Nyateƒea Na Ablɔɖe Wo

WODE ame miliɔn ɖeka kple edzivɔ gaxɔ me le United States. Wotso kufia na amesiawo dometɔ akpe etɔ̃ lɔƒo. Tsɔe be yee le nɔnɔme ma me. Aleke nàse le ɖokuiwò me? Nu ma ŋu bubu dziŋɔ vavã. Gake le susu aɖe nu la, ameƒomea katã le nɔnɔme ma tɔgbe me. Biblia gblɔ be: “Wo katã wɔ nuvɔ̃, eye Mawu ƒe ŋutikɔkɔe hiã wo tim.” (Romatɔwo 3:23) Ẽ, esi míenye Adam ƒe dzidzimeviwo ta la, nuvɔ̃ ‘de mí game.’ (Romatɔwo 5:12) Míesea míaƒe gamenɔnɔa ƒe ŋusẽkpɔɖeamedziwo le mía ɖokui me gbesiagbe abe Kristotɔ apostolo Paulo ene, amesi ŋlɔ be: “Mekpɔ se bubu, si le aʋa wɔm kple se, si le nye nyasã me la, le nye ŋutinuwo me, eye wòlém aboyo le nuvɔ̃ ƒe se, si le nye ŋutinuwo me la me.”—Romatɔwo 7:23.

Nuvɔ̃ si le mía ŋu wɔe be wotso kufia na mía dometɔ ɖesiaɖe le kpɔɖeŋumɔ nu, elabena Biblia gblɔ be: “Nuvɔ̃ la ƒe fetue nye ku.” (Romatɔwo 6:23) Hakpala Mose ɖɔ míaƒe nɔnɔmea nyuie be: “Míaƒe agbenɔƒewo nye ƒe blaadre, ne ede ƒã la, ƒe blanyi, eye fuɖename kple hiã nye wo adegbeƒonu; elabena wova yi kabakaba, eye míedzo.”—Psalmo 90:10; tsɔe sɔ kple Yakobo 4:14.

Ameƒomea ƒe kluvimenɔnɔ na nuvɔ̃ kple ku ye nɔ susu me na Yesu esi wògblɔ na eyomedzelawo be: “Nyateƒe la lawɔ mi ablɔɖeviwoe.” (Yohanes 8:32) Yesu to nya mawo dzi nɔ nane si lolo sasasã wu ablɔɖekpɔkpɔ tso Romatɔwo ƒe dziɖuɖu te la tsɔm nɔ ŋkume ɖom na eyomedzelawo—nuvɔ̃tsɔtsɔke kple vovo tso ku si me ƒe nya gblɔm wònɔ na wo! Aleke esia awɔ asu wo si? Yesu gblɔ na wo be: “Ne Vi la wɔ mi ablɔɖeviwo la, ekema mianye ablɔɖeviwo vavã.” (Yohanes 8:36) Ẽ, esi Yesu si nye “Vi la” tsɔ eƒe agbe ɖo anyi la, ezu avulévɔsa si agbugbɔ aƒle nusi Adam bu la. (Yohanes I, 4:10) Esia ʋu mɔ na ameƒomea me tɔ toɖolawo katã be woaɖe wo tso nuvɔ̃ kple ku ƒe kluvinyenye me. Mawu ƒe Tenuvi la ku “bena amesiame, si xɔa edzi sena la, mele tsɔtsrɔ̃ ge o, ke boŋ wòakpɔ agbe mavɔ.”—Yohanes 3:16.

Eyata Yesu Kristo ŋue nyateƒe si ate ŋu ana ablɔɖe mí la ku ɖo. Mɔkpɔkpɔ li na amesiwo va zua eƒe afɔɖoƒetolawo be woaɖe wo tso nuvɔ̃ kple ku ƒe kluvinyenye me ne Mawu Fiaɖuƒea va le anyigba dzi nyawo gbɔ kpɔm bliboe. Fifia gɔ̃ hã la, ablɔɖe vavã sua amesiwo xɔ nyateƒe si le Mawu ƒe Nya la me dzi se la si. Le mɔ kawo nu?

Vovo tso Vɔvɔ̃ na Ame Kukuwo Me

Ame miliɔn geɖe vɔ̃na na ame kukuwo egbea. Nukata? Elabena wofia wo le woƒe subɔsubɔhawo me be luʋɔ aɖe dona le ŋutilã me le ku me eye wòyia gbɔgbɔmexexe aɖe me. Susu ma tae wònye kɔnu le dukɔ aɖewo me na ame kuku ƒe ƒometɔwo be woadɔ ŋu ŋkeke kple zã geɖe. Zi geɖe la, wodzia ha heƒoa ʋu sesĩe kpena ɖe eŋu. Konyifalaawo xɔe se be nusia adze ame kukua ŋu ale be eƒe gbɔgbɔ mava anɔ fu ɖem na agbagbeawo o. Ðeko Kristodukɔa ƒe alakpanufiafiawo le ame kukuwo ŋu gado ŋusẽ kɔnu sia.

Gake Biblia gblɔ nyateƒe si ku ɖe nɔnɔme si me ame kukuwo le la ŋu. Egblɔe kɔte be wò luʋɔe nye wò ŋutɔ, ke menye wò akpa makpɔmakpɔ aɖe si ganɔa agbe le ku megbe ye o. (Mose I, 2:7; Xezekiel 18:4) Gakpe ɖe eŋu la, womele funyafunya wɔm ame kukuwo le dzomavɔ bibi aɖeke me o eye womele gbɔgbɔmexexe aɖeke si me tɔwo ate ŋu awɔ nane na agbagbeawo la me hã o. Biblia gblɔ be: “Kukuawo menya naneke o, . . . nuwɔwɔ alo tamebubu, sidzedze alo nunya mele tsieƒe, afisi yi ge nala o.”—Nyagblɔla 9:5, 10.

Biblia me nyateƒe siawo na ame geɖe vo tso vɔvɔ̃ na ame kukuwo si me. Womegasaa vɔ xɔasiwo bene woatsɔ afa dzi na wo tɔgbuiwo o, eye womegaxaa nu be wole funyafunya wɔm woƒe lɔlɔ̃tɔwo nublanuimakpɔmakpɔtɔe ɖe nuvɔ̃ siwo wowɔ ta hã o. Wosrɔ̃e be mɔkpɔkpɔ wɔnuku aɖe le Biblia me na amesiwo ku, elabena egblɔ na mí be “tsitretsitsi li na ame dzɔdzɔewo kple ame madzɔmadzɔwo siaa” le Mawu ƒe ɣeyiɣi ɖoɖi dzi. (Dɔwɔwɔwo 24:15; Yohanes 5:28, 29) Eyata ɖeko ame kukuwo le ɖiɖim ɖe eme, abe alɔ̃ mee woyi ʋĩ ene.—Tsɔe sɔ kple Yohanes 11:11-14.

Nyateƒe si ku ɖe nɔnɔme si me ame kukuwo le ŋu kpakple tsitretsitsi mɔkpɔkpɔa ate ŋu ana míavo tso mɔkpɔkpɔbuɖeame si ku hena vanɛ la me. Mɔkpɔkpɔ mae lé srɔ̃tɔ aɖewo ɖe te le United States esime wo viŋutsu si xɔ ƒe ene ku le afɔku aɖe me. Vidada la gblɔ be: “Nane bu le míaƒe agbe me si teƒe naneke mate ŋu axɔ ɖo o vaseɖe esime míekpɔ mía viŋutsua ake ne wofɔe ɖe tsitre. Gake míenya be ɣeyiɣi kpui aɖe koe míase veve, elabena Yehowa do ŋugbe be yeatutu míaƒe konyifaɖatsiwo ɖa.”—Nyaɖeɖefia 21:3, 4.

Vovo tso Vɔvɔ̃ na Etsɔme Me

Nukae adzɔ le etsɔme? Ðe míaƒe anyigba la afiã le nuklia dzobibi mea? Ðe alesi wole míaƒe anyigba la ƒe nutome gblẽm la awɔe be míagate ŋu anɔ anyigba la dzi oa? Ðe agbenyuimanɔmanɔ ahe sedzimawɔmawɔ kple zitɔtɔ vɛa? Ame geɖe vɔ̃na le nusiawo ta ŋutɔŋutɔ.

Gake Biblia na wovona tsoa vɔvɔ̃ dziŋɔ ma tɔgbe me. Eka ɖe edzi na mí be “anyigba ya li tegbee.” (Nyagblɔla 1:4) Yehowa mewɔ míaƒe anyigba la be yeaɖo asi glã amegbetɔ nudomegblẽlawo nava tsrɔ̃e o. (Yesaya 45:18) Ke boŋ Yehowa ɖe wòwɔ anyigba la be wòanye paradisoƒe na ameƒome si wɔ ɖeka. (Mose I, 1:27, 28) Eƒe tameɖoɖo metrɔ o. Biblia gblɔ na mí be Mawu ‘atsrɔ̃ amesiwo gblẽa anyigba la.’ (Nyaɖeɖefia 11:18) Biblia gblɔ be le ema megbe la, “ame ɖihiãwo anyi anyigba la dome, eye dzi adzɔ wo ɖe ŋutifafa gbogbo la ŋuti.”—Psalmo 37:11.

Míate ŋu aka ɖe ŋugbedodo sia dzi elabena Mawu mekaa aʋatso o. Yehowa gblɔ to eƒe nyagblɔɖila Yesaya dzi be: “Nya, si do tso nye nu me la . . . magbugbɔ va gbɔnye ƒuƒlu o, negbe ɖeko wòawɔ nye lɔlɔ̃nu, eye wòawɔ nusi gbe meɖoe ɖo la hafi.” (Yesaya 55:11; Tito 1:2) Eyata míate ŋu atsɔ kakaɖedzi akpɔ mɔ na ɣeyiɣi si me Mawu ƒe ŋugbedodo sia si woŋlɔ ɖe Biblia me le Petro II, 3:13 la ava eme: “Míele dziƒo yeye kple anyigba yeye, siwo me dzɔdzɔenyenye anɔ la lalam le eƒe ŋugbedodo la nu.”

Vovo tso Vɔvɔ̃ na Amegbetɔ Me

Ŋutsu kple nyɔnu siwo mevɔ̃ kura o le woƒe ɖokuitsɔtsɔ na Mawu me ƒe kpɔɖeŋu nyui geɖe le Biblia me. Amesiawo dometɔ aɖewoe nye Gideon, Barak, Debora, Daniel, Ester, Yeremya, Abigail, kple Yael—kple bubu geɖe. Ŋutsu kple nyɔnu nuteƒewɔla siawo ɖe hakpala ƒe nɔnɔme fia, amesi ŋlɔ be: “Mawu ŋu mele ŋu ɖom ɖo, nyemavɔ̃ o; nuka amegbetɔ awɔm ma?”—Psalmo 56:12.

Le ƒe alafa gbãtɔ me la, apostolo Petro kple Yohanes woɖe dzideƒo ma tɔgbe fia esime subɔsubɔhakplɔlawo de se na wo be woadzudzɔ gbeƒãɖeɖe. Woɖo nya la ŋu be: “Míate ŋu agbe nuƒoƒo le nusi míekpɔ kple nusi míese la ŋuti o.” Petro kple Yohanes ƒe tenɔnɔ sesĩe wɔe be wode wo gaxɔ me emegbe. Esi woɖe wo nukutɔe megbe la, wogadze dɔ gɔme enumake eye woyi edzi “gblɔ mawunya la kple dzideƒo.” Eteƒe medidi o wokplɔ Petro kple apostolo bubuawo va Yudatɔwo ƒe Sanhedrin la ŋkume. Nunɔlagã gblɔ na wo be: “Alo ɖe menye se míede na mi bena: Migafia nu ɖe ŋkɔ sia dzi oa? Eye kpɔ ɖa, mieyɔ Yerusalem fũ kple miaƒe nufiafia.” Petro kple apostolo bubuawo ɖo eŋu be: “Ele be, woabu Mawu awu amewo.”—Dɔwɔwɔwo 4:16, 17, 19, 20, 31; 5:18-20, 27-29.

Egbea esi Yehowa Ðasefowo le woƒe Mawu Fiaɖuƒe ŋuti nyanyuigbɔgblɔdɔa wɔm la, wodzea agbagba be yewoasrɔ̃ ƒe alafa gbãtɔ me Kristotɔwo ƒe dzonɔameme. Zi geɖe la, sɔhɛ siwo le wo dome hã ʋua woƒe xɔse me na ame bubuwo vɔvɔ̃manɔmee. Xlẽ kpɔɖeŋu aɖewo kpɔ.

Stacie nye ƒewuivi si ŋu kpena. Eyata gbã la, enye kuxi nɛ be wòaƒo nu na ame bubuwo tso nusiwo dzi wòxɔ se ŋu. Nukae wòwɔ tsɔ ɖu ŋukpea dzi? Egblɔ be: “Mesrɔ̃a Biblia la, eye mekpɔa egbɔ be mese nusi gblɔm mele la gɔme. Ena wòle bɔbɔe wu, eye kakaɖedzi su asinye wu.” Nuto si me Stacie le ƒe nyadzɔdzɔgbalẽ ka nya ta tso eƒe nɔnɔme nyui la ŋu. Nyati si nufiala aɖe si le woƒe sukua ŋlɔ la gblɔ be: “Edze abe [Stacie ƒe] xɔse ye do ŋusẽe be wòte ŋu nɔa nyaƒoɖeamenu geɖe siwo dzea ŋgɔ ƒewuivi akpa gãtɔ la nu ene. . . . Ese le eɖokui me be ele be Mawu subɔsubɔ naxɔ nɔƒe gbãtɔ le yeƒe susu me.”

Ƒe atɔ̃ koe Tommy xɔ esime wòdze Biblia sɔsrɔ̃ gɔme tso edzilawo gbɔ. Togbɔ be enye ɖevi hã la, ete ŋu ʋli tadedeagu vavãtɔ ta dzideƒotɔe. Esi Tommy ƒe sukuhatiwo nɔ ŋkekenyuiɖuɖuwɔnawo tam la, eya ta Mawu ƒe Paradiso si ŋugbe wòdo la ƒe nɔnɔmewo. Esi Tommy ɖo eƒe ƒewuiwo me la, ede dzesii be sukuvi geɖe mesea Yehowa Ðasefowo ƒe dzixɔsewo gɔme o. Le esi teƒe be vɔvɔ̃ nana wòazi kpi la, ebia eƒe nufialawo dometɔ ɖeka be aɖe mɔ yeatsɔ nyabiabia kple ŋuɖoɖo adzro nu me kple ye hati sukuviawo ale be yeaɖo woƒe biabiawo katã ŋu zi ɖeka hã. Woɖe mɔ nɛ eye wòɖi ɖase nyui aɖe.

Esi Markietta xɔ ƒe 17 la, mɔnukpɔkpɔ nyui aɖe su esi be wòƒo nu tso eƒe dzixɔse ŋu na eƒe sukuxɔmehatiwo. Egblɔ be: “Wode dɔ asi na mí be míava ƒo nu. Metia nye tanya tso agbalẽ si nye Questions Young People Ask—Answers That Work me.a Metia ta vovovo atɔ̃ tso agbalẽa me eye meŋlɔ woƒe tanyawo ɖe nuŋlɔkpe dzi. Mebia tso klass la si be woagbugbɔ aɖo wo ɖe ɖoɖo nu le esi wokpɔ be ele vevie wu nu.” Emegbe míedzro nu me eye klass la hã kpɔ gome le eme. Markietta wu enu be: “Metsɔ agbalẽa fia klass la eye sukuvi geɖe bia be yewoaxɔ ɖe. Nye nufiala gɔ̃ hã bia be mana ɖeka ye.”

Nyateƒea Ate Ŋu Ana Nàvo

Abe alesi míekpɔe ene la, nyateƒe si le Biblia me la te ŋu naa ablɔɖe amesiwo katã srɔ̃nɛ, ƒe kae ameawo xɔ o, eye emenyawo kpɔa ŋusẽ ɖe wo dzi. Enaa wovona tsoa vɔvɔ̃ na ame kukuwo, vɔvɔ̃ na etsɔme, kple vɔvɔ̃ na amegbetɔ me. Mlɔeba la, Yesu ƒe tafevɔsa la aɖe ameƒomea me tɔ toɖolawo tso nuvɔ̃ kple ku si me. Dzidzɔ ka gbegbee nye si wòanye be míanɔ agbe tegbee le paradisonyigba dzi eye nuvɔ̃ si ƒe dome míenyi la magade ga mí akpɔ o!—Psalmo 37:29.

Àdi be yeagasrɔ̃ nu geɖe tso yayra siwo ƒe ŋugbe Mawu do la ŋua? Ne nenemae la, ke nukae wòle be nàwɔ? Yesu gblɔ be: “Esia fia agbe mavɔ, be woanɔ wò, Mawu vavãtɔ ɖeka la, kple Yesu Kristo, amesi nèdɔ ɖa la, ŋuti sidzedze xɔm.” (Yohanes 17:3, NW) Eyata ne èdi be yeakpɔ ablɔɖe si ŋugbe Yesu do na eƒe nusrɔ̃lawo la, ke ele be nàsrɔ̃ nu tso Yehowa Mawu kple Via ŋu. Ehiã be nànya nusi Mawu ƒe lɔlɔ̃nu nye eye nàwɔ ɖe edzi, elabena Biblia gblɔ be: “Xexeame va yina kple eƒe nudzodzrowo; ke amesi wɔa Mawu ƒe lɔlɔ̃nu la, nɔa anyi yi ɖe mavɔmavɔ me.”—Yohanes I, 2:17.

[Etenuŋɔŋlɔwo]

[Nɔnɔmetata si le axa 7]

Le Mawu Fiaɖuƒea te la, woaɖe ameƒomea mlɔeba tso nuvɔ̃ kple ku si me