Yi Edzi Nàsubɔ Yehowa Kple Dzi Blibo

“Vinye . . . , dze si fofowò ƒe Mawu la, eye nàsubɔe kple dzi blibo.”—1 KRON. 28:9.

DI NYABIASE SIAWO ƑE ŊUÐOÐOWO:

Nu kae nye kpɔɖeŋudzi la?

Mɔ ka dzie míate ŋu ato adzro míaƒe dzia me kpɔ?

Aleke míawɔ be míayi edzi anɔ Yehowa subɔm kple dzi blibo?

1, 2. (a) Amegbetɔ ƒe ŋutinu ka ŋue woƒo nu tso le kpɔɖeŋunyagbɔgblɔ nu le Mawu ƒe Nya la me zi geɖe wu bubu ɖe sia ɖe? (b) Nu ka tae wòle vevie be míase nu si kpɔɖeŋudzi la fia gɔme?

WOYƆ amegbetɔ ƒe ŋutinuwo le kpɔɖeŋunyagbɔgblɔ nu zi geɖe le Mawu ƒe Nya la me. Le kpɔɖeŋu me, blemafofo Hiob gblɔ be: “Nu madzɔmadzɔ aɖeke mele nye asiwo me o.” Fia Salomo de dzesii be: “Nya nyui xɔxɔ dea ami ƒuto me.” Yehowa na kakaɖedzi Ezekiel be: “Mawɔ wò ŋkume wòasẽ abe lotamekpe ene.” Eye ame aɖewo gblɔ na apostolo Paulo be: “Èle nane siwo míaƒe towo mese kpɔ o la gblɔm.”—Hiob 16:17; Lod. 15:30; Eze. 3:9; Dɔw. 17:20.

² Gake woƒo nu tso amegbetɔ ƒe ŋutinu aɖe ya ŋu le kpɔɖeŋunyagbɔgblɔ nu zi gbɔ zi geɖe le Biblia me wu bubu ɖe sia ɖe. Eyae nye esi dze le nuteƒewɔla Xana ƒe gbedodoɖa me esi wògblɔ be: “Nye dzi le aseye tsom le Yehowa me.” (1 Sam. 2:1) Le nyateƒe me la, Biblia ŋlɔlawo yɔ dzi la zi akpe ɖeka kloe, eye le wo katã kloe me la, wozãe le kpɔɖeŋunyagbɔgblɔ nu. Eya ta ele vevie ŋutɔ be míase nu si dzi la fia gɔme, elabena Biblia gblɔ be ehiã be míakpɔ eta.—Mixlẽ Lododowo 4:23.

KPƆÐEŊUDZI LA—NU KAE WÒNYE?

 3. Aleke míawɔ ase nu si “dzi” si wozã le Biblia me la fia gɔme? Wɔ eƒe kpɔɖeŋu.

³ Togbɔ be Mawu ƒe Nya la meɖe nu si ŋkɔnya “dzi” fia gɔme tẽe o hã la, ekpe ɖe mía ŋu be míase nu si nya ma fia gɔme. Le mɔ ka nu? Míate ŋu awɔ eƒe kpɔɖeŋu ale: Tsɔe be woɖo kpe zɔzrɔ̃e suesue akpe geɖe siwo le amadede vovovo me la ɖe wo nɔewo dzi wòzu gli kɔkɔ aɖe si ŋu nɔnɔmetata dzeani aɖe le. Ne ame aɖe te ɖa le eŋu yi megbe vie la, akpɔe be woɖo kpeawo le ɖoɖo tɔxɛ aɖe nu ale gbegbe be wòdze abe ɖe wota nu dzeani aɖe ɖe glia ŋu ene. Nenema kee, wòle be míalé ŋku ɖe teƒe siwo katã wozã nya “dzi” le le Biblia me la ŋu nyuie ale be míate ŋu ase nu si wòfia gɔme. Ekema nu kae kpɔɖeŋudzi la nye?

 4. (a) Nu kae “dzi” la le tsitre ɖi na? (b) Gɔmesese kae le Yesu ƒe nya si dze le Mateo 22:37 la si?

⁴ Biblia ŋlɔlawo zã “dzi” la tsɔ ɖɔ amegbetɔ ƒe ememe ƒe amenyenye bliboa. Elɔ ame ƒe didiwo, tamesusuwo, ale si wòwɔa nui, eƒe nɔnɔmewo, ŋutetewo, nu siwo ʋãnɛ wòwɔa nu, kple eƒe taɖodzinuwo ɖe eme. (Mixlẽ 5 Mose 15:7; Lododowo 16:9; Dɔwɔwɔwo 2:26.) Abe ale si numekugbalẽ aɖe gblɔe ene la, efiaa “ame si ƒomevi tututu ame nye le ememe.” Gake ɣeaɖewoɣi la, “dzi” la mefiaa nu mawo katã o. Le kpɔɖeŋu me, Yesu gblɔ be: “Ele be nàlɔ̃ Yehowa wò Mawu kple wò dzi blibo kple wò luʋɔ blibo kple wò tamesusu blibo.” (Mat. 22:37) Le afi sia la, “dzi” la fia ame ƒe didiwo kple seselelãmewo. Esi Yesu yɔ dzi, luʋɔ, kple tamesusu ɖe vovo la, ɖe wònɔ gbe tem ɖe edzi be ele be míalɔ̃ Mawu le dzi me eye míaɖee afia le míaƒe agbenɔnɔ kple ale si míezãa míaƒe tamebubuŋutetewo la siaa me. (Yoh. 17:3; Ef. 6:6) Gake ne woyɔ “dzi” la ɖeɖe dzaa la, etsia tsitre ɖi na ame ƒe amenyenye ememetɔ bliboa.

NU SI TA WÒHIÃ BE MÍADZƆ MÍAƑE DZI ŊU

 5. Nu ka tae míedi be míawɔ míaƒe ŋutete ɖe sia ɖe be míasubɔ Yehowa kple dzi blibo?

⁵ Fia David ɖo ŋku nya sia dzi na Salomo tso dzi la ŋu be: “Vinye Salomo, dze si fofowò ƒe Mawu la, eye nàsubɔe kple dzi blibo kpakple luʋɔ blibo, elabena Yehowa dzroa dziwo katã me kpɔna, eye wònya tamesusuwo katã!” (1 Kron. 28:9) Le nyateƒe me la, Yehowa dzroa dziwo katã me kpɔna, mía tɔwo hã le eme. (Lod. 17:3; 21:2) Eye nu si wòkpɔ le míaƒe dzi me la kpɔa ŋusẽ gã aɖe ɖe mía kplii dome ƒomedodoa kple ale si etsɔme ava nɔ na mí la dzi. Eya ta susu nyuiwo li siwo tae wòle be míawɔ ɖe David ƒe aɖaŋuɖoɖo siwo tso gbɔgbɔ me la dzi ale be míawɔ míaƒe ŋutete ɖe sia ɖe be míasubɔ Yehowa kple dzi blibo.

 6. Nu kae wòle be wòanɔ nyanya na mí le tame si míeɖo be míasubɔ Yehowa la ŋu?

⁶ Le nyateƒe me la, esi míenye Yehowa Ðasefowo ta la, dɔ siwo míewɔna dzonɔamemetɔe la ɖenɛ fiana xoxo be míedi vevie be míasubɔ Mawu kple dzi blibo. Le ɣeyiɣi ma ke me la, míenyae be Satana ƒe xexe vɔ̃ɖi sia ƒe nyaƒoɖeamenuwo kple míaƒe ŋutilã madebliboa ƒe nudzodzrowo kpɔa ŋusẽ gã aɖe ɖe mía dzi eye woate ŋu agbɔdzɔ tame si míeɖo kplikpaa be míasubɔ Mawu tso dzi blibo me la me. (Yer. 17:9; Ef. 2:2) Eya ta be míakpɔ egbɔ be esia nagadzɔ o—si fia be, míagaɖe ŋu ɖi o—la, ehiã be míanɔ míaƒe dzi la me dzrom kpɔ edziedzi. Aleke míate ŋu awɔ esiae?

 7. Nu kae ɖea míaƒe dzi ƒe nɔnɔme fiana?

⁷ Ðikeke mele eme o be, míaƒe amenyenye ememetɔ la medzena wokpɔna o, abe ale si ko womate ŋu akpɔ ati ƒe tome alo eƒe tume o ene. Gake abe ale si Yesu gblɔe le Todzimawunya la me ene la, ale si ko atikutsetse ɖenɛ fiana ne ati aɖe nyo alo menyo o la, nenema kee míaƒe nuwɔnawo ɖea míaƒe dzi ƒe nɔnɔme fiana. (Mat. 7:17-20) Mina míadzro nuwɔna siawo dometɔ ɖeka me kpɔ.

MƆ AÐE SI DZI MÍATO ADZRO MÍAƑE DZI LA ME KPƆ

 8. Le Yesu ƒe nya si le Mateo 6:33 nu la, aleke míeɖea nu si le míaƒe dzi me fiana?

⁸ Do ŋgɔ le Todzimawunya ma ke me la, Yesu gblɔ nu si koŋ wòle be eƒe nyaselawo nawɔ atsɔ aɖee afia be yewodi be yewoasubɔ Yehowa kple yewoƒe dzi blibo la na wo. Egblɔ be: “Miyi edzi mianɔ fiaɖuƒe la kple Mawu ƒe dzɔdzɔenyenye dim gbã, eye woatsɔ nu bubu siawo katã akpe ɖe eŋuti na mi.” (Mat. 6:33) Le nyateƒe me la, nu si míetsɔna ɖoa nɔƒe gbãtɔ la ɖea nu siwo míedina, nu siwo míesusuna, kpakple nu siwo míeɖona be míawɔ le míaƒe dzi ƒe gogloeƒe la fiana. Eya ta nu siwo míetsɔ ɖoa nɔƒe gbãtɔ le agbe me la me dzodzro nye mɔ ɖeka aɖe si dzi míato anya ne míele Mawu subɔm kple dzi blibo loo alo míele ewɔm o.

 9. Aleke Yesu kpe ŋutsu aɖewoe, eye nu kae ale si wowɔ nui la ɖe fia?

⁹ Esi Yesu de dzi ƒo na eyomedzelawo be ‘woayi edzi anɔ fiaɖuƒe la dim gbã’ megbe kpuie la, nane dzɔ, si nye ale si nu si ame aɖe tsɔna ɖoa nɔƒe gbãtɔ la ɖea nu si le eƒe dzi me fiana vavã la ƒe kpɔɖeŋu. Nya Nyui ŋlɔla Luka dze nudzɔdzɔ sia ŋuti nuŋlɔɖia gɔme kple nya siawo be, Yesu ƒe “mo trɔ ɖe Yerusalem yiyi ŋu vevie” togbɔ be enya nu si gbɔna dzɔdzɔ ge ɖe edzi le afi ma mlɔeba la nyuie hã. Esi Yesu kple eƒe apostoloawo nɔ “mɔa dzi yina la,” edo go ŋutsu aɖewo eye wòkpe wo dometɔ ɖe sia ɖe be: “Dze yonyeme.” Ŋutsu mawo di be yewoawɔ ɖe Yesu ƒe amekpekpea dzi—gake nya aɖe nɔ wo dometɔ ɖe sia ɖe si. Ame ɖeka ɖo eŋu be: “Ðe mɔ nam be mayi aɖaɖi fofonye gbã.” Ame bubu gblɔ be: “Madze yowòme; gake gbã la, na maklã nye aƒemetɔwo.” (Luka 9:51, 57-61) Vovototo gã kae nye esi le ale si Yesu ɖoe kplikpaa be yeawɔ Mawu ƒe lɔlɔ̃nu kple ale si ŋutsu siawo wɔ nu ɖe Yesu ƒe amekpekpea ŋui la dome! Esi wotsɔ woawo ŋutɔwo ƒe nudidiwo ɖo nɔƒe gbãtɔ, ke menye Fiaɖuƒea ƒe nuwo o ta la, woɖee fia be yewoƒe dzi meku ɖe Mawu ŋu bliboe o.

10. (a) Aleke ame geɖe wɔ ɖe Yesu ƒe amekpekpea dzi egbea? (b) Kpɔɖeŋu kpui kae Yesu wɔ?

¹⁰ Ale si míawo ya míewɔ nui la to vovo na ŋutsu mawo tɔ kura. Míelɔ̃ wɔ ɖe Yesu ƒe amekpekpea dzi nunyatɔe heva zu eyomedzelawo eye míele Yehowa subɔm fifia gbe sia gbe. Le mɔ sia nu la, míeɖe ale si míese le míaƒe dzi me ɖe Yehowa ŋu la fia. Gake togbɔ be míele agbagba dzem le hamea me vevie hã la, ele be wòanɔ susu me na mí be nane ate ŋu adzɔ ɖe míaƒe dzi dzi bɔbɔe. Nu kae? Yesu ƒo nu tso eŋu le dzeɖoɖoa dzi yiyi kple ŋutsu siwo wòkpe be woava zu yeƒe nusrɔ̃lawo la me esi wògblɔ be: “Ame si tsɔ eƒe asi da ɖe kodzi dzi, gake wògale nu siwo le megbe kpɔm la, medze na Mawu fiaɖuƒe la o.” (Luka 9:62) Nu kae míate ŋu asrɔ̃ tso kpɔɖeŋu ma me?

ÐE ‘MÍELÉNA ÐE NU SI NYO LA ŊUA’?

11. Aleke apadɔwɔla si ŋu Yesu ƒo nu tsoe la ƒe dɔa va yii, eye nu ka tae?

¹¹ Mina míagblɔ nya bubuwo kpe Yesu ƒe kpɔɖeŋua be míase nufiame siwo le eme la gɔme nyuie wu. Apadɔwɔla aɖe le agble ŋlɔm vevie. Gake esi wòle nuŋɔŋlɔa dzi la, eganɔ nu siwo le edzi yim le eƒe aƒe me, eƒe ƒomea, xɔlɔ̃awo, nuɖuɖu, hadzidzi, nukoko, kple ya fafɛ xɔxɔ ŋu bum. Nu siawo le edzrom vevie ŋutɔ. Esi wòle dɔa wɔm hena ɣeyiɣi didi aɖe la, nu siawo va nɔ edzrom vevie ale gbegbe be wòɖe asi le kodzia ŋu trɔ hele “nu siwo le megbe” la kpɔm. Togbɔ be dɔ geɖe gali woawɔ hafi woaƒã nukuwo hã la, nu mawo he apadɔwɔlaa ƒe susu ɖa le dɔa dzi eye mewɔ eƒe dɔa nyuie o. Eme kɔ ƒãa be apadɔwɔlaa ƒe aƒetɔ mekpɔ dzidzɔ ɖe eŋu o, elabena medo dzi wɔ dɔa wu enu o.

12. Aleke míate ŋu atsɔ apadɔwɔla si le Yesu ƒe kpɔɖeŋua me la asɔ kple Kristotɔ aɖewo egbea?

¹² Fifia kpɔ ale si nu sia tɔgbi ate ŋu adzɔ egbeae ɖa. Míate ŋu atsɔ apadɔwɔla la asɔ kple Kristotɔ aɖe si ŋu wòdze le be ele subɔsubɔm nyuie evɔ le nyateƒe me la, ele gbɔgbɔmefɔku me. Le kpɔɖeŋu me, tsɔe be nɔvia doa vevie nu le subɔsubɔdɔa me. Gake togbɔ be edea kpekpeawo hekpɔa gome le gbeadzisubɔsubɔdɔa me hã la, mete ŋu dzudzɔ xexemenu aɖewo siwo doa dzidzɔ nɛ la ŋu bubu o. Le eƒe dzi ƒe gogloeƒe la, nu mawo dzronɛ vevie. Mlɔeba la, esi wòsubɔ ƒe geɖe megbe la, xexemenu mawo va nɔ edzrom vevie ale gbegbe be wòva trɔ hele “nu siwo le megbe kpɔm.” Togbɔ be dɔ geɖe gali wòawɔ le subɔsubɔdɔa me hã la, ‘melé agbenya la me ɖe asi goŋgoŋ o,’ eye megatsɔ dzo ɖe teokrasidɔwo wɔwɔ ŋu abe tsã ene o. (Flp. 2:16) Etena ɖe Yehowa, “nuŋeŋe ƒe Aƒetɔ la,” dzi ne ame aɖe medo dzi le dɔa wɔwɔ me o.—Luka 10:2.

13. Nu kae Yehowa subɔsubɔ kple dzi blibo lɔ ɖe eme?

¹³ Nufiamea me kɔ ƒãa. Ne míekpɔa gome le dɔwɔna nyui tuameɖo siwo nye hamea ƒe kpekpewo dede kple gomekpɔkpɔ le gbeadzisubɔsubɔdɔa me me edziedzi la, míedze na kafukafu. Gake Yehowa subɔsubɔ kple dzi blibo bia nu geɖe wu esiawo ko. (2 Kron. 25:1, 2, 27) Ne Kristotɔ aɖe galɔ̃a “nu siwo le megbe”—si fia xexemenu aɖewo—le eƒe dzi ƒe gogloeƒe la, esia ate ŋu agblẽ ƒomedodo si le woa kple Mawu dome la me. (Luka 17:32) Ne ‘míenyɔ ŋu nu vɔ̃ɖi eye míelé ɖe nu si nyo la ŋu’ vavã la, eya ko hafi ‘míadze na Mawu fiaɖuƒe la.’ (Rom. 12:9; Luka 9:62) Eya ta ehiã be mí katã míakpɔ egbɔ be Satana ƒe xexea me nu aɖeke nagaxe mɔ na mí be míalé fɔ ɖe Fiaɖuƒea ƒe nuwo ŋu kple dzi blibo o—aleke kee nu mawo ɖadze abe ɖe wole vevie alo wodoa dzidzɔ na ame ene o.—2 Kor. 11:14; mixlẽ Filipitɔwo 3:13, 14.

YI EDZI NÀNƆ ŊUDZƆ!

14, 15. (a) Aleke Satana le agbagba dzem be yeakpɔ ŋusẽ ɖe míaƒe dzi dzi? (b) Wɔ kpɔɖeŋu aɖe si ɖee fia be afɔku le ayemɔ si zãm Satana le la me.

¹⁴ Lɔlɔ̃ na Yehowa ʋã mí míetsɔ mía ɖokuiwo ɖe adzɔgbe nɛ. Tso ɣemaɣi la, mía dometɔ geɖe míeɖee fia ƒe geɖe be míeɖoe kplikpaa be míayi edzi asubɔ Yehowa kple dzi blibo. Ke hã Satana gale agbagba dzem kokoko be yeakpɔ ŋusẽ ɖe mía dzi. Míaƒe dzia kokoko domee wòdi be yeagblẽ. (Ef. 6:12) Ke hã ɖewohĩ ede dzesii be míele asi ɖe ge le Yehowa subɔsubɔ ŋu zi ɖeka kpoyi o. Eya ta ewɔa “nuɖoanyi sia” ŋu dɔ ayetɔe tsɔ dzea agbagba be yeana dzo si le mía me ɖe Mawu subɔsubɔ ŋu la nu nanɔ tsitsim vivivi. (Mixlẽ Marko 4:18, 19.) Nu ka tae Satana ƒe ayemɔ ma kpɔa dzidzedze ŋutɔ?

¹⁵ Kpɔɖeŋu aɖe akpe ɖe mía ŋu míaɖo nya sia ŋu. Tsɔe be èle agbalẽ aɖe xlẽm le elektrikkaɖi aɖe si le keklẽm nyuie ŋutɔ nu, gake kasia elektrikkaɖigo la fiã. Ède dzesi nu si dzɔ la enumake, elabena xɔa me do viviti tsiɖitsiɖi. Ètsɔ elektrikkaɖigo bubu ɖɔli esi fiã la, eye xɔa me gakɔ nyuie ake. Ŋkeke si kplɔe ɖo ƒe zã me la, ègava le nu xlẽm le akaɖi ma ke nu. Gake mènyae be ame aɖe tsɔ akaɖigo si ƒe keklẽ ɖiɖi wu tɔwòa vie ko la va ɖɔlii o. Ðewohĩ màkpɔ vovototoa adze sii o. Eye ne ame aɖe va ɖɔli elektrikkaɖigo sia hã kple bubu aɖe si ƒe keklẽ ɖiɖi wui vie ko la le ŋkeke si kplɔe ɖo dzi la, ɖewohĩ màde dzesi esia hã o. Nu ka tae? Elabena elektrikkaɖi la ƒe keklẽ le ɖiɖim vivivi ale gbegbe be mète ŋu kpɔe dze sii o. Nenema kee, Satana ƒe xexea ƒe ŋusẽkpɔɖeamedzi ate ŋu ana míaƒe dzonɔamemea nu nanɔ tsitsim vivivi. Ne Kristotɔ aɖe mele ŋudzɔ o la, mate ŋu ade dzesi esia o, eye ne edzɔ alea la, ke Satana ɖu edzi.—Mat. 24:42; 1 Pet. 5:8.

GBEDODOÐA LE VEVIE

16. Aleke míate ŋu akpɔ mía ɖokui ta tso Satana ƒe aɖaŋu vɔ̃wo me?

¹⁶ Aleke míate ŋu akpɔ mía ɖokui ta tso Satana ƒe aɖaŋu vɔ̃ siawo me eye míayi edzi anɔ Yehowa subɔm kple dzi blibo? (2 Kor. 2:11) Gbedodoɖa le vevie. Paulo de dzi ƒo na eƒe haxɔsetɔwo be “[woanɔ] te sesĩe ɖe Abosam ƒe aɖaŋu vɔ̃wo nu.” Eyome eɖo aɖaŋu na wo be: “Mitsɔ gbedodoɖa ɖe sia ɖe ƒomevi kple kokoƒoƒowo do gbe ɖa ɣeawokatãɣi.”—Ef. 6:11, 18; 1 Pet. 4:7.

17. Nu kae míesrɔ̃ tso Yesu ƒe gbedodoɖawo me?

¹⁷ Be míatsi tsitre sesĩe ɖe Satana ŋu la, nunya anɔ eme be míasrɔ̃ Yesu kple didi si le Eme be yeasubɔ Yehowa kple yeƒe dzi blibo la. Le kpɔɖeŋu me, de dzesi nu si Luka ŋlɔ tso ale si Yesu do gbe ɖa le zã si do ŋgɔ na eƒe ku me ŋu; eŋlɔ be: “Esi wònɔ nu xam vevie ta la, egado gbe ɖa vevie wu.” (Luka 22:44) Yesu do gbe ɖa vevie kpɔ, gake le ɣeyiɣi sia me la, esi wònya be yele dodokpɔ sesẽtɔ me to ge le anyigba dzi la, egado gbe ɖa “vevie wu”—eye woɖo eƒe gbedodoɖaa ŋu nɛ. Yesu ƒe kpɔɖeŋua ɖee fia be míate ŋu ado gbe ɖa vevie ɣeaɖewoɣi wu ɣebubuɣiwo. Eya ta ne dodokpɔ si me tom míele la nu sẽ wu eye Satana le aɖaŋu vɔ̃ siwo nu sẽ wu la zãm ɖe mía ŋu la, ele be míado gbe ɖa “vevie wu” ahabia Yehowa ƒe ametakpɔkpɔ.

18. (a) Nya kawoe wòle be míabia mía ɖokuiwo tso míaƒe gbedodoɖawo ŋu, eye nu ka tae? (b) Nu kawoe kpɔa ŋusẽ ɖe míaƒe dzi dzi, eye le mɔ kawo nu? (Kpɔ aɖaka si le axa 16.)

¹⁸ Ne míedoa gbe ɖa alea la, nu kae ate ŋu ado tso eme na mí? Paulo gblɔ be: “Le nu sia nu me la, mitsɔ gbedodoɖa kple kokoƒoƒo kpakple akpedada ana Mawu nanya miaƒe didiwo; eye Mawu ƒe ŋutifafa, si ƒoa susu ɖe sia ɖe ta la, adzɔ miaƒe dziwo” ŋu. (Flp. 4:6, 7) Ɛ̃, ele be míanɔ gbe dom ɖa vevie edziedzi be míayi edzi anɔ Yehowa subɔm kple dzi blibo. (Luka 6:12) Eya ta bia ɖokuiwò be: ‘Ðe medoa gbe ɖa veviea? Eye ɖe medoa gbe ɖa edziedzia?’ (Mat. 7:7; Rom. 12:12) Ale si nàɖo nyabiase siawo ŋui la aɖe ale si gbegbe nèdi vevie tso dzi blibo me be yeasubɔ Mawu la fia.

19. Nu kae nàwɔ be nàyi edzi asubɔ Yehowa kple dzi blibo?

¹⁹ Abe ale si míekpɔe ene la, nu siwo míetsɔ ɖoa nɔƒe gbãtɔ le agbe me la ɖea ale si tututu míaƒe dzi ƒe nɔnɔme le fiana. Míedi be míakpɔ egbɔ be nu siwo míegblẽ ɖe megbe loo alo Satana ƒe aɖaŋu vɔ̃wo nagagbɔdzɔ tame si míeɖo be míasubɔ Yehowa kple dzi blibo la me o. (Mixlẽ Luka 21:19, 34-36.) Eya ta abe David ene la, míeyia edzi ƒoa kokoko na Yehowa be: “Tsɔ nye dzi ɖo nu ɖeka kolia ŋu.”—Ps. 86:11.

[Aɖaka si le axa 16]

NU ETƆ̃ SIWO KPƆA ŊUSẼ ÐE MÍAƑE DZI DZI

Abe ale si ko míetea ŋu ɖea afɔ aɖewo woɖea vi na míaƒe lãkusidzia ene la, nenema kee míate ŋu aɖe afɔ aɖewo be míaƒe kpɔɖeŋudzia nanɔ lãmesẽ me. Bu nu vevi etɔ̃ siawo ŋu kpɔ:

1 Nunyiame: Míaƒe lãkusidzi la hiãa nunyiame agbɔsɔsɔme si sɔ nɛ. Nenema kee wòhiã be míakpɔ egbɔ be míanɔ nu nyui agbɔsɔsɔme si sɔ la ɖum le gbɔgbɔ me to ɖokuisinusɔsrɔ̃, ŋugbledede, kple kpekpewo dede dzi.—Ps. 1:1, 2; Lod. 15:28; Heb. 10:24, 25.

2 Kamedede: Be míaƒe lãkusidzia nanɔ lãmesẽ me la, ɣeaɖewoɣi la, ehiãna be míade míaƒe kawo me veviedodotɔe. Nenema kee gomekpɔkpɔ le gbeƒãɖeɖedɔa me dzonɔamemetɔe—ɖewohĩ to gbeƒãɖeɖedɔa dzidzi ɖe edzi me—kpena ɖe míaƒe kpɔɖeŋudzia ŋu wònɔa lãmesẽ me.—Luka 13:24; Flp. 3:12.

3 Ame siwo dome míele: Ame mavɔ̃mawu siwo dome míele la ate ŋu ana nu nate míaƒe lãkusidzia kple míaƒe kpɔɖeŋudzia siaa ŋu. Ke hã míate ŋu aɖe esia dzi kpɔtɔ ne míedea ha kple míaƒe haxɔsetɔwo edziedzi ale si míate ŋui, elabena wotsɔa ɖe le eme na mí vavã eye woƒe dzi ku ɖe Mawu ŋu bliboe.—Ps. 119:63; Lod. 13:20.