Ɣeyiɣi Si Me Wòle Be Míanɔ Ŋudzɔ

“Ele be, woaɖe gbeƒã nyanyui la afia dukɔwo katã gbãgbiagbã. . . . Ke amesi ke lado dzi vaseɖe nuwuwu la, eya lakpɔ ɖeɖe.”—MARKO 13:10, 13.

 1. Nukatae wòle be míado dzi eye míalé dzi ɖe ƒo?

ELE be míado dzi—le dzidzime totro maxɔse aɖe me! Tso ƒe 1914 me ke la, amewo ƒe dzidzime si li la gblẽ, abe alesi wònɔ le Yesu ƒe ŋkekea me ene. Eye egbea xexeame katãe nugbegblẽwɔwɔa xɔ aƒe ɖo. Le ‘ŋkeke mamle’ siawo me la, ‘ɣeyiɣi vɔ̃ siwo me toto sesẽ’ si ŋu apostolo Paulo ƒo nu le la le fu ɖem na ameƒomea. ‘Ame vɔ̃ɖiwo kple ameblelawo le vɔ̃ɖivɔ̃ɖim ɖe edzi.’ Edze ƒã be ‘xexeame katã le vɔ̃ɖitɔ,’ Satana Abosam, amesi le eƒe agbagba mamleawo dzem be yeagblẽ anyigba la, ‘ƒe ŋusẽ te.’ Gake lé dzi ɖe ƒo! “Xaxa gã” aɖe le du dzi gbɔna si ahe gbɔɖeme mavɔ vɛ na dzɔdzɔenyenyelɔ̃lawo katã.—Timoteo II, 3:1-5, 13; Yohanes I, 5:19; Nyaɖeɖefia 7:14.

 2. Aleke nyagblɔɖi aɖe va eme le ƒe 1914 mee?

² Enye dzidzɔnya be Yehowa ɖo Aƒetɔ Yesu Kristo zi dzi le dziƒowo, esi nye dzadzraɖo wɔwɔ na ameƒomea ƒe futɔ siwo tea wo ɖe anyi la ɖeɖeɖa. (Nyaɖeɖefia 11:15) Abe alesi wònɔ le Mesia ƒe vava gbãtɔ me ene la, nyagblɔɖi ɖedzesi aɖe si Daniel ŋlɔ la va eme le ƒe alafa sia me. Wogblɔ alesi woɖo asi fiaɖuɖu si dze ɖe anyigba dzi la dzi vie ɣeyiɣi didime si nye “azã adre” ŋu nya na mí le Daniel 4:13, 14, 29 me. Le wo mevava gãtɔ me la, azã adre siawo ƒe didime nye ƒe adre siwo dometɔ ɖesiaɖe didi ‘ŋkeke’ 360 le Biblia ƒe ƒebubu nu, alo wo katã ƒe ƒuƒoƒo nye ƒe 2,520.a Wodze egɔme tso ƒe 607 D.M.Ŋ. me, esime Babilon dze afɔtutu Israel-fiaɖuƒea dzi gɔme, vaseɖe ƒe 1914 M.Ŋ. me, si nye ƒe si me woɖo Yesu fiazikpui dzi le dziƒo wònye ameƒomea ƒe Fia si dze. Ɣemaɣie ‘dukɔwo ƒe ɣeyiɣi ɖoɖiawo’ wu enu. (Luka 21:24) Gake dukɔwo gbe tanana Mesia Fiaɖuƒe si woɖo anyi yeyee la.—Psalmo 2:1-6, 10-12; 110:1, 2.

 3, 4. (a) Aleke míate ŋu atsɔ ƒe alafa gbãtɔ me nudzɔdzɔwo asɔ kple míaƒe ɣeyiɣia me tɔwoe? (b) Nyabiabia siwo sɔ kawoe míate ŋu abia?

³ Esi ƒewo ƒe kwasiɖa 70 lia (ƒe 29-36 M.Ŋ.) nɔ aƒe tum kple esi ƒe 1914 nɔ aƒe tum la, Mawu vɔ̃lawo nɔ mɔ kpɔm na Mesia la ƒe vava. Eye eva hã! Gake le go evea siaa me la, nɔnɔme si me wòva le la to vovo na nusi wonɔ mɔ kpɔm na. Le wo ame evea siaa me la, “dzidzime” vɔ̃ɖi aɖe atsrɔ̃ le ɣeyiɣi kpui aɖe megbe le Mawu ƒe gbeɖeɖe nu.—Mateo 24:34.

⁴ Le míaƒe nyati si do ŋgɔ me la, míekpɔ alesi Yudatɔwo ƒe dzidzime vɔ̃ɖi si bia be woawu Yesu la wu enui. Ke dzidzime gbegblẽ si tsia tre ɖe eyama ŋu alo metsɔa ɖeke le eƒe nya me o hã ɖe? Ɣekaɣie woahe ʋɔnudɔdrɔ̃ ava dzidzime maxɔse sia dzi?

“Minɔ Ŋudzɔ”!

 5. (a) Susu nyui ka tae mehiã be míanya Yehowa ƒe “ŋkeke kple gaƒoƒo” la o? (b) Abe alesi Marko gblɔe ene la, aɖaŋuɖoɖo si me nunya le kae Yesu tsɔ wu eƒe nyagblɔɖia nui?

⁵ Esi Yesu gblɔ nudzɔdzɔ siwo ava wu enu ɖe “xaxa gã” la me ɖi vɔ la, egagblɔ kpee be: “Le ŋkeke ma kple gaƒoƒo ma ŋuti la, ame aɖeke menyae o; mawudɔla, siwo le dziƒowo, kple Vi la hã menyae o, negbe Fofonye ɖeka ko.” (Mateo 24:3-36; Marko 13:3-32) Ɣeyiɣi si me nudzɔdzɔawo ava eme la ŋutɔŋutɔ nyanya mehiã mí o. Ele be míaƒe susu nanɔ ŋudzɔnɔnɔ boŋ ŋu, míanɔ ŋusẽ dom míaƒe xɔse, eye míaƒe ŋku nabiã ɖe Yehowa subɔsubɔdɔa wɔwɔ ŋu—menye ɖe ɣletiŋkeke aɖe bubu ŋu o. Yesu ƒo eƒe nyagblɔɖi ɖedzesi la ta be: “Mikpɔ nyuie, eye minɔ ŋudzɔ; elabena mienya ɣekaɣi azãgbe la le edzi su ge o. . . . Minɔ ŋudzɔ. . . . Nusi gblɔm mele na mi la, mele egblɔm na amewo katã bena: Minɔ ŋudzɔ!” (Marko 13:33-37) Afɔku de xa ɖe egbe xexe sia ƒe viviti la me. Ele be míanɔ ŋudzɔ!—Romatɔwo 13:11-13.

 6. (a) Nuka dzie wòle be míatu míaƒe xɔse ɖo sesĩe? (b) Aleke míate ŋu ‘axlẽ míaƒe ŋkekewoe’? (d) Gɔmesese vevi kae le nya “dzidzime” si Yesu zã la ŋu?

⁶ Menye nuɖoanyi vɔ̃ɖi sia ƒe ŋkeke mamle siawo ŋuti nyagblɔɖi si tso gbɔgbɔ me ŋu koe wòle be míalé ŋku ɖo o ke boŋ vevietɔ la, ele be míatu míaƒe xɔse ɖe Kristo Yesu kple Mawu ƒe ŋugbedodo wɔnukuwo dzi. (Hebritɔwo 6:17-19; 9:14; Petro I, 1:18, 19; Petro II, 1:16-19) Esi Yehowa ƒe amewo di vevie be yewoakpɔe nuɖoanyi vɔ̃ɖi sia nawu enu ta la, ɣeaɖewoɣi wosusua ɣeyiɣi aɖe be eyae “xaxa gã” la adze egɔme, eye kura gɔ̃ hã wobua esia ɖe dzidzime ɖeka ƒe agbenɔƒe ƒe didime ŋu tso ƒe 1914 dzi. Menye ƒe alo ŋkeke alesinu nye dzidzime ɖeka ƒe didime susu kpɔ agblɔ ye ana “dzi nyanu naɖo mía si” o, ke boŋ alesi “míaxlẽ míaƒe ŋkekewoe” le Yehowa kafukafu dzidzɔtɔe mee ana. (Psalmo 90:12) Nya “dzidzime” si Yesu zã la ku ɖe amesiwo le agbe le ɣeyiɣi ɖeka me le ŋutinya ƒe ɣeyiɣi aɖe me kple nɔnɔme siwo ɖe dzesi le wo ŋu la ŋuti koŋ, ke menye ɣeyiɣi ƒe didime bubu ŋue wòku ɖo o.b

 7. Nukae ŋutinyafiala aɖe ŋlɔ tso “ƒe 1914 ƒe dzidzime” la ŋu, eye aleke esia sɔ ɖe Yesu ƒe nyagblɔɖia nui?

⁷ Ŋutinyafiala Robert Wohl gblɔ nya si wɔ ɖeka kple esia le eƒe agbalẽ si nye The Generation of 1914 (Ƒe 1914 ƒe Dzidzime La) me be: “Womeɖoa ɣeyiɣikɔntabubu ƒe seɖoƒe na dzidzime ne wole nu ƒom le eŋu le ŋutinya me o . . . Menye ɣeyiɣiwo ƒe didimee wotsɔna bunɛ o.” Gake etɔ asi edzi be Xexemeʋa I la nye “dometsotso aɖe si mã blemaɣeyiɣiwo ɖa tso fifitɔwo gbɔ si ŋu womate ŋu ake ɖi le o,” eye wògblɔ kpee be: “Amesiwo nɔ agbe to aʋa la me mete ŋu ɖe dzixɔse si nye be xexeme ɖeka wu enu eye bubu dze egɔme le August 1914 me la ɖa le susu me o.” Aleke gbegbe esia nye nyateƒee nye si! Nya la ƒe akpa vevi aɖee nye ma wòtɔ atii. Ameƒomea ƒe “dzidzime sia” si li tso ƒe 1914 me la kpɔ tɔtrɔ dziŋɔwo teƒe. Ekpɔ alesi anyigba no ame miliɔn geɖe ƒe ʋui. Aʋawɔwɔ, ameƒomevi aɖewo tsɔtsrɔ̃ ɖa kura, ŋɔdzidoname, nuvlowɔwɔ, kple sedzimawɔmawɔ do agbogbo le xexeame katã. Dɔwuame, dɔléle, kple agbegbegblẽnɔnɔ va xɔ aƒe ɖe xexeame katã. Yesu gblɔe ɖi be: “Miawo hã [eƒe nusrɔ̃lawo], ne miekpɔ nusiawo le eme vam la, midze sii bena, mawufiaɖuƒe la gogo. Vavã mele egblɔm na mi bena: Dzidzime sia nu mele yiyi ge akpɔ o, vaseɖe esime woawu nusiawo katã nu.”—Luka 21:31, 32.

 8. Aleke Yehowa ƒe nyagblɔɖilawo te gbe ɖe ŋudzɔnɔnɔ ƒe vevienyenye dzii?

⁸ Nyateƒee, Mesia Fiaɖuƒea ƒe aʋadziɖuɖu bliboe ɖo vɔ! Eyata ɖe viɖe aɖe anɔ eme be míanɔ ŋku lém ɖe ɣeyiɣi tɔxɛ aɖewo ŋu alo anɔ “dzidzime” aɖe ƒe agbenɔƒe ƒe didime ŋutɔŋutɔ buma? Kura o! Xabakuk 2:3 gblɔ kɔte be: “Azãgbe li na ŋutega la, eƒe nuwuwu le aƒe tum, eye maflu ame o; ke ne etsi megbe la, kpɔ esinu; elabena ele vava ge kokoko, eye mahe ɖe megbe o.” Yehowa ƒe akɔntabiagbe la le du dzi sesĩe gbɔna.—Yeremya 25:31-33; Maleaxi 3:19.

 9. Tso ƒe 1914 me ke ƒe nudzɔdzɔ kawoe fia be ɣeyiɣi la le kpuie?

⁹ Esi Kristo ƒe Fiaɖuƒea dze dziɖuɖu gɔme le ƒe 1914 me la, wotsɔ Satana ƒu gbe ɖe anyigba dzi. Esia nye “baba [wodo] na anyigba . . . elabena Abosam ɖi va mia gbɔ, eye dzi le ekum ŋutɔ; elabena enyae be, vovoɣi vi aɖe ko yekpɔ.” (Nyaɖeɖefia 12:12, míawoe te gbe ɖe edzi) Vovoɣi ma le kpuie ŋutɔ ne wotsɔe sɔ kple ƒe akpe siwo Satana tsɔ ɖu dzii. Fiaɖuƒea ɖo vɔ, eye nenema ke Yehowa ƒe ŋkeke kple gaƒoƒo si dzi wòahe ʋɔnudɔdrɔ̃ ava dzidzime vɔ̃ɖi sia dzii hã ɖo vɔe!—Lododowo 3:25; 10:24, 25.

“Dzidzime” si Nu Ava Yi

10. Aleke “dzidzime sia” ɖi Noa ƒe ŋkekea me tɔe?

¹⁰ Mina míagalé ŋku ɖe Yesu ƒe nya siwo le Mateo 24:34, 35 ŋu nyuie wu: “Vavã mele egblɔm na mi bena: Dzidzime sia nu mele yiyi ge, vaseɖe esime nusiawo katã nava ve me o. Dzi kple anyigba nu lava yi, ke nye nyawo nu mele yiyi ge akpɔ o.” (Míawoe te gbe ɖe edzi.) Yesu ƒe nya siwo kplɔe ɖo fia be ‘ame aɖeke menya ŋkeke ma kple gaƒoƒo ma o.’ Esi le vevie wu la, efia be ele be míakpɔ nyuie le mɔ̃ siwo ƒo xlã mí le dzidzime sia me ŋu. Eyata Yesu gblɔ kpee be: “Sigbe alesi Noa ƒe ŋkekewo nɔ la, nenema ke lanye Amegbetɔvi la ƒe vava. Elabena alesi wowɔ le ŋkeke, si dze ŋgɔ na tɔɖɔɖɔ me, wole nu ɖum, eye wole nu nom, wole srɔ̃ ɖem, eye wole wo tsɔm na, bena woaɖe, vaseɖe ŋkeke, si dzi Noa yi ɖe aɖakaʋua me, eye womedze sii o, vaseɖe esime tɔɖɔɖɔ va, eye wòkplɔ wo katã yii la, nenema ke lanye Amegbetɔvi la ƒe vava.” (Mateo 24:36-39) Le afisia la, Yesu tsɔ eƒe ŋkekea me ƒe dzidzime la sɔ kple Noa ƒe ŋkekea me tɔ.—Mose I, 6:5, 9; NW, etenuŋɔŋlɔ.

11. Aleke Yesu tsɔ ‘dzidzimewo’ sɔ kple wo nɔewo, abe alesi Mateo kple Luka ka nya ta le eŋu ene?

¹¹ Menye esiae nye zi gbãtɔ si apostoloawo se Yesu tsɔ ‘dzidzimewo’ sɔ kple wo nɔewo o, elabena ŋkeke aɖewo do ŋgɔ la, egblɔ le eɖokui ŋu be: “Amegbetɔvi la . . . [akpe fu] geɖe, eye dzidzime sia lado vloe. Eye alesi wòva ve me le Noa ƒe ŋkekewo mee la, nenema wòanɔ le Amegbetɔvi la ƒe ŋkekeawo hã me.” (Luka 17:24-26, míawoe te gbe ɖe edzi) Eyata Mateo ta 24 kple Luka ta 17 zã nuwo tsɔtsɔ sɔ kple wo nɔewo ɖeka ma ke. Le Noa ƒe ŋkekea me la, ‘ŋutilã siwo katã gblẽ woƒe mɔ le anyigba dzi’ eye wotsrɔ̃ wo le Tsiɖɔɖɔa mee nye “dzidzime sia.” Le Yesu ƒe ŋkekea me la, Yudatɔ siwo gbe Yesue nye “dzidzime sia.”—Mose I, 6:11, 12; 7:1.

12, 13. (a) Nukae nye “dzidzime sia” si nu ayi godoo la egbea? (b) Aleke Yehowa ƒe amewo dzea ŋgɔ “dzidzime gɔglɔ̃ totro kpaɖikpaɖi” siae?

¹² Eyata le Yesu ƒe nyagblɔɖia mevava mlɔea me egbea la, edze abe “dzidzime sia” ku ɖe anyigbadzitɔ siwo kpɔ Kristo ƒe anyinɔnɔ ƒe dzesia gake wogbe asitɔtrɔ le woƒe mɔwo ŋu ene. Gake mí amesiwo nye Yesu ƒe nusrɔ̃lawo ya míegbe be míanɔ agbe si sɔ kple “dzidzime sia” tɔ o. Togbɔ be míele xexeame hã la, mele be míanye eƒe akpa aɖeke o, ‘elabena ɣeyiɣi ɖoɖi la tu aƒe.’ (Nyaɖeɖefia 1:3; Yohanes 17:16) Apostolo Paulo xlɔ̃ nu mí be: “Miwɔ nuwo katã liʋiliʋilili kple ɖikeke manɔmee, bena miazu mokaka manɔŋutɔwo kple ame dzadzɛwo, mawuvi, siwo nye ame maɖifɔwo le dzidzime gɔglɔ̃ totro kpaɖikpaɖi titina, amesiwo dome mieklẽna le abe akaɖiwo ene le xexeame.”—Filipitɔwo 2:14, 15; Kolosetɔwo 3:5-10; Yohanes I, 2:15-17.

¹³ Menye Kristotɔwo ƒe agbe dzadzɛ nɔnɔ koe míaƒe ‘keklẽ abe akaɖiwo ene’ fia o ke ƒo wo katã ta la, efia dɔ si Yesu de asi na mí le nyagblɔɖi me hã wɔwɔ, esi nye: “Woaɖe gbeƒã fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã, eye ekema nuwuwu aɖo.” (Mateo 24:14) Amegbetɔ aɖeke mate ŋu agblɔ ɣeyiɣi si me nuwuwu ma ava o, gake míenya be ame vɔ̃ɖiwo ƒe “dzidzime” la ƒe nuwuwu ava ne wonya wɔ ɖaseɖiɖidɔa “vaseɖe anyigba ƒe seƒe ke” wòdze Mawu ŋu ko.—Dɔwɔwɔwo 1:8.

“Ŋkeke Ma Kple Gaƒoƒo Ma”

14. Aleke Yesu kple Paulo xlɔ̃ nu le “ɣeyiɣiwo kple azãgbewo” ŋui, eye aleke wòle be míawɔ nu wòasɔ ɖe enui?

¹⁴ Ne wowɔ xexeame katã ƒe ɖaseɖiɖidɔa va ɖo afisi ƒe tame Yehowa ɖo la, ekema eƒe ‘ŋkeke kple gaƒoƒo’ ade be woaɖe xexemenuɖoanyi sia ɖa. Mehiã be míanya ŋkekea do ŋgɔ o. Eyata le Yesu ƒe kpɔɖeŋua sɔsrɔ̃ me la, Paulo xlɔ̃ nu be: “Ke le ɣeyiɣiwo kple azãgbewo ŋuti la, nɔviwo, mehiã mi be, míaŋlɔe aɖo ɖe mi o; elabena mia ŋutɔwo mienyae kɔte bena, Aƒetɔ ƒe ŋkeke la gbɔna, abe alesi fiafitɔ vana le zã me ene. Ne wole gbɔgblɔm be: “Ŋutifafa kple dedienɔnɔ!” la, tete tsɔtsrɔ̃ kpata ava lili wo kpoyi abe alesi fuɖuame va lilia funɔ ene, eye womate ŋu asi le enu o.” De dzesi nusi dzi Paulo te gbe ɖo: ‘Eyae nye ne wole gbɔgblɔm be.’ Ẽ, ne wole nu ƒom le “ŋutifafa kple dedienɔnɔ” ŋu ye Mawu ahe eƒe ʋɔnudɔdrɔ̃a vɛ kpoyi le ɣeyiɣi aɖe si me womele mɔ kpɔm nɛ le kura o me. Aleke gbegbe Paulo ƒe nuxlɔ̃ame sɔe nye si be: “Eyata azɔ migana míanɔ alɔ̃ dɔm abe ame bubuwo ene o, ke boŋ mina míanɔ ŋudzɔ, eye míanɔ mo xexi”!—Tesalonikatɔwo I, 5:1-3, 6, NW; kpɔ kpukpui 7-11 hã; Dɔwɔwɔwo 1:7.

15, 16. (a) Nukatae mele be míabui be Harmagedon le didiƒe ʋĩ wu alesi míesusui o? (b) Aleke woakɔ Yehowa ƒe dziɖulanyenye ŋui godoo le ɣeyiɣi si gbɔna kpuie me?

¹⁵ Ðe míaƒe nukpɔsusu sia si me kɔ nyuie wu le “dzidzime sia” gɔmesese ŋuti fia be Harmagedon le didiƒe ʋĩ wu alesi míesusui tsãa? Kura o! Togbɔ be míenya “ŋkeke kple gaƒoƒo” la ɣeaɖekeɣi kpɔ o hã la, ele nyanya na Yehowa Mawu ya, eye metrɔna o. (Maleaxi 3:6) Edze ƒã be xexeame le nyɔnyrɔ̃m ɖe gbegblẽ si me magafɔ tsoe o me vĩ wu. Ŋudzɔnɔnɔ hiã fifia wu ɣeyiɣi ɖesiaɖe si va yi. Yehowa ɖe “nusiwo lava ve me kaba” fia mí, eye ele be míatsɔ hiahiã kpata ƒe vevienyenye blibo axɔe.—Nyaɖeɖefia 1:1; 11:18; 16:14, 16.

¹⁶ Esi ɣeyiɣia le aƒe tum la, minɔ ŋudzɔ, elabena esusɔ vie ko Yehowa ahe dzɔgbevɔ̃e va Satana ƒe nuɖoanyia katã dzi! (Yeremya 25:29-31) Yehowa be: “Mado gã ɖokuinye, makɔ ɖokuinye ŋu, eye maɖe ɖokuinye afia le dukɔ geɖewo ŋku me, ne woadze sii be, nyee nye Yehowa.” (Xezekiel 38:23) ‘Yehowa ƒe nyametsoŋkeke’ ma tu aƒe!—Yoel 1:15; 2:1, 2; Amos 5:18-20; Zefanya 2:2, 3.

“Dziƒo Yeye Kple Anyigba Yeye” Dzɔdzɔewo

17, 18. (a) Abe alesi Yesu kple Petro gblɔe ene la, aleke “dzidzime sia” nu ava yii? (b) Nukatae wòle be míanɔ ŋudzɔ ɖe míaƒe agbenɔnɔ kple mawusosroɖadɔwo ŋu?

¹⁷ Yesu gblɔ le ‘nusiawo katã siwo ava va eme’ ŋu be: “Dzi kple anyigba nu lava yi, ke nye nyawo nu mele yiyi ge akpɔ o.” (Mateo 24:34, 35) Anɔ eme be nusi nɔ susu me na Yesue nye “dzidzime sia” ƒe ‘dziƒo kple anyigba’—dziɖulawo kple amesiwo dzi ɖum wole. Apostolo Petro zã nyagbɔgblɔ sia tɔgbe ke esi wònɔ nu ƒom tso “fifi dziƒo kple anyigba” siwo “woda ɖi na dzo, vaseɖe ame mavɔ̃mawuwo ƒe ʋɔnudɔdrɔ̃ kple gbegblẽ ƒe ŋkeke la dzi.” Eyi edzi ƒo nu tso alesi “[Yehowa] ƒe ŋkeke le vava ge abe fiafitɔ ene, le esime [dziɖuɖu ƒe] dziƒowo ava yi kple gbeɖeɖe” eye amewo ƒe habɔbɔ gbegblẽ la, alo “anyigba,” kple eƒe dɔwɔwɔ vɔ̃wo nu nayi la ŋu. Apostoloa yi edzi xlɔ̃ nu mí be míanɔ ‘agbe kɔkɔe awɔ nusiwo me mawusosroɖa le esime Yehowa ƒe ŋkeke, si me woalólo dziƒo le dzo me eye gɔmedzenuwo hã alólo le dzoxɔxɔ me la le susu me na mí vevie eye míele elalam’! Nukae akplɔe ɖo? Petro he míaƒe susu yi ‘dziƒo yeye kple anyigba yeye siwo me dzɔdzɔenyenye anɔ’ la dzi.—Petro II, 3:7, 10-13.c

¹⁸ “Dziƒo yeye” mawo si nye Fiaɖuƒe dziɖuɖu si le Kristo Yesu kple eƒe hatidziɖulawo si me, adudu yayrawo ƒo ɖe ameƒomea ƒe “anyigba yeye” habɔbɔ la dzi. Ðe nèle amesiwo ava nɔ habɔbɔ ma me la domea? Ne èle wo dome la, ke nusita nàtso aseye le etsɔme wɔnuku si le ŋgɔgbe ta la le asiwò!—Yesaya 65:17-19; Nyaɖeɖefia 21:1-5.

19. Mɔnukpɔkpɔ gã kae ate ŋu asu mía si fifia?

¹⁹ Ẽ, wole ameƒomea ƒe “dzidzime” dzɔdzɔe nu ƒom ƒu fifia gɔ̃ hã. Egbea amesiaminawo, amesiwo nye “dɔla nuteƒewɔla kple aɖaŋudzela” la le hehe si tso Mawu gbɔ la nam wòsɔ ɖe Psalmo 78:1, 4 me nyawo dzi be: “Nye dukɔ, mise nye nufiame; miƒu to anyi ɖe nye nu me nyawo ŋu! . . . Míaxlẽ Yehowa ƒe ŋkɔxɔxɔ kple eƒe ŋusẽ kpakple nukunu, siwo wòwɔ la, afia megbeviwo.” Le ƒe sia ƒe April 14 lia dzi le hame siwo wu 75,500 me le anyigba 230 kple edzivɔ dzi la, amesiwo wu 12,000,000 le xexeame godoo de Kristo ƒe ku la ƒe Ŋkuɖodzi ɖuƒe. Ðe nènɔ wo domea? Ke tu wò xɔse ɖe Kristo Yesu dzi eye ‘nàyɔ Yehowa ŋkɔ bene woaɖe wò.’—Romatɔwo 10:11-13.

20. Esi ‘ɣeyiɣi si susɔ la le kpuie’ ta la, aleke wòle be míanɔ ŋudzɔe, eye kple mɔkpɔkpɔ ka?

²⁰ Apostolo Paulo gblɔ be ‘ɣeyiɣi si susɔ la le kpuie.’ Eyata fifiae nye ɣeyiɣi si me wòle be míanɔ ŋudzɔ ɣeawokatãɣi eye míaƒe ŋku nabiã ɖe Yehowa ƒe dɔ la ŋu, esime míele dzi dom le dodokpɔ kple fuléle siwo ameƒomea ƒe dzidzime vɔ̃ɖi la hena vaa mía dzi la me. (Korintotɔwo I, 7:29; Mateo 10:22; 24:13, 14) Mina míanɔ ŋudzɔ, anɔ ŋku lém ɖe nusiwo katã wogblɔ ɖi le Biblia me be woava “dzidzime sia” dzi la ŋu. (Luka 21:31-33) Ne míesi le nusiawo nu eye tenɔnɔ si ŋu Mawu ƒe ŋudzedzekpɔkpɔ le le mía si le Amegbetɔvi la gbɔ la, míaƒe asi ate ŋu asu agbe mavɔ fetu la dzi mlɔeba.

[Etenuŋɔŋlɔwo]

Numetotobiabiawo:

◻ Esi míekpɔ alesi Daniel 4:29 va emee la, nukatae wòle be ‘míanɔ ŋudzɔ’ fifia?

◻ Aleke Mateo kple Luka ƒe Nyanyuiawo fia nusi “dzidzime sia” nye lae?

◻ Esi míele “ŋkeke ma kple gaƒoƒo ma” lalam la, nuka ŋue míeléa ŋku ɖo, eye aleke wòle be míawɔ nu ɖe eŋui?

◻ Nukae wòle be “dziƒo yeye kple anyigba yeye” ƒe mɔkpɔkpɔ la nade dzi ƒo na mí be míawɔ?

[Nɔnɔmetata siwo le axa 17]

Ameƒome si le fu kpem la akpɔ gbɔdzɔe ne dzidzime sẽŋuta vɔ̃ɖi sia nu va yi

[Afi Si Míexɔ Mɔɖeɖe Tso]

Alexandra Boulat/Sipa Press

[Afi Si Míexɔ Mɔɖeɖe Tso]

Miame kple ete: Luc Delahaye/Sipa Press

[Nɔnɔmetata si le axa 18]

Ŋutikɔkɔe “dziƒo yeye kple anyigba yeye” le ŋgɔ gbɔna na ameƒomevi ɖesiaɖe kpuie