Ta Wuiatɔ̃lia

Yehowa ƒe Adaŋudede ɖe Dukɔwo Ŋu

Yesaya 14:24–19:25

 1. Ʋɔnudrɔ̃nya kae Yesaya ŋlɔ ɖi ɖe Asiria ŋu?

YEHOWA ate ŋu azã dukɔwo atsɔ ahe toe na eƒe amewo ɖe woƒe vɔ̃ɖivɔ̃ɖi ta. Togbɔ be ele nenema hã la, megbea tohehe na dukɔ mawo ɖe woƒe ŋutasesẽ, dada, kple fuléle tadedeagu vavãtɔ dzodzro ta o. Eyata eƒe gbɔgbɔ ʋã Yesaya wòŋlɔ ‘nya ɖe Babel ŋu’ xoxoxo do ŋgɔ. (Yesaya 13:1) Gake etsɔmee Babilon ava zu ŋɔdzidonu. Asiria ye nɔ Mawu ƒe dukɔ si wòbla nu kpli la tem ɖe anyi le Yesaya ƒe ŋkekea me. Asiria tsrɔ̃ Israel-dziehefiaɖuƒea eye wogbã Yuda ƒe akpa geɖe. Gake afi aɖe koe Asiria ƒe dziɖuɖukpɔkpɔ se ɖo. Yesaya ŋlɔ bena: “Yehowa Zebaot ka atam be: Alesi mebu ɖe ta me la, nenema wòanɔ. . . . Magbã Asur le nye anyigba dzi, eye mafanyae kple afɔ ɖe nye towo dzi, eƒe kɔkuti aɖe ɖa le wo ŋu, eye eƒe agba adzo ɖa le woƒe kɔʋu me.” (Yesaya 14:24, 25) Esi Yesaya gblɔ nya sia ɖi megbe kpuie la, Asiria megava nye ŋɔdzi na Yuda o.

2, 3. (a) Amekawo ŋue Yehowa do eƒe alɔ ɖe dzi ɖo le blema? (b) Nukae wòfia be Yehowa nado eƒe alɔ ɖe dzi ɖe “dukɔwo katã” ŋu?

² Ke dukɔ bubu siwo nye Mawu ƒe ame siwo wòbla nu kpli ƒe futɔwo ya ɖe? Ele be woadrɔ̃ ʋɔnu woawo hã. Yesaya gblɔ be: “Esia nye ta me, si woɖo [adaŋudede, “NW”] ɖe anyigba blibo la ŋu, eye esia nye alɔ, si wodo ɖe dzi ɖe dukɔwo katã ŋu. Elabena ne Yehowa Zebaot ɖo nu ɖe ta me la, ameka agblẽ eme, eye ne edo eƒe alɔ ɖe dzi la, ameka agbugbɔe?” (Yesaya 14:26, 27) Yehowa ƒe “adaŋudede” la menye nuxlɔ̃ame dzro ko o. Enye nusi wòɖo be yeawɔ, si nye eƒe sedede. (Yeremya 49:20, 30) Mawu ƒe “alɔ” nye eƒe ŋusẽ si wòzãna. Yehowa gblɔ eƒe adaŋudede ɖe Filisti, Moab, Damasko, Kus (alo Etiopia), kple Egipte ŋu le Yesaya ta 14 lia ƒe kpukpui mamlɛawo kple ta 15 vaseɖe 19 lia me.

³ Gake Yesaya gblɔ be Yehowa do alɔ ɖe dzi ɖe “dukɔwo katã” ŋu. Eyata togbɔ be Yesaya ƒe nyagblɔɖi siawo va eme le blema hã la, gɔmeɖose si le eme la ku ɖe “nuwuɣi” si me Yehowa ado eƒe alɔ ɖe dzi ɖe anyigba dzi fiaɖuƒewo katã ŋu la ŋuti. (Daniel 2:44; 12:9; Romatɔwo 15:4; Nyaɖeɖefia 19:11, 19-21) Mawu ŋusẽkatãtɔ, Yehowa, tsɔa kakaɖedzi ɖea nusi wòɖo be yeawɔ fiana ɣeyiɣi didi aɖe do ŋgɔ. Ame aɖeke mate ŋu agbugbɔ eƒe alɔ si wòdo ɖe dzi la o.—Psalmo 33:11; Yesaya 46:10.

“Da Toaʋala” aɖe Tso Ðe Filisti Ŋu

 4. Nya siwo Yehowa gblɔ ɖe Filisti ŋu dometɔ aɖewo ɖe?

⁴ Filistitɔwo ŋue wotrɔ ɖo gbã. “Gbe, siwo va le ƒe, si me fia Axaz ku la, wonye esi: Filisti-nyigba blibo la, meganɔ dzidzɔ kpɔm le esi ati, si ƒo wò la ŋe ta o! Elabena ƒli ado tso da ƒe ke me, eye eƒe kutsetse anye da toaʋala [si nu aɖi le, “NW”].”—Yesaya 14:28, 29.

5, 6. (a) Mɔ ka nue Uziya nɔ abe da ene na Filistitɔwo le? (b) Nukae Xizkiya va zu na Filistitɔwo?

⁵ Ŋusẽ nɔ Fia Uziya ŋu wòte ŋu nɔ te ɖe Filisti ƒe ŋɔdzidonamea nu. (Kronika II, 26:6-8) Ezu abe da ene na wo, eye eƒe ati ƒo futɔ ma atraɖii. Le Uziya ƒe ku—‘eƒe atia ƒe ŋeŋe’—megbe la, Yotam si nye nuteƒewɔla la va ɖu fia, gake “dukɔ la gale nu gbegblẽ wɔwɔ dzi ɖaa ko.” Emegbe Axaz va zu fia. Nuwo trɔ, eye Filistitɔwo ƒe asrafowo te ŋu va dzea Yuda dzi. (Kronika II, 27:2; 28:17, 18) Gake fifia nuwo gava nɔ tɔtrɔm bubui. Le ƒe 746 D.M.Ŋ. me la, Fia Axaz ku eye Xizkiya si nye ɖekakpui la va nɔ fiazikpuia dzi. Ne Filistitɔwo bu be nuwo ayi edzi ade yewo dzi la, ke woda ƒu vevie. Xizkiya va nye futɔ sẽŋu aɖe na wo. Xizkiya si nye Uziya ƒe dzidzimevi (“kutsetse” si do tso eƒe “ke” me) la nɔ abe “da toaʋala si nu aɖi le” ene—edzea wo dzi kpata alɔtsɔtsɔe, eye eƒe nugbegblẽ le amesiwo dzi wòdze ŋu vena abe da ƒe aɖie si wo ene.

⁶ Nya sia ɖɔ fia yeyea wòsɔ nyuie. “[Xizkiya si] Filistitɔwo vaseɖe Gaza kple eƒe liƒowo gbɔ.” (Fiawo II, 18:8) Asiria Fia Sanxerib ƒe nuŋlɔɖiwo fia be Filistitɔwo va zu Xizkiya teviwo. “Ame dahewo”—Yuda-fiaɖuƒe si gbɔdzɔ la—kpɔ dedienɔnɔ kple ŋutilãmenu geɖe, esime dɔ to le Filisti.—Xlẽ Yesaya 14:30, 31.

 7. Nya siwo ɖe xɔse fia kae wòle be Xizkiya nagblɔ na ame dɔdɔ siwo va Yerusalem?

⁷ Edze abe wodɔ amewo ɖo ɖe Yuda ene—ɖewohĩ wodi be yewoawɔ ɖeka atso ɖe Asiria ŋu. Nya kae wòle be woagblɔ na wo? “Aleke woahaɖo eŋu na dukɔwo ƒe ame dɔdɔwo ma?” Ðe Xizkiya abla nu kple dukɔwo be yeanɔ dediea? Kura o! Ele be wòagblɔ na ame dɔdɔawo be: “Yehowa tso Zion, eye eyae eƒe dukɔ ƒe hiãtɔwo asi atso.” (Yesaya 14:32) Ele be fiaa naɖo ŋu ɖe Yehowa ŋu bliboe. Zion ƒe gɔmeɖoanyia li ke sesĩe. Woakpɔ dukɔa ta wòanye dedienɔƒe tso Asiriatɔwo ƒe ŋɔdzidonamea me.—Psalmo 46:2-8.

 8. (a) Aleke dukɔ aɖewo wɔa nu abe Filisti ene egbeae? (b) Nukae Yehowa wɔ tsɔ kpe ɖe eƒe amewo ŋu egbea abe alesi wòwɔe le blema ene?

⁸ Egbea dukɔ aɖewo tsia tre ɖe Mawu ƒe tadeagulawo ŋu vevie abe Filisti ene. Wosikaa Yehowa ƒe Ðasefo Kristotɔwo ɖe gaxɔwo kple fuwɔamesaɖawo me. Woxea mɔ ɖe woƒe dɔa nu. Wowua wo dometɔ geɖe. Tsitretsiɖeŋulawo yi edzi ‘de ha bibibi ɖe ame dzɔdzɔe la ƒe luʋɔ ŋu.’ (Psalmo 94:21) Kristotɔwo ƒe ƒuƒoƒo sia ƒe futɔwo abu wo “ame tsɛwo” kple “hiãtɔwo.” Gake to Yehowa ƒe kpekpeɖeŋu me la, woɖua nu geɖe le gbɔgbɔ me, esime dɔ nɔa woƒe futɔwo ya wum. (Yesaya 65:13, 14; Amos 8:11) Ne Yehowa do eƒe alɔ ɖe dzi ɖe egbeŋkekea me Filistitɔwo ŋu la, ‘ame tsɛ’ siawo anɔ dedie. Le afika? Le hadede kple ‘Mawu ƒe aƒe,’ si ƒe dzogoedzikpe vavã enye Yesu, la me. (Efesotɔwo 2:19, 20) Eye woanɔ “dziƒo Yerusalem,” si nye Yehowa ƒe Dziƒofiaɖuƒe la ƒe Fia, Yesu Kristo, te.—Hebritɔwo 12:22; Nyaɖeɖefia 14:1.

Womiã Nu na Moab

 9. Amekae nya si kplɔe ɖo la yi na, eye aleke dukɔ sia ɖee fia be yenye Mawu ƒe amewo ƒe futɔ?

⁹ Dukɔ bubu aɖe hã do liƒo kple Israel le Ƒukukua ƒe ɣedzeƒe gome—eyae nye Moab. Nusi na Moabtɔwo to vovo tso Filistitɔwo gbɔe nye be wodo ƒome kple Israel, le esi wonye Abraham tɔgãyɔvi Lot ƒe dzidzimeviwo ta. (Mose I, 19:37) Togbɔ be ƒomedodo ma nɔ wo dome hã, Moab léa fu Israel ɣesiaɣi. Le kpɔɖeŋu me, le Mose ƒe ŋkekeawo me la, Moab-fia dɔ nyagblɔɖila Bileam be wòaƒo fi ade Israel-viwo. Esi esia medze edzi o la, Moab zã agbegbegblẽnɔnɔ kple Baal-subɔsubɔ tsɔ tre mɔ̃ na Israel. (Mose IV, 22:4-6; 25:1-5) Eyata mewɔ nuku be fifia Yehowa ƒe gbɔgbɔ ʋã Yesaya wòŋlɔ “nya ɖe Moab ŋu” o!—Yesaya 15:1a.

10, 11. Nukae adzɔ ɖe Moab dzi?

¹⁰ Yesaya ƒe nyagblɔɖia ku ɖe Moab-duwo kple teƒe gbogbo aɖewo siwo ƒe ɖewoe nye Ar, Kir (alo Kir-Xareset), kple Dibon ŋu. (Yesaya 15:1b, 2a) Moabtɔwo afa konyi ɖe Kir-Xareset ƒe weintsetse ƒuƒu siwo anye be eƒe agble koŋue wodena le dua me la ta. (Yesaya 16:6, 7) Woadze Sibma kple Yaezer siwo xɔ ŋkɔ le weingbledede me dzi agblẽ wo. (Yesaya 16:8-10) Eglat-selisiya, si ƒe ŋkɔ gɔme ate ŋu anye “Nyinɔ si Xɔ Ƒe Etɔ̃” la anɔ abe nyivi sesẽ si le xɔxlɔ̃m nublanuitɔe le dzodzodzoetsitsi ta ene. (Yesaya 15:5) Gbe aƒu le anyigba la dzi eye ʋu ayɔ “Dimon ƒe tɔwo” me le Moabtɔwo wuwu ta. “Nimrim ƒe tsiwo” azu “tagba,” eɖanye le kpɔɖeŋumɔ nu loo alo ava eme ŋutɔŋutɔ le nyaa nu o—ɖewohĩ le esi futɔwo ƒe asrafowo axe mɔ na woƒe tɔsisiwo ta.—Yesaya 15:6-9.

¹¹ Moabtɔwo ata akpanya, si nye nusi wotana ne wole konyi fam. Woalũ ta kokoe atsɔ afia ŋukpe kple konyifafa. ‘Woalũ’ ge, atsɔ afia nuxaxa vevie kple wo bɔbɔɖeanyi. (Yesaya 15:2b-4) Ʋɔnudrɔ̃nya siawo wɔ dɔ ɖe Yesaya ŋutɔ dzi vevie elabena eka ɖe edzi bliboe be woava eme. Eƒe dɔme ɖe gbe abe kasaŋku ƒe kawo ene le esi dzɔgbevɔ̃enya si wogblɔ ɖe Moab ŋu wɔ nublanui nɛ ta.—Yesaya 16:11, 12.

12. Aleke nya siwo Yesaya gblɔ ɖe Moab ŋu va emee?

¹² Ɣekaɣie nyagblɔɖi sia ava eme? Eteƒe madidi o. “Esia nye nya, si Yehowa gblɔ ɖe Moab ŋu tsã. Azɔ la Yehowa gblɔ be: Le ƒe etɔ̃ me tututu abe agbatedɔwɔla ƒe ƒe ene la, maɖi gbɔ Moab ƒe ŋusẽ hekpe ɖe eƒe ameha gbogboawo ŋu, eye susɔea anɔ ʋɛ, manɔ nemi me hã o.” (Yesaya 16:13, 14) Blematomenukuku ƒe kpeɖodziwo li si wɔ ɖeka kple nya sia be le ƒe alafa enyilia D.M.Ŋ. me la, Moab kpe fu vevie eye amewo meganɔ eƒe nuto geɖe me o. Tiglath-pileser III yɔ Moab-fia Salamanu de dziɖula siwo xe adzɔ nɛ la dome. Sanxerib xɔ adzɔ tso Moab-fia Kammusunadbi gbɔ. Asiria fiagã siwo nye Esar-haddon kple Ashurbanipal gblɔ be Moab Fia siwo nye Musuri kple Kamashaltu nye yewo teviwo. Le ƒe alafa geɖe siwo va yi me la, Moab-dukɔa megava nɔ anyi o. Woke ɖe dudo siwo wobu be woanye Moab-duwo la ŋu, gake vaseɖe fifia la, nu ʋɛ aɖewo koe woku le tome si ɖo kpe edzi be Israel ƒe futɔ sia nɔ anyi kpɔ.

Egbeŋkekea me “Moab” Atsrɔ̃

13. Habɔbɔ kae míate ŋu atsɔ asɔ kple Moab egbea?

¹³ Xexeame katã ƒe habɔbɔ aɖe li egbea si ɖi blema Moab. Eyae nye Kristodukɔa, si nye “Babilon gã la” ƒe akpa vevitɔ. (Nyaɖeɖefia 17:5) Abraham fofo, Tarax, mee Moab kple Israel siaa dzɔ tso. Nenema ke Kristodukɔa gblɔna be ƒe alafa gbãtɔ me Kristo-hamea mee yewodzɔ tso, abe Kristotɔ amesiaminawo ƒe hame si li egbea la ke ene. (Galatiatɔwo 6:16) Gake Kristodukɔa ƒe nɔnɔme gblẽ—abe Moab ene—ede gbɔgbɔ me agbegbegblẽnɔnɔ dzi eye ena amewo subɔ mawuwo ɖe Mawu vavã ɖeka, Yehowa, teƒe. (Yakobo 4:4; Yohanes I, 5:21) Kristodukɔa kplɔlawo ƒe ƒuƒoƒoa tsi tre ɖe amesiwo ɖea gbeƒã Fiaɖuƒe ŋuti nyanyuia ŋu.—Mateo 24:9, 14.

14. Togbɔ be Yehowa de adaŋu ɖe egbeŋkekea me Moab ŋu hã la, mɔkpɔkpɔ kae li na habɔbɔ ma me tɔ ɖesiaɖe?

¹⁴ Womiã nu na Moab mlɔeba. Esia tututue adzɔ ɖe Kristodukɔa hã dzi. Yehowa azã nusi sɔ kple Asiria le egbeŋkekea me atsɔ awɔe aƒedoe. (Nyaɖeɖefia 17:16, 17) Gake mɔkpɔkpɔ li na amesiwo le egbeŋkekea me “Moab” sia me. Yesaya gblɔe de nyagblɔɖi si ku ɖe Moab ŋu me be: “Amenuveve ali ke fiazikpui aɖe, eye ʋɔnudrɔ̃la aɖe anɔ edzi le Dawid ƒe agbadɔ me ɖikaa, amesi dia nya dzɔdzɔe yome, eye wòsea dzɔdzɔenyenye me.” (Yesaya 16:5) Le ƒe 1914 me la, Yehowa ɖo Yesu si nye Dziɖula si tso Fia Dawid ƒe ƒomea me la ƒe fiazikpui gɔme anyi sesĩe. Yesu ƒe fianyenye nye Yehowa ƒe amenuveve ɖeɖefia eye anɔ anyi tegbee ahanye nu si Mawu bla kple Fia Dawid la me vava. (Psalmo 72:2; 85:11, 12; 89:3, 4; Luka 1:32) Ame fatu geɖe dzo le egbeŋkekea me “Moab” eye wobɔbɔ wo ɖokui na Yesu ale be woakpɔ agbe. (Nyaɖeɖefia 18:4) Aleke gbegbe wòfaa akɔ na amesiawo be woanya be Yesu ‘ana nusi dzɔdzɔenyenye fia me nakɔ na dukɔwo’!—Mateo 12:18; Yeremya 33:15.

Damasko Atsrɔ̃ Azu Aƒedo

15, 16. (a) Afɔ kawoe Damasko kple Israel ɖe ɖe Yuda ŋu le fuléle ta, eye nukae do tso eme na Damasko? (b) Ameka hã ŋue nya si wogblɔ ɖe Damasko ŋu la ku ɖo? (d) Nukae Kristotɔwo ate ŋu asrɔ̃ tso Israel ƒe kpɔɖeŋua me egbea?

¹⁵ Azɔ Yesaya ŋlɔ “nya ɖe Damasko ŋu.” (Xlẽ Yesaya 17:1-6.) Damasko, si nye “Aram ƒe ta” la le Israel ƒe dziehe. (Yesaya 7:8) Le Yuda Fia Axaz ƒe fiaɖuɣi la, Damasko-fia Rezin wɔ ɖeka kple Israel-fia Pekax va dze Yuda dzi. Gake esi Axaz bia kpekpeɖeŋu Asiria-fia Tiglat-Pileser III la, ewɔ aʋa kple Damasko, eɖu edzi eye wòɖe aboyo emenɔla geɖe. Damasko megado ŋɔdzi na Yuda kpɔ le ema megbe o.—Fiawo II, 16:5-9; Kronika II, 28:5, 16.

¹⁶ Anɔ eme be le esi Israel bla nu kple Damasko ta la, ʋɔnudrɔ̃nya siwo ku ɖe dziehefiaɖuƒe mawɔnuteƒe ma ŋu nɔ nya si Yehowa gblɔ ɖe Damasko ŋu la me. (Yesaya 17:3-6) Israel azu abe agble si me nuku ʋɛ aɖewo susɔ ɖo le nuŋeɣi alo amiti si dzi wogbe amitsetseawo ƒe akpa gãtɔ le eƒe alɔawo me ene. (Yesaya 17:4-6) Kpɔɖeŋu si na wobua tame kae nye si wònye na amesiwo ɖe adzɔgbe na Yehowa! Edi be woasubɔ ye ɖeka ko eye subɔsubɔ dzadzɛ si tso dzi blibo me koe dzea eŋu. Eye etsri amesiwo léa fu wo nɔviwo.—Mose II, 20:5; Yesaya 17:10, 11; Mateo 24:48-50.

Kaka Ðe Yehowa Dzi Bliboe

17, 18. (a) Aleke ame aɖewo xɔ Yehowa ƒe nyawoe le Israel, gake nukae ame akpa gãtɔ wɔ? (b) Aleke egbenudzɔdzɔwo ɖi Xizkiya ƒe ŋkekea me tɔwoe?

¹⁷ Azɔ Yesaya gblɔ be: “Le ɣemaɣi la amegbetɔ atrɔ kɔ ɖe ewɔla ŋu, eye eƒe ŋkuwo akpɔ Israel ƒe kɔkɔetɔ la dzi ɖa; eye matrɔ kɔ ɖe vɔsamlekpui, siwo nye eƒe asinudɔwɔwɔwo la ŋu o, eye maɖe ŋku ɖe Asera kple ɣelegba, siwo eya ŋutɔ ƒe asi wɔ la o.” (Yesaya 17:7, 8) Ẽ, ame aɖewo se Yehowa ƒe nuxlɔ̃amenya la le Israel. Le kpɔɖeŋu me, esi Xizkiya ɖo du ɖe Israel-nɔlawo be woava wɔ ɖeka kple Yuda ne woaɖu Ŋutitotozã la, Israel-vi aɖewo tso ɖe eŋu hezɔ mɔ yi anyiehenutome va wɔ ɖeka kple wo nɔviwo le tadedeagu dzadzɛ me. (Kronika II, 30:1-12) Ke hã Israel-nɔla akpa gãtɔ ɖu fewu le ame dɔdɔ siwo tsɔ gbedasia vɛ ŋu. Dukɔa ƒe xɔsegbegbe gblẽ wògbɔ eme. Eyata adaŋu si Yehowa de ɖe eŋu la va eme. Asiria tsrɔ̃ Israel-duwo, anyigba la zu gbegbe, eye gbedamateƒewo megawɔa nu o.—Xlẽ Yesaya 17:9-11.

¹⁸ Ke egbea ya ɖe? Israel nye dukɔ si gbe xɔse. Eyata alesi Xizkiya dze agbagba be yeakpe ɖe dukɔ ma me tɔwo ŋu ne woatrɔ ava tadedeagu dzadzɛ me la ɖo ŋku alesi Kristotɔ vavã siwo li egbea dzea agbagba be yewoakpe ɖe Kristodukɔa ƒe habɔbɔ si gbe xɔse la me tɔwo ŋu dzi na mí. Tso ƒe 1919 me la, “Mawu ƒe Israel” ƒe ame dɔdɔwo to Kristodukɔa katã me le amewo kpem be woava tadedeagu dzadzɛ me. (Galatiatɔwo 6:16) Ame akpa gãtɔ gbe esia wɔwɔ. Ame geɖe ɖu fewu le ame dɔdɔawo ŋu. Gake ame aɖewo wɔ ɖe ameyɔyɔa dzi. Fifia woƒe xexlẽme ɖo miliɔn geɖe, eye wokpɔa dzidzɔ ɖe ‘Israel ƒe Kɔkɔetɔ la kpɔkpɔ’ ŋu eye wòfiaa nu wo. (Yesaya 54:13) Wodzudzɔ tadedeagu le vɔsamlekpui makɔmakɔwo dzi—si fia be womegatsɔa wo ɖokui naa mawu siwo amegbetɔ wɔ o eye womegaɖoa ŋu ɖe wo ŋu o—eye wodina vevie be yewoatrɔ ɖe Yehowa ŋu. (Psalmo 146:3, 4) Abe Yesaya ŋɔlimetɔ Mixa ene la, wo dometɔ ɖesiaɖe gblɔna be: “Ke nye la matsa ŋu na Yehowa, eye makpɔ Mawu, nye xɔnametɔ sinu; nye Mawu ase nye gbe.”—Mixa 7:7.

19. Amekawo ‘tae’ Yehowa ‘ablu ɖo,’ eye nukae esia afia na wo?

¹⁹ Aleke gbegbe woto vovo na amesiwo ɖoa dzi ɖe amegbetɔ si kuna ŋu enye si! Ŋutasẽnuwɔwɔ kple zitɔtɔ gãwo ɖe kpe na ameƒomea le ŋkeke mamlɛ siawo me. Ameƒome dzeaglã ƒe “atsiaƒu” dzeagbo la hea dzimaɖeɖi kple tɔtrɔ kpatawo vɛ. (Yesaya 57:20; Nyaɖeɖefia 8:8, 9; 13:1) Yehowa ‘ablu ɖe’ ʋunyaʋunyawɔla siawo ‘ta.’ Eƒe Fiaɖuƒe si le dziƒo atsrɔ̃ habɔbɔ kple amegbetɔ ɖesiaɖe si hea masɔmasɔwo vɛ, eye ‘woasi ayi adzɔgedzɔgee abe yali le ahom nu ene.’—Yesaya 17:12, 13; Nyaɖeɖefia 16:14, 16.

20. Togbɔ be dukɔwo ‘haa’ Kristotɔ vavãwo hã la, kakaɖedzi kae le wo si?

²⁰ Nukae ado tso eme? Yesaya gblɔ be: “Ŋɔdzi li le [fiẽ], eye hafi ŋu nava ke la, womegali o. Esia nye amesiwo da adzo mí la ƒe gome kple mía halawo ƒe dzidzenu.” (Yesaya 17:14) Ame geɖe haa Yehowa ƒe amewo, wowɔa ŋlɔmi le wo ŋu hedoa vlo wo. Esi Kristotɔ vavãwo menye xexeame subɔsubɔha gãwo ƒe akpa aɖeke o—eye womedi be yewoanye woƒe akpa aɖeke hã o—ta la, ɖeklemiɖela akpaɖekadzidelawo kple tsitretsiɖeŋula zazɛ̃nyahelawo bua wo be yewoate ŋu adze wo dzi bɔbɔe. Gake Mawu ƒe amewo ka ɖe edzi be ‘ŋu si ake’ woƒe xaxawo nu nayi la le du dzi gbɔna.—Tesalonikatɔwo II, 1:6-9; Petro I, 5:6-11.

Etiopia Tsɔ Nunana Vɛ na Yehowa

21, 22. Dukɔ ka ŋue wogagblɔ ʋɔnudrɔ̃nya ɖo, eye aleke Yesaya ƒe nya siwo tso gbɔgbɔ me la va emee?

²¹ Etiopia si le Egipte ƒe anyiehe la kpe aʋa kple Yuda kpɔ zi eve ya teti. (Kronika II, 12:2, 3; 14:1, 9-15; 16:8) Fifia Yesaya gblɔ ʋɔnu si woava drɔ̃ dukɔ ma ɖi be: “Baba na anyigba, si le aʋala ƒom kpakpakpa le Kus [alo Etiopia] ƒe tɔsisiwo ƒe go kemɛ.” (Xlẽ Yesaya 18:1-6.)a Yehowa de se be ‘woalã Etiopia, woaflii ɖa, ahaŋee.’

²² Xexemeŋutinya na míenya be le ƒe alafa enyilia D.M.Ŋ. ƒe nuwuwu lɔƒo la, Etiopia xɔ Egipte eye wòɖu edzi anɔ ƒe 60. Asiria Fiagã siwo nye Esar-haddon kple Ashurbanipal hã va dze edzi. Asiria kpɔ ŋusẽ ɖe Egipte dzi esi Ashurbanipal tsrɔ̃ Thebes, eye wòna Etiopia ƒe ŋusẽkpɔkpɔ ɖe Nil Balia dzi wu nu. (Kpɔ Yesaya 20:3-6 hã.) Ke egbeŋkekea me ya ɖe?

23. Akpa kae egbeŋkekea me “Etiopia” wɔna, eye nukata eƒe nuwuwu ava?

²³ Le Daniel ƒe nyagblɔɖi si ku ɖe ‘nuwuɣia’ ŋu me la, wogblɔ be Etiopia kple Libia ‘anɔ dziehefia yome,’ si fia be woawɔ ɖe eƒe mɔfiafia dzi. (Daniel 11:40-43, NW) Wogayɔ Etiopia de ‘Gog si tso Magog’ ƒe asrafowo me. (Xezekiel 38:2-5, 8) Gog ƒe aʋakɔwo, si me dziehefia hã le, atsrɔ̃ ne wodze Yehowa ƒe dukɔ kɔkɔe la dzi. Eyata Yehowa akɔ asi dzi ɖe egbeŋkekea me “Etiopia” hã ŋu le eƒe tsitretsitsi ɖe Yehowa ƒe dziɖulanyenye ŋu ta.—Xezekiel 38:21-23; Daniel 11:45.

24. Mɔ kawo nue Yehowa xɔ “nunanawo” tso dukɔwo gbɔ le?

²⁴ Ke hã nyagblɔɖia gagblɔ be: “Ɣemaɣi la dukɔ, si dzɔ atsu ƒlalu, eye eŋu zrɔ̃ dredredre, dukɔ, si wovɔ̃na . . . dea didiƒe ke, . . . ahe nunanawo vɛ na Yehowa Zebaot, ayi Yehowa Zebaot ƒe ŋkɔ ƒe nɔƒe, ayi Zion-to la gbɔ.” (Yesaya 18:7) Togbɔ be dukɔwo melɔ̃ ɖe Yehowa ƒe dziɖulanyenye dzi o hã la, ɣeaɖewoɣi wowɔa nu wòɖea vi na Yehowa ƒe amewo. Le dukɔ aɖewo me la, dziɖuɖua de se hetso afia siwo dea gomenɔamesi siwo le se nu dzi na Yehowa subɔla nuteƒewɔlawo. (Dɔwɔwɔwo 5:29; Nyaɖeɖefia 12:15, 16) Eye nunana bubu aɖewo hã li. “Fiawo atsɔ nunana vɛ na wò. . . . Amegãwo atso Egipte ava, eye Kus [Etiopia] aɖe abla ado asi ɖe dzi na Mawu.” (Psalmo 68:30-32) Egbeŋkekea me “Etiopiatɔ” miliɔn geɖe siwo vɔ̃a Yehowa la le ‘nunana’ si nye tadedeagu hem vɛ egbea. (Maleaxi 1:11) Wole gome kpɔm le dɔ gã si nye gbeƒãɖeɖe Fiaɖuƒe ŋuti nyanyuia le anyigba katã dzi me. (Mateo 24:14; Nyaɖeɖefia 14:6, 7) Nunana nyui kae nye si wotsɔna naa Yehowa!—Hebritɔwo 13:15.

Egipte ƒe Dzi Lólo

25. Nukae dzɔ ɖe blema Egipte dzi si na Yesaya 19:1-11 va eme?

²⁵ Yuda ƒe anyiehe gomee Egipte, si nye Mawu ƒe ame siwo wòbla nu kpli ƒe futɔ xoxowo, la le. Yesaya ta 19 lia ƒo nu tso tɔtɔ si nɔ Egipte le Yesaya ƒe agbenɔɣi ŋu. Wonɔ dukɔmeviʋa wɔm le Egipte le “du kple du, [kpakple] fiaɖuƒe kple fiaɖuƒe” dome. (Yesaya 19:2, 13, 14) Ŋutinyaŋlɔlawo ŋlɔ nya siwo ɖo kpe edzi be fiaƒome siwo nɔ ho ʋlim kple wo nɔewo nɔ dukɔa ƒe akpa vovovowo dzi ɖum le ɣeyiɣi ɖeka ma ke me. Egipte ƒe nunya si wotsɔ ƒoa adegbee, kple eƒe ‘legba kple dzotɔ siwo ŋu ŋusẽ mele o’ mekpɔ eta tso “amegã sesẽ” la si me o. (Yesaya 19:3, 4) Asiria, Babilon, Persia, Hela, kple Roma katã ɖu Egipte dzi ɖe wo nɔewo yome. Nudzɔdzɔ siawo katã nye nyagblɔɖi si le Yesaya 19:1-11 la me vava.

26. Le emevava gãtɔ me la, aleke egbeŋkekea me “Egipte” nɔlawo awɔ nu ɖe Yehowa ƒe ʋɔnudɔdrɔ̃wo ŋui?

²⁶ Gake wotsɔa Egipte wɔa Satana ƒe xexea ƒe kpɔɖeŋui zi geɖe le Biblia me. (Xezekiel 29:3; Yoel 4:19; Nyaɖeɖefia 11:8) Eyata ɖe Yesaya ƒe “nya ɖe Egipte ŋu” ava eme le mɔ si lolo wu nua? Ẽ, ava eme! Ele be nya siwo wotsɔ dze nyagblɔɖia gɔmee nana amesiame nanɔ ŋudzɔ: “Kpɔ ɖa, Yehowa do alilikpo ɖidu gbɔna ɖe Egipte: Egipte legbawo dzo nyanyanya le eŋku me, eye dzi lólo ɖe dɔ me na Egipte.” (Yesaya 19:1) Eteƒe madidi o Yehowa atso ɖe Satana ƒe habɔbɔa ŋu. Ɣemaɣi la, woakpɔe be nu dzodzrowoe nuɖoanyi sia ƒe mawuwo nye. (Psalmo 96:5; 97:7) ‘Dzi alólo ɖe dɔme na Egipte’ le vɔvɔ̃ ta. Yesu gblɔ ɣeyiɣi ma ƒe nya ɖi be: “Dukɔwo [atsi] dzodzodzoe le atsiaƒu ƒe gbeɖeɖe kple eƒe agbodzedze la ŋuti; eye amewo ƒe gbɔgbɔ nu latsi le vɔvɔ̃ kple mɔkpɔkpɔ na nusiwo le anyigba blibo la katã dzi vam la ŋuti.”—Luka 21:25, 26.

27. Mama kae wogblɔ ɖi be ava “Egipte,” eye aleke wòle eme vamee egbea?

²⁷ Yehowa gblɔe ɖi le ɣeyiɣi si ado ŋgɔ na eƒe ʋɔnudɔdrɔ̃ ŋu be: “Madɔ avu na Egipte kple Egipte, nɔvi kple nɔvi, havi kple havi, du kple du, fiaɖuƒe kple fiaɖuƒe, ne woawɔ aʋa kple wo nɔewo.” (Yesaya 19:2) Tso esime woɖo Mawu ƒe Fiaɖuƒea anyi le ƒe 1914 me la, ‘Yesu ƒe anyinɔnɔ ƒe dzesi’ la dze le dukɔwo kple fiaɖuƒewo ƒe tsitretsitsi ɖe wo nɔewo ŋu me. Toɖekametɔwo wuwu, ameƒomeviwo kple gbeɖekadolawo tsɔtsrɔ̃ ɖe ame miliɔn geɖe ƒe agbe ɖa le ŋkeke mamlɛ siawo me. “Fuɖuame” sia nu anɔ sesẽm ɖe edzi esime nuwuwua le aƒe tum.—Mateo 24:3, 7, 8.

28. Nukae alakpasubɔsubɔ ate ŋu awɔ atsɔ axɔ na nuɖoanyi sia le ʋɔnudrɔ̃ŋkekea dzi?

²⁸ “Maɖe gbɔgbɔ le Egipte me keŋkeŋ, eye magblẽ eƒe tameɖoɖo me, eye woabia nu legbawo, dzotɔwo, ŋɔliyɔlawo kple afakalawo.” (Yesaya 19:3) Esime Mose do ɖe Farao ŋkume la, wodo ŋukpe Egipte-fakalawo eye womete ŋu nɔ te ɖe Yehowa ƒe ŋusẽ nu o. (Mose II, 8:18, 19; Dɔwɔwɔwo 13:8; Timoteo II, 3:8) Nenema ke alakpasubɔsubɔ mate ŋu axɔ na nuɖoanyi gblẽku sia le ʋɔnudrɔ̃gbea o. (Tsɔe sɔ kple Yesaya 47:1, 11-13.) Mlɔeba Egipte va nɔ “amegã sesẽ” aɖe, si nye Asiria te. (Yesaya 19:4) Esia nye afɔku si ava nuɖoanyi sia dzi le etsɔme ƒe kpɔɖeŋu.

29. Ne Yehowa ƒe ŋkekea va la, kpekpeɖeŋu kae dunyahelawo ate ŋu ana?

²⁹ Ke dunyahehe me ŋgɔnɔlawo ya ɖe? Ðe woate ŋu axɔ nɛa? “Bometsilawo ɖeɖe sɔŋ nye Zoan-amegãwo, Farao ƒe adaŋudela nyanuwo; wodo lã woƒe adaŋudede.” (Xlẽ Yesaya 19:5-11.) Aleke gbegbe wòanye bometsinui enye si be woakpɔ mɔ be amegbetɔ adaŋudelawo ate ŋu ana kpekpeɖeŋu aɖe le ʋɔnudrɔ̃gbea! Ne xexemenunyawo katã le wo si hã la, mawumenunya mele wo si o. (Korintotɔwo I, 3:19) Wogbe Yehowa eye wotrɔ ɖe nusi woyɔna be dzɔdzɔmeŋutinunya, xexemenunya, ga, vivisese, kple mawu bubu siwo wotsɔ ɖo eteƒe ŋu. Esia na be Mawu ƒe tameɖoɖowo ƒe sidzedze aɖeke mele wo si o. Woblea wo hetɔtɔa wo. Woƒe agbagbadzedzewo nye dzodzro. (Xlẽ Yesaya 19:12-15.) “Ŋu akpe nunyalawo, dzi aɖe le wo ƒo, eye asi atu wo; kpɔ ɖa, Yehowa ƒe nya wogbe, nunya kae hele wo si azɔ ma?”—Yeremya 8:9.

Dzesi Kple Ðasefo na Yehowa

30. Mɔ ka nue “Yuda-nyigba azu ŋɔdzi na Egipte” le?

³⁰ Gake togbɔ be “Egiptetɔwo” ƒe kplɔlawo gbɔdzɔ “abe nyɔnuwo ene” hã la, godoo wo dometɔ aɖewo adi mawumenunya. Yehowa ƒe amesiaminawo kple woƒe zɔhɛwo ‘ɖea gbeƒã Mawu ƒe nutsuwɔwɔwo fiana.’ (Yesaya 19:16; Petro I, 2:9) Wole woƒe ŋutete ɖesiaɖe wɔm le nu xlɔ̃m amewo le Satana ƒe habɔbɔa ƒe tsɔtsrɔ̃ si gbɔna ŋu. Nɔnɔme siae Yesaya nɔ mɔ kpɔm na esime wògblɔ be: “Yuda-nyigba azu ŋɔdzi na Egipte, eye ne woyɔ eŋkɔ le egbɔ la, adzo nyanyanya le Yehowa ƒe ta me, si wòɖo ɖe eŋu la ta.” (Yesaya 19:17) Yehowa ƒe dɔla nuteƒewɔlawo yina ɖagblɔa nyateƒea na amewo—woɖea gbeƒã fuwɔame siwo Yehowa gblɔ ɖi hã. (Nyaɖeɖefia 8:7-12; 16:2-12) Esia ɖea fu na xexeme subɔsubɔhakplɔlawo.

31. Aleke wòdzɔe be wodo “Kanaan-gbe” le Egipte-duwo me (a) le blema? (b) kple egbea hã?

³¹ Nu wɔmoyaa kae do tso gbeƒãɖeɖedɔ sia me? “Le ɣemaɣi la du atɔ̃ anɔ Egipte-nyigba dzi, siwo agblɔ Kanaan-gbe, woaka atam na Yehowa Zebaot, eye woayɔ wo dometɔ ɖeka be [Gbegblẽ ƒe Du, “NW”].” (Yesaya 19:18) Edze ƒã be nyagblɔɖi sia va eme le blemaɣeyiɣiwo me esime Yudatɔ siwo si yi Egipte-duwo me nɔ Hebrigbe dom le afima. (Yeremya 24:1, 8-10; 41:1-3; 42:9–43:7; 44:1) Egbea amewo le egbeŋkekea me “Egipte” ƒe anyigba dzi siwo srɔ̃ Biblia me nyateƒea ƒe “gbegbɔgblɔ dzadzɛ” la dodo. (Zefanya 3:9) Woyɔ kpɔɖeŋuduawo dometɔ ɖeka be “Gbegblẽ ƒe Du,” si fia be ‘gbegbɔgblɔ dzadzɛa’ ƒe akpa ma ku ɖe nukoklo le Satana ƒe habɔbɔa kple eƒe “gbegblẽ” ŋu.

32. (a) “Vɔsamlekpui” kae le Egipte-nyigba titina? (b) Aleke amesiaminawo le abe “dzesikpe” ene le Egipte ƒe liƒo dzi?

³² Gbeƒãɖeɖedɔ si wɔm Yehowa ƒe amewo le na be amewo anya Yehowa ƒe ŋkɔ gã la godoo le nuɖoanyi sia me. “Ɣemaɣi la vɔsamlekpui anɔ Egipte-nyigba titina na Yehowa, eye dzesikpe anɔ eƒe liƒo dzi na Yehowa.” (Yesaya 19:19) Nya siawo fia asi ɖoƒe si Kristotɔ amesiamina siwo le nubabla me kple Mawu la le. (Psalmo 50:5) Wozu abe “vɔsamlekpui” ene le vɔ sam; wozu abe “nyateƒe ƒe sɔti kple gɔmeɖoɖoanyi sesĩ” ene le ɖase ɖim le Yehowa ŋu. (Timoteo I, 3:15; Romatɔwo 12:1; Hebritɔwo 13:15, 16) Wole ‘anyigba la titina’ eye wokpɔa wo—kpakple woƒe zɔhɛ siwo nye ‘alẽ bubuawo’—le dukɔ kple ƒukpo 230 kple edzivɔ dzi. Gake ‘womenye xexeame ƒe akpa aɖeke o.’ (Yohanes 10:16; 17:15, 16) Le kpɔɖeŋumɔ nu la, wotɔ ɖe xexe sia kple Mawu ƒe Fiaɖuƒea ƒe liƒo dzi, eye wodzra ɖo be yewoatso liƒo ma axɔ yewoƒe dziƒofetua.

33. Mɔ kawo nue amesiaminawo nye “dzesi” kple “ɖaseɖiɖi” le “Egipte”?

³³ Yesaya yi edzi be: “Anye dzesi kple ɖaseɖiɖi na Yehowa Zebaot le Egipte-nyigba dzi, eye ne wodo ɣli na Yehowa le woƒe ketɔwo ta la, aɖo xɔnametɔ ɖe wo, amesi awɔ aʋa aɖe wo.” (Yesaya 19:20) Amesiamina siwo le abe “dzesi” kple “ɖaseɖiɖi” ene la xɔa ŋgɔ le gbeƒãɖeɖedɔa me eye wodoa Yehowa ƒe ŋkɔ ɖe dzi le nuɖoanyi sia me. (Yesaya 8:18; Hebritɔwo 2:13) Woate ŋu ase amesiwo wote ɖe anyi ƒe ɣlidodo le xexeame katã, gake ne míagblɔe la, amegbetɔdziɖuɖuwo mete ŋu naa kpekpeɖeŋu wo o. Gake Yehowa aɖo Ðela Gã aɖe ɖa, si nye Fia Yesu Kristo, be wòana ablɔɖe ɖokuibɔbɔlawo katã. Ne ŋkeke mamlɛ siawo wu enu le Harmagedon-ʋa la me la, ana mawuvɔ̃lawo nakpɔ gbɔdzɔe kple yayra mavɔwo.—Psalmo 72:2, 4, 7, 12-14.

34. (a) Aleke “Egiptetɔwo” ava dze si Yehowae, eye vɔsa kple nunana kae woatsɔ nɛ? (b) Ɣekaɣie Yehowa aƒo Egipte, eye hayahaya kae akplɔe ɖo?

³⁴ Gake hafi ɣemaɣi naɖo la, enye Mawu ƒe lɔlɔ̃nu be sidzedze vavãtɔ nasu ame ƒomeviwo katã si ne woakpɔ ɖeɖe. (Timoteo I, 2:4) Eyata Yesaya gblɔ be: “Yehowa aɖe eɖokui afia Egiptetɔwo, eye Egiptetɔwo adze si Yehowa ɣemaɣi, woatsɔ akpedavɔsa kple nuɖuvɔsa asubɔe, woaɖe adzɔgbe na Yehowa, eye woawɔ edzi. Yehowa aƒo Egiptetɔwo, eye wòagahaya wo; elabena ne wotrɔ ɖe eŋu la, ase woƒe kukuɖeɖe, eye wòahaya wo.” (Yesaya 19:21, 22) “Egiptetɔwo,” siwo nye amesiwo tso Satana ƒe xexea ƒe dukɔwo katã me, va dzea si Yehowa hesaa vɔ nɛ, si nye “nuyi, siwo ʋua eŋkɔ me la, ƒe kutsetse.” (Hebritɔwo 13:15) Wodoa ŋugbe na Yehowa to adzɔgbeɖeɖe nɛ me, eye wonɔa agbe nuteƒewɔwɔtɔe hewɔa subɔsubɔdɔa tsɔ xea woƒe adzɔgbeɖefe lae. Ne Yehowa ‘ƒo’ nuɖoanyi sia le Harmagedon vɔ la, ato eƒe Fiaɖuƒea dzi ayɔ dɔ amegbetɔƒomea. Le Yesu ƒe Ƒe Akpe Ðeka Dziɖuɖua me la, woakplɔ ameƒomea aɖo blibodede gbɔ le gbɔgbɔ me, susu me, agbenɔnɔ me, kple le ŋutilã me—anye hayahaya nyateƒe!—Nyaɖeɖefia 22:1, 2.

“Woayra Wò, Nye Dukɔ”

35, 36. Kadodo kae va nɔ Egipte, Asiria, kple Israel dome le blema si nye Yesaya 19:23-25 me vava?

³⁵ Azɔ nyagblɔɖila la kpɔ nudzɔdzɔ ɖedzesi aɖe do ŋgɔ: “Ɣemaɣi la mɔ tata atso Egipte ayi Asur; Asur ava Egipte, eye Egipte ayi Asur, eye Egipte kple Asur siaa woasubɔe. Ɣemaɣi la Israel anye etɔ̃lia akpe ɖe Egipte kple Asur ŋu ahanye yayra anɔ anyigba titina, eye Yehowa Zebaot ayrae agblɔ bena: Woayra wò, nye dukɔ Egipte kple nye asinudɔwɔwɔ Asur kpakple nye domenyinu Israel!” (Yesaya 19:23-25) Ẽ, xɔlɔ̃wɔwɔ ava ɖo Egipte kple Asiria dome gbeɖeka. Aleke wòadzɔe?

³⁶ Esime Yehowa ɖe eƒe amewo tso dukɔwo me le blema la, eta mɔ si yi ablɔɖe me na wo le kpɔɖeŋumɔ nu. (Yesaya 11:16; 35:8-10; 49:11-13; Yeremya 31:21) Nyagblɔɖi sia ƒe akpa aɖe va eme le Babilon dzi ɖuɖu megbe esime wokplɔ aboyomewo tso Asiria kple Egipte, kpakple Babilon trɔ va Ŋugbedodonyigba la dzi. (Yesaya 11:11) Ke le egbeŋkekea me hã ɖe?

37. Aleke ame miliɔn geɖe wɔa nui egbea abe ɖe mɔ tata aɖe tso “Asiria” yi “Egipte” ene?

³⁷ Egbea gbɔgbɔ me Israel-vi amesiaminawo ƒe ame susɔeawo nye ‘yayra le anyigba titina.’ Wodoa tadedeagu vavãtɔ ɖe ŋgɔ eye wole gbeƒã ɖem Fiaɖuƒegbedasia na amewo le dukɔwo katã me. Dukɔ siawo dometɔ aɖewo wɔa nu abe Asiria ene hesẽ ŋutɔ le asrafonyawo me. Dukɔ bubuwo ƒe nya me mesẽ nenema o, ɖewohĩ wole abe Egipte—si nye “dziehefia” ɣeaɖeɣi le Daniel ƒe nyagblɔɖia me la—ene. (Daniel 11:5, 8) Ame miliɔn geɖe siwo tso dukɔ siwo sesẽ le asrafonya me kple esiwo ƒe nya me mesẽ o siaa me va le tadedeagu vavãtɔ me. Alea wòdzɔe be amesiwo tso dukɔwo katã me wɔ ɖeka le ‘subɔsubɔm.’ Dukɔmevinyenye ƒe mama aɖeke mele amesiawo dome o. Wolɔ̃ wo nɔewo, eye woate ŋu agblɔ le nyateƒe me be ‘Asiria va Egipte eye Egipte yi Asiria.’ Ele abe ɖe mɔ tata tso ɖeka gbɔ yi evelia gbɔ ene.—Petro I, 2:17.

38. (a) Aleke Israel “anye etɔ̃lia akpe ɖe Egipte kple [Asiria] ŋu”? (b) Nukata Yehowa gblɔ be “Woayra wò, nye dukɔ”?

³⁸ Gake aleke Israel ‘va nye etɔ̃lia kpe ɖe Egipte kple Asiria ŋui’? Le ‘nuwuɣia’ ƒe gɔmedzedze la, amesiwo nɔ Yehowa subɔm le anyigba dzi la ƒe akpa gãtɔ nye “Mawu ƒe Israel” la me tɔwo. (Daniel 12:9; Galatiatɔwo 6:16) Tso ƒe 1930 ƒeawo me la, ‘alẽ bubuawo’ ƒe ameha gã aɖe siwo si anyigbadzinɔnɔ ƒe mɔkpɔkpɔ le la do. (Yohanes 10:16a; Nyaɖeɖefia 7:9) Wodo tso dukɔwo—esiwo wotsɔ Egipte kple Asiria wɔ kpɔɖeŋu na—me hele zi nyẽm ɖe Yehowa ƒe tadedeagu ƒe aƒe la ŋu eye wokpea ame bubuwo be woava wɔ ɖeka kpli yewo. (Yesaya 2:2-4) Gbeƒãɖeɖedɔ si wo nɔvi amesiaminawo wɔna la ke wowɔna, wodoa dzi le dodokpɔ mawo ke me, woɖea anukwareɖiɖi kple nuteƒewɔwɔ ma ke fiana, eye woɖua nu le gbɔgbɔmekplɔ̃ ɖeka ma ke ŋu. Amesiaminawo kple ‘alẽ bubuawo’ nye “alẽha ɖeka” nyateƒe. (Yohanes 10:16b) Ðe ame aɖe ate ŋu ake ɖi le alesi Yehowa kpɔa ŋudzedze ɖe woƒe dɔwɔwɔ ŋu le woƒe veviedodo kple dzidodo ta la ŋua? Mewɔ nuku o be egblɔ yayranya sia tso wo ŋu be: “Woayra wò, nye dukɔ”!

[Etenuŋɔŋlɔwo]

[Nɔnɔmetata si le axa 191]

Filisti-srafowo lũ ɖe woƒe futɔwo dzi (Egiptetɔwo ƒe ƒe alafa 12 lia D.M.Ŋ. me nukpakpa)

[Nɔnɔmetata si le axa 192]

Moab-srafo alo mawu si wokpa ɖe kpe dzi (tso ƒe alafa 11 vaseɖe 8 lia D.M.Ŋ. me)

[Nɔnɔmetata si le axa 196]

Siria-srafo si do kposɔ (ƒe alafa asiekelia D.M.Ŋ. me)

[Nɔnɔmetata si le axa 198]

Amegbetɔƒome dzeaglã ƒe “atsiaƒua” hea dzimaɖeɖi kple tɔtrɔ kpatawo vɛ

[Nɔnɔmetata si le axa 203]

Egipte-trɔ̃nuawo mete ŋu nɔ te ɖe Yehowa ƒe ŋusẽ nu o