Barnaba “Akɔfafavi” La

ƔEKAƔIE nye zi mamlɛtɔ si xɔ̃wò aɖe fa akɔ na wò? Èɖo ŋku zi mamlɛtɔ si nèfa akɔ na ame aɖe dzia? Ɣeaɖewoɣi la, mí katã míehiãa dzideƒo, eye aleke míedaa akpee na amesiwo nanɛ lɔlɔ̃tɔe enye si! Akɔfafa bia be woagbɔ dzi ɖi aɖo to, ase nu gɔme na ame, eye woana kpekpeɖeŋu ame. Èle klalo na esia wɔwɔa?

Ame aɖe si ɖo ɖokuitsɔtsɔna ma ƒe kpɔɖeŋu ɖie nye Barnaba, amesi ‘nye ame nyui, eye gbɔgbɔ kɔkɔe kple xɔse yɔe fũ.’ (Dɔwɔwɔwo 11:24) Nukatae wogblɔ nya ma tso Barnaba ŋu? Nukae wòwɔ si tae wòdze be woagblɔ nya ma le eŋu?

Kpekpeɖeŋunala Kple Dɔmenyotɔ

Eƒe ŋkɔ ŋutɔe nye Yosef, gake apostoloawo da dzesideŋkɔ si sɔ kple eƒe nuwɔna ale gbegbe la ɖe edzi—Barnaba, si gɔmee nye “Akɔfafavi.”a (Dɔwɔwɔwo 4:36) Ðeko woɖo Kristo-hamea tetie nye ma. Ame aɖewo susui be Barnaba anye Yesu ƒe nusrɔ̃lawo dometɔ ɖeka xoxo. (Luka 10:1, 2) Ne ele eme nenema alo mele eme o hã la, ŋutsu sia na ɖaseɖiɖi nyui le eɖokui ŋu.

Le ƒe 33 M.Ŋ. ƒe Pentekoste-ŋkekea megbe teti la, Barnaba, amesi nye Lewi-vi si tso Kipro la lɔ̃ faa dzra anyigba aɖe eye wòtsɔ ga la na apostoloawo. Nukatae wòwɔ nu ma? Nuŋlɔɖi si le Dɔwɔwɔwo ƒe agbalẽa me gblɔ na mí be Kristotɔ siwo nɔ Yerusalem la ‘mãa nu na wo nɔewo le ame ɖesiaɖe ƒe hiahiã nu.’ Edze ƒã be Barnaba kpɔe be hiahiã aɖe li, eye wòtso eƒe dzime faa wɔ nane tso eŋu. (Dɔwɔwɔwo 4:34-37) Ðewohĩ enye amesi si alɔme le, gake mehe ɖe megbe be yeatsɔ yeƒe ŋutilãmenunɔamesiwo kple ye ɖokui ana atsɔ ado Fiaɖuƒea ƒe nuwo ɖe ŋgɔ o.b Agbalẽnyala F. F. Bruce gblɔ be: “Afisiafi si Barnaba kpɔ ame alo nɔnɔme siwo hiã dzideƒo le la, ewɔa nusianu si wòate ŋui tsɔ dea dzi ƒo na wo.” Esia dze ƒã le nudzɔdzɔ evelia si me eƒe ŋkɔ dze le me.

Abe ƒe 36 M.Ŋ. lɔƒo ene la, Saul si tso Tarso (amesi va zu apostolo Paulo emegbe), si zu Kristotɔ ɣemaɣi nɔ agbagba dzem be yeawɔ ɖeka kple hame si nɔ Yerusalem, ‘gake wo katã nɔ evɔ̃m elabena womexɔe se be nusrɔ̃la wònye o.’ Aleke wòate ŋu ana hamea naka ɖe edzi be yetrɔ dzime vavã ke menye ameflunu aɖe ko wɔm yele be yeagagblẽ nu le eŋu o? “Barnaba xɔe, eye wòkplɔe yi apostoloawo gbɔ.”—Dɔwɔwɔwo 9:26, 27; Galatiatɔwo 1:13, 18, 19.

Womegblɔ nusita Barnaba ka ɖe Saul dzi o. Aleke ke wòɖale o, “Akɔfafavi” la wɔ nu wòsɔ kple ŋkɔ si wotsɔ nɛ esi wòɖo to Saul hena kpekpeɖeŋui le esime wòɖo kuxi si wɔ abe ɖe womate ŋu awɔ naneke le eŋu o ene la me. Togbɔ be Saul gatrɔ yi wo de Tarso hã la, ŋutsu eveawo va zu xɔlɔ̃wo. Nu nyui ado tso ema me le ƒe siwo gbɔna me.—Dɔwɔwɔwo 9:30.

Le Antioxia

Anye abe ƒe 45 M.Ŋ. me ene la, nu wɔnuku siwo dzɔ le Antioxia si le Siria ƒe nyatakakawo ɖo Yerusalem—Helagbedola siwo le nuto ma me va nɔ xɔsetɔwo zum. Hamea ɖo Barnaba ɖa be wòayi aɖakpɔe ɖa eye wòawɔ ɖoɖo ɖe dɔa ŋu le afima. Womagate ŋu aɖo ame aɖeke ɖa wòanyo wu ema o. Luka gblɔ be: “Esi amesia va, eye wòkpɔ Mawu ƒe amenuvevea la, edzɔ dzi, eye wòde dzi ƒo na wo katã bena, woanɔ Aƒetɔ la gbɔ kple woƒe dzimeɖoɖo. Elabena ame nyui wònye, eye wòyɔ fũ kple Gbɔgbɔ kɔkɔe kple xɔse; eye wotsɔ ameha gã aɖe [kpee na Aƒetɔ la].”—Dɔwɔwɔwo 11:22-24.

Menye nu mawo koe wòwɔ o. Agbalẽnyala Giuseppe Ricciotti gblɔ be: “Ŋutsu si te ŋu tsona ɖe nusi hiã ŋue Barnaba nye, eye ese alesi wòhiãe be wòatso bla ɖe dɔ ŋu bene alesi nukuawo ƒo see la, wòate ŋu aŋe nuku gbogbo aɖe tso eme la gɔme enumake. Eyata nusi hiã vevie wue nye nuŋelawo.” Esi wònye Kipro ye Barnaba tso ta la, anya nya alesi wòawɔ nu ɖe Dukɔwo me tɔwo ŋui. Anya see le eɖokui me be yee dze etɔxɛe be yeaɖe gbeƒã na trɔ̃subɔlawo. Gake elɔ̃ be ame bubuwo nakpe ɖe ye ŋu le dzidedeƒonamedɔ dodzidzɔname sia wɔwɔ me.

Saul ƒe nya va Barnaba ƒe tame. Anɔ eme be Barnaba nya nu tso Anania ƒe ɖeɖefia si wòkpɔ tso Saul ƒe dzimetɔtrɔ la ŋu be amesia si ti nɔviawo yome tsã la va zu ‘dɔwɔnu tiatia, be wòatsɔ Yesu ƒe ŋkɔ ayi na trɔ̃subɔlawo.’ (Dɔwɔwɔwo 9:15) Ale Barnaba dze mɔ ɖo ta Tarso—si didi wu kilometa 200—be yeaɖadi Saul. Wo ame evea nye hadɔwɔla siwo wɔ dɔ aduadu ƒe blibo ɖeka, eye ɣemaɣie ‘woyɔ nusrɔ̃lawo le Antioxia gbã be Kristotɔwo.’—Dɔwɔwɔwo 11:25, 26.

Le Klaudio ƒe dziɖuɣi la, dɔ sesẽ aɖe to le Roma Fiaɖuƒea ƒe akpa vovovowo. Yudatɔ ŋutinyaŋlɔla Josephus gblɔ be “ame geɖe ku le Yerusalem le esi naneke menɔ wo si woatsɔ aƒle nuɖuɖui o ta.” Eyata nusrɔ̃la siwo nɔ Antioxia la “ɖo bena, wo dome amesiame naɖo nunana ɖe nɔvi, siwo le Yudea la, alesi woate ŋui. Nusia wowɔ hã eye woɖoe ɖe amegãawo to Barnaba kple Saul si me.” Esi wowu dɔ ma nu vɔ la, wo ame evea kpakple Yohanes si woyɔna be Marko trɔ gbɔ va Antioxia, eye afimae woxlẽ wo le kpe ɖe hamea me nyagblɔɖilawo kple nufialawo ŋu.—Dɔwɔwɔwo 11:29, 30; 12:25; 13:1.

Dutanyanyuigblɔdɔ Tɔxɛ Aɖe

Emegbe nu wɔnuku aɖe dzɔ. “Esi wole Aƒetɔ la subɔm, eye wotsia nu dɔna la, Gbɔgbɔ kɔkɔe la gblɔ bena: Azɔ mitia Barnaba kple Saul nam hena dɔwɔwɔ, si ŋuti meyɔ wo ɖo.” Bu eŋu kpɔ! Yehowa ƒe gbɔgbɔ ɖoe be woade dɔ tɔxɛ aɖe asi na ame evea. “Azɔ woawo la, esi Gbɔgbɔ kɔkɔe la dɔ wo ɖa la, wova Seleukia, eye tso afima woɖo ʋu yi Kipro.” Woate ŋu ayɔ Barnaba hã wòasɔ be apostolo, alo amedɔdɔ.—Dɔwɔwɔwo 13:2, 4; 14:14.

Esi wozɔ mɔ to Kipro, eye wokpe ɖe Sergio Paulo si nye Roma-dziɖuɖua teƒenɔla si nye ƒukpo ma ƒe dziɖula ŋu wòtrɔ dzime vɔ megbe la, woyi Perge, si le Asia Sue ƒe anyiehe gome, afisi Yohanes si woyɔna be Marko la trɔ le wo yome heyi Yerusalem le. (Dɔwɔwɔwo 13:13) Edze abe va ɖo ɣemaɣi la, Barnaba ye xɔ ŋgɔ na dɔa, ɖewohĩ abe dɔwɔhati si si nuteƒekpɔkpɔ le wu ene. Tso afisia heyina la, Saul (amesi woyɔna azɔ be Paulo) ye xɔ ŋgɔ. (Tsɔe sɔ kple Dɔwɔwɔwo 13:7, 13, 16; 15:2.) Ðe alesi nuwo trɔe alea ɖe fu na Barnaba? Ao, Kristotɔ tsitsi si tsɔ ɖokuibɔbɔ kpɔe dze sii be Yehowa nɔ yeƒe dɔwɔhatia hã zãm ŋusẽtɔe la wònye. Yehowa di be nuto bubuwo hã nase nyanyuia to wo dzi.

Le nyateƒe me la, hafi woava nya ame eveawo le Antioxia si le Pisidia la, nuto bliboa se Mawu ƒe nya la tso Paulo kple Barnaba gbɔ, eye ame geɖe xɔ nya la. (Dɔwɔwɔwo 13:43, 48-52) Le Ikonio la, “Yudatɔwo kple Helatɔwo dome ame geɖewo xɔe se.” Esia ʋã Paulo kple Barnaba wonɔ afima ŋkeke geɖe ‘hele nu ƒom kple dzideƒo le Yehowa, amesi na wowɔ dzesiwo kple nukunuwo to woƒe asiwo dzi la ƒe ŋusẽ me.’ Esi wosee be woɖo nugbe ɖe yewo ŋu be woaƒu kpe yewo la, wo ame evea si nunyatɔe va yi dɔa dzi le Likaonia, Listra, kple Derbe. Togbɔ be woƒe agbe ɖo afɔku me le Listra hã la, Barnaba kple Paulo yi edzi ‘do ŋusẽ nusrɔ̃lawo ƒe luʋɔwo, eye wode dzi ƒo na wo be woanɔ xɔse la me; eye bena xaxa geɖewo me to ge yewoala tsã hafi ayi ɖe Mawu fiaɖuƒe la me.’—Dɔwɔwɔwo 14:1-7, 19-22.

Gbeƒãɖela veviedonula eve siawo maɖe mɔ woado vɔvɔ̃ na wo o. Ke boŋ wotrɔ yi afisiwo wodo go tsitretsiɖeŋu sẽŋua le va yi be yewoado ŋusẽ ame yeye siwo va zu Kristotɔwo, anye be yewoakpe ɖe ŋutsu siwo dze ŋu be woaxɔ ŋgɔ le hame yeyeawo me.

Aʋatsotso ƒe Nya La

Anye ƒe 16 le ƒe 33 M.Ŋ. ƒe Pentekoste-ŋkekea megbe la, Barnaba nɔ eme wokpɔ nyadzɔdzɔ si ɖe dzesi le ŋutinya me la gbɔ. “Ame aɖewo tso Yudea va fia nu nɔviawo [le Antioxia si le Siria] bena: Ne wometso aʋa na mi le Mose ƒe kɔa nu o la, miate ŋu akpɔ xɔxɔ o.” Barnaba kple Saul nya le woƒe nuteƒekpɔkpɔ me be mele eme nenema o, eye woʋli nya ma vevie. Le esi teƒe be woatsɔ woawo ŋutɔ ƒe ŋusẽ azii ɖe wo dzi la, wokpɔe dzesii bena nya si gbɔ wòle be woakpɔ hena nɔviawo ƒe habɔbɔ bliboa ƒe nyonyo nya ma nye. Eyata woɖo nya la ɖe dziɖuha la gbɔ le Yerusalem, eye woƒe nyatakakawo kpe ɖe wo ŋu be wokpɔ nyaa gbɔ. Ema megbe Paulo kple Barnaba, amesiwo ŋu wogblɔ le be wonye ‘lɔlɔ̃tɔ siwo tsɔ woƒe agbe na ɖe mía Aƒetɔ Yesu Kristo ƒe ŋkɔ la ta’ la nɔ amesiwo wodɔ be woaɖagblɔ nudzɔdzɔa na nɔviawo le Antioxia la dome. Esi woxlẽ lɛta si tso dziɖuha la gbɔ eye wona nuƒowo la, hamea ‘dzɔ dzi le akɔfafa la ŋuti’ eye “wodo ŋusẽ wo.”—Dɔwɔwɔwo 15:1, 2, 4, 25-32.

‘Dɔmedzoe Helĩhelĩ Aɖe’

Le nu nyui gbogbo si woŋlɔ tso Barnaba ŋu megbe la, míasusui be míate ŋu awɔ nu gbeɖe wòaɖii o. Gake “Akɔfafavi” la nye ame madeblibo abe míawo ke ene. Esi wo kple Paulo wonɔ dutanyanyuigbɔgblɔ ƒe mɔzɔzɔ evelia ƒe ɖoɖo wɔm be yewoayi aɖasrã hameawo kpɔ la, masɔmasɔ aɖe do mo ɖa. Barnaba di be yeakplɔ ye nɔvi Yohanes si woyɔna be Marko ɖe asi, gake Paulo mebui be esɔ nenema o elabena Yohanes si woyɔna be Marko trɔ le wo yome le woƒe dutanyanyuigbɔgblɔ ƒe mɔzɔzɔ gbãtɔ me. ‘Dɔmedzoe helĩhelĩ aɖe do mo ɖa, eye womã tso wo nɔewo gbɔ. Barnaba tsɔ Marko kpe ɖe eɖokui ŋu, eye woɖo ʋu yi Kipro. Ke Paulo hã tia Sila kpe ɖe eɖokui ŋu’ eye woɖo ta afi bubu.—Dɔwɔwɔwo 15:36-40.

Aleke wòwɔ nublanui enye esi! Togbɔ be ele nenema hã la, nudzɔdzɔa na míeganya nu bubu tso Barnaba ƒe nɔnɔme ŋu. Agbalẽnyala aɖe gblɔ be: “Eɖe Barnaba ƒe nɔnɔme nyui mavɔmavɔawo fia be elɔ̃ faa ɖoe eɖokui dzi eye wògaka ɖe Marko dzi zi evelia.” Abe alesi nuŋlɔla ma bui ene la, anya nɔ eme baa be “alesi Barnaba ka ɖe edzii kpe ɖe eŋu be wòte ŋu do ŋusẽ eɖokui eye wònye nane si ʋãe be wògbugbɔ tameɖoɖo kplikpaa bubu wɔ.” Abe alesi nuwo va yii ene la, eva dze emegbe be enyo be wòka ɖe edzi nenema, elabena eva ɖo ɣeaɖeɣi la, Paulo gɔ̃ hã lɔ̃ ɖe alesi Marko nye dɔwɔnu vevi aɖe le Kristotɔwo ƒe subɔsubɔdɔa mee la dzi.—Timoteo II, 4:11; tsɔe sɔ kple Kolosetɔwo 4:10.

Barnaba ƒe kpɔɖeŋua ate ŋu ado ŋusẽ mí be míaɖo to, ase nu gɔme, eye míade dzi ƒo na amesiwo ƒo dzi ɖe le eye míana kpekpeɖeŋu ŋutɔŋutɔ ɣesiaɣi si míekpɔe be ehiã. Alesi wòlɔ̃ faa be yeasubɔ ye nɔviwo le dɔmefafa kple dzideƒo me, kple nu nyui siwo do tso eme la nye dzideƒo le eɖokui si. Yayra kae enye si wònye be amesiwo le abe Barnaba ene nanɔ míaƒe hamewo me egbea!

[Etenuŋɔŋlɔwo]

[Nɔnɔmetata si le axa 23]

Barnaba ‘nye ame nyui, eye gbɔgbɔ kɔkɔe kple xɔse yɔe fũ’