“Gbedoxɔ Na Dukɔwo Katã”
“Alo womeŋlɔ ɖi bena: Woayɔ nye aƒe la be gbedoxɔ na dukɔwo katã oa?”—MARKO 11:17.
1. Ƒomedodo ka ƒomevie nɔ Adam kple Xawa kpakple Mawu dome le gɔmedzedzea me?
ESIME wowɔ Adam kple Xawa la, ƒomedodo kplikplikpli aɖe nɔ wo kple woƒe Dziƒofofo dome. Yehowa Mawu ƒo nu kpli wo eye wògblɔ tame nyui si wòɖo ɖe amegbetɔƒomea ŋu na wo. Kakaɖedzitɔe la, eʋã wo wotsɔ aseyetsotso kafu Yehowa ɖe eƒe asinudɔwɔwɔ gãwo ta edziedzi. Ne Adam kple Xawa hiã mɔfiafia ne wole woƒe ɖoƒe si nye amegbetɔƒomea fofo kple dada zuzu le etsɔme ŋu bum la, woate ŋu anɔ woƒe Paradiso-ƒe la ƒe afisiafi ado ɖe Mawu ŋkume. Womehiã na nunɔla ƒe subɔsubɔdɔ le gbedoxɔ me o.—Mose I, 1:28.
2. Tɔtrɔ kae va esime Adam kple Xawa wɔ nuvɔ̃?
2 Nɔnɔmea trɔ esime mawudɔla dzeaglã aɖe ble Xawa wòbu be ne yegbe Yehowa ƒe fianyenye la, yeƒe agbenɔnɔ anyo wu eye wògblɔ be nyɔnua ‘anɔ abe Mawu ene.’ Xawa xɔ Satana ƒe aʋatsoa dzi se eye wòɖu ati si Mawu be womegaɖu o la ƒe tsetse. Emegbe Satana to Xawa dzi te srɔ̃a kpɔ. Nublanuitɔe la, Adam ɖo to srɔ̃a nuvɔ̃wɔla, si fia be ede asixɔxɔ wo kple nyɔnua ƒe ƒomedodo ŋu wu eƒe ƒomedodo kpli Mawu. (Mose I, 3:4-7) Esia fia be Adam kple Xawa tia Satana be wòanye yewoƒe mawu.—Tsɔe sɔ kple Korintotɔwo II, 4:4.
3. Nu gbegblẽ kawoe do tso Adam kple Xawa ƒe aglãdzedzea me?
3 Menye ɖeko esia wɔwɔ na amegbetɔ atsu kple asi gbãtɔ la bu ƒomedodo xɔasi si nɔ wo kple Mawu dome o ke agbe tegbee nɔnɔ le anyigba dzi paradiso me hã bu ɖe wo. (Mose I, 2:16, 17) Mlɔeba woƒe ŋutilã wɔnuvɔ̃ la va nɔ gbegblẽm wotsɔ yi ku mee. Woƒe dzidzimeviwo nyi nuvɔ̃ ƒe nɔnɔme sia dome. Biblia ɖe eme be: “Nenema ku la va to amewo katã dzi yi.”—Romatɔwo 5:12.
4. Mɔkpɔkpɔ kae Mawu tsɔ ɖo ameƒome wɔnuvɔ̃ la ŋkume?
4 Nane va hiã ne woatsɔ adzra ameƒome wɔnuvɔ̃a kple wo Wɔla kɔkɔe la dome ɖo. Esime Mawu nɔ afia tsom na Adam kple Xawa la, ena mɔkpɔkpɔ woƒe etsɔmeviwo to ŋugbe si wòdo le ‘dzidzimevi’ aɖe si aɖe ameƒomea tso nu gbegblẽ siwo Satana ƒe aglãdzedze he vɛ ŋu dzi. (Mose I, 3:15) Emegbe Mawu ɖee fia be Dzidzimevi yayratɔ la ado tso Abraham me. (Mose I, 22:18) Esi lɔlɔ̃ ƒe tameɖoɖo sia nɔ susu me na Mawu ta la, etia Israel-viwo siwo nye Abraham ƒe dzidzimeviwo be woanye yeƒe dukɔ tiatia.
5. Nukata wòle be míatsɔ ɖe le nusiwo nɔ Mawu ƒe Se ƒe nubabla kple Israel me?
5 Le ƒe 1513 D.M.Ŋ. me la, Mawu bla nu kple Israel-viwo eye wolɔ̃ be yewoawɔ ɖe eƒe sewo dzi. Ele be amesiwo katã di be yewoade ta agu na Mawu egbea natsɔ ɖe le Se ƒe nubabla ma me vevie elabena efia asi Dzidzimevi si ŋugbe wodo la. Paulo gblɔ be enye “nu nyui, siwo le vava ge la, ƒe vɔvɔli.” (Hebritɔwo 10:1) Subɔsubɔdɔ si Israel-nunɔlawo wɔ le avɔgbadɔ, alo tadedeagu ƒe agbadɔ, si woate ŋu aho ayi teƒe bubu la ŋue Paulo nɔ nu ƒom tsoe hafi gblɔ nya sia. Woyɔe be “Yehowa ƒe gbedoxɔ” alo “Yehowa ƒe me.” (Samuel I, 1:9, 24) Ne míedzro subɔsubɔdɔ kɔkɔe si wowɔ le Yehowa ƒe aƒe si nɔ anyigba dzi me la, míate ŋu ava kpɔ ŋudzedze ɖe nublanuikpɔkpɔ ƒe ɖoɖo si me woate ŋu ana amegbetɔ wɔnuvɔ̃wo kple Mawu dome nagava nyo la ŋu bliboe.
Kɔkɔeƒe ƒe Kɔkɔeƒe La
6. Nukae wotsɔ da ɖe Kɔkɔeƒe ƒe Kɔkɔeƒe la, eye nukae tsi tre ɖi na Mawu ƒe afima nɔnɔ?
6 Biblia gblɔ be: “Nuwokatãtaƒola la menɔa nusi wowɔ kple asi la me o.” (Dɔwɔwɔwo 7:48) Gake alilikpo aɖe si nɔ xɔ emetɔ si woyɔ be Kɔkɔeƒe ƒe Kɔkɔeƒe la tsi tre ɖi na Mawu ƒe anyinɔnɔ le eƒe aƒe si nɔ anyigba dzi la me. (Mose III, 16:2) Edze ƒã be alilikpo sia klẽ sesĩe, wònye kekeli le Kɔkɔeƒe ƒe Kɔkɔeƒea. Enɔ aɖaka kɔkɔe aɖe si woyɔ be “nubablaɖaka,” si me kpe siwo dzi woŋlɔ se siwo Mawu de na Israel-viwo la dometɔ aɖewo ɖo le la tame. Kerubi eve siwo keke aʋalã me nɔ Aɖaka la ƒe nutsyɔnu dzi, si nye gbɔgbɔmenuwɔwɔ siwo le ɖoƒe kɔkɔ le Mawu ƒe dziƒohabɔbɔa me ƒe kpɔɖeŋu. Alilikpo keklẽ wɔnuku la nɔ nutsyɔnu la dzi le kerubiawo dome. (Mose II, 25:22) Esia nye alesi Mawu Ŋusẽkatãtɔ la bɔbɔ nɔ fiazikpui dzi le dziƒotasiaɖam si kerubi gbagbewo tsɔ dzi la ƒe kpɔɖeŋu. (Kronika I, 28:18) Eɖe nusita Fia Xizkiya do gbe ɖa be: “Yehowa Zebaot, Israel ƒe Mawu, wò amesi nɔa Kerubiwo dzi” la me.—Yesaya 37:16.
Kɔkɔeƒe La
7. Nukawoe nɔ Kɔkɔeƒea?
7 Woyɔ avɔgbadɔ la ƒe xɔ evelia be Kɔkɔeƒe la. Akaɖiti dzeani aɖe si ŋu alɔ adre le la nɔ xɔ sia ƒe ʋɔtrua ƒe miãme, eye ŋkumeɖobolo ƒe kplɔ̃ nɔ nuɖusime. Vɔsamlekpui si dzi atike ʋeʋẽe la ƒe dzudzɔ tuna tsona la nɔ ŋgɔ tẽ. Enɔ xɔmetsovɔ si mã Kɔkɔeƒea kple Kɔkɔeƒe ƒe Kɔkɔeƒea me la ŋgɔ.
8. Dɔ kawoe nunɔlawo wɔna ɣesiaɣi le Kɔkɔeƒea?
8 Ŋdi kple fiẽ ɖesiaɖe la, ele be nunɔla aɖe nayi avɔgbadɔa me eye wòado dzudzɔ ʋeʋẽe le dzudzɔdovɔsamlekpuia dzi. (Mose II, 30:7, 8) Le ŋdi me ne wole dzudzɔa dom la, ele be woade ami akaɖi adre siwo le sikakaɖitia dzi la me. Wosia akaɖiawo le fiẽ be wòaklẽ ɖe Kɔkɔeƒea. Le Sabat ɖesiaɖe dzi la, ele be nunɔla aɖe natsɔ abolo yeye 12 ada ɖe ŋkumeɖobolo ƒe kplɔ̃a dzi.—Mose III, 24:4-8.
Xɔxɔnu La
9. Nukae wotsɔ tsileze la wɔe, eye nukae míate ŋu asrɔ̃ tso esia me?
9 Xɔxɔnu si ŋu wotsɔ avɔ tɔ kpɔ ɖo hã nɔ avɔgbadɔa ŋu. Tsileze gã aɖe nɔ xɔxɔnua afisi nunɔlawo klɔa woƒe asiwo kple afɔwo le hafi gena ɖe Kɔkɔeƒea. Ele be woale tsi hã hafi woasa vɔwo le vɔsamlekpui si le xɔxɔnu la dzi. (Mose II, 30:18-21) Dzadzɛnyenye ƒe nudidi sia nye ŋkuɖodzinya vevi aɖe na Mawu subɔlawo egbea be ele be woadze agbagba anɔ dzadzɛ le ŋutilã, agbenɔnɔ, susu, kple gbɔgbɔ me ne wodi be yewoƒe tadedeagu nadze Mawu ŋu. (Korintotɔwo II, 7:1) Le ɣeyiɣi aɖe megbe la, gbedoxɔmesubɔvi siwo menye Israel-viwo o lae fɔa nake wotsɔ doa dzo ɖe vɔsamlekpuia dzi eye wodua tsi ɖe tsilezea me.—Yosua 9:27.
10. Nukawoe nye nusiwo wotsɔ saa vɔe le vɔsamlekpuia dzi la dometɔ aɖewo?
10 Ŋdi kple fiẽ ɖesiaɖe la, womea vɔsalẽvi le vɔsamlekpuia dzi tsɔ kpe ɖe nuɖuvɔsa kple nunovɔsa ŋu. (Mose II, 29:38-41) Wosaa vɔ bubuwo le ŋkeke tɔxɛwo dzi. Ɣeaɖewoɣi ele be woasa vɔ ɖe ame aɖe ŋutɔ ƒe nuvɔ̃ si wòwɔ ta. (Mose III, 5:5, 6) Ɣebubuwoɣi la, Israel-vi ate ŋu asa vɔ wòanye ƒomedodo nyui ƒe nunana si ƒe akpa aɖewo nunɔlawo kple amesi tsɔ nunanaa vɛ la siaa ɖuna. Esia fia be ŋutifafa ate ŋu anɔ amegbetɔ wɔnuvɔ̃wo kple Mawu dome, eye woaɖu nu kplii le kpɔɖeŋumɔ nu. Amedzro si va le wo dome gɔ̃ hã ate ŋu ava zu Yehowa ƒe tadeagula eye mɔnukpɔkpɔ asu esi be wòatsɔ vɔsanuwo ava Eƒe aƒea me faa. Gake vɔsanu nyuitɔ kekeakewo koe nunɔlawo xɔna ale be woade bubu Yehowa ŋu alesi dze. Ele be woatu vɔsawɔ wòame nyuie, eye mele be naneke nagblẽ le vɔsalãwo ŋu o.—Mose III, 2:1; 22:18-20; Maleaxi 1:6-8.
11. (a) Nukae wotsɔ vɔsalãwo ƒe ʋu wɔna, eye nukae esia ɖe fia? (b) Nukae nye Mawu ƒe nukpɔsusu le amegbetɔ kple lãwo ƒe ʋu siaa ŋu?
11 Wotsɔa vɔsalã siawo ƒe ʋu vaa vɔsamlekpuia gbɔe. Esia nye gbesiagbeŋkuɖodzinu na dukɔa be wonye nuvɔ̃me siwo hiã na ɖela si ƒe ʋu ate ŋu alé avu woƒe nuvɔ̃wo ɖaa eye wòaɖe wo tso ku si me. (Romatɔwo 7:24, 25; Galatiatɔwo 3:24; tsɔe sɔ kple Hebritɔwo 10:3.) Ʋuzazã le mɔ kɔkɔe sia nu ɖo ŋku edzi na Israel-viwo hã be ʋu tsi tre ɖi na agbe eye be Mawu tɔe agbe nye. Mawu de se ɣesiaɣi be amegbetɔwo nagazã ʋu le mɔ bubu aɖeke nu o.—Mose I, 9:4; Mose III, 17:10-12; Dɔwɔwɔwo 15:28, 29.
Avuléŋkeke
12, 13. (a) Nukae nye Avuléŋkeke? (b) Hafi nunɔlagã la nate ŋu atsɔ ʋu ayi Kɔkɔeƒe ƒe Kɔkɔeƒea la, nukae wòle be wòawɔ?
12 Ƒe ɖeka zi ɖeka le ŋkeke si woyɔna be Avuléŋkeke dzi la, ele be Israel-dukɔ bliboa kple amedzro siwo le wo dome siwo dea ta agu na Yehowa nadzudzɔ dɔ ɖesiaɖe wɔwɔ eye woatsi nu dɔ. (Mose III, 16:29, 30) Le ŋkeke vevi sia dzi la, woklɔa nuvɔ̃ ɖa le dukɔa ŋu le kpɔɖeŋumɔ aɖe nu ale be ŋutifafa nanɔ wo kple Mawu dome le ƒe si kplɔe ɖo me. Mina míakpɔ wɔna la le susu me ne míade ŋugbe le nu vevieawo dometɔ aɖewo ŋu.
13 Nunɔlagã la le avɔgbadɔa ƒe xɔxɔnu. Esi wòlé tsi le tsileze si me tsi le la gbɔ vɔ la, ewu nyitsu be wòatsɔ asa vɔe. Ekɔ nyitsua ƒe ʋu ɖe agba aɖe me; woazãe le mɔ tɔxɛ aɖe nu atsɔ alé avu nunɔlawo ƒe Lewi-toa ƒe nuvɔ̃wo. (Mose III, 16:4, 6, 11) Gake hafi nunɔlagã la nayi vɔsadɔawo wɔwɔ dzi la, nane li wòle be wòawɔ. Etsɔ dzudzɔdonu si ʋena lilili (anye gatsi gã mee wòkui ɖo) eye wòɖe dzoka xɔxɔ le vɔsamlekpuia me ɖe dzoɖenu aɖe dzi. Fifia ege ɖe Kɔkɔeƒea eye wòzɔ ɖo ta Kɔkɔeƒe ƒe Kɔkɔeƒe ƒe xɔmetsovɔa gbɔ. Ezɔ blewu to xɔmetsovɔ la ŋu eye wòva tsi tre ɖe nubablaɖaka la ŋgɔ. Azɔ esi amegbetɔ bubu aɖeke mele ekpɔm o la, ekɔ dzudzɔdonu ɖe dzoka xɔxɔa dzi eye ʋeʋe lililia yɔ Kɔkɔeƒe ƒe Kɔkɔeƒea.—Mose III, 16:12, 13.
14. Nukata wòle be nunɔlagã la natsɔ lã vovovo eve ƒe ʋu ayi Kɔkɔeƒe ƒe Kɔkɔeƒe lae?
14 Fifia Mawu le lɔlɔ̃m be yeakpɔ nublanui eye woalé avu ye le kpɔɖeŋumɔ aɖe nu. Esia tae woyɔ Aɖaka la ƒe nutsyɔnu be ‘nublanuikpɔkpɔzikpui’ alo ‘avuléle ƒe nutsyɔnu’ ɖo. (Hebritɔwo 9:5, Reference Bible ƒe etenuŋɔŋlɔ) Nunɔlagã la do le Kɔkɔeƒe ƒe Kɔkɔeƒea, etsɔ nyitsua ƒe ʋu, eye wògage ɖe Kɔkɔeƒe ƒe Kɔkɔeƒea ake. Abe alesi wobia le Sea me ene la, ede eƒe asibide ʋua me eye wòhlẽe zi adre ɖe Aɖaka la ƒe nutsyɔnua ŋgɔ. (Mose III, 16:14) Emegbe egbugbɔyi xɔxɔnu eye wòwu gbɔ̃, si nye nuvɔ̃vɔsa ‘na dukɔ la.’ Etsɔ gbɔ̃a ƒe ʋu yi Kɔkɔeƒe ƒe Kɔkɔeƒea eye wòwɔe abe alesi wòwɔ nyitsu la ƒe ʋu ene. (Mose III, 16:15) Subɔsubɔdɔ vevi bubuwo hã yia edzi le Avuléŋkekea dzi. Le kpɔɖeŋu me, ele be nunɔlagã la natsɔ eƒe asiwo aɖo gbɔ̃ evelia ƒe tame eye wòaʋu “Israel-viwo ƒe nuvɔ̃wo” me akɔ ɖe edzi. Emegbe wokplɔa gbɔ̃ gbagbe la yia gbedadaƒo be wòatsɔ dukɔa ƒe nuvɔ̃wo ayii le kpɔɖeŋumɔ nu. Mɔ sia nue woléa avu “na nunɔlawo kple dukɔ la ƒe ha blibo la” le ƒe sia ƒe.—Mose III, 16:16, 21, 22, 33.
15. (a) Aleke Salomo ƒe gbedoxɔ la ɖi avɔgbadɔ lae? (b) Nya kae Hebritɔwo ƒe agbalẽa gblɔ le subɔsubɔdɔ kɔkɔe si wowɔ le avɔgbadɔa kple gbedoxɔa siaa me ŋu?
15 Le Israel-vi siwo Mawu bla nu kpli ƒe ŋutinya ƒe ƒe 486 gbãtɔawo me la, avɔgbadɔ si wote ŋu hona yia teƒe bubu la zu teƒe si wodea ta agu na woƒe Mawu, Yehowa, le. Emegbe wona mɔnukpɔkpɔ Israel-fia Salomo wòtu xɔ si anɔ teƒe ɖeka ɖaa. Togbɔ be wogblɔ be gbedoxɔ sia alolo eye woaɖo atsyɔ nɛ geɖe wu hã la, Mawu ƒe ɖoɖoa kpɔtɔ nɔ abe alesi wònɔ le avɔgbadɔa me ene. Enye tadedeagu ƒe ɖoɖo gãtɔ si nyo wu si Yehowa ‘aɖo anyi, eye menye amegbetɔ aɖekee o’ la ƒe kpɔɖeŋu abe avɔgbadɔa ke ene.—Hebritɔwo 8:2, 5; 9:9, 11.
Gbedoxɔ Gbãtɔ Kple Evelia
16. (a) Nukae Salomo bia lɔlɔ̃tɔe esime wònɔ gbedoxɔa ŋu kɔm? (b) Aleke Yehowa ɖe eƒe ŋudzedzekpɔkpɔ ɖe Salomo ƒe gbedodoɖaa ŋu fiae?
16 Esime Salomo nɔ gbedoxɔ dzeania ŋu kɔm la, egblɔ nya sia si tso gbɔgbɔ me la tsɔ bia be: “Ne du bubu me tɔ hã, amesi metso wò dukɔ Israel dome o, ke boŋ anyigba didi aɖe dzi wòtso va le wò ŋkɔ gã . . . ta, eye wòva do gbe ɖa le aƒe sia me la, ekema nasee le nɔwòƒe le dziƒo, eye nawɔ nusiwo katã ŋuti du bubu me tɔ la le yɔwòm ɖo la, ne anyigba dzi dukɔwo katã nadze si wò ŋkɔ, eye woavɔ̃ wò abe wò dukɔ Israel ene, eye woadze sii bena, wò ŋkɔ woyɔ ɖe xɔ sia, si metu la ŋu.” (Kronika II, 6:32, 33) Mawu ɖe eƒe ŋudzedzekpɔkpɔ ɖe Salomo ƒe xɔŋukɔkɔ ƒe gbedodoɖa la ŋu fia wòdze ƒã. Dzokakati aɖe ge tso dziƒo eye wòfia vɔsalã siwo nɔ vɔsamlekpuia dzi, eye Yehowa ƒe ŋutikɔkɔe yɔ gbedoxɔ la me.—Kronika II, 7:1-3.
17. Nukae va dzɔ ɖe gbedoxɔ si Salomo tu la dzi mlɔeba, eye nukatae?
17 Nublanuitɔe la, vɔvɔ̃ nyui si nɔ Israel-viwo me na Yehowa la bu. Emegbe wodo vlo eƒe ŋkɔ gã la to ʋukɔkɔɖi, trɔ̃subɔsubɔ, ahasiwɔwɔ, ƒometɔ kplikplikpli gbɔ dɔdɔ, kple ŋlɔmiwɔwɔ le tsyɔ̃eviwo, ahosiwo, kple du bubu me tɔwo ŋu me. (Xezekiel 22:2, 3, 7, 11, 12, 26, 29) Eyata le ƒe 607 D.M.Ŋ. me la, Mawu he ʋɔnudɔdrɔ̃ va wo dzi esi wòkplɔ Babilon-srafowo vɛ be woatsrɔ̃ gbedoxɔ la. Wokplɔ Israel-vi siwo tsi agbe la yi aboyo me le Babilon.
18. Le gbedoxɔ evelia me la, mɔnukpɔkpɔ kawoe ʋu ɖi na ŋutsu siwo menye Israel-viwo o siwo tsɔ dzi blibo do alɔ Yehowa ƒe tadedeagu dzadzɛ la?
18 Le ƒe 70 megbe la, Yudatɔwo ƒe ame susɔe siwo trɔ dzime la trɔ yi Yerusalem eye wona mɔnukpɔkpɔ wo be woagbugbɔ Yehowa ƒe gbedoxɔa atu. Eɖe dzesi be nunɔlawo kple Lewi-vi siwo asubɔ le gbedoxɔ evelia sia me la mede ha o. Esia wɔe be wona mɔnukpɔkpɔ geɖe wu Netinim-vi, siwo nye gbedoxɔmesubɔvi siwo menye Israel-viwo o la ƒe dzidzimeviwo, wozu subɔlawo le Mawu ƒe aƒea me. Gake woƒe ɖoƒea mede nunɔlawo kple Lewi-viawo tɔ nu gbeɖe o.—Ezra 7:24; 8:17, 20.
19. Ŋugbe kae Mawu do le gbedoxɔ evelia ŋu, eye aleke nya siawo va emee?
19 Gbã la, edze abe gbedoxɔ evelia la made gbãtɔ nu kura o ene. (Xagai 2:3) Gake Yehowa do ŋugbe be: “Maʋuʋu dukɔwo katã, eye woahe dukɔwo katã ƒe nu vevitɔ vɛ, eye matsɔ ŋutikɔkɔe ayɔ xɔ sia taŋ, . . . Xɔ megbetɔ ƒe atsyɔ̃ asɔ gbɔ wu gbãtɔ tɔ.” (Xagai 2:7, 9) Nya siawo va eme eye ŋutikɔkɔe nɔ gbedoxɔ evelia la ŋu wu. Enɔ anyi didi wu gbãtɔa ƒe 164 sɔŋ eye tadeagula geɖe wu tso dukɔ geɖe wu me va eƒe xɔxɔnuwo. (Tsɔe sɔ kple Dɔwɔwɔwo 2:5-11.) Gbedoxɔ evelia gbugbɔdzraɖodɔ dze egɔme le Fia Herodes ƒe ŋkekeawo me, eye wokeke eƒe xɔxɔnuwo ɖe enu. Wotui ɖe kpe gbadza gã aɖe dzi eye sɔti dzeaniwo ƒo xlãe, si na ŋutikɔkɔe geɖe nɔ eŋu wu gbedoxɔ gbãtɔ si Salomo tu. Xɔxɔnu egodotɔ nɔ eme na dukɔwo me tɔ siwo di be yewoade ta agu na Yehowa. Wotsɔ kpe mã Dukɔwo ƒe Xɔxɔnu sia kple xɔxɔnu emetɔ si woɖo ɖi na Israel-viwo ɖeɖeko la me.
20. (a) Nusi to vovo kae ɖe dzesi le gbedoxɔ si wogbugbɔ tu la ŋu? (b) Nukae ɖee fia be nukpɔsusu gbegblẽ nɔ Yudatɔwo si le gbedoxɔa ŋu, eye nukae Yesu wɔ le esia ŋu?
20 Nu gã ɖedzesi aɖe nɔ gbedoxɔ evelia sia ŋu si nye be Mawu ƒe Vi, Yesu Kristo, fia nu le eƒe xɔxɔnuwo. Gake abe alesi wònɔ le gbedoxɔ gbãtɔ gome ene la, nukpɔsusu nyui menɔ Yudatɔwo katã si ɖe Mawu ƒe aƒea dzi kpɔkpɔ ƒe mɔnukpɔkpɔ si su wo si la ŋu o. Woɖe mɔ gɔ̃ hã be asitsalawo natsa asi le Dukɔwo ƒe xɔxɔnua. Tsɔ kpe ɖe eŋu la, woɖe mɔ amewo tsɔ gbedoxɔa zu mɔ kpui si wotona ne wotsɔ agba yina Yerusalem-dua ƒe akpa aɖe. Ŋkeke ene do ŋgɔ na Yesu ƒe ku la, ekɔ gbedoxɔa ŋu tso ŋutilãmenuwɔna siawo me, eye eyi edzi nɔ egblɔm be: “Alo womeŋlɔ ɖi bena: Woayɔ nye aƒe la be gbedoxɔ na dukɔwo katã oa? Ke miawo la mietsɔe wɔ adzodalawo ƒe doe.”—Marko 11:15-17.
Mawu Gblẽ Eƒe Aƒe si le Anyigba Dzi la Ði Tegbee
21. Nukae Yesu ɖe fia le Yerusalem-gbedoxɔa ŋu?
21 Alesi Yesu tsɔ dzideƒo do Mawu ƒe tadedeagu dzadzɛ ɖe dzi la na Yuda-subɔsubɔhakplɔlawo ɖoe be yewoawui. (Marko 11:18) Esi Yesu nya be wole ye wu ge kpuie la, egblɔ na Yuda-subɔsubɔhakplɔlawo be: “Woagblẽ miaƒe aƒe ɖi na mi aƒedoe.” (Mateo 23:37, 38) Eto ema dzi ɖee fia be eteƒe madidi o Mawu magakpɔ ŋudzedze ɖe tadedeagu si tɔgbe yia edzi le ŋutilãmegbedoxɔa me le Yerusalem la ŋu o. Maganye “gbedoxɔ na dukɔwo katã” o. Esi Yesu ƒe nusrɔ̃lawo fia asi gbedoxɔa me xɔwo ƒe anidzedze na eyama la, egblɔ be: “Miele nusiawo katã kpɔma?. . . Womele kpe gblẽ ge ɖe kpe aɖeke dzi le afii, si womatu asii aƒu anyi o.”—Mateo 24:1, 2.
22. (a) Aleke nya siwo Yesu gblɔ le gbedoxɔa ŋu va emee? (b) Le esi teƒe be Kristotɔ gbãtɔwo natsɔ woƒe mɔkpɔkpɔ ada ɖe anyigbadzidu aɖe dzi la, nuka boŋ wodi?
22 Yesu ƒe nyagblɔɖia va eme le ƒe 37 megbe le ƒe 70 M.Ŋ. me, esime Roma-srafowo tsrɔ̃ Yerusalem kple eƒe gbedoxɔa. Ema nye kpeɖodzi ɖedzesi be Mawu gblẽ eƒe aƒe ŋutilã me tɔ la ɖi. Yesu megblɔe ɖi gbeɖe be woagbugbɔ gbedoxɔ bubu atu ɖe Yerusalem o. Apostolo Paulo ŋlɔ na Kristotɔ Hebritɔwo le anyigba dzi dugã la ŋuti be: “Du, si nɔa anyi la, mele mía si le afisia o, ke boŋ míele du, si gbɔna la dim.” (Hebritɔwo 13:14) Kristotɔ gbãtɔwo kpɔ mɔ be yewoava zu “dziƒo Yerusalem”—Mawu ƒe Fiaɖuƒe si le abe du ene, la me tɔwo. (Hebritɔwo 12:22) Eyata Yehowa ƒe tadedeagu vavãtɔ la megale ŋutilãmegbedoxɔ aɖeke me le anyigba dzi o. Le nyati si kplɔe ɖo me la, míadzro ɖoɖo si de ŋgɔ wu si Mawu wɔ na amesiwo katã di be yewoade ta agu nɛ “le gbɔgbɔ kple nyateƒe me” la me.—Yohanes 4:21, 24.
Numetoto ƒe Biabiawo
◻ Ƒomedodo kple Mawu kae Adam kple Xawa bu?
◻ Nukata wòle be míatsɔ ɖe le avɔgbadɔ la me nuwo me?
◻ Nukae míesrɔ̃ tso dɔ siwo wowɔ le avɔgbadɔa ƒe xɔxɔnuwo me?
◻ Nukata Mawu ɖe mɔ wotsrɔ̃ eƒe gbedoxɔ la?
[Nɔnɔmetata siwo le axa 10, 11]
Gbedoxɔ Si Herodes Gbugbɔ Tu
1. Kɔkɔeƒe ƒe Kɔkɔeƒe
2. Kɔkɔeƒe
3. Numevɔsamlekpui
4. Gazɔ
5. Nunɔlawo ƒe Xɔxɔnu
6. Israel-viwo ƒe Xɔxɔnu
7. Nyɔnuwo ƒe Xɔxɔnu