“Mibia Yehowa Kple Eƒe Ŋusẽ Ta Se”

“Yehowa ƒe ŋku kpɔa anyigba blibo la dzi, eye wòdoa ŋusẽ amesiwo ku ɖe eŋu kple woƒe dzi blibo.”—KRONIKA II, 16:9.

 1. Nukae nye ŋusẽ, eye aleke amegbetɔwo zãe?

ŊUSẼ ate ŋu afia nu geɖe, siwo ƒe ɖewo ate ŋu anye gbeɖeɖe na amewo, aƒetɔɖuɖu ɖe wo dzi, alo ŋusẽkpɔkpɔ ɖe wo dzi; ate ŋu afia nuwɔŋutete alo afɔɖeɖe si me nane ado tso; ete ŋu nyea ŋutilãmeŋusẽ (alɔkame sesẽ); alo tagbɔɖaɖɛ alo agbenyuinɔnɔ ŋutete. Ŋutinya nyui aɖeke mele amegbetɔwo ŋu le ŋusẽzazã gome o. Esi Aƒetɔ Acton, si nye ŋutinyaŋlɔla, nɔ nu ƒom tso dunyahelawo ƒe ŋusẽzazã ŋu la, egblɔ be: “Ŋusẽ gblẽa ame dome eye ŋusẽkpɔkpɔ ɖe nusianu dzi ɖe wògblẽa ame dome kura.” Kpɔɖeŋuwo bɔ ɖe egbegbe ŋutinya me siwo fia be Aƒetɔ Acton ƒe nyawo nye nyateƒe le go geɖe me. ‘Amegbetɔ ɖu fia ɖe ame bubuwo dzi hena woƒe dzɔgbevɔ̃e’ le ƒe alafa 20 lia me wu ɣeyiɣi ɖesiaɖe siwo do ŋgɔ. (Nyagblɔla 8:9) Akpasesẽdziɖula gblẽkuwo zã woƒe ŋusẽ yakayaka ŋutɔ eye wona ame miliɔn geɖe ku. Ŋusẽnɔamesi si ŋu wometsɔ lɔlɔ̃, nunya, kple dzɔdzɔenyenye kpe ɖo o la, ɖe wòvɔ̃ɖi.

 2. Ðe alesi mawumenɔnɔme bubuwo kpɔa ŋusẽ ɖe alesi Yehowa zãa eƒe ŋusẽe dzi me.

² To vovo na amegbetɔwo la, Mawu ya zãa eƒe ŋusẽ wòɖea vi ɣesiaɣi. “Yehowa ƒe ŋku kpɔa anyigba blibo la dzi, eye wòdoa ŋusẽ amesiwo ku ɖe eŋu kple woƒe dzi blibo.” (Kronika II, 16:9) Yehowa ɖua eɖokui dzi le ŋusẽzazã me. Dzigbɔɖie na Mawu ɖo asi ame vɔ̃ɖiwo tsɔtsrɔ̃ dzi be yeana mɔnukpɔkpɔ wo bene woatrɔ dzime. Lɔlɔ̃ ʋãe wònaa ɣe klẽna ɖe ame ƒomeviwo katã dzi—ame dzɔdzɔewo kple ame vɔ̃ɖiwo siaa. Dzɔdzɔenyenye aʋãe mlɔeba wòazã eƒe ŋusẽ si seɖoƒe meli na o la atsɔ atsrɔ̃ Satana Abosam, amewula la.—Mateo 5:44, 45; Hebritɔwo 2:14; Petro II, 3:9.

 3. Nukatae Mawu ƒe ŋusẽ si ƒo ɖesiaɖe ta nye susu si ta míaɖo ŋu ɖe eŋu?

³ Alesi ŋusẽ triakɔ le míaƒe Dziƒofofoa si la nye susu si ta wòle be míaka ɖe edzi ahaɖo ŋu ɖe eŋu—le eƒe ŋugbedodowo kple ametakpɔkpɔ siaa gome. Ne ɖevi ku ɖe fofoa ƒe asi ŋu goŋgoŋ la, esenɛ le eɖokui me be yele dedie, elabena enya be ye fofo mana vɔ̃ aɖeke natu ye o. Nenema ke mía Fofo si le dziƒo, amesi ‘si xɔnameŋusẽ geɖe le,’ akpɔ mía ta tso vɔ̃ ɖesiaɖe me ne míezɔ kplii. (Yesaya 63:1; Mixa 6:8) Eye esi Yehowa nye Fofo nyui ta la, ewɔa eƒe ŋugbedodowo dzi ɣesiaɣi. Eƒe ŋusẽ si seɖoƒe meli na o la nye kpeɖodzi be eƒe ‘nya ava eme eye wòawɔ nusi gbe wòɖoe ɖo.’—Yesaya 55:11; Tito 1:2.

 4, 5. (a) Nukae dzɔ esi Fia Asa ɖo ŋu ɖe Yehowa ŋu bliboe? (b) Nukae ate ŋu adzɔ ne míeɖo ŋu ɖe amegbetɔwo ƒe nyagbɔkpɔnuwo ŋu?

⁴ Nukatae wòle vevie nenema gbegbe be míaɖoe kplikpaa be míagaŋlɔ mía Fofo si le dziƒo ƒe ametakpɔkpɔ be o? Elabena ele bɔbɔe be míaŋlɔ amesi tututu nye míaƒe xɔnametɔ be ne nɔnɔmewo ɖe kpe na mí ʋuu wòglo mí. Nya sia dze le Fia Asa si ɖo ŋu ɖe Yehowa ŋu le go geɖe me la gome. Etiopia-ʋakɔ si me asrafo sesẽ miliɔn ɖeka nɔ la ho ɖe Yuda ŋu le Asa ƒe dziɖuɣi. Esi Asa dze sii be nu de yeƒe futɔwo dzi le aʋawɔŋutete gome la, edo gbe ɖa be: “Yehowa, ame aɖeke meli kpe ɖe ŋuwò, si axɔ na ame le ame kako kple ame beli ƒe aʋawɔwɔ me o. Yehowa, mía Mawu, xɔ na mí, elabena wòe míede mee, eye le wò ŋkɔ me míeho aʋa ɖe ame gbogbo siawo ŋu; Yehowa, wòe nye mía Mawu, eye amegbetɔ aɖeke mate ŋu axe mɔ na wò o.” (Kronika II, 14:10) Yehowa wɔ nusi Asa bia la nɛ eye wòna wòɖu futɔawo dzi gbidigbidi.

⁵ Gake le subɔsubɔ nuteƒewɔwɔtɔe ƒe geɖe megbe la, Asa megava nɔ ŋu ɖom ɖe Yehowa ƒe xɔnameŋusẽ ŋu tututu o. Etrɔ ɖe Aram (Siria) ŋu be wòakpe ɖe ye ŋu yeagblẽ nugbe si Israel ƒe dziehe fiaɖuƒe nɔ ɖoɖom me. (Kronika II, 16:1-3) Togbɔ be zãnu si Asa na Siria Fia Ben-Hadad ɖe ŋɔdzi si Israel nye na Yuda ɖa hã la, nu si wòbla kple Siria ɖe alesi meɖo ŋu ɖe Yehowa ŋu o fia. Nyagblɔɖila Xanani biae kãŋ be: “ɖe [Etiopiatɔwo kple Libiatɔwo] menye aʋakɔ gã aɖe hekpe ɖe tasiaɖamwo kple sɔdolawo ŋu kpaŋkpaŋ oa? Ke esi nède me Yehowa la, ɖe [metsɔ] wo de asi na wò oa?” (Kronika II, 16:7, 8) Ke hã Asa gbe mokaname sia. (Kronika II, 16:9-12) Ne míedze ŋgɔ kuxiwo la, migana míaɖo ŋu ɖe amegbetɔwo ƒe nyagbɔkpɔnuwo ŋu o. Ke boŋ mina míaɖo ŋu ɖe Mawu ŋu, elabena ŋuɖoɖo ɖe amegbetɔwo ƒe ŋusẽ ŋu ɖe wòna wotsia yame.—Psalmo 146:3-5.

Kpɔ Mɔ na Ŋusẽ si Yehowa Nana

 6. Nukatae wòle be ‘míabia Yehowa kple eƒe ŋusẽ ta se’?

⁶ Yehowa ate ŋu ado ŋusẽ esubɔlawo ahakpɔ wo ta. Biblia de dzi ƒo na mí be ‘míabia Yehowa kple eƒe ŋusẽ ta se.’ (Psalmo 105:4) Nukatae? Elabena ne míewɔ nuwo le Mawu ƒe ŋusẽ me la, míawɔ míaƒe ŋusẽ ŋudɔ wòaɖe vi na amewo tsɔ wu be wòagblẽ nu le wo ŋu. Esia ƒe kpɔɖeŋu si nyo wu megale afi aɖeke míakpɔ tsɔ wu Yesu Kristo, amesi wɔ nukunuwo le ‘Yehowa ƒe ŋusẽ’ me tɔ o. (Luka 5:17) Yesu ate ŋu avu ɖe kesinɔtɔ zuzu, ŋkɔxɔxɔ, alo fia ŋusẽkatãtɔ zuzu ŋu hafi. (Luka 4:5-7) Gake ezã ŋusẽ si Mawu nae la tsɔ na hehe amewo hefia nu wo, etsɔe kpe ɖe amewo ŋu heda gbe le wo ŋu boŋ. (Marko 7:37; Yohanes 7:46) Kpɔɖeŋu nyui ka gbegbee nye si wònye na mí!

 7. Nɔnɔme vevi kae míatu ɖo ne míewɔa nu le Mawu ƒe ŋusẽ me tsɔ wu mía ŋutɔwo míaƒe ŋusẽ me?

⁷ Gakpe ɖe eŋu la, ne míewɔa nu le “ŋusẽ, si Mawu [nana]” me la, akpe ɖe mía ŋu be míabɔbɔ mía ɖokui. (Petro I, 4:11) Amesiwo dia ŋusẽnɔƒewo na wo ɖokui la va zua dadalawo. Kpɔɖeŋu ɖekae nye Asiria Fia Esar-Xadon si ƒo adegbe be: “Ŋusẽtɔe menye, ŋusẽkatãtɔe menye, kalẽtɔe menye, medzɔ atsu, metri akɔ.” Gake Yehowa ya “tia xexeame gbɔdzɔgbɔdzɔnuwo, bene wòado ŋukpe nu sesẽwo.” Eyata ne Kristotɔ vavã aƒo adegbe la, aƒoe le Yehowa me, elabena enya be nusi yewɔ la metso ye ŋutɔ yeƒe ŋusẽ me o. ‘Ne míebɔbɔ mía ɖokui ɖe Mawu ƒe asi sesẽ la te’ la, woado mí ɖe dzi le gɔmesese vavãtɔ nu.—Korintotɔwo I, 1:26-31; Petro I, 5:6.

 8. Nukae wòle be míawɔ gbã hafi Yehowa nado ŋusẽ mí?

⁸ Aleke míawɔ axɔ ŋusẽ tso Mawu gbɔ? Gbã la, ele be míabiae le gbedodoɖa me. Yesu ka ɖe edzi na eƒe nusrɔ̃lawo be ye Fofo ana gbɔgbɔ kɔkɔea amesiwo bianɛ. (Luka 11:10-13) De ŋugble le alesi ŋusẽ ɖo Kristo ƒe nusrɔ̃lawo ŋu esime woɖoe be yewoaɖo to Mawu wu subɔsubɔhakplɔla siwo de se na wo be woadzudzɔ ɖaseɖiɖi tso Yesu ŋuti la ŋu kpɔ. Esi wodo gbe ɖa bia Yehowa ƒe kpekpeɖeŋu la, woɖo gbe si wodo ɖa tso dzime ŋu na wo, eye gbɔgbɔ kɔkɔea do ŋusẽ wo be woyi edzi tsɔ dzinɔameƒo ɖe gbeƒã nyanyuia.—Dɔwɔwɔwo 4:19, 20, 29-31, 33.

 9. Gblɔ teƒe evelia si míakpɔ gbɔgbɔmeŋusẽ tsoe, eye nàgblɔ Ŋɔŋlɔawo me kpɔɖeŋu ɖeka si fia alesi wòwɔa dɔe.

⁹ Evelia, míate ŋu axɔ gbɔgbɔmeŋusẽ tso Biblia me. (Hebritɔwo 4:12) Ŋusẽ si le Mawu ƒe Nya la ŋu dze le Fia Yosiya ŋɔli. Togbɔ be Yuda fia sia ɖe legbawo ɖa le dukɔa me xoxo hã la, Yehowa ƒe Se si wofɔ le gbedoxɔa me ʋãe be wòyi edzi wɔ nu geɖe tsɔ kɔ dukɔa ŋui.a Esi Yosiya ŋutɔ xlẽ Sea na ameawo vɔ la, dukɔ bliboa bla nu kple Yehowa, eye wogatsɔ dzonɔameme si nu sẽ wu la ho ɖe trɔ̃subɔsubɔ ŋu zi evelia. Nu nyui si do tso Yosiya ƒe ɖɔɖɔɖodɔa mee nye be ‘womete ɖa le Yehowa ŋu le eƒe agbenɔɣi katã o.’—Kronika II, 34:33.

10. Mɔ etɔ̃lia ka dzie míate ŋu ato axɔ ŋusẽ tso Yehowa gbɔ, eye nukata nusia le vevie ŋutɔ?

¹⁰ Mɔ etɔ̃lia si dzi míato axɔ ŋusẽ tso Yehowa gbɔe nye be míade ha kple Kristotɔwo. Paulo de dzi ƒo na Kristotɔwo be woade kpekpewo ɣesiaɣi bene ‘woate ŋu ade dzo wo nɔewo me na lɔlɔ̃ kple dɔ nyuiwo wɔwɔ’ eye be woade dzi ƒo na wo nɔewo. (Hebritɔwo 10:24, 25) Esi woɖe ga Petro nukutɔe la, edzroe be yeanɔ ye nɔviwo dome, eyata eyi Yohanes, si woyɔna be Marko dada ƒeme, afisi “ame geɖewo ƒo ƒu ɖo hele gbe dom ɖa.” (Dɔwɔwɔwo 12:12) Le nyateƒe me la, wo katã woate ŋu anɔ woƒe aƒewo me ado gbea ɖa hafi. Gake wotiae be yewoaƒo ƒu ado gbe ɖa ahade dzi ƒo na yewo nɔewo le ɣeyiɣi sesẽ ma me. Le Paulo ƒe mɔ legbee si me afɔku nɔ si wòzɔ yi Roma ƒe nuwuwu la, eva do go nɔvi aɖewo le Puteoli eye emegbe egado go ame bubu siwo zɔ mɔ va kpee. Aleke wòwɔ nui? “Esi Paulo kpɔ wo la, eda akpe na Mawu, eye [dzi ɖo eƒo].” (Dɔwɔwɔwo 28:13-15) Gododo Kristotɔwo ake do ŋusẽe. Ŋusẽ ɖoa míawo hã ŋu ne míede ha kple hati Kristotɔwo. Zi alesi ablɔɖe li eye míete ŋu dea ha kple mía nɔewo ko la, mele be míate kpɔ be míawo ɖeɖe míanɔ agbemɔ xaxɛa dzi zɔm o.—Lododowo 18:1; Mateo 7:14.

11. Yɔ nɔnɔme aɖewo siwo me ‘ŋusẽ si gbɔ dzɔdzɔmetɔ ŋu’ hiã le vevie.

¹¹ To gbedodoɖa, Mawu ƒe Nya la sɔsrɔ̃, kpakple hadede kple haxɔsetɔwo edziedzi me la, ‘míayi edzi anɔ ŋu sẽm le Aƒetɔ la kple eƒe ŋusẽ ƒe ŋutete me.’ (Efesotɔwo 6:10) Ðikeke mele eme o be mí katã míehiã ‘Aƒetɔ la ƒe ŋusẽ.’ Dɔléle gbãlãmenamewo ɖea fu na ame aɖewo, eye amegãkuku alo amesi nye ame ƒe kpeɖeŋutɔ le agbe me ƒe kuku le ame gbɔ nye nuxaxa na ame bubuwo. (Psalmo 41:4) Ame bubuwo doa go srɔ̃tɔ dzimaxɔsetɔ ƒe tsitretsiɖeŋu. Dzilawo, vevietɔ dzilaɖekɛwo, kpɔnɛ be ɣeyiɣiawo katã ƒe ŋutilãmedɔ wɔwɔ aganɔ ƒome dzi kpɔm nye agbanɔamedzi si tea ɖeɖi ame ŋu ale gbegbe. Kristotɔ sɔhɛwo hiã ŋusẽ si woatsɔ anɔ te ɖe zɔhɛwo ƒe nyaƒoɖeamenuwo nu ahagbe atikevɔ̃ɖizazã kple agbegbegblẽnɔnɔ. Ame aɖeke nagahe ɖe megbe be wòabia ‘ŋusẽ si gbɔ dzɔdzɔmetɔ ŋu’ tso Yehowa gbɔ be wòatsɔ akpe akɔ kple kuxi siawo o.—Korintotɔwo II, 4:7.

‘Ŋusẽdodo Amesiwo Ŋu Ðeɖi Te’

12. Aleke Yehowa doa ŋusẽ mí le Kristotɔwo ƒe subɔsubɔdɔa mee?

¹² Gakpe ɖe eŋu la, Yehowa doa ŋusẽ esubɔlawo le subɔsubɔdɔa wɔwɔ me. Míexlẽ le Yesaya ƒe nyagblɔɖi me be: “Eyae naa lãmesesẽ amesiwo ŋu ɖeɖi te, eye wònaa ŋusẽ geɖe ame beliwo. . . . Ŋusẽ yeye ɖoa amesiwo kpɔa mɔ na Yehowa ya ŋu, woɖɔa li fu abe hɔ̃ ene, woƒua du metia wo o, wozɔa azɔli ɖeɖi metea wo ŋu o.” (Yesaya 40:29-31) Paulo ŋutɔ hã xɔ ŋusẽ tsɔ wɔ eƒe subɔsubɔdɔae. Ewɔe be eƒe subɔsubɔdɔa tse ku. Eŋlɔ ɖo ɖe Kristotɔ siwo nɔ Tesalonika be: “Míaƒe nyanyui la meva mia gbɔ le nya me ɖeɖeko o, ke boŋ le ŋusẽ kple gbɔgbɔ kɔkɔe [me].” (Tesalonikatɔwo I, 1:5) Ŋusẽ nɔ eƒe gbeƒãɖeɖe kple nufiafia ŋu ale gbegbe be tɔtrɔ gãwo va amesiwo ɖo toe ƒe agbenɔnɔ me.

13. Nukae do ŋusẽ Yeremya be wòdo dzi togbɔ be wotsi tre ɖe eŋu hã?

¹³ Ne míedze ŋgɔ ɖekematsɔleme ƒe nɔnɔme le míaƒe anyigbamama me—ne ɖewohĩ enye anyigbamama si me míeɖe gbeƒã le ƒe geɖe gake naneke medo tso eme o la, dzi ate ŋu aɖe le mía ƒo. Tsitretsiɖeŋu, alɔmeɖeɖe, kple ɖekematsɔleme si Yeremya do goe ɖe dzi le eƒo nenema ke. Egblɔ na eɖokui be: ‘Nyemagaƒo nu le Mawu ƒe ŋkɔ me o.’ Gake mete ŋu mia nu ɖe nyaa dzi o. Eƒe gbedasia ‘nɔ abe dzobibi nue wotu nu ɖo ɖe eƒe ƒuwo me ene.’ (Yeremya 20:9) Amekae na ŋusẽ yeyee le tsitretsiɖeŋu gbogbo sia me? Yeremya gblɔ be: “Yehowa, nye kalẽtɔ sesẽ, li kplim.” (Yeremya 20:11) Vevienyenye si gbegbe Yeremya kpɔ be ele yeƒe gbedasia kple dɔ si Mawu de ye si ŋu wɔe be wòlɔ̃ xɔ dzideƒoname tso Yehowa gbɔ.

Anyrawɔŋusẽ Kple Gbedaŋusẽ

14. (a) Ŋusẽ ka gbegbee le dɔwɔnu si nye aɖe si? (b) Gblɔ kpɔɖeŋu aɖewo tsɔ fia nusi gbegbe aɖe ate ŋu agblẽ.

¹⁴ Menye Mawu gbɔe ŋusẽ siwo le mía si la katã tso tẽ o. Le kpɔɖeŋu me, nu sue aɖee aɖe nye, gake anyrawɔwɔ kple gbedada le ame ŋu siaa ƒe ŋusẽ le esi. Salomo xlɔ̃ nu be: “Ku kple agbe le aɖe si me.” (Lododowo 18:21) Nusi do tso dze kpui si Satana ɖo kple Xawa me la ɖe nusi gbegbe nyagbewo ate ŋu agblẽ la fia. (Mose I, 3:1-5; Yakobo 3:5) Míawo hã míate ŋu atsɔ aɖe agblẽ nu geɖe. Alɔmeɖeɖe le ɖetugbivi aɖe ŋu be elolo akpã ate ŋu ana nuɖuɖu magadzroe o. Ameŋugblẽnya aɖe gbugbɔgblɔ enuenu eŋumabumabui ate ŋu agblẽ xɔlɔ̃ xoxowo dome. Ẽ, ele be míaɖu aɖe la dzi.

15. Aleke míate ŋu azã míaƒe aɖe atsɔ atu ame ɖo ahada gbe le wo ŋui?

¹⁵ Gake aɖe te ŋu tua ame ɖo hafi gagblẽa ame dome hã. Biblia me lododo aɖe gblɔ be: “Ame aɖewo ƒe nuƒoƒo le abe yitɔame ene; ke nunyalawo ƒe aɖe daa gbe le ame ŋu.” (Lododowo 12:18) Kristotɔ nyanuwo zãa ŋutete si le aɖe si tsɔ faa akɔ na blanuilélawo kple amesiwo ame ku na. Veveseɖeamenunyawo ate ŋu ade dzi ƒo na ƒewuivi siwo le avu wɔm kple hatiwo ƒe nyaƒoɖeamenu gbegblẽwo. Aɖe zazã ameŋububutɔe ana kakaɖedzi nasu nɔviŋutsu kple nɔvinyɔnu tsitsiwo si be wogahiã yewo eye wogalɔ̃ yewo kokoko. Veveseɖeamenunyawo ate ŋu ade agbe yeye dɔnɔwo me. Ƒo wo katã ta la, míate ŋu azã míaƒe aɖe atsɔ agblɔ Fiaɖuƒegbedasi sẽŋua na amesiwo katã asee. Ne wòdzro mí tso dzi me be míaɖe gbeƒã Mawu ƒe Nyaa la, ke ŋutete le mía ŋu na ewɔwɔ. Biblia gblɔ be: “Megate nu nyui hiãtɔ, nenye be ŋutete le ŋuwò na ewɔwɔ o.”—Lododowo 3:27.

Ŋusẽ Zazã Nyuie

16, 17. Aleke hamemegãwo, dzilawo, srɔ̃ŋutsuwo, kple srɔ̃nyɔnuwo ate ŋu asrɔ̃ Yehowa le ŋusẽ si Mawu na wo zazã mee?

¹⁶ Togbɔ be Yehowa nye ŋusẽkatãtɔ hã la, eɖua hamea dzi le lɔlɔ̃ me. (Yohanes I, 4:8) Kristotɔ dzikpɔlawo srɔ̃nɛ ale be woléa be na Mawu ƒe alẽha la lɔlɔ̃tɔe—wozãa woƒe ŋusẽ nyuie, menye le mɔ gbegblẽ nu o. Ele eme baa be ehiã be dzikpɔlawo ‘naka mo, agbe nya, ahaxlɔ̃ nu’ ɣeaɖewoɣi, gake wowɔnɛ ‘le dzigbɔɖeanyi kple nufiafiaɖaŋu me.’ (Timoteo II, 4:2) Eyata ɣesiaɣi la, hamemegãwo dea ŋugble le nya siwo apostolo Petro ŋlɔ ɖo ɖe amesiwo le ŋusẽnɔƒewo le hamea me ŋu, si nye: “Minyi Mawu ƒe alẽha, si wode asi na mi la; menye le dzizizi ta o, ke boŋ kple lɔlɔ̃nu faa; menye le viɖe ƒoɖi ta o, ke boŋ kple dzi faa; menye abe aƒetɔwo ɖe amesiwo nye Mawu ƒe domenyinu la dzi ene o, ke boŋ abe amesiwo nye kpɔɖeŋu na alẽha la ene.”—Petro I, 5:2, 3, NW; Tesalonikatɔwo I, 2:7, 8.

¹⁷ Yehowa na ŋusẽ dzilawo kple srɔ̃ŋutsuwo hã, eye ele be woazã ŋusẽ sia atsɔ ana kpekpeɖeŋu, anyi ame, ahaɖe numalɔ̃leamegbɔ afia. (Efesotɔwo 5:22, 28-30; 6:4) Yesu ƒe kpɔɖeŋu fia be woate ŋu azã ŋusẽ le lɔlɔ̃mɔ nu wòanyo. Ne tohehe da sɔ eye wòle ɖoɖo nu la, ɖeviwo meléa blanui o. (Kolosetɔwo 3:21) Ŋusẽ agaɖo srɔ̃ɖeɖe ŋu ne srɔ̃ŋutsu Kristotɔwo wɔa woƒe tanyenye ŋudɔ le lɔlɔ̃ me eye srɔ̃nyɔnuwo dea bubu deto wo srɔ̃ŋutsuwo ƒe tanyenye ŋu tsɔ wu be woagbɔ ŋusẽkpɔɖeamedzi ƒe seƒe si Mawu ɖo na wo ŋu adi be yewoaɖu aƒetɔ alo awɔ nusi dze yewo ŋu.—Efesotɔwo 5:28, 33; Petro I, 3:7.

18. (a) Aleke wòle be míasrɔ̃ Yehowa ƒe kpɔɖeŋu le dziku dzi ɖuɖu mee? (b) Nukae wòle be amesiwo le ŋusẽnɔƒewo nadze agbagba aƒã ɖe amesiwo le woƒe dzikpɔkpɔ te me?

¹⁸ Amesiwo si ŋusẽ le le ƒomea kple hamea me nakpɔ nyuie ŋutɔ aɖu dziku dzi, elabena dziku ɖe wòdoa vɔvɔ̃ na ame ke meɖea lɔlɔ̃ fiana o. Nyagblɔɖila Naxum gblɔ be: “Yehowa gbɔa dzi ɖi blewu, eye ŋusẽ gã le esi.” (Naxum 1:3; Kolosetɔwo 3:19) Dziku dzi ɖuɖu nye ŋusẽnɔamesi ƒe dzesi, gake dziku ɖeɖe ɖe go nye gbɔdzɔgbɔdzɔ ƒe dzesi. (Lododowo 16:32) Le ƒomea kple hamea me siaa la, taɖodzinuae nye be míaƒã lɔlɔ̃ ɖe ame me—lɔlɔ̃ na Yehowa, lɔlɔ̃ na ame havi, kple lɔlɔ̃ na gɔmeɖose dzɔdzɔewo. Lɔlɔ̃e nye ɖekawɔwɔ ƒe nublanu sesẽtɔ kekeake kple nyuiwɔwɔ ƒe ameʋãŋusẽ sesẽtɔ kekeake.—Korintotɔwo I, 13:8, 13; Kolosetɔwo 3:14.

19. Dzideƒonamenya si faa akɔ na ame kae Yehowa gblɔ, eye aleke wòle be míawɔ nu ɖe eŋui?

¹⁹ Be woanya Yehowa fia be woanya ŋusẽ si le esi. Yehowa gblɔ to Yesaya dzi be: “Mènyae, eye mèsee kpɔ be, Mawu mavɔ enye Yehowa, amesi wɔ anyigba ƒe mlɔeanuwo oa? Nu metia kɔ nɛ o, ɖeɖi metea eŋu o.” (Yesaya 40:28) Ŋusẽ mevɔna le Yehowa ŋu o. Ne míeɖo ŋu ɖe eŋu ke menye ɖe mía ŋutɔwo ŋu o la, magblẽ mí ɖi o. Ena kakaɖedzi mí be: “Megavɔ̃ o, elabena meli kpli wò; ŋɔ megadzi wò o, elabena nyee nye wò Mawu, mali ke wò, makpe ɖe ŋuwò, eye matsɔ nye xɔname ƒe nuɖusi alé wò.” (Yesaya 41:10) Aleke wòle be míawɔ nui ɖe alesi wòléa be na mí lɔlɔ̃tɔe ŋu? Mina míazã ŋusẽ ɖesiaɖe si Yehowa na mí la atsɔ akpe ɖe amewo ŋu ahatu wo ɖo abe alesi Yesu wɔe ene. Neva eme be míaɖu míaƒe aɖe dzi bene wòada gbe le ame ŋu tsɔ wu be wòawɔ nuvevi ame. Eye neva eme be míanɔ ŋudzɔ le gbɔgbɔ me ɣesiaɣi, anɔ te sesĩe le xɔse me, ahatsi asẽ ŋu le mía Wɔla Gã, Yehowa Mawu, ƒe ŋusẽ me.—Korintotɔwo I, 16:13.

[Etenuŋɔŋlɔwo]

Àte Ŋu Aɖe Wo Mea?

• Aleke Yehowa zãa eƒe ŋusẽe?

• Mɔ kawo dzie míate ŋu ato axɔ ŋusẽ tso Yehowa gbɔ?

• Aleke wòle be míazã aɖe ƒe ŋusẽe?

• Aleke ŋusẽ si Mawu nana la ate ŋu anye yayrae?

[Nɔnɔmetata si le axa 15]

Yesu zã Yehowa ƒe ŋusẽ tsɔ kpe ɖe amewo ŋui

[Nɔnɔmetata si le axa 17]

Ne wòdzro mí tso dzi me be míaɖe gbeƒã Mawu ƒe Nyaa la, ke ŋutete le mía ŋu na ewɔwɔ