Kristotɔwo Ƒe Ðekawɔwɔ Hea Ŋutikɔkɔe Vanɛ Na Mawu
“Midze agbagba vevie miawɔ ɖeka le gbɔgbɔ la me.”—EF. 4:3.
1. Aleke ƒe alafa gbãtɔ me Kristotɔ siwo nɔ Efeso la he ŋutikɔkɔe vae na Mawu?
ÐEKAWƆWƆ si nɔ Kristo hame si nɔ blema Efeso me la he ŋutikɔkɔe vae na Yehowa, Mawu vavã la. Edze ƒãa be, le asitsadu vevi ma me la, nɔvi Kristotɔ aɖewo nye kesinɔtɔ siwo si kluviwo nɔ, evɔ wo dometɔ bubuwo ya nye kluviwo eye anɔ eme be woda ahe ŋutɔ. (Ef. 6:5, 9) Wo dometɔ aɖewo nye Yudatɔ siwo srɔ̃ nyateƒea le ɣleti etɔ̃ siwo apostolo Paulo tsɔ fia nu le woƒe ƒuƒoƒea la me. Eye hamea me tɔ aɖewo hã subɔ trɔ̃ si woyɔna be Artemis la eye wonye akunyawɔlawo tsã. (Dɔw. 19:8, 19, 26) Eme kɔ ƒãa be ame ƒomevi vovovo kple dukɔ vovovo me tɔwoe va zu Kristo hame vavã la me tɔwo. Paulo kpɔe dze sii be hamea ƒe ɖekawɔwɔ he ŋutikɔkɔe vae na Yehowa. Eya ta apostoloa ŋlɔ bena: “Eya tɔ nanye ŋutikɔkɔe to hame la [dzi].”—Ef. 3:21.
2. Nu kae na Kristotɔ siwo nɔ Efeso la ƒe ɖekawɔwɔa ɖo afɔku me?
2 Ke hã, ɖekawɔwɔ si nye yayra na Efeso hamea la ɖo afɔku me. Eya ta Paulo xlɔ̃ nu woƒe hamemetsitsiwo be: “Le mia ŋutɔwo dome la, ame aɖewo atsi tsitre, eye woagblɔ nya totrowo, be woahe nusrɔ̃lawo ɖe wo ɖokuiwo ŋu.” (Dɔw. 20:30) Gakpe ɖe eŋu la, nɔvi aɖewo meɖe asi le nɔnɔme siwo dea mama amewo dome, siwo Paulo gblɔ be “[wole] dɔ wɔm le tomaɖomaɖo ƒe viwo me” la ŋu keŋkeŋ o.—Ef. 2:2; 4:22.
Lɛta Aɖe Si Te Gbe Ðe Ðekawɔwɔ Dzi
3, 4. Alekee lɛta si Paulo ŋlɔ na Efesotɔwo la te gbe ɖe ɖekawɔwɔ dzi?
3 Paulo de dzesii be hafi Kristotɔwo nate ŋu ayi edzi anɔ nu wɔm le ɖekawɔwɔ me la, ele be wo dometɔ ɖe sia ɖe nadze agbagba vevie anɔ nu siwo ana ɖekawɔwɔ nanɔ hamea me la wɔm. Mawu tsɔ eƒe gbɔgbɔ ʋã Paulo wòŋlɔ lɛta aɖe na Efesotɔwo si me wòte gbe ɖe ɖekawɔwɔ dzi le. Le kpɔɖeŋu me, Paulo ŋlɔ nu tso Mawu ƒe tameɖoɖo si nye be, ‘yeaƒo nuwo katã nu ƒu ɖekae ake ɖe Kristo la me’ ŋu. (Ef. 1:10) Tsɔ kpe ɖe eŋu la, etsɔ Kristotɔwo sɔ kple kpe vovovo siwo wotsɔ tu xɔ aɖee. ‘Xɔ blibo si wotu kpe ɖo nyuie la le tsitsim le gbedoxɔ kɔkɔe zum na Yehowa.’ (Ef. 2:20, 21) Gakpe ɖe eŋu la, Paulo te gbe ɖe Yudatɔwo kple Dukɔwo me tɔ siwo zu Kristotɔwo la ƒe ɖekawɔwɔ dzi, eye wòɖo ŋku edzi na nɔviawo be Mawu ɖeka koe wɔ wo katã. Egblɔ na wo be, Yehowae nye “Fofo la, ame si gbɔ wòtso be ŋkɔ le ƒome sia ƒome, si le dziƒo kple anyigba dzi la si.”—Ef. 3:5, 6, 14, 15.
4 Ne míele Efesotɔwo ta 4 lia me dzrom la, míava kpɔ nu si tae ɖekawɔwɔ bia agbagbadzedze vevie; míakpɔ ale si Yehowa kpena ɖe mía ŋu míewɔa ɖekae, eye míade dzesi nɔnɔme siwo wòle be woanɔ mía si bene míakpɔtɔ awɔ ɖeka. Ðe manyo be nàxlẽ ta bliboa katã bene nusɔsrɔ̃a naɖe vi na wò geɖe wu oa?
Nu Si Tae Ðekawɔwɔ Bia Agbagbadzedze Vevie
5. Nu ka tae mawudɔlawo tea ŋu subɔa Mawu le ɖekawɔwɔ me, gake nu ka tae ɖekawɔwɔ ate ŋu asesẽ na míawo ya wu?
5 Paulo xlɔ̃ nu Efeso nɔviwo vevie be ‘woadze agbagba vevie awɔ ɖeka le gbɔgbɔ la me.’ (Ef. 4:3) Bene nàte ŋu akpɔ ale si agbagbadzedze hiã le go sia me adze sii la, bu ale si nuwo le le mawudɔlawo gome ŋu kpɔ. Nu gbagbe aɖeke mesɔ kple nɔvia pɛpɛpɛ le anyigba dzi o, eya ta susu le eme be míaƒo nya ta be, Yehowa wɔ mawudɔla ɖe sia ɖe kple amenyenye tɔxɛ aɖe. (Dan. 7:10) Ke hã, wotea ŋu subɔa Yehowa le ɖekawɔwɔ me, elabena wo katã woɖoa to eƒe gbe hewɔa eƒe lɔlɔ̃nu. (Mixlẽ Psalmo 103:20, 21.) Abe mawudɔla wɔnuteƒewo ke ene la, amenyenye vovovowoe le mí Kristotɔwo si, ke hã, gbɔdzɔgbɔdzɔ vovovowo le míawo ya ŋu. Esia ate ŋu awɔe be ɖekawɔwɔ nasesẽ na mí wu.
6. Nɔnɔme kawoe akpe ɖe mía ŋu be míate ŋu awɔ nu aduadu kple nɔvi siwo ŋu gbɔdzɔgbɔdzɔ siwo to vovo na mía tɔwo le la?
6 Ne amegbetɔ madeblibowo le agbagba dzem be yewoawɔ nu aduadu la, ate ŋu adzɔ bɔbɔe be woado go kuxiwo. Le kpɔɖeŋu me, tsɔe be nɔviŋutsu fatu aɖe si tsia megbe edziedzi la kple nɔviŋutsu aɖe si nɔa game dzi evɔ wòdoa dziku kabakaba la le Yehowa subɔm le hame ɖeka me. Wo dometɔ ɖe sia ɖe ate ŋu ase le eɖokui me be ame kemɛa ƒe nuwɔna mesɔ o, gake ɖewohĩ aŋlɔ be be ye hã yeƒe nuwɔna mesɔ le nanewo me o. Aleke nɔviŋutsu eve siawo ate ŋu awɔ asubɔ aduadu le ɖekawɔwɔ me? Bu ale si nɔnɔme siwo Paulo kafu le eƒe nya siwo gbɔna me la ate ŋu akpe ɖe wo ŋui ŋu kpɔ. Eyome nàde ŋugble le ale si míate ŋu ana ɖekawɔwɔ nanɔ mía dome to nɔnɔme mawo tutuɖo me ŋu. Paulo ŋlɔ bena: “Mele kuku ɖem na mi vevie be miazɔ ale si dze . . . le tamebɔbɔɖeanyi kple tufafa blibo me, le dzigbɔgbɔ blewu me, eye miado dzi anɔ anyi kple mia nɔewo le lɔlɔ̃ me, eye midze agbagba vevie miawɔ ɖeka le gbɔgbɔ la me le ŋutifafa ƒe nublanu la me.”—Ef. 4:1-3.
7. Nu ka tae wòle vevie be míadze agbagba awɔ nu le ɖekawɔwɔ me kple Kristotɔ madeblibo bubuwo?
7 Ele vevie be míasrɔ̃ ale si míasubɔ Mawu le ɖekawɔwɔ me kple mía nɔvi siwo hã nye ame madeblibowo, elabena tadeagula vavãwo ƒe habɔbɔ ɖeka koe li. “Ŋutilã ɖeka kple gbɔgbɔ ɖeka ye li, abe ale si ko woyɔ mi le mɔkpɔkpɔ ɖeka, si gbɔ woyɔ mi vae la me ene; Aƒetɔ ɖeka, xɔse ɖeka, nyɔnyrɔxɔxɔ ɖeka; Mawu ɖeka, si nye amewo katã Fofo, ame si le wo katã nu.” (Ef. 4:4-6) Yehowa ƒe gbɔgbɔ kple yayra le nɔviwo ƒe habɔbɔ ɖeka kolia si zãm Mawu le la dzi. Ne edzɔ be hamea me tɔ aɖe wɔ nu wòve mí vevie gɔ̃ hã la, ɖe teƒe bubu aɖe gali míayia? Teƒe bubu aɖeke megali si míase agbe mavɔ nyawo le o.—Yoh. 6:68.
“Nunana Siwo Nye Amewo” La Doa Ðekawɔwɔ Ðe Ŋgɔ
8. Ame kawoe Kristo zãna tsɔ kpena ɖe mía ŋu be mama nagaɖo mía dome o?
8 Paulo zã nane si asrafo siwo nɔ anyi le blemaɣeyiɣiwo me wɔna zi geɖe la tsɔ wɔ kpɔɖeŋui na ale si Yesu na “nunana siwo nye amewo” be woana ɖekawɔwɔ nanɔ hamea me. Asrafo siwo ɖu aʋa dzi la tea ŋu kplɔa aboyomewo vaa aƒe mee be woanye kluviwo akpe ɖe yewo srɔ̃wo ŋu le aƒemedɔwo wɔwɔ me. (Ps. 68:2, 13, 19) Le mɔ ma ke nu la, esi Yesu ɖu xexea dzi la, kluvi geɖe siwo lɔ̃ faa be yewoasubɔe la va su esi. (Mixlẽ Efesotɔwo 4:7, 8.) Alekee wòzãa ame siawo siwo woate ŋu agblɔ be wonye aboyomewo lae? “[Etsɔ] ame aɖewo na wonye apostolowo, ɖewo nye nyagblɔɖilawo, ɖewo nye nya nyui gblɔlawo, eye ɖewo nye alẽkplɔlawo kple nufialawo, kple susu be woaɖɔ ame kɔkɔewo ɖo, hena subɔsubɔdɔwɔwɔ, hena Kristo la ƒe ŋutilã tutu, va se ɖe esime mí katã míawɔ ɖeka le xɔse” me.—Ef. 4:11-13.
9. (a) Aleke “nunana siwo nye amewo” la dzea agbagba be ɖekawɔwɔ nakpɔtɔ anɔ mía dome? (b) Nu ka tae wòle be hamea me tɔ ɖe sia ɖe nakpe asi ɖe ɖekawɔwɔ si le hamea me ŋu?
9 Alẽkplɔla lɔ̃ame siawo siwo nye “nunana siwo nye amewo” la dzea agbagba be ɖekawɔwɔ nakpɔtɔ anɔ mía dome. Le kpɔɖeŋu me, ne hamemetsitsi aɖe de dzesii be ‘hoʋiʋli ƒe gbɔgbɔ’ le gegem ɖe nɔviŋutsu eve aɖewo me ɖe wo nɔewo ŋu la, ate ŋu awɔ geɖe be ɖekawɔwɔ nanɔ hamea me ne eyɔ woawo ɖeɖe heɖo aɖaŋu na wo bene ‘wòaɖɔ nenem me mawo ɖo le tufafa ƒe gbɔgbɔ me.’ (Gal. 5:26–6:1) Abe nufialawo ene la, “nunana siwo nye amewo” siawo toa Biblia me nufiafiawo dzi kpena ɖe mía ŋu míetua xɔse sẽŋu ɖo. To esia dzi la, wodoa ɖekawɔwɔ ɖe ŋgɔ, eye wokpena ɖe mía ŋu míewɔa ŋgɔyiyi va zua Kristotɔ siwo tsi le gbɔgbɔ me. Paulo ŋlɔ bena wowɔa esia “bene míaganye vidzĩ, siwo wonyamana abe ale si ƒutsotsoewo nyamaa nu ene, eye nufiafia ƒe ya sia ya ƒona yina gaƒona gbɔna, to amewo ƒe beble me, to alakpanya si ŋu wotrɔ asi le aɖaŋutɔe la me o.” (Ef. 4:13, 14) Ele be Kristotɔ ɖe sia ɖe nakpe asi ɖe ɖekawɔwɔ si le nɔviwo ƒe habɔbɔa me ŋu, abe ale si ko míaƒe ŋutilãa ƒe ŋutinu ɖe sia ɖe kpea asi ɖe ŋutinu bubuwo ŋu to etɔ si nua wɔwɔ le nu si ŋutilãa hiã gbɔ kpɔkpɔ me dzi ene.—Mixlẽ Efesotɔwo 4:15, 16.
Tu Nɔnɔme Nyuiwo Ðo
10. Aleke gbɔdɔdɔ ƒe agbe gbegblẽ nɔnɔ ate ŋu agblẽ nu le míaƒe ɖekawɔwɔa ŋu?
10 Ède dzesii be lɛta si Paulo ŋlɔ na Efesotɔwo la ƒe ta enelia ɖee fia be nuwɔwɔ le lɔlɔ̃ mee nye mɔ vevitɔ si dzi míato ana ɖekawɔwɔ nanɔ mía dome abe Kristotɔ siwo tsi le gbɔgbɔ me enea? Eyome egblɔ nu si lɔlɔ̃ɖeɖefia lɔ ɖe eme. Le kpɔɖeŋu me, nuwɔwɔ le lɔlɔ̃ me bia be míaƒo asa na agbe gbegblẽ nɔnɔ kple ŋukpenanuwɔwɔ. Paulo xlɔ̃ nu nɔviawo be ‘woagayi edzi anɔ zɔzɔm, abe ale si dukɔwo hã zɔna’ ene o. “Naneke megakpea ŋu na” ame siawo o, eye “wotsɔ wo ɖokuiwo na ŋukpenanuwɔwɔ.” (Ef. 4:17-19) Xexe sia si me agbe gbegblẽ nɔnɔ xɔ aƒe ɖo la ƒe ŋusẽkpɔɖeamedziwo ate ŋu agblẽ nu le míaƒe ɖekawɔwɔa ŋu. Amewo ƒoa nu tso matrewɔwɔ ŋu le fefenyawo me, wotsɔa eŋutinyawo kpaa hae, wokpɔnɛ tsɔ ɖea modzakae, eye wokpɔa gome le eme le adzame alo wowɔnɛ wònɔa nyanya na amewo gɔ̃ hã. Ke hã, ahiãmoɖoɖo gɔ̃ hã, si nye nuwɔwɔ ɖe ame aɖe ŋu abe ɖe eƒe nu lé dzi na wò ene evɔ mèwɔ susu be yeaɖee o, ate ŋu aɖe wò ɖe aga tso Yehowa kple hamea gbɔ. Nu ka tae? Elabena etea ŋu kplɔa ame dea gbɔdɔdɔ ƒe agbe gbegblẽ nɔnɔ me bɔbɔe. Gakpe ɖe eŋu la, ahiãmoɖoɖo tea ŋu kplɔa ame si nye srɔ̃tɔ la dea ahasiwɔwɔ me, eye esia ate ŋu aklã ɖeviwo ɖa tso wo dzilawo gbɔ eye wòana srɔ̃tɔ maɖifɔ la kple srɔ̃a dome nama nublanuitɔe. Edea mama amewo dome nyateƒe! Mewɔ nuku o be Paulo ŋlɔ bena: “Miesrɔ̃e be nenemae Kristo la le o”!—Ef. 4:20, 21.
11. Tɔtrɔ kae Biblia de dzi ƒo na Kristotɔwo be woawɔ?
11 Paulo te gbe ɖe edzi be ele be míaɖe asi le nuŋububu masɔmasɔ siwo dea mama amewo dome la ŋu, eye ɖe esiawo teƒe la, míatu nɔnɔme siwo akpe ɖe mía ŋu be míanɔ anyi le ɖekawɔwɔ me kple ame bubuwo la ɖo. Egblɔ be: “Ele be miaɖe amenyenye xoxo, si wɔa nu ɖe agbenɔnɔ si nɔ mia si tsã nu, eye wole egblẽm le eƒe [amenyenye xoxo la ƒe] beble ƒe didiwo nu, la ɖa; . . . ele be woawɔ mi yeyee le ŋusẽ si ʋãa miaƒe tamesusu la me, eye miado amenyenye yeye, si wowɔ le Mawu ƒe lɔlɔ̃nu nu le dzɔdzɔenyenye kple nuteƒewɔwɔ vavãtɔ me la.” (Ef. 4:22-24) Aleke woate ŋu ‘awɔ mí yeyee le ŋusẽ si ʋãa míaƒe tamesusu la me’? Ne míedea ŋugble tso nu siwo míesrɔ̃na tso Mawu ƒe Nyaa kpakple kpɔɖeŋu nyui siwo Kristotɔ siwo tsi le gbɔgbɔ me la ɖona me ŋu ŋudzedzekpɔkpɔtɔe eye míekua kutri vevie la, míate ŋu atu amenyenye yeye, “si wowɔ le Mawu ƒe lɔlɔ̃nu nu” la ɖo.
Srɔ̃ Ale Si Nàƒo Nu Le Mɔ Nyuitɔ Nu
12. Aleke nyateƒetoto doa ɖekawɔwɔ ɖe ŋgɔe, eye nu ka tae wòsesẽna na ame aɖewo be woanye nyateƒetolawo?
12 Nyateƒetoto le vevie na ame siwo le abe ŋutinuwo ene na wo nɔewo la, eɖanye le ƒomea me alo hamea me o. Nyateƒetoto, anukwareɖiɖi, kple dɔmenyonyo le nuƒoƒo na amewo me tea ŋu naa amewo dome nɔa kplikplikpli. (Yoh. 15:15) Ke ne ame aɖe ka aʋatso na nɔvia ya ɖe? Ne nɔvia va nyae be eda alakpa na ye la, esia awɔe be magaka ɖe edzi tututu o. Eya ta àte ŋu ase nu si tae Paulo gblɔ be, “ame sia ame neto nyateƒe na ehavi, elabena ŋutinuwoe míenye na mía nɔewo” la gɔme. (Ef. 4:25) Asesẽ na ame si alakpadada zu numame na, ɖewohĩ le esi wòdze egɔme tso ɖevime ta, la be wòate nyateƒetoto. Ke hã, Yehowa akpɔ ŋudzedze ɖe agbagba siwo wòanɔ dzedzem be yeawɔ tɔtrɔ la ŋu, eye akpe ɖe eŋu hã.
13. Nu kae dzugbewo ɖeɖe ɖa le míaƒe nuƒoƒo me lɔ ɖe eme?
13 Yehowa fiaa mí be míade bubu mía nɔewo ŋu le hamea kple ƒomea siaa me eye míana ɖekawɔwɔ nanɔ mía dome to ale si wòde se vevi aɖewo ku ɖe ale si míeƒoa nui ŋu me. Egblɔ be: “Migana nya ƒaƒã aɖeke nado go tso miaƒe nu me o . . . Mina woaɖe ameléleɖedɔme kaɖikaɖi kple dɔmedzoe kple dziku kple ɣlidodo kpakple dzugbewo, ɖa le mia dome hekpe ɖe nu gbegblẽ wɔwɔ ɖe sia ɖe ŋu.” (Ef. 4:29, 31) Mɔ ɖeka aɖe si dzi míato aƒo asa na nya veamewo gbɔgblɔe nye be míatu bubudede amewo ŋu geɖe wu ƒe nɔnɔme ɖo. Le kpɔɖeŋu me, ne ŋutsu aɖe zãa dzugbewo ɖe srɔ̃a ŋu la, ele be wòadze agbagba awɔ tɔtrɔ le ale si wòwɔa nu ɖe srɔ̃a ŋui me, vevietɔ le esi wònya ale si Yehowa dea bubu nyɔnuwo ŋui ta. Mawu tsɔ gbɔgbɔ kɔkɔe si ami na nyɔnu aɖewo gɔ̃ hã, hena mɔnukpɔkpɔ wo be woaɖu dzi abe fiawo ene kple Kristo. (Gal. 3:28; 1 Pet. 3:7) Nenema kee, ne ezu numame na nyɔnu aɖe be wònɔa ɣli dom ɖe srɔ̃a ta la, ele be ale si Yesu ɖu eɖokui dzi esime wodo dziku nɛ la nyanya naʋãe be wòawɔ tɔtrɔ.—1 Pet. 2:21-23.
14. Nu ka tae dzikudodo tea ŋu gblẽa nu?
14 Nɔnɔme aɖe si do ƒome kplikplikpli kple dzugbewo zazã ye nye dzikudzimaɖumaɖu. Esia hã ate ŋu ama ame siwo le ƒomedodo nyui me kple wo nɔewo la dome. Dziku le abe dzo ene. Dziku tea ŋu flana kabakaba eye etea ŋu gblẽa nu geɖe. (Lod. 29:22) Ne ame aɖe tɔ dzɔ be wòagblɔ nu si vee gɔ̃ hã la, ele be wòaɖu eƒe dzikua dzi be wòagagblẽ ƒomedodo xɔasi si le woa kple amewo dome la me o. Ele be Kristotɔwo nadze agbagba atsɔ vodada anɔ wo nɔewo kem, woaganye ame siwo léa nya ɖe dɔ me kple ame siwo ganɔa nu ƒom le nu si dzɔ va yi la ŋu o. (Ps. 37:8; 103:8, 9; Lod. 17:9) Paulo ɖo aɖaŋu na Efesotɔwo be: “Mibi dzi, gake migawɔ nu vɔ̃ o; miaƒe dzibibi la naganɔ anyi ɣe naɖo to ɖe edzi o, eye migaɖe mɔ na Abosam hã o.” (Ef. 4:26, 27) Dzikudzimaɖumaɖu ate ŋu ana mɔnu Abosam wòade mama kple dzre gɔ̃ hã hamea me.
15. Nu kae nu si menye mía tɔ o tsɔtsɔ ate ŋu agblẽ?
15 Ne míedoa asi ɖe ame bubuwo ƒe nuwo gbɔ o la, esia hã ana ɖekawɔwɔ nanɔ hamea me. Biblia gblɔ be: “Fiafitɔ la nagafi fi azɔ o.” (Ef. 4:28) Yehowa ƒe amewo kana ɖe wo nɔewo dzi. Gake ne Kristotɔ aɖe wɔ esia ŋu dɔ le mɔ gbegblẽ nu hetsɔ nu si menye etɔ o la, ekema agblẽ dzidzɔ si ɖekawɔwɔ si le mía dome hena vanɛ la me.
Lɔlɔ̃ Na Mawu Nana Míewɔa Ðeka
16. Aleke míate ŋu ato nya tuameɖowo gbɔgblɔ dzi ado ŋusẽ ɖekawɔwɔ si le mía dome?
16 Ale si lɔlɔ̃ na Mawu ʋãa mí míewɔa nu ɖe mía nɔewo ŋu le lɔlɔ̃ me la gbɔe wòtso be ɖekawɔwɔ le Kristo hamea me. Ŋudzedzekpɔkpɔ ɖe Yehowa ƒe dɔmenyonyo ŋu ʋãa mí míedzea agbagba veviedodotɔe be míawɔ ɖe aɖaŋuɖoɖo sia dzi: “[Migblɔ] nya sia nya si nyo hena tutuɖo le ale si wòhiã nu, bene wòana nu nyui aɖe ame siwo asee la. . . . Mizu ame siwo nyoa dɔme na wo nɔewo, miaƒe dɔme netrɔ ɖe mia nɔewo ŋu vevie, eye mitsɔ nɔ mia nɔewo kem faa, abe ale si ko Mawu hã to Kristo dzi tsɔ ke mi faa ene.” (Ef. 4:29, 32) Yehowa tsɔa mí ame siwo nye ame madeblibowo la ƒe nu vɔ̃wo kea mí dɔmenyotɔe. Ðe mele be míawo hã míatsɔ ame bubuwo ƒe vodadawo anɔ wo kem nenema ke le woƒe blibomademade ta oa?
17. Nu ka tae wòle be míadze agbagba vevie ado míaƒe ɖekawɔwɔa ɖe ŋgɔ?
17 Ðekawɔwɔ si le Mawu ƒe amewo dome la hea ŋutikɔkɔe vanɛ na Yehowa. Eƒe gbɔgbɔa ʋãa mí le mɔ vovovowo nu be míado ɖekawɔwɔ ɖe ŋgɔ le mía dome. Negadzɔ gbeɖe be míagbe gbɔgbɔ la ƒe mɔfiafia dzi wɔwɔ o. Paulo ŋlɔ bena: ‘Miganɔ nuxaxa dom na Mawu ƒe gbɔgbɔ kɔkɔe la o.’ (Ef. 4:30) Ðekawɔwɔ nye nu xɔasi aɖe si ta wòle vevie be míakpɔ. Ehea dzidzɔ vanɛ na ame sia ame, eye wòhea ŋutikɔkɔe vanɛ na Yehowa. “Eya ta mizu Mawu srɔ̃lawo, abe lɔlɔ̃viwo ene, eye miyi edzi miazɔ le lɔlɔ̃ me.”—Ef. 5:1, 2.
Aleke Nàɖo Wo Ŋui?
• Nɔnɔme kawoe nana be ɖekawɔwɔ nɔa Kristotɔwo dome?
• Alekee míaƒe agbenɔnɔ ate ŋu ado ɖekawɔwɔ ɖe ŋgɔ le hamea me?
• Alekee míaƒe nuƒoƒo ate ŋu ana míawɔ nu kple mía nɔewo le ɖekawɔwɔ me?
[Nɔnɔmetata si le axa 17]
Dukɔ vovovo me tɔwo wɔ ɖeka
[Nɔnɔmetata si le axa 18]
Ènya nu siwo gbegbe ahiãmoɖoɖo tea ŋu gblẽna?