Ðe Wòle Be Kɔnuwo Natsi Tre Ðe Nyateƒe Ŋua?
MARTIN LUTHER ka ɖe edzi be ye tɔ dzɔ. Exɔe se be Biblia la de ye dzi. Gake Polandtɔ ɣletiviŋutinunyala Copernicus susui be blemadzixɔse si nɔ anyi ɣemaɣi la mesɔ o.
Dzixɔse kae? Eyae nye be xexeame titina ye anyigba le eye nu bubuwo katã ƒo xlaẽ. Copernicus gblɔ be nyateƒe lae nye be anyigba lae ƒona xlã ɣea. Luther gbe nya sia hegblɔ be: “Amewo ɖoa to ɣletivimefakala si do nyitsɔ laa si te kpɔ be yeaɖee fia be anyigba lae le xlã ƒom ke menye dziƒowo alo dziƒolilia, alo ɣe kple ɣletia ye o.”—History of Western Philosophy.
ZI GEÐE la, blemadzixɔsewo tsia tre ɖe nya siwo le eteƒe henye nyateƒe la ŋu. Woate ŋu ana amewo nawɔ nusiwo me afɔku le gɔ̃ hã.
Gake esia mefia be kɔnuwo tsia tre ɖe nyateƒea ŋu ɣesiaɣi o. Le nyateƒe me la, apostolo Paulo de dzi ƒo na Kristotɔ siwo nɔ anyi le eƒe ɣeyiɣia me be woawɔ ɖe kɔnu siwo yetsɔ de wo si la dzi: “Ke mele mia kafum . . . [be] mielé [kɔnuawo, NW] me ɖe asi abe alesi meɖo na mi la ene.”—Korintotɔwo I, 11:2; kpɔ Tesalonikatɔwo II, 2:15; 3:6 hã.
Nukae Paulo yɔ be ‘kɔnuwo’? Insight on the Scriptures, Babla 2, axa 1118, ɖee fia be Helagbe me nya pa·raʹdo·sis si wòzã na ‘kɔnu’ la fia nya si “wogblɔ kple nu alo woŋlɔ ɖi.” Le English gbe me la, nya la gɔmee nye “nyatakaka, xɔseŋutinufiafiawo, alo nuwɔna siwo dzilawo tsɔ de asi na wo viwo alo esi va zu mɔ si nu amewo bua tame alo wɔa nu ɖo.”a Esi kɔnu siwo apostolo Paulo tsɔ de wo si tso teƒe nyui ta la, esɔ be Kristotɔwo lé wo me ɖe asi.
Gake edze ƒã be blemadzixɔsewo ate ŋu anye nyateƒe alo aʋatso, nyui alo vɔ̃. Le kpɔɖeŋu me, Britaniatɔ xexemenunyala Bertrand Russell kafu ame abe Copernicus si nɔ anyi le ƒe alafa 16 lia me ene, amesi tsɔ nuteƒewɔwɔ kple dzideƒo tɔ gbe blemadzixɔsewoe. Wova “de dzesii be nusiwo dzi woxɔ se tso blemaɣeyiɣiwo me la ate ŋu anye aʋatso.” Ðe wò hã èkpɔ nunya si le eme be míagadze blemadzixɔsewo yome numanyamanyatɔe o la dze siia?—Tsɔe sɔ kple Mateo 15:1-9, 14.
Ekema mawusubɔsubɔdzixɔsewo kple kɔnyinyiwo ya ɖe? Ðe míatsɔe ko be wonyo eye afɔku mele wo me oa? Aleke míawɔ anya? Nukae wòle be míawɔ ne míede dzesii be mawusubɔsubɔ me kɔnuwo tsi tre ɖe nyateƒea ŋu vavã? Nyati si kplɔe ɖo adzro biabia siawo me.
[Etenuŋɔŋlɔ]
a Watchtower Bible and Tract Society of New York, Inc. ye tae.
[Nɔnɔmetata Tsoƒe si le axa 2]
Akpa dzi: Jean-Leon Huens © National Geographic Society
[Nɔnɔmetata Tsoƒe si le axa 3]
Universität Leipzig