Nyabiabia Siwo Tso Exlẽlawo Gbɔ

Mese egɔme be wozãa Helagbe me nya “toʹte” (ekema) tsɔ fiaa nane si adzɔ akplɔ nane ɖo. Ke nukatae Mateo 24:9 xlẽ le New World Translation me be: “Ekema [“toʹte”] amewo lade mi asi na fukpekpe,” esime nuŋlɔɖi si sɔ kplii le Luka 21:12 ya gblɔ be: “Gake do ŋgɔ na nusiawo katã la amewo laɖo asi mia dzi eye woati mia yome”?

Enye nyateƒe be woate ŋu azã toʹte atsɔ afia nane si adzɔ akplɔ nane ɖo, ne míagblɔe la, nusiwo adzɔ ɖe wo nɔewo yome. Gake mele be míase egɔme be mɔ sia ko nue wozã nya la le le Biblia me o.

A Greek-English Lexicon of the New Testament and Other Early Christian Literature, si Bauer, Arndt, kple Gingrich ŋlɔ ɖee fia be wozãa nya toʹte le gɔmesese vevi eve nu le Ŋɔŋlɔawo me.

Ðekae nye “ɣemaɣi.” Esia ate ŋu anye “ɣeyiɣi si va yi ƒe ekema.” Kpɔɖeŋu ɖeka si wona enye Mateo 2:17 le New World Translation me be: “Ɣemaɣi wowu nya si wogblɔ ɖi to nyagblɔɖila Yeremya dzi la nu.” Esia mefia be nane si adzɔ akplɔ nane ɖo o ke boŋ efia nane si dzɔ le ɣeyiɣi aɖe koŋ si va yi me, enye ɣemaɣi. Nenema ke woate ŋu azã toʹte na “etsɔ[me] ƒe ekema.” Eƒe kpɔɖeŋu aɖe dze le Korintotɔwo I, 13:12: “Elabena azɔ la míekpɔa nu le ahũhɔ̃e me le abebubu me, ke emegbe la ŋku me kple ŋku me; azɔ la medze si nu afã kple afã, ke emegbe la madze si nu keŋ, abe alesi wodze sim keŋ la ene.” (Míawoe te gbe ɖe edzi.) Le afisia Paulo zã toʹte le ‘ɣeaɖeɣi le etsɔme’ ƒe gɔmesese nu.

Nyagɔmeɖegbalẽ sia gblɔ be go bubu si me wogazãa toʹte le enye be “woatsɔ afia nane si adzɔ akplɔ nane ɖo le ɣeyiɣi aɖe me.” Nyagɔmeɖegbalẽ sia na kpɔɖeŋu geɖe siwo le nuŋlɔɖi etɔ̃ siwo ku ɖe ŋuɖoɖo si Yesu na eƒe apostolowo ku ɖe eƒe anyinɔnɔ ƒe dzesia ŋu me. a Nyagɔmeɖegbalẽa gblɔ be teƒe siwo wozã toʹte le be “woatsɔ afia nane si adzɔ akplɔ nane ɖo le ɣeyiɣi aɖe me” la ƒe kpɔɖeŋuwo le Mateo 24:10, 14, 16, 30; Marko 13:14, 21; kple Luka 21:20, 27. Nya siwo ƒo xlãe ŋu bubu ɖee fia be nane si adzɔ akplɔe ɖoe nye gɔmesese nyuitɔ. Eye esia akpe ɖe mía ŋu míakpɔ gɔmesese na Yesu ƒe nyagblɔɖi siwo ku ɖe nusiwo adzɔ akplɔ wo nɔewo ɖo le etsɔme ŋu.

Gake mele be míaƒo nya ta be teƒe ɖesiaɖe si toʹte dze le le nuŋlɔɖi siawo me la fia nane si adzɔ akplɔ nane ɖo godoo o. Le kpɔɖeŋu me, le Mateo 24:7, 8 la, míexlẽe be Yesu gblɔe ɖi be dukɔ atsi tre ɖe dukɔ ŋuti eye dɔwuame kple anyigbaʋuʋu ava. Kpukpui 9 yi edzi le New World Translation me be: “Ɣemaɣi woade mi asi na fukpekpe, eye woawu mi, eye dukɔwo katã woalé fu mi le nye ŋkɔ ŋuti.” Ðe wòasɔ be míase egɔme be aʋawɔwɔ, dɔwuame, kple anyigbaʋuʋu siwo wogblɔ ɖi la katã adzɔ, eye ɖewohĩ woadzudzɔ, hafi yometiti nadze egɔmea?

Mate ŋu anɔ nenema o, eye nusi míenya tso emevava ŋu le ƒe alafa gbãtɔ me hã menɔ nenema o. Nuŋlɔɖi si le Dɔwɔwɔwo ƒe agbalẽa me ɖee fia be le ɣeyiɣi si me Kristo-hamea me tɔwo dze gbeƒãɖeɖe gɔme teti ko la, wodo go yometiti sesẽwo. (Dɔwɔwɔwo 4:5-21; 5:17-40) Míate ŋu agblɔ be aʋawɔwɔ, dɔwuame, kple anyigbaʋuʋu siwo katã ŋu nya Yesu gblɔ la dzɔ do ŋgɔ na yometiti ma si dze egɔme kaba la o. Gake yometiti ma dzɔ “do ŋgɔ” hafi nu bubu siwo wògblɔ ɖi la dometɔ geɖe dzɔ, si wɔ ɖeka kple alesi Luka gblɔe: “Gake do ŋgɔ na nusiawo katã la amewo laɖo asi mia dzi eye woati mia yome.” (Luka 21:12) Esia fia be le Mateo 24:9 la, gɔmesese si sɔ si nu wozã toʹte le enye “ɣemaɣi.” Le ɣeyiɣi ma me, alo ɣemaɣi, si aʋawɔwɔ, dɔwuame, kple anyigbaʋuʋu adzɔ la, woati Yesu yomedzelawo yome.

[Etenuŋɔŋlɔ]