Ɣeyiɣiwo Kple Azãgbewo Le Yehowa Si Me

“Miawo la mele na mi be, mianya ɣeyiɣi alo azãgbe, siwo Fofo la ɖo le ye ŋutɔ ƒe ŋusẽ nu o.”—DƆWƆWƆWO 1:7.

 1. Aleke Yesu ɖo nya siwo eƒe apostolowo biae ku ɖe ɣeyiɣi ŋu la ŋuti?

NUKAE agasɔ le dzɔdzɔme nu na amesiwo “le hũ ɖem, eye wole nu xam ɖe ŋunyɔnu siwo katã wole wɔwɔm” le Kristodukɔa me kple anyigba katã dzi tsɔ wu be woabia be ɣekaɣie nuɖoanyi vɔ̃ɖi sia awu enu eye Mawu ƒe dzɔdzɔenyenye xexeme yeyea nava xɔ ɖe eteƒe hã? (Xezekiel 9:4; Petro II, 3:13) Yesu ƒe apostolowo bia nyawoe ku ɖe ɣeyiɣi ŋu do ŋgɔ teti na eƒe ku kple esime wòtsi tre vɔ megbe. (Mateo 24:3; Dɔwɔwɔwo 1:6) Gake Yesu megblɔ naneke le eƒe ŋuɖoɖo me si dzi woanɔ te ɖo abu ɣeyiɣi ƒe akɔnta o. Le ŋuɖoɖoa ɖeka me la, ena dzesi ƒokpli vovovo wo, eye egblɔ na wo le bubu me be ‘mele na wo be woanya ɣeyiɣi alo azãgbe siwo Fofo la ɖo le ye ŋutɔ ƒe ŋusẽ nu la o.’—Dɔwɔwɔwo 1:7.

 2. Nukata míate ŋu agblɔ be Yesu menya ɣeyiɣi siwo Fofoa ɖo na nusiwo ava dzɔ le nuwuɣia me xoxoxo o?

² Togbɔ be Yesu nye Yehowa ƒe Tenuvi hã la, eya ŋutɔ hã menyaa Fofoa ƒe ɣeyiɣiɖoɖowɔɖiwo ɣesiaɣi o. Esi Yesu nɔ ŋkeke mamlɛawo ŋu nya gblɔm ɖi la, etsɔ ɖokuibɔbɔ gblɔ be: “Ke le ŋkeke ma kple gaƒoƒo ma ŋuti la, ame aɖeke menyae o; mawudɔla, siwo le dziƒowo, kple Vi la hã menyae o, negbe Fofonye ɖeka ko.” (Mateo 24:36) Yesu lɔ̃ faa be yealala akpɔ ye Fofo sinu vaseɖe esime wòagblɔ ɣeyiɣi si tututu wòatso atsrɔ̃ nuɖoanyi vɔ̃ɖi sia na ye.a

 3. Nukae míate ŋu asrɔ̃ tso ŋuɖoɖo siwo Yesu na le nya siwo wobiae ku ɖe Mawu ƒe tameɖoɖo ŋu me?

³ Míate ŋu afɔ nya eve le alesi Yesu ɖo biabia siwo ku ɖe ɣeyiɣi siwo me nuwo adzɔ wòanye Mawu ƒe tameɖoɖo me vava ŋu me. Gbãtɔe nye be ɣeyiɣi ƒe ɖoɖowɔɖiwo le Yehowa si; eye eveliae nye be, eya ɖeɖekoe ɖoa ɣeyiɣiawo, eye mele be esubɔlawo nakpɔ mɔ be agblɔ ɣeyiɣiawo alo azãgbeawo tututu na yewo do ŋgɔ o.

Yehowa ƒe Ɣeyiɣiwo Kple Azãgbewo

 4. Helagbe me nya siwo gɔme woɖe be “ɣeyiɣi” kple “azãgbe” le Dɔwɔwɔwo 1:7 gɔme ɖe?

⁴ Nukae ‘ɣeyiɣiwo’ kple ‘azãgbewo’ fia? Ɣeyiɣi ƒomevi eve ye dze le Yesu ƒe nya si woŋlɔ ɖe Dɔwɔwɔwo 1:7 me. Helagbe me nya si gɔme woɖe be ‘ɣeyiɣiwo’ fia “ɣeyiɣi ƒe didime,” dometsotso si le ɣeyiɣiwo dome (ate ŋu adidi alo anɔ kpuie). Nya aɖe si fia ɣeyiɣi ɖoɖi, azã gobi aɖe, alo ɣeyiɣi didime aɖe, si me nanewo dzɔna le gɔmee woɖe be “azãgbe.” W. E. Vine gblɔ le gbegbɔgblɔ gbãtɔ si me woɖe nya eve siawo gɔme tsoe ŋu be: “Le Dɔwɔwɔwo 1:7 la, ‘Fofo la ɖo’ ɣeyiɣiawo (chronos), gamewo ƒe didimewo, kple azãgbewo (kairos), siwo nye nudzɔdzɔwo ƒe ɣeyiɣi siwo me nya tɔxɛ aɖewo dzɔna le la ‘le Eya ŋutɔ ƒe ŋusẽ nu.’ ”

 5. Ɣekaɣie Yehowa gblɔ Eƒe tameɖoɖo be yeatsrɔ̃ xexe gblẽkua na Noa, eye dɔ eve kawoe Noa wɔ?

⁵ Do ŋgɔ na Tsiɖɔɖɔa la, Mawu ɖo ƒe 120 ƒe ɣeyiɣi na xexeme gblẽku si amegbetɔwo kple mawudɔla dzeaglã siwo do ŋutilã la he vɛ. (Mose I, 6:1-3) Mawuvɔ̃la Noa xɔ ƒe 480 ɣemaɣi. (Mose I, 7:6) Vi menɔ esi o eye ƒe 20 gava yi hã vi menɔ esi o. (Mose I, 5:32) Ɣeyiɣi didi aɖe megbe, esime Noa viŋutsuwo tsi heɖe srɔ̃ hafi Mawu gblɔ na Noa be Yeaɖe vɔ̃ɖinyenye ɖa le anyigba dzi. (Mose I, 6:9-13, 18) Togbɔ be ɣemaɣi wode dɔ eve asi na Noa be wòakpa aɖakaʋu eye wòaɖe gbeƒã na eŋɔlimetɔwo hã la, Yehowa meɖe eƒe ɣeyiɣi ƒe ɖoɖowɔɖiwo fiae o.—Mose I, 6:14; Petro II, 2:5.

 6. (a) Aleke Noa ɖee fiae be yegblẽ ɣeyiɣiawo ɖe Yehowa si me? (b) Aleke míate ŋu asrɔ̃ Noa ƒe kpɔɖeŋu lae?

⁶ ‘Noa tsɔ ƒe geɖe wɔ nusiwo katã ƒe se Mawu de nɛ’—eye ɖewohĩ ade ƒe blaatɔ̃ gɔ̃ hã. Noa wɔe “le xɔse me,” menya ɣeyiɣi gobi aɖeke o. (Mose I, 6:22; Hebritɔwo 11:7) Yehowa megblɔ ɣeyiɣi si tututu dzi nuwo adzɔ nɛ o vaseɖe esime wòsusɔ kwasiɖa ɖeka na Tsiɖɔɖɔa hafi. (Mose I, 7:1-5) Alesi Noa ka ɖe Yehowa dzi hexɔ edzi se bliboe wɔe be egblẽ ɣeyiɣiawo ɖe Mawu si me. Eye aleke gbegbe Noa ada akpee nye si esime wòkpɔe le Tsiɖɔɖɔa ƒe ɣeyiɣi me be Yehowa kpɔ ye ta kple emegbe esime wòdo go le aɖakaʋua me ɖo afɔ anyigba si ŋu wokɔ dzi! Esi míele mɔ kpɔm na ɖeɖekpɔkpɔ ma ƒomevi la, ɖe mele be míaxɔ Mawu dzi ase oa?

7, 8. (a) Aleke dukɔwo kple xexemeŋusẽwo wɔ va dzɔ? (b) Mɔ ka nue Yehowa ‘ɖo azãgbewo kple amewo ƒe nɔƒewo ƒe liƒowo da ɖi’ le?

⁷ Le Tsiɖɔɖɔa megbe la, Noa ƒe dzidzimevi akpa gãtɔ gbe Yehowa ƒe tadedeagu vavãtɔ. Esi wodi be yewoatsi teƒe ɖeka ta la, wote dutsotso kple xɔ tsrala aɖe tutu hena alakpasubɔsubɔ. Yehowa kpɔe be ɣeyiɣia de be yeade nu eme. Etɔtɔ woƒe gbe eye “wokaka tso [Babel] ɖe anyigba blibo la katã dzi.” (Mose I, 11:4, 8, 9) Emegbe gbe vovovoawo dolawo ƒo ƒu zu dukɔwo, eye wo dometɔ aɖewo xɔ dukɔ bubuwo kpe wo ɖokui hezu dukɔ gã sẽŋuwo, kple xexemeŋusẽwo gɔ̃ hã.—Mose I, 10:32.

⁸ Ɣeaɖewoɣi bene Mawu ƒe tameɖoɖowo nava eme la, eɖoa dukɔwo ƒe liƒowo kple ɣeyiɣi si me dukɔ aɖe akpɔ ŋusẽ le eƒe nutome loo alo azu xexemeŋusẽ. (Mose I, 15:13, 14, 18-21; Mose II, 23:31; Mose V, 2:17-22; Daniel 8:5-7, 20, 21) Apostolo Paulo ƒo nu tso Yehowa ƒe ɣeyiɣiwo kple azãgbewo ƒe akpa sia ŋu esime wògblɔ na Hela-gbalẽnyalawo le Atene be: “Mawu, si wɔ xexeame kple nusiwo katã le eme la, . . . [wɔ] bena, amewo ƒe dukɔ sia dukɔ tso ʋu ɖeka me le anyigba la ƒe ŋku me; eye wòɖo azãgbewo kple woƒe nɔƒe ƒe liƒowo da ɖi.”—Dɔwɔwɔwo 17:24, 26.

 9. Aleke Yehowa ‘ɖɔa li ɣeyiɣiwo kple azãgbewo’ le fiawo gomee?

⁹ Nya sia mefia be Yehowae nana be dunyahela aɖewo kpɔa dziɖuɖu eye nuwo trɔna le dukɔwo me o. Gake ne elɔ̃ la, ate ŋu ade nu nyawo me bene yeƒe tameɖoɖo nava eme. Eyata Daniel, amesi ava kpɔ eteƒe woamu Babilonia Xexemeŋusẽa eye Medo-Persia nava xɔ ɖe eteƒe la, gblɔ le Yehowa ŋu be: “Eyae ɖɔa li ɣeyiɣiwo kple azãgbewo, eɖea fiawo le zi dzi, eye wòɖoa fiawo zi dzi, enaa nunya nunyalawo kple sidzedze nugɔmeselawo.”—Daniel 2:21; Yesaya 44:24–45:7.

‘Ɣeyiɣia Nɔ Ðoɖom’

10, 11. (a) Ɣeyiɣi didi kae wònye tso esime Yehowa ɖo ɣeyiɣi si wòava ɖe Abraham ƒe dzidzimeviwo tso kluvinyenye me? (b) Nukae fia be Israel-viwo menya ɣeyiɣi si tututu dzi woaɖe wo o?

¹⁰ Ƒe alafa ene kple edzivɔ do ŋgɔ la, Yehowa ɖo ƒe si tututu me wòado ŋukpe Egipte Xexemeŋusẽa ƒe fia aɖe Abraham ƒe dzidzimeviwo tso kluvinyenye me. Esi Mawu nɔ eƒe tameɖoɖo ɖem fia Abraham la, edo ŋugbe be: “Nyae, naganyae bena, wò dzidzimeviwo anye amedzrowo le anyigba aɖe, si menye wo tɔ o la dzi, eye woasubɔ anyigba ma dzi tɔwo, eye woamawo ate wo ɖe anyi ƒe alafa ene sɔŋ. Gake hã mava wɔ fu dukɔ, si subɔm wole la, eye le esia megbe la woatsɔ kesinɔnu geɖewo adzoe.” (Mose I, 15:13, 14) Esime Stefano nɔ Israel ƒe ŋutinya gblɔm kpuie le Sanhedrin la ŋkume la, eƒo nu tso ƒe 400 ɣeyiɣi ma ŋu eye wògblɔ be: “Esi ŋugbedodo ƒe ɣeyiɣi, si dzi Mawu kã ɖo na Abraham ɖo la, dukɔ la dzi, eye wosɔ gbɔ le Egipte, vaseɖe esime fia bubu tsi tre le Egipte, amesi menya Yosef o.”—Dɔwɔwɔwo 7:6, 17, 18.

¹¹ Farao yeye sia wɔ Israel-viwo kluviwoe. Womeŋlɔ Mose ƒe Agbalẽ Gbãtɔa ɣemaɣi haɖe o, togbɔ be anɔ eme be dzidzimewo gblɔ ŋugbe siwo Yehowa do na Abraham la na wo megbeviwo loo alo woŋlɔe ɖi hã. Togbɔ be ele alea hã la, edze abe nyatakaka siwo nɔ Israel-viwo si la mesu ana woabu woƒe ɖeɖe tso teteɖeanyi me ƒe ɣeyiɣikɔnta o ene. Mawu nya ɣeyiɣi si wòaɖe wo, gake megblɔe na Israel-vi siwo nɔ fu kpem la o. Míexlẽ be: “Esi eteƒe va didi la, Egipte-fia ku. Eye Israel-viwo fa konyi le woƒe dɔ sesẽ la ŋu, eye wodo ɣli. Eye woƒe ɣli, si wodo, be woavo tso woƒe dɔ sesẽa me la, de Mawu gbɔ. Eye Mawu se woƒe konyifafa, eye wòɖo ŋku nu, si wòbla kple Abraham, Isak kple Yakob la dzi. Eye Mawu kpɔ Israel-viwo ƒe nublanui, eye wòve wo nu.”—Mose II, 2:23-25.

12. Aleke Stefano ɖee fiae be Mose tso do ŋgɔ na Yehowa ƒe ɣeyiɣi?

¹² Míate ŋu akpɔe le Stefano ƒe ŋutinya kpui la hã me be Israel-viwo menya woƒe ɖeɣi o. Esi wònɔ Mose ƒe nya gblɔm la, egblɔ be: “Esi wòxɔ ƒe blane la, eɖo tame be, yeaɖakpɔ nɔvia Israel-viwo ɖa. Eye esi wòkpɔ be, wole nu madzɔmadzɔ wɔm ɖe wo dometɔ ɖeka ŋu la, exɔ nɛ, eye wòdo hlɔ̃ ɖe akɔ na amesi wote ɖe anyi, esi wòwu Egiptetɔ la; eye wòbu xa bena, nɔviawo ase egɔme bena, Mawu ato yeƒe asi dzi ana ɖeɖe wo; ke womese egɔme o.” (Dɔwɔwɔwo 7:23-25, míawoe te gbe ɖe edzi.) Mose tso ƒe 40 do ŋgɔ na Mawu ƒe ɣeyiɣi. Stefano ɖee fia be ehiã be Mose nagalala ƒe 40 bubu hafi Mawu ‘va ɖe Israel-viwo to eƒe asi dzi.’—Dɔwɔwɔwo 7:30-36.

13. Aleke nɔnɔme si me míele ɖi Israel-viwo tɔ do ŋgɔ na woƒe ɖeɖe tso Egipte?

¹³ Togbɔ be ‘ŋugbedodoa me vaɣi nɔ ɖoɖom’ eye Mawu ɖo ƒe si tututu wònye hã la, ele be Mose kple Israel bliboa katã naɖe xɔse afia. Ele be woalala Yehowa ƒe ɣeyiɣi ɖoɖia nava, eye edze abe womate ŋu abu eŋuti kɔnta anya do ŋgɔ o ene. Míawo hã míeka ɖe edzi be míaƒe ɖeɖe tso nuɖoanyi vɔ̃ɖi sia me gogo. Míenya be míele ‘ŋkeke mamlɛawo’ me. (Timoteo II, 3:1-5) Eyata ɖe mele be míalɔ̃ aɖe xɔse afia eye míalala ŋkeke si Yehowa ɖo na eƒe ŋkeke gã la oa? (Petro II, 3:11-13) Ekema asɔ be míawo hã míadzi ɖeɖeha nyui aɖe atsɔ akafu Yehowa abe alesi Mose kple Israel-viwo dzii ene.—Mose II, 15:1-19.

“Esi Azãgbe la Ðo”

14, 15. Aleke míewɔ nya be Mawu ɖo ɣeyiɣi si me Via ava anyigba dzi, eye nukae nyagblɔɖilawo kple mawudɔlawo nɔ ŋudzɔ be yewoakpɔ?

¹⁴ Yehowa tia ɣeyiɣi ɖoɖi aɖe si dzi eƒe Tenuvi la ava anyigba dzi anye Mesia. Paulo ŋlɔ be: “Esi azãgbe la ɖo vɔ la, Mawu dɔ ye ŋutɔ Via ɖo ɖa, eye nyɔnu aɖe dzii, eye wodzii ɖe se la te.” (Galatiatɔwo 4:4) Esia nye ŋugbe si Mawu do be yeaɖo Dzidzimevi—si nye ‘Silo, amesi dukɔwo ana tae’—ɖa la ƒe emevava.—Mose I, 3:15; 49:10.

¹⁵ Mawu ƒe nyagblɔɖilawo—kple mawudɔlawo gɔ̃ hã—nɔ ŋudzɔ be yewoadze si “azãgbe” si dzi Mesia la ado ɖe anyigba dzi bene ameƒomea siwo nye nuvɔ̃mewo nate ŋu akpɔ ɖeɖe. Petro gblɔ be: “Ðeɖe sia yome mɔ nyagblɔɖila, siwo gblɔ nya ɖi le amenuveve, si le mia dzi va ge ŋuti la, di vevie, eye wodzro eme kpɔ tsitotsito; wodzro azãgbe kple azãgbe, si ƒomevi Kristo ƒe Gbɔgbɔ, si le wo me la, laɖe afia la me kpɔ, esime wòɖi ɖase tsã le fukpekpe, siwo le Kristo dzi va ge, kple ŋutikɔkɔe, si le wo yome dze ge la ŋuti. . . . Nusiwo me kpɔkpɔ dzro mawudɔlawo hã.”—Petro I, 1:1-5, 10-12.

16, 17. (a) Nyagblɔɖi ka dzie Yehowa to kpe ɖe ƒe alafa gbãtɔ me Yudatɔwo ŋu be woatsɔ akpɔ mɔ na Mesia la? (b) Aleke Daniel ƒe nyagblɔɖia na Yudatɔwo nɔ mɔkpɔkpɔ me na Mesia la?

¹⁶ Yehowa gblɔ nya aɖe si ku ɖe “kwasiɖa blaadre” ŋu ɖi to eƒe nyagblɔɖila Daniel—amesi si xɔse sesẽ le—dzi. Nyagblɔɖi ma akpe ɖe ƒe alafa gbãtɔ me Yudatɔwo ŋu be woanya be Mesia si ƒe ŋugbe wodo la ƒe vavaɣi ɖo. Nyagblɔɖia ƒe akpa aɖe gblɔ be: “Tso ɣeyiɣi, si wode se be, woagatso Yerusalem vaseɖe amegã [Mesia], si wosi ami na dzi la, le kwasiɖa adre; [kpakple] kwasiɖa blaade vɔ eve.” (Daniel 9:24, 25) Yuda, Katoliko, kple Protestant gbalẽnyalawo katã kloe lɔ̃ ɖe edzi be “kwasiɖa” siwo woyɔ le afisia nye ƒewo ƒe kwasiɖawo. Daniel 9:25 ƒe “kwasiɖa” 69 (ƒe 483) dze egɔme le ƒe 455 D.M.Ŋ. me, esime Persia Fia Artaxsasta na ŋusẽ Nexemya be “woagatso Yerusalem.” (Nexemya 2:1-8) Wowu enu le ƒe 483 megbe—le ƒe 29 M.Ŋ. me, esime wonyrɔ Yesu eye wotsɔ gbɔgbɔ kɔkɔe si ami nɛ wòzu Mesia, alo Kristo.—Mateo 3:13-17.

¹⁷ Míenya nenye be ƒe alafa gbãtɔ me Yudatɔwo nya ɣeyiɣi si tututu ƒe 483 la dze egɔme ya o. Gake esime Yohanes Amenyrɔɖetsimela la dze eƒe subɔsubɔdɔ gɔme la, “dukɔ la [nɔ] mɔkpɔkpɔ me, eye wo katã [wonɔ] ɖi kem le woƒe dzi me le Yohanes ŋuti be, ɖewo mahĩ eyae nye Kristo la.” (Luka 3:15) Biblia-nyala aɖewo gblɔ be Daniel ƒe nyagblɔɖiae na wonɔ mɔ kpɔm alea. Esi Matthew Henry nɔ nu ƒom tso kpukpui sia ŋu la, eŋlɔ be: “Míekpɔe le afisia . . . be dukɔa nɔ te ɖe Yohanes ƒe subɔsubɔdɔ kple nyɔnyrɔnana dzi dze tamebubu le Mesia la ŋu gɔme eye woƒe susu gblɔ na wo be eƒe vavaɣi ɖo vɔ. . . . Daniel ƒe kwasiɖa blaadreawo nɔ vɔvɔm azɔ.” Fransegbe me Manuel Biblique, si Vigouroux, Bacuez, kple Brassac ŋlɔ la gblɔ be: “Amewo nya be ƒewo ƒe kwasiɖa siwo Daniel gblɔ la nɔ enu wum; mewɔ nuku na ame aɖeke esime Yohanes Amenyrɔɖetsimela ɖe gbeƒãe be Mawu ƒe fiaɖuƒea ɖo vɔ o.” Yudatɔ agbalẽnyalagã Abba Hillel Silver ŋlɔ be le ɣemaɣi ƒe “ɣeyiɣikɔntabubu nyanyɛ” nu la, “wonɔ mɔ kpɔm na Mesia la le ƒe alafa gbãtɔ M.Ŋ. ƒe ƒe blaeve vɔ atɔ̃ vaseɖe ƒe blaatɔ̃ dome.”

Nudzɔdzɔwoe—Menye Ɣeyiɣikɔntabubuwo O

18. Togbɔ be Daniel ƒe nyagblɔɖia kpe ɖe Yudatɔwo ŋu wonya ɣeyiɣi si me woakpɔ mɔ be Mesia la nava hã la, nukae ɖo kpe Yesu ƒe Mesianyenye dzi wu?

¹⁸ Togbɔ be edze abe ɣeyiɣikɔntabubu kpe ɖe Yudatɔwo ŋu be wonya ɣeyiɣi gbadzaa si me Mesia la ado ene hã la, nusiwo va dzɔ emegbe ɖee fia be mewɔe be wo dometɔ akpa gãtɔ xɔe se be Yesue nye Mesia la o. Esi megade ƒe ɖeka o hafi Yesu naku la, ebia eƒe nusrɔ̃lawo se be: “Ameka amehawo gblɔna bena, menye mahã? Eye woɖo ŋu gblɔ bena: Yohanes [Amenyrɔɖetsimelae], ke bubuwo bena: Eliya, eye ame bubuwo bena: Blema nyagblɔɖila aɖe gatsi tre.” (Luka 9:18, 19) Nuŋlɔɖi aɖeke mele mía si si fia be Yesu yɔ nya tso kpɔɖeŋukwasiɖaawo ƒe nyagblɔɖia me tsɔ ɖo kpe edzi be yee nye Mesia la o. Gake egblɔ ɣeaɖeɣi be: “Nye la mexɔ ɖaseɖiɖi, si lolo wu Yohanes tɔ; elabena dɔwɔwɔ, siwo Fofo la nam, bena mawu wo nu la, dɔwɔwɔ ma, siwo ke wɔm mele la, le ɖase ɖim le ŋutinye bena, Fofo lae dɔm ɖa.” (Yohanes 5:36) Le esi teƒe be ɣeyiɣikɔntabubu aɖe si woɖe fia naɖi ɖase be Yesue nye Mesia si Mawu dɔ ɖa la, eƒe gbeƒãɖeɖe, eƒe nukunuwo, kple nusiwo dzɔ le eƒe kuɣi (zãdokeli nukutɔe, gbedoxɔ me xɔmetsovɔ la ƒe mamã ɖe eve, kple anyigbaʋuʋu) boŋue ɖi ɖase le eŋuti.—Mateo 27:45, 51, 54; Yohanes 7:31; Dɔwɔwɔwo 2:22.

19. (a) Aleke Kristotɔwo awɔ anya be Yerusalem ƒe tsɔtsrɔ̃ tu aƒe? (b) Nukatae xɔse sesẽ gahiã Kristotɔ gbãtɔ siwo si do go le Yerusalem la kokoko?

¹⁹ Nenema ke esi Yesu ku vɔ la, womena naneke Kristotɔ gbãtɔwo si akpe ɖe wo ŋu be woabu Yudatɔwo ƒe nuɖoanyia ƒe nuwuwu si nɔ ŋgɔ ƒe ɣeyiɣikɔnta o. Ele eme be Daniel ƒe kpɔɖeŋukwasiɖaawo ƒe nyagblɔɖia gblɔ nuɖoanyi ma ƒe tsɔtsrɔ̃ ɖi ya. (Daniel 9:26b, 27b) Gake nusia adzɔ le ‘kwasiɖa blaadreawo’ ƒe nuwuwu (ƒe 455 D.M.Ŋ.–36 M.Ŋ.). Alo míagblɔe be esi Trɔ̃subɔdukɔwo me tɔwo va zu Yesu yomedzelawo le ƒe 36 M.Ŋ. me vɔ la, Kristotɔwo to Daniel ta 9 ƒe ɣeyiɣikɔntabubua ƒe nyawo dzɔɣi ŋu. Le woawo gome la, menye ɣeyiɣikɔntabubue afia wo be Yudatɔwo ƒe nuɖoanyia awu enu kpuie o, ke nudzɔdzɔwo boŋue. Nudzɔdzɔ mawo siwo Yesu gblɔ ɖi la dze emevava gɔme tso ƒe 66 M.Ŋ. me, esime Roma-ʋakɔwo ho ɖe Yerusalem ŋu gake gatrɔ dzo. Esia na Kristotɔ nuteƒewɔla toɖola siwo nɔ Yerusalem kple Yudea kpɔ mɔnu ‘si yi towo dzi.’ (Luka 21:20-22) Esi ɣeyiɣikɔntabubu si afia nusiwo adzɔ la menɔ Kristotɔ gbãtɔawo si o ta la, womenya ɣekaɣi Yerusalem atsrɔ̃ o. Ebia xɔse sesẽ ŋutɔ le wo gome be woagblẽ woƒe aƒewo, agblewo, kple dɔwɔƒewo ɖi eye woanɔ adzɔge tso Yerusalem abe ƒe ene sɔŋ ene vaseɖe esime Roma-ʋakɔwo gatrɔ gbɔ le ƒe 70 M.Ŋ. me va tsrɔ̃ Yudatɔwo ƒe nuɖoanyia!—Luka 19:41-44.

20. (a) Viɖe kae míate ŋu akpɔ tso Noa, Mose, kple ƒe alafa gbãtɔ me Kristotɔ siwo nɔ Yudea ƒe kpɔɖeŋu me? (b) Nuka mee míava dzro le nyati si kplɔe ɖo me?

²⁰ Kakaɖedzitɔe la, mí amesiwo li egbea míate ŋu agblẽ ɣeyiɣiawo kple azãgbewo ɖe Yehowa si me abe alesi Noa, Mose, kple ƒe alafa gbãtɔ me Kristotɔ siwo nɔ Yudea wɔe ene. Agbemenya ŋutɔŋutɔ siwo le dzɔdzɔm wònye Biblia ƒe nyagblɔɖiwo me vavae na míeka ɖe edzi be míele nuwuɣia me eye be míaƒe ɖeɖe gogo, ke menye ɣeyiɣikɔntabubu dzro aɖe koe o. Gakpe ɖe eŋu la, togbɔ be míele Kristo ƒe anyinɔɣia me hã la, mefia be megahiã be míanɔ xɔse ɖem fia ahanɔ ŋudzɔ o. Ele be míayi edzi anɔ mɔ kpɔm vevie na nudzɔdzɔ ʋãdziname siwo wogblɔ ɖi le Ŋɔŋlɔawo me. Nusia mee míadzro le nyati si kplɔe ɖo me.

[Etenuŋɔŋlɔ]

Numetoto

◻ Nukae Yesu gblɔ na eƒe apostolowo le Yehowa ƒe ɣeyiɣiwo kple azãgbewo ŋu?

◻ Ɣeyiɣi didi kae Noa nya Tsiɖɔɖɔa ƒe ɣeyiɣi da ɖi?

◻ Nukae fia be Mose kple Israel-viwo menya ɣeyiɣi si tututu woava ɖe wo tso Egipte o?

◻ Vi kawoe Biblia me kpɔɖeŋu siwo ku ɖe Yehowa ƒe ɣeyiɣiwo kple azãgbewo ŋu aɖe na mí?

[Nɔnɔmetata si le axa 11]

Noa ƒe xɔse na wògblẽ ɣeyiɣiwo ɖe Yehowa si me