Lɔlɔ̃ Ƒe Mɔ La Nu Metsina Gbeɖe O
“Midi amenuvevenunana nyuitɔwo vevie, eye hekpe ɖe esia ŋuti la mafia mɔ nyuitɔ mi!”—KORINTOTƆWO I, 12:31.
1-3. (a) Aleke lɔlɔ̃ ɖeɖefia ɖi gbe yeye sɔsrɔ̃ le nu geɖe mee? (b) Nukawoe ate ŋu ana lɔlɔ̃ ɖeɖefia nanye nu sesẽ?
ÈDI be yeasrɔ̃ gbe yeye aɖe kpɔa? Ne míaƒo nu fũ o la, míagblɔ be menɔa bɔbɔe o! Gake ɖevi sue ate ŋu asrɔ̃ gbe yeye aɖe ne enya le edolawo dome ko. Eƒe ahɔhɔ̃ te ŋu léa gbegbɔgblɔa ƒe gbeɖiɖiwo kple woƒe gɔmesese akpa gã aɖe, ale be kaka nàkpɔ la, ɖevi suea te ŋu doa gbea memie, ɖewohĩ wòanɔ edom edziedzi hã. Gake mele nenema le ame tsitsiwo gome o. Míedia nya le dutagbe me nyagɔmeɖegbalẽwo me zi geɖe hafi dutagbea me nyagbɔgblɔ ʋee aɖewo va mãa mí. Gake le ɣeyiɣi aɖe megbe ne míeva se gbea yi ŋgɔ nyuie la, míeva dzea tamebubu gɔme le gbe yeyea me eye edodo nɔa bɔbɔe na mí.
2 Lɔlɔ̃ ɖeɖefia sɔsrɔ̃ hã ɖi gbe yeye sɔsrɔ̃ le go geɖe me. Nyateƒee, mí amegbetɔwo míenyi Mawu ƒe nɔnɔme sia agbɔsɔsɔ aɖe ƒe dome. (Mose I, 1:27; tsɔe sɔ kple Yohanes I, 4:8.) Ke hã ebiaa agbagbadzedze etɔxɛe be míaɖe lɔlɔ̃ afia—vevietɔ egbea si ʋuɖekametɔwo ƒe lɔlɔ̃ ɖeɖefia wo nɔewo le vevem. (Timoteo II, 3:1-5) Ɣeaɖewoɣi aleae wòdzɔnae le ƒomea ŋutɔ me. Ẽ, ame geɖe tsina le aƒe siwo me ƒã ŋutɔ hafi wogblɔa nya siwo me lɔlɔ̃ le me—ne wogblɔnɛ gɔ̃ hãe nye ema. (Efesotɔwo 4:29-31; 6:4) Ke aleke míawɔ asrɔ̃ lɔlɔ̃ ɖeɖefia—ne womeɖee fia mía ŋutɔwo boo o hã?
3 Biblia ate ŋu akpe ɖe mía ŋu. Le Korintotɔwo I, 13:4-8 la, menye nusi lɔlɔ̃ nye gbadzaa koe Paulo gblɔ o, ke boŋ eƒo nu tso alesi lɔlɔ̃ ƒomevi sia si de ŋgɔ wu bubuawo wɔa nui ŋu le mɔ si awɔ dɔ ɖe ame dzi nu. Kpukpui siawo me dzodzro akpe ɖe mía ŋu be míase Mawu ƒe nɔnɔme sia me nyuie eye eɖeɖefia nanɔ bɔbɔe na mí. Mina míadzro lɔlɔ̃ si ŋu Paulo ƒo nu le la ƒe akpa aɖewo me kpɔ. Míaƒo wo nu ƒu ɖe hatsotso gã etɔ̃ me: míaƒe nɔnɔme gbadzaa; emegbe míaƒo nu tso ƒomedodo si anɔ mía kple ame bubuwo dome ŋu tẽ; eye mlɔeba míaƒe dzidodo.
Lɔlɔ̃ Kpena ɖe Mía Ŋu be Míaɖu Dada Dzi
4. Aleke Biblia kɔ nu mee ku ɖe Ŋuʋaʋã ŋu?
4 Le nya gbãtɔ siwo Paulo gblɔ le lɔlɔ̃ ŋu nuwuwu vɔ megbe la, eŋlɔ ɖo ɖe Korintotɔwo be: “Lɔlɔ̃ la meʋãa ŋu o.” (Korintotɔwo I, 13:4) Ŋuʋaʋã ate ŋu anye ame bubuwo ƒe nudzedziname alo ŋgɔyiyi ƒe ameveve hã. Ŋuʋaʋã sia tɔgbe gblẽa nu le ame ŋu—le ŋutilã, seselelãme, kple gbɔgbɔ me.—Lododowo 14:30; Romatɔwo 13:13; Yakobo 3:14-16.
5. Aleke lɔlɔ̃ ate ŋu akpe ɖe mía ŋu míaɖu ŋuʋaʋã dzii ne ewɔ abe ɖe woto mía ŋu tsɔ teokrasi mɔnukpɔkpɔ aɖe na ame bubu?
5 Esi nya la le alea ta la, bia ɖokuiwò se be, ‘Ðe meʋãa ŋu ne ewɔ abe ɖe woto ŋunye tsɔ teokrasi mɔnukpɔkpɔ aɖe na ame bubua?’ Ne ŋuɖoɖoae nye ẽ la, mègabu mɔkpɔkpɔ o. Biblia-ŋlɔla Yakobo ɖo ŋku edzi na mí be ‘ŋuʋaʋã ƒe nɔnɔme’ le ame madeblibo ɖesiaɖe me. (Yakobo 4:5) Lɔlɔ̃ na nɔviwò ate ŋu akpe ɖe ŋuwò be nàgada asɔ. Ate ŋu akpe ɖe ŋuwò be nàdzɔ dzi kple amesiwo dzi le dzɔdzɔm eye ne woyra ame bubu alo kafui la, màbui be esi womelɔ̃ ye ya yeƒe nya tae o.—Tsɔe sɔ kple Samuel I, 18:7-9.
6. Nɔnɔme sesẽ kae va nɔ ƒe alafa gbãtɔ me Korinto-hamea me?
6 Paulo gblɔ kpee be lɔlɔ̃ “meƒoa adegbe o, medoa eɖokui ɖe dzi glodzo o.” (Korintotɔwo I, 13:4) Ne nunana alo ŋutete aɖe le mía si la, mehiã be míatsɔe anɔ adegbe ƒomee o. Edze ƒã be esia nye kuxi na ŋuʋãla aɖewo siwo tra ɖe blema Korinto-hamea me. Ðewohĩ wote ŋu ɖea nu me alo te ŋu wɔa nanewo nyuie wu ame bubuwo. Ate ŋu anye be susu hehe va wo ɖokui dzii hã nɔ eme tae mamã kukluiwo le hamea me ɖo. (Korintotɔwo I, 3:3, 4; Korintotɔwo II, 12:20) Nuwo va gblẽ ale gbegbe be wòle be emegbe Paulo naka mo na Korintotɔwo vevie be ‘wodo dzi ɖe mɔ ɖe nugɔmemaselawo,’ amesiwo wòyɔ fɔbuametɔe be ‘apostolo siwo kɔ akpa’ la ‘ƒe nyawo ŋu.’—Korintotɔwo II, 11:5, 19, 20.
7, 8. Zã Biblia nàtsɔ afia alesi míate ŋu azã dzɔdzɔmenunana siwo ƒe dome míenyi atsɔ ana ɖekawɔwɔ nanɔ anyii.
7 Nusia ƒomevi ate ŋu adzɔ egbea hã. Le kpɔɖeŋu me, ame aɖewo adi be yewoanɔ adegbe ƒom le nusiwo yewote ŋu wɔna le gbeadzisubɔsubɔdɔa me alo le mɔnukpɔkpɔ siwo su yewo si le Mawu ƒe habɔbɔa me ŋu. Ne míebi wu ame bubuwo le hamea me alo ŋutete tɔxɛ aɖe le mía si si mele wo si o kura hã la, ɖe wònye nusita míado mía ɖokui ɖe dzi glodzoo ɖoa? Ne èsusu eŋu la, ele be míazã dzɔdzɔmenunana ɖesiaɖe si míexɔ atsɔ ahe ɖekawɔwɔ vɛ—menye be míatsɔ ahe susu ava mía ɖokui dzi o.—Mateo 23:12; Petro I, 5:6.
8 Paulo ŋlɔ be togbɔ be hamevi geɖe ye le hamea me hã la, “Mawu wɔ ŋutilã heɖoe teƒeteƒe.” (Korintotɔwo I, 12:19-26) Helagbe me nya si gɔme woɖe be ‘wɔ ɖo teƒeteƒe’ fia alesi woana nuwo nade nu wo nɔewo me ɖekawɔwɔ nanɔ wo me, abe ne wotsɔ amadede vovovo tsaka ene. Eyata mele be hamea me tɔ aɖeke nada le esi wòle ŋgɔ na ame bubuwo le nanewo me ta eye wòanɔ didim be yeaɖu amegã ɖe ame dzi o. Dada kple ɖoƒe kɔkɔ didi mele Mawu ƒe habɔbɔ me o.—Lododowo 16:19; Korintotɔwo I, 14:12; Petro I, 5:2, 3.
9. Nuxlɔ̃amekpɔɖeŋu kawoe Biblia gblɔ tso amesiwo nɔ woawo ŋutɔ ƒe viɖewo dim ŋu?
9 Lɔlɔ̃ “media ye ŋutɔ tɔ o.” (Korintotɔwo I, 13:5) Amesi lɔ̃a ame metoa ayemɔ dzi able ame nu be yeƒe asi naka nu o. Nya sia ƒe nuxlɔ̃amekpɔɖeŋuwo le Biblia me. Le kpɔɖeŋu me: Míaxlẽ nu le Delila, Izebel, kple Atalya—nyɔnu siwo ble amewo de nugbegblẽwɔwɔ me ɖe woawo ŋutɔ woƒe viɖewo ta—ŋu. (Ʋɔnudrɔ̃lawo 16:16; Fiawo I, 21:25; Kronika II, 22:10-12) Fia Dawid vi Absalom tɔ hã li. Etena ɖe amesiwo va Yerusalem be woadrɔ̃ nya na yewo ŋu gblɔna na wo ayetɔe be fia ƒe ʋɔnudrɔ̃lawo metsɔ ɖeke le eme na wo ŋutɔŋutɔ o. Ne egblɔe alea vɔ la, ke egblɔnɛ tẽ be ʋɔnudrɔ̃ƒea hiã amesiwo tsɔa ɖe le eme na ame abe ye ene! (Samuel II, 15:2-4) Gake Absalom ŋutɔ ƒe nyonyo ŋu koe wòtsi dzi ɖo, menye amesiwo wote ɖe anyi ŋue o. Eya ŋutɔ wɔ eɖokui abe fiae woɖoe ene eye wòfi ame geɖe ƒe dzi. Gake emegbe Absalom va ku nublanuiku le aʋa me. Le eƒe ku me la, womebui be edze be woade bubu eŋu le eɖiɖi me gɔ̃ hã o.—Samuel II, 18:6-17.
10. Aleke míate ŋu aɖee afiae be míebua ame bubuwo ƒe nyonyo ŋu?
10 Esia nye nuxɔxlɔ̃ na Kristotɔwo egbea. Ŋutsuwo alo nyɔnuwoe míenye o, ate ŋu anye be míenya amenubeble. Ðewohĩ míenya alesi míaƒo nu atsɔ aɖu ame dzii, le dzeɖoɖo me la, míaxɔ nya la awɔ mía tɔe alo míaƒe nu nasẽ wu amesiwo ƒe susu to vovo na mía tɔ. Gake ne lɔlɔ̃ le mía me nyateƒe la, míabu ame bubuwo hã ƒe nyonyo ŋu. (Filipitɔwo 2:2-4) Míadi be míable ame nu ne wòawɔ nusi míedi alo ado nya aɖewo siwo ŋu nya aku ɖo ɖa le míaƒe nuteƒekpɔkpɔ alo míaƒe nɔƒe le Mawu ƒe habɔbɔa me ta abe míaƒe susu koe nye nyuitɔ ene o. Ke boŋ míaɖo ŋku Biblia ƒe lododo sia dzi be: “Dàda doa ŋgɔ na gbegblẽ, eye ɖokuidodoɖedzi na anyidzedze.”—Lododowo 16:18.
Lɔlɔ̃ Naa Ŋutifafa Nɔa Anyi
11. (a) Mɔ kawo nue míate ŋu aɖee afia le be lɔlɔ̃ nyoa dɔme eye wòwɔa nusi dze? (b) Aleke míate ŋu aɖee afiae be míekpɔa dzidzɔ ɖe nu madzɔmadzɔ ŋu o?
11 Paulo gaŋlɔ be lɔlɔ̃ ƒe “dɔme nyona” eye “mewɔa nusi medze o.” (Korintotɔwo I, 13:4, 5) Ẽ, lɔlɔ̃ mana míawɔ nu amemabumabutɔe, agblɔ nya madzeto, alo agbe bubudede ame ŋu le míaƒe nuwɔna me o. Ke boŋ míabu ame bubuwo ƒe seselelãme ŋu. Le kpɔɖeŋu me, amesi lɔ̃a ame mawɔ nusi aɖe fu na ame bubuwo ƒe dzitsinya o. (Tsɔe sɔ kple Korintotɔwo I, 8:13.) Lɔlɔ̃ “medzɔa dzi le nu madzɔmadzɔ ŋuti o, ke eya kple nyateƒee dzɔa dzi.” (Korintotɔwo I, 13:6) Ne míelɔ̃ Yehowa ƒe sea la, míabu agbegbegblẽnɔnɔ nu tsɛe alo nusiwo Mawu lé fui naɖe modzaka na mí o. (Psalmo 119:97) Lɔlɔ̃ akpe ɖe mía ŋu be nusiwo tua ame ɖo nado dzidzɔ na mí menye nusiwo hea ame ɖe megbe o.—Romatɔwo 15:2; Korintotɔwo I, 10:23, 24; 14:26.
12, 13. (a) Aleke wòle be míawɔ nui ne ame aɖe dze agɔ le mía dzi? (b) Gblɔ Biblia me kpɔɖeŋuwo nàtsɔ afia be ne mía tɔ dzɔ be míakpɔ dziku kura gɔ̃ hã míate ŋu awɔ nu numanyamanyatɔe.
12 Paulo ŋlɔ be lɔlɔ̃ “mebia dzi o” (“nu mevenɛ kabakaba o,” Phillips). (Korintotɔwo I, 13:5) Nyateƒee, esɔ le dzɔdzɔme nu be dzi naku mí amegbetɔ madeblibowo alo míado dɔmedzoe vie ne ame aɖe wɔ nu wòve mí. Gake masɔ be míalé nya alo dziku ɖe dɔme o. (Psalmo 4:5; Efesotɔwo 4:26) Ne mía tɔ dzɔ be míakpɔ dziku hã la, ne míeɖu mía ɖokui dzi o la, ate ŋu ana míawɔ nusi me nunya mele o, eye Yehowa ate ŋu ahe eƒe to na mí.—Mose I, 34:1-31; 49:5-7; Mose IV, 12:3; 20:10-12; Psalmo 106:32, 33.
13 Ame aɖewo ɖe mɔ ame bubuwo ƒe blibomademadewo gblẽ woƒe nyametsotso si wowɔ be yewoade Kristotɔwo ƒe kpekpewo alo ade gbeadzi me. Le ɣeyiɣi siwo va yi me la, amesiawo dometɔ geɖe ʋli nyateƒea ta sesĩe, ɖewohĩ wodo dzi le ƒometɔwo ƒe tsitretsiɖeŋu, dɔwɔhatiwo ƒe amekoko, kple nusiawo tɔgbe me. Wodo dzi tsɔ kplamatsedonu siawo elabena wobu wo be wonye nuteƒewɔwɔ ƒe dodokpɔ, eye esɔ be wobui nenema. Gake nukae dzɔna ne hati Kristotɔ aɖe wɔ nane alo gblɔ nya aɖe si me lɔlɔ̃ mele o ɖe wo ŋu? Ðe menye nuteƒewɔwɔ ƒe dodokpɔe nye esia hã oa? Eya tututue, elabena ne míeɖe mɔ dzikua tsi dɔme na mí la, ate ŋu adzɔ be ‘míaɖe mɔ na Abosam.’—Efesotɔwo 4:27.
14, 15. (a) Nukae wòfia be ‘wobu akɔnta le nu madzɔmadzɔ ŋu ɖi’? (b) Aleke míawɔ asrɔ̃ Yehowa le tsɔtsɔke me?
14 Eyata susu nyui aɖe tae Paulo gblɔ kpee be lɔlɔ̃ “mebua vɔ̃ si wowɔ ɖe eŋu ƒe akɔnta ɖi o.” (Korintotɔwo I, 13:5, NW) Le afisia ezã nya aɖe si gakɔntabulawo zãna, ate ŋu anye be edi be yeafia be míade dzesi agɔ si wodze ɖe mía ŋu ɖi ɖe nuŋlɔɖigbalẽ me be míagava ŋlɔ be o. Ðe wòanye amelɔlɔ̃ be míalé nya alo nane si wowɔ si ve mí ɖi, abe ɖe wòahiã be míagava ɖo ŋku edzi le etsɔme enea? Aleke gbegbe wòadzɔ dzi na míi enye si be Yehowa mekea ŋku ɖe míaƒe nyawo me tsitotsito nublanuimakpɔmakpɔtɔe nenema o! (Psalmo 130:3) Ẽ, ne míetrɔ dzime la, etutua míaƒe vodadawo ɖa.—Dɔwɔwɔwo 3:19.
15 Míate ŋu asrɔ̃ Yehowa le esia me. Mele be dzi naku mí helĩhelĩ ne ewɔ abe ɖe ame aɖe da mí ɖe anyi ene o. Ne nu mesẽa mía veve o la, míate ŋu anɔ nu geɖe gblẽm le mía ɖokui ŋu wu amesi dze agɔ le mía dzi. (Nyagblɔla 7:9, 22) Ðe esia teƒe la, enyo be míaɖo ŋku edzi be lɔlɔ̃ ‘xɔa nuwo katã dzi sena.’ (Korintotɔwo I, 13:7) Nyateƒee, mía dometɔ aɖeke madi be yeanye amesi xɔa nya sia nya dzi sena bɔbɔe o, gake mele be míabu nazã ɖe mía nɔviwo ƒe susu ŋu hã dzodzro o. Ɣesiaɣi si wòanya wɔ la, mina míatsɔe na mía nɔewo be mía nɔviwo meɖo susu vɔ̃ aɖeke o.—Kolosetɔwo 3:13.
Lɔlɔ̃ Kpena Ðe Mía Ŋu Míedoa Dzi
16. Nɔnɔme kawo mee lɔlɔ̃ ate ŋu akpe ɖe mía ŋu le be míagbɔ dzi blewu?
16 Eyata Paulo gblɔ na mí be “lɔlɔ̃ la gbɔa dzi blewu.” (Korintotɔwo I, 13:4) Ekpena ɖe mía ŋu be míanɔ te ɖe nɔnɔme sesẽwo nu, ɖewohĩ ɣeyiɣi didi aɖe. Le kpɔɖeŋu me, Kristotɔ geɖewo le aƒe siwo me mã le subɔsubɔnyawo me la me ɣeyiɣi didi aɖee nye sia. Bubuwo nye trewo, menye le esi wònyo na wo ta o, ke boŋ le esi womete ŋu kpɔ amesi sɔ na wo “le Aƒetɔ la me” o ta. (Korintotɔwo I, 7:39; Korintotɔwo II, 6:14) Eye ame bubuwo hã li siwo lãmegbegblẽ sesẽwo ɖea fu na. (Galatiatɔwo 4:13, 14; Filipitɔwo 2:25-30) Le nyateƒe me, le nuɖoanyi madeblibo sia me la, ame aɖeke meli si le nɔnɔme aɖe si me dzidodo mehiã le o me o.—Mateo 10:22; Yakobo 1:12.
17. Nukae akpe ɖe mía ŋu be míado dzi le nusianu me?
17 Paulo ka ɖe edzi na mí be lɔlɔ̃ “[tsɔa] nuwo katã kpoo, . . . ekpɔa mɔ na nuwo katã, edoa dzi le nuwo katã me.” (Korintotɔwo I, 13:7) Lɔlɔ̃ na Yehowa akpe ɖe mía ŋu be míalɔ̃ akpe fu sia fu ɖe dzɔdzɔenyenye ta. (Mateo 16:24; Korintotɔwo I, 10:13) Míedina be woayɔ mí be xɔsetakukulawo o. Míaƒe taɖodzinu boŋ ye nye be míanɔ anyi le ŋutifafa me kpoo. (Romatɔwo 12:18; Tesalonikatɔwo I, 4:11, 12) Gake ne xɔse ƒe dodokpɔwo va la, edzɔa dzi na mí be míado dzi le wo me elabena míenyae be woawo hã nye nusi Kristo ƒe nusrɔ̃lanyenye bia la ƒe akpa aɖe. (Luka 14:28-33) Ne míele dzi dom la, míedzea agbagba be dzi maɖe le mía ƒo o kple mɔkpɔkpɔ be nu nyui aɖe atso míaƒe fukpekpeawo me.
18. Aleke dzidodo hiãe ne míele fu aɖeke kpem o hã?
18 Menye xaxawo me koe dzidodo hiã le o. Ɣeaɖewoɣi la, dzidodo fia ko be woanɔ nɔnɔme aɖe me eteƒe nadidi, be woayi nane wɔwɔ dzi kuxiwo ɖali alo womeɖali o. Gbɔgbɔmedɔwo wɔwɔ ɖaa ɖe ɖoɖowɔɖi nyui nu hã nye dzidodo ƒe akpa aɖe. Le kpɔɖeŋu me, ète ŋu wɔa gbeadzisubɔsubɔdɔa nyuie le alesi wò nɔnɔmewo aɖe mɔe nua? Èxlẽa Mawu ƒe Nya la eye nèƒoa nu na Fofowò si le dziƒo le gbedodoɖa mea? Èdea hamea ƒe kpekpewo edziedzia, eye èkpɔa gome le dzidede ƒo na wò haxɔsetɔwo kple woƒe dzidedeƒo na wò mea? Ne èwɔa nusiawo la, ke ne èle nɔnɔme sesẽwo me tom fifia alo mèle wo me tom o, dzia koe nye ma dom nèle. Mègana ta o, “elabena ne míegbɔdzɔ . . . o la, míaŋe nu le ye ŋutɔ ƒe azãgbe la dzi.”—Galatiatɔwo 6:9.
Lɔlɔ̃—“Mɔ si Ƒo Ðesiaɖe Ta”
19. Aleke lɔlɔ̃ nye ‘mɔ si ƒo ɖesiaɖe tae’?
19 Paulo te gbe ɖe lɔlɔ̃ ɖeɖefia ƒe vevienyenye dzi esi wòyɔ Mawu ƒe amenyenye sia be enye “mɔ si ƒo ɖesiaɖe ta.” (Korintotɔwo I, 12:31, NW) ‘Ƒo ɖesiaɖe ta’ aleke? Ðeko Paulo yɔ gbɔgbɔ la ƒe nunana siwo bɔ le ƒe alafa gbãtɔ me Kristotɔwo dome vɔ koe nye ma. Wona nyagbɔgblɔɖi ŋutete ame aɖewo, wona dɔdada ŋutete bubuwo, eye ame geɖe xɔ gbewo gbɔgblɔ ƒe ŋutete. Wonye nunana wɔnukuwo vavã! Ke hã Paulo gblɔ na Korintotɔwo be: “Nenye ɖe metsɔ amewo kple mawudɔlawo ƒe gbegbɔgblɔwo ƒoa nu, ke lɔlɔ̃ mele asinye o la, anye ne mele abe ayawagba, si ɖina alo abe gaƒoƒo, si ɖina la ene. Eye nenye ɖe nyagbɔgblɔɖi le asinye, eye menya nya ɣaɣlawo katã kple sidzedze katã, eye nenye ɖe xɔse katã le asinye, ale bena mate ŋu aɖe towo ɖa, ke lɔlɔ̃ mele asinye o la, anye ne nyemenye naneke o.” (Korintotɔwo I, 13:1, 2) Ẽ, dɔwɔwɔ siwo anye ne asixɔxɔ anɔ wo ŋu hafi la zua “dɔwɔwɔ kukuwo” ne menye Mawu kple havi lɔlɔ̃ tae míewɔ wo o.—Hebritɔwo 6:1.
20. Nukatae wòhiã agbagbadzedze ɣeawokatãɣi ne míedi be míasrɔ̃ nɔnɔme si nye lɔlɔ̃ la?
20 Yesu gblɔ nu bubu si ta wòle be míasrɔ̃ Mawu ƒe nɔnɔme si nye lɔlɔ̃ la ɖeɖefia na mí. Egblɔ be: “Esia me amewo katã woanyae le bena, nye nusrɔ̃lawo mienye, ne lɔlɔ̃ le mia dome.” (Yohanes 13:35) Nya “ne” si wozã la fia be wogblẽe ɖe Kristotɔ ɖesiaɖe si me be wòaɖee afia be yeasrɔ̃ lɔlɔ̃ ɖeɖefia loo alo yemasrɔ̃e o. Ne èbu eŋu kpɔ la, dutadukɔ me nɔnɔ ɖeɖeko mazi ame dzi be wòasrɔ̃ woƒe gbe o. Nenema ke kpekpewo dede le Fiaɖuƒe Akpata me alo hadede kple hati Kristotɔwo ɖeɖe mafia lɔlɔ̃ ɖeɖefia mí le eɖokui si o. “Gbe” sia sɔsrɔ̃ nye nusi bia agbagbadzedze ɣeawokatãɣi.
21, 22. (a) Aleke wòle be míawɔ nui ne míete ŋu ɖo lɔlɔ̃ ƒe akpa aɖe si ŋu Paulo ƒo nu le la gbɔ o? (b) Mɔ ka nue míate ŋu agblɔe le be “lɔlɔ̃ la nu metsina gbeɖe o”?
21 Ɣeaɖewoɣi la, màte ŋu aɖo lɔlɔ̃ ƒe akpa aɖe si ŋu Paulo ƒo nu le gbɔ o. Gake dzi megaɖe le ƒowò o. Ku kutri dzigbɔɖitɔe. Yi edzi nànɔ kpekpeɖeŋu dim le Biblia me eye nàtsɔ eƒe gɔmeɖosewo awɔ dɔe le wò nuwɔwɔ ɖe amewo ŋu me. Mègaŋlɔ kpɔɖeŋu si Yehowa ŋutɔ ɖo ɖi na mí la be gbeɖe o. Paulo xlɔ̃ nu Efesotɔwo be: “Mikɔ dɔme ɖe mia nɔewo ŋu, eye miaƒe dɔme natrɔ ɖe mia nɔewo ŋu, eye mitsɔ ke mia nɔewo, abe alesi Mawu tsɔ ke mi le Kristo me la ene.”—Efesotɔwo 4:32.
22 Abe alesi gbe yeye sɔsrɔ̃ va bɔbɔna na ame ne ɣeyiɣiawo va le yiyim ene la, nenema ke le ɣeyiɣi aɖe megbe àva kpɔe be lɔlɔ̃ ɖeɖefia ava anɔ bɔbɔe wu. Paulo ka ɖe edzi na mí be “lɔlɔ̃ la nu metsina gbeɖe o.” (Korintotɔwo I, 13:8) To vovo na gbɔgbɔ ƒe nukununanawo la, lɔlɔ̃ la nu mava yi gbaɖekegbe o. Eyata yi edzi nànɔ Mawu ƒe nɔnɔme sia sɔsrɔ̃ dzi. Abe alesi Paulo gblɔe ene la, eyae nye “mɔ si ƒo ɖesiaɖe ta.”
Àte Ŋu Aɖe Wo Mea?
◻ Aleke lɔlɔ̃ ate ŋu akpe ɖe mía ŋui be míaɖu dada dzi?
◻ Mɔ kawo nue lɔlɔ̃ ate ŋu akpe ɖe mía ŋu le be míana ŋutifafa nanɔ hamea me?
◻ Aleke lɔlɔ̃ ate ŋu akpe ɖe mía ŋu míado dzii?
◻ Aleke lɔlɔ̃ nye ‘mɔ si ƒo ɖesiaɖe tae’?
[Nɔnɔmetata si le axa 19]
Lɔlɔ̃ akpe ɖe mía ŋu be míaŋe aɖaba aƒu míaƒe haxɔsetɔwo ƒe vodadawo dzi
[Nɔnɔmetata si le axa 23]
Dzidodo fia be ele be míanɔ nu wɔm ɖe teokrasi ɖoɖowɔɖi dzi ɖaa