Ènyaa?
Nu vlo kawoe Baraba wɔ?
▪ Nya Nyui Gbalẽ eneawo katã ƒo nu tso Baraba, ŋutsu si ŋu Roma dziɖula Pontio Pilato ɖe asi le ɖe Yesu teƒe, la ŋu. Woɖɔ Baraba be enye ‘gamenɔla si ŋu ŋkɔ nyui aɖeke mele o,’ kple “adzodala.” (Mateo 27:16; Yohanes 18:40) Enɔ Romatɔwo ƒe gaxɔ me le Yerusalem, elabena ekpe ɖe “ame siwo dze aglã ɖe dziɖuɖu ŋu, eye wowu ame le woƒe aglãdzedzea me, la ŋu.”—Marko 15:7.
Togbɔ be nuŋlɔɖi bubu aɖeke megali si ƒo nu tso nu vlo siwo Baraba wɔ ŋu o hã la, ale si wobui kpe ɖe aglãdzelawo ŋu la na numekulawo ƒo nya ta be enɔ aglãdzeha siwo nɔ Israel le ƒe alafa gbãtɔ me la dometɔ aɖe me. Ŋutinyaŋlɔla Flavius Josephus gblɔ be aglãdzehawo ƒe nuwɔnawo ɖe dzesi le dunyahehe me hoʋiʋliwo me ɣemaɣi; nu vlo wɔla siawo gblɔna be yewole xɔxɔm na Yudatɔ tsɛ siwo wote ɖe anyi. Le ƒe alafa gbãtɔ Mía Ŋɔli ƒe domedomee la, ame geɖe ŋutɔ va dze aglã ɖe Romatɔwo kple Yudatɔ bubumewo ŋu le esi wobui be wole yewo tem ɖe anyi ta. Emegbe aglãdzeha siawo me tɔwo va nye Yudatɔwo ƒe aʋawɔla, siwo nyã Romatɔwo tso Yudea le ƒe 66 Mía Ŋɔli me la, dometɔ akpa gãtɔ.
Numekugbalẽ si nye The Anchor Bible Dictionary gblɔ be: “Anɔ eme be Baraba nye adzogliwo ƒe ha aɖe me tɔ. Adzogli siawo ƒe nu nyo dumevi tsɛwo ŋu, elabena wotsia tre ɖe Israel ƒe bubumewo kple ame ŋkutawo ŋu, eye wonye kplamatsedonu na Roma dziɖuɖua.”
Le Romatɔwo ŋɔli la, nu gbegblẽ kawoe ame wɔna hafi wowunɛ abe ale si wowu Yesu ene?
▪ Nu si Romatɔwo wɔna tsɔ hea to na aglãdzelawo, sedzidalawo, kple ame bubu siwo dze aglã ɖe dziɖuɖua ŋue nye be wohea wo ɖe fuwɔameti ŋu ahagblẽ wo ɖe afi ma va se ɖe esime woku. Wobua tohehe sia be enye ku si vloe wu bubuawo katã.
Agbalẽ si nye Palestine in the Time of Jesus gblɔ be: “Wowɔnɛ le dutoƒo, ehea vlodoame vaa ame dzi, eye amea sea veve helĩhelĩ, eye wowɔnɛ kple susu be ame sia ame si ate kpɔ be yeadze aglã ɖe dziɖuɖua ƒe nuɖoanyi ŋu la navɔ̃.” Roma agbalẽŋlɔla aɖe si nɔ anyi le blema gblɔ ku ɖe nu vlo wɔlawo wuwu ŋu be: “Mɔdodo siwo dzi amewo tona wu lae wotiana be woawu amewo le, bena ame akpa gãtɔ nakpɔ eteƒe ne woavɔ̃.”
Josephus gblɔ be esi Titus ƒe asrafowo ɖe to ɖe Yerusalem le ƒe 70 Mía Ŋɔli me la, wowu aboyome aɖe alea le glia godo bene vɔvɔ̃ naɖo ame siwo le dua ta kpɔm, ale be woana ta. Esi woxɔ dua mlɔeba la, wowu ame geɖewo to mɔnu sia ke dzi.
Le ŋutinya me la, ɣeyiɣi si me wowu amewo alea le agbɔsɔsɔ gãtɔ me lae nye esi Spartacus (73-71 D.M.Ŋ.) nɔ ŋgɔ na aglãdzedze aɖe si me woɖu wo dzi le eye wowu kluvi kple gamenɔla 6,000 le mɔ si tso Capua ɖo ta Roma la dzi.
[Nɔnɔmetata si le axa 10]
“Tsɔ Baraba na mí” Charles Muller ye tae, 1878