Turin Ƒe Ameɖivɔ la Eyae Wotsɔ Ði Yesua?

ETSO NYƆ! ƑE NUŊLƆLA SI LE ITALY GBƆ

Tso April 18 vaseɖe June 14, 1998, dzi la, woda avɔ aɖe si wobe eyae woxatsa ɖe Yesu Nazaretetɔ la ƒe kukua ŋu hafi ɖii la ɖe Italy, le San Giovanni Battista ƒe Gbedoxɔgã me le Turin be amewo nava kpɔ. Wotsɔe de ahuhɔ̃eɖaka si me ya mate ŋu age ɖo o, si tukpe mate ŋu aŋɔ o, si me wolé ya aɖe si mate ŋu ado o dee la me. Yame ƒe nɔnɔme si me wòanɔ anɔ dedie mee wodee le afima.

TSAÐILAWO zɔ to ameɖivɔa si ŋu wolé fɔ ɖo dzra ɖo nyuie, si woda ɖe teƒe aɖe si wowɔ si woazɔ ato akpɔe wònye ame toƒe vovovo etɔ̃ si ƒe ɖesiaɖe kɔ gbɔ nɔvia ŋu vie, la ŋkume. Esia na wòdze nyuie amesiame te ŋu kpɔ. Aɖabaƒoƒo eve ŋu koe woɖe mɔ ɖo na amesiwo wona mɔnukpɔkpɔ siae be woatɔ ɖe egbɔ akpɔe. Nukpɔkpɔa wɔ dɔ ɖe ame aɖewo dzi ale gbegbe be woyi ŋugble me ʋĩ eye aɖatsi nɔ gegem le mo na wo, ke ame bubuwo ya ɖeko wodi be yewoanya nusi wònye. Woka nya ta be amesiwo de ɖakpɔe ade ame miliɔn 2.5.

Nya si biam wonɔ edziedzie nye be: “Nukae nèsusu le ameɖivɔa ŋu?” Le amesi mawusubɔsubɔ me dzodzro doa dzidzɔ na gome la, wɔnaa ʋu mɔnukpɔkpɔ nɛ be wòagbugbɔ ŋku alé ɖe nya la ŋu nyuie, eye wòagbugbɔ axlẽ Biblia ƒe axa siwo ƒo nu tso Yesu ɖiɖi ŋuti.​—Kpɔ aɖaka si le axa si kplɔe ɖo.

Ameɖivɔ la nye aklala si ƒe didime nye sentimeta 436 eye wòkeke sentimeta 110 eye ŋutsu si wobe eku ŋutasẽku la ƒe ameti ƒe nɔnɔme ɖe ɖe eme. Gake nyabiabia lae nye bena, Turin ƒe Ameɖivɔ siae nye esi woxatsa ɖe Yesu ƒe kukua ŋu ƒe alafa 19 kple edzivɔ sɔŋ enye esi va yia?

Ŋutinya me Nudzɔdzɔwo

New Catholic Encyclopedia gblɔ be: “Ðaseɖiɖi aɖeke meli be ameɖivɔ aɖe nɔ anyi le ƒe alafa gbãtɔawo me le Kristotɔwo ŋɔli o.” Le ƒe 544 M.Ŋ. me la, wofɔ ame ƒe nɔnɔme aɖe si ɖe ɖe avɔ dzi si woxɔ se be menye amegbetɔ ƒe asie wotsɔ tae ɖe edzi o le Edessa, afisi egbegbe Turkey le. Wogblɔ be Yesu ƒe moe dze le nɔnɔme sia si ɖe ɖe nua dzi me. Le ƒe 944 M.Ŋ. me la, wogblɔ be Constantinople ye ame ƒe nɔnɔme sia nɔ. Gake ŋutinyaŋlɔla akpa gãtɔ mexɔe se be avɔ sia yɔmee wole fifia be Turim ƒe Ameɖivɔ la o.

Le ƒe alafa 14 lia ƒe gɔmedzedze me le France la, ameɖivɔ aɖe nɔ Geoffroi de Charny si. Le ƒe 1453 me la, eva yi Louis, si nye Savoy ƒe Dziɖula si me, eye eya hã tsɔe ɖade sɔleme aɖe si le Savoy ƒe fiadu Chambéry la me. Emmanuel Philibert tsɔe tso afima le ƒe 1578 me yi Turin.

Nukpɔsusu Vovovowo

Le ƒe 1988 me la, Anastasio Ballestrero si nye Turin ƒe bisiɔpgã ɣemaɣi na wotsɔ ɣeyiɣikɔntabubu mɔnu si woyɔna be radiocarbon ƒe nudodokpɔmɔnu do Turin ƒe Ameɖivɔ la kpɔe be yeanya ƒe si wòxɔ. Dodokpɔa si nudokpɔƒe xɔŋkɔ etɔ̃ siwo le Switzerland, England, kple United States wowɔ la ɖee fia be eli tso Titinaɣeyiɣiwo me, esi fia be ɣeyiɣi didi aɖe le Kristo ƒe ku megbe hafi wova ke ɖe eŋu. Ballestrero lɔ̃ ɖe nusi wokpɔ la dzi, eye wògblɔ le nyatakaka aɖe si wota me be: “Esi míetsɔ nusiawo de asi na dzɔdzɔmeŋutinunyalawo be woalé ŋku ɖe eŋu agblɔ la, sɔlemeha la gagbugbɔ le gbe tem ɖe edzi be yewoatsɔ bubu kple subɔsubɔ ana Kristo ƒe nɔnɔmewɔwɔ sia si dze na subɔsubɔ la, si gakpɔtɔ nye nusi hameviwo ayi edzi atsɔ subɔsubɔ ƒe bubu ana.”

Giovanni Saldarini si nye bisiɔpgã si li fifia gblɔ be: “Míate ŋu agblɔ be Kristo si woɖe tso atitsoga la ŋu ƒe nɔnɔmetata enye nɔnɔmetata sia o.” Gake le ɣeyiɣi ma ke me la, egblɔe kakaɖedzitɔe be: “Ðikeke aɖeke mele eŋu o be xɔsetɔ ate ŋu akpɔ ŋutsu si ŋu Nyanyuigbalẽwo ƒo nu tsoe la ƒe dzedzeme le nɔnɔme ma si ɖe ɖe avɔa dzi me.” Esi wonɔ ameɖivɔa ɖem fia le May 24, 1998, dzi la, Papa John Paul II yɔ avɔa be: “Amesi ƒe ŋutilã wowɔ funyafunyae heklã ɖe ati ŋu la ƒe dzedzeme si wògblẽ ɖi.”

Abe alesi míate ŋu akpɔe ene la, ɖaseɖiɖi sẽŋuwo li be menye Turin ƒe Ameɖivɔ lae wotsɔ ɖi Yesui o. Gake ne eyae wònye hã ɖe? Ðe wòanyo be amesi di be yeawɔ Biblia ƒe nufiafiawo dzi nade subɔsubɔ ƒe bubu avɔ ma ŋua?

Bu se evelia le Se Ewoawo me si gblɔ le Roma Katolikotɔwo ƒe Biblia gɔmeɖeɖe me be, “Mègawɔ nɔnɔmewɔwɔ aɖeke alo nusiwo le dziƒo alo nusiwo le anyigba dzi alo nusiwo le tsi me le anyigba te la ƒe nɔnɔme na ɖokuiwò o. Mègade ta agu na wo o” la ŋu kpɔ. (Mose II, 20:​4, 5, New Jerusalem Bible) Vavãe, nyateƒe Kristotɔwo wɔa apostolo Paulo ƒe nya siwo gblɔ be, “Míezɔna le xɔse me, eye menye le nukpɔkpɔ me o” la dzi.​—Korintotɔwo II, 5:⁠7; Yohanes I, 5:⁠21.

[Aɖaka si le axa 22]

Ameɖivɔ la Kple Nyanyuigbalẽwo me Nuŋlɔɖiwo

Nyanyuigbalẽawo ŋlɔlawo gblɔ be esi Yosef si tso Arimatia ɖe Yesu ƒe kukua le atia ŋu la, etsɔ “aklala, si fu tititi” xatsa ɖe eŋuti. (Mateo 27:​57-61; Marko 15:​42-47; Luka 23:​50-56) Apostolo Yohanes gblɔ kpee be: “Nikodemo . . . hã va, eye wòtsɔ mire kple aloe, anɔ pounde alafa ɖeka nu hetɔtɔ ɖe asi vɛ. Tete wotsɔ Yesu ƒe kuku la, eye woblae ɖe aklala me kple atike ʋeʋẽe la, abe alesi Yudatɔwo wɔna ɖia amee ene.”​—Yohanes 19:​39-⁠42.

Le Yudatɔwo ƒe kɔnu nu la, wolea tsi na ame kuku, emegbe wosia ami kple atike ʋeʋẽwo nɛ. (Mateo 26:​12; Dɔwɔwɔwo 9:​37) Le Sabat ƒe ŋdi me la, Yesu xɔlɔ̃ nyɔnuwo ɖoe be yewoawu eƒe kukua si wotsɔ mlɔ yɔdoa me xoxo la dzadzraɖo nu. Gake esi wotsɔ woƒe ‘atike ʋeʋẽawo yi afima be yewoasi nɛ’ la, womekpɔ Yesu ƒe kukua le yɔdoa me o!​—Marko 16:​1-⁠6; Luka 24:​1-⁠3.

Ema megbe teti esi Petro va eye wòge ɖe yɔdoa me la, nukae wòkpɔ? Eteƒekpɔla Yohanes ka nya ta be: “[Ekpɔ abiblatseawo, NW ] mlɔ afima; eye taku, si wobla ta nɛ la, mele [abiblatseawo, NW ] gbɔ o, ke boŋ woŋe eme ɖo afi bubu.” ( Yohanes 20:​6, 7) De dzesii be womeyɔ aklala o​—abiblatsewo kple taku koe woyɔ. Esi Yohanes ɖoe koŋ yɔ abiblatse kple taku la, ɖe mayɔ aklala, alo ameɖivɔ, ne ɖe wòle afima oa?

Gakpe ɖe eŋu la, bu nusia ŋu kpɔ: Ne ɖe Yesu ƒe dzedzeme ɖe ɖe avɔ si wotsɔ ɖii me la, anye ne amewo made dzesii wòazu nya woanɔ gbɔgblɔm oa? Gake le nya siwo le Nyanyuigbalẽawo me megbe la, womeƒo nu tso ameɖivɔa ŋu kura le Biblia me o.

Amesiwo wobe wonye Kristotɔ agbalẽŋlɔlawo le ƒe alafa etɔ̃lia kple enelia me, siwo dometɔ geɖe ŋlɔ nya gbogbo aɖewo tso nusiwo wobe wonye nukunuwo dzɔ siwo do ƒome kple ame kɔkɔe siwo ku dometɔ geɖe ƒe nuwo ŋu la kura gɔ̃ hã megblɔ be ameɖivɔ aɖeke nɔ anyi si me Yesu ƒe dzedzeme ɖe ɖo o. Màte ŋu ase nya bliboa gɔme o, elabena Yesutɔ agbalẽnyala Herbert Thurston gblɔ be ƒe alafa 15 kple 16 lia me tɔ siwo kpɔ avɔa “gblɔ le nusiwo ɖe ɖe ameɖivɔa me ŋu be afisi woɖe ɖo kple woƒe amadede dze kɔte ale gbegbe be anye nusi wowɔ eteƒe medidi kura o ye wòanye.”

[Nɔnɔmetata Tsoƒe si le axa 21]

David Lees/©Corbis