Nɔviwo Ƒe Habɔbɔ Si Me Ðekawɔwɔ Le

YEHOWA MAWU wɔ nu kple Israel dukɔ si wòtia, si ŋu eƒe ŋkɔ le la hena ƒe 1,500 sɔŋ. Emegbe Yehowa “trɔ susu ɖe dukɔwo ŋu zi gbãtɔ, be yeaɖe amewo tso wo dome hena yeƒe ŋkɔ la.” (Dɔw. 15:14) Ame siwo ŋu Yehowa ƒe ŋkɔ le la anye eƒe ɖasefowo, woawɔ ɖeka le tamesusu kple nuwɔna me, togbɔ be wotso anyigba ƒe teƒe vovovowo hã. Dɔ aɖe si Yesu de asi na eyomedzelawo lae ana woaƒo amewo nu ƒu hena Mawu ƒe ŋkɔ la. Egblɔ na eyomedzelawo be: “Eya ta miheyi ɖawɔ dukɔwo katã me tɔwo woanye nusrɔ̃lawo, mianyrɔ wo ɖe Fofo la kple Vi la kpakple gbɔgbɔ kɔkɔe la ƒe ŋkɔ me, miafia wo be woawɔ nu siwo katã ƒe se mede na mi la dzi.”—Mat. 28:19, 20.

² Esi nètsɔ ɖokuiwò ɖe adzɔgbe na Yehowa hexɔ nyɔnyrɔ la, èva zu Yesu Kristo ƒe nusrɔ̃la. Èva le xexea me katã ƒe Kristotɔwo ƒe nɔviwo ƒe habɔbɔ wɔɖeka si me tɔwo meɖea mɔ dukɔ alo to si me wotso alo woƒe ganyawo ƒe vovototo maa wo dome o la me. (Ps. 133:1) Esia wɔe be èlɔ̃ hawòvi Kristotɔ siwo le hamea me eye nèdea bubu wo ŋu. Anɔ eme be wo dometɔ aɖewo tso dukɔ bubu me alo woƒe ŋutigbalẽ ƒe amadede alo agbalẽnyanya to vovo na tɔwò, eye ɖewohĩ màlɔ̃ tsã be yeade ha kpli wo o le vovototo mawo ta. Ke hã nɔvilɔlɔ̃ kple ɖekawɔwɔ si le mia dome la nu sẽ wu kadodo bubu ɖe sia ɖe, wo ɖanye hadome, subɔsubɔ, alo ƒome kadodowo o.—Marko 10:29, 30; Kol. 3:14; 1 Pet. 1:22.

³ Ne esesẽ na ame aɖewo be woaɖe asi le vovototodedeameme le ame ƒe ŋutigbalẽ, dunyahehe, hadomeɖoƒe alo nazãbubu bubu siwo ƒo ke ɖe to ɖe wo me ŋu la, woate ŋu abu Kristotɔ gbãtɔ siwo nye Yudatɔwo, siwo wòle na be woadzudzɔ nazãbubu ɖe dukɔ bubu me tɔwo ŋu le esi womesubɔna kpli wo o ta ƒe kpɔɖeŋua ŋu. Esime wogblɔ na Petro be wòayi ɖe Roma-ʋafia Kornelio ƒeme la, Yehowa dzra Petro ƒe susu ɖo dɔmenyotɔe na dɔ sia wɔwɔ.—Dɔwɔwɔwo ta 10.

⁴ Wogblɔ na Petro le ŋutega aɖe me be wòawu lã aɖewo siwo nye lã makɔmakɔwo le Yudatɔwo ƒe kɔa nu la aɖu. Esi Petro gbe la, gbe aɖe tso dziƒo gblɔ nɛ be: “Dzudzɔ nu siwo ŋuti Mawu kɔ la yɔyɔ be nu ƒoɖi.” (Dɔw. 10:15) Esi Mawu de nu nyaa me alea ko hafi Petro ƒe susu ɖɔ ɖo eye wòsu te na dɔ si de ge wole esi be wòayi dukɔwo me tɔ aɖe gbɔ la wɔwɔ. Esi Petro ɖo to Yehowa ƒe gbe heyi dɔa gbe la, egblɔ na ame siwo ƒo ƒu la be: “Miawo ŋutɔwo mienyae nyuie, ale si mele se nu be Yudatɔ nade ha kple dukɔ bubu me tɔ alo ava egbɔ o, gake Mawu ɖee fiam be magayɔ ame aɖeke be ame ƒoɖi alo ame makɔmakɔ o. Esia tae esi wodɔ ame ɖem la, nyemekpɔ susu aɖeke si ta magbe vava o.” (Dɔw. 10:28, 29) Esia yome Petro kpɔ kpeɖodzi si fia be Yehowa kpɔ ŋudzedze ɖe Kornelio kple eƒe aƒe la ŋu.

⁵ Ehiã be Saul si tso Tarso si nye Farisitɔ agbalẽnyalagã la nabɔbɔ eɖokui abɔ ha kple ame siwo wòbuna tsã be mesɔ be yeade ha kpli wo o. Ele nɛ be wòaxɔ mɔfiame tso wo gbɔ gɔ̃ hã. (Dɔw. 4:13; Gal. 1:13-20; Flp. 3:4-11) Míate ŋu aka ɖe edzi be alea tɔgbi kee Sergio Paulo, Dionisio, Damaris, Filemon, Onesimo kple ame bubuwo ɖɔ woƒe susu ɖo esime woxɔ nya nyuia hezu Yesu Kristo ƒe nusrɔ̃lawo.—Dɔw. 13:6-12; 17:22, 33, 34; Filem. 8-20.

⁶ Ðikekemanɔmee la, nɔvi siwo le hamea me ƒe lɔlɔ̃ hã he wò ɖe Yehowa kple eƒe habɔbɔa ŋu. Èkpɔ lɔlɔ̃ si nye nu vevi si dea dzesi Yesu Kristo ƒe nusrɔ̃la vavãwo la le wo ŋu, abe ale si eya ŋutɔ gblɔe ene be: “Mele se yeye nam mi be mialɔ̃ mia nɔewo; ale si melɔ̃ mi la, miawo hã milɔ̃ mia nɔewo nenema ke. Esia me amewo katã anyae le be nye nusrɔ̃lawo mienye, ne lɔlɔ̃ le mia dome.” (Yoh. 13:34, 35) Eye èva kpɔ ŋudzedze ɖe Yehowa kple eƒe habɔbɔa ŋu geɖe wu esi nèva de dzesii be lɔlɔ̃ si le hamea me la nye lɔlɔ̃ si le xexea me katã ƒe nɔviwo ƒe habɔbɔa me la ƒe akpa sue aɖe ko. Èle Biblia ƒe nyagblɔɖi si nye be woaƒo amewo nu ƒu le ŋkeke mamlɛawo me be woasubɔ Yehowa le ŋutifafa kple ɖekawɔwɔ me la me vava teƒe kpɔm.—Mika 4:1-5.

⁷ Esi nu geɖe ŋutɔ dea mama amewo me le anyigba dzi egbea ta la, ame kae abui be woate ŋu ana ame siwo “tso dukɔ sia dukɔ, to sia to, ame ƒomeviwo katã kple gbegbɔgblɔ sia gbegbɔgblɔ me” la nawɔ ɖeka? (Nyaɖ. 7:9) De ŋugble le vovototo siwo le mɔ̃ɖaŋu deŋgɔwo ŋu dɔ wɔlawo kple ame siwo lé blemadekɔnuwo me ɖe asi dome la ŋu kpɔ. Kpɔ mawusubɔsubɔ me masɔmasɔ siwo le to ɖeka me tɔwo kple dukɔ ɖeka me tɔwo dome ɖa. Esi dukɔmevinyenye ƒe gbɔgbɔ nu le sesẽm ɖe edzi la, dunyahehe va ma amewo me fifia wu tsã. Eye ne èbu vovototo si le ame dahewo kple kesinɔtɔwo dome kple nu bubu geɖe siwo dea mama amewo me ŋu la, àkpɔe be amewo nu ƒoƒo ƒu tso towo, dukɔwo, gbegbɔgblɔwo kple hatsotsowo katã me be woawɔ ɖeka le lɔlɔ̃ kple ŋutifafa si nu meyina o me la nye nukunu si Mawu Ŋusẽkatãtɔ la ɖeɖe ko ate ŋu awɔ.—Zak. 4:6.

⁸ Ke hã ɖekawɔwɔ sia li ŋutɔŋutɔ, eye esi nèva zu Yehowa Ðasefo ɖeadzɔgbe xɔnyɔnyrɔ la, wò hã èva zu habɔbɔ wɔɖeka sia me tɔ. Esi ɖekawɔwɔ sia le vi ɖem na wò la, enye wò hã wò agbanɔamedzi be nàlé eme ɖe asi. Àte ŋu awɔ esia ne èwɔna ɖe apostolo Paulo ƒe nya siwo le Galatiatɔwo 6:10 la dzi; afi ma gblɔ be: “Zi ale si mɔnukpɔkpɔa kpɔtɔ li la, mina míawɔ nyui na amewo katã, ke vevietɔ na ame siwo do ƒome kpli mí le xɔse la me.” Míewɔna ɖe aɖaŋuɖoɖo sia hã dzi be: “Migawɔ naneke le dzrehehe alo bubu dzodzro didi ta o, ke boŋ mitsɔ ɖokuibɔbɔ bu ame bubuwo be wonye gã wu mi, ale be miaganɔ miawo ŋutɔ miaƒe nyonyo ko dim o, ke miadi ame bubuwo hã ƒe nyonyo.” (Flp. 2:3, 4) Zi ale si míemlaa mía ɖokui be míakpɔ mía nɔviŋutsuwo kple nɔvinyɔnuwo abe ale si Yehowa kpɔa woe ene, ke menye le nu si wonye le ŋutilã me nu o la, míayi edzi ase vivi le ŋutifafa kple dzidzɔ ƒe ƒomedodo si le mía kpli wo dome la me.—Ef. 4:23, 24.

⁹ Apostolo Paulo wɔ kpɔɖeŋu aɖe tsɔ ɖee fia be mama mele hamea me o, ke boŋ ame siwo katã le hamea me la tsɔa ɖe le eme na wo nɔewo. (1 Kor. 12:14-26) Togbɔ be mía kple nɔvi siwo le habɔbɔ si le xexea me godoo la me tɔ aɖewo dome didi ŋutɔ hã la, míetsɔa ɖe le woƒe nyonyo me kokoko. Ne wole mía nɔvi aɖewo yome tim la, etena ɖe mí ame susɔeawo dzi vevie. Ne hiã tu mía nɔvi aɖewo alo afɔku aɖe dzɔ ɖe wo dzi alo aʋawɔwɔ alo dukɔ me zitɔtɔwo le nu gblẽm le wo ŋu la, ame mamlɛawo dina vevie be yewoato mɔ aɖe dzi akpe ɖe wo ŋu le gbɔgbɔ kple ŋutilã me siaa.—2 Kor. 1:8-11.

¹⁰ Ele be mí katã míanɔ gbe dom ɖa ɖe mía nɔviwo ta gbe sia gbe. Wo dometɔ aɖewo dzea ŋgɔ nu gbegblẽ wɔwɔ ƒe tetekpɔwo. Fukpekpe siwo me tom wo dometɔ aɖewo le la ate ŋu anɔ nyanya na ame sia ame. Gake bubuwo doa go tsitretsiɖeŋu tso dɔwɔhatiwo kple ƒometɔ siwo menye haxɔsetɔwo o gbɔ, si ŋu ame geɖe menyaa naneke tsoe o. (Mat. 10:35, 36; 1 Tes. 2:14) Míetsɔ ɖe le eme na wo vevie, elabena xexea me katã ƒe nɔviwo ƒe habɔbɔe míenye. (1 Pet. 5:9) Mía dometɔ aɖewo le dɔ wɔm vevie le Yehowa subɔsubɔ me hele ŋgɔ xɔm le gbeƒãɖeɖedɔa kple hameawo siaa me. Azɔ hã, enye nɔvi aɖewo ƒe agbanɔamedzi be woakpɔ xexea me katã ƒe dɔa dzi. Ne nu bubu aɖeke meli míawo ŋutɔwo míate ŋu awɔ atsɔ akpe ɖe wo ŋu tẽe o gɔ̃ hã la, wo katã wohiã na míaƒe gbedodoɖa, si dzi míetona ɖenɛ fiana be míelɔ̃ wo vevie hetsɔ ɖe le eme na wo vavã.—Ef. 1:16; 1 Tes. 1:2, 3; 5:25.

¹¹ Le zitɔtɔ si bɔ ɖe xexea me le ŋkeke mamlɛ siawo me ta la, ele be Yehowa ƒe amewo nanɔ dzadzraɖoɖi be yewoakpe ɖe yewo nɔewo ŋu. Ɣeaɖewoɣi la, afɔkuwo abe anyigbaʋuʋu kple tsiɖɔɖɔwo ene, ana wòahiã be woawɔ kpekpeɖeŋunadɔ gãwo ahawɔ ɖoɖo be woaɖo nuhiahiã gbogbo aɖewo ɖa be woatsɔ akpe ɖe nɔviawo ŋu. Ƒe alafa gbãtɔ me Kristotɔwo ɖo kpɔɖeŋu nyui aɖe ɖi le esia gome. Nusrɔ̃la siwo nɔ Antiokia la ɖo ŋku Yesu ƒe aɖaŋuɖoɖoa dzi eye wotsɔ dzidzɔ ɖo nunanawo ɖe nɔvi siwo nɔ Yudea. (Dɔw. 11:27-30; 20:35) Emegbe la, apostolo Paulo de dzi ƒo na Kristotɔ siwo nɔ Korinto la be woakpe asi ɖe kpekpeɖeŋununana ƒe ɖoɖo si ŋu wowɔ ɖoɖo ɖo nyuie la ŋu. (2 Kor. 9:1-15) Le míaƒe ŋkekeawo me la, ne nya dzɔ ɖe mía nɔviwo dzi eye wohiã ŋutilãmekpekpeɖeŋu la, habɔbɔa kple Kristotɔ ɖekaɖekawo tsona kpla naa nu siwo wohiã la wo.

¹² Míaƒe xexea me katã ƒe nɔviwo ƒe habɔbɔ wɔɖeka la le ɖoɖo nu be míawɔ Yehowa ƒe lɔlɔ̃nu. Eƒe lɔlɔ̃nu le ɣeyiɣi sia mee nye be woaɖe gbeƒã Fiaɖuƒe ŋuti nya nyuia le xexe bliboa katã me be wòanye ɖaseɖiɖi na dukɔwo katã. (Mat. 24:14) Esi míele dɔ sia wɔm la, Yehowa ƒe lɔlɔ̃nue nye be míanɔ agbe ɖe yeƒe agbenɔnɔ ƒe dzidzenu deŋgɔawo nu. (1 Pet. 1:14-16) Ele be míalɔ̃ faa abɔbɔ mía ɖokui na mía nɔewo eye míawɔ dɔ hena nya nyuia ƒe ŋgɔyiyi. (Ef. 5:21) Fifiae wòle be míatsɔ Mawu ƒe Fiaɖuƒea aɖo nɔƒe gbãtɔ le míaƒe agbe me wu ɣeyiɣi bubu ɖe sia ɖe, ke menye be míanɔ míawo ŋutɔwo ƒe nudidiwo yome tim o. (Mat. 6:33) Ne esia le susu me na mí esi míele dɔ wɔm ɖekae na nya nyuia ƒe ŋgɔyiyi la, míakpɔ dzidzɔ kple dzidzeme fifia, eye yayra mavɔwo ava su mía si.

¹³ Woɖe mí Yehowa Ðasefowo ɖe vovo tso ameƒomea me tɔ mamlɛawo gbɔ be míanye dukɔ kɔkɔe si doa vevie nu le mía Mawu la subɔsubɔ me. (Tito 2:14) Subɔsubɔ si míetsɔna naa Yehowa ye na míeto vovo. Menye ɖeko míele dɔ wɔm le ɖekawɔwɔ me kple mía nɔviwo le xexe bliboa me o, ke míegblɔa nyateƒea ƒe gbegbɔgblɔ ɖeka la eye míewɔa nu wòsɔna ɖe nyateƒe si míegblɔna la hã nu. Yehowa gblɔ esia ɖi to eƒe nyagblɔɖila Zefaniya dzi be: “Matrɔ dukɔwo ƒe gbegbɔgblɔ wòanye gbegbɔgblɔ dzadzɛ, ne wo katã nayɔ Yehowa ƒe ŋkɔ, eye woasubɔe le ɖekawɔwɔ me.”—Zef. 3:9.

¹⁴ Eyome Yehowa ƒe gbɔgbɔ ʋã Zefaniya wòƒo nu tso xexea me katã ƒe nɔviwo ƒe habɔbɔ si va zu nu ŋutɔŋutɔ li egbea ŋu be: “Israel ƒe ame susɔeawo mawɔ nu madzɔmadzɔ aɖeke o; womaka aʋatso o, eye womakpɔ alakpaɖe le nu me na wo o; woaɖu nu amlɔ anyi, eye ame aɖeke mado voɖi na wo o.” (Zef. 3:13) Esi míese Yehowa ƒe Nya si nye nyateƒe la gɔme eye míetrɔ míaƒe susu kple agbenɔnɔ wòsɔ ɖe Yehowa ƒe dzidzenuwo nu ta la, míetea ŋu wɔa dɔ le ɖekawɔwɔ me. Míetea ŋu wɔa nu siwo ame siwo bua nuwo ŋu le amegbetɔ ƒe susu nu la abu be manya wɔ o. Ɛ̃, míenye ame siwo to vovo vavã, míenye Mawu ƒe ame, siwo dea bubu eŋu le anyigba bliboa katã dzi.—Mika 2:12.