Ŋkekenyui Ðedzesiwo Le Israel Ƒe Ŋutinya Me

“Wò ŋutsuwo katã nava Yehowa, wò Mawu ƒe ŋku me zi etɔ̃ le ƒe ɖeka me le teƒe, si wòatia, . . . eye womava Yehowa ŋku me asi gbɔlo o.”—MOSE V, 16:16.

 1. Nukae míate ŋu agblɔ tso Biblia ƒe ɣeyiɣiawo me ŋkekenyuiwo ŋu?

NUKAE vaa susu me na wò ne èbu ŋkekenyui ŋu? Agbeblibaɖuɖu kple agbegbegblẽnɔnɔe xɔ aƒe ɖe blema ŋkekenyui aɖewo me. Nenema ke egbe ŋkekenyui aɖewo hã le. Gake ŋkekenyui siwo ƒe se wode le Mawu ƒe Sea me na Israel ya to vovo. Togbɔ be wonye dzidzɔɣeyiɣiwo hã la, woagate ŋu ayɔ wo be ‘takpekpe kɔkɔewo.’—Mose III, 23:2.

 2. (a) Nukae wobia tso Israel-ŋutsuwo si be woawɔ zi etɔ̃ le ƒe me? (b) Le alesi wozã nya lae le Mose V, 16:16 nu la, nukae nye “ŋkekenyui”?

² Mɔzɔzɔ yi Yerusalem, ‘teƒe si Yehowa tia,’ nyea dzidzɔ kple vivisese na Israel-ŋutsu wɔnuteƒewo—siwo ŋu zi geɖe woƒe ƒomewo kpena ɖo—eye wokɔa dɔme dzɔa nu na ŋkekenyui vevi etɔ̃ ɖuɖu. (Mose V, 16:16) Agbalẽ si nye Old Testament Word Studies ɖe Hebrigbe me nya si gɔme woɖe be “ŋkekenyui” le Mose V, 16:16 gɔme be enye “dzidzɔ gã aɖe kpɔɣi . . . si wotsɔa vɔsasa kple azãɖuɖu ɖoa ŋku Mawu ƒe amenuveve ɖedzesi aɖewo dzii.”a

Ŋkekenyui Gãwo ƒe Vevienyenye

 3. Yayra kawo dzie ƒe sia ƒe ƒe ŋkekenyui etɔ̃awo na míeɖo ŋkui?

³ Esi wònye agbledelawoe Israel-viwo nye ta la, wonɔa te ɖe Mawu ƒe yayra be wòana tsidzadza wo dzi. Mose ƒe Sea me ŋkekenyui gãwo do go ɖe luŋeɣi le adame ƒe gɔmedzedze, ƒoŋeɣi le adame ƒe nuwuwu, kple nuku susɔeawo ŋeŋe le dzomeŋɔli ƒe nuwuwu nu. Wonyea dzidzɔkpɔɣi gãwo kple akpedada na Tsidzadzanala kple anyigba wɔnu la Wɔla. Gake ŋkekenyuiawo gayi ŋgɔ wu ema.—Mose V, 11:11-14.

 4. Ŋutinya me nudzɔdzɔ ka dzie woɖoa ŋkui le ŋkekenyui gbãtɔa ɖuɖu me?

⁴ Woɖua ŋkekenyui gbãtɔ le blema Biblia ƒe ɣletigbalẽ ƒe ɣleti gbãtɔ me, tso Nisan 15 va ɖo 21 lia, si sɔna ɖe míaƒe March ƒe nuwuwu lɔƒo alo April ƒe gɔmedzedze dzi. Woyɔnɛ be Abolo Maʋãmaʋã ƒe Ŋkekenyui, eye esi woɖunɛ ɖe Nisan 14 lia ƒe Ŋutitoto yome tututu ta la, wogayɔnɛ hã be “Ŋutitotoŋkekenyui.” (Luka 2:41; Mose III, 23:5, 6) Ŋkekenyui sia naa Israel-viwo ɖoa ŋku alesi woɖe wo tso fukpekpe me le Egipte dzi, eyata woyɔa abolo maʋãmaʋã la be “funyibolo.” (Mose V, 16:3) Eɖoa ŋku edzi na wo be woƒe ʋuʋu dzo le Egipte nɔ kpatakpata ale gbegbe be ɣeyiɣi menɔ anyi woade nuʋãnu woƒe amɔwɔ me alala wòaho o. (Mose II, 12:34) Abolo ʋaʋã aɖeke manɔ Israel-viwo ƒe aƒeme le ŋkekenyui sia ɖuɣi o. Woawu eɖula ɖesiaɖe si aɖu abolo ʋaʋã, amedzroviwo hã le eme.—Mose II, 12:19.

 5. Mɔnukpɔkpɔ ka dzie ŋkekenyui evelia ana woaɖo ŋkui, eye amekawo hãe akpɔ gome le dzidzɔkpɔkpɔa me?

⁵ Woɖua ŋkekenyui evelia le kwasiɖa adre (ŋkeke 49) siwo kplɔ Nisan 16 lia ɖo megbe eye edzea Sivan, si nye dzinu etɔ̃lia, ƒe ŋkeke 6 lia dzi, si nyea míaƒe May ƒe nuwuwu lɔƒo. (Mose III, 23:15, 16) Woyɔnɛ be Kwasiɖawo ƒe Ŋkekenyui (le Yesu ƒe ŋkekea me la, wogayɔnɛ hã be Pentekoste, si fia “Blaatɔ̃lia” le Helagbe me), eye woɖunɛ le ƒea ƒe ɣeyiɣi si me Israel ɖo Se ƒe Nubabla la me le Sinai Toa dzi la me lɔƒo. (Mose II, 19:1, 2) Le ŋkekenyui sia ɖuɣi la, Israel-vi wɔnuteƒewo aɖo ŋku mɔnukpɔkpɔ si wònye na wo be woɖe wo ɖe vovo be woanye Mawu ƒe dukɔ kɔkɔe dzi. Mawu ƒe dukɔ tɔxɛ nyenye bia be woawɔ ɖe Mawu ƒe Se la dzi, si ƒe ɖee nye se si gblɔ be woatsɔ ɖe le eme na ame dahewo ale be woawo hã nate ŋu aɖu ŋkekea.—Mose III, 23:22; Mose V, 16:10-12.

 6. Nudzɔdzɔ ka dzie ŋkekenyui etɔ̃lia ɖoa ŋkui na Mawu ƒe amewo?

⁶ Woyɔa ƒe sia ƒe ƒe ŋkekenyui gã etɔ̃lia be Avaɖoɖoŋkekenyui, alo Agbadɔŋkekenyui. Woɖunɛ le dzinu adrelia si nye Tishri, alo Etanim me, tso ŋkeke 15 vaseɖe 21 lia, si sɔ kple míaƒe October ƒe gɔmedzedze. (Mose III, 23:34) Le ɣeyiɣi sia me la, Mawu ƒe amewo nɔa woƒe aƒewo godo alo agbadɔ siwo wotsɔ atilɔwo kple aŋgbawo wɔ ɖe woƒe xɔwo tame me. Eɖoa ŋku woƒe ƒe 40 mɔzɔzɔ tso Egipte yi Ŋugbedodonyigba la dzi, esime wòhiã be dukɔa nasrɔ̃ ŋuɖoɖo ɖe Mawu ŋu hena woƒe gbesiagbe nuhiahiãwo kpɔkpɔ dzi, na wo.—Mose III, 23:42, 43; Mose V, 8:15, 16.

 7. Vi kae blema Israel-dukɔa ƒe ŋkekenyuiwo me dzodzro aɖe na mí?

⁷ Mina míadzro ŋkekenyui aɖewo siwo ɖe dzesi le Mawu ƒe blemadukɔ la ƒe ŋutinya me kpɔ. Esia ade dzi ƒo na mí egbea, elabena wobia tso míawo hã mía si be míakpe ta edziedzi kwasiɖa sia kwasiɖa kple zi etɔ̃ le ƒe me le takpekpewo me.—Hebritɔwo 10:24, 25.

Le Dawid Fiaƒomea ƒe Fiawo Ŋɔli

 8. (a) Azãɖuɖu si ɖe dzesi le ŋutinya me kae woɖu le Fia Salomo ŋɔli? (b) Nusi Avɔgbadɔŋkekenyuia fia ƒe taƒoƒo gãtɔ kae míate ŋu akpɔ mɔ na?

⁸ Woɖu ŋkeke ɖedzesi aɖe le Avɔgbadɔŋkekenyuia ɖuɣi le Fia Salomo, Dawid vi, ƒe dziɖuɣi si me nuwo dze edzi na dukɔa la ŋɔli. “Ameha gã aɖe” siwo tso Ŋugbedodonyigba la ƒe seƒe ke kpe ta na Avɔgbadɔŋkekenyuia kple gbedoxɔa ŋutikɔkɔ. (Kronika II, 7:8) Esi woɖui vɔ la, Fia Salomo ɖo ŋkekea ɖulawo ɖe aƒe, eye “woyra fia la, eye woyi woƒe agbadɔwo me kple dzidzɔ, eye woƒe dzi dze eme le nu nyui, siwo katã Yehowa wɔ na eƒe dɔla Dawid kple eƒe dukɔ Israel la ŋuti.” (Fiawo I, 8:66) Enye ŋkekenyui ɖedzesi vavã. Egbea Mawu subɔlawo le mɔ kpɔm na Avɔgbadɔŋkekenyuia ƒe taƒoƒo gã la le Salomo Gãtɔ, Yesu Kristo, ƒe Ƒe Akpe Ðeka Dziɖuɖua ƒe nuwuwu. (Nyaɖeɖefia 20:3, 7-10, 14, 15) Ɣemaɣi la, amesiwo le anyigba ƒe dzogoe ɖesiaɖe dzi, si me amesiwo wofɔ ɖe tsitre kple Harmagedon-ʋa me agbetsilawo hã le, awɔ ɖeka le Yehowa Mawu ƒe tadedeagu si me dzidzɔ le me.—Zaxarya 14:16.

9-11. (a) Nudzɔdzɔ kawoe na woɖu ŋkekenyui ɖedzesi aɖe le Fia Xizkiya ƒe ŋkekeawo me? (b) Kpɔɖeŋu kae ame geɖe siwo tso dziehe to ewo fiaɖuƒea me ɖo, eye nuka dzie wòɖo ŋkui na mí egbea?

⁹ Woɖu ŋkekenyui si gaɖe dzesi si ƒe nya Biblia gblɔ le Fia Axaz vɔ̃ɖi si do gbedoxɔa ƒe ʋɔtruwo eye wòkplɔ Yuda-fiaɖuƒea de xɔsegbegbe me la ƒe dziɖuɖu megbe. Amesi ɖu fia ɖe Axaz yomee nye Fia Xizkiya si ya nye fia nyui. Le Xizkiya ƒe fiaɖuɖu ƒe ƒe gbãtɔ me, esime wòxɔ ƒe 25 la, edze nuwo dzadzraɖo kple tɔtrɔwo wɔwɔ gɔme. Eʋu gbedoxɔa enumake eye wòwɔ ɖoɖo ɖe eƒe dzadzraɖodɔwo ŋu. Emegbe fia la ɖo lɛta ɖe Israel-vi siwo le Israel ƒe dziehe to ewo fiaɖuƒe si lé fu wo la me tsɔ kpe wo be woava ɖu Ŋutitotoŋkekenyui kple Abolo Maʋãmaʋã Ŋkekenyuia. Ame geɖe va togbɔ be wo tɔwo nɔ fewu ɖum le wo ŋu hã.—Kronika II, 30:1, 10, 11, 18.

¹⁰ Ðe ŋkekenyuiɖuɖua dze edzia? Biblia gblɔ na mí be: “Ale Israel-vi, siwo le Yerusalem la, ɖu abolo maʋamaʋã ŋkekenyui la ŋkeke adre kple dzidzɔ gã aɖe, eye Lewi-viwo kple nunɔlawo tsɔ Yehowa ƒe hadzinuwo kafu Yehowa gbesiagbe sesĩe.” (Kronika II, 30:21) Kpɔɖeŋu nyui kae nye si Israel-vi mawo ɖo ɖi na Mawu ƒe amewo egbea, amesiwo dometɔ geɖe doa dzi le tsitretsiɖeŋuwo me eye wozɔa mɔ didi dea takpekpewo!

¹¹ Le kpɔɖeŋu me, bu “Mawusosroɖa” Nutome Gã Takpekpe etɔ̃ siwo wowɔ le Poland le ƒe 1989 me ŋu kpɔ. Vavala 166,518 dometɔ aɖewo nye ame gbogbo aɖewo siwo tso afisiwo nye Soviet Union tsã kple Ɣedzeƒe Europa dukɔwo me, afisiwo woxe mɔ ɖe Yehowa Ðasefowo ƒe dɔa nu le ɣemaɣi. Agbalẽ si nye Jehovah’s Witnesses—Proclaimers of God’s Kingdomb gblɔ be: “Eyae nye zi gbãtɔ si takpekpe siawo valawo dometɔ aɖewo nɔ ƒuƒoƒo gã si me Yehowa ƒe amewo sɔ gbɔ wu 15 alo 20 le kpɔ. Ŋudzedzekpɔkpɔ yɔ dzi me na wo esi wokpɔ ame akpe geɖe le fefewɔƒeawo, eye wowɔ ɖeka kple wo le gbedodoɖa me, eye woawo hã dzi Yehowa kafuha kple wo.”—Axa 279.

12. Nukae na woɖu Fia Yosiya ƒe ŋkekea me ŋkekenyui ɖedzesi la?

¹² Le Xizkiya ƒe ku megbe la, Yuda-fiawo gadze alakpasubɔsubɔ gɔme ake le Fia Manase kple Amon ƒe dziɖuɣiwo. Fia nyui si nye Yosiya, amesi wɔ nu dzideƒotɔe eye wògaɖo tadedeagu vavãtɔ anyi la va ɖu fia ɖe wo yome. Esi Yosiya xɔ ƒe 25 la, eɖe gbe be woadzra gbedoxɔa ɖo. (Kronika II, 34:8) Esime wonɔ edzram ɖo la, wofɔ Se si Mose ŋlɔ la le gbedoxɔa me. Nusi Fia Yosiya xlẽ le Mawu ƒe Sea me la wɔ dɔ ɖe edzi ŋutɔ eye wòwɔ ɖoɖo be woaxlẽe na dukɔa katã. (Kronika II, 34:14, 30) Eye ewɔ ɖoɖo be woaɖu Ŋutitotoŋkekenyui le nusi woŋlɔ ɖi nu. Fia la ɖo kpɔɖeŋu nyui aɖe ɖi le nudzɔdzɔ faa ɖe ŋkekenyuia ɖuɖu ŋu hã me. Esia na be Biblia gblɔ be: “Womeɖu Ŋutitotoŋkekenyui sia tɔgbe le Israel tso nyagblɔɖila Samuel ŋɔli kpɔ o, eye Israel-fiawo katã meɖu ŋutitotoŋkekenyui, abe esi Yosiya kple nunɔlawo kple Lewi-viwo, Yuda blibo la kple Israel, si va, kpakple Yerusalemtɔwo ɖu la ene o.”—Kronika II, 35:7, 17, 18.

13. Nukawo dzie ŋkekenyui siwo Xizkiya kple Yosiya ɖu la ɖo ŋkui na mí?

¹³ Xizkiya kple Yosiya ƒe ɖɔɖɔɖowo sɔ kple tadedeagu vavãtɔ gbugbɔgaɖoanyi wɔnuku si va le Kristotɔ vavãtɔwo dome tso Yesu Kristo ɖoɖo zi dzi le ƒe 1914 me. Abe alesi wònɔ vevietɔ le Yosiya ƒe ɖɔɖɔɖowo me ene la, nusi woŋlɔ ɖe Mawu ƒe Nya la me dzie wotu míaƒe ŋkekea me gbugbɔgaɖoanyi sia ɖo. Eye abe alesi wònɔ le Xizkiya kple Yosiya gome ene la, wowɔ takpekpe siwo me woɖe Biblia me nyagblɔɖi ʋãmewo kple Biblia ƒe gɔmeɖose siwo sɔ ɖe ɣeyiɣia dzi zazã me le. Nusi gadzi nufiamekpekpe siawo ƒe dzidzɔ ɖe edzie nye ame gbogbo siwo xɔ nyɔnyrɔ. Abe Israel-vi siwo trɔ dzime le Xizkiya kple Yosiya ŋɔli ene la, nyɔnyrɔxɔla yeyeawo ɖe asi le Kristodukɔa kple Satana ƒe xexeame ƒe akpa mamlɛa ƒe nuwɔna vɔ̃ɖiwo ŋu. Le ƒe 1997 me amesiwo wu 375,000 ye xɔ nyɔnyrɔ tsɔ wɔ woƒe adzɔgbeɖeɖe na Mawu kɔkɔe Yehowa ƒe kpɔɖeŋui—wowu ame 1,000 gbesiagbe le mamã dedie nu.

Esime Wotrɔ Gbɔ tso Aboyo Me

14. Nukae na woɖu ŋkekenyui ɖedzesi aɖe le ƒe 537 D.M.Ŋ. me?

¹⁴ Le Yosiya ƒe ku megbe la, dukɔa gagbugbɔ yi ɖe alakpasubɔsubɔ nyɔŋu me. Mlɔeba le ƒe 607 D.M.Ŋ. me la, Yehowa he to na eƒe dukɔa esi wòkplɔ Babilon-ʋakɔwo vɛ be woho ɖe Yerusalem ŋu. Wotsrɔ̃ dua kple eƒe gbedoxɔa, eye wowɔ anyigba la aƒedoe. Yudatɔwo nɔ aboyo me ƒe 70 le Babilon le ema megbe. Eye Mawu gade dzo lãme na Yudatɔ susɔe siwo trɔ dzime hetrɔ gbɔ va Ŋugbedodonyigbaa dzi be woagaɖo tadedeagu vavãtɔ anyi. Wogbɔ va Yerusalem si zu dudo le ƒe 537 D.M.Ŋ. ƒe ɣleti adrelia me. Nu gbãtɔ si wowɔe nye be woɖi vɔsamlekpui si dzi woasa vɔ le ɖaa gbesiagbe abe alesi woŋlɔe ɖe Se ƒe nubabla la mee ene. Wowɔe ɖe game dzi tututu hena ŋkekenyui bubu si xɔ ŋkɔ le ŋutinya me ɖuɖu. “Woɖu agbadɔŋkekenyui la, abe alesi woŋlɔe ɖi ene.”—Ezra 3:1-4.

15. Dɔ kae dze ŋgɔ ame susɔe siwo trɔ gbɔ le ƒe 537 D.M.Ŋ. me, eye aleke nu ma tɔgbe aɖe dzɔ le ƒe 1919 mee?

¹⁵ Dɔ gã aɖe nɔ aboyomenɔla siawo siwo trɔ gbɔ la dzi—Mawu ƒe gbedoxɔa gbugbɔgatu kple Yerusalem tsotso kpakple eƒe gliwo gbugbɔgaɖo. Dukɔ siwo ƒo xlã wo siwo wòbiã ŋu na la tsi tre ɖe wo ŋu vevie. Esime wonɔ gbedoxɔa tum la, enye ‘gɔmedzedze nyaŋui aɖe.’ (Zaxarya 4:10) Esɔ kple nɔnɔme si me Kristotɔ amesiamina wɔnuteƒewo nɔ le ƒe 1919 me. Le ƒe ɖedzesi ma me la, woɖe wo tso Babilon Gã, xexeame ƒe alakpasubɔsubɔha ƒe fiaɖuƒe, la ƒe gbɔgbɔmekluvinyenye me. Wonye ame akpe ʋee aɖewo ko eye xexeme si lé fu wo la tsi tre ɖe wo ŋu. Ðe Mawu ƒe futɔwo ate ŋu axe mɔ ɖe tadedeagu vavãtɔ ƒe ŋgɔyiyi nua? Biabia ma ƒe ŋuɖoɖo na míeɖo ŋku ŋkekenyui eve mamlɛ siwo woŋlɔ ɖe Hebri Ŋɔŋlɔawo me dzi.

16. Nukae ɖe dzesi le ƒe 515 D.M.Ŋ. me ŋkekenyui aɖe ŋu?

¹⁶ Wova wu gbedoxɔa gbugbɔgatu nu le ƒe 515 D.M.Ŋ. ƒe dzinu si nye Adar me, eye wowu enu ɖe game dzi tututu na Nisan adame ŋkekenyui la ɖuɖu. Biblia gblɔ na mí be: “Woɖu abolo maʋãmaʋã ŋkekenyui la ŋkeke adre kple dzidzɔ, elabena Yehowa do dzidzɔ na wo, eye wòtrɔ Asur-fia ƒe dzi ɖe wo ŋu be, wòdo ŋusẽ woƒe alɔwo ɖe Israel ƒe Mawu ƒe xɔ la ŋu dɔwɔwɔ ŋuti.”—Ezra 6:22.

17, 18. (a) Ŋkekenyui ɖedzesi kae woɖu le ƒe 455 D.M.Ŋ. me? (b) Aleke míele nɔnɔme ma tɔgbe aɖe mee egbea?

¹⁷ Ƒe 60 megbe, le ƒe 455 D.M.Ŋ. me la, wogaɖu ŋkekenyui ɖedzesi bubu. Woɖu Avɔgbadɔŋkekenyui tsɔ de dzesi Yerusalem ƒe gliwo gbugbɔgaɖo ƒe nuwuwui. Biblia gblɔ na mí be: “Ameha blibo, si gbɔ tso aboyo me la, wɔ agbadɔwo, eye wonɔ agbadɔwo me, elabena tso Yosua, Nun vi la ŋɔli la Israel-viwo mewɔ alea kpɔ o vaseɖe ŋkeke ma dzi, eye wònye dzidzɔ gã ŋutɔ.”—Nexemya 8:17.

¹⁸ Mawu ƒe tadedeagu vavãtɔ gbugbɔgaɖoanyi si womaŋlɔ be o togbɔ be wotsi tre ɖe wo ŋu vevie hã kae nye si wònye! Alea ke wògale egbea hã. Togbɔ be míedo go yometiti kple tsitretsiɖeŋu gbogbo aɖe hã la, Mawu Fiaɖuƒe nyanyuia ɖo anyigba ƒe seƒewo ke, eye woɖe gbeƒã Mawu ƒe ʋɔnudɔdrɔ̃gbedasiwo wòde didiƒe ʋĩ. (Mateo 24:14) Amesiamina 144,000 la nutetre mlɔea tu aƒe. Woƒo amesiamina susɔeawo kple woƒe zɔhɛ ‘alẽ bubu’ siwo wu miliɔn atɔ̃ nu ƒu tso dukɔwo katã me ɖe “alẽha ɖeka” me. (Yohanes 10:16; Nyaɖeɖefia 7:3, 9, 10) Avɔgbadɔŋkekenyui la ƒe nyagblɔɖi ƒe emevava wɔnuku kae nye si! Eye nuƒoƒoƒudɔ vevi sia ayi edzi aɖo xexe yeyea me esime woakpe ame biliɔn geɖe siwo wofɔ ɖe tsitre be woawo hã nava kpɔ gome le nusi Avɔgbadɔŋkekenyuia nye vɔvɔli na la me.—Zaxarya 14:16-19.

Le Ƒe Alafa Gbãtɔ M.Ŋ. Me

19. Nukae na ƒe 32 M.Ŋ. me Avɔgbadɔŋkekenyuia ɖe dzesi?

¹⁹ Ðikekemanɔmee la, ŋkekenyui siwo woŋlɔ ɖe Biblia me siwo ɖe dzesi wu dometɔ aɖewoe nye esiwo ɖuƒe Mawu Vi, Yesu Kristo, de. Le kpɔɖeŋu me, bu Agbadɔŋkekenyui (alo, Avɔgbadɔŋkekenyui) si ɖuƒe Yesu de le ƒe 32 M.Ŋ. me ŋu kpɔ. Ezã mɔnukpɔkpɔ ma tsɔ fia nyateƒe veviwoe eye wòyɔ nya tso Hebri Ŋɔŋlɔawo me tsɔ ɖo kpe eƒe nufiafia dzii. (Yohanes 7:2, 14, 37-39) Nane si wowɔna ɖaa le ŋkekenyui sia ɖuɖu mee nye be wosia akaɖi ɖe akaɖiti gã ene siwo dzi akaɖi geɖe nɔna le gbedoxɔa ƒe xɔxɔnu emetɔ me la dzi. Nusia gadzia ŋkekenyuiɖuɖua ƒe dzidzɔkpɔkpɔ si yia edzi ɖoa zã me la ɖe edzi. Anye akaɖiti gã siawoe nɔ susu me na Yesu esime wògblɔ be: “Nyee nye xexeame ƒe kekeli la; amesi ke dzea yonyeme la, mele viviti la me zɔ ge akpɔ o, ke boŋ agbe la ƒe kekeli anɔ esi.”—Yohanes 8:12.

20. Nukatae ƒe 33 M.Ŋ. me Ŋutitotoŋkekenyui la ɖe dzesi?

²⁰ Ƒe 33 M.Ŋ. Ŋutitotoŋkekenyuia kple Abolo Maʋãmaʋã Ŋkekenyuia hã gaɖe dzesi. Ŋutitotoŋkekenyui ma ɖugbee Yesu ƒe futɔwo wui wòzu Ŋutitotolẽvi la ŋutɔŋutɔ si ku eye wòtsɔ “xexeame ƒe nuvɔ̃” yii. (Yohanes 1:29; Korintotɔwo I, 5:7) Ŋkeke etɔ̃agbe si nye Nisan 16 lia, Mawu fɔ Yesu ɖe gbɔgbɔmeŋutilã makumaku me. Esia sɔ ɖe lu gbãtɔ si wotsɔna saa vɔe le luŋeɣi abe alesi wobiae le Sea me ene la nu. Eyata Aƒetɔ Yesu Kristo si wofɔ ɖe tsitre la zu “amesiwo dɔ alɔ̃ [ɖe ku me] la dome ŋgɔgbetɔ.”—Korintotɔwo I, 15:20.

21. Nukae dzɔ le ƒe 33 M.Ŋ. me Pentekostea dzi?

²¹ Ŋkekenyui aɖe si ɖe dzesi vavãe nye ƒe 33 M.Ŋ. me Pentekoste-ŋkekenyuia. Le ŋkeke sia dzi la, Yudatɔ kple trɔ̃subɔla zu Yudatɔ geɖe kpe ta ɖe Yerusalem, eye Yesu ƒe nusrɔ̃la siwo ade 120 hã nɔ wo dome. Esime wonɔ ŋkekenyuia ɖum la, Aƒetɔ Yesu Kristo si wofɔ ɖe tsitre la kɔ Mawu ƒe gbɔgbɔ kɔkɔea ɖe ame 120 la dzi. (Dɔwɔwɔwo 1:15; 2:1-4, 33) To esia dzi la, wosi ami na wo wozu Mawu ƒe dukɔ yeye si wòtia to nubabla yeye si ƒe Avulélae Yesu Kristo nye la dzi. Le ŋkekenyui ma ɖuɖu me la, Yudatɔwo ƒe nunɔlagã la tsɔa abolo ʋaʋã eve siwo wotsɔ luŋeŋe gbãtɔ mee la saa vɔe na Mawu. (Mose III, 23:15-17) Abolo ʋaʋã mawo nye kpɔɖeŋu na amegbetɔ madeblibo 144,000 siwo Yesu ‘ƒle na Mawu’ be woanye ‘fiaɖuƒe kple nunɔlawo aɖu fia ɖe anyigba la dzi.’ (Nyaɖeɖefia 5:9, 10; 14:1, 3) Abolo ʋaʋã eveawo agate ŋu anye kpɔɖeŋu na alesi dziƒofia siawo tso ameƒome wɔnuvɔ̃ la ƒe akpa eve, Yudatɔwo kple Dukɔwo me tɔwo, me hã.

22. (a) Nukatae Kristotɔwo meɖua ŋkekenyui siwo wobia le Se ƒe nubabla la me o? (b) Nuka mee míadzro le nyati si kplɔe ɖo me?

²² Esi nubabla yeyea dze dɔwɔwɔ gɔme le ƒe 33 M.Ŋ. ƒe Pentekostea dzi la, efia be asixɔxɔ meganɔ Se ƒe nubabla xoxoa ŋu le Mawu ŋkume o. (Korintotɔwo II, 3:14; Hebritɔwo 9:15; 10:16) Mefia be Kristotɔ amesiaminawo megale se aɖeke te o. Wole Mawu ƒe se si Yesu Kristo fia si woŋlɔ ɖe woƒe dzi me la te. (Galatiatɔwo 6:2) Eyata esi ƒe sia ƒe ƒe ŋkekenyui etɔ̃awo le Se ƒe nubabla xoxoa me ta la, Kristotɔwo meɖunɛ o. (Kolosetɔwo 2:16, 17) Gake míate ŋu asrɔ̃ nu geɖe tso alesi Mawu ƒe subɔla siwo nɔ anyi do ŋgɔ na Kristotɔwo ŋɔli bua ŋkekenyuiwo kple tadedeagu ƒe kpekpe bubuwoe me. Míadzro kpɔɖeŋu siwo aʋã mía dometɔ ɖesiaɖe godoo be míakpɔ Kristotɔwo ƒe kpekpewo dede edziedzi ƒe vevienyenye la me le míaƒe nyati si kplɔe ɖo me.

[Etenuŋɔŋlɔwo]

Numetotobiabiawo

◻ Taɖodzinu kae nɔ Israel ƒe ŋkekenyui gã etɔ̃awo ŋu?

◻ Nukae ɖe dzesi le Xizkiya kple Yosiya ƒe ŋkekea me ŋkekenyuiwo ŋu?

◻ Nudzɔdzɔ vevi ka ƒe ŋkekee woɖu le ƒe 455 D.M.Ŋ. me, eye nukatae wòde dzi ƒo?

◻ Nukae ɖe dzesi le Ŋutitotoŋkekenyuia kple Pentekoste la ŋu le ƒe 33 M.Ŋ. me?

[Aɖaka si le axa 12]

Ŋkekenyui Me Nufiame Aɖe Na Mí Egbea

Ele be amesiwo katã Yesu ƒe nuvɔ̃vulévɔsa la aɖe vi na la nanɔ agbe ɖe nusi Abolo Maʋãmaʋã Ŋkekenyuia nye kpɔɖeŋu na la nu. Nusi ŋkekenyui sia nye vɔvɔli nae nye Kristotɔ amesiaminawo ƒe dzidzɔkpɔkpɔ ɖe alesi woɖe wo tso xexe vɔ̃ɖi sia me kple woƒe ɖeɖe tso nuvɔ̃ ƒe fɔbubu te to Yesu ƒe tafea dzi. (Galatiatɔwo 1:4; Kolosetɔwo 1:13, 14) Woɖua ŋkekenyuia ŋutɔŋutɔ ŋkeke adre—enye xexlẽme si wozãna le Biblia me tsɔ fiaa gbɔgbɔmeblibonyenyee. Nusi ŋkekenyuia fia la nɔa anyi le Kristotɔ amesiaminawo ƒe hamea ƒe anyigbadzinɔɣi la katã eye ele be woaɖui le “dzadzɛnyenye kple nyateƒe” me. Efia be woanɔ ŋudzɔ ɣesiaɣi ɖe kpɔɖeŋumɔwɔ ʋaʋã ŋuti. Wozãa amɔwɔ ʋaʋã le Biblia me tsɔ wɔa kpɔɖeŋui na nufiafia gbegblẽwo, alakpanuwɔwɔ, kple nugbegblẽwɔwɔ. Ele be Yehowa subɔla vavãwo naɖee afia be yewolé fu amɔwɔ sia, mele be woaɖe mɔ wòaƒo ɖi woƒe agbenɔnɔ kple Kristo-hamea ƒe dzadzɛnyenye o.—Korintotɔwo I, 5:6-8; Mateo 16:6, 12.

[Nɔnɔmetata si le axa 9]

Wotsɔa lubabla si nye lu si woŋe yeyee saa vɔe le ƒe sia ƒe ƒe Nisan 16 lia dzi, ŋkeke si dzi wofɔ Yesu ɖe tsitre

[Nɔnɔmetata si le axa 10]

Anye ŋkekenyuiɖuɣi kaɖiwoe nɔ susu me na Yesu esime wòyɔ eɖokui be “xexeame ƒe kekeli”