Nyabiabia Siwo Tso Exlẽlawo Gbɔ
Yesu de dzi ƒo be: “Miʋli be, miayi ɖe agbo bii la me, elabena mele egblɔm na mi bena: Ame geɖewo ladi be, woayi ɖe eme, eye womate ŋui o.” (Luka 13:24) Nukae wòwɔnɛ, eye nukae wòfia egbea?
Nusi dzɔ hafi wògblɔ nya wɔdɔɖeamedzi sia ŋu bubu koe akpe ɖe mía ŋu míase egɔme nyuie. Ɣleti ade hafi Yesu naku la, eyi Yerusalem esime wonɔ gbedoxɔ ŋuti gbugbɔkɔzã ɖum. Egblɔ be yee nye Mawu ƒe alẽwo kplɔla, gake eɖe eme be Yudatɔwo katã kloe mele yeƒe alẽwo dome o le esi wogbe toɖoɖo ye ta. Esi wògblɔ be yee nye ‘amesi’ tso Fofo la gbɔ la, Yudatɔwo fɔ kpe be yewoaƒui. Esi le wo gbɔ yi Perea le Yordan godo.—Yohanes 10:1-40.
Afimae ŋutsu aɖe biae le be: “Aƒetɔ, ame ʋee aɖewo koe akpɔ ɖeɖe mahã?” (Luka 13:23) Nya si wòbia la sɔ ŋutɔ, elabena ɣemaɣi Yudatɔwo xɔe se be ame agbɔsɔsɔme sue aɖe koe dze na ɖeɖekpɔkpɔ. Le alesi wowɔa nui nu la, mesesẽ be woanya amesiwo wosusu be woawoe ame ʋee mawo nye o. Abe alesi nusiwo va dzɔ emegbe fia ene la, woda ƒu ŋutɔ!
Yesu le wo dome ade ƒe eve sɔŋ le nu fiam wo, le nukunuwo wɔm, eye wòtsɔ mɔnukpɔkpɔa le wo ŋkume ɖom bene woate ŋu ava zu Dziƒofiaɖuƒea domenyilawo. Nukae do tso eme? Enye dada na wo, kpakple vevietɔ woƒe ŋgɔnɔlawo, be yewonye Abraham ƒe dzidzimeviwo eye be Mawu ƒe Se la le yewo si. (Mateo 23:2; Yohanes 8:31-44) Gake wogbe bubudede Alẽkplɔla Nyui la ŋu kple eƒe gbe sese. Ðeko wònɔ abe ɖe woʋu ʋɔ aɖe na wo ene, eye teƒeɖoɖo vevi si woakpɔ ne woto ʋɔtrua nue nye be woanye Fiaɖuƒea me tɔwo, gake wogbe mɔa nu toto. Wo dometɔ ʋee aɖewo ko, ame tsɛwo koŋ, ye se Yesu ƒe gbedasia, tso ɖe eŋu, eye wokplɔe ɖo.—Luka 22:28-30; Yohanes 7:47-49.
Le ƒe 33 M.Ŋ. ƒe Pentekoste-ŋkekea dzi la, ame tsɛ siawo koe dzra ɖo be woatsɔ gbɔgbɔ kɔkɔea asi ami na wo. (Dɔwɔwɔwo 2:1-38) Womele numadzɔmadzɔwɔla siwo Yesu gblɔ be woafa avi ahaɖu aɖukli le esi wodo kpo mɔnukpɔkpɔ si wona wo xɔxɔ ta dome o.—Luka 13:27, 28.
Eyata le ƒe alafa gbãtɔa me la, ‘ame geɖeawoe’ nye Yudatɔ akpa gãtɔ, eye vevietɔ woƒe subɔsubɔhakplɔlawo. Amesiawo gblɔ be yewodi be Mawu nakpɔ ŋudzedze ɖe yewo ŋu—gake woawo ŋutɔ ƒe dzidzenuwo kple mɔwo dzie wotona, menye Mawu tɔ o. Gake “ame ʋee” siwo wɔ afɔɖeɖe le esi wodi le anukware me be yewoanɔ Fiaɖuƒea me ta la, woawoe va zu Kristo-hamea me tɔ siwo wosi ami na.
Azɔ bu nusi wòfia si de ŋgɔ wu le míaƒe ŋkekea me ŋu kpɔ. Wofia ame gbogbo aɖewo siwo le Kristodukɔa ƒe sɔlemewo dem be woayi dziƒo. Gake mɔkpɔkpɔ sia menɔ te ɖe Ŋɔŋlɔawo me nufiafia vavãtɔwo dzi o. Abe alesi Yudatɔ siwo nɔ anyi va yi di be Mawu nakpɔ ŋudzedze ɖe yewo ŋu to yewo ŋutɔ ƒe nudidiwo me ene la, nenemae woawo hã dii.
Gake ameha aɖewo siwo mesɔ gbɔ de wo nu o koe xɔ Fiaɖuƒe gbedasia le míaƒe ɣeyiɣia me, wotsɔ wo ɖokui ɖe adzɔgbe na Yehowa, eye wodze be wòakpɔ ŋudzedze ɖe wo ŋu. Esia wɔe be wozu “fiaɖuƒe la ƒe viwo.” (Mateo 13:38) Ƒe 33 M.Ŋ. ƒe Pentekoste dzie wodze ‘vi’ siawo siwo wosi ami na la yɔyɔ gɔme. Yehowa Ðasefowo xɔe se ɣeyiɣi didi aɖe be alesi Mawu le nu wɔm kple eƒe amewo la fia be woyɔ dziƒoyilawo ƒe ƒuƒoƒoa me tɔwo xoxo. Eyata amesiwo va srɔ̃ Biblia me nyateƒea le ŋkeke siawo me se egɔme be wole agbe mavɔ nɔnɔ le paradisonyigba dzi ƒe mɔnukpɔkpɔa dom ɖe yewo hã gbɔ. Amesiawo va sɔ gbɔ wu Kristotɔ amesiamina, siwo si mɔkpɔkpɔ le koŋ be woayi dziƒo la. Menye amesiwo mele mɔ kpɔm be yewoayi dziƒo koŋ ŋue Luka 13:24 ku ɖo o, gake aɖaŋuɖoɖo nyui le eme na wo vavã.
Esi Yesu de dzi ƒo na mí be míaʋli mía ɖokui la, menye ɖe wòle gbɔgblɔm be ye loo alo ye Fofo daa mɔxenuwo ɖe mɔ me na mí be woado kplamatse mí o. Gake míekpɔe le Luka 13:24 be Mawu ƒe nudidiwo le ale gbegbe be aɖe amesiwo medze o ɖa. ‘Miʋli mia ɖokui sesĩe’ fia dagbadagba, kutrikuku. Eyata míate ŋu abia mía ɖokui be, ‘Ðe mele kutri kuma?’ Míate ŋu agbugbɔ Luka 13:24 me nyawo agblɔ be, ‘Ehiã be maʋli ɖokuinye sesĩe ato agbo bii la me elabena ame geɖe ladi be yewoayi eme gake womate ŋui o. Eyata ɖe mele ɖokuinye ʋlim sesĩea? Ðe mele abe lãmesẽfefewɔla le blema lãmesẽfefewɔƒe si wɔa etɔ sinua be dziɖuɖufetua naka ye sia? Lãmesẽfefewɔla ma dometɔ aɖeke mawɔe kple dzi afã, awɔe ɖewoɖewoe ko o. Ðe mele nenema?’
Yesu ƒe nyawo fia be ame aɖewo adi be ‘yewoato agboa nu’ alesi wodii, anɔ zɔ ɖem alesi wolɔ̃. Nɔnɔme ma ate ŋu akpɔ ŋusẽ ɖe Ðasefo ɖekaɖekawo dzi. Wo dometɔ aɖewo awɔ susu be, ‘Menya Kristotɔ veviedola geɖe siwo tsɔ wo ɖokui ke, eye wotsɔ nu geɖe sa vɔ; gake nuɖoanyi vɔ̃ɖi sia mewu enu kaka woku o. Eyata anyo wu be magbɔ dzi ɖi, manɔ agbe abe amesiame ene.’
Ele bɔbɔe be susu ma nava ame ƒe tame, gake ɖe nunya le emea? Le kpɔɖeŋu me, ɖe apostoloawo wɔ susu nenema? Kura o. Wowɔ wo tɔ sinua le tadedeagu vavãtɔ me—vaseɖe woƒe kugbe ke. Le kpɔɖeŋu me Paulo gblɔ be: “[Kristoe] míawo míele gbeƒã ɖem, . . . nusi ta hã medzea agbagba ɖo, eye meʋlina le eƒe ŋusesẽ, si sẽa ŋu ŋusẽtɔe le menye la nu.” Emegbe eŋlɔ be: “Elabena esia ŋuti míele dɔ wɔm sesĩe hele ʋiʋlim vevie ɖo, elabena míetsɔ míaƒe mɔkpɔkpɔ ɖo Mawu gbagbe, si nye ame ƒomeviwo katã Xɔla, vevietɔ nuteƒewɔlawo tɔ la dzi.”—Kolosetɔwo 1:28, 29; Timoteo I, 4:10, NW.
Míenya be nu nyuitɔe wònye Paulo wɔ be wòʋli eɖokui. Aleke gbegbe míaƒe dzi adze emee nye si ne míete ŋu gblɔ abe Paulo ene be: “Ʋiʋli nyui lae meʋli; mewu nye mɔzɔzɔ la nu, melé xɔse la me ɖe asi.” (Timoteo II, 4:7) Eyata le Yesu ƒe nya siwo woŋlɔ ɖe Luka 13:24 nu la, mía dometɔ ɖesiaɖe ate ŋu abia eɖokui be, ‘Ðe mekua kutri hewɔa dɔ sesĩea? Ẽ, ɖe meɖenɛ fiana wòdzena ɣesiaɣi be mele wɔwɔm ɖe Yesu ƒe dzideƒonya be: “Miʋli be, miayi ɖe agbo bii la me” dzia?’