Nufiame Siwo Le Yesu ƒe Nukunuwo Me

“LE ŊKEKE etɔ̃agbe la woɖu srɔ̃ɖeŋkekenyui le Kana le Galilea . . . eye wokpe Yesu hã kple eƒe nusrɔ̃lawo va srɔ̃ɖeƒe. Eye esi wein mede wo nu o la, Yesu dada gblɔ nɛ bena: Wein mele wo si o.” Nudzɔdzɔ sia ʋu mɔ na Yesu be wòawɔ eƒe nukunu gbãtɔ.—Yohanes 2:1-3.

Ðe kuxi sia medze nu maɖinu, nu tsɛ si woava gblɔ na Yesu oa? Biblia-nyalagã aɖe ɖe eme be: “Amedzrowɔwɔ nye agbanɔamedzi vevi aɖe le Ɣedzeƒedukɔwo me . . . Amedzrowɔwɔ ŋutɔŋutɔ, vevietɔ le srɔ̃ɖeƒe bia be nuɖuɖu kple nunono nabɔ. Ne nuɖuɖu [vɔ] le srɔ̃ɖeƒe la, ŋukpenya sia agblẽ ƒomea kple srɔ̃tɔ yeyeawo ƒe ŋkɔ ɖaa.”

Eyata Yesu tso ɖe eŋu. Ekpɔ “kpezɔ ade [le] afima le Yudatɔwo ƒe ŋutikɔklɔ ƒe kɔa nu.” Asi kple afɔ kɔklɔ hafi aɖu nu nye kɔnu na Yudatɔwo, eye wohiã tsi sɔgbɔ be vavalawo nazã. Yesu ɖe gbe na amesiwo le amedzroawo subɔm be: “Midu tsi ɖe zɔawo me.” Menye Yesue nye “nuɖuɖudzikpɔla” la o gake etsɔ ŋusẽ ƒo nu na wo tẽ. Nuŋlɔɖia gblɔ be: “Esi nuɖuɖudzikpɔla la ɖɔ tsi [la kpɔ la, etrɔ zu wein].”—Yohanes 2:6-9; Marko 7:3.

Ðewohĩ adze be mesɔ ɖe enu be nusiwo bɔ abe srɔ̃ɖeɖe ene teƒee Yesu wɔ eƒe nukunu gbãtɔ le o, gake nudzɔdzɔa ɖe nu geɖe fia le Yesu ŋu. Tre wònye eye le ɣeyiɣi siwo va emegbe la, eƒo nu tso trenɔnɔ ƒe viɖewo ŋu na eƒe nusrɔ̃lawo. (Mateo 19:12) Gake eƒe srɔ̃ɖeƒea vava fia be metsri srɔ̃ɖeɖe kura o. Eda sɔ, ekpe asi ɖe srɔ̃ɖeɖoɖoa ŋu; ekpɔe be enye nusi ŋu bubu le le Mawu ŋkume.—Tsɔe sɔ kple Hebritɔwo 13:4.

Yesu menye ame nikpi si ƒe nya me sẽ abe alesi sɔlemehawo ƒe ameblelawo gblɔ emegbe be wòle ene o. Edze ƒã be amewo dome nɔnɔ dzɔ dzi nɛ eye metsi tre ɖe hadomenuwɔwɔ ŋu o. (Tsɔe sɔ kple Luka 5:29.) Eyata eƒe nuwɔna nye kpɔɖeŋu na eyomedzelawo. Yesu ŋutɔ ɖee fia be mehiã kokoko be woalé blanui alo ayrɔ sũ—abe ɖe nudzɔdzɔewɔwɔ bia dzidzɔmakpɔmakpɔ ene o. Ke boŋ wode se na Kristotɔwo emegbe be: “Dzi nadzɔ mi le Aƒetɔ la me ɖaasi.” (Filipitɔwo 4:4) Kristotɔwo ɖoa ŋu ɖo egbea be woana modzakaɖeɖe nanɔ ɖoɖo nu nyuie. Wokpɔa dzidzɔ le Mawu subɔsubɔ me, gake le Yesu ƒe kpɔɖeŋu sɔsrɔ̃ me la, wodia ɣeyiɣi ɣeaɖewoɣi dea ha kple wo nɔewo le hadomemodzakaɖeɖe me.

Kpɔ lɔlɔ̃ si nɔ Yesu si hã ɖa. Agba aɖeke menɔ edzi be wòawɔ nukunu o. Womegblɔ nya aɖeke ɖi le esia ŋu si le be wòava eme o. Edze ƒã be Yesu dada ƒe dzitsitsi kple alesi srɔ̃tɔ yeyeawo axaxae la koe ʋãe. Etsɔ ɖe le woƒe seselelãmewo me eye medi be yeana ŋukpe nalé wo o. Ðe esia mena kakaɖedzi wò be Kristo tsɔ ɖe le mewò vevie—le wò gbesiagbekuxiwo gɔ̃ hã me oa?—Tsɔe sɔ kple Hebritɔwo 4:14-16.

Esi tsi “tɔmedeze eve alo etɔ̃” te ŋu nɔ kpezɔa me ta la, Yesu wɔ wein gbogbo aɖe le eƒe nukunua me—ɖewohĩ anye lita 390 (galɔn 105) sɔŋ! (Yohanes 2:6) Nukata aha sɔ gbɔ alea? Yesu menɔ ahatsunono si Mawu tsri la ƒe dzi dem ƒo o. (Efesotɔwo 5:18) Ke boŋ enɔ Mawu ƒe dɔmenyonyo ɖem fia. Esi wein nye aha si bɔ ɣemaɣi ta la, woate ŋu azã kpɔtɔea ɣebubuɣi.—Tsɔe sɔ kple Mateo 14:14-20; 15:32-37.

Kristotɔ gbãtɔwo srɔ̃ Yesu ƒe dɔmenyonyo ƒe kpɔɖeŋu. (Tsɔe sɔ kple Dɔwɔwɔwo 4:34, 35.) Nenema ke wode dzi ƒo na Yehowa ƒe amewo egbea be ‘woana nu amewo.’ (Luka 6:38) Gake gɔmesese le Yesu ƒe nukunua ŋu le nyagblɔɖi hã me. Efia asi ɣeyiɣi si ava le etsɔ me esime Mawu atsɔ “nuɖuɖu damiwo kple wein, siwo ɖo ƒã” ana mí dɔmenyotɔe eye wòaɖe dɔwuame ɖa na ameƒomea keŋkeŋ.—Yesaya 25:6.

Ke ŋutilãmedɔ gbogbo siwo Yesu da le eƒe nukunuawo me ya ɖe? Nukae míate ŋu asrɔ̃ tso wo me?

Nu Nyui Wɔwɔ le Sabat Dzi

“Tsi tre, nakɔ wò aba dzi, eye nazɔ azɔli!” Nya mawoe Yesu gblɔ na ŋutsu aɖe si dze dɔ ƒe 38 sɔŋ. Nyanyuiawo ƒe nuŋlɔɖia yi edzi be: “Eye ame la ƒe lãme sẽ enumake, eye wòkɔ eƒe aba dzi hezɔ azɔli.” Nukutɔe la, menye amesiamee nusia dzɔ dzi na o. Nuŋlɔɖia gblɔ be: “Yudatɔwo ti Yesu yome, eye wodi be, yewoawui; elabena ewɔ nusia le Sabat dzi.”—Yohanes 5:1-9, 16.

Sabat nye ŋkeke si woɖo be amesiame nadzudzɔ ahatso aseye. (Mose II, 20:8-11) Gake eva zu amegbetɔ ƒe se sesẽ si wotsɔ te amewo ɖe anyii le Yesu ƒe ŋkekea me. Agbalẽnyalagã Alfred Edersheim ŋlɔe be le Talmud ƒe akpa siwo woŋlɔ Sabat-se geɖe ɖo me la, “wobu nyawo ŋu kple ŋkubiã be wole vevie ŋutɔ le subɔsubɔ me, eye wonye nya siwo asesẽ ŋutɔ hafi nàbui be tagbɔkɔkɔetɔ abu wo nya veviwoe.” (The Life and Times of Jesus the Messiah) Rabiawo tsɔ se gbɔlo malike siwo kpɔ ŋusẽ ɖe Yudatɔwo ƒe agbenɔnɔ ƒe akpa ɖesiaɖe kloe dzi la be enye ku kple agbe ƒe nya—edziedzi la, womebua amegbetɔ ƒe seselelãme ŋu kura o. Sabat-se aɖe gblɔ be: “Ne xɔ mu dze ame aɖe dzi eye womenya ne ele afima o, alo be ele agbe alo ku o, alo ne trɔ̃subɔla alo Israel-tɔ wònye o la, ke woafɔ gli gbagbãwo le edzi. Ne wokpɔe agbagbee la, ke woate ŋu ayi gli gbagbãwo fɔfɔ dzi; gake ne [eku] la, woagblẽe ɖi.”—Tractate Yoma 8:7, The Mishnah, si gɔme Herbert Danby ɖe.

Aleke Yesu bu se me léle ɖe asi sesĩe ŋu nyaʋiʋli maɖinu mawoe? Esi woke ɖii be eda gbe le Sabat dzi la, egblɔ be: “Fofonye le dɔ wɔm vaseɖe fifi, eye nye hã mele dɔ wɔm.” (Yohanes 5:17) Menye dɔ wɔm Yesu nɔ be woaxe fe na ye ne yeakpɔ ga o. Ke Mawu ƒe lɔlɔ̃nue wònɔ wɔwɔm. Alesi ko woɖe mɔ na Lewitɔwo be woawɔ woƒe subɔsubɔdɔ kɔkɔe le Sabat dzi la, Yesu hã ate ŋu awɔ dɔ siwo Mawu de esi abe Mesia ene, eye manye dada le Mawu ƒe Se dzi o.—Mateo 12:5.

Dɔ siwo Yesu da le Sabat-ŋkekea dzi klo nu le Yudatɔ agbalẽfialawo kple Farisitɔwo dzi hã be wowɔa “nu dzɔdzɔe vivivo”—woƒe nya me sẽ eye woƒe tamebubu meda sɔ o. (Nyagblɔla 7:16) Nyateƒee, menye Mawu ƒe lɔlɔ̃nu be woawɔ dɔ nyuiwo le kwasiɖa ƒe ŋkeke aɖewo ko dzi o; eye Mawu meɖoe be Sabat nanye se gbɔlowo dzi wɔɣi o. Yesu gblɔ le Marko 2:27 be: “Wowɔ Sabat le ame ta, eye menye ame le Sabat ta o.” Yesu melɔ̃ sedede siwo nye ame ŋutɔ ƒe susu o ke amewoe wòlɔ̃.

Eyata anyo be Kristotɔwo mana woƒe nya me nasẽ egbea alo woƒe susu nanɔ sewo ko dede ŋu o. Amesiwo xɔ ŋgɔ le hamea me tsria amegbetɔ ƒe sededewo kple ɖoɖowo tsɔtsɔ do agbae na ame bubuwo. Yesu ƒe kpɔɖeŋua de dzi ƒo na mí hã be míadi mɔnukpɔkpɔwo awɔ nyui na amewo. Le kpɔɖeŋu me, mele be Kristotɔ nabui gbeɖe be ne yele aƒeme yi aƒeme dɔa wɔm alo ne yele nuƒolanɔƒea ko hafi yeagblɔ Biblia me nyateƒea na amewo o. Apostolo Petro gblɔ be ele be Kristotɔ ‘nasu te ɖaasi, bene wòana ŋuɖoɖo amesiame, si abia nya aɖee le mɔkpɔkpɔ, si le eme la ŋuti.’ (Petro I, 3:15) Womeɖo ɣeyiɣi ɖi koŋ na nyuiwɔwɔ o.

Nufiame le Nublanuikpɔkpɔ Me

Woŋlɔ nukunu ɖedzesi bubu ŋu nya ɖe Luka 7:11-17. Nuŋlɔɖia gblɔ be Yesu “[yi] du aɖe, si woyɔna be Nain la me; eye eƒe nusrɔ̃la geɖeawo kple ameha gã aɖe kpe ɖe eŋuti yi.” Ameɖiƒewo kpɔtɔ le egbegbe Arab-kɔƒe Nein ƒe dzieheɣedzeƒekpa dzi vaseɖe egbea. “Esi wògogo du la ƒe agbo nu,” ekpɔ amewo nɔ ɣli dom. “Kpɔ ɖa, wotsɔ ame kuku aɖe, si nye tenuvi na dadaa, si nye ahosi la, le go domi, eye duametɔ geɖewo kpe ɖe eŋuti.” H. B. Tristram de dzesii be “alesi wowɔa kunui” tso blema ke “metrɔ o,” eye wògagblɔ be: “Mekpɔ nyɔnuwo nɔ amekukugba la ŋgɔ eye nyɔnu fafala siwo wohaya la dze wo ŋgɔ. Wowu woƒe abɔwo dzi, wokaka ɖa ɖe ta helé blanui vevie, eye wonɔ ame kukua ƒe ŋkɔ yɔm leléle.”—Eastern Customs in Bible Lands.

Ahosi si ƒe mo kpɔkpɔ dzaa ɖe vevesese vevie fia la nɔ ameha siwo nɔ ɣli dom la dome. Esi srɔ̃a ku ta la, ebua via le alesi nuŋlɔla Herbert Lockyer gblɔe nu be, “kpeɖeŋutɔ le eƒe tsitsime, kple akɔfafa le eƒe akogotsitsi me—aƒea dzikpɔla kple sɔti. Esi eƒe tenuvia ku la, kpeɖeŋutɔ mamlea nu enye ma yi.” (All the Miracles of the Bible) Aleke Yesu wɔ nui? Luka gblɔe eme kɔ be “esi Aƒetɔ la kpɔ ahosi la la, eƒe dɔme trɔ ɖe eŋuti, eye wògblɔ nɛ bena: Megafa avi o!” Helagbe me nya si gɔmeɖeɖe ŋutɔŋutɔe nye “dɔkaviwo” mee woɖe nya si gɔme woɖe be eƒe “dɔme trɔ” la tsoe. Egɔmee nye be “nu nawɔ dɔ ɖe ame dzi ayi ememe ke.” (Vine’s Expository Dictionary of Old and New Testament Words) Ẽ, ewɔ dɔ ɖe Yesu dzi vevie yi ememe ke.

Anɔ eme be Yesu dada nye ahosi ɣemaɣi, eyata fofoa Yosef si xɔe nyi ƒe ku na wònya alesi lɔlɔ̃tɔ ƒe ku venae. (Tsɔe sɔ kple Yohanes 19:25-27.) Ahosia meɖe kuku na Yesu hafi o. Yesu tso ɖe eŋu kpla nublanuikpɔkpɔtɔe. “Esi wòte va la, ede asi aɖaka la ŋu” togbɔ be asikaka ame kuku ŋu na wozua ame makɔmakɔ le Mose ƒe Sea te hã. (Mose IV, 19:11) Yesu to eƒe ŋusẽ wɔnukuwo dzi ɖe nusi he makɔmakɔnyenyea vɛ la ŋutɔ ɖa! “Eye wògblɔ bena: Ðekakpui, mele egblɔm na wò bena: Tsi tre! Eye ame kuku la fɔ bɔbɔ nɔ anyi, eye wòde asi nuƒoƒo me, eye wòtsɔe na dadaa.”

Nublanuikpɔkpɔ ŋuti nufiame ʋãme ka gbegbee nye si! Mele be Kristotɔwo nasrɔ̃ amemalɔ̃malɔ̃ kple amemawɔmawɔ ƒe nɔnɔme si ɖem wole fia le “ŋkeke mamle” siawo me o. (Timoteo II, 3:1-5) Ke Petro I, 3:8 ƒoe ɖe mía nu boŋ be: “Mlɔeba la mi katã misusu nu ɖeka, ame nu nawɔ nublanui na mi; milɔ̃ mia nɔewo.” Ne ame nyanyɛ aɖe ku alo dze dɔ vevie la, míate ŋu afɔe ɖe tsitre alo ayɔ dɔe o. Gake míate ŋu akpe ɖe wo ŋu alo afa akɔ na wo, ɖewohĩ to kua teƒe nɔnɔ kple avifafa kpli wo me.—Romatɔwo 12:15.

Tsitretsitsi wɔnuku sia si Yesu wɔ la fia asi nusi ava dzɔ le etsɔ me hã—esime “amesiwo katã le [ŋkuɖodziyɔdowo] me la, woase eƒe gbe; eye [woado go.]”! (Yohanes 5:28, 29) Kutɔwo ŋutɔwo akpɔ Yesu ƒe nublanuikpɔkpɔ le xexeame godoo, esime dadawo, fofowo, ɖeviwo, kple xɔlɔ̃ siwo ku la afɔ tso yɔdo me!

Nufiame Siwo Le Nukunuawo Me

Eyata eme kɔ be Yesu ƒe nukunuwo menye ŋusẽ ŋudɔwɔwɔ lédziname ko o. Wokɔ Mawu ŋuti eye wònye kpɔɖeŋu na Kristotɔ siwo nu woƒoe ɖo be ‘woakafu Mawu.’ (Romatɔwo 15:6) Wode nunyuiwɔwɔ, dɔmenyonyo, kple nublanuikpɔkpɔ ƒe dzi ƒo. Vevietɔ wu la, wonye ŋusẽdɔ siwo woawɔ le Kristo ƒe Ƒe Akpe Ðeka Dziɖuɖu te ƒe ɖeɖefia sue aɖe.

Teƒe sue aɖe koe Yesu wɔ eƒe nukunuwo le esime wònɔ anyigba dzi. (Mateo 15:24) Enye Fia si ŋu wokɔ si ƒe dziɖuɖu akeke ta akpe anyigba ɖo! (Psalmo 72:8) Amesiwo wòyɔ dɔ kple amesiwo wòfɔ ɖe tsitre nukutɔe ɣemaɣi la va ku mlɔeba. Woaɖe nuvɔ̃ kple ku ɖa keŋkeŋ le eƒe dziƒodziɖuɖu te, si ana woakpɔ agbe mavɔ. (Romatɔwo 6:23; Nyaɖeɖefia 21:3, 4) Ẽ, Yesu ƒe nukunuwo ɖee fia be etsɔ me nyui aɖe le ŋgɔ gbɔna. Yehowa Ðasefowo kpe ɖe ame miliɔn geɖe ŋu be mɔkpɔkpɔ vavãtɔ va su wo si be yewoanɔ agbe le afima. Hafi ɣemaɣi naɖo la, nusiwo ava dzɔ le etsɔ me kpuie ɖɔɖɔkpɔ wɔnuku ka gbegbee nye si Yesu Kristo ƒe nukunuwo ɖe fia!

[Nɔnɔmetata si le axa 7]

Yesu trɔ tsi wòzu wein