Srɔ̃ŋutsuwo—Mibɔbɔ Ðe Kristo Ƒe Tanyenye Te

“Ŋutsu sia ŋutsu ƒe ta enye Kristo.”—KORINTOTƆWO I, 11:3.

1, 2. (a) Nu ka dzie woanɔ te ɖo agblɔ be ame aɖe nye srɔ̃ŋutsu nyui? (b) Nu ka tae wòle vevie be woalɔ̃ ɖe edzi be Mawue ɖo srɔ̃ɖeɖe anyi?

NU KA dzie nànɔ te ɖo agblɔ be ame aɖe nye srɔ̃ŋutsu nyui? Eƒe agbalẽnyanya ye loo alo eƒe ŋusẽ yea? Ale si wòte ŋu hea ga vaa aƒe me yea? Alo ale si wòwɔa nu ɖe srɔ̃a kple viawo ŋu tufafatɔe kple lɔlɔ̃tɔe koŋ yea? Srɔ̃ŋutsu geɖe ɖo ko le nu mamlɛtɔ sia ya gome, elabena xexea me ƒe gbɔgbɔ kple amegbetɔwo ƒe nukpɔsusuwoe kpɔa ŋusẽ ɖe wo dzi. Nu ka tae? Nu si koŋ gbɔ wòtsoe nye be wodo kpo lɔlɔ̃ ɖe srɔ̃ɖeɖe Gɔmeɖoanyila—Ame si “tsɔ agbaƒuti, si wòɖe le amea me la, wɔ nyɔnui, eye wòkplɔe va ame la gbɔe”—la ƒe mɔfiamewo dzi hegbe wo dziwɔwɔ.—Mose I, 2:21-24.

² Yesu Kristo ɖo kpe nya si Biblia gblɔ be Mawue ɖo srɔ̃ɖeɖe anyi la dzi, eye wòbia ɖeklemiɖela siwo nɔ eƒe ŋkekea me la be: “Alo miexlẽe kpɔ bena, amesi wɔ ame le gɔmedzedzea me ke la, atsu kple asi wòwɔ woe o mahã? Eye wòbe: Le esia ta ame agblẽ fofoa kple dadaa ɖi, eye wòalé ɖe srɔ̃a ŋuti, eye wo kpakple eve la woanye ŋutilã ɖeka; nenem bena tso esia dzi yina la womeganye ame eve o, negbe ŋutilã ɖeka ko. Azɔ nusi ke Mawu bla [le srɔ̃ɖeɖe me] la, ame nagamã eme o.” (Mateo 19:4-6) Nyateƒea ŋutɔe nye be nu si koŋ nana srɔ̃ɖeɖe kpɔa dzidzedzee nye be woalɔ̃ ɖe edzi be Mawue ɖoe anyi, eye woawɔ ɖe mɔfiame siwo le Eƒe Nya, Biblia, me la dzi.

Nu Si Nana Ame Zua Srɔ̃ŋutsu Nyui

3, 4. (a) Nu kae na be Yesu nya nu tsitotsito tso srɔ̃ɖeɖe ŋu? (b) Ame kae nye Yesu ƒe kpɔɖeŋusrɔ̃ la, eye aleke wòle be srɔ̃ŋutsuwo nawɔ nu ɖe wo srɔ̃wo ŋui?

³ Nu si nana ame zua srɔ̃ŋutsu nyui enye nusɔsrɔ̃ tso nya siwo Yesu gblɔ kple ale si wòwɔ nui me. Enya nu tsitotsito tso srɔ̃ɖeɖe ŋu, elabena enɔ eteƒe esime wowɔ ame eve gbãtɔawo kple esime wozu srɔ̃tɔwo siaa. Yehowa Mawu gblɔ nɛ be: ‘Na míawɔ ame ɖe míaƒe nɔnɔme, wòaɖi mí.’ (Mose I, 1:26) Eme kɔ be, Ame si Mawu wɔ do ŋgɔ na ame sia ame kple nu sia nu, ame si va zu “dɔnunɔla le egbɔ” lae Wònɔ nu ƒom na. (Lododowo 8:22-30) Ame siae nye “nuwɔwɔwo katã ƒe ŋgɔgbevi la.” Eyae nye “Mawu ƒe nuwɔwɔwo ƒe gɔmedzedze la,” eli xoxoxo hafi wowɔ xexea.—Kolosetɔwo 1:15; Nyaɖeɖefia 3:14.

⁴ Woyɔ Yesu be “Mawu ƒe alẽvi,” eye woɖɔe le kpɔɖeŋumɔ nu be enye srɔ̃ŋutsu. Mawudɔla aɖe gblɔ kpɔ be: “Va afii, ne mafia ŋugbetɔ, si nye Alẽvi la srɔ̃ la wò!” (Yohanes 1:29; Nyaɖeɖefia 21:9) Ke ame kae nye ŋugbetɔ ma, alo srɔ̃a? “Alẽvi la srɔ̃” lae nye Kristo yomedzela wɔnuteƒe siwo wotsɔ gbɔgbɔ si ami na la ƒe ƒuƒoƒo, ame siwo aɖu fia kplii le dziƒo. (Nyaɖeɖefia 14:1, 3) Eya ta, ale si Yesu wɔ nu ɖe eƒe nusrɔ̃lawo ŋui esime wònɔ anyigba dzi kpli wo la nye kpɔɖeŋu na srɔ̃ŋutsuwo le ale si wòle be woawɔ nu ɖe wo srɔ̃wo ŋui.

 5. Ame kawoe Yesu nye kpɔɖeŋu na?

⁵ Enye nyateƒe be, Biblia gblɔ be Yesu nye kpɔɖeŋu na eyomedzelawo katã, abe ale si míexlẽ ene be: “Kristo hã kpe fu le mia ta, eye wògblẽ kpɔɖeŋu ɖi na mi, bene miadze eƒe afɔɖoƒewo yome.” (Petro I, 2:21) Ke hã ŋutsuwo koŋue wònye kpɔɖeŋu na. Biblia gblɔ be: “Ŋutsu sia ŋutsu ƒe ta enye Kristo, ke nyɔnu ƒe ta enye ŋutsu, ke Kristo ƒe ta enye Mawu.” (Korintotɔwo I, 11:3) Esi wònye Kristoe nye ta na ŋutsu ta la, ele be srɔ̃ŋutsuwo nasrɔ̃ eƒe kpɔɖeŋu. Eya ta, be ƒomea nakpɔ dzidzedze kple dzidzɔ la, ele vevie be woawɔ woƒe tanyenyea ŋu dɔ nyuie. Be woate ŋu awɔ esia la, ele na srɔ̃ŋutsuwo be woawɔ nu ɖe wo srɔ̃wo ŋu le lɔlɔ̃ me, abe ale si Yesu wɔ nu ɖe eƒe kpɔɖeŋusrɔ̃, si nye eƒe nusrɔ̃la amesiaminawo ŋui ene.

Ale Si Nànɔ Te Ðe Srɔ̃ɖeɖe Me Kuxiwo Nui

 6. Aleke wòle be srɔ̃ŋutsuwo nanɔ anyi kple wo srɔ̃woe?

⁶ Le egbexexe sia si me xaxawo bɔ ɖo me la, ele vevie be srɔ̃ŋutsuwo nasrɔ̃ dzigbɔɖi, lɔlɔ̃, kple dzidzenu dzɔdzɔewo me léle ɖe asi sesĩe ƒe kpɔɖeŋu si Yesu ɖo la. (Timoteo II, 3:1-5) Biblia gblɔ le kpɔɖeŋu si Yesu gblẽ ɖi la ŋu be: “Mi ŋutsuwo la, minɔ anyi kple [mia srɔ̃wo] le nunya me.” (Petro I, 3:7) Nyateƒee, ele be srɔ̃ŋutsuwo nakpe akɔ kple srɔ̃ɖeɖe me kuxiwo le nunya me, abe ale si Yesu kpe akɔ kple nɔnɔme sesẽwoe ene. Ekpe fu geɖe wu amegbetɔ ɖe sia ɖe, gake enyae be Satana, eƒe gbɔgbɔ vɔ̃wo, kple xexe vɔ̃ɖi sia gbɔe yeƒe tetekpɔawo tso. (Yohanes 14:30; Efesotɔwo 6:12) Nɔnɔme sesẽ siwo va Yesu dzi mewɔ nuku nɛ kpɔ o, nenema kee mele be wòawɔ nuku na srɔ̃tɔwo ne wole go dom “xaxa le ŋutilã me” o. Biblia na nyanya ame siwo ɖoe be yewoaɖe srɔ̃ la be woakpɔ mɔ na xaxa siawo.—Korintotɔwo I, 7:28.

7, 8. (a) Nu kae wòbia be wòanɔ anyi kple nyɔnuwo le nunya me? (b) Nu ka tae nyɔnuwo dze na bubu?

⁷ Biblia gblɔ be, ele be srɔ̃ŋutsuwo nanɔ anyi kple ‘nyɔnuwo le nunya me, esi wonye gbɔdzɔgbɔdzɔtɔwo wu la ŋuti, eye woatsɔ bubu na wo.’ (Petro I, 3:7) Le esi srɔ̃ŋutsu naɖu srɔ̃a dzi ŋutasesẽtɔe abe ale si Biblia gblɔe ɖi be ŋutsuwo anɔ wɔwɔm ene teƒe la, ele be srɔ̃ŋutsu si le didim be Mawu nakpɔ ŋudzedze ɖe ye ŋu nade bubu srɔ̃a ŋu boŋ. (Mose I, 3:16) Adi be yealé be na ye srɔ̃ abe nunɔamesi xɔasi aɖe ene, eye mele be wòawɔ nuvevii alo aƒoe gbeɖe o. Ke boŋ abu eƒe seselelãmewo ŋu ahade bubu kple asixɔxɔ eŋu ɣeawokatãɣi.

⁸ Nu ka tae wòle be srɔ̃ŋutsuwo nade bubu si sɔ wo srɔ̃wo ŋu? Biblia ɖo eŋu be: “Woawo hã wonye agbe ƒe amenuveve hadomenyilawo, bene miagaxe mɔ na miaƒe gbedodoɖawo o.” (Petro I, 3:7) Ele be srɔ̃ŋutsuwo nanyae be Yehowa mebua ŋutsu si subɔnɛ be exɔ asi wu nyɔnu si hã nye esubɔla o. Nyɔnu siwo ƒe nu dzea Mawu ŋu la, axɔ agbe mavɔ nunana ma ke si ŋutsuwo hã axɔ la—wo dometɔ geɖe anɔ agbe le dziƒo gɔ̃ hã, afi si “atsu alo asi megali o.” (Galatiatɔwo 3:28) Eya ta ele be srɔ̃ŋutsuwo naɖo ŋku edzi be ame ƒe nuteƒewɔwɔe nana asixɔxɔ nɔa eŋu le Mawu ŋkume, ke menye ŋutsu alo nyɔnu, srɔ̃ŋutsu alo srɔ̃nyɔnu, alo ɖevi gɔ̃ hã nyenye ƒe nyae o.—Korintotɔwo I, 4:2.

 9. (a) Le Petro ƒe nya nu la, susu ka tae wòle be srɔ̃ŋutsuwo nade bubu wo srɔ̃wo ŋu? (b) Aleke Yesu de bubu nyɔnuwo ŋui?

⁹ Nya siwo apostolo Petro gblɔ tsɔ ƒo eƒe nyawo tae la te gbe ɖe vevienyenye si le bubudede nyɔnuwo ŋu dzi, egblɔ be “bene miagaxe mɔ na miaƒe gbedodoɖawo o.” Afɔku gã ka gbegbee mɔxeɖenu sia anye! Esia ate ŋu axe mɔ na srɔ̃ŋutsu ƒe gbedodoɖawo gɔ̃ hã, abe ale si wodzɔ ɖe Mawu subɔla mawɔnuteƒe aɖewo dzi le blema ene. (Konyifahawo 3:43, 44) Nunyatɔe la, ŋutsu Kristotɔwo—ame siwo ɖe srɔ̃ kple esiwo le srɔ̃ɖeɖe ŋu bum siaa—asrɔ̃ nu tso ale si Yesu wɔ nu ɖe nyɔnuwo ŋu bubutɔe la me. Elɔ̃ faa xɔ nyɔnuwo kpe ɖe ame siwo kplɔnɛ ɖo le eƒe subɔsubɔdɔa me la ŋu, eye wòwɔ nu ɖe wo ŋu le tufafa kple bubu me. Ɣeaɖeɣi gɔ̃ hã la, Yesu ɖe nyateƒe wɔnuku aɖe fia nyɔnuwo gbã hegblɔ na wo be woayi aɖaka eta na ŋutsuawo!—Mateo 28:1, 8-10; Luka 8:1-3.

Kpɔɖeŋu Aɖe Na Srɔ̃ŋutsuwo Koŋ

10, 11. (a) Nu ka tae wòhiã be ŋutsuwo koŋ nasrɔ̃ nu tso kpɔɖeŋu si Yesu ɖo la me? (b) Aleke wòle be srɔ̃ŋutsuwo naɖe lɔlɔ̃ afia wo srɔ̃woe?

¹⁰ Abe ale si míede dzesii va yi ene la, Biblia tsɔ ƒomedodo si le srɔ̃ŋutsu kple srɔ̃nyɔnu dome la sɔ kple ƒomedodo si le Kristo kple eƒe “ŋugbetɔ,” si nye eyomedzela amesiaminawo ƒe hamea, la dome. Biblia gblɔ be: “Ŋutsue nye ta na nyɔnu, abe alesi Kristo hã nye ta na hame la ene.” (Efesotɔwo 5:23) Ele be nya siawo nade dzi ƒo na srɔ̃ŋutsuwo be woalé ŋku ɖe ale si Yesu wɔ eƒe tanyenyea ŋu dɔe, alo ale si wòkplɔ eyomedzelawoe la ŋu. Ŋkuléle ɖe nu ŋu alea koe ate ŋu akpe ɖe srɔ̃ŋutsuwo ŋu be woasrɔ̃ Yesu ƒe kpɔɖeŋua, eye woana mɔfiame wo srɔ̃wo, alɔ̃ wo ahalé be na wo, abe ale si Yesu wɔe na hame la ene.

¹¹ Biblia xlɔ̃ nu Kristotɔwo be: “Mi ŋutsuwo la, milɔ̃ mia ŋutɔwo mia srɔ̃wo, abe alesi Kristo hã lɔ̃ hame la, eye wòtsɔ ye ŋutɔ ɖokui hena ɖe eta la ene.” (Efesotɔwo 5:25) Le Efesotɔwo ta enelia me la, woyɔ “hame la” be “Kristo ƒe ŋutilã.” Ŋutsu kple nyɔnu geɖewoe ƒo ƒu wɔ kpɔɖeŋuŋutilã sia ƒe ŋutinuwo, eye wo katã nana be ŋutilã la wɔa dɔ nyuie. Ke Yesue “nye ŋutilã, si nye hame la ƒe ta.”—Efesotɔwo 4:12; Kolosetɔwo 1:18; Korintotɔwo I, 12:12, 13, 27.

12. Aleke Yesu ɖe lɔlɔ̃ fia eƒe kpɔɖeŋuŋutilã la?

¹² Yesu ɖe lɔlɔ̃ fia eƒe kpɔɖeŋuŋutilã, si nye “hame la,” vevietɔ le ale si wòtsɔ beléle wɔ nu siwo aɖe vi na ame siwo ava zu emetɔwo la me. Le kpɔɖeŋu me, esime ɖeɖi te eƒe nusrɔ̃lawo ŋu la, egblɔ na wo be: “Miva, ne míawo ɖeɖe míayi gbedzi, ne míadzudzɔ mía ɖokui ʋɛ.” (Marko 6:31) Esi Yesu ƒe apostoloawo dometɔ ɖeka nɔ nu ƒom tso dɔ siwo Yesu wɔ gaƒoƒo ʋɛ aɖewo do ŋgɔ na eƒe ku ŋu la, eŋlɔ bena: “Esi wòlɔ̃ etɔ [siwo nye eƒe kpɔɖeŋuŋutilã me tɔwo la], . . . elɔ̃ wo vaseɖe nuwuwu.” (Yohanes 13:1) Kpɔɖeŋu nyui kae nye esi Yesu ɖo le ale si wòle be srɔ̃ŋutsuwo nawɔ nu ɖe wo srɔ̃wo ŋui me!

13. Aleke woxlɔ̃ nu srɔ̃ŋutsuwo be woalɔ̃ wo srɔ̃woe?

¹³ Esi apostolo Paulo yi edzi nɔ nu ƒom tso kpɔɖeŋu si Yesu ɖo na srɔ̃ŋutsuwo ŋu la, exlɔ̃ nu wo be: “[Ele] na ŋutsuwo be, woalɔ̃ woa ŋutɔwo wo srɔ̃wo abe woa ŋutɔwo ƒe ŋutilãwo ene. Amesi lɔ̃a ye ŋutɔ srɔ̃ la, elɔ̃a eɖokui; elabena ame aɖeke melé fu ye ŋutɔ ƒe ŋutilã kpɔ o, ke boŋ enyinɛ, eye wòkpɔa edzi, abe alesi Aƒetɔ la wɔna na hame la ene.” Paulo yi eƒe nyaa dzi be: “Mia dome ɖesiaɖe nalɔ̃ ye ŋutɔ srɔ̃anyɔnu nenema ke, abe ye ŋutɔ ɖokui ene.”—Efesotɔwo 5:28, 29, 33.

14. Aleke srɔ̃ŋutsu wɔa nu ɖe eƒe ŋutilã madebliboa ŋui, eye nu kae esia fia ku ɖe ale si wòle be wòawɔ nu ɖe srɔ̃a ŋui la ŋu?

¹⁴ Bu Paulo ƒe nya siawo ŋu kpɔ. Ðe ame si ƒe susu le te ɖonɛ koŋ wɔa nuvevi eɖokuia? Ne ame aɖe kli afɔ la, ɖe wòɖea ati ɖe afɔa dzi ƒonɛ be ena yekli nua? Gbeɖegbeɖe! Ðe srɔ̃ŋutsu doa ŋukpe eɖokui alo ƒoa nu tso eya ŋutɔ ƒe vodadawo ŋu le exɔlɔ̃wo gbɔa? Kpao! Ke nu ka tae wòadzu srɔ̃a alo vɔ̃ɖitɔe wua wòaƒoe ne ewɔ vodada aɖe? Mele be srɔ̃ŋutsuwo nadi woa ŋutɔwo tɔ ko o, ke ele be woadi wo srɔ̃wo hã tɔ.—Korintotɔwo I, 10:24; 13:5.

15. (a) Nu kae Yesu wɔ esime ɖeɖi te eƒe nusrɔ̃lawo ŋu? (b) Nufiame kawoe le eƒe kpɔɖeŋua me na mí?

¹⁵ Bu ale si Yesu se nu gɔme na eƒe nusrɔ̃lawoe esime ɖeɖi te wo ŋu, le zã si do ŋgɔ na eƒe ku ŋu kpɔ. Togbɔ be ebia tso wo si be woado gbe ɖa enuenue hã la, woyi alɔ̃ me zi etɔ̃ sɔŋ le Getsemane bɔa me. Kasia asrafowo va ɖe to ɖe wo. Yesu bia asrafoawo be: “Ameka dim miele?” Esi woɖo eŋu nɛ be, “Yesu, Nazaretetɔ lae!” la, egblɔ na wo be: “Nyee nye esi!” Esi wònyae be yeƒe ku ƒe “gaƒoƒo la ɖo vɔ” la, egblɔ na wo be: “Eyaŋuti nenye nye dim miele la, ekema mina mɔ amesiawo, be woadzo ayi.” Yesu medo kpo ɖe tsɔtsɔ le eƒe nusrɔ̃la—siwo nye eƒe kpɔɖeŋuŋugbetɔa ƒe akpa aɖe la—ƒe nyonyo me kpɔ o, eye wòto mɔ aɖe nu na woɖe asi le wo ŋu. Ne srɔ̃ŋutsuwo srɔ̃ nu tso ale si Yesu wɔ nu ɖe eƒe nusrɔ̃lawo ŋui me la, woakpɔ gɔmeɖose geɖe siwo ŋu dɔ woate ŋu awɔ le nuwɔwɔ ɖe wo srɔ̃wo ŋu me.—Yohanes 18:1-9; Marko 14:34-37, 41.

Yesu Ƒe Lɔlɔ̃ Menye Seselelãme Dzro Ko O

16. Aleke Yesu sena le eɖokui me ɖe Marta ŋu, ke hã aleke wòɖɔe ɖoe?

¹⁶ Biblia gblɔ be: “Yesu lɔ̃a Marta kple nɔvianyɔnua kpakple Lazaro,” ame siwo wɔa amedzro nɛ zi geɖe. (Yohanes 11:5) Ke hã, esi Marta tsi dzi ɖe nuɖaɖa ŋu akpa, si wɔe be mekpɔ ɣeyiɣi ɖe gbɔgbɔmenufiame siwo nam Yesu nɔ ŋu o la, Yesu megbe aɖaŋuɖoɖo nɛ o. Egblɔ nɛ be: “Marta, Marta, èle agbagba dzem, eye nèle fu ɖem na ɖokuiwò le nu geɖewo ŋuti, ke nu ɖeka koe le vevie.” (Luka 10:41, 42) Ðikeke mele eme o be, esi Marta nyae be Elɔ̃a ye ta la enɔ bɔbɔe nɛ be wòaxɔ aɖaŋuɖoɖoa ade eme. Nenema kee wòle be srɔ̃ŋutsuwo nawɔ nu ɖe wo srɔ̃wo ŋu le tufafa kple lɔlɔ̃ me ahabu nyawo ŋu nyuie hafi agblɔ. Ke hã, ne ɖɔɖɔɖo hiã la, esɔ be woaɖee agblɔ faa abe ale si Yesu wɔe ene.

17, 18. (a) Aleke Petro gbe nya na Yesue, eye nu ka tae wòhiã be woaɖɔ Petro ɖo? (b) Agba kae le srɔ̃ŋutsu dzi?

¹⁷ Ɣebubuɣi la, Yesu gblɔ na eƒe apostolowo be ele na ye be yeayi Yerusalem, afi si “amegãwo kple nunɔlagãwo kpakple agbalẽfialawo” woati eyome le “eye woawui, eye le ŋkeke etɔ̃agbe woafɔe ɖe tsitre.” Esi Yesu gblɔ nya sia la, Petro ɖe kpɔe hete nyagbegbe nɛ be: “Mawu nehe esia ɖa xaa tso gbɔwò, Aƒetɔ; esia nagava dziwò gbeɖe o!” Edze ƒã be seselelãme si gbɔ emee kpɔ ŋusẽ ɖe Petro ƒe tamesusu dzi. Ehiã be woaɖɔe ɖo. Eya ta Yesu gblɔ nɛ be: “Te ɖa yi megbenye, Satana! Nuɖiaɖia nènye nam, elabena menye Mawu tɔ nèsusu o, negbe nusi nye amegbetɔwo tɔ ko.”—Mateo 16:21-23.

¹⁸ Ðeko Yesu gblɔ nu si Mawu di tso esi be wòawɔ—si nye be akpe fu geɖe eye woawui—na wo vɔ tetie nye ema. (Psalmo 16:10; Yesaya 53:12) Eya ta Petro tɔ medzɔ be wòte nyagbegbe na Yesu o. Nyateƒee, ehiã vevie be woaɖɔ Petro ɖo, abe ale si ko wònɔna le míawo hã gome ɣeaɖewoɣi ene. Esi srɔ̃ŋutsuae nye ƒomea ƒe ta ta la, ekpɔ mɔ eye wònye eƒe agbanɔamedzi hã be wòaɖɔ eƒe ƒomea me tɔwo ɖo, srɔ̃a meto le eme o. Togbɔ be ahiã be wòatɔ afɔ to sesĩe hã la, ele be wòaɖɔ wo ɖo le tufafa kple lɔlɔ̃ me. Abe ale si ko Yesu kpe ɖe Petro ŋu wògbugbɔ nuwo ŋu bu nyuie ene la, ahiã ɣeaɖewoɣi be srɔ̃ŋutsuwo nawɔ nenema na wo srɔ̃wo. Le kpɔɖeŋu, me ne srɔ̃nyɔnu aɖe ƒe awudodo, alo eƒe atsyɔ̃ɖonuwo alo atsyɔ̃ɖomiwo zazã megava le ɖeka wɔm kple dzadzraɖo ɖe nɔnɔme nyui me si wokafu le Ŋɔŋlɔawo me o la, srɔ̃ŋutsu ate ŋu ahe eƒe susu ayi nu si tae wòhiã be wòawɔ ɖɔɖɔɖo aɖewo le go siawo me la dzi tufafatɔe.—Petro I, 3:3-5.

Enyo Be Srɔ̃ŋutsuwo Nagbɔ Dzi Ði

19, 20. (a) Kuxi kae do mo ɖa le Yesu ƒe apostolowo dome, eye aleke Yesu kpɔ nya sia gbɔe? (b) Aleke agbagba si Yesu dze la kpɔ dzidzedzee?

¹⁹ Ne vodada aɖe li si wòle be woaɖɔ ɖo la, mele be srɔ̃ŋutsuwo nakpɔ mɔ be agbagba siwo dzem yewole be yewoaɖɔ nɔnɔmea ɖo la nadze edzi enumake kokoko o. Exɔ ɣeyiɣi geɖe ŋutɔ hafi agbagba siwo Yesu dze be yeaɖɔ yeƒe apostolowo ƒe nɔnɔmewo ɖo la te ŋu dze edzi. Le kpɔɖeŋu me, nyaʋiʋli aɖe nɔ wo dome si gava do mo ɖa le Yesu ƒe subɔsubɔdɔa ƒe nuwuwu lɔƒo. Wonɔ nya ʋlim le wo nɔewo dome le ame si nye gãtɔ ŋu. (Marko 9:33-37; 10:35-45) Le woƒe nyaʋiʋli zi evelia megbe teti la, Yesu wɔ ɖoɖo be ye kpli wo ɖeɖe yewoaɖu Ŋutitotoŋkekenyui mamlɛtɔ si yeaɖu la. Gbe ma gbe la, wo dometɔ ɖeka teti metso be yeawɔ dɔ tsɛ si nye woƒe afɔ siwo ƒo ɖi la kɔklɔ abe ale si wowɔnɛ le kɔa nu ene la o. Yesu ŋutɔ wɔe. Eye wògblɔ na wo be: “Mena kpɔɖeŋu mi.”—Yohanes 13:2-15.

²⁰ Anɔ bɔbɔe na srɔ̃ŋutsu siwo bɔbɔa wo ɖokui abe Yesu ene la srɔ̃wo be woawɔ nu aduadu kpli wo ahakpe ɖe wo ŋu. Gake dzigbɔɖi hiã. Emegbe le Ŋutitotoŋkekenyuia ƒe zã ma ke me la, dzre gaɖo apostoloawo dome le wo dometɔ si nye gãtɔ la ŋu. (Luka 22:24) Zi geɖe la, tɔtrɔwɔwɔ le agbenɔnɔ kple nuwɔna me xɔa ɣeyiɣi eye wowɔnɛ vivivi. Ke hã, aleke wòɖea vie nye esi ne nu nyuiwo do tso eme, abe ale si wònɔ le apostoloawo gome ene!

21. Esi kuxiwo nu le sesẽm ɖe edzi ta la, nu ka dzie woxlɔ̃ nu srɔ̃ŋutsuwo be woaɖo ŋkui, eye nu kae wòle be woawɔ?

²¹ Egbea la, srɔ̃ɖeɖe me kuxiwo nu le sesẽm ɖe edzi. Ame geɖe megabua srɔ̃ɖetamkaka la ŋkubiãnyae o. Eya ta ele be srɔ̃ŋutsuwo nade ŋugble tso srɔ̃ɖeɖea dzɔtsoƒe ŋu. Miɖo ŋku edzi be Yehowa, mía Mawu lɔ̃ame, lae ɖo srɔ̃ɖeɖea anyi, eye eyae wɔ ɖoɖo ɖe eŋu. Menye ɖeko wòtsɔ Via, Yesu, na be wòanye míaƒe Tafexela—alo mía Ðela—ko o, ke be wòanye kpɔɖeŋu hã na srɔ̃ŋutsuwo woasrɔ̃.—Mateo 20:28; Yohanes 3:29; Petro I, 2:21.

Aleke Nàɖo Wo Ŋui?

• Nu ka tae wòle vevie be míade dzesi srɔ̃ɖeɖea dzɔtsoƒe?

• Mɔ kawo nue wode dzi ƒo na srɔ̃ŋutsuwo be woalɔ̃ wo srɔ̃wo le?

• Ale si Yesu wɔ nu ɖe eƒe nusrɔ̃lawo ŋui ƒe kpɔɖeŋu kawoe ɖe ale si wòle be srɔ̃ŋutsu nawɔ eƒe tanyenyea ŋu dɔ abe Kristo ene la fia?

[Nɔnɔmetata si le axa 14]

Nu ka tae wòle be srɔ̃ŋutsuwo nasrɔ̃ nu tso kpɔɖeŋu si Yesu ɖo le nuwɔwɔ ɖe nyɔnuwo ŋu me?

[Nɔnɔmetata si le axa 15]

Yesu se nu gɔme na eƒe nusrɔ̃lawo esi ɖeɖi te wo ŋu

[Nɔnɔmetata si le axa 16]

Ele be srɔ̃ŋutsuwo naɖo aɖaŋu na wo srɔ̃wo le tufafa me ahabu nyawo ŋu nyuie hafi agblɔ