Naneke Mate Ŋu ‘Ama Mí Ða Tso Mawu Ƒe Lɔlɔ̃ La Gbɔ O’

 1. Seselelãme ɖedzileameƒo kae ɖea fu na ame geɖe, hekpe ɖe Kristotɔ vavã aɖewo gɔ̃ hã ŋu?

ÐE YEHOWA MAWU lɔ̃ wò ŋutɔŋutɔa? Ame aɖewo lɔ̃ ɖe edzi be Mawu lɔ̃ ameƒome bliboa abe ale si Yohanes 3:16 gblɔe ene. Gake wosenɛ le wo ɖokui me be: ‘Mawu mate ŋu alɔ̃ nye ɖeka ya ŋutɔŋutɔ gbeɖe o.’ Ðikeke ate ŋu aɖo Kristotɔ vavãwo gɔ̃ hã me ɣeaɖewoɣi le go sia me. Esi dzi ɖe le ame aɖe ƒo la, egblɔ be: “Esesẽna nam ŋutɔ be maxɔe ase be Mawu tsɔ ɖe le eme nam.” Ðe ɖikeke mawo tɔgbi ɖoa mewò ɣeaɖewoɣia?

2, 3. Ame kae di be míaxɔe ase be míenye nu maɖinuwo le Yehowa ŋkume alo malɔ̃ mí o, eye aleke míate ŋu aɖu nuŋububu ma dzii?

² Satana di vevie be míaxɔe ase be Yehowa Mawu melɔ̃ mí o eye míele vevie nɛ hã o. Nyateƒee wònye be Satana flua amewo zi geɖe to ɖokuidodoɖedzi kple dada ƒe gbɔgbɔ ƒaƒã ɖe wo me me ya. (2 Korintotɔwo 11:3) Gake edzɔa dzi nɛ hã be yeana ame siwo dzi yeate ŋu adze bɔbɔe la nabui be asixɔxɔ aɖeke mele yewo ŋu o. (Yohanes 7:47-49; 8:13, 44) Ele esia dzi vevietɔ le ‘ŋkeke mamlɛ’ sesẽ siawo me. Egbea ame geɖe tsina le ƒome siwo me amewo “melɔ̃a ame ƒe nya o” me. Ame bubuwo kpea akɔ ɣesiaɣi kple ame siwo nye ame wɔadãwo, ɖokuitɔdilawo kple totrilawo. (2 Timoteo 3:1-5) Fuwɔwɔame, vovototodedeameme, alo fuléle siwo me ame aɖewo to ƒe geɖe ate ŋu ana woabui be asixɔxɔ aɖeke kura mele yewo ŋu o alo be womate ŋu alɔ̃ yewo o.

³ Ne seselelãme ɖedzileameƒo mawo le fu wɔm wò hã la, mègabu mɔkpɔkpɔ o. Ɣeaɖewoɣi mía dometɔ geɖe míebua fɔ mía ɖokui madzemadzee. Gake ɖo ŋku edzi be ɖe Mawu ƒe Nyaa li “na ɖɔɖɔɖo” eye wònye nu si wotsɔna ‘mua nu siwo li ke sesĩe la ƒua anyi.’ (2 Timoteo 3:16; 2 Korintotɔwo 10:4) Biblia gblɔ be: “Míana kakaɖedzi míaƒe dziwo le eŋkume le nu sia nu si me míaƒe dzi abu fɔ mí le la me, elabena Mawu nye gã wu míaƒe dziwo, eye wònya nuwo katã.” (1 Yohanes 3:19, 20) Mina míadzro mɔ ene siwo dzi Ŋɔŋlɔawo kpena ɖe mía ŋu le be “míana kakaɖedzi míaƒe dziwo” be Yehowa lɔ̃ mí la me.

4, 5. Aleke Yesu ƒe kpɔɖeŋu si ku ɖe atsutsrɔewo ŋu ɖee fia be míexɔ asi le Yehowa ŋkume?

⁴ Gbã la, Biblia fia mí tẽe be Mawu kpɔa nu xɔasi aɖe le esubɔlawo dometɔ ɖe sia ɖe me. Le kpɔɖeŋu me, Yesu gblɔ be: “Ðe womedzraa atsutsrɔe eve xɔa gaku ɖeka, si ƒe home le sue ŋutɔ oa? Gake wo dometɔ ɖeka pɛ hã mage adze anyigba le mia Fofo ƒe manyamanya me o. Ke woxlẽ miaƒe taɖawo katã gɔ̃ hã. Eya ta migavɔ̃ o; miexɔ asi sãsãsã wu atsutsrɔe geɖewo.” (Mateo 10:29-31) Bu nu si nya mawo fia na ame siwo nɔ Yesu ƒe nyawo sem le ƒe alafa gbãtɔ me ŋu kpɔ.

⁵ Ðewohĩ ale si wònye atsutsrɔe ye ame aɖe aƒle la awɔ nuku na mí. Gake le Yesu ƒe ŋkekea me la, atsutsrɔe ye nye xevi si ƒe asi bɔbɔ wu ɖe sia ɖe si wotsɔ ɖaa nui. De dzesii be gaku sue ɖeka ye wotsɔ ƒlea atsutsrɔe evee. Gake Yesu gblɔ emegbe be ne wozã gaku sue eve la, woaxɔ atsutsrɔe atɔ̃, menye ene o. Wotsɔa xe ɖeka dea edzi, abe ɖe meɖi naneke o ene. Ðewohĩ xe mawo meɖi naneke le amewo ŋkume o, gake aleke Wɔlaa ya bua woe? Yesu gblɔ be: “Mawu meŋlɔa wo dometɔ ɖeka pɛ [esi wotsɔ de edzi gɔ̃ hã] be o.” (Luka 12:6, 7) Anɔ eme be míele Yesu ƒe nyawo gɔme sem azɔ. Ne Yehowa dea asixɔxɔ atsutsrɔe ɖeka ŋu alea ɖe, ke aleke gbegbe amegbetɔ axɔ asi nɛ ye nye esi! Abe ale si Yesu ɖe emee ene la, Yehowa nya nu sia nu tso mía ŋu. Kpɔe ɖa ko be enya xexlẽme na míaƒe taɖawo gɔ̃ hã!

 6. Nu ka tae míate ŋu aka ɖe edzi be nu ŋutɔŋutɔ gblɔmee Yesu nɔ esi wògblɔ be wonya xexlẽme na míaƒe taɖawo?

⁶ Enya xexlẽme na míaƒe taɖawo nyateƒea? Ame aɖewo abui be esia ya ɖe Yesu nɔ ami ɖem ɖe nyaa. Gake wò ya bu tsitretsitsi mɔkpɔkpɔa ŋu kpɔ. Hafi Yehowa nagbugbɔ mí awɔ la, ke efia be edze si nu sia nu tsitotsito le mía ŋu nyuie ale gbegbe! Edea asixɔxɔ mía ŋu ale gbegbe be eɖoa ŋku míaƒe nu sia nu dzi, si me míaƒe domenyiŋusẽfianu (DNA) kple nu siwo katã míelé ɖe susu me ƒe geɖe kpakple míaƒe nuteƒekpɔkpɔwo katã hã le.a Ne míetsɔe sɔ kple míaƒe taɖawo ƒe xexlẽme—ta ɖe sia ɖe toa ɖa 100,000 le mama dedie nu—la, ke nu tsɛ aɖe ko esia ya nye nɛ.

7, 8. (a) Nu kawoe nye nɔnɔme siwo wòdzɔa dzi na Yehowa be yeakpɔ ne wòle amegbetɔwo ƒe dziwo me dzrom la dometɔ aɖewo? (b) Dɔ siwo míewɔna siwo xɔ asi le Yehowa ŋkume ƒe ɖewoe nye kawo?

⁷ Evelia, Biblia fia nu xɔasi si Yehowa kpɔna le esubɔlawo me la mí. Kpuie ko la, míaƒe nɔnɔme nyuiwo kple míaƒe agbagbadzedzewo dzɔa dzi nɛ. Fia David gblɔ na via Salomo be: “Yehowa dzroa dziwo katã me kpɔna, eye wòdzea si tamesusuwo kple dzimedidiwo katã.” (1 Kronika 28:9) Esi Mawu le ame biliɔn geɖe siwo le xexe sia si me anyrawɔwɔ kple fuléle bɔ ɖo ƒe dziwo me dzrom kpɔ la, aleke gbegbe dzi adzɔe ye nye esi ne eva ke ɖe ame aɖe si ƒe dzi lɔ̃a ŋutifafa, nyateƒe, kple dzɔdzɔenyenye ŋu! Nu kae dzɔna ne Mawu kpɔ ame aɖe si ƒe dzi me yɔ fũu kple lɔlɔ̃ na eyama, ame si di be yeasrɔ̃ nu tso eŋu ahagblɔ sidzedze ma ŋu nya na ame bubuwo? Yehowa gblɔ na mí be yedea dzesi ame siwo ƒoa nu tso ye ŋu na ame bubuwo. Eye “ŋkuɖodzigbalẽ” le Yehowa si gɔ̃ hã na ame siwo katã nye “evɔ̃lawo kple ame siwo dea ŋugble le eƒe ŋkɔ ŋu.” (Malaki 3:16) Nɔnɔme siawo xɔa asi nɛ ŋutɔ.

⁸ Nu kawoe nye dɔ nyui siwo ŋu Yehowa dea asixɔxɔe dometɔ aɖewo? Eyae nye agbagba ɖe sia ɖe si míedzena be míasrɔ̃ Via, Yesu Kristo. (1 Petro 2:21) Dɔ vevitɔ siwo ŋu Mawu dea asixɔxɔe dometɔ ɖekae nye Fiaɖuƒe ŋuti nya nyuia gbɔgblɔ. Míexlẽ le Romatɔwo 10:15 be: “Ame siwo ɖea gbeƒã nu nyuiwo ŋuti nya nyui la ƒe afɔwo nya kpɔ loo!” Zi geɖe míabui be míaƒe afɔ tsɛwo nya kpɔ o. Gake le afi sia wotsi tre ɖi na agbagba siwo dzem Yehowa subɔlawo le le gbeƒãɖeɖe nya nyuia me. Agbagbadzedze siawo katã nya kpɔ eye woxɔ asi le eŋkume.—Mateo 24:14; 28:19, 20.

9, 10. (a) Nu ka tae míate ŋu aka ɖe edzi be Yehowa dea asixɔxɔ míaƒe dzidodo le nɔnɔme sesẽwo me ŋu? (b) Nu manyomanyo kawoe Yehowa mebuna ɖe esubɔla wɔnuteƒewo ŋu gbeɖe o?

⁹ Yehowa dea asixɔxɔ míaƒe dzidodo hã ŋu. (Mateo 24:13) Ðo ŋku edzi be Satana di be nàgbe Yehowa. Ŋkeke sia ŋkeke si nèwɔ nuteƒe na Yehowa la, enye ŋkeke bubu si nèkpe asi ɖe eŋu be woakpɔ nyaŋuɖoɖo na Satana ƒe alɔmeɖeɖewo. (Lododowo 27:11) Dzi menya dona ɣeaɖewoɣi o. Dɔlényawo, gakuxiwo, nuteɖeamedziwo, kple kplamatsɛdonu bubuwo ate ŋu anye dodokpɔ na mí gbe sia gbe. Mɔkpɔkpɔ siwo meva eme o hã ate ŋu aɖe dzi le ame ƒo. (Lododowo 13:12) Dzidodo le nɔnɔme sesẽ siawo me xɔ asi na Yehowa ŋutɔ. Ema tae Fia David bia Yehowa be wòade yeƒe aɖatsiwo “lãgbalẽgolo” me, eye wòyi edzi gblɔ kakaɖedzitɔe be: “Ðe mèŋlɔ wo ɖe wò agbalẽ me oa?” (Psalmo 56:8) Ɛ̃, Yehowa bua aɖatsi siwo katã míefana kple fu siwo katã míekpena le nuteƒewɔwɔ nɛ me la nu xɔasii eye wòɖoa ŋku wo dzi. Nu siawo katã xɔ asi le eƒe ŋkume.

¹⁰ Nya lae nye be dzi si bua fɔ eɖokui ate ŋu agbe kpeɖodzi siawo siwo fia be míexɔ asi le Mawu ŋkume. Ðewohĩ dzia agblɔ na eɖokui be: ‘Gake ame bubu geɖe li siwo ɖoa kpɔɖeŋu nyui wum ɖe. Nye nu madze Yehowa ŋu kura nenye be etsɔm sɔ kple ame mawo o!’ Yehowa metsɔa ame aɖeke sɔna kple nɔvia o; eye eƒe nya me mesẽ hã le eƒe nuŋububu me alo be wòadi nu si míate ŋui o atso mía si o. (Galatiatɔwo 6:4) Nugɔmesese detoe wòtsɔ dzroa míaƒe dziwo me kpɔnae, eye edea asixɔxɔ nɔnɔme nyui siwo le eme ŋu—ne wogale sue ŋutɔ gɔ̃ hã.

11. Nu kae míate ŋu asrɔ̃ tso Yehowa ŋu le ale si wòwɔ nu ɖe Abiya ŋui me?

¹¹ Etɔ̃lia, ne Yehowa le mía me dzrom la, etsɔa beléle sraa mía me, hedia nɔnɔme nyuiawo. Le kpɔɖeŋu me, esi Yehowa de se be woawu Fia Yeroboam ƒe fiaƒome blibo si gbe xɔse la, Eɖe gbe be woaɖi Abiya, fia viŋutsuawo dometɔ ɖeka, bubutɔe. Nu ka tae? “Yehowa, Israel ƒe Mawu la kpɔ nu nyui aɖe” le eme. (1 Fiawo 14:1, 10-13) Ne míagblɔe la, Yehowa dzro ɖekakpui ma ƒe dzi me eye wòke ɖe “nu nyui aɖe” ŋu le eme. Aleke kee nu nyui ma le sue alo dze nu maɖinui o, Yehowa kpɔe be asixɔxɔ le eŋu eye wòdee eƒe Nya la me. Eɖo eteƒe nɛ gɔ̃ hã, heɖe nublanuikpɔkpɔ si sɔ fia ƒome si gbe xɔse la me tɔ ɖeka ma.

12, 13. (a) Aleke Fia Yehosafat ƒe ŋutinyaa ɖee fia be Yehowa kpɔa nɔnɔme nyui siwo le mía me ne míewɔ nu vɔ̃ gɔ̃ hã? (b) Le míaƒe dɔ nyuiwo wɔwɔ kple nɔnɔme nyuiwo gome la, aleke Yehowa nye Dzila lɔ̃ame si ƒo ɖe sia ɖe tae?

¹² Míate ŋu akpɔ kpɔɖeŋu bubu si nyo wu kura le Fia nyui Yehosafat gome. Esi fia la wɔ bometsinu aɖe la, Yehowa ƒe nyagblɔɖila gblɔ nɛ be: “Le esia ta Yehowa do dziku ɖe ŋuwò.” Nya sia ŋu bubu atɔ dzi na ame loo! Gake Yehowa ƒe gbedeasia mese ɖe afi ma o. Eyi edzi be: “Gake wokpɔ nu nyui aɖewo le ŋuwò.” (2 Kronika 19:1-3) Eya ta Yehowa ƒe dɔmedzoe dzɔdzɔe si wòdo la megbã ŋku nɛ wògbe nyuiwɔwɔ si le Yehosafat me la kpɔkpɔ o. Aleke gbegbe wòto vovo na amegbetɔ madeblibowoe nye esi! Ne míedo dziku ɖe amewo ŋu la, míete ŋu gakpɔa nɔnɔme nyui siwo le wo me la dzea sii o. Eye ne míewɔ nu vɔ̃ la, mɔkpɔkpɔbuɖeame, ŋukpe kple fɔɖiɖi si míesena la ate ŋu agbã ŋku na mí míagbe nɔnɔme nyui siwo le mía me kpɔkpɔ. Gake ɖo ŋku edzi be Yehowa tsɔa míaƒe nu vɔ̃wo kea mí ne míetrɔ dzi me eye míeʋli vevie be míagawɔ wo ake o.

¹³ Ne Yehowa le mewò dzrom la, eɖea asi le nu vɔ̃ mawo ŋu, abe ale si ame si le tome kum le sika dim la ɖea asi le kpe maɖinuwo ŋui ene. Ke wò nɔnɔme nyuiwo kple dɔ nyuiwo ya ɖe? Ɛhɛ̃, esiawoe nye “kpe xɔasi” siwo wòfɔna! Èkpɔ ale si dzila lɔ̃amewo dea asixɔxɔ wo viwo ƒe nutatawo alo sukudɔdeasi aɖewo ŋu, wònɔa wo si ƒe geɖe esime ɖeviawo ya ŋlɔ woƒe dɔwɔna ma be teƒe kpɔa? Yehowae nye Dzila si lɔ̃a ame wu ɖe sia ɖe. Zi ale si míeyi edzi wɔa nuteƒe nɛ ko la, maŋlɔ dɔ nyui kple nɔnɔme nyui siwo le mía me la be akpɔ gbeɖe o. Le nyateƒe me la, ebunɛ nu madzɔmadzɔ be yeaŋlɔ nu siawo be, eye mewɔa nu madzɔmadzɔ gbeɖe o. (Hebritɔwo 6:10) Egasraa mía me le mɔ bubu aɖe hã nu.

14, 15. (a) Nu ka tae míaƒe blibomademadewo mena Yehowa gbea nyui siwo le mía me la kpɔkpɔ o? Wɔ eƒe kpɔɖeŋu. (b) Nu kae Yehowa awɔ tso nɔnɔme nyui siwo wòkpɔna le mía me ŋu, eye aleke wòbua eƒe ame wɔnuteƒewoe?

¹⁴ Yehowa kpɔa nu yia ŋgɔ wu míaƒe blibomademadewo ko hekpɔa míaƒe ŋutetewo. Eƒe kpɔɖeŋue nye esi: Ame siwo lɔ̃a nutatawo la wɔa nu sia nu si woate ŋui be yewoaɖɔ nɔnɔmetata aɖe si ƒe akpa aɖe gblẽ vevie la ɖo. Le kpɔɖeŋu me, esi ame aɖe da tu wògblẽ Leonardo da Vinci ƒe nɔnɔmetata, si ƒe home ade dɔlar miliɔn 30, le Dukɔa ƒe Nutatawo Dzraɖoƒe le London, England la, meva susu me na ame aɖeke be esi wogblẽ nutataa ko la, woatsɔe aƒu gbe o. Wodze dɔ gɔme enumake be woaɖɔ nutata dzeani si xɔ ƒe 500 la ɖo enumake. Nu ka tae? Le ale si nutata lɔ̃lawo dea asixɔxɔ dɔ ma ŋui tae. Ðe mèxɔ asi wu akalo kple aŋɔ nutata oa? Èxɔ asi vevie ŋutɔ le Mawu ŋkume—aleke kee blibomademade si ƒe dome míenyi gblẽ nu le ŋuwòe hã o. (Psalmo 72:12-14) Yehowa Mawu, Wɔla aɖaŋudzela si wɔ amegbetɔƒomea, awɔ nu sia nu si hiã atsɔ aɖɔ ame siwo katã wɔ afɔɖeɖe si sɔ ɖe eƒe belélename lɔlɔ̃tɔe ŋu la ɖo ale be woaɖo blibodede gbɔ.—Dɔwɔwɔwo 3:21; Romatɔwo 8:20-22.

¹⁵ Ɛ̃, Yehowa kpɔa nɔnɔme nyui siwo mía ŋutɔwo míekpɔna le mía me o gɔ̃ hã. Eye ne míeyi edzi subɔe la, ana nyuiawo natsi ɖe edzi le mía me ʋuu va se ɖe esime míaɖo blibodede gbɔ. Eɖanye aleke kee Satana ƒe xexea awɔ nu ɖe mía ŋui o, Yehowa dea asixɔxɔ esubɔla wɔnuteƒewo ŋu be wonye ame veviwo.—Hagai 2:7.

16. Nu kae nye kpeɖodzi gãtɔ be Yehowa lɔ̃ mí, eye aleke míewɔ nya be míawo tae wòtsɔ nunana sia na ɖo?

¹⁶ Enelia, Yehowa wɔa nu geɖe tsɔ ɖoa kpe eƒe lɔlɔ̃ dzi na mí. Ðikekemanɔmee la, Kristo ƒe tafevɔsa lae nye alakpa si Satana da be míenye ame maɖinuwo alo ame siwo womalɔ̃ o la ƒe ŋuɖoɖo gãtɔ kekeake. Mele be míaŋlɔ be gbeɖe o be vevesese si Yesu tsɔ kui le fuwɔametia ŋu kple veve helĩhelĩ si Yehowa se le Via lɔlɔ̃a ƒe ku teƒe kpɔkpɔ me la nye kpeɖodzi be wolɔ̃ mí. Nublanuitɔe la, esesẽ na ame geɖe be woaxɔe ase be yewo tae wotsɔ nunana sia na ɖo. Wobunɛ be yewomedze nɛ o. Gake ɖo ŋku edzi be apostolo Paulo nye ame si ti Kristo yomedzelawo yome tsã. Ke hã eŋlɔ be: ‘Mawu ƒe Vi la lɔ̃m eye wòtsɔ eɖokui na ɖe tanye.’—Galatiatɔwo 1:13; 2:20.

17. Mɔ kawo dzie Yehowa tona hea mí vaa eɖokui kple Via gbɔe?

¹⁷ Yehowa ɖoa kpe eƒe lɔlɔ̃ na mí dzi to kpekpe ɖe mía dometɔ ɖe sia ɖe ŋu be míawɔ Kristo ƒe vɔsa ƒe viɖewo ŋu dɔ me. Yesu gblɔ be: “Ame aɖeke mate ŋu ava gbɔnye o, negbe ɖe Fofo si dɔm ɖa la, hee vɛ.” (Yohanes 6:44) Ɛ̃, Yehowa ŋutɔ hea mí vaa Via kpakple agbe mavɔ nɔnɔ ƒe mɔkpɔkpɔa gbɔ. Le mɔ ka nu? To gbeƒãɖeɖedɔ si va ɖoa mía gbɔ ɖekaɖeka dzi, kpakple to Yehowa ƒe gbɔgbɔ kɔkɔe si wòzãna tsɔ kpena ɖe mía ŋu be míase gbɔgbɔ me nyateƒewo gɔme ahawɔ wo ŋu dɔ togbɔ be gbɔdzɔgbɔdzɔwo le mía ŋu eye míenye ame madeblibowo gɔ̃ hã dzi. Le esia ta Yehowa ate ŋu agblɔ le mía ŋu abe ale si wògblɔ le Israel ŋu ene be: “Metsɔ lɔlɔ̃ mavɔ lɔ̃ wò. Esia tae meve nuwò eye mehe wò ɖe ɖokuinye ŋu ɖo.”—Yeremiya 31:3.

18, 19. (a) Mɔ ka dzie Yehowa ɖea eƒe lɔlɔ̃ si me ƒomedodo kplikplikpli le fiaa mí le, eye nu kae fia be eya ŋutɔe kpɔa esia gbɔ? (b) Aleke Mawu ƒe Nya la ka ɖe edzi na mí be Yehowa nye toɖola veveseɖeamenula?

¹⁸ Ðewohĩ gbedodoɖa ƒe mɔnukpɔkpɔa dzie míetona kpɔa Yehowa ƒe lɔlɔ̃ si me ƒomedodo kplikplikpli le na mí wu. Biblia kpe mía dometɔ ɖe sia ɖe be ‘míanɔ gbedodoɖa dzi ɣeawokatãɣi.’ (1 Tesalonikatɔwo 5:17) Eɖoa to senɛ. Woyɔe gɔ̃ hã be enye “Gbedodoɖasela.” (Psalmo 65:2) Metsɔ ɖoƒe sia na ame bubu aɖeke o, metsɔe na eya ŋutɔ Via hã o. Bu eŋu kpɔ ko: Xexe bliboa katã Wɔla le mía kpem be míate ɖe ye ŋu le gbedodoɖa me, míaɖe dzi ɖi faa aƒo nu. Eye toɖola ka ƒomevie wònye? Ðe wònye vevemaseɖeamenula, ɖekematsɔlemetɔ, alo ame si dzi nu mewɔa dɔ ɖo oa? Kura o.

¹⁹ Yehowa sea veve ɖe ame nu. Nu kae nye veveseseɖeamenu? Kristotɔ tsitsi nuteƒewɔla aɖe gblɔ be: “Veveseseɖeamenu nye veve si nye dzi sena ɖe wò vevesese nu.” Ðe Yehowa sea míaƒe vevesesewo le eɖokui mea? Míexlẽ le eƒe dukɔ Israel ƒe fukpekpewo ŋu be: “Le woƒe vevesesewo katã me la, eya hã se veve.” (Yesaya 63:9) Menye ɖe Yehowa kpɔ ameawo ƒe xaxawo ko o; ese veve ɖe wo nu ŋutɔŋutɔ. Ale si gbegbe Yehowa sena le eɖokui me la dze le eya ŋutɔ ƒe nya siwo wògblɔ na esubɔlawo me be: “Ame si ka asi mia ŋu la ka asi nye gadaglamakui ŋu.”b (Zakariya 2:8) Aleke gbegbe ema avee ye nye esi! Ɛ̃, Yehowa sea veve ɖe mía nu. Ne míele veve sem la, esea veve.

20. Susu si meda sɔ o kae wòle be míatsri le nuxlɔ̃ame si le Romatɔwo 12:3 dzi wɔwɔ me?

²⁰ Kristotɔ si da sɔ manɔ te ɖe Mawu ƒe lɔlɔ̃ na mí kple asixɔxɔ dede mía ŋu ƒe kpeɖodzi sia dzi ada eɖokui alo abu eɖokui ame vevii wu ale si wòle o. Apostolo Paulo ŋlɔ be: “To amenuveve si wonam me la, mele egblɔm na mia dometɔ ɖe sia ɖe be wòagabu eɖokui ŋu wu ale si dze o, ke boŋ be wòabu ale si wòanɔ ŋute le susu me ŋu, ame sia ame le xɔse ƒe dzidze si Mawu nɛ la nu.” (Romatɔwo 12:3) Biblia gɔmeɖeɖe bubu gblɔ le afi sia be: “Mele egblɔm na mia dometɔ ɖe sia ɖe be wòagabu eɖokui wòagbɔ asixɔxɔ si tututu le eŋu la o, ke boŋ wòabu eɖokui ale si dze.” (A Translation in the Language of the People, si gɔme Charles B. Williams ɖe) Eya ta esi mía Fofo si le dziƒo ƒe lɔlɔ̃ na mí naa dzi dzɔa mí la, mina míada asɔ le míaƒe nuŋububu me ahaɖo ŋku edzi be menye ɖe míaƒe dɔwɔwɔwo alo esi míedze nɛ tae Mawu lɔ̃ mí ɖo o.—Luka 17:10.

21. Satana ƒe alakpanya kawoe wòle be míagbe ɣesiaɣi, eye Mawu ƒe nyateƒenya ka dzie wòle be míayi edzi aka ɖo le míaƒe dzi blibo me?

²¹ Mina mí katã míawɔ nu sia nu si míate ŋui atsri Satana ƒe alakpanyawo katã, si ƒe ɖee nye be míenye ame maɖinuwo alo ame siwo womalɔ̃ o. Ne nu siwo me nèto le agbe me na nèkpɔa ɖokuiwò mɔxenu gã si dzi Mawu ƒe lɔlɔ̃ deto gɔ̃ hã mate ŋu akpe o, alo nèbua wò dɔ nyui wɔwɔwo nu maɖinui ale gbegbe be eƒe ŋku si kpɔa nu sia nu gɔ̃ hã mate ŋu akpɔ wo o, alo nèbua wò nu vɔ̃wo be wololo akpa ale be Via xɔasia ƒe ku gɔ̃ hã mate ŋu alé avu ɖe wo ta o la, ke alakpae, ɖe èble ɖokuiwò. Gbe alakpanya mawo katã tso wò dzi blibo me! Mina míayi edzi aka ɖe nyateƒenya siawo siwo gbɔgbɔ ʋã Paulo wògblɔ la dzi na míaƒe dzi, be: “Elabena meka ɖe edzi bliboe be, eɖanye ku o, eɖanye agbe o, eɖanye mawudɔlawo o, eɖanye dziɖuɖuwo o, eɖanye nu siwo li fifia o, eɖanye nu siwo le vava ge o, eɖanye ŋusẽwo o, eɖanye kɔkɔƒe o, eɖanye gogloƒe alo nuwɔwɔ bubu aɖe o, mate ŋu ama mí ɖa tso Mawu ƒe lɔlɔ̃ si le Kristo Yesu, mía Aƒetɔ, me la gbɔ o.”—Romatɔwo 8:38, 39.