Nukae Hiã Bene Srɔ̃ɖeɖe Me Nanyo?

Ne mèsrɔ̃ tsiƒuƒu gbã o ɖe, àlɔ̃ adzo dze tɔsisi mea? Bometsinu sia wɔwɔ ate ŋu ahe afɔku vɛ—ate ŋu awu wò gɔ̃ hã. Gake de ŋugble le ame gbogbo siwo tsɔa dzitsitsi ɖea srɔ̃ evɔ womenya nu boo tso alesi woatsɔ agbanɔamedzi siwo le eme o ŋu kpɔ.

YESU gblɔ be: “Ameka le mia dome, ne ele didim be, yeatu mɔ̃ la, mabɔbɔ nɔ anyi gbã, eye wòabu eŋu kɔnta, ne nu le esi, be wòawu enu la o mahã?” (Luka 14:28) Alesi dzadzraɖo wɔwɔ hiã hena mɔ̃ tutu la, nenema ke wòhiã na srɔ̃ɖeɖe hãe. Ele be amesiwo di be yewoaɖe srɔ̃ la nabu eŋu kɔnta nyuie kakaɖedzi nanɔ wo si be yewoate ŋu akpɔ emenyawo gbɔ.

Ŋkuléle Ðe Srɔ̃ɖeɖe Ŋu

Yayrae wònye ne srɔ̃ si akpɔ dzidzɔ ahafa konyi kple ame le agbemenyawo me la le ame si. Srɔ̃ɖeɖe ate ŋu axe ʋe si akogotsitsi alo dziɖeleameƒo ɖena ɖi. Ate ŋu ana dzɔdzɔmedidi sẽŋu si le mía me na lɔlɔ̃, hadede, kple xɔlɔ̃wɔwɔ kplikplikpli la naka mía si. Susu nyui aɖe tae esime Mawu wɔ Adam vɔ la, wògblɔ be: “Menyo bena ame la natsi akogo o; mawɔ kpeɖeŋutɔ, si asɔ ɖe eŋu la nɛ.”—Mose I, 2:18; 24:67; Korintotɔwo I, 7:9.

Ẽ, woate ŋu akpɔ ta na kuxi aɖewo ne woɖe srɔ̃. Gake ahe yeye aɖewo hã vɛ. Nukatae? Elabena srɔ̃ɖeɖe nye ame vovovo eve siwo ɖewohĩ woate ŋu anɔ anyi ɖekae evɔ womesɔ kura o ƒe anyinɔnɔ. Eyata masɔmasɔ ate ŋu aɖo srɔ̃tɔ siwo sɔ na wo nɔewo nyuie gɔ̃ hã dome. Kristotɔ apostolo Paulo ŋlɔ be amesiwo ɖe srɔ̃ la “akpɔ xaxa le ŋutilã me”—alo abe alesi The New English Bible ɖe emee ene la, “woase veve ahaxa nu le ŋutilãmegbenɔnɔ sia me.”—Korintotɔwo I, 7:28.

Ðe Paulo le gbɔgblɔm be eme manyo oa? Menye nenema kura o! Ðeko wònɔ dzi dem ƒo na amesiwo le srɔ̃ɖeɖe ŋu bum be woanya alesi nuwo le ŋutɔŋutɔ. Dzi si dzɔa ame ne ame ƒe nu lé dzi na nɔvia menye nu nyuitɔ si dzi woanɔ te ɖo anya alesi srɔ̃ɖegbenɔnɔ ava nɔ le ɣleti kple ƒe siwo akplɔ srɔ̃kpegbea ɖo me o. Srɔ̃ɖeɖe ɖesiaɖe ƒe gbetɔamewo kple kuxiwo le etɔxɛ. Menye be míanya be kuxiwo ava loo alo womava o ye nye nyaa o ke alesi míakpɔ wo gbɔ ne wodo mo ɖae nye nyaa.

Kuxiwo naa mɔnukpɔkpɔ atsu kple asi be woaɖe woƒe lɔlɔ̃ ƒe nuvãnyenye afia wo nɔewo. Le kpɔɖeŋu me: Meli si me wonɔna ɖia tsa adze esi ŋu ŋusẽ le ŋutɔ esime wode sekee wòli kpoo le ʋudzeƒe. Gake aɖo ƒu dzi hafi woanya nenye be enyo be woaɖoe azɔ ƒu dzi—ne ɖewohĩ ate ŋu ato ahomya ƒe ƒutsotsoe sesẽwo me gɔ̃ hã. Nenema ke womate ŋu anɔ te ɖe ɣeyiɣi si me tomefafa li eye wole lɔlɔ̃ ɖem fia wo nɔewo ko dzi anya srɔ̃ɖekadodoa ƒe sesẽme o. Ɣeaɖewoɣi la, ne srɔ̃tɔawo ɖo nɔnɔme sesẽwo me eye wote ŋu nɔ te ɖe xaxaawo nu ko hafi woɖoa kpe edzi.

Be wòanya wɔ la, srɔ̃tɔawo hiã ɖokuitsɔtsɔna, elabena ɖe Mawu ɖoe be ŋutsu “[naku] ɖe srɔ̃a ŋuti” eye be ame evea ‘nazu ŋutilã ɖeka.’ (Mose I, 2:24) Ðokuitsɔtsɔna ƒe nya la doa vɔvɔ̃ na ame geɖe egbea. Gake ɖeko wònyo be ame eve siwo lɔ̃ wo nɔewo nyateƒe la nadi be yewoado ŋugbe vevi aɖe be yewoanɔ anyi ɖekae. Ðokuitsɔtsɔna naa bubu nɔa srɔ̃ɖeɖea ŋu. Ena kakaɖedzi nɔa anyi be nuka kee adzɔ o, atsu kple asi la ado alɔ wo nɔewo.a Ne mèle klalo be yeatsɔ ye ɖokui ana alea o la, ke mèle klalo ŋutɔŋutɔ na srɔ̃ɖeɖe o. (Tsɔe sɔ kple Nyagblɔla 5:4, 5.) Ahiã be amesiwo ɖe srɔ̃ xoxo gɔ̃ hã nagadzi alesi wose ɖokuitsɔtsɔna ƒe vevienyenye le srɔ̃ɖeɖe ƒe kelili me gɔmee ɖe edzi.

Ðokuiwò me Dzodzro

Ðikeke mele eme o be àte ŋu ayɔ nɔnɔme siwo nàdi be woanɔ ye srɔ̃ si. Gake esesẽ wu be nàdzro ɖokuiwò me anya alesi nàte ŋu ana srɔ̃ɖeɖe me nanyoe. Ðokuimedzodzro do ŋgɔ na srɔ̃ɖeɖe ƒe atamkaka kple le emegbe siaa le vevie ŋutɔ. Le kpɔɖeŋu me, bia nya siwo gbɔna la ɖokuiwò.

• Ðe melɔ̃ be matsɔ ɖokuinye ana srɔ̃nye le nye agbe me katãa?—Mateo 19:6.

Le Biblia me nyagblɔɖila Maleaxi ŋɔli la, srɔ̃ŋutsu geɖe ɖe asi le wo srɔ̃wo ŋu, eye ɖewohĩ be yewoava ɖe ɖetugbiwo. Yehowa gblɔ be nyɔnu siwo wogblẽ ɖi ƒe aɖatsiwo yɔ yeƒe vɔsamlekpui dzi, eye wòbu fɔ ŋutsu siwo wɔ ‘nu tovo’ sia ɖe wo srɔ̃wo ŋu.—Maleaxi 2:13-16.

• Ne mele srɔ̃ɖeɖe ŋu bum la, ɖe metsi to sɔhɛmenɔɣi si me gbɔdɔdɔ ƒe seselelãmewo nu sẽna vevie eye menaa wowɔa nyametsotso nyuiwo o mea?—Korintotɔwo I, 7:36.

Nikki, amesi ɖe srɔ̃ esime wòxɔ ƒe 22 gblɔ be: “Afɔku le eme ŋutɔ be woaɖe srɔ̃ esime wometsi kura o.” Exlɔ̃ nu be: “Wò seselelãmewo, taɖodzinuwo, kple nusiwo nyoa ŋuwò ayi edzi anɔ tɔtrɔm tso esime nèle dodom le ƒewuiwo me vaseɖe esime nàxɔ wu ƒe 20 ayina dodo ge le eme.” Le nyateƒe me la, míate ŋu anɔ te ɖe ƒexɔxɔ ɖeɖeko dzi anya ne wole klalo na srɔ̃ɖeɖe o. Ke hã, srɔ̃ɖeɖe esime womedo le sɔhɛmenɔɣi si me gbɔdɔdɔ ƒe seselelãmewo nyea nu yeye eye wo nu sẽna vevie me o la ate ŋu ana womawɔ nyametsotso nyuiwo o eye wòana woaŋe aɖaba aƒu nusiwo ate ŋu ahe kuxiwo vɛ dzi.

• Nɔnɔme kawoe le asinye siwo akpe ɖe ŋunye mana srɔ̃ɖeɖe me nanyo?—Galatiatɔwo 5:22, 23.

Apostolo Paulo ŋlɔ ɖo ɖe Kolosetɔwo be: “Mido dɔmetɔtrɔ kple nublanuikpɔkpɔ, dɔmekɔkɔ, ɖokuibɔbɔɖeanyi, dɔmefafa, [kple] dzigbɔgbɔ blewu.” (Kolosetɔwo 3:12) Aɖaŋuɖoɖo sia nyo na amesiwo le tame bum le srɔ̃ɖeɖe ŋu kpakple amesiwo ɖe srɔ̃ xoxo siaa.

• Ðe tsitsi ƒe ŋutete si hiã be woatsɔ ado alɔ ame srɔ̃ le ɣeyiɣi sesẽwo me la le asinyea?—Galatiatɔwo 6:2.

Ðɔkta aɖe gblɔ be: “Amewo lɔ̃a fɔbubu wo srɔ̃wo ne kuxiwo do mo ɖa. Menye amesi dze agɔe le vevie wu o. Ke boŋ alesi atsu kple asi awɔ ɖeka aɖɔ srɔ̃ɖeƒomedodoa ɖoe le vevie wu.” Nunyala Fia Salomo ƒe nyawo sɔ na srɔ̃tɔwo. Eŋlɔ bena: “Ne ame le eve la, enyo wu ame ɖeka, elabena woakpɔ fetu nyui ɖe woƒe agbagbadzedzewo ta. Elabena ne wo dometɔ ɖeka dze anyi la, nɔvia afɔe ɖe tsitre; ke baba na amesi tsi akogo, elabena ne edze anyi la, evelia meli afɔe ɖe tsitre o.”—Nyagblɔla 4:9, 10.

• Ðe dzi dzɔam zi geɖe eye mɔkpɔkpɔ nyuiwo nɔa asinyea, alo nu koe mexana eye nyemebua naneke be ava anyo oa?—Lododowo 15:15.

Amesi mebua naneke be ava nyo o la bua ŋkeke ɖesiaɖe be enye ŋkeke vɔ̃. Srɔ̃ɖeɖe matrɔ nɔnɔme sia nukutɔe o! Amesi nye tre—eɖanye ŋutsu alo nyɔnu o—si kpɔa vodada le nu ŋu ɣesiaɣi alo mekpɔa mɔ na nu nyui aɖeke o la, srɔ̃tɔ vodadakpɔla alo mɔkpɔkpɔmanɔsitɔ koe wòava zu. Susu gbegblẽ bubu ɖe etsɔme ŋu alea ate ŋu ana nuwo nasẽ vevie le srɔ̃ɖeɖe me.—Tsɔe sɔ kple Lododowo 21:9.

• Ðe meléa ɖokuinye ne nu te ɖe dzinyea, alo ɖe medoa dziku wɔa nu ɖokuidzimaɖumaɖutɔea?—Galatiatɔwo 5:19, 20.

Wode se na Kristotɔwo be “[woanɔ] blewu le dziku me.” (Yakobo 1:19) Hafi ŋutsu alo nyɔnu naɖe srɔ̃ kple ne wòɖo srɔ̃ƒe siaa la, ele be wòasrɔ̃ aɖaŋuɖoɖo sia dzi wɔwɔ, esi gblɔ be: “Mibi dzi, eye migawɔ nuvɔ̃ o; ɣe la nagaɖo to ɖe miaƒe dzibibi o.”—Efesotɔwo 4:26.

Ŋkuléle Ðe Amesi Nàva Ðe Ŋu

Biblia ƒe lododo aɖe gblɔ be: “Nunyala léa ŋku ɖe eƒe afɔɖeɖe ŋu.” (Lododowo 14:15) Nya sia le vevie ŋutɔ ne èdi be yeatia amesi yeaɖe. Amesi ŋutsu alo nyɔnu atia wòanye srɔ̃a nye nyametsotso vevitɔ kekeake siwo wòawɔ dometɔ ɖeka. Gake wolé ŋku ɖe nu ŋu kpɔe be ame geɖe gbɔa dzi ɖi tsoa nya me le ʋu si woaƒle alo suku si woade ŋu wu ɖe amesi woaɖe ŋu.

Le Kristo-hamea me la, ‘wodoa amesiwo si wotsɔa agbanɔamedziwo dena la kpɔ gbã be wodze hã.’ (Timoteo I, 3:10) Ne èle srɔ̃ɖeɖe ŋu bum la, ke àdi be yeaka ɖe amea ƒe ‘dzedze’ dzi gbã. Le kpɔɖeŋu me, de ŋugble le biabia siwo gbɔna ŋu kpɔ. Togbɔ be nyaa dze abe nyɔnu ƒe nyabiabiawo ene hã la, gɔmeɖoseawo dometɔ geɖe sɔ na ŋutsu hã. Eye amesiwo ɖe srɔ̃ xoxo gɔ̃ hã ate ŋu ade ŋugble le nya siawo ŋu wòaɖe vi na wo.

• Aleke amewo bunɛ?—Filipitɔwo 2:19-22.

Lododowo 31:23 ƒo nu tso ŋutsu si “[wonyana] ne eya kple anyigba dzi ame tsitsiwo wole ʋɔnudrɔ̃ƒe” ŋu. Dume-metsitsiwo nɔa anyi ɖe du ƒe agbo nu drɔ̃a ʋɔnu. Eyata edze kɔte be bubunɔƒe aɖe le esi le amewo dome. Alesi ame bubuwo bua ŋutsui la na wonyaa ŋkɔ si tɔgbe le eŋu. Ne wòanya wɔ la, de ŋugble le alesi amesiwo le ete bunɛ hã ŋu. Esia afia alesi wò si nye srɔ̃a àva bui.—Tsɔe sɔ kple Samuel I, 25:3, 23-25.

• Aleke eƒe agbenɔnɔ le?

Nunya si tso Mawu gbɔ la, “gbã la, eŋuti kɔna.” (Yakobo 3:17) Ðe amesi nèdi be yeaɖe la tsia dzi ɖe kɔɖiɖi na eƒe gbɔdɔdɔ ƒe seselelãmewo ŋu tsɔ wu ɖe tenɔnɔ si le mia kplii si le Mawu gbɔ ŋua? Ne mele agbagba aɖeke dzem be yeanɔ agbe ɖe Mawu ƒe agbenyuinɔnɔ ƒe dzidzenuwo nu fifia o la, nukae ana nàka ɖe edzi be anɔ agbe ɖe enu ne mieɖe mia nɔewo vɔ?—Mose I, 39:7-12.

• Aleke wòwɔa nu ɖe ŋunyee?—Efesotɔwo 5:28, 29.

Biblia ƒe agbalẽ si nye Lododowo ƒo nu tso ŋutsu si “ɖoa dzi ɖe” srɔ̃a ŋu la ŋuti. Gakpe ɖe eŋu la, ‘ekafunɛ.’ (Lododowo 31:11, 28) Meʋãa ŋu akpa o, eye menye amesi dia nu geɖe fũ akpa tso srɔ̃a si hã o. Yakobo ŋlɔ be nunya si tso dziƒo la ‘efaa tu, enye nugɔmesela, nublanuikpɔkpɔ kple kutsetse nyuiwo yɔe fũ.’—Yakobo 3:17.

• Aleke wòwɔa nu ɖe eya ŋutɔ ƒe ƒometɔwo ŋui?—Mose II, 20:12.

Menye ɖeviwo si koe wobia tsoe be woabu wo dzilawo o. Biblia gblɔ be: “Ðo to fofowò, si dzi wò, eye megado vlo dawò, ne eku nyagã o!” (Lododowo 23:22) Ðk. Hugh Missildine ŋlɔe nyuie be: “Woate ŋu aƒo asa na srɔ̃ɖeɖe me kuxi kple masɔmasɔ geɖe—alo woate ŋu akpɔ wo do ŋgɔ ya teti—ne ŋutsu kple nyɔnu siwo gbɔna wo nɔewo ɖe ge ɖia tsa vlavo yia wo nɔewo ƒe aƒewo me va kpɔa ƒomedodo si le ‘amesi ɖe ge wogbɔna’ kple edzilawo dome. Alesi wòbua edzilawoe ana nànya alesi wòabu srɔ̃ae. Ele be nàbia ɖokuiwò be: ‘Ðe medi be wòawɔ nu ɖe ŋunye abe alesi wòwɔnɛ ɖe edzilawo ŋu enea?’ Eye alesi edzilawo wɔa nu ɖe eŋui la anye mɔ nyui aɖe si dzi nàto anya alesi wòawɔ nu ɖe eɖokui ŋu kple alesi wòadi be nàwɔ nu ɖe ye ŋui—ne miaƒe ɖiɖiɖemeɣi le srɔ̃ɖeɖe megbe teti wu enu.”

• Ðe wòlɔ̃a dzikudodo alo amedzudzua?

Biblia ɖo aɖaŋu be: “Mina woaɖe veve heliheli kple dɔmedzoe kple dziku kple ɣlidodo kple busubɔbɔ katã kpakple nu tovo wɔwɔ katã hã ɖa le mia dome.” (Efesotɔwo 4:31) Paulo xlɔ̃ nu Timoteo le Kristotɔ aɖewo siwo “[léa] anukutsyɔtsyɔwo kple nyaʋawɔwɔ ƒe dɔ” eye wohea “ŋuʋaʋã, dzrewɔwɔ, busunyagbɔgblɔ, nya vɔ̃ susu ɖe ame ŋuti kple nyahehe dzodzro vɛ” la ŋu.—Timoteo I, 6:4, 5.

Gakpe ɖe eŋu la, Paulo ŋlɔ be amesi dze be woana mɔnukpɔkpɔ tɔxɛwoe le hamea me ‘naganye ameƒola o’—eye le Helagbe si wotsɔ ŋlɔe nu la, “wòaganye kɔdala o.” (Timoteo I, 3:3, NW ƒe etenuŋɔŋlɔ) Mele be wòanye amesi ƒoa ame alo amesi bluna ɖe ame ta o. Amesi lɔ̃a adãnuwɔwɔ ne dzi kui la mesɔ anye ame srɔ̃ o.

• Taɖodzinu kawoe le esi?

Ame aɖewo nɔa kesinɔnuwo yome eye nu manyomanyowo koe do tso eme na wo. (Timoteo I, 6:9, 10) Ðeko ame bubuwo hã le yiyim le agbe me ko taɖodzinu aɖeke mele wo si o. (Lododowo 6:6-11) Gake amesi nye mawuvɔ̃la aɖo tame kplikpaa abe alesi Yosua ɖoe ene, amesi gblɔ be: “Ke mía kple nye aƒe ya míasubɔ Yehowa!”—Yosua 24:15.

Teƒeɖoɖowo Kple Agbanɔamedziwo

Mawu ƒe ɖoɖoe srɔ̃ɖeɖe nye. Yehowa Mawue ɖe mɔ le eŋu heɖoe anyi. (Mose I, 2:22-24) Etrɔ asi le srɔ̃ɖeɖoɖoa ŋu be ɖekawɔwɔ nanɔ ŋutsu kple nyɔnu dome ɖaa ale be woanye kpeɖeŋutɔwo na wo nɔewo. Ne atsu kple asi wɔ ɖe Biblia ƒe gɔmeɖosewo dzi la, woate ŋu akpɔ mɔ be dzidzɔ anɔ yewoƒe agbenɔnɔ me.—Nyagblɔla 9:7-9.

Gake ele be míanyae be míele ‘ɣeyiɣi siwo me nɔnɔ sesẽ me.’ Biblia gblɔe ɖi be le ɣeyiɣi sia me la, amewo anye “ɖokuilɔ̃lawo, galɔ̃lawo, adegbe ƒuƒlu ƒolawo, dadalawo, . . . ame mawɔnuteƒewo, amesiwo melɔ̃a ame ƒe nya o, nugɔmemaselawo, . . . yomemɔfialawo, ame magbɔdziɖiwo, amesiwo doa wo ɖokui ɖe dzi glodzoo.” (Timoteo II, 3:1-4, NW) Nɔnɔme siawo ate ŋu akpɔ ŋusẽ ɖe ame ƒe srɔ̃ɖeɖe dzi vevie. Eyata ele be amesiwo le srɔ̃ɖeɖe ŋu bum nabu eŋu kɔnta moveviɖoɖotɔe. Eye ele be amesiwo ɖe srɔ̃ xoxo nato mawumemɔfiame siwo le Biblia me sɔsrɔ̃ kple wo ŋudɔwɔwɔ me ayi edzi adze agbagba ana woƒe ƒomedodoa nanyo ɖe edzi.

Ẽ, anyo ŋutɔ ne amesiwo le susu wɔm be yewoaɖe srɔ̃ la kpɔ nu yi ŋgɔ wu srɔ̃kpegbea. Eye menye srɔ̃ɖewɔnaawo ŋu koe wòle be amesiame nade ŋugble le o ke ele be woade ŋugble le srɔ̃ɖegbenɔnɔa hã ŋu. Kpɔ Yehowa sinu be wòafia mɔ wò nàbu nuwo ŋu alesi tututu wole tsɔ wu be nàtsɔ lɔlɔ̃ ƒe seselelãme dzro ko abu wo ŋui. Ne èwɔe alea la, anɔ eme godoo be srɔ̃ɖeɖe me anyo na wò.

[Etenuŋɔŋlɔ]

[Aɖaka si le axa 5]

“Lɔlɔ̃ Ŋu Nya Nyuitɔ Kekeake si Mexlẽ Kpɔ”

Ðk. Kevin Leman ŋlɔ be: “Aleke nàwɔ anya be yewolɔ̃ yewo nɔewo nyateƒe? Blemagbalẽ aɖe li si me woƒo nu tso lɔlɔ̃ ŋu le. Esusɔ vie agbalẽa naxɔ ƒe akpe eve, gake eganye lɔlɔ̃ ŋu nya nyuitɔ kekeake si mexlẽ kpɔ.”

Kristotɔ apostolo Paulo ƒe nya siwo le Biblia me le Korintotɔwo I, 13:​4-8 ŋue Ðk. Leman nɔ nu ƒom tsoe:

“Lɔlɔ̃ la gbɔa dzi blewu, eƒe dɔme nyona; lɔlɔ̃ la meʋãa ŋu o, lɔlɔ̃ la meƒoa adegbe o, medoa eɖokui ɖe dzi glodzo o, mewɔa nusi medze o, media ye ŋutɔ tɔ o, mebia dzi o, mebua naneke vɔ̃ o; medzɔa dzi le nu madzɔmadzɔ ŋuti o, ke eya kple nyateƒee dzɔa dzi. Etsɔa nuwo katã kpoo, exɔa nuwo katã sena, ekpɔa mɔ na nuwo katã, edoa dzi le nuwo katã me. Lɔlɔ̃ la nu metsina gbeɖe o.”

[Aɖaka si le axa 8]

Seselelãmewo Ate Ŋu Aflu Ame

Edze ƒã be Sulam-nyɔnuvi si nɔ anyi le Biblia ƒe ɣeyiɣiwo me nya nyuie be lɔlɔ̃ ƒe seselelãmewo ate ŋu aflu ame. Esime Fia Salomo ŋusẽtɔ la nɔ enu blem la, egblɔ na ehati nyɔnuviwo be ‘woagaʋuʋu lɔlɔ̃ alo anyɔe ɖe ye me o vaseɖe esime wòdze ye ŋu hafi.’ (Hawo ƒe Ha 2:7) Ðetugbi nyanu sia medi be ye xɔlɔ̃wo naƒoe ɖe ye nu ʋuu yeƒe seselelãmewo naɖu ye dzi o. Amesiwo le srɔ̃ɖeɖe ŋu bum egbea hã ate ŋu awɔ nu nenema ke. Ðu wò seselelãmewo dzi sesĩe. Ne àɖe srɔ̃ la, ke esi nèlɔ̃ amea tae, menye esi woagblɔ be srɔ̃ le asiwò ta ko o.

[Nɔnɔmetata si le axa 6]

Amesiwo ɖe srɔ̃ xoxoxo gɔ̃ hã agate ŋu ado ŋusẽ woƒe srɔ̃ɖekadodoa

[Nɔnɔmetata si le axa 7]

Aleke wòwɔa nu ɖe edzilawo ŋui?