Nukatae Saul Ti Kristotɔwo Yome?

‘LE NYATEƑE ME LA, MEBU LE ɖokuinye me be ele be mawɔ nu geɖe siwo atsi tre ɖe Yesu, Nazaretetɔ la, ƒe ŋkɔ la ŋuti eye mewɔe hã le Yerusalem. Mede ame kɔkɔewo dometɔ geɖewo gaxɔ me le ŋusẽ si mexɔ tso nunɔlagãwo gbɔ la nu. Ne wole nusrɔ̃lawo wu ge la, medaa akɔ lɔ̃na ɖe edzi. Mesẽ ŋuta le wo ŋu enuenu le ƒuƒoƒeawo katã, eye mezia wo dzi be woagbe woƒe xɔse. Esi meku tsu gɔ̃ hã ɖe wo ŋuti la, metia wo yome yia du bubuwo ke hã me.’ —Dɔwɔwɔwo 26:9-11.

NENEMAE Saul si tso Tarso, si wogayɔna hã be apostolo Paulo gblɔ. Gake etrɔ kura le ɣeyiɣi si me wògblɔ nya siawo. Meganye amesi tsia tsitre ɖe Kristotɔnyenye ŋu o, fifia ezu etaʋlila vevitɔwo dometɔ ɖeka. Gake nukae na Saul ti Kristotɔwo yome tsã? Nukatae ‘wòsusu be yeawɔ’ nu mawo? Eye ɖe míate ŋu asrɔ̃ nane atso eƒe ŋutinya la mea?

Kpeƒuƒu Stefano

Saul ƒe ŋkɔ dze le Biblia ƒe nuŋlɔɖiwo me zi gbãtɔ le amesiwo wu Stefano dome. “Wotu asi ʋume [na Stefano] do go le dua me, eye woƒu kpee; eye ɖaseɖilawo da woƒe awuwo ɖe ɖekakpui aɖe, si woyɔna be Saul la ƒe afɔ nu.” “Ke Saul kpɔ dzidzɔ le eƒe wuwu ŋuti.” (Dɔwɔwɔwo 7:56, 57; 8:1) Nukae he amedzidzedze ma vɛ? Yudatɔwo kple Kilikiatɔ aɖewo ʋli nya kple Stefano gake womete ŋu nɔ te ɖe eyama nu o. Womegblɔ ne Saul si hã nye Kilikiatɔ la nɔ wo dome alo menɔ wo dome o. Gake wozã aʋatso ɖasefowo tsɔ tso Stefano nu be egblɔ busunya eye wolée hekplɔe yi Sanhedrin la ŋkume. (Dɔwɔwɔwo 6:9-14) Ƒuƒoƒo sia si dzi nunɔlagã kpɔna lae nye Yudatɔwo ƒe ʋɔnudrɔ̃ƒe kɔkɔtɔ. Esi wònye eyae nye subɔsubɔ ƒe ʋɔnudrɔ̃ƒe kɔkɔtɔ kekeake ta la, eme tɔwo kpɔa nusi wobu be enye nufiafia dzadzɛtɔ la hã ta. Le woƒe susu nu la, Stefano dze na ku. Ðe megblɔ na yewo be yewomewɔna ɖe Sea dzi oa? (Dɔwɔwɔwo 7:53) Woafiae be yewowɔna ɖe edzi!

Saul ƒe dzixɔsewoe na wòbui be esɔ be yeada asi ɖe nukpɔsusu ma dzi. Farisitɔe wònye. Kɔmamã sẽŋu sia bia be woalé se kple kɔnyinyiwo me ɖe asi goŋgoŋ. Wobu Kristotɔnyenye be etsi tre ɖe gɔmeɖose mawo ŋu, eye wofiaa nu be Yesue nye mɔ yeye si dzi woato akpɔ ɖeɖe. Ƒe alafa gbãtɔ me Yudatɔwo kpɔ mɔ be Mesia la anye Ŋutikɔkɔefia si aɖe yewo tso Romatɔ siwo wolé fui vevie ƒe amedziɖuɖu ƒe kɔkuti te. Eyata enye nusi gɔme womate ŋu ase o, nusi womate ŋu axɔ o, kple nusi nyɔ ŋu na wo ale gbegbe be amesi Sanhedrin Gã la bu fɔe be egblɔ busunya eye emegbe woklãe ɖe fuwɔameti ŋuti abe hlɔ̃dola si woƒo fi de ene la nanye Mesia la.

Sea gblɔ be “Mawu ƒo fi de” amesi wohe ɖe ati ŋu. (Mose V, 21:22, 23; Galatiatɔwo 3:13) Frederick F. Bruce gblɔ be le Saul ƒe nukpɔsusu nu la, “edze ƒã be nya siawo sɔ na Yesu. Eku le Mawu ƒe fiƒode te, eyata mate ŋu adzɔ be wòanye Mesia, amesi le gɔmeɖeɖe ɖesiaɖe kloe nu la, anye amesi dzi Mawu ƒe yayra anɔ etɔxɛe o. Eyata be woagblɔ be Yesue nye Mesia la nye busunyagbɔgblɔ; amesiwo agblɔ nya totro mawo adze na fu si busunyagblɔlawo kpena.” Abe alesi Saul ŋutɔ lɔ̃ ɖe edzii emegbe ene la, nukpɔsusu si nye be ‘Kristo nye amesi woklã ɖe ati ŋu la nye nukikli na Yudatɔwo.’—Korintotɔwo I, 1:23.

Alesi Saul wɔ nu ɖe nufiafia ma nue nye be eɖoe kplikpaa be yeatsi tre ɖe eŋu kple yeƒe ŋutete katã. Ebui be yeate ŋu azã ŋutasesẽ gɔ̃ hã atsɔ agblẽ nufiafia ma mee. Eka ɖe edzi bliboe be aleae Mawu dii. Esi Saul nɔ nu ƒom tso nɔnɔme si wòɖe fia ŋu la, egblɔ be: “Le ŋuʋaʋã nu la hame yometila menye; le dzɔdzɔenyenye, si le sea me nu la mokaka manɔŋutɔ menye.” “Meɖikpi ti Mawu ƒe hame la yome akpa, eye megblẽe. Eye mede ŋgɔgbe le Yudatɔnyenye me wu nye hati geɖewo le nye dukɔ la dome, eye meɖikpi ʋã ŋu akpa le mía fofowo ƒe nuɖoanyiwo ŋuti.”—Filipitɔwo 3:6; Galatiatɔwo 1:13, 14.

Ŋgɔxɔxɔ le Yometiti Hehe Vɛ Me

Le Stefano ƒe ku megbe la, Saul meganye amesi kpea asi ɖe yometiti hehe vɛ dzro ko ŋu o, ke boŋ eva zu amesi va do gaglãsu ɖe eme. Edze abe eva zu amesi wonya nyuie be etia ame yome ene, elabena le eƒe dzimetɔtrɔ megbe gɔ̃ hã, esi wòdze agbagba be yeawɔ ɖeka kple nusrɔ̃lawo la, “wo katã le evɔ̃m, esi womexɔe se bena, nusrɔ̃la wònye o.” Esi wòdze ƒã be eva zu Kristotɔ nyateƒe la, eƒe dzimetɔtrɔ he aseyetsotso kple akpedada vɛ na nusrɔ̃la siwo see, menye be ame aɖe si nye tsitretsiɖeŋula tsã ko trɔ dzime o, ke boŋ “amesi ti mía yome tsã la, gblɔa xɔse ƒe nyanyui, si wògblẽ tsã la, fiana azɔ.”—Dɔwɔwɔwo 9:26; Galatiatɔwo 1:23, 24.

Damasko didi kilometa 220—si nye ŋkeke adre alo enyi ƒe azɔlizɔzɔ—tso Yerusalem. Ke hã Saul, amesi “galé ŋɔdzidodo kple hlɔ̃dodo ƒe gbɔgbɔtsixe ɖe ƒo ɖe Aƒetɔ la ƒe nusrɔ̃lawo ŋuti” la yi ɖe nunɔlagã gbɔ eye wòbia be wòana agbalẽ ye yeatsɔ ayi ƒuƒoƒeawoe le Damasko. Nukatae? Bene Saul nabla amesiwo wòkpɔ le “nenem mɔ sia dzi” akplɔ ava Yerusalem. Esi wona ŋusẽe la, edze ‘nuwɔwɔ kple hamea le ŋutasesẽ me gɔme, egena ɖe aƒewo me, eye wòhea ŋutsuwo kple nyɔnuwo yi ɖadea gaxɔ me.’ ‘Eƒoa ame bubuwo le ƒuƒoƒeawo’ eye edaa akɔ ɖe edzi (le nya la ŋutɔ nu la, “etsɔa kpekui daa akɔe”) tsɔ lɔ̃na ɖe wo wuwu dzii.—Dɔwɔwɔwo 8:3; 9:1, 2, 14; 22:5, 19; 26:10, NW, etenuŋɔŋlɔ.

Le ŋugbledede le hehe si Saul xɔ tso Gamaliel gbɔ kple ŋusẽ si va su esi fifia ŋu me la, agbalẽnyala aɖewo xɔe se be ewɔ ŋgɔyiyi tso Sea srɔ̃vi ko dzi va zu amesi si ŋusẽ agbɔsɔsɔme aɖe va su le Yudatɔnyenye me. Le kpɔɖeŋu me, ame aɖe bui be ɖewohĩ Saul va zu nufiala le Yerusalem ƒe ƒuƒoƒea. Gake nusi wòfia be Saul ‘daa akɔ ɖe edzi’—eɖanye enye ʋɔnudrɔ̃ƒea me tɔ alo amesi daa asi ɖe Kristotɔwo wuwu dzi o—míate ŋu aka ɖe esia dzi tututu o.a

Esi wònye le gɔmedzedzea me la Kristotɔwo katã nye Yudatɔwo alo amesiwo trɔ dzime va Yuda-subɔsubɔha me ta la, Saul bu Kristotɔnyenye be enye xɔsegbenuwɔna si le edzi yim le Yuda-subɔsubɔha la me, eye wòbui be enye Yuda-subɔsubɔ akuakua ƒe agbanɔamedzi be woaɖɔ nɔnɔmea ɖo. Agbalẽnyala Arland J. Hultgren gblɔ be: “Medze abe ɖe Paulo yometila la tsi tre ɖe Kristotɔnyenye ŋu le esi wòkpɔe abe subɔsubɔha si le Yuda-subɔsubɔha godo alo le ho ʋlim kplii ene ta o. Anye be eya kple ame bubuwo anya bui be Kristotɔnyenye gale Yuda-subɔsubɔhaa ƒe ŋusẽ te kokoko.” Eƒe taɖodzinue nye be yeato mɔ ɖesiaɖe dzi aƒoe ɖe Yudatɔ siwo tra mɔ nu be woagbe nu le woƒe dzixɔsewo gbɔ eye woatrɔ ava xɔse vavãtɔ me. (Dɔwɔwɔwo 26:11) Mɔnu siwo ʋu nɛ dometɔ ɖekae nye wo dede gaxɔ me. Bubue nye wo ƒoƒo le ƒuƒoƒewo, si nye tohehe si bɔ si wohena ɖe ɖokuimabɔmabɔ ɖe rabiwo ƒe ŋusẽ te ta le ʋɔnudrɔ̃ƒe si ʋɔnudrɔ̃la etɔ̃ le.

Gake Yesu ƒe eɖokui ɖeɖe fia Saul le Damasko-mɔ dzi he nusiawo katã va nuwuwui. Tso amesi nye Kristotɔwo ƒe futɔ vɔ̃ɖivɔ̃ɖi dzi la, Saul va zu amesi doa vevie Kristonyenye taʋiʋli zi ɖeka ale gbegbe be le ɣeyiɣi kpui aɖe ko me la, Yudatɔ siwo le Damasko di be yewoawui. (Dɔwɔwɔwo 9:1-23) Eyata mewɔ nuku o be esi Saul zu Kristotɔ la, akpe nu geɖe ƒe fu abe alesi wòna Kristotɔwo kpe fu va yii esime wònɔ wo yome tim ene, ale be wòte ŋu gblɔ le ƒe geɖe megbe be: “Yudatɔwo si mexɔ ƒoƒo ɖeka ɖi go blaene me le zi atɔ̃.”—Korintotɔwo II, 11:24.

Woate Ŋu Azã Dzonɔameme ɖe Mɔ Gbegblẽ Nu

Le Saul ƒe dzimetɔtrɔ megbe esi wova nya ŋkɔ Paulo nɛ nyuie wu la, eŋlɔ be: “Nye amesi nye busunyagblɔla kple yometila kpakple vlodola tsã; ke wokpɔ nublanui nam, elabena mewɔe le numanyamanya me, le dzimaxɔse me.” (Timoteo I, 1:13) Eyata anukwareɖiɖi kple veviedodonu le subɔsubɔha si me wole me menye kpeɖodzi be Mawu akpɔ ŋudzedze ɖe ame ŋu o. Dzo nɔ Saul me eye wòwɔ nu le eƒe dzitsinya nu, gake ema mewɔe ame dzɔdzɔe o. Ezã eƒe dzonɔameme si nu sẽ ale gbegbe ɖe mɔ gbegblẽ nu. (Tsɔe sɔ kple Romatɔwo 10:2, 3.) Ele be esia nana míayi ŋugble me.

Ame geɖe xɔe se vevie egbea be agbenyuinɔnɔ koe nye nusi Mawu di tso yewo si. Gake nenemaea? Anyo be amesiame naɖo to Paulo ƒe nuxlɔ̃amenya sia be: “Mido nuwo katã kpɔ, eye milé nu nyui la me ɖe asi.” (Tesalonikatɔwo I, 5:21) Esia fia be míagbɔ dzi ɖi axɔ sidzedze vavãtɔ si tso Mawu ƒe Nya si nye nyateƒe la me eye míanɔ agbe wòasɔ ɖe enu bliboe. Ne míekpɔe le Biblia me dzodzro me be tɔtrɔ aɖewo li wòle be míawɔ la, ke ele be míadze agbagba ɖesiaɖe awɔe kaba. Ðewohĩ mía dometɔ ʋɛ aɖewo koe nye busunyagblɔlawo, yometilawo, alo totrilawo kpɔ de Saul nu. Gake hã ne míewɔ nu le xɔse kple sidzedze vavãtɔ me ko hafi míate ŋu akpɔ Mawu ƒe amenuveve abe Paulo ene.—Yohanes 17:3, 17.

[Etenuŋɔŋlɔ]