Yesu Dzidzi—Ŋutinya la Ŋutɔŋutɔ

BU NUDZƆDZƆ aɖe si ŋu ame geɖe nya nu le nyuie le miaƒe dukɔa ƒe ŋutinya me ŋu kpɔ. Kpeɖodzi geɖe le eŋu eye ŋutinyaŋlɔla geɖe ŋlɔe ɖi. Azɔ nukae nàwɔ ne ame aɖe gblɔ na wò be nu ma medzɔ kpɔ o eye be nya bliboa katã nye nyakpakpa? Alo ne míetrɔe ɖe mía ɖokui ŋu la, nukae nàwɔ ne ame aɖe gblɔ be nusiwo ƒowòmetɔwo gblɔ na wò ku ɖe wò ŋutɔ tɔgbuiwò ƒe dzidzi kple eƒe ɖevimegbenɔnɔ ŋu ƒe akpa gãtɔ menye nyateƒe o? Le nya evea siaa gome la, ɖewohĩ nya ma ɖeɖe gbɔgblɔ ave dɔme na wò. Ðikeke mele eme o be màxɔ nya siawo dzi ase le alesi wogblɔe ta ko o!

Ke hã egbea la, ɖikela geɖe melɔ̃na ɖe Yesu dzidzi ŋuti nuŋlɔɖi siwo Mateo kple Luka ŋlɔ ɖe Nyanyuigbalẽawo me dzi o. Wogblɔna be nuŋlɔɖiawo tsi tre ɖe wo nɔewo ŋu eye ɖekawɔwɔ mele wo dome o, eye be alakpanyawo kple ŋutinyagbɔgblɔ me vodadawo le woa kple evea siaa me. Ðe ema ate ŋu anye nyateƒea? Le esi teƒe be míalɔ̃ ɖe nya siawo dzi la, mina mía ŋutɔwo míadzro Nyanyuiawo me nuŋlɔɖiawo me akpɔ. Ne míele wo me dzrom la, mina míakpɔ nusi woate ŋu afia mí egbea.

Nusita Woŋlɔ Wo

Gbã la, enyo be míaɖo ŋku tameɖoɖo si le Biblia ƒe nuŋlɔɖi siawo ŋu dzi. Menye agbemeŋutinyawoe wonye o; Nyanyuigbalẽwoe wonye. Ele vevie be míade dzesi vovototo sia. Le agbemeŋutinya me la, eŋlɔla ate ŋu aŋlɔ nya wòayɔ axa alafa geɖe dzi adze agbagba be yeaɖe alesi amesi ŋu yele nua ŋlɔ̃m tsoe wɔ va zu amesi xɔ ŋkɔ. Eyata, agbemeŋutinya aɖewo zãa axa bla nanewo ɖe amesiwo ŋu nya ŋlɔ̃m wole la dzilawo, edzidzi, kple eƒe ɖevimenyawo me ɖeɖe tsitotsito ŋu. Mele nenema le Nyanyuigbalẽawo ya me o. Le Nyanyuigbalẽ eneawo dome la, Mateo kple Luka tɔ eveawo koe ƒo nu tso Yesu dzidzi kple eƒe ɖevimenɔɣi ŋu. Gake menye woƒe taɖodzinue nye be yewoaɖe alesi Yesu wɔ va zu amesi wònye la me o. Ðo ŋku edzi be Yesu yomedzelawo nyae be enye gbɔgbɔmenuwɔwɔ nɔ dziƒo hafi va anyigba dzi. (Yohanes 8:23, 58) Eyata Mateo kple Luka meƒo nu tso Yesu ƒe ɖevimenɔɣi ŋu be yewoatsɔ aɖe amesi ƒomevi wòva zu me o. Ke boŋ nudzɔdzɔ siwo sɔ ɖe tameɖoɖo si le woƒe Nyanyuigbalẽawo ŋɔŋlɔ ŋu nue wogblɔ.

Ke tameɖoɖo ka tae woŋlɔ wo? Nya “nyanyui” fia “dzidzɔnya.” Gbedasi ma ke nɔ ame eveawo si—be Yesue nye Mesia alo Kristo si ƒe ŋugbe wodo la; be eku ɖe ameƒomea ƒe nuvɔ̃wo ta; eye be wofɔe ɖe tsitre yi dziƒo. Gake nɔnɔme vovovowo mee nuŋlɔla eveawo tso eye ame vovovowoe woŋlɔ nyaawo na. Mateo si nye nudzɔla la ŋlɔ eƒe nyawo wòsɔ na Yudatɔwo koŋ. Luka si nye atikewɔla la ŋlɔe ɖo ɖe “amegã Teofil”—amesi anya nɔ ɖoƒe kɔkɔ aɖe—kple na Yudatɔwo kple Trɔ̃subɔlawo siaa. (Luka 1:1-3) Nuŋlɔla ɖesiaɖe tia nudzɔdzɔ siwo sɔ nyuie wu si ate ŋu ana eƒe nuxlẽlawo naxɔ nyaa dzi ase. Le esia ta, Mateo ƒe nuŋlɔɖia te gbe ɖe Hebri Ŋɔŋlɔawo me nyagblɔɖi siwo va eme ɖe Yesu dzi la dzi. Gake Luka ya ŋlɔe ɖe ŋutinyaŋɔŋlɔ mɔnu si gɔme eƒe nuxlẽla siwo menye Yudatɔwo o ate ŋu ase nu.

Eyata mewɔ nuku o be woƒe nuŋlɔɖiawo to vovo. Gake evea metsi tre ɖe wo nɔewo ŋu, abe alesi ɖikelawo gblɔnɛ ene o. Wode nu wo nɔewo me hetsia ɖe wo nɔewo nu nyuie ale be nɔnɔme bliboa dze.

Yesu Dzidzi le Betlexem

Mateo kple Luka siaa ŋlɔ nu tso nukunu ɖedzesi aɖe si ku ɖe Yesu dzidzi ŋu—eyae nye be ɖetugbui nɔaƒe aɖee dzii. Mateo ɖee fia be nukunu sia nye nya si Yesaya gblɔ ɖi ƒe alafa geɖe do ŋgɔ ƒe emevava. (Yesaya 7:14; Mateo 1:22, 23) Luka gblɔ be Betlexem ye wodzi Yesu le elabena ŋkɔŋɔŋlɔ ƒe se si Kaisaro de ƒoe ɖe Yosef kple Maria nu be woazɔ mɔ ayi afima. (Kpɔ aɖaka si le axa 7.) Yesu dzidzi le Betlexem nye nu ɖedzesi. Ƒe alafawo do ŋgɔ la, nyagblɔɖila Mixa gblɔ ɖi be Mesia la atso du si wobuna du tsɛ si gogo Yerusalem la me.—Mixa 5:2.

Zã si me wodzi Yesu va zu nusi wonya nyuie le esi eya dzie wotua Yesu dzidzi ƒe wɔwɔfiawo ɖo ta. Ke hã ŋutinya la ŋutɔ to vovo sã tso nusi woɖena fiana zi geɖe la gbɔ. Ŋutinyaŋlɔla Luka, amesi gblɔ amexexlẽ ƒe wɔna si kplɔ Yosef kple Maria va Betlexem na mí la kee gblɔ alẽkplɔlawo ƒe gbedzinɔnɔ kple woƒe alẽwo le zã vevi ma me ƒe nya hã na mí. Nɔnɔme eve siawo na Biblia me kula geɖe gblɔ be manye December mee wodzi Yesu o. Wotɔa asi alesi manya wɔ o be Kaisaro naƒoe ɖe Yudatɔ siwo dzea aglã kabakaba la nu be woazɔ mɔ le vuvɔ kple tsidza ŋɔli me ayi wo de, si agado dziku na aglãdzelawo ɖe edzi la dzi. Nenema ke agbalẽnyalagãwo de dzesii be alẽkplɔlawo mate ŋu anɔ gbedzi le yame ƒe nɔnɔme sesẽ ma ƒomevi me o.—Luka 2:8-14.

De dzesii be Yehowa tiae be yeaɖe gbeƒã ye Vi ƒe dzidzi na agbatedɔwɔla dahe siwo nɔ gbedzi, ke menye na ɣeyiɣi ma me agbalẽnyalawo kple subɔsubɔhakplɔla siwo kpɔa ŋusẽ ɖe ame dzi la o. Agbalẽfialawo kple Farisitɔwo mebua alẽkplɔla siwo ƒe dɔwɔɖoɖowo wɔe be womete ŋu wɔna ɖe numese siwo wode ƒe akpa aɖewo dzi o la ɖe naneke me o. Gake Mawu ve ŋutsu ɖokuibɔbɔla kple nuteƒewɔla siawo nu—mawudɔlawo ƒe hatsotso aɖe ka nya ta na wo be wodzi Mesia, amesi Mawu ƒe amewo kpɔ mɔ na ƒe akpe geɖe la le Betlexem le ɣeyiɣi ma dzi tututu. Menye “fia etɔ̃” siwo woɖena fiana le Yesu dzidzi ƒe wɔwɔfiawo mee yi ɖasrã Maria kple Yosef o ke ŋutsu siawoe yi eye wokpɔ vidzĩ si mele ɖeke nyam o la le lãnuɖunu aɖe me.—Luka 2:15-20.

Yehowa Vea Nyateƒedila Ðokuibɔbɔlawo Nu

Mawu vea ɖokuibɔbɔla siwo lɔ̃nɛ hetsɔa ɖe le eƒe tameɖoɖowo me vava me vevie la nu. Esia nye nya vevi si dze enuenu le nudzɔdzɔ siwo ku ɖe Yesu dzidzi ŋu me. Esi Yosef kple Maria tsɔe yi ɖe gbedoxɔa me le Mose ƒe Sea nu anɔ dzinu ɖeka le ɖevia dzidzi megbe la, wona “akpakpa eve alo ahɔ̃nevi eve.” (Luka 2:22-24) Alẽvi koŋue Sea bia hafi, gake eɖe mɔ ɖe esia si mexɔ asi fũ o la ŋu le ame dahewo ta. (Mose III, 12:1-8) Bu eŋu kpɔ. Menye hotsuitɔwo ƒe ƒomee Yehowa Mawu, xexeame ƒe dziɖulagã la tia be woanyi Via si gbɔ melɔ̃a nu le o si nye eƒe tenuvi la le o ke boŋ hiãtɔwo tɔe wòtia. Ne dzilae nènye la, ele be esia naɖo ŋku edzi na wò nyuie be nu nyuitɔ kekeake si nàte ŋu ana viwòwo—si ƒo ŋutilãmekesinɔnuwo alo suku kɔkɔ dede ta—enye aƒe si me wotsɔa gbɔgbɔmenu xɔasiwo ɖoa nɔƒe gbãtɔ le.

Le gbedoxɔa me la, Yehowa gave tadeagula nuteƒewɔla eve bubu siwo nye ɖokuibɔbɔlawo la nu. Ðekae nye Hana, ahosi si xɔ ƒe 84 si ‘medzona le gbedoxɔa me o.’ (Luka 2:36, 37) Ame evelia enye ame tsitsi nuteƒewɔla aɖe si ŋkɔe nye Simeon. Wo ame evea katã kpɔ dzidzɔ manyagblɔ ɖe mɔnukpɔkpɔ si Mawu na wo ŋu—si nye Mesia si ƒe ŋugbe wodo la kpɔkpɔ hafi woaku. Simeon gblɔ nya ɖi le ɖevia ŋu. Enye nyagblɔɖi si yɔ fũ kple mɔkpɔkpɔ gake konyifafa vi aɖe le eme. Egblɔ nya ɖi be nuxaxa ayɔ ɖetugbi Maria si nye vidada la gbeɖeka ɖe via lɔlɔ̃a ta.—Luka 2:25-35.

Ðevi si Ðo Afɔku Me

Simeon ƒe nyagblɔɖia nye nublanuinya si dzi woaɖo ŋkui be woava lé fu ɖevi sia si mele ɖeke nyam o la. Esi wòkpɔtɔ nye vidzĩ gɔ̃ hã la, wolé fui xoxo. Mateo ƒe nuŋlɔɖia ɖe alesi esia nɔ la me nyuie. Dzinu geɖe va yi, eye fifia Yosef, Maria, kple Yesu le aƒe aɖe me le Betlexem. Amedzro geɖe siwo womenɔ mɔ kpɔm na o va dze wo. To vovo na nusi dzena le Yesu dzidzi ƒe wɔwɔfia geɖe me la, Mateo meyɔ amesiwo va ƒe xexlẽme o eye meyɔ wo be “nunyalawo” alo “fia etɔ̃” hã o. Ezã Helagbe me nya maʹgoi, si gɔmee nye “ɣletivimefakalawo.” Ele be esia ɖeɖe nakpe ɖe exlẽla ŋu wòanya be nu vɔ̃ɖi aɖe le edzi yim le afisia, elabena ɣletivimefakaka nye nuwɔna aɖe si ŋu Mawu ƒe Nya tsi tre ɖo eye Yudatɔ nuteƒewɔlawo ɖɔa ŋu ɖo ƒoa asa nɛ.—Mose V, 18:10-12; Yesaya 47:13, 14.

Ɣletivimefakala siawo kplɔ ɣletivi aɖe ɖo tso ɣedzeƒe ke eye wotsɔ nunanawo ɖe asi be yewoatsɔ ana “Yudatɔwo ƒe fia, si wodzi la.” (Mateo 2:2) Gake ɣletivia mekplɔ wo yi Betlexem o. Ekplɔ wo yi Yerusalem kple Herodes Gãtɔ gbɔ. Mɔnukpɔkpɔ kple didi vevie menɔ ame aɖeke si le xexeame ɖe nuvevi wɔwɔ Yesu si nye ɖevi ŋu wu amesia o. Ŋutsu nugãdila kple amewula sia wu eƒe ƒometɔ kplikplikpli geɖe siwo wòbu be woate ŋu aɖe zi le ye te.a Esi wòse be wodzi amesi ava nye “Yudatɔwo ƒe fia” gbaɖegbe la, edo mɔ ɣletivimefakalawo be woayi aɖadi Ame ma le Betlexem. Esi wonɔ yiyim la, nu wɔmoyaa aɖe dzɔ. Edze abe “ɣletivi” si kplɔ wo yi Yerusalem la nɔ zɔzɔm ene!—Mateo 2:1-9.

Míenya ne akaɖi ŋutɔŋutɔe nusia nye nɔ yame loo alo ŋutega aɖe ko wònye o. Gake míenya be menye Mawu gbɔe “ɣletivi” sia tso o. Etsɔ susu vɔ̃ kplɔ trɔ̃subɔla siawo yi ɖe Yesu gbɔ tututu—ɖevi si nuvevi ɖesiaɖe ate ŋu awɔ si mate ŋu aʋli eɖokui ta o, si atikpala dahe aɖe kple srɔ̃a koe nye takpɔkpɔ na. Anye ne ɣletivimefakala siwo menya be ɖe Herodes ble yewo o la atrɔ atsɔ nyatakaka ayi na fiagã si do dziku la wòatsrɔ̃ ɖevia hafi. Gake Mawu de asi nyaa me to drɔ̃e me eye wòna woto mɔ bubu yi aƒe. Eyata anye Mawu ƒe futɔ Satana si adi be yeawɔ nusianu si yeate ŋui atsɔ awɔ nuvevi Mesia la ƒe dɔwɔnue “ɣletivi” la nye. Aleke wòwɔ mo yaa enye si be woɖea “ɣletivi” la kple ɣletivimefakalaawo fiana le Yesu dzidzi ƒe wɔwɔfiawo me be Mawu ƒe amedɔdɔwoe wonye!—Mateo 2:9-12.

Ke hã Satana metɔe ɖe afima o. Fia Herodes, amesi zãm wònɔ le nyaa me de se be woawu vidzĩ siwo katã xɔ vaseɖe ƒe eve le Betlexem. Gake Satana mate ŋu akpe ŋgo kple Yehowa aɖu dzi o. Mateo gblɔe be Mawu kpɔ ɖevi manyanuwo wuwu ŋutasesẽtɔe sia do ŋgɔ. Yehowa gaxe mɔ na Satana ake eye wòto mawudɔla aɖe dzi xlɔ̃ nu Yosef be wòasi ayi Egipte be woanɔ dedie. Mateo ka nya ta be le ɣeyiɣi aɖe megbe la Yosef gakplɔ eƒe ƒome sue la ake eye mlɔeba woyi ɖanɔ Nazaret, afisi Yesu kple nɔvia ŋutsuwo kple nyɔnuwo tsi le.—Mateo 2:13-23; 13:55, 56.

Yesu Dzidzi—Nusi Wòfia na Wò

Ðe nudzɔdzɔ siwo ƒo xlã Yesu dzidzi kple eƒe ɖevimenɔnɔ me dzodzro kpuie alea wɔ nuku na wòa? Ewɔa nuku na ame geɖe. Ewɔa nuku na wo be woanya be nuŋlɔɖiawo de nu wo nɔewo me ŋutɔŋutɔ eye wode pɛpɛpɛ, togbɔ be dzi nɔa ame aɖewo ƒo wogblɔna be mele nenema o hã. Ewɔa nuku na wo be woanya be wogblɔ nudzɔdzɔ aɖewo ɖi ƒe alafawo do ŋgɔ. Eye ewɔa nuku na wo be Nyanyuia me nya vevi aɖewo to vovo sã na nusiwo woɖena fiana le Yesu dzidzi ŋutinyawo kple wɔwɔfiawo me.

Ke hã ɖewohĩ nusi wɔ nuku wu ɖesiaɖee nye be wogblẽa Nyanyuia me nya veviwo ɖi le alesi woɖua Kristmas le teƒe geɖe me. Le kpɔɖeŋu me, womebua Yesu Fofo—menye Yosef o, ke boŋ Yehowa Mawu—ŋu boo o. Bu alesi wòse le eɖokui me esime wòtsɔ Via si gbɔ melɔ̃a nu le o de Yosef kple Maria si be woanyii ahakpɔ eƒe nuhiahiãwo gbɔ ŋu kpɔ. Bu veve si Fofoa si le dziƒo ase le esi wòɖe mɔ be Via natsi ɖe xexe aɖe si me fia vɔ̃ɖi aɖe aɖo nugbe ɖe ewuwu ŋu esi wònye ɖevi dzaa ko ŋu kpɔ! Lɔlɔ̃ deto si le Yehowa si na ameƒomeae ʋãe wòwɔ vɔsasa sia.—Yohanes 3:16.

Yesu ŋutɔŋutɔ buna le Kristmas ɖuɖuwo me zi geɖe. Nuŋlɔɖi aɖeke meli si fia be eyɔ eƒe dzigbe na eƒe nusrɔ̃lawo kpɔ o; eye kpeɖodzi aɖeke meli hã be eyomedzelawo ɖu eƒe dzigbezã o.

Menye Yesu ƒe dzidzie wòde se na eyomedzelawo be woaɖo ŋkui o ke boŋ eƒe ku—kple alesi wòɖe dzesi le ŋutinya me lae. (Luka 22:19, 20) Ao, menye vidzĩ si wònye mlɔ lãnuɖunu me si mate ŋu awɔ naneke o lae Yesu di be woatsɔ aɖo ŋku ye dzi o, elabena menye nenemae wògale fifia o. Le Yesu wuwu ƒe 60 kple edzivɔ megbe la, eɖe eɖokui fia apostolo Yohanes le ŋutega me wònye Fia ŋusẽtɔ si le sɔ dom yina aʋa. (Nyaɖeɖefia 19:11-16) Ele be míanya be ɖoƒe ma, si nye Mawu ƒe Dziƒofiaɖuƒea Dziɖula, ye Yesu le egbea, elabena eyae nye fia si atrɔ xexeame.

[Etenuŋɔŋlɔ]

[Aɖaka/Nɔnɔmetatawo si le axa 7]

Ðe Luka Wɔ Vodadaa?

ALEKE wòdzɔe be wodzi Yesu, amesi tsi le Nazaret eye wodze sii be enye Nazaretetɔ la ɖe Betlexem si gbɔ didi anɔ kilometa 150? Luka ɖe eme be: “Eye wòva ve me le ŋkeke mawo me [do ŋgɔ na Yesu dzidzi] be, sedede tso kaisaro Augusto gbɔ bena, woaxlẽ xexeme katã aŋlɔ. [Ŋkɔŋɔŋlɔ] gbãtɔ sia va me, esime Kirenio le mɔ̃mefia ɖum le Siria. Eye amewo katã dze mɔ heyi be, woaŋlɔ woƒe ŋkɔwo, amesiame yi ɖe ye ŋutɔ ƒe du me.”—Luka 1:1; 2:1-3.

Ðikela geɖe bua nya sia be enye vodada gã aɖe, alo vɔ̃ɖitɔ wu la, be enye nyakpakpa. Wotea tɔ ɖe edzi be ƒe 6 alo 7 M.Ŋ. mee amexexlẽ kple Kirenio ƒe mɔmefianyenye sia va eme le. Ne nyateƒee woƒe nyaa nye la, esia ana ɖikeke gã aɖe nanɔ Luka ƒe nuŋlɔɖia ŋu, elabena kpeɖodziwo fia be ƒe 2 D.M.Ŋ. mee wodzi Yesu. Gake ɖikela siawo ŋe aɖaba ƒu nyateƒenya vevi eve dzi. Gbãtɔe enye be Luka ɖee fia be menye zi ɖeka koe woxlẽ amewo o—de dzesii be egblɔ be “ŋkɔŋɔŋlɔ gbãtɔ sia.” Enya nu tso amexexlẽ bubu si va eme emegbe ŋu nyuie. (Dɔwɔwɔwo 5:37) Ŋkɔŋɔŋlɔ si wova wɔ emegbe siae nye esi tututu ŋu ŋutinyaŋlɔla Josehpus ƒo nu tsoe, si wowɔ le ƒe 6 M.Ŋ. me. Evelia, Kirenio ƒe mɔmefianyenye mezii ɖe mía dzi be míahe ƒe si me wodzi Yesu ayi megbee o. Nukatae? Elabena kpeɖodziwo ɖee fia be zi evee Kirenio ɖu mɔmefa. Agbalẽnyalagã geɖe lɔ̃ eɖe dzi be eƒe mɔmefiaɖuɖu gbãtɔa nɔ edzi yim le ƒe 2 D.M.Ŋ. me lɔƒo.

Ðikela aɖewo gblɔ be ɖe Luka kpa ŋkɔŋɔŋlɔ ŋu nya la be wòanye nusita wodzi Yesu le Betlexem ɖo, ale be wòanye nyagblɔɖi si le Mixa 5:2 ƒe emevava. Nya sia na Luka zu amesi ɖoe koŋ ka aʋatso, eye ɖikela aɖeke mate ŋu agblɔ nya sia le ŋutinyaŋlɔla ɖɔŋuɖo si ŋlɔ Nyanyuigbalẽa kple Dɔwɔwɔwo ƒe agbalẽa ŋu o.

Nya bubu si me ɖikela aɖeke mate ŋu aɖe o enye be: Ŋkɔŋɔŋlɔ ŋutɔ hã nye nyagblɔɖi aɖe me vava! Le ƒe alafa adelia D.M.Ŋ. me la, Daniel gblɔ dziɖula aɖe si “[ana] nudzɔdzɔxɔlawo natsa le fiaɖuƒe nyo la me” ŋu nya ɖi. Ðe nya sia ku ɖe Augusto kple se si wòde be woaŋlɔ amewo ƒe ŋkɔ le Israel la ŋua? Nyagblɔɖia yi edzi be ‘woatsrɔ̃’ Mesia, alo “nubabla ƒe amegã” la le amesi ava xɔ ɖe dziɖula sia teƒe ƒe dziɖuɣi. Nyateƒee, ‘wotsrɔ̃’ Yesu, alo wui le Tiberio, amesi xɔ ɖe Augusto teƒe ƒe dziɖuɣi.—Daniel 11:20-22

[Nɔnɔmetatawo]

Kaisaro Augusto (27 D.M.Ŋ.–14 M.Ŋ.)

Kaisaro Tiberio (14-37 M.Ŋ.)

[Afi Si Míexɔ Mɔɖeɖe Tso]

Musée de Normandie, Caen, France

Photograph taken by courtesy of the British Museum

[Nɔnɔmetata si le axa 8]

Yehowa ƒe dɔla ve alẽkplɔla ɖokuibɔbɔlawo nu tsɔ Kristo dzidzi ŋuti nyanyuia yi na wo