mí be nuwuwua meva haɖe oa? Le ƒe 1990 ƒe ƒe siawo me la, eɖi nukunya ŋutɔ be woɖe mɔ siwo woxe ɖe gbeƒãɖeɖedɔa nu ɖa le Ɣedzeƒe Europa, Afrika ƒe akpa aɖewo, kple le anyigba bubuwo dzi. Nusi awɔ na mí abe ‘megbetsitsi’ ene la wɔe be wokpɔ ɣeyiɣi na “alẽ” bubu geɖewo nuƒoƒoƒu tso anyigbamamã siawo siwo nu ʋu nyitsɔ sia la me.—Yohanes 10:16.

 3. Nukatae wòle be “dzidzime sia” ƒe gɔmesese si su mía la nade dzi ƒo na mí be míabiã ŋku ɖe Mawu ƒe dɔa ŋu wu?

³ Nyagblɔɖila la gblɔ be “mahe ɖe megbe o.” Yesu gblɔ be fifi dzidzime vɔ̃ɖi sia nu mayi akpɔ vaseɖe esime “nusiawo katã nava ve me o.” (Mateo 24:34) Ðe eƒe nyawo ƒe gɔmesese yeye si su mía si fia be míaƒe gbeƒãɖeɖedɔa megahiã kpata oa?a Nudzɔdzɔwo fia be menye nenema boŋ ye kura o! Míaƒe dzidzime si li fifia le nyɔnyrɔm ɖe nuvɔ̃ɖiwɔwɔ kple gbegblẽ si tɔgbe teƒe womekpɔ kpɔ le ŋutinya katã me o la me. (Tsɔe sɔ kple Dɔwɔwɔwo 2:40.) Ele be míatsɔ hiahiã kpata ayi míaƒe dɔa dzii. (Timoteo II, 4:2) Nyagblɔɖi siwo katã ku ɖe ɣeyiɣi si me xaxa gã la ava ŋu la fia be egbɔna kpata, kpoyi le vome, aɖi ɖe ame—abe fiafitɔ ene. (Tesalonikatɔwo I, 5:1-4; Nyaɖeɖefia 3:3; 16:15) “Eyaŋuti miawo hã misu te; elabena Amegbetɔvi la ava le gaƒoƒo, si ŋuti miebu o la me.” (Mateo 24:44) Esi dzidzime mavɔ̃mawu sia le eƒe tsɔtsrɔ̃ ɖika gogom la, míedi kura be ‘míanɔ mimlim le’ xexeame ƒe susuhenuwo ‘ƒe ba me’ atsɔ míaƒe agbe mavɔ kpɔkpɔ ƒe mɔkpɔkpɔ xɔasi la aƒu gbe o!—Petro II, 2:22; 3:10; Luka 21:32-36.

 4. Nukae na wòhiã be woagadzi ‘nuɖuɖu si wonana le ɣeyiɣi nyuitɔ dzi’ la ɖe edzi, eye aleke wole hiahiã sia gbɔ kpɔmee?

⁴ Abe alesi tututu Yesu ƒe nyagblɔɖia gblɔe ene la, míeɖo “fuɖuame ƒe gɔmedzedze” me le ƒe 1914 me esi ameƒomea ge ɖe ‘nuɖoanyiawo ƒe nuwuɣi’ me. Nuxaxawo, afɔkudzɔdzɔwo, kple sedzimawɔmawɔ dzi ɖe edzi va ɖo egbe ŋkeke sia. (Mateo 24:3-8, 12) Le ɣeyiɣi sia ke me la, Yehowa de dɔ asi na dɔla nuteƒewɔla kple aɖaŋudzela ƒe ha si wosi ami na be woana ‘gbɔgbɔmenuɖuɖu’ woƒe Aƒetɔ Kristo ƒe aƒemetɔwo ‘le ɣeyiɣi nyuitɔ dzi.’ (Mateo 24:45-47) Mesia Fia la le mɔ fiam gbɔgbɔmenuɖuɖunana ɖoɖo wɔnuku sia le anyigba bliboa katã dzi.

“Nuɖuɖu” Gbogbo Aɖe

 5. Agbagba ka dzem wole le “nuɖuɖu” si nye vevitɔ la nana ŋu?

⁵ Bu alesi woɖaa “nuɖuɖu” lae ŋu kpɔ. (Luka 12:42) Nuɖuɖu si nye vevitɔ si wonaa Kristotɔwoe nye Mawu ƒe Nya Biblia la. Bene Biblia nanya fia nyuie la, ehiã vevie be gɔmeɖeɖe si anya xlẽ eye wòsɔ la nanɔ anyi. Wonɔ hiahiã sia gbɔ kpɔm vivivi le ƒeawo me, vevietɔ tso ƒe 1950 me esime woɖe New World Translation of the Christian Greek Scriptures gɔme ɖe Eŋlisigbe me. Va ɖo ƒe 1961 me la, Biblia bliboa ƒe gɔmeɖeɖe si nye New World Translation nɔ anyi, eye mexɔ ɣeyiɣi aɖeke hafi wòdo le gbegbɔgblɔ vevi bubuwo me o. Gbegbɔgblɔ 3 siwo me woɖee ɖe go le le ƒe 1996 subɔsubɔƒea me la na wo katã ƒe ƒuƒoƒo va nye 27, siwo dometɔ 14 nye Biblia bliboa katã. Le Biblia gɔmeɖeɖe sia kple Biblia-srɔ̃gbalẽwo gɔmeɖeɖe ta la, Kristotɔ siwo tsɔ wo ɖokui ke siwo ƒe xexlẽme nye 1,174 tsɔ woƒe ɣeyiɣiwo katã le gbe gɔme ɖemee le dukɔ 77 me.

 6. Aleke Habɔbɔa kpɔ Biblia-srɔ̃gbalẽwo ƒe hiahiã la gbɔe?

⁶ Gbetakpɔxɔ Habɔbɔa ƒe agbalẽtaƒe 24 le agbalẽ siwo ƒe xexlẽme le dzidzim ɖe edzi ɖaa tata dzi tsɔ le gbegɔmeɖela gbogbo siawo ƒe dɔa dom ɖe ŋgɔe. Eyata wole agbalẽtamɔ̃ bubu siwo wɔa dɔa kabakaba ɖoɖo dzi le alɔdze gãwo. Gbetakpɔxɔ kple Nyɔ! magazineawo tata le dzidzim ɖe edzi ɣleti sia ɣleti, ale wo katã ƒe xexlẽme ɖo 943,892,500, si nye dzidziɖedzi 13.4 le alafa me le ƒea me. Biblia kple agbalẽ gãwo tata le United States, Brazil, Finland, Germany, Italy, Japan, kple Mexico dzi ɖe edzi alafa memamã 40 ɖe ƒe 1995 tɔ dzi va ɖo 76,760,098 le ƒe 1996 me. Alɔdze bubuwo hã wɔ dɔ vevi aɖe le agbalẽtata ƒe dzidziɖedzia me.

 7. Aleke Yesaya 54:2 ƒe nyawo gava hiã fifia vevie wu?

⁷ Nusi na dzidziɖedzia ƒe akpa gã aɖe hiã le ƒe 1990 ƒe ƒeawo mee nye mɔ siwo woxe ɖe Yehowa Ðasefowo nu le Ɣedzeƒe Europa kple Afrika ɖeɖeɖa. Gbɔgbɔmenuɖuɖua ƒe dɔ si le amewo wum le teƒe siawo la nu sẽ ŋutɔ. Eyata amekpekpe la le ɖiɖim sesĩe kple hiahiã kpata be: “Keke wò agbadɔ ƒe nɔƒe ɖe nu, eye nahe wò agbadɔvɔ me, megahe asi ɖe megbe o! Didi wò kawo ɖe nu, eye naƒo wò tsyotiwo ɖe to!”—Yesaya 54:2.

 8. Asikpekpeɖeŋu dɔmenyotɔe kae na míete ŋu le ganyawo gbɔ kpɔm?

⁸ Eyata ehiã be woakeke Habɔbɔa ƒe alɔdzedɔwɔƒe 104 dometɔ geɖe ɖe nu. Le alesi ganyawo sesẽ ŋutɔ le anyigbamamã siwo nu woʋu yeyee ƒe akpa gãtɔ me ta la, ga si zãm wole na takekedɔ sia la ƒe akpa gã aɖe tsoa dukɔ siwo dzi ganyawo de wu ƒe nusiwo wodzɔna na xexeame katã ƒe dɔa me. Enye dzidzɔ be hamewo kple ame ɖekaɖekawo le asi kpem ɖe eŋu tso dzi blibo me, le gbɔgbɔ si woɖe fia le Mose II, 35:21 me nu: “Eye amesiame, si wòdzɔ dzi na, eye wòlɔ̃ kple dzi faa la, va dzɔ nu na Yehowa, bena woatsɔ awɔ Mawu ƒe . . . dɔwo.” Míetsɔ mɔnukpɔkpɔ sia le akpe dam na amesiwo katã le gome kpɔm le dɔmenyonunana sia me.—Korintotɔwo II, 9:11.

 9. Aleke Romatɔwo 10:13, 18 le eme vamee egbea?

⁹ Le ƒe 1996 me la, Gbetakpɔxɔ Habɔbɔa ƒe agbalẽwo kafu Yehowa ƒe ŋkɔa kple eƒe tameɖoɖowo vaseɖe anyigba la ƒe seƒe ke. Ðeko wòle abe alesi apostolo Paulo gblɔe ɖi ene. Eyɔ nya tso Yoel ƒe nyagblɔɖia kple Psalmo 19 lia me ŋlɔ be: “Amesiame, si ayɔ [Yehowa, NW] ƒe ŋkɔa dzi la, woaɖee. Ke megblɔ be: Alo ɖe womesee o mahã? Ẽ, vavãe! Woƒe numegbe ɖi hoo le anyigba blibo la katã dzi, eye woƒe nyawo de xexeme ƒe seƒewo ke.” (Romatɔwo 10:13, 18) Esi Yehowa ƒe amewo kafu eƒe ŋkɔ xɔasia vevie alea la, ewɔ akpa vevi aɖe le nana be ŋutikɔkɔe neyɔ eƒe tadeaguƒe la me. Gake nukawo mee gbeƒãɖeɖe sia kpɔ dzidzedze le le ƒe 1996 me? Taflatse lé ŋku ɖe akɔntabubu si le axa 18 vaseɖe 21 la ŋu.

Xexeame Katã ƒe Nuŋeŋedɔa

10. Nu ɖedzesi kawoe nède dzesii le Yehowa ƒe amewo ƒe dɔwɔwɔ me le akɔntabubu si le axa 18-21 la me?

¹⁰ Ɣeyiɣi aɖeke medo ŋgɔ si Yesu ƒe nya siwo le Luka 10:2 be, “Nuŋeŋe la sɔ gbɔ, ke dɔwɔlawo mede ha o; eyaŋuti miɖe kuku na nuŋeŋe ƒe Aƒetɔ la bena, wòaɖo dɔwɔlawo aɖo ɖe eƒe nuŋeŋe la me” ƒe vevienyenye dze alea gbegbe kpɔ o. Èle wɔwɔm ɖe amekpekpe ma dzia? Ame miliɔn geɖe le wɔwɔm ɖe edzi le xexeame godoo. Esia dze le Fiaɖuƒe gbeƒãɖelawo ƒe agbɔsɔsɔ yeye si nye 5,413,769 siwo bu gbeadzisubɔsubɔkɔnta le ƒe 1996 me la me. Gakpe ɖe eŋu la, nɔviŋutsu kple nɔvinyɔnu yeye 366,579 xɔ nyɔnyrɔ. Aleke gbegbe ‘dukɔwo katã ƒe nu nyoameŋu’ siawo siwo le gome kpɔm le nana be ‘ŋutikɔkɔe nayɔ Yehowa ƒe tadeaguƒea me’ la xɔ asi na míi enye si!—Xagai 2:7.

11. Nukatae wòle be dzi nadzɔ mía dometɔ ɖesiaɖe atso eme?

¹¹ Takeke siwo ŋu wobu akɔnta le le anyigbamamã siwo me woʋu dɔa nu le yeyee me la wɔ nuku ale gbegbe. Ðe mía dometɔ aɖewo ʋãa ŋu ame bubu siwo le dzidziɖedzi sia kpɔma? Kura o, míekpɔa dzidzɔ kple wo boŋ. Ðeko nuwo ƒe gɔmedzedze nɔ sue le dukɔ ɖesiaɖe me va yi. Xagai ŋɔlimetɔ nyagblɔɖila Zaxarya ŋlɔ be: “Amekae ado vlo gɔmedzedze nyaŋui?” (Zaxarya 4:10) Dzi dzɔa mí wu gbɔgblɔ be Fiaɖuƒe gbeƒãɖela miliɔn geɖe le anyigba siwo dzi ɖaseɖiɖidɔa li ke ɖo me fifia eye wokpea anyigbamamã la ɖo enuenu, kura ete ŋu nyea kwasiɖa sia kwasiɖa le dugã geɖewo me. Ðe wòle be alɔ neku mí esime Yehowa le ɖeɖekpɔkpɔ mɔnukpɔkpɔa nam teƒe siwo dzi nuwo mede alea tsã oa? Gbeɖe o! Yesu gblɔ be: “Abɔ la enye xexe la me.” (Mateo 13:38) Ele be míayi míaƒe ɖaseɖiɖidɔa dzi tsitotsito, abe alesi nusrɔ̃la gbãtɔawo ɖi ɖase tsitotsitoe le Yudatɔwo ƒe nuɖoanyia ƒe nuwuɣi ene.—Dɔwɔwɔwo 2:40; 10:42; 20:24; 28:23.

Ŋgɔyiyi Ðaa

12. Ŋusẽdoame ʋãme kae li si ta míakpɔ “ŋgɔ tẽ”? (Kpɔ aɖaka si nye “Nuŋeŋe ‘tso Anyigba ƒe Seƒe Ke’ ” hã.)

¹² Ẽ, ele be míanɔ ŋgɔ yim alea, ‘míakpɔ ŋgɔ tẽ’ kple Yehowa ƒe tasiaɖam si nye eƒe dziƒodɔlawo ƒe habɔbɔ la. (Xezekiel 1:12) Petro ƒe nyawo le susu me na mí be: “Menye ɖe Aƒetɔ la le wɔwɔm blewu le eƒe ŋugbedodowo dziwɔwɔ me, abe alesi ame aɖewo bunɛ blewuwɔwɔ la ene o; hafi egbɔ dzi ɖi blewu na mi, esi melɔ̃ bena, ame aɖeke natsrɔ̃ o; ke boŋ bena amewo katã natrɔ va dzimetɔtrɔ gbɔ la ŋuti.” (Petro II, 3:9) Mina dzonɔameme ƒe kpɔɖeŋu nyui si mía nɔvi siwo le dukɔ siwo me ganyawo sẽ le me ɖo la naʋã mí. Nusi adze abe Harmagedon ƒe vava ƒe megbetsitsi ene na mí la wɔe be mɔnukpɔkpɔ li wotsɔ le ame akpe alafa geɖe nu ƒom ƒu le anyigba siawo kple anyigbamamã siwo wowɔa dɔa kpena ɖo nyuie la me. Mègaflu ɖokuiwò o: “Yehowa ƒe ŋkeke gã la tu aƒe, etu aƒe, eye wòle du dzi ŋutɔ.” (Zefanya 1:14) Le míaƒe akpa dzi la, ele be míawo hã míanɔ du dzi aɖi ɖase mamlɛa tsitotsito!

13, 14. (a) Nya kae míate ŋu agblɔ le agbalẽwo mamã le ƒe 1996 me ŋu? (b) Ðoɖo tɔxɛ kae hamewo ate ŋu awɔ ƒe sia ƒe, eye ɖoɖo ka wɔm nèle be yeakpe asi ɖe eŋu?

¹³ Biblia, agbalẽ, kple magazinewo mamã hã ƒe dzidziɖedzi ɖe dzesi le ƒe si va yi me ale gbegbe, togbɔ be woawo medze le akɔntabubua me o hã. Le kpɔɖeŋu me, wokpɔ magazine mamã ƒe dzidziɖedzi 19 le alafa me, esi womã ɖekaɖeka 543,667,923. Míaƒe magazineawo nyo woatsɔ aɖe gbeƒãe le mɔ vovovowo nu—le ablɔwo dzi, le modzakaɖebɔwo me, le ʋutɔɖoƒewo, le dɔwɔƒewo. Nyatakakawo fia be le anyigbamamã aɖewo siwo me Fiaɖuƒe gbeƒãɖeɖedɔa xɔ me la, míaƒe magazineawo ƒe nyonyome wɔ dɔ ɖe dɔnyala bibiwo dzi ŋutɔ eye wole lɔlɔ̃m wole Biblia-nusɔssrɔ̃ wɔm kple wo.

¹⁴ Le ƒe sia ƒe ƒe April me la, hamewo lɔ̃a ɖoɖowɔwɔ ɖe magazinedɔ tɔxɛ wɔwɔ ŋu, eye wotsɔa ŋkeke bliboa wɔa magazinedɔe tso aƒeme yi aƒeme kple le afisiwo amehawo nɔna. Miaƒe hamea awɔ dɔ sia le April 1997 mea? Míetrɔ asi le April me Gbetakpɔxɔ kple Nyɔ! tɔxɛwo ŋu ɖi na mi, eye wo nana le xexeame katã le ɣeyiɣi ɖeka ma ke me awɔ dɔ ɖe ame dzi ŋutɔ! Le Cyprus-ƒukpo dzi la, hameawo tsɔ nyagbɔgblɔ si nye “mina Fiaɖuƒenya la naɖo amesiame gbɔ” wɔ woƒe taɖodzinui eye kura gɔ̃ hã woyi magazinedɔa wɔwɔ ƒe ɖoɖo sia dzi ɣleti sia ɣleti, eye wona agbɔsɔsɔ gbogbotɔ kekeake si nye 275,359 le ƒea me, esi nye dzidziɖedzi 54 le alafa me.

Xagai ƒe Gbedasi Mamlɛawo

15. (a) Nukatae Yehowa gade gbe bubuwo asi na Xagai? (b) Nukae wòle be míasrɔ̃ le Xagai ƒe gbedasi etɔ̃lia me?

¹⁵ Esi Xagai gblɔ eƒe gbedasi evelia ƒe ŋkeke 63 megbe la, Yehowa gade gbe etɔ̃lia aɖe esi be wòagblɔ si wòanyo be míana wòade dzi gbɔ na mí egbea. Alesi Xagai ƒo nui la, ɖeko wòwɔ abe ɣemaɣie Yudatɔwo nɔ gbedoxɔa gɔme ɖom anyi ene, evɔ woɖo egɔme anyi ƒe 17 va yi xoxo. Yehowa kpɔe be ehiã be yeagawɔ ameŋutikɔkɔdɔ aɖe ake. Nunɔlawo megatsɔ ɖeke le woƒe dɔwo me o eye eyata wo ŋu mekɔ le Yehowa ŋkume o. Ðe wòate ŋu anye be Yehowa ƒe amewo dometɔ aɖewo hã ƒe alɔ do agblɔ egbea, eye woɖea mɔ le wo ɖokui ŋu be wogena ɖe xexeame ƒe mɔɖeɖe ɖe nusi dze ame ŋu wɔwɔ faa kple ŋutilãmenudidiwo ŋu ƒe nuwɔnawo mea? Ele vevie ŋutɔ be míana míaƒe dzi nanɔ ŋutikɔkɔe hehe va Yehowa ƒe ŋkɔa dzii ŋu “tso egbe dzi” eye míaka ɖe ŋugbe si wòdo la dzi, be: “Made yayra aƒe tso ŋkeke ma dzi.”—Xagai 2:10-19; Hebritɔwo 6:11, 12.

16. ‘Nuwo ʋuʋu’ kae tu aƒe ŋutɔ, eye nukae anye emetsonu?

¹⁶ Le ŋkeke ma dzi tututu la, ‘aʋakɔwo ƒe Yehowa’ ƒe gbe va na Xagai zi enelia si nye mamlɛa. Ena wonya nusi Eƒe ‘dziƒo kple anyigba ʋuʋu’ fia la be: “Mamũ fiaɖuƒewo ƒe fiazikpuiwo aƒu anyi, eye matsrɔ̃ dukɔwo ƒe fiaɖuƒe sesẽwo, mamũ tasiaɖamwo kple wo me nɔlawo aƒu anyi, sɔwo kple wo dolawo adze anyi, eye amesiame atsi ehavi ƒe yi nu.” (Xagai 2:6, 21, 22) Eyata ‘nuwo ʋuʋu’ sia aɖo eƒe taƒoƒo esime Yehowa akɔ anyigba la ŋu keŋkeŋ le Harmagedon me. Ɣemaɣi la, ke woaƒo “dukɔwo katã ƒe nu nyoameŋuwo” nu ƒu vɔ xoxo, be woanye amegbetɔwo ƒe xexeme yeyea ƒe habɔbɔ ƒe gɔmeɖoanyi. Nusiwo ta míatso aseye ahakafu Yehowa kawo gbegbe nye si!—Xagai 2:7, NW; Nyaɖeɖefia 19:6, 7; 21:1-4.

17. Aleke wotsɔ Yesu wɔ ‘ŋkɔsigɛe’?

¹⁷ Xagai ŋlɔ tsɔ ƒo eƒe nyagblɔɖia tae be: “Ale Yehowa Zebaot gblɔ esi: Ɣemaɣi la matsɔ wò, nye dɔla Zerubabel, . . . awɔ ŋkɔsigee; elabena wòe metia, Yehowa Zebaot ye gblɔe!” (Xagai 2:23) Fifia Kristo Yesue nye Yehowa ƒe Mesia Fia kple Nunɔlagã la ŋutɔŋutɔ, amesi le dɔ si Dziɖuɖuteƒenɔla Zerubabel kple Nunɔlagã Yosua wɔ vovovoe le anyigba dzi Yerusalem la katã wɔm le dziƒo. Abe dziɖula ƒe ŋkɔsigɛ si le Yehowa ƒe nuɖusi ene la, Yesue nye amesi zu “Ẽ,” amesi dzi Yehowa ato ana ‘Mawu ƒe ŋugbedodo’ gbogboawo nava eme. (Korintotɔwo II, 1:20; Efesotɔwo 3:10, 11; Nyaɖeɖefia 19:10) Biblia me nyagblɔɖinyawo katã ku ɖe alesi Yehowa atsɔ Kristo ana wòanye Fia kple Nunɔla Tafexelae la ŋu.—Yohanes 18:37; Petro I, 1:18, 19.

18. Aleke ‘Yehowa Zebaot ƒe nya’ mamlɛtɔ ava me le mɔ si lolo wu nui?

¹⁸ Nyateƒee, le míaƒe ŋkeke siawo me la, Yehowa ƒe gbɔgbɔmegbedoxɔ dzeania mee nàkpɔ ŋutikɔkɔe gãtɔ kekeake le! Eye esusɔ vie ko, ne Yehowa ɖe Satana ƒe nuɖoanyia katã ɖa vɔ keŋkeŋ la, Xagai 2:9 me nyawo agava eme dzidzɔtɔe, be: “Xɔ megbetɔ ƒe atsyɔ̃ asɔ gbɔ wu gbãtɔ tɔ, Yehowa Zebaot ye gblɔe!” Ŋutifafa ava mlɔeba!—xexeame katã ƒe ŋutifafa mavɔ si “Ŋutifafafia” Kristo Yesu, Yehowa ƒe ‘ŋkɔsigɛ,’ amesi ŋu woŋlɔ le be, “Ne eƒe dziɖuɖu nakeke ta, eye seƒeɖo manɔe na ŋutifafa . . . o, . . . Yehowa Zebaot ƒe ŋuʋaʋã awɔe ade goe” la ahe vɛ. (Yesaya 9:5, 6) Tso mavɔ me yi ɖe mavɔ me, Yehowa ƒe tadeaguƒe la ƒe ŋutikɔkɔe adze le afisiafi le eƒe xexeame katã ƒe dziɖuƒe si ŋutifafa axɔ aƒe ɖo la me. Neva eme be aƒe ma mee míanɔ ɖaa tegbee!—Psalmo 27:4; 65:5; 84:11.

[Etenuŋɔŋlɔ]

Àte Ŋu Aɖe Wo Mea?

◻ Aleke wotsɔ ‘ŋutikɔkɔe’ le Yehowa ƒe aƒe la me ‘yɔmee’ egbea?

◻ Nukatae nyanyui gbeƒãɖeɖea mehiã kpata ɣeaɖekeɣi kpɔ de fifia nu o?

◻ Ŋusẽdoame be míatsɔ hiahiã kpata ƒe vevienyenye aɖe gbeƒã kae míekpɔ le Ƒe 1996 Subɔsubɔƒea ƒe Akɔntabubu me?

◻ Aleke Kristo nye Yehowa ƒe ‘ŋkɔsigɛe’?

[Aɖaka si le axa 15]

Nuŋeŋe “tso Anyigba ƒe Mlɔenu”

MÍEXLẼ Yehowa ƒe sedede le Yesaya 43:6 be: “Megasika ame ɖi o! Kplɔ vinyeŋutsuwo tso didiƒe vɛ kple vinyenyɔnuwo tso anyigba ƒe mlɔenu.” Ŋɔŋlɔ sia le eme vam nukutɔe egbea le Ɣedzeƒe Europa. Le kpɔɖeŋu me, bu Moldova si nye Kɔmiunist-dukɔ tsã la ŋu kpɔ. Kɔƒe aɖewo li siwo me tɔwo ƒe afã sɔŋ nye Ðasefowo fifia. Ehiã be woazɔ mɔ ayi didiƒewo hafi akpɔ anyigbamamã aɖe gbeƒã le eme, gake wole agbagba la dzem! Gbeƒãɖela siwo le hame siawo me dometɔ geɖe nye amesiwo wokplɔ yi aboyo mee el Siberia le ƒe 1950 ƒe ƒeawo ƒe gɔmedzedze me la ƒe viwo. Fiafia woƒe ƒomeawo le ŋgɔ xɔm le nuŋeŋedɔa me. Le gbeƒãɖela 12,565 me la, ƒe si va yi mee wo dometɔ 1,917 xɔ nyɔnyrɔ. Hame 43 li siwo dometɔ ɖesiaɖe ƒe gbeƒãɖelawo anɔ ame 150, eye nutome suewo dzi ɖe edzi tso ene va ɖo enyi le subɔsubɔƒe yeyea me.

Takeke si le edzi yim le Albania hã wɔ nuku ŋutɔ. Afimae Ðasefo nuteƒewɔla siwo mede naneke o do dzi le ŋutasesẽdziɖuɖu vɔ̃ɖitɔ kekeake te le ade ƒe 50 sɔŋ. Wowu wo dometɔ aɖewo. Esia na míeɖo ŋku Yesu ƒe ŋugbedodo sia dzi, be: “Megavɔ̃ fu, siwo nàva kpe la, ƒe ɖeke o. Kpɔ ɖa, Abosam latsɔ mia dome ame aɖewo ade gaxɔ me, bene woate mi akpɔ, . . . Nanye nuteƒewɔla yiɖase ku me, eye mana agbefiakuku wò.” (Nyaɖeɖefia 2:10; kpɔ Yohanes 5:28, 29; 11:24, 25 hã.) Nuka kpɔm míele fifia le Albania? Eyae nye Yehowa ƒe ŋugbedodo si le Yesaya 60:22 la ƒe emevava aɖe si wɔ nuku nyateƒe, be: “Ame suewo azu akpe, eye ame ʋeewo azu dukɔ sesẽ”! Le ƒe 1990 me la, gbeƒãɖela ɖeka koe bu subɔsubɔkɔnta le Albania. Gake “dɔwɔla” bubu geɖe tso Italy kple dukɔ bubuwo me wɔ ɖe Yesu ƒe amekpekpea be, ‘Miheyi ɖawɔ nusrɔ̃lawo, mianyrɔ wo’ la dzi. (Mateo 28:19; Luka 10:2) Le Yesu ƒe ku Ƒe Ŋkuɖodzia ɖuɣi le ƒe 1996 me la, gbeƒãɖela 773 ye nɔ dɔ dzi le gbeadzi, eye amesiawo kpe amewo va woƒe Ŋkuɖodzia ɖuƒewo ale be woƒe xexlẽme nye 6,523, esi nye gbeƒãɖelawo ƒe xexlẽmea teƒe enyi! Wobu vavalawo ƒe agbɔsɔsɔme wɔnukuwo ƒe akɔnta le teƒe siwo sa ɖe aga hã. Togbɔ be gbeƒãɖela aɖeke menɔ dugã siwo nye Kukës kple Divjakë me o hã la, ame 192 kple 230 ye va le teƒe siawo. Le Krujë si gbeƒãɖela ɖeka ko nɔ la, ame 212 ye va. Gbeƒãɖela 30 siwo le Korçë haya teƒe aɖe si ame 300 kple edzivɔwo ate ŋu anɔ. Esi xexlẽme ma tege ɖe xɔa me la, wogbugbɔ ame 200 bubu ɖo ɖe aƒeme le teƒe manɔanyi ta. Nyateƒe, agbleawo dzi ƒu na ŋeŋe!

Nyatakaka sia tso Romania: “Esi míenɔ aƒeme yi aƒeme dɔa wɔm la, míedo go ame aɖe si be Yehowa Ðasefoe yenye eye ebe yele duvi aɖe si me míenya be Ðasefo aɖeke mele o me. Egblɔ na mí be ame 15 bubu hã gali siwo ye kple wo yewonɔa kpekpewo wɔm Yawoɖawo kple Kwasiɖawo eye be yewodze gbeƒãɖeɖe tso aƒeme yi aƒeme gɔme. Eƒe ŋufɔke, míeyi ɖe du ma me. Ŋutsu, nyɔnu kple ɖevi 15 nɔ xɔ eve me nɔ mía lalam eye woxɔ agbalẽ 20 kple magazine yeye 20. Míefia alesi wowɔa Biblia-nusɔsrɔ̃e wo. Mí katã míedzi ha eye míeɖo woƒe nyabiase siwo hiã wu ŋu. Amesi le ŋgɔ na ƒuƒoƒoa gblɔ be: ‘Ŋkeke ʋee aɖewo koe nye sia si medo gbe ɖa na Yehowa be wòaɖo alẽkplɔla aɖe si asɔ na nye dzi la ɖe mí, eye woɖo nye gbedodoɖa la ŋu.’ Dzi dzɔ mí wu gbɔgblɔ, eye esi míele dzodzo ge la, abe tsyɔ̃evi aɖe si va ke ɖe ame aɖe si zu fofoa ŋu ene la, egblɔ be: ‘Míeɖe kuku, migaŋlɔ mí be o sea. Migava srã mí kpɔ!’ Míetrɔ yi, eye wole Biblia-nusɔsrɔ̃ adre wɔm le du ma me. Le anyigbamamã yeye geɖe me la, wotsɔ Biblia-srɔ̃gbalẽwo le dɔa gɔme dzemee le nukumɔ aɖe nu, eye wokpɔa ŋudzedze ɖe agbalẽawo ŋu ŋutɔ, eye esia fia be Mawu ƒe dɔe wònye.”

[Nyaɖoɖo si le axa 18-21]

YEHOWA ÐASEFO SIWO LE XEXEA ME KATÃ ƑE ƑE 1996 SUBƆSUBƆƑEA ƑE AKƆNTABUBU

(Àkpɔe le agbalẽa ŋutɔ me)

[Nɔnɔmetata siwo le axa 16, 17]

Wole “dukɔwo katã ƒe nu nyoameŋuwo” nu ƒom ƒu le Ƒukpowo dzi (1), Anyiehe Amerika (2), Afrika (3), Asia (4), Dziehe Amerika (5), kple Europa (6)