Yesu ƒe Nukunuwo—Ŋutinya Alo Glie Wonyea?

“Le zã ƒe ŋudzɔɣi enelia me la Yesu le ƒu dzi zɔm gbɔna wo gbɔ.”—Mateo 14:25.

DZIXƆSE be Yesu Kristo wɔ nukunuwo le vevie le ame miliɔn geɖe gome le xexeame katã abe alesi ko Mawu ŋutɔ dzixɔxɔse hã le vevie ene. Nyanyuiŋlɔlawo—Mateo, Marko, Luka, kple Yohanes—ƒo nu tso Yesu ƒe nukunuwo dometɔ 35 ŋu. Gake woƒe nuŋlɔɖiwo fia be ewɔ nu klitsu bubu geɖe.—Mateo 9:35; Luka 9:11.

Menye modzakaɖeɖe na amewo tae wòwɔ nukunu siawo o. Wonye nu ɖedzesi siwo ɖo kpe nya si Yesu gblɔ be yenye Mawu ƒe Vi, Mesia, si wokpɔ mɔ na ɣeyiɣi didi aɖe la dzi. (Yohanes 14:11) Mose wɔ nukunuwo esi wòɖe eɖokui fia Israel-dukɔ si nɔ kluvinyenye me. (Mose II, 4:1-9) Esɔ be woakpɔ mɔ be Mesia si ŋu wogblɔ ɖi le be alolo wu Mose la hã nawɔ dzesi aɖe atsɔ afia be Mawu le megbe na ye. (Mose V, 18:15) Eyata Biblia yɔ Yesu be “ŋutsu, si ŋuti Mawu na kpeɖoɖodzi mi [Yudatɔwo] le to nu dzɔtsuwo kple nukunuwo kple dzesiwo, siwo Mawu wɔ to eyama dzi . . . me.”—Dɔwɔwɔwo 2:22.

Tsã la, amewo lɔ̃ ɖe alesi Biblia yɔ Yesu be enye nukunuwɔla la dzi ɖimakemakee. Gake le nyitsɔ laa ƒewo me la, ɖikelawo va ke ɖi Nyanyuiawo ƒe nuŋlɔɖiwo vevie. Lloyd Graham ƒo nu tso Biblia ƒe nuŋlɔɖi le Yesu ƒe ƒudzizɔzɔ ŋuti le eƒe agbalẽ Deceptions and Myths of the Bible me, hegblɔ gɔ̃ hã be: “Enye numanyamanya ŋutɔ be woaxɔ nusia dzi ase, gake ame miliɔn geɖe xɔe se. Evɔ míebiana be nukae gblẽ le míaƒe xexeame ŋu hã. Ðe nèbu be numanyamanya sia gbegbe ate ŋu awɔ xexeme aɖe si anyo wua?”

Ðe Manyawɔ Oa?

Gake susu mele ɖikeke siawo me o. The World Book Encyclopedia ɖe nukunu gɔme be “nudzɔdzɔ aɖe si me womate ŋu aɖe to dzɔdzɔmese nyanyɛwo dzi o.” Le gɔmeɖeɖe sia nu la, anye ne woabu television si ɖea nuwo le amadede me, telefon, alo kɔmpiuta sue be wonye nukunuwo le ƒe alafa ɖeka pɛ siwo va yi me! Ðe susu le eme be woahe glãka agblɔ be nane manyawɔ o le esi míate ŋu anɔ te ɖe egbegbe dzɔdzɔmeŋutinunya dzi aɖe eme o ta?

Nyateƒenya bubu si ŋu wòle be míabu enye si: Le Helagbe gbãtɔ si me woŋlɔ “Nubabla Yeyea” ɖo me la, nya si wozã na “nukunu” enye dyʹna·mis—si gɔmee nye “ŋusẽ.” Woɖe egɔme hã be “ŋusẽdɔwo” alo “ŋutete.” (Luka 6:19; Korintotɔwo I, 12:10; Mateo 25:15) Biblia gblɔ be Yesu ƒe nukunuwo nye “Mawu ƒe gãnyenye” ɖeɖefia. (Luka 9:43) Ðe nukunu mawo manyawɔ na Mawu ŋusẽkatãtɔ—Amesi si “ŋusẽ geɖe kple alɔkame sesẽ” le la oa?—Yesaya 40:26.

Eƒe Nyateƒenyenye ƒe Kpeɖodzi

Nyanyui eneawo me toto nyuie gaɖe kpeɖodzi bubu fia si ana woaxɔ wo dzi ase. Nu ɖekae nye be nuŋlɔɖi siawo menye gliwo alo xodadawo o. Le kpɔɖeŋu me, bu aʋatsoŋutinya siwo wokaka le Yesu ŋuti le ƒe alafa siwo va me le eƒe ku megbe ŋu kpɔ. “Toma ƒe Nyanyui” si ŋu kpeɖodzi mele o gblɔ be: “Esi Yesu, ŋutsuvi sia, tsi xɔ ƒe atɔ̃ la . . . , eyi ɖato kɔƒe la me eye ŋutsuvi aɖe nɔ du dzi va lɔ eƒe abɔ. Dzi ku Yesu eye wògblɔ nɛ be: ‘Màgaɖe zɔ ayi ŋgɔ gbeɖe o,’ enumake ɖevi la dze anyi heku.” Ŋutinya si ƒomevi wònye la kpɔkpɔ mesesẽ o—nya kpakpae. Hekpe ɖe eŋu la, ŋutsuvi ŋutasẽla vɔ̃ɖi sia si ŋu woƒo nu tsoe le afisia la meɖi Biblia ƒe Yesu le mɔ aɖeke nu o.—Tsɔe sɔ kple Luka 2:51, 52.

Bu Nyanyuiwo ƒe nuŋlɔɖi vavãwo ŋu azɔ. Nyakpakpawo alo alakpanyawo mele wo me o. Yesu wɔ nukunuwo tsɔ kpɔ amewo ƒe nuhiahiã ŋutɔŋutɔwo gbɔe, menye eya ŋutɔ ƒe didi ta koe wòwɔ wo o. (Marko 10:46-52) Yesu mewɔ eƒe ŋusẽ ŋudɔ ɖe eya ŋutɔ ƒe viɖe ta kpɔ o. (Mateo 4:2-4) Eye mewɔ wo ŋudɔ be wòatsɔ ado eɖokui ɖe dzi gbeɖe o. Le nyateƒe me la, esi Fia Herodes numemikpɔla di be Yesu nawɔ “dzesi” wɔnuku aɖe na ye la, Yesu “meɖo ɖeke ŋu nɛ o.”—Luka 23:8, 9.

Yesu ƒe nukunuwo hã to vovo sã na ŋɔdzomenuwɔlawo, akunyawɔlawo, kple xɔsegbedalawo tɔ. Eƒe ŋusẽdɔwo kɔ Mawu ŋu ɣesiaɣi. (Yohanes 9:3; 11:1-4) Kɔnuwɔwɔwo, ŋkɔƒoƒoɖowo, adegbeƒoƒo, ayemenuwɔwɔ alo gabaɖadodo menɔ eƒe nukunuwo me o. Esi Yesu do go nubiala ŋkuagbãtɔ aɖe si ŋkɔe nye Bartimeo, amesi do ɣli be, “Rabuni, [na] makpɔ nu” la, ɖeko Yesu gblɔ nɛ be: “Heyi, wò xɔse la ɖe wò! Eye enumake la wòkpɔ nu.”—Marko 10:46-52.

Nyanyuiawo ƒe nuŋlɔɖiwo ɖee fia be naneke meɣla ɖe Yesu ƒe ŋusẽdɔwɔwɔwo me o, mewɔ ɖoɖo tɔxɛ aɖeke ɖe wo wɔwɔ ŋu alo to ayeme alo ameflumɔwo dzi o. Ewɔ wo le gaglãgbe, eye zi geɖe le eteƒekpɔla gbogbo aɖewo ŋkume. (Marko 5:24-29; Luka 7:11-15) Medo kpo nu le dɔdada aɖeke me hegblɔ be xɔse mele dɔnɔ aɖe si abe alesi egbegbe xɔsegbedalawo tenɛ kpɔ ene o. Mateo 8:16 gblɔ be: “[Eda] gbe le amesiwo katã ƒe lãme gblẽ la ŋuti.”

Agbalẽnyalagã Arthur Pierson gblɔ le Kristo ƒe nukunuwo ŋu le eƒe agbalẽ “Many Infallible Proofs:” The Evidences of Christianity me be: “Dɔ gbogbo siwo wòda, alesi wòda woe keŋkeŋ enumake, eye medo kpo nu le ɖeke alo ame kukuwo gɔ̃ hã fɔfɔ me o la, de vovototo gã aɖe nukunu siawo kple yeaɖi nukunu siwo wɔm wole fifia alo esiwo woawɔ le ɣeyiɣi bubu ɖesiaɖe me la dome.”

Xexemenunyalawo ƒe Kpeɖodzinyawo

Arthur Pierson gagblɔ nya bubu si ɖo kpe Nyanyuiawo ƒe nuŋlɔɖiwo dzi esime wògblɔ be: “Ŋɔŋlɔawo me nukunuwo ŋuti kpeɖodzi aɖeke meɖe dzesi de alesi eƒe futɔwo hã lɔ̃ ɖe wo dzi nu o.” Yuda-subɔsubɔhakplɔlawo di vevie be yewoaɖi gbɔ Yesu, gake eƒe nukunuwo nɔ nyanya ale gbegbe be tsitretsiɖeŋulawo mete ŋu gbe wo o. Nusi ko wote ŋu wɔe nye be wogblɔ be gbɔgbɔ vɔ̃wo ƒe ŋusẽe wòtsɔ wɔ woe. (Mateo 12:22-24) Esi Yesu ku ƒe alafa aɖewo megbe la, Yudatɔwo ƒe Talmud-ŋlɔlawo gagblɔ be nukunuwɔwɔ ƒe ŋusẽ nɔ Yesu si. Le Jewish Expressions on Jesus ƒe nya nu la, wogblɔ be “akunyae wòwɔ.” Ðe woate ŋu agblɔ nya ma ne anya awɔ gɔ̃ hã be woanɔ te ɖe nu sue aɖe dzi agbe Yesu ƒe nukunuwo agblɔ be glitoto ko wonyea?

Ƒe alafa enelia me sɔlemehawo ƒe ŋutinyaŋlɔla Eusebius gagblɔ kpeɖodzinya bubu. Eŋlɔ Quadratus aɖe si ŋlɔ lɛta ɖo ɖe fiagã la tsɔ ʋli Kristotɔwo tae ƒe nya ɖe eƒe agbalẽ The History of the Church From Christ to Constantine me. Quadratus ŋlɔ be: “Míaƒe Ðela la ƒe nukunuwo li woakpɔ ɣesiaɣi, elabena wonye nyateƒe—menye ɣeyiɣi si me wòyɔ dɔ amewo alo fɔ wo ɖe tsitre koe wokpɔ wo o ke wonɔ anyi ɣesiaɣi wokpɔ, menye esime Ðela la nɔ mía dome ɖeɖeko o, ke ɣeyiɣi didi aɖe le Eƒe dzodzo megbe hã; le nyateƒe me la, wo dometɔ aɖewo nɔ agbe va ɖo nye ŋutɔ nye agbenɔɣi ke.” Agbalẽnyalagã William Barclay de dzesii be: “Nya si gblɔm Quadratus le enye be amesiwo wòwɔ nukunuwo na nɔ anyi wokpɔ le yeƒe ɣeyiɣia hã me. Ne ema menye nyateƒe o la, anye ne ɖeko Roma-dziɖuɖua agblɔ be aʋatsoe.”

Susu le eme be woaxɔ Yesu ƒe nukunuwo dzi ase, gɔmesese le eŋu eye ewɔ ɖeka kple eƒe kpeɖodziwo hã bliboe. Gake Yesu ƒe nukunuwo menye ŋutinya kukuwo o. Hebritɔwo 13:8 ɖo ŋku edzi na mí be: “Yesu Kristo nye eyama ke etsɔ kple egbe, yi ɖe mavɔmavɔ me.” Ẽ, ele agbe le dziƒo egbea, eye wòte ŋu wɔa eƒe ŋusẽ wɔnukuwo ŋudɔ le mɔ si lolo wu esiwo wòwɔ esi wònye amegbetɔ nɔ anyigba dzi la nu. Hekpe ɖe eŋu la, Nyanyuiawo ƒe nuŋlɔɖiwo le eƒe nukunuwo ŋu (1) fia nu nyui aɖe Kristotɔwo egbea, (2) eɖe Yesu ƒe amenyenye dodzidzɔnamewo fia, eye (3) wòhe susu yi ɣeyiɣi si ava kpuie esime nudzɔdzɔ siwo wɔ nuku wu adzɔ la dzi!

Nyati si kplɔe ɖo adzro Biblia me nuŋlɔɖi nyanyɛ etɔ̃ me atsɔ aɖe nya vevi siawo me.