Woɖe Wo Tso “Dzidzime Vɔ̃ɖi” Aɖe Me
“O, dzidzime maxɔse kple dzidzime totro kpaɖikpaɖi! Ɣekaɣi dzi manɔ anyi kpli mi, eye mado dzi ahe mi ase ɖo mahã?”—LUKA 9:41.
1. (a) Nuka ƒe dzesie afɔkuɣeyiɣi siwo me míele la nye? (b) Nukae Ŋɔŋlɔawo gblɔ tso agbetsilawo ŋu?
MÍELE afɔkuɣeyiɣiwo me. Anyigbaʋuʋuwo, tsiɖɔɖɔwo, dɔwuame, dɔléle, sedzimawɔmawɔ, bɔmbdadawo, aʋawɔwɔ dziŋɔwo—nusiawo kple bubuwo ɖe kpe na ameƒomea le míaƒe ƒe alafa 20 lia sia me. Gake afɔku gãtɔ si ƒo ɖesiaɖe ta la le ŋgɔgbe gbɔna kpuie. Eyae nye ka? Eyae nye ‘xaxa gã si meva kpɔ tso xexeame ƒe gɔmedzedze vaseɖe egbegbe o, eye megale vava ge akpɔ o.’ (Mateo 24:21) Gake mía dometɔ geɖe míate ŋu akpɔ mɔ na etsɔme si me dzidzɔ anɔ! Nukatae? Elabena Mawu ŋutɔ ƒe Nya la ƒo nu tso eŋu be “ameha gã, si ame aɖeke mete ŋu xlẽ o la, tso dukɔ sia dukɔ kple to sia to kple du sia du kple gbegbɔgblɔ sia gbegbɔgblɔ me . . . Amesiawo nye amesiwo do go tso xaxa gã la me . . . Dɔ megale wo wu ge akpɔ o, eye tsikɔ hã megale wo wu ge akpɔ o . . . Eye Mawu atutu aɖatsiwo katã ɖa le woƒe ŋkuwo me.”—Nyaɖeɖefia 7:1, 9, 14-17.
2. Aleke Mateo 24, Marko 13, kple Luka 21 ƒe kpukpui gbãtɔwo va eme zi gbãtɔe?
2 Nuŋlɔɖi si tso gbɔgbɔ me si le Mateo 24:3-22, Marko 13:3-20, kple Luka 21:7-24 la gblɔ alesi Yesu ƒo nu tso ‘nuɖoanyiawo ƒe nuwuɣi’ ŋuti le nyagblɔɖi me ŋu.a Nyagblɔɖi sia va eme zi gbãtɔ ɖe Yudatɔwo ƒe nuɖoanyi mawɔnuteƒea dzi le Mía Ŋɔli ƒe alafa gbãtɔ me, eye eva wu enu kple “xaxa gã” si tɔgbe meva kpɔ o si va Yudatɔwo dzi. Woɖe Yudatɔwo ƒe subɔsubɔ kple dunyahehe nuɖoanyi bliboa katã, si ƒe nɔƒe vevitɔe nye Yerusalem, la ɖa, eye womegate ŋu gbugbɔe ɖo anyi kpɔ o.
3. Nukatae wòhiã kpata be míalé to ɖe Yesu ƒe nyagblɔɖia ŋu egbea?
3 Azɔ mina míade ŋugble le nɔnɔme siwo ƒo xlã Yesu ƒe nyagblɔɖi sia ƒe emevava gbãtɔ ŋu. Esia akpe ɖe mía ŋu be míase emevava egbegbetɔ si ɖii la gɔme nyuie wu. Afia alesi wòhiã be míatso ɖe nuwɔwɔ ŋutɔŋutɔ ŋu kpla fifia bene míatsi agbe le xaxa gãtɔ kekeake si dze ŋgɔ ameƒomea katã la me mí.—Romatɔwo 10:9-13; 15:4; Korintotɔwo I, 10:11; 15:58.
‘Nuwuwua’—Ɣekaɣie?
4, 5. (a) Nukatae Yudatɔ siwo vɔ̃a Mawu le ƒe alafa gbãtɔ M.Ŋ. me la tsɔ ɖe le Daniel 9:24-27 me nyagblɔɖia me? (b) Aleke nyagblɔɖi sia va emee?
4 Le ƒe 539 D.M.Ŋ. me lɔƒo la, wona Mawu ƒe nyagblɔɖila Daniel kpɔ nusiwo ava dzɔ le ƒewo ƒe “kwasiɖa blaadre” ƒe “kwasiɖa” mamlea me ŋuti ŋutega. (Daniel 9:24-27) “Kwasiɖa” siawo dze egɔme le ƒe 455 D.M.Ŋ. me esime Persia-fia Artaxsasta de se be woagbugbɔ Yerusalem-dua atso. “Kwasiɖa” mamlea dze egɔme kple Mesia, Yesu Kristo, ƒe dodo, esime wòxɔ nyɔnyrɔ̃ eye wosi ami nɛ le ƒe 29 M.Ŋ. me.b Ƒe alafa gbãtɔ me Yudatɔ siwo vɔ̃a Mawu la nya nu tso Daniel ƒe nyagblɔɖia ƒe ɣeyiɣikɔntabubu sia ŋu nyuie. Le kpɔɖeŋu me, Luka 3:15 gblɔ le ameha siwo ƒo zi ɖe Yohanes Amenyrɔ̃ɖetsimela la ƒe gbeƒãɖeɖe ŋu le ƒe 29 M.Ŋ. me ŋu be: “Dukɔ la le mɔkpɔkpɔ me, eye wo katã wole ɖi kem le woƒe dzi me le Yohanes ŋuti be, ɖewo mahĩ eyae nye Kristo la.”
5 “Kwasiɖa” 70 lia anye ƒe adre siwo me woave Yudatɔwo nu etɔxɛe. Edze egɔme le ƒe 29 M.Ŋ. me, eye Yesu ƒe nyɔnyrɔ̃xɔxɔ kple subɔsubɔdɔ, kpakple eƒe vɔsaku “le kwasiɖa afã me” le ƒe 33 M.Ŋ. me dzɔ le ɣeyiɣi sia me, eye “kwasiɖa afã” bubu kplɔe ɖo va ɖo ƒe 36 M.Ŋ. me. Le “kwasiɖa” sia me la, Yudatɔ siwo vɔ̃a Mawu kple amesiwo trɔ dzime va Yuda-subɔsubɔha me ɖeɖekoe wona mɔnukpɔkpɔe be woazu Yesu ƒe nusrɔ̃la siwo wosi ami na. Ke le ƒe 70 M.Ŋ. me si nye ɣeyiɣi aɖe si womenya do ŋgɔ o la, Roma-ʋakɔ siwo nɔ Titus ƒe kpɔkplɔ te la va tsrɔ̃ Yudatɔwo ƒe nuɖoanyi si gbe xɔse la.—Daniel 9:26, 27.
6. Aleke “ŋunyɔnu” la hoe le 66 M.Ŋ. me, eye nukae Kristotɔwo wɔ?
6 Aleae wotsrɔ̃ Yudatɔwo ƒe nunɔlanyenye si ƒo ɖi Yerusalem gbedoxɔa eye woɖo nugbe wu Mawu ŋutɔ ƒe Vi la ɖa keŋkeŋ enye si. Woƒe dukɔa kple towo ŋuti nuŋlɔɖiwo hã nu yi. Ema megbe la, Yudatɔ aɖeke magate ŋu agblɔe le se nu be nunɔla alo fia ƒome mee yetso o. Gake enye dzidzɔ be woɖe gbɔgbɔ me Yudatɔ siwo wosi ami na be woanye fia kple nunɔlawo la ɖe vovo be ‘woaɖe gbeƒã Yehowa Mawu ƒe nutsuwɔwɔwo.’ (Petro I, 2:9) Esi Roma-ʋakɔ la ɖe to ɖe Yerusalem zi gbãtɔ le ƒe 66 M.Ŋ. me eye woku afisi gbedoxɔa nɔ gɔ̃ hã la, Kristotɔwo kpɔe dze sii be asrafo mawoe nye ‘aƒedo ƒe ŋunyɔnu, si wogblɔ ɖi to nyagblɔɖila Daniel dzi, si le tsitre ɖe kɔkɔeƒe la.’ Kristotɔ siwo nɔ Yerusalem kple Yudea wɔ ɖe Yesu ƒe nyagblɔɖi me sededea dzi eye wosi yi towo dzi be woanɔ dedie.—Mateo 24:15, 16; Luka 21:20, 21.
7, 8. “Dzesi” kae Kristotɔwo kpɔ, gake nukae womenya o?
7 Yudatɔ Kristotɔ nuteƒewɔla mawo kpɔ Daniel ƒe nyagblɔɖia mevava eye woawo ŋutɔ kpɔ aʋa dziŋɔwo, dɔwuamewo, dɔvɔ̃wo, anyigbaʋuʋuwo, kple sedzimawɔmawɔ siwo ƒe nya Yesu gblɔ ɖi be woanye ‘nuɖoanyiawo ƒe nuwuɣi’ ƒe dzesi la ƒe akpa aɖewo la teƒe. (Mateo 24:3) Gake ɖe Yesu gblɔ ɣeyiɣi si me Yehowa ahe ʋɔnudɔdrɔ̃a ŋutɔŋutɔ ava nuɖoanyi gblẽku ma dzi na woa? Ao. Míate ŋu aka ɖe edzi be nya si wògblɔ ɖi le eƒe anyinɔnɔ le Fiaɖuƒeŋusẽ me si ava va le ɣeyiɣi si nɔ ŋgɔgbe me hã ku ɖe ƒe alafa gbãtɔ me “xaxa gã” la ŋu, be: “Le ŋkeke ma kple gaƒoƒo ma ŋuti la, ame aɖeke menyae o; mawudɔla, siwo le dziƒowo, kple Vi la hã menyae o, negbe Fofonye ɖeka ko.”—Mateo 24:36.
8 Yudatɔwo ate ŋu akpɔ Daniel ƒe nyagblɔɖia me abu ɣeyiɣi si me Yesu ado anye Mesia la. (Daniel 9:25) Gake womeyɔ “xaxa gã” si va tsrɔ̃ Yudatɔ xɔsegbelawo ƒe nuɖoanyia mlɔeba la ƒe ŋkeke na wo o. Yerusalem kple eƒe gbedoxɔa tsɔtsrɔ̃ megbe ko hafi wova nya be ƒe 70 M.Ŋ. mee. Gake Yesu ƒe nyagblɔɖinya siawo nɔ susu me na wo be: “Dzidzime sia nu mele yiyi ge, vaseɖe esime nusiawo katã nava ve me o.” (Mateo 24:34) Edze abe ɖe alesi wozã nya “dzidzime” le afisia to vovo na alesi wozãe le Nyagblɔla 1:4, afisi woƒo nu tso dzidzime siwo kplɔ wo nɔewo ɖo ƒe vava kple alesi wo nu va yinae ŋu ene.
“Dzidzime Sia”—Nukae Wòfia?
9. Aleke gbegɔmeɖegbalẽwo ɖe Helagbe me nya ge·ne·aʹ gɔmee?
9 Esi apostolo ene siwo bɔbɔ nɔ Amitoa dzi kple Yesu se eƒe ‘nuɖoanyiawo ƒe nuwuɣi’ ŋuti nyagblɔɖia la, aleke woase nyagbɔgblɔ “dzidzime sia” gɔmee? Le Nyanyuiawo me la, woɖe nya “dzidzime” gɔme tso Helagbe me nya ge·ne·aʹ me, esi me egbegbe nyagɔmeɖegbalẽwo ɖe ale: “Le nya la ŋutɔŋutɔ nu la, amesiwo dzɔ tso tɔgbui ɖeka me.” (Walter Bauer ƒe Greek-English Lexicon of the New Testament) “Nane si wodzi, ƒome; . . . hlɔ̃ . . . alo ameƒomevi aɖe me tɔ siwo dzɔ ɖe wo nɔewo yome . . . alo ameha siwo katã nɔ anyi le ɣeyiɣi ɖeka ma ke me ƒe ƒuƒoƒo, Mat. 24:34; Marko 13:30; Luka 1:48; 21:32; Fil. 2:15, eye vevietɔ Yudatɔ siwo nɔ anyi le ɣeyiɣi ɖeka me ƒe ƒuƒoƒo.” (W. E. Vine ƒe Expository Dictionary of New Testament Words) “Amesi wodzi, hlɔ̃ ɖeka me tɔwo, ƒome; . . . ameha siwo katã nɔ anyi le ɣeyiɣi ɖeka me ƒe ƒuƒoƒo: Mt. xxiv. 34; Mk. xiii. 30; Lk. i. 48 . . . wozãnɛ na Yudatɔ siwo le agbe le ɣeyiɣi ɖeka me la koŋ.”—J. H. Thayer ƒe Greek-English Lexicon of the New Testament.
10. (a) Gɔmeɖeɖe siwo ɖi wo nɔewo kae agbalẽ eve gblɔ esi woyɔ nya tso Mateo 24:34 me? (b) Aleke mawunyagɔmeɖegbalẽ kple Biblia gɔmeɖeɖe aɖewo lɔ̃ ɖe gɔmeɖeɖe sia dzii?
10 Eyata Vine kple Thayer siaa yɔ nya tso Mateo 24:34 me le “dzidzime sia” (he ge·ne·aʹ hauʹte) gɔmeɖeɖe me be enye “ameha siwo nɔ anyi le ɣeyiɣi ɖeka me ƒe ƒuƒoƒo.” Theological Dictionary of the New Testament (1964) lɔ̃ ɖe gɔmeɖeɖe sia dzi, esi wògblɔ be: “Alesi Yesu zã ‘dzidzimee’ la fia gɔmesese gbadza si nɔ susu me nɛ: dukɔ bliboa katãe nɔ susu me nɛ, eye enya alesi wo katã woɖo nuvɔ̃wɔwɔ ɖe tamee.” Nyateƒee, ‘nuvɔ̃wɔwɔ ɖoɖo ɖe tame’ sia dze le Yuda-dukɔa me nyateƒe le Yesu ƒe anyigbadzinɔɣi, abe alesi tututu wòɖe dzesi le xexemenuɖoanyi sia ŋui ene.c
11. (a) Ameka ƒe nyawo koŋ ye wòle be nefia mɔ mí le alesi míazã he ge·ne·aʹ hauʹte me? (b) Aleke amesia zã nya siae?
11 Gake alesi Nyanyuia ŋlɔla siwo gbɔgbɔ ʋã zã Helagbe me nyagbɔgblɔ he ge·ne·aʹ hauʹte, alo “dzidzime sia” esi wole Yesu ƒe nyawo ŋlɔm ɖi ye Kristotɔ siwo le nu srɔ̃m le nya sia ŋu la na wòfiaa mɔ woƒe tamebubu. Le teƒe siwo katã wòzãe le la, ezãe le nya siwo meƒo nu nyuie tso ameawo ŋu o me. Eyata Yesu yɔ Yudatɔwo ƒe subɔsubɔhaŋgɔnɔlawo be “dawo, ƒliwo ƒe dzidzimewo” eye wògblɔ yi edzi be Gehenna eƒe ʋɔnudɔdrɔ̃ ava “dzidzime sia” dzi. (Mateo 23:33, 36) Gake subɔsubɔhaŋgɔnɔla ameŋkumenuwɔlawo ko dzie ʋɔnudɔdrɔ̃ sia avaa? Kura o. Yesu ƒe nusrɔ̃lawo see wòzã “dzidzime sia” vovototomadeamemee tsɔ fia gɔmesese si le gbadzaa wu sã nu. Eyae nye ka?
“Dzidzime Vɔ̃ɖi Sia”
12. Aleke Yesu gblɔ nya si ɖe ƒomedodo si le “amehawo” kple “dzidzime sia” dome fia eƒe nusrɔ̃lawo se?
12 Le ƒe 31 M.Ŋ. me le Yesu ƒe Galilea subɔsubɔdɔ vevia me ɣeyiɣi kpui aɖe le Ŋutitotoŋkekenyuia megbe la, eƒe nusrɔ̃lawo see wògblɔ na “amehawo” be: “Ameka gɔ̃ ŋuti matsɔ egbevi siawo [dzidzime sia] aɖoe mahã? Woɖi ɖevi, siwo bɔbɔ nɔ asi me, eye wole wo tɔwo yɔm le gbɔgblɔm bena: Míeku dze na mi, eye mieɖu ɣe o; míedzi konyifaha na mi, eye mieƒo akɔta o. Elabena Yohanes [Amenyrɔ̃ɖetsimela] va, meɖua nu o, menoa nu hã o, eye wogblɔ bena: Gbɔgbɔ vɔ̃ le eme, Amegbetɔvi la [Yesu] va, ɖua nu, noa nu hã, eye wogblɔ bena: Kpɔ ɖa, amesia enye nutsuɖula kple ahatsunola, nudzɔlawo kple nuvɔ̃wɔlawo ƒe xɔlɔ̃.” Naneke medzea ‘ameha’ gblẽku mawo ŋu gbeɖegbeɖe o!—Mateo 11:7, 16-19.
13. Amekawoe Yesu fia be woawoe nye “dzidzime vɔ̃ɖi sia” siwo wobu fɔe le eƒe nusrɔ̃lawo gbɔ?
13 Emegbe le ƒe 31 M.Ŋ. me, esime Yesu kple eƒe nusrɔ̃lawo dze woƒe gbeƒãɖeɖe mɔzɔzɔ evelia le Galilea gɔme la, “agbalẽfialawo kple farisitɔwo dometɔ aɖewo” bia dzesi Yesu. Egblɔ na woawo kple ‘ameha’ siwo nɔ eteƒe la be: “Dzidzime vɔ̃ɖi wɔahasi le dzesi biam, eye womele dzesi na gee o, negbe nyagblɔɖila Yona ƒe dzesi la ko; elabena abe alesi Yona nɔ ƒumelãtsu ƒe dɔ me xɔ ŋkeke etɔ̃ kple zã hã etɔ̃ la, nenema ke amegbetɔvi la anɔ anyigba ƒe tu me ŋkeke etɔ̃ kple zã hã etɔ̃. . . . Nenema ke wòanɔ na dzidzime vɔ̃ɖi sia hã.” (Mateo 12:38-46) Edze ƒã be “dzidzime vɔ̃ɖi sia” nye subɔsubɔhaŋgɔnɔlawo kple ‘ameha’ siwo mete ŋu se dzesi si va eme le Yesu ƒe ku kple tsitretsitsi me gɔme o la.d
14. Fɔ kae Yesu ƒe nusrɔ̃lawo se wòbu Zadukitɔwo kple Farisitɔwo?
14 Le ƒe 32 M.Ŋ. me ƒe Ŋutitotoŋkekenyuia megbe, esi Yesu kple eƒe nusrɔ̃lawo va Galilea-nuto si nye Magadan me la, Zadukitɔwo kple Farisitɔwo gabia dzesi Yesu ake. Egagblɔe na wo be: “Dzidzime vɔ̃ɖi wɔahasi le dzesi biam, eye womele dzesi na gee o, negbe Yona ƒe dzesi la ko. Tete wògblẽ wo ɖi hedzo.” (Mateo 16:1-4) Mawusubɔsubɔ me alakpanuwɔla mawo koŋ ye ɖi fɔ elabena woawoe nye ‘ameha’ mawo siwo Yesu bu fɔe be wonye “dzidzime vɔ̃ɖi sia” la kplɔlawo.
15. Aleke Yesu kple eƒe nusrɔ̃lawo do go “dzidzime sia” do ŋgɔ na eƒe nɔnɔmetɔtrɔ kple eƒe le nɔnɔmetɔtrɔa megbe teti hã?
15 Esi Yesu ƒe Galilea subɔsubɔdɔa yina ɖe eƒe nuwuwu la, eyɔ amehawo kple eƒe nusrɔ̃lawo vɛ gblɔ na wo be: “Amesi ke kpe ŋu nye kple nye nyawo le dzidzime wɔahasi kple dzidzime wɔnuvɔ̃ sia dome la, Amegbetɔvi la hã akpe ŋui, ne eva le Fofoa ƒe ŋutikɔkɔe me kple mawudɔla kɔkɔeawo.” (Marko 8:34, 38) Eyata edze ƒã be Yudatɔ matrɔdzimewo ƒe amehawoe nye “dzidzime wɔahasi kple dzidzime wɔnuvɔ̃ sia.” Ŋkeke aɖewo megbe, le Yesu ƒe nɔnɔmetɔtrɔ megbe la, Yesu kple eƒe nusrɔ̃lawo ‘va ameha la gbɔ,’ eye ame aɖe kplɔ via vɛ nɛ be wòada gbe le eŋu. Yesu gblɔ be: “O, dzidzime maxɔse kple dzidzime, si tro kpaɖikpaɖi; ɣekaɣi manɔ anyi kpli mi ase ɖo? Eye ɣekaɣie mado dzi ahe mi ase ɖo mahã?”—Mateo 17:14-17; Luka 9:37-41.
16. (a) Fɔbubunya kae Yesu gbugbɔ gblɔ na ‘amehawo’ le Yudea? (b) Aleke “dzidzime sia” va wɔ hlɔ̃nu vɔ̃ɖitɔ kekeakee?
16 Anye le Yudea ye, le ƒe 32 M.Ŋ. me ƒe Agbadɔmeŋkekenyuia megbe “esi amehawo le ƒu ƒom” ɖe Yesu gbɔ la, egagblɔ eƒe fɔbubunya la na wo be: “Dzidzime sia enye dzidzime vɔ̃ɖi; ele dzesi dim, eye womele dzesi aɖeke na gee o, negbe Yona ƒe dzesi la ko.” (Luka 11:29) Mlɔeba esi subɔsubɔhaŋgɔnɔlawo kplɔ Yesu va ʋɔnui la, Pilato di be yeaɖe asi le eŋu hafi. Nuŋlɔɖia gblɔ be: “Nunɔlagãwo kple amegãwo ƒoe ɖe amehawo nu bena, woabia Baraba, eye woawu Yesu. . . . Pilato gblɔ na wo bena: Ekema nuka mawɔ Yesu, si woyɔna be Kristo la mahã? Wo katã wogblɔ bena: Na woaklãe ɖe ati ŋuti! Ke egblɔ na wo bena: Ekema vɔ̃ ka wòwɔ mahã? Ke woawo do ɣli sesĩe wu bena: Na woaklãe ɖe ati ŋuti!” “Dzidzime vɔ̃ɖi” ma bia be woawu Yesu!—Mateo 27:20-25.
17. Aleke ‘dzidzime totro kpaɖikpaɖi sia’ me tɔ aɖewo wɔ nui esi wose Petro ƒe gbeƒãɖeɖea le Pentekoste-ŋkekea dzi?
17 Alea wɔ “dzidzime maxɔse kple dzidzime, si tro kpaɖikpaɖi” si nu woƒe subɔsubɔhaŋgɔnɔlawo ƒo nya ɖo la wɔ akpa vevi aɖe le Aƒetɔ Yesu Kristo wuwu me. Ŋkeke 50 megbe, le ƒe 33 M.Ŋ. ƒe Pentekostea dzi la, nusrɔ̃lawo xɔ gbɔgbɔ kɔkɔe la eye wodze gbe vovovowo gbɔgblɔ gɔme. Esi wose gbeɖiɖia la, “ameha la ƒo zi va kpe ta,” eye apostolo Petro yɔ wo be “Yudea-ŋutsuwo kple mi amesiwo nɔa Yerusalem” eye wògblɔ be: “[Yesu] amesi . . . mieto nu madzɔmadzɔ wɔlawo ƒe asi dzi klãe ɖe ati ŋuti, eye miewui.” Aleke nyaselawo dometɔ aɖewo wɔ nui? “Etɔ woƒe dzi me.” Eyata Petro gblɔ na wo be woatrɔ dzime. “Eɖi ɖase kple nya bubu geɖewo hã, eye wòxlɔ̃ nu wo gblɔ bena: Mina woaɖe mi tso dzidzime gɔglɔ̃ sia me!” Esi wosee la, amesiwo ade ame akpe etɔ̃ ‘xɔ eƒe nya la tso dzi me eye wonyrɔ̃ wo.’—Dɔwɔwɔwo 2:6, 14, 23, 37, 40, 41.
Woɖe Nusi “Dzidzime Sia” Nye la Fia
18. Nukae wòfiana ɣesiaɣi ne Yesu zã nyagbɔgblɔ si nye “dzidzime sia”?
18 Ke nukae nye “dzidzime” si ŋu nya Yesu lɔ̃a gbɔgblɔ le eƒe nusrɔ̃lawo gbɔ? Aleke wose eƒe nya siwo nye: “Dzidzime sia nu mele yiyi ge, vaseɖe esime nusiawo katã nava ve me o” la mee? Kakaɖedzi le eŋu be Yesu metrɔ alesi wòzãa nyagbɔgblɔ “dzidzime sia” si fia eŋɔlimetɔ ameha siwo nye “mɔfiala ŋkuagbãtɔwo,” amesiwo ƒe ƒuƒoƒoe nye Yuda-dukɔa la o. (Mateo 15:14) Fuwɔame siwo katã Yesu gblɔ ɖi la va “dzidzime sia” dzi eye enu yi le “xaxa gã” si tɔgbe meva kpɔ o si va Yerusalem dzi la me.—Mateo 24:21, 34.
19. Ɣekaɣie Yudatɔwo ƒe nuɖoanyia ƒe “dzi kple anyigba” nu va yi, eye aleke woyii?
19 Ʋɔnue Yehowa nɔ dɔdrɔ̃m Yudatɔwo le ƒe alafa gbãtɔ me. Woɖe dzimetrɔla siwo va ɖe Yehowa ƒe mɔnuɖoɖo si me nublanuikpɔkpɔ le si to Kristo dzi la dzixɔxɔse fia la tso “xaxa gã” ma me. Abe alesi tututu Yesu gblɔe ɖi ene la, nusiwo katã ƒe nya wògblɔ ɖi la dzɔ, eye ɣemaɣi Yudatɔwo ƒe nuɖoanyia ƒe ‘dziƒo kple anyigba’—dukɔ bliboa, si me eƒe subɔsubɔhakplɔlawo kple amewo ƒe habɔbɔ vɔ̃ɖi la nɔ—la nu va yi. Yehowa he ʋɔnudɔdrɔ̃ ma vɛ!—Mateo 24:35; tsɔe sɔ kple Petro II, 3:7.
20. Nuxlɔ̃ame si sɔ ɖe ɣeyiɣia dzi ka dzie wòhiã kpata be Kristotɔwo katã nawɔ ɖo?
20 Yudatɔ mawo siwo lé ŋku ɖe nyagblɔɖinyawo ŋu la nyae be menye agbagbadzedze be yewoabu “dzidzime” aɖe ƒe didime alo “ɣeyiɣi kple azãgbe” aɖewo siwo woyɔ na wo gbɔe yewoƒe ɖeɖekpɔkpɔ la tso o, ke boŋ yewo ɖokui ɖeɖeɖa tso yewo ŋɔlimetɔwo ƒe dzidzime vɔ̃ɖi gbɔ ɣesiaɣi kple Mawu ƒe lɔlɔ̃nu wɔwɔ dzonɔamemetɔe gbɔe wòtso. Togbɔ be Yesu ƒe nyagblɔɖia ƒe emevava gãtɔ ku ɖe míaƒe ŋkekea ŋu hã la, ehiã be ƒe alafa gbãtɔ me Yudatɔ Kristotɔwo hã nawɔ ɖe nuxlɔ̃ame sia dzi, si gblɔ be: “Eyaŋuti minɔ ŋudzɔ le ɣeawo katã ɣi me kple gbedodoɖa, bene miate ŋu asi le nusiawo katã, siwo le eme va ge la nu, eye be mianɔ tsitre ɖe Amegbetɔvi la ŋku me.”—Luka 21:32-36; Dɔwɔwɔwo 1:6-8.
21. Nudzɔdzɔ kpata kae míate ŋu anɔ mɔ kpɔm na kpuie le etsɔme?
21 Egbea, “Yehowa ƒe ŋkeke gã la tu aƒe, . . . eye wòle du dzi ŋutɔ.” (Zefanya 1:14-18; Yesaya 13:9, 13) Le Yehowa ŋutɔ ƒe “ŋkeke kple gaƒoƒo” ɖoɖi dzi la, ahe eƒe dɔmedzoe helĩhelĩ la ava xexeame ƒe akpa siwo nye eƒe subɔsubɔha, dunyahehe, kple asitsatsa, kpakple ame dzego siwo nye egbegbe “dzidzime vɔ̃ɖi wɔahasi” sia la dzi. (Mateo 12:39; 24:36; Nyaɖeɖefia 7:1-3, 9, 14) Aleke nàwɔ woaɖe wò tso “xaxa gã” la me? Míaƒe nyati si kplɔe ɖo aɖo eŋu eye wòagblɔ etsɔme mɔkpɔkpɔ wɔnuku si li la na mí.
[Etenuŋɔŋlɔwo]
a Taflatse kpɔ nyagblɔɖi sia ŋuti nyaɖoɖo deto si le February 15, 1994 Gbetakpɔxɔ ƒe axa 14, 15.
b Kpɔ ƒewo ƒe “kwasiɖawo” ŋuti numeɖeɖe bubuwo le agbalẽ si nye The Bible—God’s Word or Man’s? si Watchtower Bible and Tract Society of New York, Inc. ta la ƒe axa 130-2.
c Biblia gɔmeɖeɖe aɖewo ɖe he ge·ne·aʹ hauʹte si le Mateo 24:34 gɔme ale: “ame siawo” (The Holy Bible in the Language of Today [1976], si gɔme W. F. Beck ɖe); “dukɔ sia” (The New Testament—An Expanded Translation [1961], si gɔme K. S. Wuest ɖe); “ame siawo” (Jewish New Testament [1979], si gɔme D. H. Stern ɖe).
d Mele be míabui be ‘ameha’ mawɔnuteƒe siawoe nye ʽam-ha·ʼaʹrets, alo “amesiwo le anyigba,” amesiwo subɔsubɔhaŋgɔnɔla dadalawo gbe be yewomade ha kple o, gake ‘woƒe nu wɔ nublanui’ na Yesu ya la o.—Mateo 9:36; Yohanes 7:49.
Aleke Nàɖo Wo Ŋui?
◻ Nukae míesrɔ̃ tso Daniel 9:24-27 mevava ŋu?
◻ Aleke egbegbe gbegɔmeɖegbalẽwo ɖe alesi wozã “dzidzime sia” le Biblia me gɔmee?
◻ Aleke Yesu zãa nya “dzidzime” ɣesiaɣii?
◻ Aleke Mateo 24:34, 35 va eme le ƒe alafa gbãtɔ mee?
[Nɔnɔmetata si le axa 12]
Yesu tsɔ “dzidzime sia” sɔ kple ɖevi mabunuwo ƒe ha
[Nɔnɔmetata si le axa 15]
Yehowa koe nya gaƒoƒo si dzi wòahe ʋɔnudɔdrɔ̃ ava Yudatɔwo ƒe nuɖoanyi vɔ̃ɖia dzi