Ta Evelia
Vifofo aɖe Kple Eƒe Vi Dzeaglãwo
1, 2. Ðe alesi wòdzɔe be vi dzeaglãwo va nɔ Yehowa si la me.
EKPƆ viawo dzi nyuie abe alesi dzila lɔ̃ame ɖesiaɖe awɔe ene. Ekpɔ egbɔ be woɖu nu, wodo awu, eye wokpɔ aƒe si me woanɔ ƒe geɖe. Ehea to na wo ne ehiã. Gake mehea to na wo wògbɔa eme gbeɖe o; tohehea nɔa “ɖoɖo nu” ɣesiaɣi. (Yeremya 30:11) Eyata míate ŋu akpɔ vevesese si vifofo lɔ̃ame sia tsɔ gblɔ nya siawoe le susu me be: “Menyi viwo wotsi, eye medo wo ɖe dzi, ke wodze aglã ɖe ŋunye.”—Yesaya 1:2b.
2 Vi dzeaglã siwo wowɔnɛ le afisiae nye Yudatɔwo, eye vifofo si wodo nuxaxa nae nye Yehowa Mawu. Nublanuinya kae nye si! Yehowa nyi Yudatɔwo eye wòdo wo ɖe dzi wu dukɔ bubuwo. Emegbe eto nyagblɔɖila Xezekiel dzi ɖo ŋku edzi na wo be: “Meta avɔ ŋɔŋɔe na wò, eye medo lãgbalẽ nyuitɔ ƒe atokota na wò, metsɔ aklala bla ta na wò, eye metsɔ seda wɔ taɖedzi na wò.” (Xezekiel 16:10) Gake Yudatɔwo ƒe akpa gãtɔ mekpɔ ŋudzedze ɖe nusiwo Yehowa wɔ na wo ŋu o. Ðe wotri to, alo dze aglã boŋ.
3. Nukata Yehowa yɔ dziƒowo kple anyigba be woanye ɖasefo ɖe Yuda ƒe aglãdzedze ŋuti?
3 Susu nyui aɖe tae Yehowa dze nya siawo siwo wògblɔ na eƒe vi dzeaglãawo la gɔme be: “Mi dziƒowo, misee, eye anyigba, ƒu to anyi; elabena Yehowa le nu ƒom.” (Yesaya 1:2a) Ƒe alafa geɖe do ŋgɔ la, dziƒowo kple anyigba see le kpɔɖeŋunyagbɔgblɔ me esime woxlɔ̃ nu Israel-viwo eme kɔ ƒã le tomaɖomaɖo me tsonuwo ŋu. Mose gblɔ be: “Meta dziƒo kple anyigba na mi egbea bena, miaku le anyigba, si dzi mietso Yordan yi, be miaxɔe wòanye mia tɔ la dzi avɔ amloamlo.” (Mose V, 4:26) Azɔ le Yesaya ƒe ŋkekea me Yehowa yɔ dziƒo si womekpɔna o kple anyigba si wokpɔna be woanye ɖasefowo le Yuda ƒe aglãdzedze ŋu.
4. Aleke Yehowa ɖɔ eɖokui na Yuda-dukɔae?
4 Alesi nɔnɔmea nye ŋkubiãnyae na wòhiã be woagblɔ nyawo kaŋ. Gake le nɔnɔme siawo siwo bia nuwɔwɔ kpata me hã la, eɖe dzesi—eye wòfaa dzi na ame—be Yehowa gblɔ be vifofo lɔ̃amee yenye na Yuda tsɔ wu be wòanye aƒetɔ si xɔ wo ƒle dzro ko. Efia be Yehowa le koko ƒom na eƒe dukɔa be woatsɔ susu si nye be yenye vifofo si le nu xam ɖe viawo ƒe aglãdzedze ta atsɔ abu nya la ŋui. Ðewohĩ dzila aɖewo siwo le Yuda ŋutɔ hã to nɔnɔme sia tɔgbe me kpɔ si na kpɔɖeŋu sia wɔ dɔ ɖe wo dzi. Aleke ke wòɖale o, Yehowa le nya si le esi la gblɔ ge ɖe Yuda ŋu.
Lã Mabutamewo Dzea Si Ame Wu
5. Mɔ ka nue nyitsu kple tedzi kuna ɖe woƒe aƒetɔ ŋu le si to vovo na Israel-viwo tɔ?
5 Yehowa gblɔ to Yesaya dzi be: “Nyitsu nyaa etɔa, eye tedzi nyaa eƒe aƒetɔ ƒe lãto; ke Israel menyae o, eye [gɔmesese mele nye dukɔ ƒe nuwɔna ŋu, “NW”] o.”a (Yesaya 1:3) Nyitsu kple tedzi nye agbatsɔlãwo, eye Titina Ɣedzeƒe tɔwo nya wo nyuie. Le nyateƒe me la, Yudatɔwo make ɖi o be lã tsɛ siawo gɔ̃ hã ɖoa to le esi wonya nyuie be ame aɖe tɔ yewonye ta. Se nusi teƒe Biblia me nyawo me kula aɖe kpɔ le esia ŋu esi fiẽ nɔ ɖoɖom le Titina Ɣedzeƒe dugã aɖe me ɖa: “Esi lãhawo nya ɖo dua ƒe gbɔto ko la, wokaka enumake. Nyi ɖesiaɖe nya amesi tɔ wònye kple eƒe aƒememɔ nyuie, eye metɔtɔ kura le mɔ xaxɛ gɔglɔ̃ siwo de nu wo nɔewo me dzi toto me o. Tedziwo ya zɔna tẽ yia ʋɔtrua nu, ɖo ta ‘woƒe aƒetɔ ƒe lãnuɖuɖaka’ gbɔ.”
6. Aleke Yuda-dukɔa wɔ nu gɔmesesemanɔŋutɔe?
6 Esi ɖikeke mele eme o be nɔnɔme siawo tɔgbe bɔ le Yesaya ƒe ŋkekea me ta la, nusi Yehowa ƒe gbedasia fia me kɔ ƒã be: Ne lã manyanu nya eƒe aƒetɔ kple eya ŋutɔ ƒe lãto la, ke nya kae Yuda-dukɔa atsɔ do taflatse be eyatae yewogbugbɔ le Yehowa yome? ‘Gɔmesese mele woƒe nuwɔnaa ŋu o’ nyateƒe. Ðeko wòwɔ abe ɖe womenya kura be Yehowa dzie woƒe nudzedziname kple agbenɔnɔ katã nɔ te ɖo o ene. Alesi Yehowa gayɔ Yudatɔwo be “nye dukɔ” la ɖo kpe eƒe nublanuikpɔkpɔ dzi na wo nyateƒe!
7. Mɔ siwo dzi míate ŋu ato aɖe ŋudzedzekpɔkpɔ afia ɖe Yehowa ƒe mɔnuɖoɖowo ŋu la dometɔ aɖewo ɖe?
7 Míadi gbeɖe be míagbe ŋudzedzekpɔkpɔ ɖe nusiwo katã Yehowa wɔ na mí ŋu ava wɔ nu gɔmesesemanɔŋutɔe o! Ðe wòle be míasrɔ̃ hakpala Dawid boŋ, amesi gblɔ be: “Makafu Yehowa tso dzi blibo me, eye maxlẽ wò nukunuwɔwɔwo katã afia.” (Psalmo 9:2) Yehowa ƒe lɔlɔ̃nu ŋuti sidzedze si míayi edzi anɔ xɔxɔm ade dzi ƒo na mí be míawɔ esia, elabena Biblia gblɔ be “sidzedze kɔkɔetɔ la enye gɔmesese.” (Lododowo 9:10) Ŋugbledede le Yehowa ƒe yayrawo ŋu gbesiagbe akpe ɖe mía ŋu míada akpe ale be míaŋe aɖaba aƒu mía Fofo si le dziƒo dzi o. (Kolosetɔwo 3:15) Yehowa gblɔ be: “Amesi tsɔ akpedada sa vɔe la, ede bubu ŋunye; eye amesi lé ŋku ɖe eƒe zɔzɔme ŋu la, mana wòakpɔ Mawu ƒe xɔname!”—Psalmo 50:23.
Wodo Vlo “Israel ƒe Kɔkɔetɔ” la Vevie
8. Nukata woate ŋu ayɔ Yudatɔwo be wonye “dukɔ, si dzi fɔɖiɖi li kɔ ɖo”?
8 Yesaya yi edzi gblɔ nya sẽŋuwo na Yuda-dukɔa be: “Baba na mi anyigba dzi nɔlawo, dukɔ, si dzi fɔɖiɖi li kɔ ɖo, vodalawo ƒe viwo, vi gbegblẽwo! Wogblẽ Yehowa ɖi, wodo ɖiŋu na Israel ƒe kɔkɔetɔ la, eye wogbugbɔ ɖe megbe.” (Yesaya 1:4) Nuvɔ̃ɖiwɔwɔ ate ŋu ali kɔ ɖi ava zu abe agba si wu tsɔtsɔ ene. Le Abraham ƒe ŋkekea me la, Yehowa gblɔ le Sodom kple Gomora ƒe nuvɔ̃wo ŋu be ‘etso eme akpa.’ (Mose I, 18:20) Nusia tɔgbe ye va le dzedzem le Yuda-dukɔa ŋu, elabena Yesaya gblɔ be woƒe ‘fɔɖiɖi li kɔ ɖi.’ Tsɔ kpe ɖe eŋu la, eyɔ wo be “vodalawo ƒe viwo, vi gbegblẽwo!” Ẽ, Yudatɔwo le abe vi dzeaglãwo ene. “Wogbugbɔ ɖe megbe,” alo abe alesi New Revised Standard Version gblɔe ene la, “wotra keŋkeŋ” tso wo Fofo gbɔ.
9. Nukae nyagbɔgblɔ “Israel ƒe kɔkɔetɔ” fia?
9 Yuda-dukɔa to woƒe godzenuwɔnawo me ɖe bubumademade “Israel ƒe kɔkɔetɔ” la ŋu si gbɔ eme fia. Nukae nyagbɔgblɔ sia si dze zi gbɔ zi 25 le Yesaya ƒe agbalẽa me fia? Be woanɔ kɔkɔe fia be ame nanɔ dzadzɛ eye eŋu nakɔ. Yehowa ƒe kɔkɔenyenye ƒo ɖesiaɖe ta. (Nyaɖeɖefia 4:8) Israel-viwo ɖoa ŋku nyateƒenya sia dzi ɣesiaɣi si wokpɔ nya siwo wota ɖe sikagagbadzɛ keklẽ si le nunɔlagã la ƒe ŋgoblanu la ŋu be: “Kɔkɔenyenye nye Yehowa tɔ.” (Mose II, 39:30, NW) Eyata Yesaya yɔ Yehowa be enye “Israel ƒe kɔkɔetɔ” tsɔ te gbe ɖe alesi gbegbe Yuda ƒe nuvɔ̃ loloe dzi. Aglãdzela siawo nɔ se si wode na wo tɔgbuiwo la dzi dam tẽ, si nye be: “Miwɔ mia ɖokui kɔkɔe, eye mianɔ kɔkɔe, elabena kɔkɔetɔ menye”!—Mose III, 11:44.
10. Aleke míatsri bubumademade “Israel ƒe kɔkɔetɔ” la ŋui?
10 Ele be Kristotɔ siwo li egbea nadze agbagba ɖesiaɖe be womagasrɔ̃ Yuda-dukɔa ƒe kpɔɖeŋu si nye bubumademade “Israel ƒe kɔkɔetɔ” ŋu la o. Ele be woasrɔ̃ Yehowa ƒe kɔkɔenyenye. (Petro I, 1:15, 16) Eye ele be ‘woalé fu vɔ̃’ hã. (Psalmo 97:10) Nuwɔna makɔmakɔ siwo ƒe ɖee nye gbɔdɔdɔ ƒe agbegbegblẽnɔnɔ, trɔ̃subɔsubɔ, fififi, kple ahamumu ate ŋu agblẽ Kristo-hamea. Ema tae woɖea amesiwo gbea asiɖeɖe le nuwɔna siawo ŋu ɖa le hamea me ɖo. Nusi adzɔ ɖe amesiwo nɔa agbe makɔmakɔ dzimematrɔmatrɔe dzi mlɔeba enye be womakpɔ gome le Mawu ƒe Fiaɖuƒedziɖuɖua ƒe yayrawo me o. Nyateƒee, nuwɔna vɔ̃ɖi siawo katã nye vlododo “Israel ƒe kɔkɔetɔ” la vɔ̃ɖitɔe.—Romatɔwo 1:26, 27; Korintotɔwo I, 5:6-11; 6:9, 10.
Wodze Dɔ tso Dzodome Vaseɖe Afɔƒome
11, 12. (a) Ƒo nu tso nɔnɔme gbegblẽ si me Yuda va nɔ ŋu. (b) Nukata mele be Yuda ƒe nu nawɔ nublanui na mí o?
11 Azɔ Yesaya dze agbagba be yeaɖe nyaa me na Yuda-dukɔa esi wòtɔ asi dɔ si lém wole dzi na wo. Egblɔ be: “Nukaŋuti woanɔ mia ƒoƒo dzi, esi miele godzedze dzi ɖaa?” Yesaya nɔ wo biam be: ‘Ðe fu siwo miekpe la mete mia ŋu oa? Nukata miaganɔ aglãdzedze dzi atsɔ awɔ fu mia ɖokui ɖe edzi?’ Yesaya yi edzi be: “Ta blibo la xɔ abi, eye nu te dzi blibo la ŋu belibeli. Teƒe nyui aɖeke mele eŋu o, tso afɔƒome vaseɖe dzodome.” (Yesaya 1:5, 6a) Dɔ nyɔŋu aɖe dze Yuda dzi—wodze dɔ le gbɔgbɔ me tso dzodome vaseɖe afɔƒome. Dɔléle si wokpɔ le wo ŋu dzi ŋɔ lo!
12 Ðe wòle be Yuda ƒe nu nawɔ nublanui na mía? Kura o! Ƒe alafa geɖe do ŋgɔ la, woxlɔ̃ nu Israel-dukɔ bliboa nyuie le tomaɖomaɖo me tsonuwo ŋu. Nya si wogblɔ na wo ƒe ɖee nye be: “Yehowa ana nuƒoƒo vɔ̃ɖi aɖe naƒo klo kple sobo na wò, tso afɔƒome vaseɖe ta me, eye màhaya akpɔ o.” (Mose V, 28:35) Le kpɔɖeŋunyagbɔgblɔ nu la, nusiawo tututue le dzɔdzɔm ɖe Yuda dzi fifia le eƒe totitri ta. Eye ne ɖe Yuda-dukɔa ɖo to Yehowa la, anye ne woate ŋu aƒo asa na nusiawo katã hafi.
13, 14. (a) Nuvevi kawoe wowɔ Yuda? (b) Ðe Yuda ƒe fukpekpewo na wògbugbɔ bu eƒe aglãdzenuwɔnawo ŋua?
13 Yesaya yi edzi ƒo nu tso Yuda ƒe nɔnɔme wɔnublanuia ŋu be: “Abi kple dodro kpakple ƒoƒo yeye; womeyɔ tsi le eme o, womeblae o, eye womeɖe ami ɖee wòbɔbɔ o.” (Yesaya 1:6b) Nuveviwɔame ƒomevi etɔ̃ ŋue nyagblɔɖila la ƒo nu tsoe le afisia: abi (abe yi alo hɛ siame ene), dodro (si nye alesi ame ŋuti hona ne woƒoe), kple ƒoƒo yeye (si nye abi gã yeye si dze abe ɖe maku akpɔ o ene). Nusi wòfia enye alesi woaƒo ame vevie le nɔnɔme ɖesiaɖe si ate ŋu ava susu me na mí nu, eye eƒe ametia ƒe akpa aɖeke meli si nuvevi mewɔ o. Yuda ƒe nɔnɔmea gblẽ ŋutɔ nyateƒe.
14 Ðe Yuda ƒe nɔnɔme wɔnublanuia ʋãe wòtrɔ ɖe Yehowa ŋua? Ao! Yuda le abe aglãdzela si ŋu woƒo nu tsoe le Lododowo 29:1 ene: “Amesi woka mo na zi geɖe, ke wòsẽ ta me la, agbã zi ɖeka gudugudu, eye gbedada manɔ eŋu o.” Edze abe gbe maganya da le dukɔa ŋu o ene. Abe alesi Yesaya gblɔe ene la, “womeyɔ tsi le [eƒe abi me] o, womeblae o, eye womeɖe ami ɖee wòbɔbɔ o.”b Le nyaa nu la, Yuda ɖi amesi ŋu abi gã siwo womeƒo alo bla o le fũ.
15. Mɔ kawo nue míate ŋu akpɔ mía ɖokui ta tso gbɔgbɔmedɔléle si me le?
15 Ele be míasrɔ̃ nu tso nusi dzɔ ɖe Yuda dzi me eye míanɔ ŋudzɔ be míagadze dɔ le gbɔgbɔ me o. Ate ŋu agblẽ nu le mía dometɔ ɖesiaɖe ŋu abe ŋutilãmedɔléle ene. Ne míebu eŋu kpɔ la, mía dometɔ ka dzie ŋutilã ƒe nudzodzrowo mate ŋu akpɔ ŋusẽ ɖo o? Ŋukeklẽ kple vivisese vivivo ƒe dzodzro ate ŋu ato ke ɖe míaƒe dzime. Eyata ele be míamlã mía ɖokui be ‘míatsri nuvɔ̃’ eye ‘míalé ɖe nu nyui ŋu.’ (Romatɔwo 12:9) Azɔ hã ele be míaɖe Mawu ƒe gbɔgbɔ ƒe kutsetseawo afia le míaƒe gbesiagbegbenɔnɔ me. (Galatiatɔwo 5:22, 23) Esia wɔwɔ ana míaƒo asa na nɔnɔme si wɔ fu Yudatɔwo—si nye gbɔgbɔmedɔ si míalé tso dzodome vaseɖe afɔƒome.
Anyigba aɖe si Zu Aƒedo
16. (a) Aleke Yesaya ɖɔ Yuda-nyigbaa ƒe nɔnɔmee? (b) Nukata ame aɖewo gblɔ be anye Axaz ƒe dziɖuɣie wogblɔ nya siawo, gake aleke míate ŋu ase wo gɔmee?
16 Fifia Yesaya ɖe asi le nɔnɔmea tsɔtsɔ sɔ kple atikewɔnyawo ŋu hetrɔ ɖe Yuda-nyigbaa ƒe nɔnɔme ŋu. Egblɔ abe ɖe wòle gbadzaƒe aɖe si ŋu aʋawɔwɔ gblẽ nu le kpɔm ene be: “Miaƒe anyigba zu gbegbe; dzo fiã miaƒe duwo, eye du bubu me tɔwo ɖu miaƒe agble le mia ŋku me, eye wòzu gbegbe, abe alesi wogblẽ Sodom ene.” (Yesaya 1:7) Agbalẽnyala aɖewo gblɔ be togbɔ be nya siawo dze le Yesaya ƒe agbalẽa ƒe gɔmedzedze hã la, anye be emegbe kura ye nyagblɔɖila la gblɔe le eƒe dɔa wɔwɔ me, ɖewohĩ le Fia vɔ̃ɖi Axaz ƒe dziɖuɣi. Wote tɔ ɖe edzi be nu dze edzi na amewo le Uziya ƒe fiaɖuɣi ale gbegbe be womate ŋu aɖɔe be egblẽ alea o. Enye nyateƒe be míate ŋu agblɔe kple kakaɖedzi ne ɖe woɖo Yesaya ƒe agbalẽa me nyawo ɖe ɣeyiɣi siwo me wodzɔ le la nu ya o. Gake ate ŋu anye be Yesaya ƒe nya siwo ku ɖe aƒedozuzu ŋu la nye nyagblɔɖi. Anɔ eme be nyagblɔmɔnu aɖe si wozã le teƒe bubuwo le Biblia me la tɔgbee Yesaya hã zã le nya siwo míexlẽ va yi la gbɔgblɔ me—eyae nye nuƒoƒo tso etsɔme nudzɔdzɔwo ŋu abe ɖe wodzɔ xoxo ene, si tea gbe ɖe kakaɖedzi si le nyagblɔɖia me vava ŋu dzi.—Tsɔe sɔ kple Nyaɖeɖefia 11:15.
17. Nukata mele be aƒedozuzu si ŋu woƒo nu tsoe le nyagblɔɖi me la nawɔ nuku na Yuda-dukɔa o?
17 Nuka ke wònye o, mele be Yuda ƒe aƒedozuzu gbɔgblɔ ɖi nawɔ nuku na dukɔ dzeaglã sia si gbe toɖoɖo la o. Ƒe alafa geɖe do ŋgɔ la, Yehowa xlɔ̃ nu wo le nusi adzɔ ɖe wo dzi ne wodze aglã ŋu. Egblɔ be: “Mana anyigba la nazu gbegbe, eye miaƒe futɔ, siwo le edzi la, ƒe mo awɔ yaa. Maka mi ahlẽ ɖe dukɔwo dome, eye madi yi anɔ mia yomee; miaƒe anyigba azu gbegbe, eye miaƒe duwo azu glikpo.”—Mose III, 26:32, 33; Fiawo I, 9:6-8.
18-20. Ɣekaɣie nya siwo le Yesaya 1:7, 8 va eme, eye mɔ ka nue Yehowa “kpɔtɔ ame ʋɛ aɖewo ɖi” le ɣeyiɣi sia me?
18 Edze ƒã be nya siwo le Yesaya 1:7, 8 va eme esime Asiriatɔwo va dze Israel dzi tsrɔ̃ wo eye wogblẽ nu geɖe le Yuda hena wokpe fu. (Fiawo II, 17:5, 18; 18:11, 13; Kronika II, 29:8, 9) Gake wometsrɔ̃ Yuda gbidii o. Yesaya gblɔ be: “Zion-nyɔnuvi tsi anyi abe agbadɔ le weingble me, abe mlɔƒe le adzamatregble me kple du, si woɖe to ɖo la ene.”—Yesaya 1:8.
19 Le nuwo tsɔtsrɔ̃ la katã me la, Yerusalem, si nye “Zion-nyɔnuvi” la akpɔtɔ anɔ anyi. Gake ametakpɔnu aɖeke manɔ esi o—anɔ abe agbadɔ le weingble me alo dzɔla ƒe mlɔƒe le adzamatregble me ene. Esi ƒe alafa 19 lia me agbalẽnyala aɖe nɔ Nil-tɔsisia dzi ɖo ta eƒe anyigbe gome la, ekpɔ agbadɔ mawo tɔgbe si na wòɖo ŋku Yesaya ƒe nyawo dzi, eye egblɔ be “dzieheya nu koe wotsɔ xee.” Ne woxa agblemenuwo vɔ le Yuda la, woɖea asi le agbadɔ siawo ŋu wokakana alo muna. Ke hã Yerusalem akpɔtɔ anɔ anyi eɖanye aleke ke wòadze du beli na Asiria-ʋakɔ siwo ɖu dukɔ ɖesiaɖe dzi la o.
20 Yesaya ƒo nyagblɔɖinya sia ta be: “Ðe menye Yehowa Zebaot ye kpɔtɔ ame ʋɛ aɖewo ɖi na mí o la, anye ne esusɔ vie ko míele abe Sodom ene, eye míeɖi Gomora!” (Yesaya 1:9)c Yehowa akpe ɖe Yuda ŋu mlɔeba wòanɔ te ɖe Asiria ƒe ŋusẽ nu. Womatsrɔ̃ Yuda gbidii abe Sodom kple Gomora ene o. Akpɔtɔ anɔ anyi.
21. Esi Babilontɔwo tsrɔ̃ Yerusalem vɔ megbe la, nukata Yehowa ‘kpɔtɔ ame ʋɛ aɖewo ɖi’?
21 Le ƒe 100 kple edzivɔ megbe la, wogava nɔ ŋɔdzi dom na Yuda. Dukɔa mesrɔ̃ nu tso to si wohe na wo to Asiria dzi me o. “Woɖe alɔme le Mawu ƒe ame dɔdɔawo ŋu, wodo vlo eƒe nyawo, eye woɖu fewu le eƒe nyagblɔɖilawo ŋu.” Esia na “Yehowa do dɔmedzoe ɖe eƒe dukɔ ŋu ɖe dzi, eye womete ŋu lé enu o.” (Kronika II, 36:16) Babiloniatɔwo ƒe fiagã Nebukadnezar ɖu Yuda dzi eye fifia ya la, womegblẽ naneke ɖi o ‘abe agbadɔ le weingble me ene.’ Wotsrɔ̃ Yerusalem gɔ̃ hã. (Kronika II, 36:17-21) Ke hã Yehowa “kpɔtɔ ame ʋɛ aɖewo ɖi.” Togbɔ be Yuda nɔ aboyo me ƒe 70 hã la, Yehowa kpɔ egbɔ be dukɔa ganɔ anyi, vevietɔ Dawid ƒe ƒomea si me Mesia si ŋugbe wodo la adzɔ tso.
22, 23. Nutaka Yehowa “kpɔtɔ ame ʋɛ aɖewo ɖi” le ƒe alafa gbãtɔ me?
22 Le ƒe alafa gbãtɔ me la, Israel si nye dukɔ si Mawu bla nu kplii la to eƒe xaxa mamlɛtɔ me. Esi Yesu ɖee fia be yee nye Mesia si ŋugbe wodo la, dukɔa gbee eye esia na Yehowa hã gbe wo. (Mateo 21:43; 23:37-39; Yohanes 1:11) Ðe esia fia be dukɔ tɔxɛ aɖeke maganɔ Yehowa si le anyigba dzi azɔ oa? Ao, menye nenema o. Apostolo Paulo ɖee fia be Yesaya 1:9 agava eme. Eyɔ nya tso Septuagint gɔmeɖeɖea me ŋlɔ bena: “Abe alesi Yesaya gblɔ nya ɖi ene bena: ‘Ðe menye Aƒetɔ Zebaot ye susɔ ƒome ɖi na mí o la, anye ne míetrɔ zu abe Sodom ene, eye míaɖi Gomora.’”—Romatɔwo 9:29.
23 Fifia ya amesiwo tsi agbe lae nye Kristotɔ amesiamina siwo xɔ Yesu Kristo dzi se. Amesiawo nye Yudatɔ xɔsetɔwo gbã. Emegbe Dukɔwo me tɔ siwo xɔ se va kpe ɖe wo ŋu. Woƒo ƒu zu Israel yeye, “Mawu ƒe Israel.” (Galatiatɔwo 6:16; Romatɔwo 2:29) “Ƒome” sia tsi agbe esi wotsrɔ̃ Yudatɔwo ƒe nuɖoanyia le ƒe 70 M.Ŋ. me. Le nyateƒe me la, “Mawu ƒe Israel” la gali egbea. Fifia xɔsetɔ miliɔn geɖe siwo tso dukɔwo me va kpe ɖe wo ŋu, amesiwo nye “ameha gã, si ame aɖeke [mate ŋu axlẽ] o la, tso dukɔ sia dukɔ kple to sia to kple du sia du kple gbegbɔgblɔ sia gbegbɔgblɔ me.”—Nyaɖeɖefia 7:9.
24. Nukae wòle be amewo katã nade dzesii ne wodi be yewoatsi agbe le ameƒomea ƒe xaxa gãtɔ kekeake me?
24 Eteƒe madidi o xexe sia adze ŋgɔ Harmagedon-ʋa la. (Nyaɖeɖefia 16:14, 16) Togbɔ be xaxa sia nu asẽ wu alesi wònɔ esime Asiriatɔwo loo alo Babilontɔwo va dze Yuda dzi, eye wòasesẽ wu Romatɔwo ƒe Yudea tsɔtsrɔ̃ le ƒe 70 M.Ŋ. me hã la, amewo atsi agbe le eme. (Nyaɖeɖefia 7:14) Eyata aleke gbegbe wòle vevie be mí katã míabu nya siwo Yesaya gblɔ na Yuda ŋu nyuie enye si! Ena nuteƒewɔlawo te ŋu tsi agbe ɣemaɣi. Eye ate ŋu ana amesiwo xɔ se natsi agbe egbea hã.
[Etenuŋɔŋlɔwo]
a Yuda to eve fiaɖuƒeae wozã “Israel” na le afisia.
b Yesaya ƒe nyawo ɖe alesi wowɔa atike na ame le eƒe ŋkekea mee fia. Biblia ŋuti numekula E. H. Plumptre gblɔ be: “Nusi wowɔna na abi si le vovom gbãe nye be ‘womianɛ’ alo ‘tea asi ɖe edzi’ be tsi nado le eme; azɔ abe alesi wowɔ na Xizkiya ene la (ta xxxviii. 21), wotsɔa abiblavɔ ‘blanɛ,’ eye wotsɔa ami si vena alo abiwutike ɖoa edzi, alo ate ŋu anye be wokɔa ami kple wein ɖe eme tsɔ klɔa abiae abe alesi wogblɔ le Luka x. 34 ene.”
c C. F. Keil kple F. Delitzsch ƒe agbalẽ si nye Commentary on the Old Testament gblɔ be: “Esia nye nyagblɔɖila la ƒe nyaawo ƒe akpa aɖe ƒe nuwuwu. Dometsotso si wogblẽ ɖe kpukpui 9 kple 10 lia dome ɖee fia be woma nyaa me ɖe akpa eve le afisia. Nyawo ƒe akpa gã alo suewo mama le mɔ sia nu, eɖanye to dometsotso gbegblẽ ɖi loo alo be woasee ɖe fli aɖe dzi o, nye mɔnu si wozãna xoxoxo do ŋgɔ na [Hebrigbe me] dzesi siwo wozãna na ablɔɖegbeɖiɖiwo kple gbeɖɔɖɔdzesiwo, eye mɔnu nyanyɛ aɖe si wozãna tso blema ke dzie wotui ɖo.”
[Nɔnɔmetata si le axa 20]
Yuda mazu aƒedo tegbee abe Sodom kple Gomora ene o