‘Nusiawo Ava Eme Tsã’
“Yesu ɖo ŋu gblɔ na wo bena: . . . [Nusiawo] ava me tsã; gake nuwuwu la meɖo haɖe o.”—MATEO 24:4-6.
1. Nya ka mee wòle be míatsɔ ɖe le?
ÐIKEKE mele eme o be ètsɔ ɖe le wò agbe kple wò etsɔme me. Ekema ele be wò hã nàtsɔ ɖe le nya aɖe si ŋu C. T. Russell tsi dzi ɖo va yi le ƒe 1877 me la ŋu. Russell, amesi va ɖo Gbetakpɔxɔ Habɔbɔa lae ŋlɔ agbalẽ si nye The Object and Manner of Our Lord’s Return. Axa 64 gbalẽvi sia dzro Yesu ƒe tɔtrɔgbɔ, alo eƒe vava le etsɔme me. (Yohanes 14:3) Ɣeaɖeɣi esi wonɔ Amitoa dzi la, apostoloawo bia nya tso tɔtrɔgbɔ sia ŋu be: “Ɣekaɣie nusiawo ava, eye ka enye wò anyinɔnɔ [alo, “vava,” King James Version] kple nuɖoanyiawo ƒe nuwuwu la ƒe dzesi?”—Mateo 24:3, NW.
2. Nukatae susu vovovo le amewo si le nya si Yesu gblɔ ɖi ŋu?
2 Ènya alesi Yesu ɖo nyaa ŋua, eye èse egɔmea? Ele Nyanyuigbalẽawo dometɔ etɔ̃ me. Nufialagã D. A. Carson gblɔ be: “Biblia ƒe ta ʋee aɖewo gome koe numeɖelawo ƒe nu mesɔ le o ne míetsɔ wo sɔ kple nya siwo le Mateo 24 kple esiwo do ƒome kplii le Marko 13 kple Luka 21.” Emegbe egblɔ nusi eya ŋutɔ hã susu—etɔ hã nye amegbetɔ ƒe nukpɔsusu tovovoawo dometɔ bubu. Le ƒe alafa si va yi me lɔƒo la, nukpɔsusu siawo dometɔ geɖe ɖe xɔsemanɔamesi fia. Amesiwo do susuawo ɖa he nya be Yesu megblɔ nya siwo míexlẽna le Nyanyuigbalẽawo me o, be wova tɔ tsi eƒe nyawo emegbe, alo be eƒe nyagblɔɖiawo meva eme o—amesiwo kea ɖi vivivo ƒe nukpɔsusuwoe wonye. Numeɖela aɖe gɔ̃ hã nɔ te ɖe ‘Mahayana-Buddhatɔwo ƒe nukpɔsusu’ dzi ɖe Marko ƒe Nyanyuia mee!
3. Aleke Yehowa Ðasefowo bua Yesu ƒe nyagblɔɖiae?
3 Gake Yehowa Ðasefowo bua Biblia be enye nyateƒegbalẽ si dzi woate ŋu aka ɖo, hekpe ɖe nya siwo Yesu gblɔ na apostolo ene siwo nɔ egbɔ le Amitoa dzi ŋkeke etɔ̃ do ŋgɔ na eƒe ku la ŋuti. Tso C. T. Russell ŋɔli ke la, nya siwo Yesu gblɔ ɖi le afima me nɔ kɔkɔm ɖe edzi na Mawu ƒe amewo vivivi. Le ƒe ʋee siwo va yi me la, Gbetakpɔxɔ gakɔ nyagblɔɖi sia ŋuti nukpɔsusu si le wo si me ɖe edzi. Ðe numeɖeɖe ma tsi susu me na wò eye nèkpɔ alesi wòka wò agbenɔnɔa?a Na míagadzro eme.
Afɔku aɖe Nɔ Ŋgɔ Gbɔna
4. Anye nukatae apostoloawo bia nya Yesu le etsɔme ŋu?
4 Apostoloawo nya be Yesue nye Mesia la. Eyata esi wose wògblɔ be yeaku, afɔ ɖe tsitre, eye yeagatrɔ adzo la, woanya bu le susu me be, ‘Ne Yesu ku hedzo la, aleke wòawɔ ana nya wɔnuku siwo wogblɔ be Mesia la awɔ nava eme?’ Gakpe ɖe eŋu la, Yesu ƒo nu tso Yerusalem kple eƒe gbedoxɔ ƒe tsɔtsrɔ̃ ŋu. Apostoloawo anya bu le susu me be, ‘Ɣekaɣie nusia adzɔ eye aleke wòadzɔe?’ Esi apostoloawo di be yewoase nya siawo gɔme ta la, wobia be: “Ɣekaɣie nusiawo ava, eye nuka lanye dzesi na ɣeyiɣi si me nusiawo katã lawu nu mahã?”—Marko 13:4, NW; Mateo 16:21, 27, 28; 23:37–24:2.
5. Aleke ŋuɖoɖo si Yesu na va eme le ƒe alafa gbãtɔa mee?
5 Yesu gblɔe ɖi be aʋawɔwɔwo, dɔwuamewo, dɔvɔ̃wo, anyigbaʋuʋuwo, fuléle Kristotɔwo kple wo yome titi, aʋatso Mesiawo, kple gbeƒãɖeɖe Fiaɖuƒe nyanyuia le afisiafi ayi edzi. Emegbe nuwuwua ava. (Mateo 24:4-14; Marko 13:5-13; Luka 21:8-19) Yesu gblɔ nya sia le ƒe 33 M.Ŋ. ƒe gɔmedzedze lɔƒo. Le ƒe siwo kplɔe ɖo me la, eƒe nusrɔ̃la siwo nɔ ŋudzɔ te ŋu kpɔe be nya siwo wògblɔ ɖi la nɔ eme vam le mɔ ɖedzesi aɖe nu nyateƒe. Ẽ, ŋutinya ɖo kpe edzi be dzesiawo va eme ɣemaɣi, va de asi na esime Romatɔwo va tsrɔ̃ Yudatɔwo ƒe nuɖoanyia le ƒe 66-70 M.Ŋ. me. Aleke nyaawo dzɔe?
6. Nya kae ɖo Romatɔwo kple Yudatɔwo dome le ƒe 66 M.Ŋ. me?
6 Le Yudatɔwo ƒe dzomeŋɔli xɔdzoa me le ƒe 66 M.Ŋ. me la, Yudatɔ Zazɛ̃nyahelawo nɔ ŋgɔ wodze Roma-srafo siwo nɔ mɔ̃ aɖe si gogo Yerusalem gbedoxɔa me dzi, ale be wote ʋunyaʋunya wɔwɔ le teƒe bubuwo le dukɔa me. Nufialagã Heinrich Graetz gblɔ le agbalẽ si nye History of the Jews me be: “Cestius Gallus, amesi nye Siria Dziɖula si ƒe dɔe wònye be wòana bubu si le Roma-srafowo ŋu nakpɔtɔ anɔ wo ŋu la . . . magate ŋu akpɔ eteƒe aglãdzedzea nanɔ ta kekem ƒo xlãe eye wòagbe naneke wɔwɔ atsɔ atsi enui be magakeke ta o. Eyɔ eƒe asrafowo ƒo ƒu eye dudzikpɔla siwo nɔ nutoa me lɔ̃ faa ɖo woƒe asrafowo ɖa.” Aʋakɔ sia si me ame 30,000 nɔ la ɖe to ɖe Yerusalem. Le aʋawɔwɔ vie megbe la, Yudatɔawo si va be ɖe gli siwo te ɖe gbedoxɔa ŋu megbe. “Romatɔawo ho ɖe gliawo ŋu ŋkeke atɔ̃ tre ɖe enu, gake ɣesiaɣi la, ɖeko wosina le Yudatɔwo ƒe aʋawɔnu siwo dam wonɔ la nu. Ŋkeke adelia dzi ko hafi wote ŋu ku dzigbeglia ƒe akpa aɖe gɔme le Gbedoxɔa ŋkume.”
7. Nukatae Yesu ƒe nusrɔ̃lawo ƒe nukpɔsusu to vovo na Yudatɔ akpa gãtɔ tɔ?
7 Wò ya kpɔ alesi gbegbe Yudatɔawo atɔtɔe ɖa, elabena wosusui tso gbaɖegbe ke be Mawu akpɔ yewo kple yewoƒe du kɔkɔea ta! Gake woxlɔ̃ nu Yesu ƒe nusrɔ̃lawo do ŋgɔ be afɔku aɖe ava Yerusalem dzi. Yesu gblɔe ɖi be: “Ŋkekewo ava dziwò, eye wò ketɔwo aƒu kpo ɖe ŋuwò, eye woaɖe to aƒo xlã wò, eye woaxaxa wò ɖe eme le goawo katã dzi, eye woaxlã wò kple viwò, siwo le mewò la, ɖe anyi, eye womele kpe gblẽ ge ɖe kpe dzi le mewò o.” (Luka 19:43, 44) Gake ɖe wòfia be Kristotɔ siwo nɔ Yerusalem le ƒe 66 M.Ŋ. me akua?
8. Afɔku kae Yesu gblɔ ɖi, eye amekawoe nye “ame tiatia” siwo ta woɖe ŋkekeawo dzi ɖo?
8 Esi Yesu nɔ apostoloawo ƒe nya ŋu ɖom le Amitoa dzi la, egblɔe ɖi be: “Ŋkeke mawo lanye xaxa, si tɔgbe meva kpɔ tso nuwɔwɔ, si Mawu wɔ la, ƒe gɔmedzedze vaseɖe egbegbe o, eye megale vava ge akpɔ o. Eye ne menye bena, ɖe Aƒetɔ la ɖe ŋkekeawo dzi o la, ŋutilã aɖeke makpɔ ɖeɖe o; gake le ame tiatia, siwo wotia ŋuti la, eɖe ŋkekeawo dzi.” (Marko 13:19, 20; Mateo 24:21, 22) Eyata woaɖe ŋkekeawo dzi eye woaxɔ na ‘ame tiatiaawo.’ Woawoe nye amekawo? Menye Yudatɔ dzeaglã siwo be yewosubɔa Yehowa gake wogbe Via lae kura o. (Yohanes 19:1-7; Dɔwɔwɔwo 2:22, 23, 36) Amesiwo nye ame tiatiaawo ŋutɔŋutɔ ɣemaɣie nye Yudatɔ kple amesiwo menye Yudatɔwo o siwo xɔ Yesu dzi se be eyae nye Mesia kple Ðela la. Mawu tia amesiawo, eye wòna wozu gbɔgbɔmedukɔ yeye, “Mawu ƒe Israel,” le ƒe 33 M.Ŋ. ƒe Pentekoste dzi.—Galatiatɔwo 6:16; Luka 18:7; Dɔwɔwɔwo 10:34-45; Petro I, 2:9.
9, 10. Aleke ‘woɖe’ Romatɔwo ƒe amedzidzedzea ‘dzii,’ eye nukae do tso eme?
9 Ðe ‘woɖe ŋkekeawo dzi’ eye woɖe amesiamina tiatia siwo nɔ Yerusalema? Nufialagã Graetz gblɔ be: “[Cestius Gallus] mekpɔe be anyo be yeagayi aʋawɔwɔ dzi kple kalẽwɔla ŋkumesẽla mawo anɔ aʋa wɔm eteƒe nadidi le ɣeyiɣi ma me, esime wòsusɔ vie kelemetsi nate dzadza . . . eye mana asrafoawo ƒe asi nasu nuhiãhiãwo dzi o la o. Le susu sia ta ɖewohĩ esusui be nunya anɔ eme be yeatrɔ adzo.” Susu ka kee wònye va tame na Cestius Gallus o, Roma-srafoawo gblẽ dua ɖi hetrɔ dzo eye Yudatɔwo kplɔ wo ɖo hegblẽ nu le wo ŋu ale gbegbe.
10 Romatɔwo ƒe tɔtrɔ dzo wɔmoya ma wɔe be woɖe “ŋutilã” aɖewo—siwo nye Yesu ƒe nusrɔ̃la siwo ɖo ŋɔdzi me le Yerusalem-dua me. Ele ŋutinya me be esi mɔnukpɔkpɔ sia ʋu ɖi la, Kristotɔwo si le nutoa me. Aleke gbegbe Mawu ɖee fia be yeate ŋu anya etsɔme akpɔ egbɔ be ye subɔlawo tsi agbee nye si! Ke nukae dzɔ ɖe Yudatɔ dzimaxɔsetɔ siwo gakpɔtɔ nɔ Yerusalem kple Yudea ya dzi?
Eŋɔlimetɔwo Akpɔ Eteƒe
11. Nukae Yesu gblɔ le “dzidzime sia” ŋuti?
11 Yudatɔ geɖe susu be yewoƒe subɔsubɔ nuɖoanyi si wowɔna le gbedoxɔa me anɔ anyi ɖaa. Gake Yesu gblɔ be: “Misrɔ̃ [nusia] le gboti ŋuti! Ne tsi ɖo eƒe alɔwo me, eye wòto aŋgbawo la, ekema midze sii bena, dzomeŋɔli le ɖoɖo ge; nenema ke miawo hã, ne miekpɔ nusiawo katã la, midze sii bena, egogo agbo la nu. Vavã mele egblɔm na mi bena: Dzidzime sia nu mele yiyi ge, vaseɖe esime nusiawo katã nava ve me o. Dzi kple anyigba nu lava yi, ke nye nyawo nu mele yiyi ge akpɔ o.”—Mateo 24:32-35, míawoe te gbe ɖe edzi.
12, 13. Anye alekee nusrɔ̃lawo se “dzidzime sia” si Yesu yɔ la gɔmee?
12 Le ƒe siwo do ŋgɔ na ƒe 66 M.Ŋ. me la, Kristotɔwo anya kpɔ dzesi ƒokplia ƒe akpa gbãtɔwo dometɔ geɖe ƒe emevava—siwo nye aʋawɔwɔwo, dɔwuamewo, kple gbeƒãɖeɖe Fiaɖuƒe nyanyuia le teƒe gbogbo aɖewo gɔ̃ hã. (Dɔwɔwɔwo 11:28; Kolosetɔwo 1:23) Gake ɣekaɣie nuwuwua ava? Nukae Yesu wɔnɛ esi wògblɔ be: ‘Dzidzime [Helagbe, ge·ne·aʹ] sia nu mele yiyi ge o’? Zi geɖe la, Yesu yɔa eŋɔlime Yudatɔ tsitretsiɖeŋula, siwo dome subɔsubɔhakplɔlawo hã le, ƒe ƒuƒoƒoa katã be “dzidzime vɔ̃ɖi wɔahasi.” (Mateo 11:16; 12:39, 45; 16:4; 17:17; 23:36) Eyata esime wonɔ Amitoa dzi eye wòyɔ “dzidzime sia” la, edze ƒã be menye Yudatɔ siwo katã nɔ agbe kpɔ ƒe nya gblɔm wònɔ o; eye menye eyomedzelawoe wòwɔnɛ o, togbɔ be wonye “dzidzime tiatia” hã. (Petro I, 2:9) Eye menye ɖe Yesu le gbɔgblɔm be “dzidzime sia” nye ɣeyiɣi ƒe didime aɖe hã o.
13 Ke Yudatɔ tsitretsiɖeŋula siwo nɔ anyi ɣemaɣi eye woakpɔ dzesi siwo wògblɔ ƒe emevava boŋue Yesu wɔnɛ. Nufialagã Joel B. Green gblɔ le “dzidzime sia” si woyɔ le Luka 21:32 ŋu be: “Enuenu le Nyanyuigbalẽ Etɔ̃lia me la, ‘dzidzime sia’ (kple nya siwo do ƒome kplii) fiaa amewo ƒe hatsotso siwo tsi tre ɖe Mawu ƒe tameɖoɖo ŋu. . . . [Efiana] amesiwo tsɔ dzimesesẽ gbe Mawu ƒe tameɖoɖo.”b
14. Nukae dzɔ ɖe “dzidzime” ma dzi, gake aleke nusi dzɔ ɖe Kristotɔwo dzi to vovoe?
14 Yudatɔ tsitretsiɖeŋulawo ƒe dzidzime vɔ̃ɖi si kpɔ eteƒe dzesia va eme la akpɔ nuwuwua hã teƒe. (Mateo 24:6, 13, 14) Eye wokpɔ eteƒe hã! Le ƒe 70 M.Ŋ. me la, Titus, Fiagã Vespasian viŋutsu, nɔ ŋgɔ na Roma-srafowo wogatrɔ va. Yudatɔ siwo woxaxa ɖo ɖe dua me ƒe fukpekpe wɔ mo yaa wu gbɔgblɔ.c Eteƒekpɔla Flavius Josephus ka nya ta be va ɖo esime Romatɔawo tsrɔ̃ dua la, Yudatɔ 1,100,000 kloe ku eye wokplɔ wo dometɔ siwo ade 100,000 yi aboyomee, eye emegbe kpuie la, amesiawo dometɔ akpa gãtɔ aku ŋɔdzitɔe le dɔwuame ta alo le Romatɔwo ƒe fefewɔƒewo. Le nyateƒe me la, xaxa si va le ƒe 66-70 M.Ŋ. me nye gãtɔ kekeake si teƒe Yerusalem kple Yudatɔwo ƒe nuɖoanyia kpɔ kpɔ alo ɖeke magade ema nu o. Aleke gbegbe nusi va dzɔ ɖe Kristotɔ siwo wɔ ɖe Yesu ƒe nyagblɔɖinuxlɔ̃amea dzi eye wodzo le Yerusalem le Roma-srafowo ƒe dzodzo vɔ megbe le ƒe 66 M.Ŋ. me to vovoe nye si! ‘Woɖe’ Kristotɔ amesiamina ‘tiatiaawo,’ alo wokpɔ wo ta wonɔ dedie le ƒe 70 M.Ŋ. me.—Mateo 24:16, 22.
Emevava Bubu Gagbɔna
15. Aleke míawɔ aka ɖe edzi be Yesu ƒe nyagblɔɖia agava eme le mɔ si lolo wu nu le ƒe 70 M.Ŋ. me megbe?
15 Gake mese ɖe afima o. Yesu gblɔ do ŋgɔ be ne wotsrɔ̃ dua vɔ la, yeava le Yehowa ƒe ŋkɔ me. (Mateo 23:38, 39; 24:2) Ena nya sia me kɔ nyuie ɣemaɣi le nya si wògblɔ ɖi le Amitoa dzi me. Esi wògblɔ be “xaxa gã” ava vɔ megbe la, egblɔ be emegbe aʋatso Kristowo ado, eye dukɔwo atu afɔ Yerusalem dzi ɣeyiɣi didi aɖe. (Mateo 24:21, 23-28; Luka 21:24) Ðe wòanye be emevava bubu si lolo wu gagbɔna? Kpeɖodzinyawo fia be agava eme. Ne míetsɔ Nyaɖeɖefia 6:2-8 (si woŋlɔ le xaxa si va Yerusalem dzi le 70 M.Ŋ. me vɔ megbe) sɔ kple Mateo 24:6-8 kple Luka 21:10, 11 la, míekpɔe be aʋawɔwɔ, nuɖuɖu ƒe veve, kple dɔvɔ̃ siwo lolo wu agava. Yesu ƒe nya siawo ƒe emevava si lolo wu la le edzi yim tso esime Xexemeʋa I dze egɔme le ƒe 1914 me ke.
16-18. Nukae míele mɔ kpɔm be egbɔna dzɔdzɔ ge?
16 Ƒe bla nanewoe nye sia si Yehowa Ðasefowo le nu fiam be dzesia ƒe emevava egbegbetɔ ɖo kpe edzi be “xaxa gã” aɖe gale ŋgɔ gbɔna. “Dzidzime” vɔ̃ɖi si li fifia akpɔ xaxa ma teƒe. Edze abe nane adzɔ do ŋgɔ gbã ene (si anye alakpasubɔsubɔhawo katã dzi dzedze), abe alesi aʋa si Gallus ho le ƒe 66 M.Ŋ. me ʋu xaxa gã si va Yerusalem dzi nui ene.d Emegbe le ɣeyiɣi ƒe dometsotso si mele nyanya o megbe la, nuwuwua ava—anye tsɔtsrɔ̃ ava xexeame katã abe alesi wòdzɔ le ƒe 70 M.Ŋ. mee ene.
17 Esi Yesu nɔ nu ƒom tso xaxa si le mía ŋgɔ kpuie ŋu la, egblɔ be: “Enumake le ŋkeke mawo ƒe xaxa [alakpasubɔsubɔhawo tsɔtsrɔ̃] megbe la ɣe la ado viviti, eye ɣleti megale ɖiɖi ge o, ɣletiviwo lage tso dziƒo, eye dziƒowo ƒe ŋusẽwo aʋuʋu. Tete Amegbetɔvi la ƒe dzesi lado ɖe dziŋgɔli me, eye anyigba dzi ƒomeawo katã woado konyifaɣli, eye woakpɔ Amegbetɔvi la le dziƒolilikpowo dzi gbɔna kple ŋusẽ kple ŋutikɔkɔe geɖe.”—Mateo 24:29, 30.
18 Eyata Yesu ŋutɔ gblɔ be “le ŋkeke mawo ƒe xaxa megbe la,” nane ƒomevi adzɔ le dziŋgɔli me. (Tsɔe sɔ kple Yoel 3:1-5; 4:15.) Nusia ana amegbetɔ tosẽlawo naɖi vo eye dzidzi naƒo wo ale gbegbe be “woado konyifaɣli.” Ame geɖe “ƒe gbɔgbɔ nu latsi le vɔvɔ̃ kple mɔkpɔkpɔ na nusiwo le anyigba blibo la katã dzi vam la ŋuti.” Gake manɔ alea le Kristotɔ vavãtɔwo gome o! Woawo ya ‘woafɔ woƒe tawo dzi, elabena woƒe ɖeɖe gogo.’—Luka 21:25, 26, 28.
Ʋɔnudɔdrɔ̃ Gbɔna!
19. Aleke míawɔ anya ɣeyiɣi si me alẽwo kple gbɔ̃wo ŋuti lododoa ava eme?
19 De dzesii be Mateo 24:29-31 gblɔe ɖi be (1) Amegbetɔvi la ava, (2) ava kple ŋutikɔkɔe geɖe le vava sia me, (3) mawudɔlawo ava kplii, eye (4) anyigba dzi ƒomeawo katã akpɔe. Yesu gagblɔ nya siawo le alẽwo kple gbɔ̃wo ŋuti lo si wòdo me. (Mateo 25:31-46) Eyata míate ŋu aƒo nya ta be lododoa ƒe ɣeyiɣi nye esime nu gbãtɔ adzɔ wòanye xaxa gã la ƒe gɔmedzedze, eye Yesu ava kple eƒe dɔlawo eye wòanɔ anyi ɖe eƒe fiazikpui dzi be yeadrɔ̃ ʋɔnu. (Yohanes 5:22; Dɔwɔwɔwo 17:31; tsɔe sɔ kple Fiawo I, 7:7; Daniel 7:10, 13, 14, 22, 26; Mateo 19:28.) Amekawoe woadrɔ̃ ʋɔnui, eye nukae ado tso eme na wo? Edze le lododoa me be Yesu ƒe ŋku anɔ dukɔwo katã ŋu, abe ke ɖe woƒo ƒu ɖe eƒe dziƒofiazikpuia ŋgɔ tututu ene.
20, 21. Nukae adzɔ ɖe alẽ siwo le Yesu ƒe lododoa me dzi? (b) Nukae gbɔna dzɔdzɔ ge ɖe gbɔ̃awo dzi?
20 Woatia ŋutsu kple nyɔnu siwo ɖi alẽwo ɖe Yesu ƒe ɖusime si fia be wokpɔ ŋudzedze ɖe wo ŋu. Nukatae? Elabena wozã mɔnukpɔkpɔ si su wo si tsɔ wɔ nyui na nɔviawo—siwo nye Kristotɔ amesiamina siwo akpɔ gome le Kristo ƒe dziƒo Fiaɖuƒea me. (Daniel 7:27; Hebritɔwo 2:9–3:1) Le alesi wòdze le lododoa mee nu la, Kristotɔ miliɔn geɖe siwo ɖi alẽwo la kpɔ Yesu ƒe gbɔgbɔmenɔviawo dze sii eye wole dɔ wɔm tsɔ le asi kpem ɖe wo ŋu. Le esia ta mɔkpɔkpɔ si tso Biblia me le “ameha gã” la si be yewoatsi agbe le “xaxa gã la” me eye emegbe yewoanɔ agbe tegbee le Paradiso si nye Mawu Fiaɖuƒea ƒe anyigba dzi dziɖuƒea me.—Nyaɖeɖefia 7:9, 14; 21:3, 4; Yohanes 10:16.
21 Nusi ava eme na gbɔ̃awo to vovo ale gbegbe! Wogblɔ le wo ŋu le Mateo 24:30 be “woado konyifaɣli” ne Yesu va. Eye wodze na konyifafa, elabena nɔnɔme siwo woakpɔ le wo ŋue nye be wogbe Fiaɖuƒegbedasia, wotsia tre ɖe Yesu ƒe nusrɔ̃lawo ŋu, eye xexeme si va yina la dze wo ŋu wu. (Mateo 10:16-18; Yohanes I, 2:15-17) Yesue anya amesiwo nye gbɔ̃wo—menye eƒe nusrɔ̃la siwo le anyigba dzi dometɔ aɖeke ye o. Egblɔ le wo ŋu be: “Amesiawo ayi ɖe tsɔtsrɔ̃ mavɔ me.”—Mateo 25:46, NW.
22. Yesu ƒe nyagblɔɖia ƒe akpa ka mee wòle be míagadzro?
22 Dzi dzɔa mí le alesi míele edzi le nyagblɔɖi siwo le Mateo ta 24 kple 25 me gɔme sem ɖe edzi ta. Gake Yesu ƒe nyagblɔɖia ƒe akpa bubu aɖe li si ŋu wòle be míalé ŋku ɖo—eyae nye ‘aƒedo ƒe ŋunyɔnu si le tsitre ɖe kɔkɔeƒea.’ Yesu xlɔ̃ nu eyomedzelawo be woazã nugɔmesese le nya sia gome eye be woanɔ dzadzraɖoɖi be yewoawɔ afɔɖeɖe. (Mateo 24:15, 16) Nukae nye “ŋunyɔnu” sia? Ɣekaɣie wòatsi tre ɖe kɔkɔeƒea? Eye aleke wòka míaƒe agbenɔnɔ fifia kple le etsɔme? Nyati si kplɔe ɖo adzro eme.
[Etenuŋɔŋlɔwo]
a Kpɔ nusɔsrɔ̃nyati siwo le Gbetakpɔxɔ ƒe tata siwo nye February 15, 1994; October 15 kple November 1, 1995; kple August 15, 1996 tɔwo me.
b Britaintɔ agbalẽnyalagã G. R. Beasley-Murray gblɔ be: “Mele be nyagbe ‘dzidzime sia’ naɖe fu na gbegɔmeɖelawo o. Togbɔ be eme kɔ be genea le Helagbe tsãtɔ me fia vidzidzi kple dzidzimevi, eyata míagblɔ be efia ameƒome hã la, . . . wozãe zi geɖe le [Helagbe me Septuagint] me na Hebrigbe me nya dôr, si gɔmee nye agbenɔɣi, ameƒomea ƒe agbenɔɣi, alo dzidzime, si fia ameŋɔlimetɔwo. . . . Le nya siwo Yesu gblɔ gome la, gɔmesese evee le nyaa ŋu: le go ɖeka me la, efiaa eŋɔlimetɔwo ɣesiaɣi, eye le go evelia me la, efiaa fɔbubu [ame aɖewo] le nane koŋ ta ɣesiaɣi.”
c Le History of the Jews me la, Nufialagã Graetz gblɔ be ɣeaɖewoɣi Romatɔwo hea gamenɔla 500 ɖe ati ŋu gbesiagbe. Wolãa asi na Yudatɔ siwo wolé la dometɔ bubuwo eye wogbugbɔa wo ɖona ɖe dua me. Aleke nɔnɔmewo nɔ le afima? “Asixɔxɔ meganɔ ga ŋu o, elabena magate ŋu aƒle abolo o. Ŋutsuwo wɔa avu kutɔkutɔe ɖe nuɖuɖu vovó nyɔŋu ɖesiaɖe ta, ɖe lãnuɖuɖu sue aɖe, lãgbalẽ kakɛ, alo lã ƒe dɔmenu siwo wotsɔ ƒu gbe na avuwo ta. . . . Alesi ame kuku siwo womeɖi o ƒe agbɔsɔsɔ nɔ dzidzim ɖe edzii la wɔe be dzomeŋɔliya xɔdzoa na dɔvɔ̃ do, eye ameawo kuna le dɔléle kple dɔwuame ta, kpakple le yi nu.”
d Nyati si kplɔe ɖo dzro xaxa si gbɔna ƒe akpa sia me.
Èɖo Ŋku Wo Dzia?
◻ Aleke Mateo 24:4-14 va eme le ƒe alafa gbãtɔ mee?
◻ Le apostoloawo ŋɔli la, aleke woɖe ŋkekeawo dzi eye woɖe ŋutilã aɖewo abe alesi wogblɔe ɖi le Mateo 24:21, 22 ene?
◻ Nukae ɖe dzesi le “dzidzime” si woyɔ le Mateo 24:34 ŋu?
◻ Aleke míewɔ nya be nya si wogblɔ ɖi le Amitoa dzi agava eme le mɔ si lolo wu nu?
◻ Ɣekaɣie alẽwo kple gbɔ̃wo ŋuti lododoa ava emee, eye aleke wòava emee?
[Nɔnɔmetata si le axa 12]
Nutata si le Tito ƒe Sɔti Tame Gobawo dzi le Roma, efia nusiwo wolɔ esi wotsrɔ̃ Yerusalem
[Afi Si Míexɔ Mɔɖeɖe Tso]
Soprintendenza Archeologica di Roma