Nukae Dzɔ ɖe Havilɔlɔ̃ Dzi?

MƆKPƆKPƆ bu ɖe ame miliɔn geɖe, wolé blanui, eye womenya afisi woada ta ɖo o. Ame aɖe fa konyi be: “Nye ɖekae ɖua nu, nye ɖekae ɖia tsa, nye ɖekae mlɔa anyi heƒoa nu na ɖokuinye.” Ame ʋee aɖewo koe le klalo be yewoatsɔ yewo ɖokui aɖo anyi akpe ɖe amesiwo le xaxa me ŋu.

Nyɔnu dɔdzikpɔlagã aɖe si xɔ dzudzɔ le dɔ me gblɔ be: ‘Gbeɖeka fiẽ la, ahosi aɖe si mía kplii míenɔ dzisasrã ɖeka dzi le dziƒoxɔ dzi va ƒo ʋɔ nam be yetsi akogo. Metsɔ gbe ɖɔɖɔe gblɔ nɛ kaŋ be vovo mele ŋunye o. Eɖe kuku be yeva ɖe fu nam eye wòtrɔ dzo.’

Nyɔnua yi edzi be: ‘Edzɔ dzi nam be nyemeɖe mɔ na fuɖename aɖeke o. Fiẽ si kplɔe ɖo la, xɔ̃nye aɖe ƒo ka nam hebia be menya nyɔnu si le míaƒe aƒeme si wu eɖokui le zã si va yi me hã. Ne susuwò mekpɔ lé amea haɖe o la, eyae nye nyɔnu si ƒo ʋɔ nam la.’ Emegbe nyɔnu dɔdzikpɔlagã la gblɔ be yesrɔ̃ “nu gã aɖe tso eme.”

Wonya nyuie be vidzĩ si womeɖe lɔlɔ̃ fia o la ate ŋu aku. Nenema ke ame tsitsiwo hã ate ŋu aku ne womelɔ̃ wo o. Ðetugbi ƒe 15 vi dzetugbe aɖe si wu eɖokui la ŋlɔ bena: “Lɔlɔ̃ enye be womagatsi akogo azɔ o.”

Nublanuinya si Li Egbea

Le ƒe ʋee siwo va yi me la, Newsweek ka nya ta le gbevovovodolawo dome fuléle ŋuti be: “‘Lé fu hawòvi’ ye anya nye ƒea ƒe mɔfiamenya.” Esime aʋa dzɔ ɖe Bosnia kple Herzegovina, siwo nye Yogoslavia ƒe akpa aɖe tsã dome la, wonyã ame miliɔn ɖeka kple edzivɔ de gbe, hewu ame akpe geɖe. Amekawoe wu wo? Nyɔnuvi aɖe si wonyã le wo de fa konyi be: “Míaƒe aƒelikawoe. Míedze si wo.”

Nyɔnu aɖe gblɔ le ame 3,000 siwo nye Hutu kple Tutsi tɔ siwo nɔ Ruganda-kɔƒe me ŋuti be: “Míenɔ anyi ɖekae le ŋutifafa me hafi.” The New York Times gblɔ be: “Kɔƒe sia ƒe ŋutinya fia nusi dzɔ le Rwanda: Tsã la, Hututɔwo kple Tutsitɔwo nɔ anyi ɖekae, woɖea wo nɔewo, eye wometsi dzi ɖe ame ƒe Hututɔ alo Tutsitɔ nyenye ŋu alo nya gɔ̃ hã o. Kasia ko nya aɖe va dzɔ kpata” eye “wode asi wo nɔewo wuwu me.”

Nenema ke Yudatɔ kple Arabiatɔ siwo le Israel la li kple wo nɔewo ɖekae, gake wo dometɔ geɖe lé fu wo nɔewo. Le ƒe alafa 20 lia sia katã me la, nɔnɔme siawo ƒomevi do mo ɖa le Dziehe Ireland, le India kple Pakistan, le Malaysia kple Indonesia, kple le ame ŋutigbalẽ vovovo siwo le United States dome—ẽ, le xexe si me míele la katã me godoo.

Míate ŋu ayi edzi anɔ gbevovovodolawo kple subɔsubɔhawo dome fulélewo ŋuti kpɔɖeŋuwo yɔm. Lɔlɔ̃ nu metsi alea gbegbe le ŋutinya me kpɔ le xexeame o.

Ameka ƒe Agbae?

Alesi wofiaa ame be wòalɔ̃ nɔviae la, nenema ke wofiaa fuléle hã. Ha nyanyɛ aɖe gblɔ be “wofianɛ [ɖeviwo] hafi wòtsia megbe akpa/Hafi nàxɔ ƒe ade, adre, alo enyi/Be nàlé fu amesiwo katã ƒowòmetɔwo lé fui.” Egbea koŋ ye wofiaa fuléle amewo. Sɔlemehawo koŋue do kpo havilɔlɔ̃ fiafia woƒe hameviwo.

Fransegbe me nyadzɔdzɔgbalẽ si woyɔna be Le Monde bia be: “Aleke wɔ womabui be Kristotɔ mawunyadɔgbedela mawo kee na hehe Tutsi kple Hutu tɔ siwo kpe aʋa le Burundi kple Rwanda eye be sɔleme ɖeka mawoe wodena o?” Le nyateƒe me la, National Catholic Reporter yɔ Rwanda be enye “dukɔ si me ame 70 le alafa me nye Katolikotɔwo.”

Le ƒe alafa sia ƒe gɔmedzedze la, Ɣedzeƒe Europa dukɔwo trɔ zu Kɔmiunisttɔ mawudzimaxɔselawo. Nukatae? Le ƒe 1960 me la, bisiɔpwo ƒe tatɔ aɖe si le subɔsubɔŋutinusrɔ̃ƒe le Prague, Czechoslovakia, gblɔ be: “Míawoe, mí Kristotɔwoe to Kɔmiunisttɔnyenye vɛ. . . . Ðo ŋku edzi be Kristotɔwoe Kɔmiunisttɔwo nye tsã. Ne womexɔ Mawu dzɔdzɔetɔ dzi se o la, ameka ƒe vodadae?”

Bu nusi sɔlemehawo wɔ le Xexemeʋa I me ŋu kpɔ. Britaintɔ aʋakplɔlagã Frank Crozier gblɔ tso aʋa ma ŋu be: “Kristo-sɔlemehawoe nye amesiwo dea ʋukɔkɔɖi dzi vevie wu ɖesiaɖe le mía dome, eye míewɔa wo ŋudɔ faa.” Emegbe, le Xexemeʋa II megbe la, The New York Times gblɔ be: “Tsã la, Katoliko-sɔfo siwo le nuto ɖeka me dea aʋa si woƒe dukɔ le wɔwɔm dzi ɣesiaɣi kloe, woyraa woƒe asrafowo eye wodoa gbe ɖa biaa aʋadziɖuɖu na wo, le esime bisiɔpwo ƒe ƒuƒoƒo bubu si le akpa kemɛa dzi hã doa gbe ɖa be yewo boŋ yewoaɖu dzi.”

Ke hã Yesu Kristo ɖe lɔlɔ̃ fia le eƒe nuwɔnawo katã me, eye apostolo Paulo ŋlɔ bena: “Mawu fia mia ŋutɔwo be, mialɔ̃ mia nɔewo.” (Tesalonikatɔwo I, 4:9, míawoe te gbe ɖe edzi.) Vancouver nyadzɔdzɔgbalẽ si woyɔna be Sun ƒe nuŋlɔla aɖe gblɔ be: “Kristotɔ vavãwo nye nɔviŋutsuwo kple nɔvinyɔnuwo le Yesu Kristo me. Womaɖo koŋ awɔ nuvevi wo nɔewo gbeɖegbeɖe o.”

Eme kɔ ƒã be, agba gã aɖe le subɔsubɔhawo dzi le lɔlɔ̃ si megali egbea o ta. Nyati aɖe si wota ɖe India Today magazine me gblɔ be: “Mawusubɔsubɔ mee wowɔ hlɔ̃nu dziŋɔtɔwo kekeake le.” Gake susu aɖe koŋ tae amewo ƒe dzimesesẽ ɖe wo nɔewo ŋu ɖe dzesi le míaƒe dzidzimea ŋu alea gbegbe ɖo.

Nusitae Lɔlɔ̃ Megabɔ O

Mía Wɔla la na ŋuɖoɖoa. Eƒe Nya, Biblia, yɔ ɣeyiɣi si me míele la be ‘ŋkeke mamlɛawo.’ Biblia ƒe nyagblɔɖiwo gblɔ be esia nye ɣeyiɣi si me amewo ‘malɔ̃ wo nɔewo o.’ Yesu Kristo gblɔe ɖi le ‘ɣeyiɣi vɔ̃ siawo siwo me nɔnɔ sesẽ’ si wogayɔ le Ŋɔŋlɔawo me be ‘nuɖoanyiawo ƒe nuwuwu’ ŋu be ‘ame geɖe ƒe lɔlɔ̃ nu atsi.’—Timoteo II, 3:1-5; Mateo 24:3, 12.

Nɔvisimalémalé si le xexeame egbea nye nusiwo ɖo kpe edzi be míele xexe sia ƒe ŋkeke mamlɛawo me la dometɔ ɖeka. Gake dzidzɔtɔe la, egafia hã be eteƒe madidi o xexe dzɔdzɔe yeye si me lɔlɔ̃ axɔ aƒe ɖo la ava xɔ ɖe ame mavɔ̃mawuwo ƒe xexe sia teƒe.—Mateo 24:3-14; Petro II, 3:7, 13.

Gake ɖe nane li si dzi míanɔ te ɖo axɔe ase be tɔtrɔ sia ate ŋu ava nyateƒe—be míate ŋu anɔ xexe aɖe si me amewo katã alɔ̃ wo nɔewo eye woanɔ anyi ɖekae le ŋutifafa mea?