Sɔhɛwo Biana Be . . .

Vidzinuɖekatɔwo ƒe Gbɔdɔdɔ Ðe Wògblẽ Nenema Gbegbea?

“Ŋutsu kple ŋutsu ƒe dɔdɔ ƒe dzodzrowo nɔ menye tso ɖevime ke. Esi nyemenya nusi wonye o ta la, nyemeɖɔ ŋu ɖo o. Esia na mewɔ nu gbegblẽ vɔ̃ɖi aɖe kple xɔ̃nye aɖe. Mese le ɖokuinye me vevie be meɖi fɔ, eye mebu be Yehowa matsɔe akem gbeɖe o.”

“TELEVISION le Mía Viwo Blem De Vidzinuɖekatɔwo ƒe Gbɔdɔdɔ Me.” Esiae nye nyati aɖe si nyadzɔdzɔgbalẽtaha aɖe ƒe nuŋlɔla ŋlɔ ƒe tanya. Nuŋlɔla la gblɔ be: “Woɖea nusiwo doa vidzinuɖekatɔwo ƒe gbɔdɔdɔ ɖe ŋgɔ la ƒe agbɔsɔsɔ [si gbɔ eme] fiana le television dzi amewo kpɔna.” Nu geɖe siwo zãm wole egbea tsɔ le vidzinuɖekatɔwo ƒe gbɔdɔdɔ kakam ɖe sɔhɛwo dome ƒe mɔnu ɖeka koe television nye. Nufialawo, zɔhɛwo, sinimawo, agbalẽwo, kple magazinewo hã le vidzinuɖekatɔwo ƒe gbɔdɔdɔ ŋu nyawo kakam.

Atikewɔlawo hã va de amesiwo doa gbɔdɔdɔnuwɔna sia ɖe ŋgɔ dzi. Ðɔktawo bua nuwɔna sia tsã be enye dɔléle. Gake le ƒe 1973 me la, Amerika Tagbɔdɔléle Dɔdaha gblɔ be womagabu vidzinuɖekatɔwo ƒe gbɔdɔdɔ be enye tsukunuwɔwɔ azɔ o. Tso ɣemaɣi la, esusɔ vie ko atikewɔla geɖe nada asi ɖe vidzinuɖekatɔwo ƒe gbɔdɔdɔ dzi be esɔ. Le kpɔɖeŋu me, tagbɔdɔdala Albert Ellis gblɔ be vidzinuɖekatɔwo ƒe gbɔdɔdɔ “megblẽ kura o ke enye amegbetɔ ƒe gbɔdɔdɔnuwɔna si nyo. . . . Àte ŋu awɔe ne èlɔ̃ eye mègana ame aɖeke nable wò nàxɔe ase be ‘menyo o’ alo ana ‘wòaɖe fu na wò o.’ ”

Nukpɔsusu siawo kaka ale gbegbe be Newsweek magazine ka nya ta be: “Nyadzɔdzɔgbalẽwo me nyawo kple nɔnɔmetatawo kpakple mɔɖeɖeɖenuŋu ƒe nɔnɔme si li fifia de dzo ƒewuiviwo me ɖe vidzinuɖekatɔwo kple ŋutsuwo kple nyɔnuwo ƒe gbɔdɔdɔ ŋu.” Togbɔ be ƒewuiviwo tsri nuwɔna sia vevie tsã hã la, manye nyakpakpa kpe nya ne wogblɔ be sɔhɛ gbogbo aɖewo le ebum fifia be eyae le “tsia dzi” o. Zi geɖe la, sɔhɛ siwo meƒoa wo ɖokui ɖe vidzinuɖekatɔwo ƒe gbɔdɔdɔ me o gɔ̃ hã lɔ̃a amesiwo wɔnɛ ƒe nya. Sɔhɛ aɖe si ŋkɔe nye Darren gblɔ be: “Mesusu be ne xɔ̃nye aɖe gblɔ nam be yewɔe kpɔ hã la, makpɔtɔ anye exɔlɔ̃.” Kɔledzivi dzaa aɖe gɔ̃ hã gblɔ vevesesetɔe be ɖewohĩ yemele ame me tututu o, elabena “nyɔnuviwo ko melɔ̃na”!

Eyata agbegbegblẽnuwɔna si bɔ egbea ate ŋu atɔtɔ Kristotɔ sɔhɛwo—vevietɔ esiwo, le susu aɖe ta wo hati ŋutsu alo nyɔnu ƒe nu léa dzi na la.a Wonya be vidzinuɖekatɔwo ƒe gbɔdɔdɔ medzea Mawu ŋu o eye wodina vevie be yewoaƒo asa nɛ. Gake woƒe seselelãmewo dzi ɖuɖu ate ŋu asesẽ na wo ɣeaɖewoɣi ale gbegbe be ɖewohĩ woava nɔ ebum nenye be Biblia ƒe nukpɔsusu le nya sia ŋu sɔ alo susu le eme. Ðewohĩ woabia be ‘Ðe vidzinuɖekatɔwo ƒe gbɔdɔdɔ gblẽ nenema gbegbea?’

Nya si Mawu ƒe Nya la Gblɔ

Wò ŋutɔ xlẽ nya si apostolo Paulo gblɔ le Korintotɔwo I, 6:9, 10 nàtsɔ aɖo eŋui: “Alo mienyae bena, ame madzɔmadzɔwo manyi mawufiaɖuƒe la ƒe dome oa? Migana woable mi o: Ahasiwɔlawo kple trɔ̃subɔlawo kple matrewɔlawo kple hadzelawo [“ŋutsu wɔgbolowo,” New International Version; “nyɔnunuwɔlawo,” King James Version], kple ŋutsu, siwo dɔna kple ŋutsuwo [“Sodomtɔwo,” Jerusalem Bible; “ŋutsu dɔwonɔewogbɔ ƒe nutovowɔlawo,” Today’s English Version], kple fiafitɔwo kple ŋubiãlawo kple ahamulawo kple busubɔlawo kple adzodalawo la womanyi mawufiaɖuƒe la ƒe dome o.” De dzesii be Paulo yɔ amesiwo edze ƒã be woɖea mɔ wozãa wo le gbɔdɔdɔ me kple amesiwo tɔ vɔ̃ɖi wu siwo dɔa “ŋutsuwo” gbɔ la tẽ. Eyata ena eme kɔ ƒã be Mawu tsri vidzinuɖekatɔwo ƒe gbɔdɔdɔ ɖesiaɖe ƒomevi.

Esia gadze le Paulo ƒe nya siwo le Romatɔwo 1:18-27 me be: “Woɖe Mawu ƒe dziku ɖe go tso dziƒo ɖe amegbetɔwo ƒe mawumavɔ̃mavɔ̃ kple madzɔmadzɔnyenye katã dzi, amesiwo xea mɔ na nyateƒe le madzɔmadzɔnyenye me . . . Eyata le woƒe dziwo ƒe nudzodzrowo me la, Mawu tsɔ wo de asi na makɔmakɔnyenye, bene woado ŋunyɔ woƒe ŋutilãwo le wo nɔewo dome . . . Eyaŋuti Mawu tsɔ wo de asi na ahɔhlɔ̃bɔbɔ yomenɔnɔ, elabena woƒe nyɔnuwo tsɔ dzɔdzɔme ƒe kɔnu wɔ nusi mele dzɔdzɔme nu o; nenema ke woƒe ŋutsuwo hã gblẽ nyɔnuwo ƒe dzɔdzɔmekɔnu ɖi, eye wofiã le woƒe fiẽŋufiẽŋui me ɖe wo nɔewo ŋu, eye ŋutsu kple ŋutsu wɔ ŋukpenanuwo.” Paulo gblɔ le afisia kaŋ be ŋutsu kple ŋutsu kple nyɔnu kple nyɔnu ƒe gbɔdɔdɔ menyo o. Ebu fɔ vidzinuɖekatɔwo ƒe gbɔdɔdɔ be mele dzɔdzɔme nu o eye be enye “ŋukpenanu.”

Enyo alo Menyo O?

Ðewohĩ ame geɖe aɖo nya sia ŋu agblɔ be Biblia ƒe nukpɔsusu nye blemanya alo tsigãdzinu. Gake ne èbu eŋu la, amekae nya míaƒe ŋutilã, susu, seselelãme, kple gbɔgbɔ me ƒe nɔnɔme de mía Wɔla nu? Mawue wɔ ŋutsu kple nyɔnu eye wòdee wo me be woƒe nu nalé dzi na wo nɔewo vevie. (Mose I, 1:​27, 28) Mewɔ wo be amesi ƒe vidzinu sɔ kple nɔvia tɔ gbɔ dɔdɔ nadzro wo o. Hekpe ɖe eŋu la, Mawu ɖoe be srɔ̃ɖeɖoɖoa me ko ŋutsu kple nyɔnu adɔ wo nɔewo gbɔ le.—Hebritɔwo 13:⁠4.

Esia mena agbenɔnɔ sesẽ na mí o. Yehowa Mawu gblɔ le Yesaya 48:​17 be yee nye “Amesi fia nusi nyo na wò la wò.” Ẽ, enya nusi ɖea vi na mí kple nusi wɔa nuvevi mí. Togbɔ be Biblia ƒe nufiafiawo dzi wɔwɔ ate ŋu asesẽ na ame aɖewo hã lã, wonye ‘nufiafia nyuiwo,’ wonyo na susu kple ŋutilã la ɣesiaɣi. (Tito 2:⁠1) Gake vidzinuɖekatɔwo ƒe gbɔdɔdɔ ya agblẽ nu le ame ŋu kokoko le ŋutilã, seselelãme, kple gbɔgbɔ me.

AIDS-dɔlélea nye alesi vidzinuɖekatɔwo ƒe gbɔdɔdɔ menyo o ƒe kpɔɖeŋu aɖe. Le Anyiehe Amerika la, ŋutsu siwo dɔna kple ŋutsuwo koŋ ye nye amesiwo te ŋu xɔa dɔlélea bɔbɔe wu. Gake dɔléle gbogbo siwo gbã ɖi​—⁠aklãtetedɔ, aklãdɔlélewo, babadɔ, agbadzà, kple dɔgbo me dɔlékuiwo​—⁠siwo dzea ŋutsu kple ŋutsu kpakple nyɔnu kple nyɔnu siwo dɔa wo nɔewo gbɔ dzi zi geɖe dometɔ ɖeka koe AIDS nye. Nukae na dɔlélewo le kakam alea? Ðk. Joseph Nicolosi ɖe eme be: “Nuŋlɔla geɖe ŋlɔ kpeɖodzinya siwo fia be alesi vidzinuɖekatɔwo ƒe gbɔdɔdɔ ƒe nuwɔna nye numãme si dzi menya ɖuna o gbɔe wòtso.” Numekuku deto aɖe ɖee fia be “ŋutsu siwo dɔna kple ŋutsuwo dometɔ 28 le alafa me dɔ ame akpe ɖeka alo esi wu nenema gbɔ kpɔ. . . . yevuŋutsu siwo dɔna kple ŋutsuwo ƒe afã kloe . . . gblɔ be yewodɔ ame vovovo 500 ya teti gbɔ kpɔ.”

Agbalẽ si nye Homosexual Behavior ɖe eme be ŋutsu siwo dɔna kple ŋutsuwo dometɔ geɖe “vɔ̃na be nuteƒewɔwɔ na ame nɔewo, lɔlɔ̃, alo agbanɔamedziwo tsɔtsɔ ƒe ƒomedodo ava ɖo yewo dome . . . Gbɔdɔdɔ si mele dzɔdzɔme nu o ƒe dzodzro nu te ŋu sẽna ŋutɔ ɣeaɖewoɣi. Amesiawo dometɔ aɖewo ate ŋu adɔ ame ewo alo esi wu nenema gbɔ le ŋkeke alo zã ɖeka ko me.” Ðe ɖokuidzimaɖumaɖu ƒe nuwɔna sia ate ŋu anye nu nyuia? Ðe mevlo heɖi gbɔ boŋ oa? Edze ƒã be amesiwo kpɔa gome le agbegbegblẽnɔnɔ vɔ̃ɖi sia me nye “gbegblẽ ƒe dɔlawo.”—Petro II, 2:⁠19.

Hekpe ɖe eŋu la, vidzinuɖekatɔwo ƒe gbɔdɔdɔ geɖe nyea ŋɔdzi, ŋutasesẽ, kple nuveviwɔame vɔ̃ɖi. Apostolo Paulo gblɔ be: “Nusiwo wowɔ le ɣaɣlaƒe la, enye ŋukpe be woaƒo nu le wo ŋuti gɔ̃ hã.” (Efesotɔwo 5:12) Ŋutasẽnuwɔna sia ɖe dɔmedzoe kple vevesese si ɣla ɖe “dzidzɔ” si wobe yewokpɔna te la fia. Nyateƒee, ŋutsu kple nyɔnu siwo dɔa wo tɔ ŋutsu kple nyɔnu bubuwo gbɔ dometɔ aɖewo gblɔ be yewomedɔna kple ame geɖe o. Gake ŋutsu alo nyɔnu siwo dɔa wo tɔ ŋutsu alo nyɔnu “ɖeka” gbɔ la le ʋee​—⁠eye ɣeyiɣi kpui aɖe ko woƒe ƒomedodo nɔa anyi. Ne vidzinuɖekatɔwo ƒe gbɔdɔdɔ ƒe ƒomedodo anɔ anyi didi hã la, mate ŋu anye lɔlɔ̃ si ŋu Biblia ƒo nu tso gbeɖe o. Lɔlɔ̃ ma “mewɔa nusi medze o.”—Korintotɔwo I, 13:​4, 5.

Emetsonuwo

Paulo gblɔ le Romatɔwo 1:27 be: “Ŋutsu kple ŋutsu wɔ ŋukpenanuwo, eye wokpɔ woƒe vodada ŋuti fetu, si dze wo la, le wo ɖokui ŋu.” Le mɔ kawo nu? Ðekae nye be agbalẽ si nye Homosexual Behavior gblɔ be: “Ahatsunono kple ezazã madzemadzee wɔa fu nyɔnu siwo dɔna kple nyɔnuwo vevie wu nyɔnu siwo dɔa ŋutsuwo gbɔ.” Numekula aɖewo hã gblɔ be ameɖokuiwuwu bɔ ɖe ŋutsuvi siwo dɔa wo tɔ ŋutsuwo gbɔ dome wu.

Nusi wògblẽna le ame ƒe gbɔgbɔmemenyenye ŋue vlo wu wo katã. Ŋutsu kple nyɔnu siwo dɔa wo tɔ ŋutsu kple nyɔnu bubuwo gbɔ “ƒe nyasã do viviti, eye wonye amedzrowo le Mawu ƒe agbe la gome.” (Efesotɔwo 4:⁠18) Ke sɔhɛ Mawuvɔ̃la siwo togbɔ be wonya Biblia ƒe gɔmeɖosewo hã la, amesiwo ƒe vidzinuwo sɔ kple wo tɔ ƒe nu léa dzi na wo ya ɖe? Edze ƒã be aʋa gã aɖe le wo ŋgɔ woawɔ. Le nyateƒe me la, ne ame mawo nya alesi Mawu bua vidzinuɖekatɔwo ƒe gbɔdɔdɔe la, akpe ɖe wo ŋu “[woatsri] nuvɔ̃.” (Romatɔwo 12:⁠9) Afɔ nyui geɖe hã li woate ŋu aɖe be dzodzro vɔ̃wo magaɖu wo dzi o. Nyati aɖe si ava la adzro esia me.

[Etenuŋɔŋlɔ]

[Nɔnɔmetata si le axa 9]

Ame geɖe gbɔ dɔdɔ, seselelãme ƒe tɔtɔ, kple dɔléle ye bɔna ɖe vidzinuɖekatɔwo ƒe gbɔdɔdɔ me