Sɔhɛwo Biana Be . . .

Ðe Mawu Ayi Edzi Anye Xɔ̃nyea?

FIA DAWID nye ŋutsu aɖe si kple Mawu wɔ xɔ̃. Gake egblɔ ɣeaɖeɣi be: “Nye dzimexaxawo do gã ɖe edzi.” Menye ame bubuwo ƒe fuwɔwɔame ko tae Dawid nɔ fu kpem ɖo o, ke eya ŋutɔ ƒe vodadawo hã tae. Eva nɔ sesem le eɖokui me be Mawu gblẽ ye ɖi, eye wòdo gbe ɖa be: “Trɔ kɔ ɖe ŋunye, eye nave nunye, elabena metsi akogo, eye mele hiã ɖim.”—Psalmo 25:11, 16-19.

Ðewohĩ nu te ɖe wò hã dziwò. Ðewohĩ èle xaxa si wu tsɔtsɔ na wò me le aƒeme loo alo le suku. Azɔ hã la, lãmegbegblẽ sesẽ aɖe anya le ŋuwò alo dzi anya ɖe le ƒowò le gbɔdzɔgbɔdzɔ aɖe si dze ŋgɔwò ta. Nuka kee nye xaxa la o, wò ɖeɖe màtsɔe o; Mawu lɔ̃na faa be woadze xɔlɔ̃ ye ahabia yeƒe kpekpeɖeŋu.a Ne èdze mia kplii dome ƒomedodo tutuɖo gɔme xoxoxo la, ke enyanya be megblẽa etɔwo ɖi ne xaxa tu wo o la afa akɔ na wò. Togbɔ be ele alea hã la, ne kuxiwo ɖe kpe na wò la, adze abe ke ɖe Mawu te ɖa le ye ŋu ene. Awɔ na wò gɔ̃ hã abe ɖe mele kpekpem ɖe ŋuwò kura o ene. Gake nenemae wòlea?

‘Ŋù le Ŋutilã Me’

Taflatse, xlẽ Korintotɔwo II, 12:7-10 gbã. Apostolo Paulo gblɔ alesi wònɔ fu kpem le nusi wòyɔ be ‘ŋù le ŋutilã me’ ŋuti ɖe afima. Anɔ eme be “ŋù” la nye ŋutilã me dɔléle aɖe, ɖewohĩ enye ŋkudɔ aɖe si nɔ eŋu. Nukae wòɖanye o, enɔ ‘eƒom’ xlã ɖe anyi le seselelãme gome. Togbɔ be eƒo koko na Mawu vevie zi etɔ̃ be wòaɖee ɖa na ye hã la, “ŋù” la kpɔtɔ nɔ eme.

Ðe Yehowa nɔ aɖaba ŋem ƒu Paulo ƒe gbedodoɖawo dzia? Kpao! Mawu gblɔ nɛ be: “Nye amenuveve sɔ gbɔ na wò; elabena nye ŋusẽ zu blibo le gbɔdzɔgbɔdzɔ me.” Togbɔ be Yehowa ɖoe be yemaɖe “ŋù” ma ɖa na Paulo o hã la, megblẽe ɖi o. Le Mawu ƒe amenuveve me la, xɔlɔ̃wɔwɔ kplikplikpli nɔ eya kple Paulo dome. Ema “sɔ gbɔ” be wòkpe ɖe Paulo ŋu wònɔ te ɖe eƒe dɔlélea nu. Esi Paulo nɔ ʋiʋlim le esia wɔwɔ me la, akpɔe hã be Mawu tsɔ eƒe ŋusẽ lé ye ɖe tee le mɔ yeye aɖe nu le ye gome hetsɔ ɖe le ye me.

Kpekpeɖeŋu Li Ne Èle Akɔ Kpem Kple Kuxiwo

Abe Paulo ene la, ɖewohĩ “ŋù” alo kuxi aɖe anɔ ŋuwò anɔ tɔwòm, si ana nàbu be naneke magava nyo o eye wòaɖe dzi le ƒowò. Abe alesi wònɔ le Paulo gome ene la, ɖewohĩ Mawu aɖe mɔ nenema ke kuxia nakpɔtɔ anɔ anyi. Ema mefia be meganye Xɔ̃wò o. Mawu gblɔ na apostolo Paulo be: “Nye ŋusẽ zu blibo le gbɔdzɔgbɔdzɔ me.” Ne èɖoa ŋu ɖe Mawu ƒe ŋusẽ ŋu, ke menye ɖe tɔwò ŋu o la, àte ŋu ado dzi. Àva kpɔe gɔ̃ hã be le Mawu ƒe gbɔgbɔa ƒe kpekpeɖeŋu me la, yete ŋu le nusiwo yesusu be manya wɔ o wɔm. Paulo gblɔ be: “Mekpɔa ŋudzedze nyui le gbɔdzɔgbɔdzɔ me . . . Elabena ne megbɔdzɔ la, ekema mesẽa ŋu.”

Ðetugbivi aɖe si ŋkɔe nye Robinb kpɔe be esia nye nyateƒe. Esi wòxɔ ƒe 14 la, ŋkudɔ aɖe na eƒe ŋku tsi. Le ƒe ma ke me la, dadaa ku kpata. Robin gblɔ be, “fifia Yehowa koe kpɔtɔ nam,” esi wòva nɔ akɔ kpem kple “ŋù” tɔame siawo. “Menya be ne manɔ te ɖe nɔnɔmea nu dzidzedzetɔe la, ke ele be manɔ eŋu kplikplikpli.” Esia tututue Robin wɔ, eye ʋeʋeʋe la ezu ɣeyiɣiawo katã ƒe nyanyuigblɔla. Egblɔ be: “Mebia Yehowa be wòakpe ɖe ŋunye le nusianu me. Ewɔe hã.”

Sɔhɛ geɖe kpɔe be dodokpɔwo me toto kpena ɖe yewo ŋu yewotena ɖe Mawu ŋu kplikplikpli wu. Bu ɖekakpui si ŋkɔe nye Jeff ŋu kpɔ. Fofoa gblẽ woƒe ƒomea ɖi dzo, wòzu agba na Jeff dadaa ɖeka be wòakpɔ ɖevi adre dzi. Jeff, amesi xɔ ƒe 12 ɣemaɣi lɔ̃ ɖe edzi be: “Fofo ƒe lɔlɔ̃ dzroam vevie. Edzroam gbesiagbe be ame aɖe naxɔ ɖe eteƒe nam.” Nukae Jeff wɔ? “Medoa gbe ɖa na Yehowa be wòakpe ɖe ŋunye makpɔ hiahiã ma gbɔ.” Jeff wɔ nu wòsɔ ɖe eƒe gbedodoɖawo nu eye wòva ƒo eɖokui ɖe gbɔgbɔmedɔwo me. Le ɣeyiɣi aɖe megbe la, ekpɔe be Yehowa le kpekpem ɖe ye ŋu—to eƒe gbɔgbɔ kɔkɔe ƒe ŋusẽdoame kple Kristo-hamea dzi. (Tsɔe sɔ kple Psalmo 27:10.) Jeff si xɔ ƒe 27 fifia gblɔ le nusi dzɔ va yi ŋu be: “Esi ame aɖeke meli si gbɔ mayi anɔ dedie o ta la, mete ɖe Yehowa ŋu kplikplikpli.” Eyɔ ƒomedodo kplikplikpli ma be “yayra xɔasi si tso dodokpɔ sia me.”

Alesi Nàwɔ Axɔ Mawu ƒe Kpekpeɖeŋu

Xɔ̃wò si le dziƒo la akpe ɖe ŋuwò nenema ke le wò xaxawo me. Gake nukae wòle be nàwɔ. Be ƒomedodo aɖe nayi edzi atsi la, ele be dzeɖoɖo nanɔ anyi. Gbedodoɖa nye mɔ si dzi míetona ɖoa dze kple Mawu. Míetoa edzi nana wònyana be míehiã na eƒe kpekpeɖeŋu. Gake ne seselelãme alo ameʋãnu aɖeke mele gbedodoɖa me o la, asixɔxɔ aɖeke menɔa eŋu o. Abe alesi sɔhɛ siwo ƒe nya míegblɔ va yi wɔe ene la, ele be ‘natrɔ wò dzi aƒo ɖe’ Mawu ŋkume! (Psalmo 62:9) Ðewohĩ ahiã gɔ̃ hã be nàdo kokoƒogbewo ɖa. (Filipitɔwo 4:6) Kokoƒogbewo nye gbedodoɖa siwo me seselelãme sesẽwo nɔna eye wotsɔa moveviɖoɖo dona wo ɖae.

Tsɔe be yeƒe susuwo alo numãme baɖa aɖe dzi ɖuɖu le sesẽm na ye. Ƒo koko na Yehowa! Bia eƒe kpekpeɖeŋu ne tetekpɔ do mo ɖa. Esia manɔ bɔbɔe ɣesiaɣi ya o. Gary gblɔ be: “Ne nu gbegblẽ aɖe wɔwɔ le dzroyem vevie la, mezia ɖokuinye dzi doa gbe ɖa. Mebuna ɣeaɖewoɣi be, ‘Ðe medze ate ɖe Yehowa ŋua?’ Gake ɖeko megaƒoa koko biaa eƒe kpekpeɖeŋu. Etsɔa ŋusẽ si mehiã be matsɔ anɔ tee la nam.” Ne esesẽ na wò gbã hã la, wò ya nɔ wò dzimenyawo gbɔgblɔ na Mawu dzi.

Ke ne ewɔ abe ɖe womele wò gbedodoɖawo ŋu ɖom o ene ya ɖe? Le kpɔɖeŋu me, Lora nɔ ʋiʋlim be yeaɖu ɖokuigbɔdɔdɔ ƒe numãme baɖa la dzi. Eɖe eme be: “Megblɔa kuxia na Yehowa anukwareɖiɖitɔe, gake nyemete ŋu le edzudzɔm o.” Mawu aɖe mɔ na mí ɣeaɖewoɣi be míaɖe alesi gbegbe nusiwo biam míele le vevie na míi afia. (Tsɔe sɔ kple Psalmo 88:14, 15.) Eyata ele be míanɔ gbedodoɖa dzi ɖaasi! (Mateo 7:7; Romatɔwo 12:12) Alea tututu Lora wɔ. Le ɣeyiɣi ma ke me la, eva nɔ aɖaŋuɖoɖo siwo dzena le nyati siwo ƒo nu tso nya sia ŋu le Gbetakpɔxɔ Habɔbɔa ƒe agbalẽwo me ŋudɔ wɔm.c Le ɣeyiɣi aɖe megbe la, ete eƒe viɖewo kpɔkpɔ. Eɖo ŋku edzi gblɔ be: “Ɣesiaɣi si menya nɔ te ɖe tetekpɔ nu ko la, medaa akpe na Yehowa elabena menya be eli kplim.” Nyateƒee, ɖewohĩ àgawɔ nusi dzi nèle agbagba dzem be yeaɖu la ake. Gake zi alesi nèyi edzi le ʋiʋlim eye menye ɖe nèɖoe koŋ le mɔ nam wò gbɔdzɔgbɔdzɔa o la, Mawu akpɔ dzidzɔ ɖe ‘agbagba siwo dzem nèle moveviɖoɖotɔe’ ŋu eye wòayi edzi anye Xɔ̃wò.—Petro II, 1:5.

Dɔwɔwɔ Kple Mawu

Mɔ bubu si dzi nàto axɔ Mawu ƒe kpekpeɖeŋu enye be nàwɔ ɖe eƒe amekpekpe be nànye yeƒe “hadɔwɔlawo” dometɔ ɖeka dzi. (Korintotɔwo I, 3:9) Esia ƒe akpa aɖee nye be wò hã nàkpɔ gome le kpekpe ɖe ame bubuwo ŋu me be woasrɔ̃ nu tso Mawu ŋu. (Mateo 28:19, 20) Ne nu te ɖe dziwò alo dzi ɖe le ƒowò la, madzro wò be nawɔ dɔ aɖeke o. Gake ‘gogbagba ɖaasi le Aƒetɔ la ƒe dɔwɔwɔ me’ ate ŋu akpe ɖe ŋuwò ŋutɔ. (Korintotɔwo I, 15:58) Ana nàɖe susu ɖa le wò ŋutɔ wò kuxiwo ŋu ya teti. (Tsɔe sɔ kple Lododowo 18:1.) Robin, amesi ƒe nya míegblɔ do ŋgɔ, gblɔ le eƒe xaxaɣiwo ŋu be: “Dɔ si menɔ wɔwɔm na Yehowa ye lém ɖe te!”

Dɔwɔwɔ kple Mawu agate ŋu akpe ɖe ŋuwò nàɖu alesi nànɔ sesem le ɖokuiwò me kokoko be Mawu gblẽ ye ɖi la dzi. Ne ame eve ƒo ƒu le dɔ wɔm ɖe taɖodzinu ɖeka ta la, ɖe wo dome menɔa kplikplikpli wu abe alesi xɔlɔ̃wo dome nɔna ene oa? Èdoa go nya sesẽwo ɣesiaɣi esi nèle gbeƒãɖeɖedɔa wɔm. Èkpɔnɛ be yetrɔna ɖe Mawu ŋu biaa kpekpeɖeŋui. Eye esi Mawu le wò dɔwɔnawo yram la, mia kplii ƒe xɔlɔ̃wɔwɔ zua nu ŋutɔŋutɔ wu. Èva nɔa alesi Mawu ɖoa ŋu ɖe ŋuwò be enye yeƒe hadɔwɔla la kpɔm nɔa si dzemee. Esia ate ŋu atu kakaɖedzi si le mewò ɖo vevie.

Le kpɔɖeŋu me, Carol meɖea dzi ɖi o. Dadaa wu eɖokui, eye fofoa si wɔa ŋlɔmi le eŋu ɣesiaɣi la ɖia gbɔ̃e. Gake ezu Yehowa Ðasefo le eƒe ƒe 17 xɔxɔ me eye wòdze gbeƒãɖeɖedɔ gɔme. Fifia esi wòtsɔ ƒe ewo wɔ ɣeyiɣiawo katã ƒe mɔɖeɖedɔ vɔ megbe la, egblɔ be: “Dɔ sia kpe ɖe ŋunye ale gbegbe elabena mekpɔe be Yehowa ƒe yayra le dzinye. Megblɔna na ɖokuinye be, ‘Ne Mawu lɔ̃m la, ke nyemenye yakame o.’ Alesi Yehowa zãam tsɔ ɖea gbeƒã eƒe ŋkɔe na meɖe dzi ɖi wu.”

‘Ðɔe Kpɔ, eye Nàkpɔ be Yehowa ƒe Dɔme Nyo’

Fia Dawid, amesi bebli hafi wòsi le nɔnɔme sesẽ si do ŋɔdzi na eƒe agbe nu la ŋlɔe bena: “[Mawu ɖem] tso nye ŋɔdziwo katã me.” (Psalmo 34:5, 7; Samuel I, 21:11-13) Eyata Dawid te ŋu gblɔ tso nuteƒekpɔkpɔ me be: “Miɖɔe kpɔ, eye miakpɔ be, Yehowa ƒe dɔme nyo; woayra ŋutsu, si sii tso.”—Psalmo 34:9.

Togbɔ be ɖewohĩ wò agbe maɖo afɔku me abe Dawid ene o hã la, ɖikeke mele eme o be àto nuteɖeamedziwo kple xaxa aɖewo me ɣeaɖewoɣi. Ne wò “dzimexaxawo do gã ɖe dzi” la, ƒo koko na Mawu. (Psalmo 25:17) Mègavɔ̃ be Mawu atso mia kplii ƒe xɔlɔ̃wɔwɔ me o. Esi nètsɔ dzigbɔɖi le dzi domee hele Yehowa ƒe kpekpeɖeŋu kple beléname kpɔm tẽ la, wò ŋutɔ ‘àɖɔe kpɔ akpɔ be Yehowa ƒe dɔme nyo.’ Eye akpɔtɔ anye Xɔ̃wò ɖaa tegbee.—Yakobo 4:8.

[Etenuŋɔŋlɔwo]

[Nɔnɔmetata si le axa 29]

Ðe Mawu gblẽa exɔlɔ̃wo ɖi le xaxaɣia?