Míate Ŋu Awɔ Dɔ Geɖe Wu
1 Nusiwo Yesu Kristo wɔ le eƒe subɔsubɔdɔa me nye etɔxɛ. Ena nu ame akpe nanewo woɖu nukutɔe, da dɔ na ame geɖewo, eye wòfɔ ame aɖewo ɖe tsitre tso ku me. (Mat. 8:1-17; 14:14-21; Yoh. 11:38-44) Eƒe dɔwɔwɔ wɔ dɔ ɖe dukɔ blibo dzi. Gake le zã mamlɛ si do ŋgɔ na eƒe ku me la, egblɔ na eyomedzela wɔnuteƒewo be: “Amesi xɔa dzinye sena la, dɔ, siwo wɔm mele la, eya hã awɔe; eye [dɔ geɖe wu] esiawo wòawɔ.” (Yoh. 14:12) Aleke míate ŋu awɔ dɔ ‘geɖe wui’?
2 To Anyigbamamã Geɖe Wu Kpekpe Ðo Me: Palestina-nutome koe Yesu wɔ dɔ le, gake wogblɔ na nusrɔ̃la gbãtɔwo be woaɖi ɖase “vaseɖe anyigba ƒe seƒe ke,” si agbɔ afisi Yesu ŋutɔ ɖe gbeƒã le ŋu sã. (Dɔw. 1:8) Gbeƒãɖeɖedɔ si gɔme wòdze la xɔ xexeame katã fifia, eɖo anyigba 232 sɔŋ dzi. (Mat. 24:14) Ðe nèle gome kpɔm le dɔwɔwɔ le anyigbamamã si wode asi na miaƒe hamea me bliboea?
3 To Ame Geɖe Wu Gbɔ Ðoɖo Me: Nusrɔ̃la ʋee aɖewo koe Yesu gblẽ ɖi be woayi gbeƒãɖeɖedɔa dzi. Gake woƒe ɖaseɖiɖi dzonɔamemetɔe le ƒe 33 M.Ŋ. ƒe Pentekoste dzi me tsonue nye amesiwo anɔ luʋɔ akpe etɔ̃ siwo xɔ nyateƒea hexɔ nyɔnyrɔ gbemagbe. (Dɔw. 2:1-11, 37-41) Amesiwo ‘ƒe nɔnɔme dze na agbe mavɔ kpɔkpɔ’ nuƒoƒoƒu yi edzi vaseɖe míaƒe ɣeyiɣi sia me, esime míele amesiwo wu 1,000 nyrɔm le mamã dedie nu gbesiagbe. (Dɔw. 13:48) Ðe nèle wò ŋutete katã wɔm be nàɖo dzianukwaretɔwo gbɔ le afisiafi si nàke ɖe wo ŋu le eye be nàtrɔ ayi ɖetsɔlemetɔwo gbɔ kabaa?
4 To Gbeƒãɖeɖe Ɣeyiɣi si Didi Wu Me: Ƒe etɔ̃ kple afã koe Yesu wɔ eƒe anyigbadzisubɔsubɔdɔa. Mía dometɔ akpa gãtɔ míele gbeƒã ɖem ɣeyiɣi si didi wu ema. Ɣeyiɣi didi ka kee woana míayi dɔ sia wɔwɔ dzi o, enye míaƒe dzidzɔ be míakpe ɖe ame yeye ɖesiaɖe ŋu be woadze agbemɔa dzi. (Mat. 7:14) Ðe nèle geɖe wɔm le Aƒetɔ la ƒe dɔwɔwɔ me ɣleti sia ɣletia?—Kor. I, 15:58.
5 Míate ŋu aka ɖe edzi be esi Yesu le megbe na mí ta la, míagawɔ dɔ geɖe wu abe eƒe nusrɔ̃la vavãwo ene.—Mat. 28:19, 20.