Ne Kɔnuwo Tsi Tre Ðe Nyateƒea Ŋu

AFƆKU—TSI SIA MENYO NA NONO O. Ðewohĩ míekpɔa nuxlɔ̃menya siawo tɔgbe edziedzi. Le teƒe geɖe la, amewo ɖɔa ŋu ɖo le tsi si wonona ŋu elabena wonya be wotsɔ nusi wona ŋkɔe be “adzetsi” si me aɖi le tɔtɔ tsi aɖewo. Numekuku aɖe ɖee fia be le ɖiƒoƒo sia ta la, tsi ate ŋu azu “nusi kakaa dɔlékuiwo . . . kple aɖinuwo” le esi teƒe be wòanye “nusi léa agbe ɖe te hekpɔa eta.”—Water Pollution.

Ðiƒoƒo Nyateƒea ƒe Tsiwo

Kɔnu siwo tsi tre ɖe nyateƒe ŋu sɔ kple tsi siwo woƒo ɖii. Ðewohĩ míaku ɖe kɔnuwo—nyatakaka, nukpɔsusuwo, dzixɔsewo, alo kɔnyinyi siwo dzidzime ɖeka tsɔ dea asi na esi kplɔe ɖo—ŋu goŋgoŋ si menye míaƒe vodada o esi, le nyateƒe me la, wotsɔ aʋatsonya fluamewo kple xexemenunya ƒe “adzetsi” tɔtɔ. Abe tsi si me aɖi le ke ene la, esiawo ate ŋu awɔ nuvevi geɖe mí—gbɔgbɔmenuveviwɔame.

Ne míexɔe se be Biblia dzie míaƒe mawusubɔsubɔdzixɔsewo nɔ te ɖo hã la, ele be mí katã míagbɔ dzi ɖi adzro wo me nyuie. Ðo ŋku edzi be esi Martin Luther lé eŋɔli me dzixɔse ɖe asi hebu fɔ Copernicus la, exɔe se be Biblia la de ye dzi. Evɔ la, Luther mesrɔ̃ blema Beroiatɔ siwo ‘ɖɔ ʋu le esi wodzroa Ŋɔŋlɔawo me kpɔna be nya kawoe le eme hã’ la ƒe kpɔɖeŋu o.—Dɔwɔwɔwo 17:10, 11.

Bu tame le alesi blemamawusubɔsubɔ dzixɔsewo gblẽ nu le Yudatɔ siwo nɔ anyi le Yesu ƒe ŋkekea me ŋu kpɔ. Woxɔe se vevie be yewo ƒe kɔnuwo nye nyateƒe. Esi wotsi tre ɖe Yesu yomedzelawo ŋu be womele kɔnuawo dzi wɔm o la, Yesu tsɔ nyabiabia sia tɔ gbe wo be: “Nukaŋuti miawo hã miedaa Mawu ƒe se la dzi le miaƒe kɔawo ŋuti mahã?” (Mateo 15:1-3) Nukae gblẽ? Yesu de dzesi kuxia esi wòyɔ nyagblɔɖila Yesaya ƒe nyawo: “Dzodzro wole [Mawu] subɔm hele nufiafia, siwo nye amewo ƒe sededewo la fiam.”—Mateo 15:9, míawoe te gbe ɖe edzi; Yesaya 29:13.

Ẽ, wotsɔ nufiafia siwo tso amewo gbɔ alo, vɔ̃ɖitɔ wu la, esiwo tso gbɔgbɔ vɔ̃wo gbɔ la ɖo esiwo tso Mawu gbɔ la teƒe. Le kpɔɖeŋu me, Insight on the Scriptures, Babla I, axa 506 ɖe eme be: “Ɣemaɣi la, Farisitɔwo fia nu be ne ame aɖe gblɔ be yeƒe nunɔamesiwo zu ‘korban,’ alo nunana si wòtsɔ ɖe adzɔgbee na Mawu ko la, mate ŋu atsɔ wo akpɔ edzilawo ƒe nuhiahiãwo gbɔ o, eɖanye aleke kee nu hiã woe o, gake ne eya ŋutɔ lɔ̃ la, ate ŋu awɔ nunɔamesi mawo ŋudɔ vaseɖe eƒe kugbe.” Amegbetɔ ƒe nunya si wotsɔ tɔtɔ nyateƒea ƒe tsiwoe kpɔ ŋusẽ gbegblẽ ɖe Yudatɔwo dzi le gbɔgbɔ me. Wo dometɔ akpa gãtɔ gbe Mesia si wonɔ mɔ kpɔm na ɣeyiɣi didi la gɔ̃ hã.

Kristodukɔa na Ðiƒoƒoa Dzi ɖe Edzi

Gbɔgbɔmenugbegblẽ sia ƒomevi dzɔ le Yesu ƒe ku megbe. Ame geɖe siwo be eyomedzelawoe yewonye la trɔ ɖe blemadzixɔse siwo wogblɔ kple nu ŋu wòzu nufiafia yeyewo tsoƒe. Cyclopedia of Biblical, Theological, and Ecclesiastical Literature si McClintock kple Strong ŋlɔ la gblɔ be, ame ma siwo yɔa wo ɖokui be Kristotɔwo la dometɔ aɖewo xɔe se be blemadzixɔse mawo nye “nufiame si apostoloawo gblɔ na Kristotɔwo ƒe sɔlemeha gbãtɔ siwo nɔ anyi tso apostoloawo ŋɔli, eye wokpɔ eta le dzadzɛnyenye me va de asi na yewo ŋutɔ yewo ŋɔli.”—Miawoe te gbe ɖe edzi.

Le nyateƒe me la, blemadzixɔse mawo nye nukpɔsusu gbegblẽ siwo mesɔ o. Cyclopedia la ɖe egɔme be “menye ɖeko” xexemenunya yeye siawo “tsi tre ɖe blemadzixɔse bubuwo ŋu o, ke etsi tre ɖe apostoloawo ŋutɔ ƒe nuŋlɔɖi siwo nɔ wo si gɔ̃ hã ŋu.” Esia menye nusi womekpɔ mɔ na kura o. Apostolo Paulo xlɔ̃ nu Kristotɔwo be: “Mikpɔ nyuie, bena ame aɖeke nagakplɔ mi ayi aboyo to xexemenunya kple beble dzodzro me o, le amewo ƒe nuɖoanyi kple xexeme ƒe gɔmedzenuwo la nu, eye menye le Kristo nu o.”—Kolosetɔwo 2:8.

Egbea hã la, blemadzixɔse geɖe ‘tsi tre ɖe apostoloawo ŋutɔ ƒe nuŋlɔɖiwo ŋu.’ Kristodukɔa tsɔ gbɔgbɔ vɔ̃wo ƒe nufiafia geɖe abe Mawuɖekaetɔ̃, dzomavɔ, amegbetɔ ƒe luʋɔ̃ makumaku, dulɔlɔ̃, kple trɔ̃subɔsubɔ de aɖi nyateƒea ƒe tsiwo mee.a (Timoteo I, 4:1-3) Ŋutinya ɖi ɖase le gbɔgbɔmedɔléle si dze amesiwo gbɔgbɔ vɔ̃wo ƒe nufiafia siwo zu Kristodukɔa ƒe nufiafia veviwo lé aboyoe dzi la ŋu.—Tsɔe sɔ kple Yesaya 1:4-7.

Le nyateƒe me la, ɖiƒoƒo nyateƒea dze egɔme tso amegbetɔ dzɔɣi ke. Satana yi nusi gɔme wòdze le Eden bɔ me la dzi hetsɔ alakpa kple beble tɔtɔ amewo ƒe susuwo. (Yohanes 8:44; Korintotɔwo II, 11:3) Esi ameƒomea nɔ kakam ɖe anyigba bliboa dzi le Tsiɖɔɖɔ si va le Noa ƒe ŋkekea me megbe la, woɖoe koŋ tsɔ gbɔgbɔ vɔ̃wo ƒe xexemenunya kple nukpɔsusuwo tɔtɔ amegbetɔ ƒe nunya si le ameƒomeviwo katã si lae.

Gbɔgbɔmeɖiƒoƒo me Tsonuwo

Nukae gbɔgbɔmeɖiƒoƒo sia ate ŋu agblẽ le ame ŋu? Míate ŋu atsɔe sɔ kple nusi tsi ƒoɖi ate ŋu agblẽ le míaƒe lãmesẽ ŋu. Eŋutinunyala aɖe gblɔ be: “Ame abe miliɔn 200 le ʋuɖɔɖɔdɔ [si hea asrãdɔ si na ʋu vɔna le ame ŋu, dzimadzeme, lãmegbegblẽ, kple ku gɔ̃ hã vɛ la] lém, esi tsi ƒoɖi ka woƒe ŋutigbalẽ ŋu ta. Le tsi ƒoɖi si wolena ta la, ame 500,000,000 le ŋkudzitetedɔ si nye nusiwo koŋ gbãa ŋku dometɔ ɖeka la lém. . . . Ameƒomea me tɔ siwo ade biliɔn eve mekpɔ tsi nono nyui o.” (Our Country, the Planet) Ame geɖe ƒe lãme gbɔdzɔ, woƒe ŋkuwo gbã, eye wowu ame aɖewo gɔ̃ hã le gbɔgbɔ me, le esi wodze blemadzixɔse siwo wotsɔ gbɔgbɔ vɔ̃wo ƒe alakpanufiafia tɔ tsii yome ta.—Korintotɔwo I, 10:20, 21; Korintotɔwo II, 4:3, 4.

Le kpɔɖeŋu me, ame geɖe tɔtɔ le ƒomedodo si le Yesu Kristo kple Fofoa, Yehowa Mawu, dome ŋu alo womenyae o. Nusi ame aɖewo siwo be Kristotɔwoe yewonye wɔnae nye be woɖea Mawu ƒe ŋkɔ kɔkɔe, Yehowa, ɖa le Kristotɔwo ƒe Hela Ŋɔŋlɔawo me. George Howard gblɔ le Journal of Biblical Literature me be: “Le míaƒe nukpɔkpɔ nu la, Hebri-ŋɔŋlɔdzesi ene si wotsɔ ŋlɔa Mawu ƒe ŋkɔe si woɖe ɖa alea lae na Trɔ̃subɔla zu Kristotɔwo tɔtɔ le ƒomedodo si le ‘Aƒetɔ Mawu’ kple ‘Aƒetɔ Kristo’ dome ŋu.”

Bu tɔtɔ si alakpadzixɔse kple vɔvɔ̃, si do tso blemadzixɔse si metso Ŋɔŋlɔawo me o, si nye be amegbetɔ ƒe luʋɔ̃ mekuna o hã ŋu kpɔ. (Tsɔe sɔ kple Nyagblɔla 9:5; Xezekiel 18:4.) Ame nenie zu kluvi na tɔgbui kukuwo subɔsubɔ alo le vɔvɔ̃m gbesiagbe be amesiwo ku la atrɔ va wɔ nuvevi yewo? Dzixɔse sia na ame aɖewo wu wo ɖokui kple ame bubuwo gɔ̃ hã.

Japantɔ geɖe susui be ne yewoku la, yewo ƒe gbɔgbɔwo agawɔ ɖeka le xexe keme me. Eyata dzila siwo wua wo ɖokui bui be anyo wu be yewoawu yewo viwo hã kpe ɖe eŋu. An English Dictionary of Japanese Ways of Thinking ɖe eme be: “Le Japan la, womebua ameɖokuiwuwu be egblẽ ɣesiaɣi o, ke wobunɛ be enye mɔ nyui si dzi woato ado taflatse ɖe ame ƒe nuvɔ̃ gã aɖe ta boŋ . . . Anɔ eme be woagblɔ veveseɖeamenunyawo gɔ̃ hã ne wole gbeƒã ɖem be ƒome aɖe wu wo ɖokui.”

Mido Kɔnuawo Kpɔ

Le afɔku si le blemadzixɔsewo yomenɔnɔ nuŋumabumabutɔe me ta la, nukae wòle be míawɔ? Le ƒe alafa gbatɔ̃ ƒe nuwuwu lɔƒo la, apostolo Yohanes ɖo aɖaŋu na ehati Kristotɔwo be: “Lɔlɔ̃tɔwo, migaxɔ gbɔgbɔ sia gbɔgbɔ dzi se o, ke mido gbɔgbɔawo kpɔ [abe alesi miado tsi akpɔ be ele dzadzɛ hã ene], nenye ɖe wotso Mawu gbɔ; [elabena] gbɔgbɔ sia gblɔɖila geɖewo do go yi xexeame.” (Yohanes I, 4:1; kpɔ Tesalonikatɔwo I, 5:21 hã.) Aleke nàte ŋu anya ne afɔku le kɔnu aɖe me? Èhiã nunyatsoƒe aɖe, si nye dzadzɛnyenye ƒe dzidzenu, be nàtsɔ do nusi nèxɔ se la akpɔ.

Biblia lae nye nunyatsoƒe ma. Yesu Kristo gblɔ be: “Wɔ wo kɔkɔe le nyateƒe la me, wò nya la enye nyateƒe.” (Yohanes 17:17) Egblɔ hã be: “Gaƒoƒo gbɔna, eye wòde azɔ, esi nyateƒegbedoɖalawo ado gbe ɖa na Fofo la le gbɔgbɔ kple nyateƒe me.” (Yohanes 4:23) Ne èzã Mawu ƒe Nya si tso gbɔgbɔ me la, àke ɖe nyateƒe ƒe tsi dzadzɛwo ŋu ke menye amegbetɔ kple gbɔgbɔ vɔ̃wo ƒe xexemenunya ƒe tsi ƒo ɖi la o.—Yohanes 8:31, 32; Timoteo II, 3:16.

Ðo ŋkui be, ɖinu suetɔ kekeake hã ate ŋu agblẽ nu. Ɣeaɖewoɣi la, exɔa ƒe geɖe hafi nusi wògblẽ la dzena. Shridath Ramphal si nye Xexeame ƒe Dzɔdzɔmenuwo Takpɔha ƒe tatɔ tsã la gblɔ be: “Tsi ƒoɖi va zu xexeame ƒe amewunu dziŋɔtɔ kekeake. Ame akpe blaeve vɔ atɔ̃ ya teti kuna gbesiagbe le eŋudɔwɔwɔ ta.” Afɔku le kɔnu siwo ƒo ɖi le gbɔgbɔ me la me wu kura gɔ̃ hã.

Ðe dzideƒo le asiwò be nàɖe ɖokuiwò ɖa tso blemadzixɔse siwo yome nènɔ ƒe geɖe la ŋu ne eva dze be wotsi tre ɖe nyateƒea ŋua? Wɔ ɖe nuxlɔ̃meawo dzi. Kpɔ ɖokuiwò kple wò ƒomea ta to egbɔkpɔkpɔ be kɔnu siwo dzi nèwɔna ɖo wɔ ɖeka kple Mawu ƒe Nya vavã la me.—Psalmo 19:9-12; Lododowo 14:15; Dɔwɔwɔwo 17:11.

[Etenuŋɔŋlɔ]

[Nɔnɔmetata si le axa 7]

Mawu ƒe Nya si nye nyateƒe la le abe tɔsisi me tsi nyui si le dzadzɛ ene