Èɖo Ŋku Wo Dzia?

Ðe Gbetakpɔxɔ siwo do nyitsɔ laa xexlẽ vivi nuwòa? Ne nenemae la, ke ŋkuɖoɖo nya siwo gbɔna dzi adzɔ dzi na wò:

◻ Nukatae míate ŋu aka ɖe amesiwo Yehowa tia be woana mɔfiame eƒe amewo la dzi?

Yehowa tiaa amesiwo si nɔnɔme tɔxɛ siwo hiã le hedea dɔ asi na wo be woakplɔ yeƒe amewo le mɔ si wòdi be woato le ɣeyiɣi aɖe tututu me nu.—8/15, axa 14.

◻ Nukae míate ŋu asrɔ̃ tso nusi dzɔ ɖe Yona dzi me?

Yona bu eɖokui ŋu fũ akpa eye metsɔ ɖeke le eme na ame bubuwo o. Míate ŋu asrɔ̃ nu tso Yona gbɔ ale be míagatsɔ mía ŋutɔ kple míaƒe seselelãmewo aɖo ŋgɔgbe o.—8/15, axa 19.

◻ Mɔ kawo nue míate ŋu agblɔ le be “Yehowa ƒe ŋkɔ enye mɔ sesẽ”? (Lododowo 18:10)

Mawu ƒe ŋkɔ si woasi atso fia ŋuɖoɖo ɖe Yehowa ŋutɔ ŋu. (Psalmo 20:2; 122:4) Efia megbenɔnɔ na eƒe dziɖulanyenye, eƒe sewo kple gɔmeɖosewo dzi wɔwɔ, eƒe ŋugbedodowo dzixɔxɔse, kple eya ɖeɖeko subɔsubɔ. (Yesaya 50:10; Hebritɔwo 11:6)—9/1, axa 10.

◻ Aleke ɖaseɖiɖimɔnu si Paulo zã le bubumewo ŋkume nye kpɔɖeŋu nyui na míi?

Paulo zã aɖaŋu tsɔ ƒo nu na Fia Agripa eye wòte gbe ɖe nya siwo eya kple Agripa lɔ̃ ɖo la dzi. Nenema ke wòle be míate gbe ɖe nyanyuia ƒe viɖewo kple mɔkpɔkpɔ siwo dzi mí katã míelɔ̃ ɖo dzii. (Korintotɔwo I, 9:22)—9/1, axa 31.

◻ Amekawoe Yehowa ƒe dzigbɔgbɔ blewu ɖea vi na?

Le Yehowa ƒe dzigbɔgbɔ blewu ta la, wole mɔnukpɔkpɔ nam ame miliɔn geɖe egbea be woakpɔ ɖeɖe le ‘Yehowa ƒe ŋkeke’ si gbɔna la dzi. (Petro II, 3:9-15) Eƒe dzigbɔgbɔ blewu ganye mɔnukpɔkpɔ na mía dometɔ ɖesiaɖe hã be ‘míatsɔ vɔvɔ̃ kple dzodzo nyanyanya awɔ mía ŋutɔwo míaƒe ɖeɖekpɔkpɔdɔe.’ (Filipitɔwo 2:12)—9/15, axa 20.

◻ Asixɔxɔ kae nɔ Septuagint Biblia-gɔmeɖeɖea ŋu?

Gɔmeɖeɖe sia wɔ akpa vevi aɖe le Yehowa Mawu kple eƒe Fiaɖuƒe si ƒe Fiae nye Yesu Kristo la ŋuti sidzedze kaka me. Woto Septuagint la dzi ɖo gɔmeɖoanyi vevi aɖe na Yudatɔ Helagbedolawo kple Trɔ̃subɔla siwo nɔ ƒe alafa gbãtɔ me la be woaxɔ Fiaɖuƒe ŋutinya nyui la.—9/15, axa 30.

◻ Nukae vi nudomegblẽlaa ƒe lododoa fia mí le Mawu ŋu?

Gbãtɔe nye be Yehowa nye ‘nublanuikpɔla kple amenuvela, amesi gbɔa dzi blewu, eye eƒe amenuveve kple nuteƒewɔwɔ sɔ gbɔ.’ (Mose II, 34:6) Evelia enye be ‘elɔ̃a tsɔtsɔke,’ ne ekpɔ dzimetɔtrɔ ƒe dzesi si bia be woakpɔ nublanui na ame. (Psalmo 86:5)—10/1, axa 12, 13.

◻ Ɣekayie ŋutifafa ƒe nɔnɔme si ŋugbe wodo le Yesaya 65:21-25 ava eme?

Amesiaminawo kpakple ‘alẽ bubuawo’ me tɔ siwo nye Yehowa subɔla siwo wɔ ɖeka la le gbɔgbɔmeparadisoa me egbea hele vivi sem le ŋutifafa si Mawu nana me. (Yohanes 10:16) Eye ŋutifafa ma axɔ aƒe ɖe Paradiso ŋutɔŋutɔ la me, ne ‘wova le Mawu ƒe lɔlɔ̃nu wɔm le anyigba katã dzi abe alesi wole ewɔm le dziƒo ene.’ Ɣemaɣie nyagblɔɖila Yesaya ƒe nyawo ava me bliboe. (Mateo 6:10)—10/15, axa 24.

◻ Nukatae Kristotɔwo ɖua srɔ̃ɖeɖe ƒe ƒezãwo evɔ womaɖua dzigbezãwo ya o?

Biblia meƒo nu gbegblẽ tso srɔ̃ɖeɖe ŋu o. Ne Kristotɔwo ɖoe be yewoaɖu srɔ̃ɖeɖe ƒe ƒezã atsɔ aɖo ŋku ŋkeke ma ƒe dzidzɔ kple tame si yewoɖo be yewo ame evea yewoawɔ nu be yewoakpɔ dzidzedze dzi alo yewomaɖui o la nye ame ŋutɔ ƒe nya. Gake trɔ̃subɔlawoe ɖu dzigbezã siwo ko ƒe nuŋlɔɖi dze le Biblia me, eye wowɔ ŋutasẽnuwo le wo me.—10/15, axa 30, 31.

◻ Le Paulo ƒe kpɔɖeŋu si woŋlɔ ɖe Korintotɔwo I, 3:12, 13 la, nukae “dzo” la le tsitre ɖi na, eye nukae wòle be Kristotɔwo katã nanya?

Dzo aɖe dze ŋgɔ mí katã le agbe me—enye míaƒe xɔse ƒe dodokpɔ. (Yohanes 15:20; Yakobo 1:2, 3) Woado amesiame si míefiaa nyateƒeae akpɔ. Ne míefia nu nyuie o la, nusi ado tso eme manyo o, abe alesi Paulo xlɔ̃ nui ene. (Korintotɔwo I, 3:15)—11/1, axa 11.

◻ Aleke Noa ‘zɔ kple Mawui’? (Mose I, 6:9)

Noa zɔ kple Mawu le gɔmesese sia nu be ewɔ nusi Mawu gblɔ nɛ be wòawɔ. Esi Noa tsɔ eƒe agbe ɖo anyi na Mawu ƒe lɔlɔ̃nu wɔwɔ ta la, ƒomedodo kplikplikpli si me vivisese le nɔ eya kple Mawu dome.—11/15, axa 10.

◻ Mɔnukpɔkpɔ kawoe ɣeyiɣi si tututu dzi Mawu abia hlɔ̃ ame vɔ̃ɖiwo si míenya o la na mí?

Esia na mɔnukpɔkpɔ mí be míaɖo kpe edzi be míelɔ̃ Yehowa vavã eye míedi be míazɔ eƒe mɔwo dzi tegbee. Efia hã be míeku ɖe Mawu ŋu goŋgoŋ eye míeka ɖe alesi wòkpɔa nyawo gbɔe dzi. Tsɔ kpe ɖe eŋu la, esia kpena ɖe mía ŋu be míanɔ ŋudzɔ eye míagadɔ gbɔgbɔmelɔ̃ o. (Mateo 24:42-44)—11/15, axa 18.

◻ Be woaxɔ ‘Mawu ƒe Vi la ƒe ŋkɔ dzi ase’ gɔme ɖe? (Yohanes I, 5:13)

Esia fia Kristo ƒe sewo katã, tsɔ kpe ɖe eƒe se be ‘míalɔ̃ mía nɔewo’ la dziwɔwɔ ŋu. (Yohanes 15:14, 17) Lɔlɔ̃ na wowɔa nyui na ame bubuwo. Eɖea ameƒomevinyenye ƒe vovototo, subɔsubɔ, kple hadome ƒe nazãbubu ɖesiaɖe ɖa.—12/1, axa 7.

◻ Nukatae ‘woléa Yehowa Ðasefowo ɖe ke me’? (Mateo 10:22)

Susu siwo ta woti Kristotɔ gbãtɔwo yome la ke tae woléa fu Yehowa Ðasefowo madzemadzee ɖo. Gbã la, Yehowa Ðasefowo wɔna ɖe woƒe subɔsubɔdzixɔsewo dzi ale gbegbe be woƒe nu medzɔa dzi na ame aɖewo o. Evelia, woɖonɛ koŋ tsɔa alakpanyawo ɖe wo ŋu—wonyea alakpa ŋutɔŋutɔwo kpakple woƒe dzixɔsewo tɔtrɔ gboe.—12/1, axa 14.